“ހިތް” ލޭ ކޮށެވިފައި……09

ޑިއުޓީއަށް ދިޔައެއް ކަމަކު ކައިލާންގެ ސަމާލުކަން ޖަޒްލީއަށް ފިޔަވައި އިތުރު ކަމަކަށް ނުދެވެއެވެ. ރޭގަނޑުގެ އަދިރިކަން ދުނިޔެމައްޗަށް ވެރިވެފައި ވާއިރު ޖަޒްލީހުރީ ބޮތްކެއް, ހޮޅިބުރިއެއްގެ އަލިކަމެއްވެސް ވާ ތަނެއްގައި ބާވައެވެ. ޖަޒްލީހުރި ހާލެއް ހިތަށް އަރާފައި ކައިލާންގެ ހަޑިގަނޑުގައި އާދަޔާއި ޚިލާފަށް ވިންދުވެސް އަަވަސް ވެފައިވާ ކަހަލައެވެ. ޖަޒްލީ ނުފެންނަނީހެން އެ ހިތަކަށް ހަމަ ޖެހުމެއް ނުލިބޭނެއެވެ. ހާލެއްގައި ޖެހުނަސް އެހީއަކަށް އެދެން ޖަޒްލީ އުޅޭނެ ޙާލު ހިތަށް އަރާފައި ކައިލާންގެ ހިތަށް ނުތަނަވަސްކަން ވެރިވަމުން ދިޔައެވެ. ކައިލާން ހުއްޓައި އެހެން މީހެއްގެ ހިޔާވަހި ކަމުގެ ދަށަށް ޖަޒްލީ ދިޔުމަކީ އޭނާ މުޅި މި ދުނިޔެއިންވެސް ދެކެން ބޭނުންވާ އެންމެ ފަހު މަންޒަރެވެ. މުޅި އުމުރަަށްވެސް ޖަޒްލީގެ ހިމާޔަތުގައި ވުމަށް އޭނާ ވަޢުދު ނުވޭ ހެއްޔެވެ؟ވީއިރު މިއަދު އެ އަޅާލުމާއި އޯގާތެރިކަން ދިނުމަށް ނުކުޅެދިފައިވީތީ ކައިލާންގެ ހިތުގައި ވޭން އަޅަމުން ދިޔައެވެ.

********

ފާތުން އޭނައާއިއެކު ޖަޒްލީ އޭނާގެ ގެއަށް ގެންދިޔައީ ޖަޒްލީއަށް ދާނެ ތަނެއް ލިބެންދެން މާލޭގެ ހަލަބޮލި މަގުމައްޗަށް އެކަނިހާލަށް ދޫކޮށްލަން އޭނާގެ ހިތަށް ކެތް ނުވީމައެވެ.

ހެންވޭރު ކޮޅުގައި ހުރި އެގޭގެ ދޮރާށިން އެތެރެއަށް ވަތް ޖަޒްލީއަށް ވަށައިގެންވާ މާޙައުލަށް ނަޒަރު ހިންގާލެވުނެވެ. މާތަނަވަސް ނޫން މެދު ފަންތީގެ ގެއެކެވެ. ގޭ ދޮރުމަތީގައިހުރި ބޮޑު އަނބު ގަހުން ފިނިފިނި ވައިރޯޅި ވަމުން ދިޔައެވެ. އެވަގުތު އަނބުގަހުގެ ގޮފި ގަނޑެއްގައި އެލުވާލާފައި ހުރި އުނދޯލި ހެއްލާލަ ހެއްލާލަ ވަރުގެ ކޮޅަށް ދުފާލައިގެން އިން މެދުއުމުރުގެ އަންހެން މީހާ ޖަޒްލީގެ ލޮލުގައި އަޅައިގަތެވެ.

“އަހާ… ދަރިފުޅު ތި އައީތަ؟މަންމަ މި އިންނަނީ ދަރިފުޅު މިރޭ އަންނަ ވާހަކަ ބުނީމަ ދަރިފުޅުގެ އިންތިޒާރުގެ….. “އެމީހާގެ ވާހަކައިން ޖަޒްލީއަށް އެއީ ފާތުންގެ މަންމަކަން އެނގުމުން އޭނާ ފާތުންގެ މަންމައަށް މަޑުމަޑު ހިނިތުންވުމެއް ހަދިޔާ ކޮށްލިއެވެ. އެވަގުތު ފާތުން ޖަޒްލީ ދައްކާލުމަށްފަހު މިއީ އަހަރެންގެ ރައްޓެއްސެކޭ ބުނެލިއެވެ. ފާތުންގެ މަންމަ ފުޅާ ހިނިތުން ވުމަކާއިއެކު ޖަޒްލީއާއި ސަލާމް ކޮށްލިއެވެ.

*******

“‘ދަރިފުޅާ…. ކައިލާންއާއި ދެކުދިން އެއްވެސް މައްސަލައެއް ޖެހިގެންތަ ތި އުޅެނީ…..”ޖަމީލާ އެތައް އިރަކު ނިދޭތޯ އެނދުގައި ފުރޮޅި ފުރޮޅިވެސް ނިދޭގޮތް ނުވުމުން ތެދުވެގެން އައިސް ސިޓިންގރޫމަށް ނިކުތްއިރު ރިޝްފާގެ ކޮޓަރި ދިއްލާފައި ހުރުމުން އެތެރެއަަށް ވަދެ ‘ސިޑްނީ ޝެލްޑަން’ގެ ވާހަކަ ފޮތެއް ހިފައިގެން އޮތް ރިޝްފާގެ ގާތުގައި އިށީންނަމުން ބޮލުގައި ފިރުމާލުމަށްފަހު އަހާލިއެވެ.

ވާހަކައަށް ގެއްލިފައި އޮތް ރިޝްފާ ކުއްލިއަކަށް ހުއްޓުން އަރާގޮތް ވިއެވެ. އަދި ކިޔަމުން ދިޔަ ޞަފްޙާގެ ކަން ފަށްކޮށްލުމަށްފަހު ފޮތް ލައްޕާލާފައި މަންމައަށް ބަލައިލީ އިވުނު އެއްޗެއް ގަބޫލު ނުކުރެވުމުންނެވެ. މަންމަ އެސުވާލު ކުރީތީ ލިބުނު ހައިރާން ކަމެއްގެ ބޮޑު ކަމުންވެސް މެއެވެ. ޖަމީލާ އަނެއްކާވެސް އެސުވާލު ތަކުރާރު ކޮށްލުމަށްފަހު އެހެން އެބުނީ މިއަދު އެގެއަށް ދިޔައިރު ކައިލާންގެ ފަރާތުން ފާހަގަވި ދުރުކަމެއްގެ ސަބަބުން ކަމަށް ބުންޏެވެ.

“ނޫން މަންމާ…. ތީ މަންމައަށް ހީވި ގޮތަކަށްވާނީ… އޮފީހުގަ މިދުވަސްކޮޅު ތަންކޮޅެއް ބިޒީކޮށް އުޅޭތީ ކައިލާން ހުންނަނީ ވަރުބަލިވެ, ތަންކޮޅެއް ބަސް މަދުވެފަ…. އެހެންވެ މަންމައަށް އެހެން ތިހީވާނީ”މަންމަގެ ވާހަކައިން މަންމަ ހާސްވެ ފިކުރުބޮޑު ވެފައިވާ ވަރު ހިތަށް އަރައި ރިޝްފާ ވާހަކައެއް ހަދާލާ މަންމަ ހަމަޔަކަށް އެޅުވުމުގައި ކާމިޔާބު ހޯދިއެވެ. ނަމަވެސް އޭނާގެ އަމިއްލަ ހިތަށް ޝިފާއެއް ލިބޭނެ ގޮތެއް ނެތެވެ. ކައިލާންއާއި ދޭތެރޭ އޭނާގެ ހިތުގައި އުފެދިފައިވާ ޝައްކު ދުވަހެއް ދުވަހަކަށް ދަނީ ޔަޤީނާ ގާތް ވަމުންނެވެ. ދަތުރުގޮސް އައި ފަހުންވެސް އޭނާ ކައިލާންއަށް ވަރަށް ގުޅައިފިއެވެ. ނަމަވެސް އެތައް ފަހަރަކު ކޯލް ބިޒީ ކުރުމަށްފަހު ޖަވާބު ދިން ފަހަރުވެސް ވަރަށް ބިޒީއޭ ކިޔާފައި ފޯނު ކަނޑާލީއެވެ. އިރު އޮއްސިގެން ދިޔައިރުވެސް ކައިލާންއަށް އޭނާއަށް ގުޅާނުލެވުނުތާ, މެސެޖެއްހާ ވަރުވެސް ކޮށްނުލިއެވެ. ކައިވެނިކުރާ ދުވަސް ނުތަންވަޅު ވެގެން އަންނަ ވަރަކަށް ކައިލާންއާއި ރިޝްފާގެ ގުޅުންދަނީ ހީނަރު ވަމުންނެވެ. އެކަމަކުވެސް ފަރުވާލެއް ނެތެވެ. މިދިގު އިންތިޒާރުވެސް ނިމޭކަށް މާގިނަ ދުވަހެއް ނެތޭ ރިޝްފާ ހިތާއިހިތުން ކިޔާލިއެވެ. ކައިލާންގެ އަތްބަކަށް ވުމަށްޓަކައި ކެތްތެރިކަމާއިއެކު އޭނާ އެ އަންނަނީ އިންތިޒާރު ކުުރަމުންނެވެ.

*******

ނިދާތަން ދައްކާފައި ފާތުން ދިޔުމުން ޖަޒްލީ ފާޚާނައަށްވަދެ ވުޟޫކޮށްލައިގެން ނިކުމެ ފާތުންގެ މުޞައްލަ ނަގައިގެން ނަމާދުކޮށްލިއެވެ. އަދި މާތްﷲ އަށް ހިތާއި ނިޔަތް ޚާލިސް ކުރާ ޙާލު އޭނާއަށް ރަނގަޅު ގޮތެއް މެދުވެރިކޮަށް ދެއްވުމަށާއި, ދިމާވާ އެންމެހާ މުސީބާތްތަކުން ސަލާމަތްވުމުގެ މަގު ދެއްކެވުން އެދި ދުޢާކުރިއެވެ.

***

“އެކަހަލަ ކުއްޖެއްކަން އެނގުނު ނަމަ އަހަރެން ގަބޫނު ނުވެސް ވީމުސް މިގޭގަ ބަހައްޓާކަށް….. ދެން އޭނަ ދާނެ ތަނެއް ނެތިއްޔޭ ކިޔާފަ ކިހިނެތްތަ މުޅި އުމުރު މިތާ ބެހެއްޓޭނީ….. ” ހަމީދާ ހިތްހަމަ ނުޖެހިފައި ބުނެލިއެވެ.

“ދެން މަންމާ….. ހެޔޮނުވާނެ ތިކަހަލަ ވާހަކަ ނުދައްކާ… ޖަޒްލީއަށް އަޑު އިވިއްޖިއްޔާ ކިހާ ދެރަވާނެ….. އޭނައަށް ގޮތެއް ފެންނަންދެން ބަހައްޓާދީ….. ޕްލީޒް މަންމާ…. އަހަންނަށްޓަކާ…. “ފާތުން ވަރަށް އާދޭހާއިއެކު އޭނާ މަންމަގާތު ބުންޏެވެ.

ނަމާދުކޮށްލައިގެން ނިދި ނައިސްގެން ނިކުތް ޖަޒްލީ އަތުގެ ނުފުށުން ލޮލަށް ޖަމާވި ކަރުނަތައް ފޮހެލީ އެދެމައިންގެ ވާހަކަ އޭނާއަަށް އިއްތިފާގަކުން ނަމަވެސް އިވުނު ކަމަށްޓަކައި މާތްﷲ އަަށް ޝުކުރުވެރިވާ ޙާލުގައެވެ. ފާތުން ކަހަލަ އޯގާތެރިއަކާއި ދިމާނުވިނަމަ އޭނާ އަދިވެސް ހުންނަން ޖެހުނީހީ އެ ރިސޯޓުގައި ތާށިވެފައެވެ. ވީމާ ފާތުންގެ އިހުސާންތެރި ކަމުގެ ބަދަލު ދެވޭނެ ހަމައެކަނި ގޮތަކީ ފާތުންނަށް އޭނާގެ ފަރާތުން އިތުރު ތަކުލީފެއް ނުޖައްސާ އެގެއިން ދިޔުމެވެ. އެހެންވެ އެދެމައިންގެ ވާހަކަތައް އިތުރަށް އަޑުއެހުމެއްނެތި ފަސްދީފައި ޖަޒްލީ އެގެއިން ނިކުމެގެން ދިޔައީ ސާފު ހިތަކާއިއެކު ފާތުންނަށް ހެޔޮގޮތްތައް މިންވަރު ކޮށްދެއްވުން އެދި މާތްﷲ އަަށް ދުޢާ ކުރާ ޙާލުގައެވެ.

*********

“ބުނީމެއްނު ކަލޭ ކައިރީ ދެން މިނަމްބަރަަށް ގުޅައިގެން ނުވާނޭ….. ޖަޒްލީ މިގެއިން ދިޔުމުގަ އަހަރެންގެ އަތެއްވާކަން އަހަރެންގެ އާއިލާއަށް އެނގިއްޖިއްޔާ މަމީ ނުބައި މީހެއްކަން ކަލެއަށް ދައްކާލާނަން…. ކަލޭ ބުނިވަރަށް ފައިސާ…………………. ”

“މަންމާ!!!! ފޯނުން ރުޅިވެރިކަމާއިއެކު ވާހަކަ ދައްކަމުން ދިޔަ ސަކީނާގެ ދުލުގެ ހަރަކާތް މަޑުޖެހުނީ ރުހާންގެ އަޑު އޭނާގެ ކަންފަތުގައި ޖެހުމުންނެވެ. އެއަޑު ސިކުނޑިއަށް ނަގައިގަނެވުމާއިއެކު އޭނާއަށް ފަސް އެނބުރި ބަލައިލެވުނެވެ. އިސާހިތަކު ގަތްފައިހުރި ބިރާއިއެކު އޭނާގެ މޫނުމަތިން ދާތިކިތައް ފައުޅުވާން ފެށިއެވެ. ހައިރާންވެ އަންތަރީސްވެފައި ހުރި ރުހާން އައިސް މަންމަ ކުރިމައްޗަށް އަރައި ހުއްޓުނުއިރު ހީވަނީ މީގެކުރިން ނުވެސް ދަންނަ މީހަކާ ދިމާއަށް ބަލަހައްޓައިގެން ހުރި ހެންނެވެ. އޭނާ ހުރީ އަމިއްލަ ކަންފަތަށް އިވުނު އަޑަށް އިތުބާރު ކުރަންވެސް ޖެހިލުންވެފައެވެ.

“ހާސް ނުވޭ… އަހަރެންގެ ފަރާތުން އެއްވެސް ނުރައްކަލެއް ކުރިމައްޗެއް ނުވާނެ. އަދި ފަސްހާސް އިތުރުކޮށްލަދީ… އެވަރުން އަހަރެންގެ ދޫ ބަންދުވާނެ… އެހެން ނޫނީ….. “ރުހާން މަންމައަތުގައި އޮތް ފޯނު އަތުލައި އޭނާގެ ކަންފަތުގައި ޖައްސާލިއިރުވެސް ސަކީނާހުރީ ހަރަކާތް ހުއްޓިފައި ފާޑަކަށް ގަނޑުވެފައެވެ. އެކޮޅުން ވާހަކަ ދައްކަމުން އެދިޔަ މީހާގެ ވާހަކަ ތަކުން ރުހާންއަށް އޭނާގެ މަންމަގެ ރަޙުމު ކުޑަކަން އެނގިގެން ދިޔައެވެ.

“ހަލޯ…. ހަލޯ…. ހަލޯ…. “ސަކީނާ އެއްޗެކޭ ނުބުނުމުން އެކޮޅުން ހަލޯ ގޮވަމުންދިޔައެވެ. ރުހާންއަށް އައި ރުޅީގައި ކަންފަތުގައި ޖައްސައިގެންހުރި ފޯނު އަތުކޮޅަށް ހޫރާލެވުނެވެ. ބިރުންގޮސް މޭގަނޑު ތެޅެމުންދިޔަ ސަކީނާއަށް އޭނާގެ ދެތަންވެފައިވާ ފޯނާއި ފޯނުގެ ބެޓެރިއަަށް ބަލަހައްޓައިގެން ހުރެވުނީއެވެ.

“އަހަންނަށް އިނގޭ މަންމަގެ ހިތުގަ ޖަޒްލީއަށް ރަހުމުގެ ކުނޑި ފުކެއްވެސް ނެތްކަން….. އެކަމަކު މީގެ ކުރިންވެސް މަންމަ ހިތްހަމަ ޖެހޭވަރަަށް އޭނައަށް އެއްޗިހި ގޮވާލާފަ ފުއްދާލައިގެން ހުންނަނީނު… ދެން ކީއްވެ މިފަހަރު ތިހިސާބަށް ކަންތައް ގެންދަން ޖެހުނީ…. ”

ރުހާން ދަތްކުނޑި ވިކައިގެން ހުރެ ވާހަކަ ދެއްކިއެވެ. “ދަ ދަރިފުޅާ… މަންމަ ޖަޒްލީއަކަށް……. ”

“އަހަރެން ބޭނުމެއް ނޫން މަންމަގެ އެއްވެސް ބަހަނާއެއް… އަހަރެން މިއަހަނީ ޖަޒްލީއަށް މަންމަ ކިހިނެތްހޭ ހެދީ…. ޖަޒްލީ ވީ ކޮންތާކުހޭ…. މަންމައަށް އިނގޭތަ ވާހަކަ ނުދެއްކޭ ކުއްޖަކަަށް މަންމަ ހާދަހާ އިހާނެތިކޮށްކަން ތި ކަންތައްކުރީ…. އަހަރެންގެ އަތުން ފައިން ގޯހެއް ނުހެދެނީސް ޖަޒްލީ ވީތަން ބުނޭ… އެހެންނޫނީ އަހަރެން ހަނދާން ނައްތާލާނަން ތީ އަހަރެންގެ މަންމަކަން… “ސަކީނާގެ ތުރުތުރު އަޅަމުންދިޔަ އަޑު މެދުކަނޑާލާފައި ރުހާން ވާހަކަ ދެއްކިއިރު ރުޅިއައިސް ރަތްވެގެންގޮސް އޭނާގެ އަޑުވެސްވަނީ ކުރިއަށްވުރެ ބާރު ވެފައެވެ.

********

ދާނެ ވަކި މިސްރާބެއް ނެތި މާލޭގެ އެއްގޯޅިން އަނެއް ގޯޅިއަށް އަޅަމުންދިޔަ ޖަޒްލީގެ ފައި ބިރުންގޮސް ބިންމަތީގައި ރަނގަޅަށް ހަރުވެސް ނުލައެވެ. އޭރު ގަޑިން ވީވަރެއްވެސް ނޭނގެއެވެ. އޭނާ ފާތުންމެން ގެއިން އައި އިރުވެސް ހުންނާނީ ދިހައެއް ޖަހާ ބޮޑުވެފައެވެ. ޖަޒްލީގެ ހިތަށް އައިހާ ހެޔޮ އެއްޗެއް ކިޔަމުން ދިޔައެވެ. އޭނާއަށް މަޖީދީމަގު ފިޔަވާ މާލޭގެ މަގުތަކުތައް ރަނގަޅަށް ނުވެސް އިނގެއެވެ.މަޖީދީ މަގަށް ނިކުމެވޭތޯވެސް ހިނގާ ހިނގާ ޖަޒްލީ ވަރުބަލި ވެއްޖެއެވެ.

“ބަލާބަލަ މިއޮއް ކަމެއް… ތިހާ ރީތި ކުދިން އެކަނިމައި އެކަނި މިކަހަލަ ހަނި ގޯޅިތަކަށް ވަންނާކަަށް ނުވާނެ…. ހިނގާ އަހަރެމެން އެގޮއްޔެ ނުގެއްލެނީސް ގެއަށް ލާދޭން ދާން… “ހިނގަމުން ހިނގަމުން ގޮސް ވަދެވުނު ގޯޅިއަކުން ނުބައި ގުރޫޕެއް ޖަޒްލީގެ ފަހަތުން އަޅުވާލިއެވެ. ޖަޒްލީ އޭނާގެ ފަޔަށް ލެވުނުހާ ބާރެއް ލާފައި އެ މަގުން ނިކުތުމަށް ދުއްވައިގަތެވެ. އެމީހުންވެސް ބާރު ހިނގުމެއްގައި ޖަޒްލީގެ ފަހަތުން އަޅުވާލިއެވެ. ފާޑުފާޑުގެ ލޯބީގެ ލަވަތައް ކިޔަމުން ނުބައި ފާޑަކަށް ހިނިގަނޑު ގަނޑު ޖަހަމުންނެވެ. ދަންވަމުންދާތީ ފިހާރަތައްވެސްވަނީ ބަންދު ކޮށްފައެވެ. ދުއްވާ އެއްޗިއްސާއި, މަގުމަތީގައި ހިނގާބިނގާވެ އުޅޭ މީހުންވެސް މަދުކަން ފާހަގަ ކުރެވެއެވެ. އެހީއަކަށް އެދެންކެރޭ ކަހަލަ މީހަކުވެސް މަގެއް މަތިން ފެންނާކަށް ނެތެވެ. އެވެސް ޖަޒްލީގެ ބަދުނަސީބު ކަމުން ކަންނޭގެއެވެ. ދެވޭ ނުދެވޭ ތަނެއް ނޭނގި ދުވަމުން ދިޔަ ޖަޒްލީގެ ލޮލުން ހޯސްލާފައި ކަރުނަ ފައިބަމުން ދިޔައެވެ. ވަރަށް ހިތްވަރު ކޮށްފައިގޮސް ކަނާތުން ފުރަތަމަ ޖެހުނު ގޯޅިއަށް އެޅިތަނާ އެ މަގުން އައި ސައިކަލެއްގައި ޖެހި ޖަޒްލީ ވިއްސައިގެން ދިޔައެވެ. ކައިލާން އަވަހަށް ތެދުވެ ދުވެފައި ގޮސް އޭނާގެ ސައިކަލުންޖެހި އަނިޔާވެފައިވާ އަންހެން ކުއްޖާގެ މޫނުމައްޗަށް އެޅިފައިވާ އިސްތަށިތައް ނަގައި ބަލާލިއިރު އޭނާގެ ދުނިޔެ ނިމުމަކަށް އައި ކަހަލައެވެ.

*****ނުނިމޭ******