މާފްކުރާށޭ ކަލާ 16

ނުހާ މާކިންއަށް ބަލަން އޮތީ ތެދުވަން ވެސް ނޭނގިފައެވެ. މާކިންވެސް ހަމަ އެފަދައެވެ. ނުހާގެ އަތުގައި ހިފަން ދިއް ކޮށްލި އަތް ނަގަންވެސް ނޭނގިފައި މާކިންއަށް ހުރެވުނީ ނުހާއާ ދިމާއަށް ބަލާށެވެ. މާޒީގެ ސޮފްހާތަކަށް ސިކުނޑި ދަތުރު ކުރަމުން ދިޔައީ އެސްފިޔަ ޖަހާލިހާ އަވަހަށެވެ. އެވައުދުތަކެވެ. އެލޯބިން ފުރިގެންވާ ފިރުމުންތަކެވެ. އެކުގައި އެއް ހަށިގަނޑަކަށް ވެގެން ހޭދަކުރިހާ ވަގުތުތަކެވެ. ކޮންފަދަ ލޯބިވެތި ހިތްގައިމު ދުވަސްތަކެއް ހެއްޔެވެ؟

“މަށެއް ބޭނުމެއްނޫން މި ބުރައެއް އުފުއްލާާކަށް. ޅައުމުރުގައި ގައިދުވެގެން ކަލޭގެ ދަރިން ބަލަން އިންނާކަށް. އަދި ކަލެއާ އިންނާކަށްވެސް. އަން. މި އޮތީ ކަލޭ މަށާއެކު ކުރި ފާފައިގެ ނިޝާން. މިކަހަލަ ފާފައެއް ގޮވައިގެން މަށަކަށް ނޫޅެވޭނެ.” ނުހާގެ ވިހަގަދަ ލަފްޒުތައް އަދިވެސް މާކިންގެ ހިތުގެ އެންމެ ފުން މިނުގައި ހަރުލާފައިވާ ކަހަލައެވެ.

“ނުހާ.” އޮފީހަށް ވަދެގެން އައިސް އައިސް ހުރި އާސިފްއަށް ވެއްޓިފައި އޮތް ނުހާ ފެނުމާއެކު ދުއްވައިގަނެވުނެވެ.
“ކިހިނެއްވީތަ ވެއްޓުނީ.” އާސިފް ލޯތްބާއެކު ނުހާ ނަގައި ގަޔާ ކައިރިކޮށްލިތަން ބަލަން މާާކިން ހުރީ އަނގަ ހުޅުވައިގެން ބުނާނެ އެއްޗެއް ނޭނގިފައެވެ. އާސިފް ގެ ގައިގައި ނުހާ ލައްކޮށްލައިގެން އޭނަގެ ކެބިންއާ ދިމާއަށް ހިނގައިގަތް އިރުވެސް މާކިން ހަމަ އެހުރި ދެފިޔަވަޅު މަތީގައި ހުރެވުނީ އެސްފިޔަ ޖަހާލަންވެސް ހަނދާން ނެތިފައެވެ. ނުހާ ލޯމަތިން ގެއްލުމުން މާކިން ދެލޯ މަރާލީ ހިތަށް ކުރަމުން ދިޔަ ފުން އަސަރުތަކުގެ ސަބަބުންނެވެ.

މަޑު ހިނގުމެއްގައި ގޮސް މިއަދު މާކިން އަށް ހަމަޖައްސާފައިވާ ކެބިންގެ ތެރެއަށް ވަނެވެ. ދެންމެއަކާއި ޖެހެންދެން އޭނާ ހުރީ އުފަލުންނެވެ. ރަނގަޅު ވަޒީފާއެއް ލިބި ހުރިހާ ކަމެއް ހަމަޖެހުނީމައެވެ. ނަމަވެސް ތަޤުދީރު އޭނައާއި ކުރި ސަމާސާ ނިކަން ދެކިބަލާށެވެ. އެތަކެއް އަހަރު ތަކަކަށްފަހު އެހަނދާންތައް މާާކިންގެ ސިކުނޑި ވަށާލީއެވެ. އެހަނދާންތަކަށް ފަސްއަޅާ ބައްދާފައި ވަނިކޮށް އަލުން އެފަސްތައް ވިއްސިވިހާލިވެގެން ގޮސް މާކިންގެ ކުރިމައްޗަށް އެޅުނީއެވެ.
ސިކުނޑި އަށް ކުރަމުން ދިޔަ ބާރުން މާކިން އަށް މޭޒުގަައި ބޯއަޅާލެވުނެވެ. ދެލޮލުން ހިފެހެއްޓުމެއްނެތި ފައިބަމުން ދިޔަ ކަރުނަތައް ކޯތާފަތް މައްޗަށް އޮހެމުން ދިޔައިރުވެސް މާކިން އޮތީއެވެ.

“މާކިން.” އަޔާާން ދޮރުހުޅުވާލާފައި މާކިންގެ ކެބިންއަށް ވަނީ މާާކިން އެގޮތަށް މޭޒުގައި ބޯއަޅައިގެން އޮއްވައެވެ.
“އޯ. ވަޓް ހެޕެންޑް ބަލީތަ؟” މާކިން އެގޮތަށް އޮއްވާ ފެނުމުން އަޔާން ހުރީ ހުއްޓުން އަރާފައެވެ.
މާކިން އަވަސް އަވަހަށް ދެލޯ ފޮހެލަމުން އިސްއުފުލާލިއެވެ.

“ވިސްނާލަނީ އަޔާން މެންގެ ހެޔޮ ކަމާ ދޭތެރޭގައި.” މާކިން އަށް އޭނާގެ ހިތުގެ ހާލަތު އަޔާންގެ ކުރިމަތީގައި ހާމައެއް ނުކުރުވުނެވެ.
“ނޫނޭ. ޔޫ ޑިޒާވް ދިސް ޖޮބް.” އަޔާން ހާމަކުރީ ހަޤީޤަތެވެ. ކިތަންމެ ގާތް މީހެއް ނަމަވެސް ވަޒީފާ ދޭނީ އެމީހެއްގެ ފެންވަރުންނެވެ. އެއީ އަޔާން ޤަބޫލުކުރާގޮތެވެ.

މާކިން އަޔާން އާ ދިމާއަށް ބަލަހައްޓައިގެން ހުރީ އަޔާން އަށް ޝުކުރުއަދާ ކުރާ ފަދަ ގޮތަކަށެވެ.
“ނުހާ އަކީ ކާކު؟” މާކިންގެ ސުވާލުން އަޔާން ދިޔައީ ސިއްސައިގެންނެވެ.
“މާކިން އަށް ނުހާ އެނގޭތަ؟” ލިބުނު ހައިރާންކަމުގައި އަޔާންއަށް ވެސް ކޮށްލެވުނީ ސުވާލެކެވެ.
“ނޭނގެ. އެކަމަކު ދެންމެ އަޔާންގެ ބައްޕަ ގޮވީ އެނަމުން. ހީވަނީ އެއީ އަޔާންގެ ބައްޕަގެ ދަރިއެއްހެން އެހެންވެ އަހާލީ.” މާކިން ދޮގުހަދަމުން ދިޔައީ ހިތުގައި އަތް އަޅައިގެން ހުރެއެވެ. ހަޤީޤަތް ހާމަކުރާނެ ހިތްވަރު މާކިންގެ ގައިގައި ނެތް ކަހަލައެވެ.
“އެއީ މައި ޑޭޑްގެ ވައިފް.” އަޔާން ބުނެ ދޫކޮށްލި ޖުމްލައިން މާކިން ހުރީ ބުނާނެ އެއްޗެއް ނޭނގި ކޮސްވެފައެވެ.
“ޤަބޫލުކުރަން އުނދަގޫ ދޯ.” އަޔާން ދޫކޮށްލީ ފުންނޭވާއެކެވެ. މާކިން ބޯ ޖަހާލިއެވެ. އެންމެ ވަގުތު ކޮޅަކުވެސް ދެން އޭނާ މިއޮފީހުގައި މަސައްކަތް ކުރަން ބޭނުމެއްނުވެއެވެ. ނަމަވެސް ވިސްނަންޖެހޭ ކުޑަކުޑަ ދަރިއެއް އެބަހުއްޓެވެ. އަޅާލާނެ އިތުރު މީހެއް ނެތް މަންމައެއް އެބަހުއްޓެވެ. އަޔާން ތެދުވެގެން ދިޔައިރުވެސް މާކިންއަށް ރޭކާވެސްނުލައެވެ. އަމިއްލަ ޚިޔާލީ ދުނިޔެއަށް ގެއްލިފައި މާކިންއަށް އިދެވުނީއެވެ.

“ދަނީތަ؟” އަތްދަބަސް ނަގައި ކޮނޑުގައި އަޅުވާލަމުން ތެދުވެ ހިނގައިގަތް ނުހާގެ އަތުގައި އާސިފް ހިފެހެއްޓިއެވެ. ނުހާ އެއްވެސް އެއްޗެއް ނުބުނެ ހުރިގޮތަށް ހުރީއެވެ. ފަހަތަށް އެނބުރި ބަލާވެސް ނުލައެވެ.
“ނުހާ. ކިހިނެއްވެގެންތަ ތިއުޅެނީ. މިހާރަކަށް އައިސް މާ ހިތްހަމަ ނުޖެހިފަ އަބަދު ހުންނަތަން ފެންނަނީ.” އާސިފް ނުހާގެ ދެކޮނޑުގައި ހިފާ މަޑުމަޑުން އަނބުރާލިއެވެ.

“ހިތްހަމަ ޖެހިފައޭ މިހުރީ.” ނުހާގެ އަނގައިން ކޮންމެ އެއްޗެއް ބުންޏަސް ދެލޯ ހެކިދެނީ ނުހާ ދެރަވެ ހާސްވެފައި ހުރި ކަމެވެ. ވާނީވެސް އެހެން ނޫން ހެއްޔެވެ؟ އަޔާންގެ ކަންތައްތަކާއި ނުހާ ބޯ ގޮއްވަނިކޮށް އަނެއްކާ ނުހާ ވިސްނަން ޖެހޭ އިތުރު ކަމެއް ލައިގަތީއެވެ. އެދުވަސްތައް އެއީ މިހާރު ނުހާގެ ހަނދާނުން ފޮހެވިފައިވާ ދުވަސްތަކެކެވެ. ނަމަވެސް ހުރިހާ އެއްޗަކީ ތަޤުދީރެވެ.
“ހިނގާ ކާރު ބުރެއް ޖަހާލަންދާން. ދެން ރަނގަޅު ތަނަކަށް ގޮސް ކާލައިގެން ގެޔަށް ދާނީ.” އާސިފް ނުހާގެ ދަތްދޮޅީގައި ހިފާ އުފުލާލިއެވެ.
“ހޫމް.” ނުހާގެ ޖަވާބު ކުރެވެ. ކިތަންމެ ދާހިތް ނުވިޔަސް ނުހާއަށް ޖެހޭނީ ދާށެވެ. ފިރިމީހާއާ ދެކޮޅުވެ ރުޅިދައްކައިގެން ނުހާ ބޭނުންވާ އެއްވެސް ކަމެއް ނުވާނެކަން އެނގޭތީއެވެ.

އޮފީސް ނުނިމިގެން ކެތް މަދުވެފައި ތިބި އެންމެންތައް ތިބީ ގެޔަށް ދާ ގަޑި ނުޖެހިގެން ކަހަލައެވެ. ހިނި ހަރަކުން ހިނިތައް ނިކުންނަ ފަދައިން އެންމެންތައް އޮފީހުން ނިކުންނަން ތެޅިފޮޅެނީއެވެ.

“ގެޔަށް ގެންގޮސްދެންތަ؟” އޮފީސް ދޮރުމަތީގައި ދަބަހަށް ލޯ ކޮށްޕައިގެން ހުރި މީތަން ސިއްސުވާލީ މާކިންގެ އަޑެވެ.
“ނޫން.” ފަރުވާކުޑަ ގޮތަކަށް ޖަވާބު ދެމުން އަނެއްކާވެސް މީތަން އޭނާގެ ދަބަސް ހާވަންފެށިއެވެ.
“އެއް ގެޔަކަށްނު ދަނީ. އެހެންވެ އަހާލީ.” މީތަންގެ ފަރުވާކުޑަ ޖަވާާބުުން މާކިން ގެ ހިތުގައި ޖެހުނެވެ.
އަޔާން ސައިކަލްގައި އެތަނަށް އައިސް މަޑުކޮއްލީ އެވަގުތުއެވެ.

“ކޮބާ. އާދޭ ދާން.” އަޔާން ހިނިތުންވެލިއެވެ. އަޔާންގެ ވާހަކަ ރަނގަޅަށް ނުނިމެނީސް މީތަން ސައިކަލަށް އަރާ އަޔާން ގެ ކޮނޑުގައި ދަތް ދޮޅި ޖައްސާލިއެވެ.

“ތިގެޔަށޭ މިދަނީ މާކިން. އާދޭ އެއްކޮށްދާން.” އަޔާން މީތަންގެ އަތްތިލައިގައި ލޯބިން ހިފާލީ މާކިންއަށް ބަލަހައްޓައިގެން ހުރެއެވެ.
“ތޭންކްސް. އެކަމަކު އަދި ގެޔަކަށް ނޫން މިދަނީ.” މާާކިން ދޮގު ހެދީ އަނެއްކާވެސް އޭނަ އަށް މަޖުބޫރުވެގެންނެވެ. މާލެ އައިސް އެންމެ ފުރަތަމަ މީތަން ފެނުނު ދުވަހުން ފެށިގެން މާކިންގެ ހިތުގައިވަނީ މީތަންގެ ސޫރަ ކުރެހިފައެވެ. ނަމަވެސް މީތަންއަކީ އަޔާންގެ މީހެއްކަން މާކިންއަށް މިހާރު އެގެއެވެ. އެމީހުންނާ އެއްކޮށް ދަމުން އެމީހުން ޖަހާހާ ސަކަރާތް ބަލާނެ ހިތްވަރެއް މިއަދު މާކިންގެ ގައިގައި ނެތެވެ.
އާސިފްއާ ނުހާވެސް އެވަގުތު އޮފީހުން ނިކުތެވެ.

“ދަރިފުޅު ހިނގާ ފިނި އެއްޗެއް ބޯލަންދާން މީތަން ގޮވައިގެން.” އާސިފް އަޔާންގެ ކައިރިއަށް އައިސް މަޑުކޮށްލިއެވެ. ނުހާ ހީވަނީ މީތަންގެ ދެލޯ ކޮނެގެން ނަގަން އުޅުނު ހެންނެވެ. މީތަންއާ ދިމާއަށް ނުހާ ބަލަމުން ގެންދިޔައީ އެހާވެސް ރުޅިވެރިކަމާއެކުގައެވެ.
“ނޯ ޑޭޑް. ދެންމެ ހަމަ މެންދުރު ކެއީމި.” އަޔާން ހީލަމުން ސައިކަލް ދުއްވާލިއެވެ.

“މާާކިން. ހައުޒް ޔުއަރ ޑޭ.” އާސިފް މާކިންގެ ކޮނޑުގައި މަޑުމަޑުން ޖަހާލަމުން ހީލިއެވެ.

“ގުޑް. ދަނީ އިނގޭ.” މާކިން ވާހަކަ ދެއްކީ އިސްޖަހައިގެން ހުރެއެވެ. ނުހާ އާ ދިމާއަށް ދެން ދުވަހަކުވެސް ނުބަލަން ހިތުގައި އަޒުމް ކަނޑައަޅައިގެން ހުރިކަހަލައެވެ.

މާކިން ފަަސްދީ ދާން ފެށުމުން ނުހާ މާކިންއަށް ބަލާލިއެވެ.

“މިއެއްޗަކަށް ފާވަން ވެސް އެނގުނީ ހަމަ މިތަނަށް ވިއްޔަ.” ހިތުން މާކިންއަށް ކުދި ކިޔަމުން ނުހާ ކާރަށް އެރިއެވެ.

ހަވީރުގެ ހިތްގައިމު ވަގުތެވެ. ފަޒާގައި ވަނީ ތެތް ފިނި ކަމެކެވެ. ހީވަނީ ހަމަ ދެންމެ ދެންމެ ވިއްސާރަ އޮއްސާލަފާނެހެންނެވެ. ގޭގެ ދޮރުމަތީގައި ޕާކް ކޮށްފައި ހުރި އޭނަގެ ސައިކަލް މަތީގައި ފާލިހް އިންނަތާ ގަޑިއިރެއް ވެއްޖެއެވެ. އިރުއިރުކޮޅާއި މަގުގެ ދެކޮޅަށް ބަލާލާލަ އިން ފާލިހް އެ އިންތިޒާރު ކުރަނީ ޒާރާ އަށެވެ.
“ކާކުގެ އިންތިޒާރުގަ.” އަޔާންއާ މީތަން ސައިކަލްގައި މަޑު ކޮށްލިކަން ފާލިހްއަށް ރޭކާލީވެސް އަޔާންގެ އަޑު ކަންފަތުގައި ޖެހުމުންނެވެ.
ފާލިހްއަށް ހިނިތުންވެލެވުނީވެސް ވަރަށް އުނދަގުލުންނެވެ. އަޔާންއަކަށް ފާލިހްގެ ފިކުރު ބޮޑުވެފައިވާ މޫނު ފާހަގަވާކަށް މާއިރުތަކެއް ނުނެގިއެވެ.
“ދޭބަލަ މަލަކާ ކައިރިއަށް ގޮސްލާފަ އަންނަން. މަ މަޑު ކުރާނަން މިތާ ފާާލިހްގެ ކައިރީގަ.” އަޔާން ބޭނުންވީ މީތަން އެތަނުން ފޮނުވާލައި ފާލިހްއާ އެކަނި ވާހަކަދައްކާށެވެ. މީތަން ގޭތެރެއަށް ވަނުމުން އަޔާން ސައިކަލް ޕާކް ކޮށްލުމަށްފަހު ފާލިހްއާ ދިމާއަށް އެނބުރުނެވެ
“ސިއްރު ނުކުރައްޗޭ. ކޮންމެވެސް ކަމެއްވެފަ ތިހުރީ.” އަޔާން ފާލިހްގެ ކޮނޑުގައި އަތް ބާއްވާލުމުން ފާލިހްގެ ކެތްތެރިކަން ކޮޅުން ލިއެވެ. ހިތުގައި ފޮރުވައިގެން ހުރި ހުރިހާ ވާހަކަތަކެއް ދުލާއި ހަމައަށް އައިއްސިއެވެ. ފާލިހް ހުރިހާ ވާހަކަތަކެއް ކިޔާދިން އިރު އަޔާން ދިޔައީ ވިސްނަމުންނެވެ. ދެން ކަންތައް ވާނެ ގޮތަކާއި ދޭތެރޭގައެވެ.
“އައި ޗީޓެޑް ހާ.” ފާލިހް ހުރީ މަލަކާއަށް ބޭވަފާތެރި ވެވުނީތީ އިންތިހާއަށް ދެރަވެފައެވެ.
“އަޔާން. އައި ސުވެއަރ. ގަސްތުގަ ނޫން އެހެން ވީކީ އެއް.” ފާލިހްގެ ފެންކަޅިވެފައިވާ ދެލޮލުން ކަރުނަ އޮހިގަތެވެ.
“ޒާރާ ބުނީ ކީކޭ.” އަޔާން ބޭނުންވީ އެންމެ ފުރަތަމަ ޒާރާ ބުނީ ކީކޭތޯ ބަލާށެވެ.
“ރޭގެ އެހާދިސާ އަށްފަހު ނުދެކެން ލޮލުންވެސް. ހަވީރު ކޮލެޖް ނިމިގެން އަންނާނެ. އެހެންވެ މިތާގަ މިއިނީ. ޝަހާދަތް މިބުނީ މިކަމާ ހުރެ ބޯ ގޮވައިފި.” ފާލިހް ދެއަތުން ބޮލުގައި ހިފަހައްޓާލިއެވެ.

“ދެން ކިހިނެއް ހަދަންވީ އަހަރެން.” މީތަން މަލަކާގެ ކޮޓަރި ތެރޭގައި ހުރެގެން އުފަލުން ނަށަނީއެވެ. އަޔާން މީތަންގެ ކައިވެންޏަށް އެދުމުންނެވެ.
“ދެން އާއެކޭ ބުނެބަލަ އަވަހަށް.” މަލަކާވެސް ހުރީ މީތަންއަށް ޓަކައި ވަރަށް އުފާވެފައެވެ.
“ބުނެފިން މަންމައާ ވާހަކަ ދައްކާނީއޭ. މަންމަމެންގެ ރުހުންވެސް ހޯދަން ވާނެއެއްނު.” މަލަކާ މީތަންގެ ވާހަކައަށް ތާއީދު ކުރަމުން ބޯޖަހާލިއެވެ. މައިންބަފައިންގެ ރުހުމާއި ލޯބި އެއީ ކިހާ މުހިންމު އެއްޗެއްކަން އެނގޭނީ އެންމެ ރަނގަޅަށް މަލަކާއަށެވެ. މާޒީގެ އެހިތްދަތި ހަނދާންތައް ކުޑަ ހިނދުކޮޅަކަށް ނަމަވެސް އަނެއްކާވެސް މަލަކާގެ ލޯ މައްޗަށް ސިފަވެގެން ދިޔައެވެ.

“ކޮން ކަމަކާތަ ތިވިސްނަނީ.” އަޔާން އެއްވެސް އެއްޗެއް ނުބުނެ ހިމޭނުން ހުންނަތަން ފެނިފައި ފާލިހް އަޔާންގެ އަތުގައި ހިފައި ތަޅުވައިގަތެވެ.
“ތިކަމާ އޭ މިވިސްނަނީ. ފުރަތަމަ ފާލިހް ޒާރާ އާ ވާހަކަ ދައްކަބަލަ. އޭނަގެ ވިސްނުން ހުރިގޮތް ބަލާފަ އެނގޭނީ އިތުރު ޚިޔާާލެއް ދޭން. އަދި މަލަކާާއަށް ނާންގާތި.” އަޔާން ފާލިހްއަށް ހިތްވަރުދިނެވެ. އެތައް ވާހަކައެއް ދައްކާ ފާާލިހްގެ ބޮލަށް ލުއި ކޮށްދެވޭތޯ މަސައްކަތް ކުރިއެވެ. އަޔާން އާ ދިމާއަށް ހިނިތުންވެފައި ބަލާލި ކަމުގައިވިޔަސް އަދިވެސް ފާލިހް ގެ ހިތަށް ހަމަޖެހުމެއް ނުލިބެއެވެ. މީތަން އާއި މަލަކާ ގޭގެ ދޮރާށި ހުޅުވާލާފައި ނިކުތުމުން ފާލިހްއާ އަޔާން އަށް ޖެހުނީ އެމީހުން ދައްކަމުން ގެންދިޔަ ވާހަކަ މެދުކަނޑާލާށެވެ.
“މަލަކާ ކިހިނެއް؟” އަޔާން ހިނިތުންވެލިއެވެ.

“ރަނގަޅޭ. ތެދެއް ގޮށް ޖަހަން ތަ ތިއުޅެނީ. ނުމޮހޭ ހާ ބާރަށް ޖަހާތި.” އަބަދުވެސް އާދަކާދައިގެ މަތިން މަލަކާ އަޔާންއާ ދިމާކުރަމުން ހީނގަތެވެ.

“ކިތަންމެ ބާރު ކުރިއަސް މޮހެން ހުރި އެއްޗެއް މޮހޭނެ.” އަޔާންވެސް މަލަކާގެ ހުނުމުގައި ބައިވެރިވަމުން ހީލިއެވެ. މީތަން ސައިކަލަށް އެރުމުން އަޔާން ފާލިހްއަށް ލޮލުގެ އިޝާރާތުން ހާސްނުވުމަށް އަންގާލަމުން ސައިކަލް ދުއްވާލިއެވެ.
“ބޭބީ. ހާދަ ފާޑަކަށޭ ތިހުންނަނީ. ބަލީތަ؟” މަލަކާ ފާލިހްގެ ފުރަގަހުން އައިސް ބައްދާލިއެވެ. ބޮލުގެ އިޝާރާތުން ނޫނެކޭ ބުނަމުން ފާލިހް މަލަކާގެ ކޮލުގައި ތުންފަތް ޖައްސާލިއެވެ.

ވިލިގިލީގެ ގަސް ބޯ ޖަންގަލީގައި ޝަރީފާ ހިނގަމުންދެއެވެ. ހީވާ ގޮތުން އޭނާ ކޮންމެވެސް އެއްޗެއް ހޯދަނީއެވެ. އިރުއިރުކޮޅާ ދެފަރާތަކަށް ބޯހޫރާލައެވެ. އެންމެ ފަހުން އޭނާ ހިނގައިގަތީ އެ ގަސް ބޯ ޖަންގަލި ތެރެއިން ނިކުންނާށެވެ. މުޅި މީހާ ދާހިއްލާ ފޯވެފައިވާއިރު އުޑުމަތީގައި ގިނަވަމުން ދިޔަ ބޯ ރަތްވިލާ ތަކުން އިރުއޮއްސެނީކަން އިއުލާން ކުރަމުންދާއިރުވެސް ޝަރީފާ އެކަމަކަށް ފަރުވާލެއް ބަހައްޓާހެން ހިއެއްނުވެއެވެ.

މަގުގެ ދެފަރާތަށް ނަޒަރު ހިންގަމުން ޝަރީފާ ގޮސް ވަނީ އެޅިގަލުން ރާނައި އެތެރޭގައި ފިލާ ޖަހާފައިވާ ކުޑަކުޑަ ގެޔަކަށެވެ. އެގޭތެރޭގައި އެއްވެސް އަލިކަމެއް ނެތެވެ. ތަރުފާލު އަޅާފައިވާ ބޮޑު އަށި މަތީގައި ހުސް ތެއްޔެއް ހުއްޓެވެ. އަދި އެތެލި ކައިރީގައި އެކި ކަހަލަ މާމެލާ މެލި ހުއްޓެވެ.

“ކޮބާ ލިބުނުތަ؟ އެތެރޭގައި ފޮތި ދަމާފައި ހުރި ދޮރެއްގެ ފޮތި ގަނޑު ހިއްލާލަމުން ނިކުތް މުސްކުޅި އަންހެނެއްގެ އަޑުން ޝަރީފާ ދިޔައީ ސިއްސައިގެންނެވެ.

“ނުލިބުނު.” ޝަރީފާ އިސްޖަހާލީ މާޔޫސްވެފައި ހުރެގެންނެވެ.

“ކަލެއަކަށް ނުވާނެ އެއްކަމެއްވެސް.” އެމުސްކުޅި އަންހެނާ ކޮރު ޖަހަމުން ގޮސް ބޮޑު އަށިމަތީގައި އިށީނެވެ.

ފާލިހްގެ އަތްމަތީގައި ނިދިފައި އޮތް މަލަކާގެ މައުސޫމު މޫނަށް ފާލިހް ބަލާލަމުން ދެލޯ މަރާލިއެވެ. ހިތުގައި ސިއްރުކޮށްފައިވާ ސިއްރުތައް ބޮލު ތެރޭގައި އެނބުރޭތީއެވެ.

މަޑުމަޑުން މަލަކާގެ ބޯދަށުން އަތް ދަމަައިގަންނަމުން ފާލިހް ތެދުވެ ކޮޓަރިން ބޭރަށް ނިކުންނަން ހިނގައިގަތެވެ. ފާލިހްއަށް ކޮޓަރިން ނިކުމެވުނީ ޒާރާގެ ކުރިމައްޗަށެވެ. ފާލިހްއަށް ވަގުތުން އިސްޖަހާލެވުނެވެ. މުޅި ތަނަށް ވެރިވެފައިވަނީ އާދަޔާ ޚިލާފް ހަމަހިމޭން ކަމެކެވެ.
ދެމީހުން އެއްވެސް ވާހަކައެއް ނުދައްކާ އިސްޖަހައިގެން ތިބީ ކުއްވެރިންތަކެއް ފަދައިންނެވެ.
“ޒާރާ. އަހަންނަށް މާފް ކުރޭ.” ތަނަށް ވެރިވެފައިވާ ހަމަހިމޭންކަން ފޫދުއްވާލީ ފާލިހްގެ މޮޅިވެރި އަޑެވެ. ފެންކަޅިވެފައިވާ ދެލޮލުން ފާލިހް ޒާރާއަށް ބަލާލިއެވެ. އެވަގުތު ޒާރާގެ މޫނުމަތީގައިވާ ހިނިތުންވުން ފެނިފައި ފާލިހްއަށް ލިބުނީ ޝޮކެކެވެ.
“ވަރަށް ހައިރާންވެއްޖެ ދޯ އަހަރެން ރުޅ ިނައިމަ. އެއީ ހަމައެކަނި ފާލިހްގެ ކުށެއް ނޫން. އަހަރެންގެ ވެސް ކުށް.” ޒާރާ ރީއްޗަށް ވާހަކަ ދައްކަން ފެށުމުން ފާލިހްގެ ހިތަށް ކުޑަ ނަމަވެސް ހަމަ ޖެހުމެއްލިބިގެން ދިޔައެވެ.
“އެހެންވީމަ މާފު ކޮށްފިންދޯ.” ފުރަތަމަ ފަހަރަށް ޒާރާގެ މޫނަށް ބަލާލަމުން ފާލިހް ހިނިތުންވެލިއެވެ. ޒާރާ ބޯޖަހާލިއެވެ.
“އެކަމަކު މަގޭ އެބައޮތް ޝަރުތެއް.” ޒާރާ އަށް ފަސްދީފައި ހިނގައިގަންނަން އުޅުނު ފާލިހުގެ އަތުގައި ޒާރާ ހިފެހެއްޓިއެވެ.
ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.