Skip to content
އެސްފިޔަ

ލޯބި 2 ވަނަ ބައި

ރޭގަނޑު ނުވައެއް ޖަހަން ކައިރިވީއިރު އަހަރެމެން ތިބީ މިއުޒިކް ޝޯވ ބަލަން ދާން ތައްޔާރުވެގެންނެވެ. އެއީ ރާއްޖޭގެ މަޝްހޫރު ބައެއް ލަވަކިޔުންތެރިންނާއި މާލޭގެ ނަށާގުރޫޕެއް ގެނެސްގެން ބާއްވާ ޢީދުގެ ހާއްސަ ޝޯވ އެކެވެ. ޝޯވ އޮތީ ރަށުގެ ބަދަރުމަތީގައި އެކަމަށް ތައްޔާރުކުރެވިފައި ބޮޑު ސްޓޭޖެއްގައެވެ. އަހަރެމެންނަށް އެތަނަށް ދެވުނުއިރު އެންމެ ފުރަތަމަ ލަވަ ފެށިގެން ކުރިއަށް ދަނީއެވެ. ކުޅިބަލާ މީހުންތައް ގިނަކަމުން ސްޓޭޖް ހުރި ހިސާބަށް ކައިރިވެވެން ވެސް ނެތެވެ.

“ދެން ވެސް ރީތިކޮށް ފެންނާނީ ތަންކޮޅެއް ދުރުގަ ތިބީމަ.”

ނަތާގެ ބަހަށް އަހަރެމެން ފަހަތަށް ޖެހެން ފެށީމެވެ. އަދި ތަންކޮޅެއް މީހުން މަދު ދިމާއެއްގައި ގޮސް ހުއްޓުނީމެވެ.

“އަދިކިރިޔާ ސާފު ވައިކޮޅެއް ވެސް ލިބޭވަރު މިވީ” ފުން ނޭވާއެއް ދޫކޮށްލަމުން އަހަރެން ވަށައިގެން ހޯދާ ބަލައިލީމެވެ. ވަކި މަޤުޞަދެއް އޮވެގެންނެއް ނޫނެވެ. އެކަމަކު ހަވީރު ފެނުނު ޒުވާނާ އަހަންނާ ވަރަށް ގާތުގައި ހުރިތަން ފެނުމުން ހަތަރެސްފައި ފިނިވެ، ނޭވާ އަވަސްވިއެވެ. ކީއްވެ ކަމެއް ނޭނގެއެވެ. ހަމަ އެވަގުތު އޭނާ އަށް ވެސް އަހަރެން ފެނުނެވެ. އެކަމަކު އޭނާ ތެޅިގަތީ ހާސްވެގެން އުޅޭ މީހަކު ފަދައިންނެވެ. ހަވީރު އެ ބެލުމުގައި ހުރި ޝައުޤުވެރިކަމެއް މިފަހަރަކު ނެތެވެ. ގިނަ އިރުތަކެއް ނުވެ ސަބަބު އަހަންނަށް ވިސްނުނެވެ. އޭނާއާ ނުހަނު ގާތުގައި ހުރީ އޭނާގެ އަންހެނުން ނުވަތަ ލޯބިވެރިޔާއެވެ. އެ އަންހެން ކުއްޖާ އިރުއިރު ކޮޅުން އޭނާގެ އަތުގައި އޮޅުލައިގަނެއެވެ. އަދި ކަންފަތް ކައިރީގައި ސިއްރުން ކޮންމެ ވެސް އެއްޗެކޭ ބުނެލައެވެ. އެހެންކަމުން އަހަރެން ގަސްތުކުރީ އެ ދިމާއަށް ނުބެލުމަށެވެ. އެކަމަކު މިއުޒިކްގެ އަޑު ގަދަވެ، ކޮންމެ ލަވައެއްގެ އެންމެ ފޯރިގަދަވާ ވަގުތު އޭނާ ހުންނަނީ އަހަންނާ ދިމާއަށް ބަލަންކަން ފާހަގަ ކުރެވުމުން އަހަންނަށް ވެސް އެކަމަށް އިޖާބަދެވުނެވެ. ހަތަރުކަޅި ބައްދަލުވާ ކޮންމެ ވަގުތަކު ހިނިތުންވެވެން ފެށިއެވެ.

އެއީ ރީތި ޒުވާނެކެވެ. އާންމުކޮށް ފެންނަ ދިވެހި ފިރިހެނުންނަށް ވުރެ ހަމުގެ ކުލަ އަލިވެފައި، އިސްކޮޅުން ދިގެވެ. ކުރުކޮށް ކޮށާފައިވާ ތުނބުޅީގެ ސަބަބުން ފިރިހެން ވަންތަކަން އިތުރުކޮށްދެއެވެ. ހީނލާއިރު އެހުންނަ ހިތްގައިމު ގޮތަކުން އަހަރެންގެ ހިތަށް ކޮންމެވެސް ކަހަލަ އާދަޔާހިލާފު އަސަރެއް ކުރަމުން ދިޔައެވެ. ބުނެދޭކަށް ނޭނގެއެވެ. ބޭއިޚުތިޔާރުގައި ވެސް އެމޫނަށް ބެލެނީއެވެ. އެއީ ކާކު ހެއްޔެވެ؟ އޭނާގެ މަޤުޞަދަކީ ކޮބާ ހެއްޔެވެ؟ އަހަރެން ލައިގެން ހުރި ހެދުމަށް މަލާމާތް ކުރަނީ ހެއްޔެވެ؟ ނޫނެކެވެ. އެއީ މަލާމާތުގެ ބެލުމެއް ނޫނެވެ. ދެން ކީއްވެ ހެއްޔެވެ؟ އެއީ ރަނގަޅު މީހެއް ނަމަ ކައިރީގައި އަންހެނުން ބަހައްޓައިގެން އެގޮތަށް ހިލޭ އަންހެނަކާ ދިމާއަކަށް ނުބަލާނެއެވެ. އަހަރެންގެ ހިތަށް ފޫހިކަން ވެރިވިއެވެ. އެކަމަކު އެއީ ހިނދުކޮޅެއްގެ ކަމެކެވެ. އަނެއްކާ ވެސް ހިނިތުންވުންތައް ބަދަލުކުރަން ފެށީމެވެ. ގާތްގަނޑަކަށް ހަތަރުގަޑިއިރަށް ދެމިގެންދިޔަ ޝޯވ ނިމުނުއިރު ވެސް އަހަރެންގެ ދެފައި ވާޅެއްނުވެއެވެ. ވަރުބައްޔެއް ނުވެއެވެ. އަދިވެސް އެތަނުގައި ހުރެވޭނެނަމައޭ ހިތަށް އަރަމުން ދިޔައެވެ.

އެރޭ ނިދަން އޮށޯތުމުން ވެސް އަހަންނަކަށް ނުނިދުނެވެ. އެ ނުދަންނަ ޒުވާނާގެ ހިޔާލުތައް އަހަންނަށް އުނދަގޫ ކުރަނީއެވެ. އެއީ މީގެކުރިން ދުވަހަކު ވެސް ނުވާގޮތެކެވެ. ލޯމަރާލާއިރަށް ފެނަންނަނީ އޭނާގެ ރީތި މޫނުވެ. އެ ހިނިތުންވުމެވެ.

އެގޮތުގައި އެރޭ ފާއިތުވެގެން ދިޔައީއެވެ. ހެނދުނު އަހަންނަށް ހޭލެވުނީ ތަންކޮޅެއް ލަހުންނެވެ. ތިންވަނަ ޢީދު ދުވަހުގެ މެންދުރު ކުރީގައި އެއްވެސް ކުޅިވަރެއް ނެތެވެ. އެހެންކަމުން އަހަރެން ދިޔައީ މުނާމެންގެ ގެއާ މާދުރު ނޫން ހިސާބެއްގައި އޮތް ފެންގަނޑެއްގެ ކައިރިއަށެވެ. އެއީ މަދުން ނޫނީ ރާއްޖޭގެ އެއްވެސް ރަށަކުން ނުފެންނާނެހާ ހިތްގައިމު ކުޅިއެކެވެ. ކުޅީގެ ފެންގަނޑާއި، ކުޅިއާ ގުޅިފައިވާ ސަރަހައްދު ފެނުމުން ސިފަކުރެވެނީ ރީތި ތަސްވީރެކެވެ. ކުޅީގެ ވަށައިގެން ހެދިފައިވާ ފެހިކަންގަދަ ދިގު ވިނަތައް އަހަރެންގެ އުނަގަނޑުން މައްޗަށް އަރައެވެ. ވިނަގަނޑުތެރޭގައި މީހުން ހިނގަން އޮތް ހަނިމަގަކުން ގޮސް އަހަރެން ފެންގަނޑު ކައިރީގައި ހުއްޓުނީމެވެ. ފެންގަނޑުގެ އަނެއް ފަރާތުން ފެންނަނީ ބޮޑު ރުއްދަނޑެކެވެ. އެއީ ކިތަންމެ ގިނައިރު ބަލަން ހުއްޓަސް ބަލާފޫހިނުވާނެ މަންޒަރެކެވެ. މަޑުމަޑު ރޯޅިތަކާއެކު ފެންގަނޑަށް އަންނަ ލޮޅުންތަކާއި، ކުދިކުދި ދޫނިތައް އުދުހިފައި އުޅޭގޮތުން އަހަރެންގެ ހިތަށް ފިނިކަން ލިބެއެވެ.

“މިހާރު ހޯދާ ހޯދާ ވަރުބަލިވެއްޖެ! ކިހިނެއް އެނގޭނީ އެކަނި މިތަނަށް އަންނާނެ ކަމެއް؟” ނަތާގެ އަޑަށް އަހަރެން ސިހުނެވެ. އޭނާ ކައިރީގައި ނުބުނެ އައުމުން ހުރީ ކަންބޮޑުވެފައެވެ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.

Comments (7)

  1. No one

    Thakkolheh kuryyy…. Dhn faharakun dhigukolachey vaahaka

  2. go

    Mih vaahaka varah varah hadih….

  3. Neel malik

    Vaahaka goaheh noon. Ekam rangalhu kollan jehey thunkolhu tha ebahuritha. But ok vaane. Mistakes ves jeheyne. ey ehves kame noon

  4. ill

    Shiff Dhatha haadha habare nuvey now. I really want to no the real name of you. Can I. Please. Vaahaka salhi. Beynun vanee vaahaka ge 3 part aa shiff Dhatha ge full name aa

  5. shiff

    Haha…thanks for commenting..tommorror next part…

  6. shiff

    ?❤alhugadhu real name adih igeaneh

  7. Miuthou

    Very nice sorty ???

Comments are closed.