ހުޅުކޮޅު 34

ޒިވާ އާއި ރިފާވެސް އެދެމެދުގައި އޮތް ދުރުކަން ކަނޑުވާލުމަށްފަހު އެކުވެރިންނަށް ވެއްޖެއެވެ. އެކި ވާހަކަ ތަކުގައި އެމީހުން މަސްއޫލުވެފައި ތިބި އިރު އެހެން ކަމަކަށް އެއްވެސް ސަމާލުކަމެއް ނެތެވެ. ވާހަކަ ތަކަށް ގެއްލިފައި ތިބި މީހުންނަށް ސިހުން ގެނުވީ ގޭގެ ދޮރު ހުޅުވުނު އަޑަށެވެ.

ގޭގެ ދޮރު ތަޅުލައިފައި އެނބުރިލި ރައިފާއަށް މަޑުޖެހިލެވުނީ ސިޓިން ރޫމުގައި ތިބި އެންމެންގެ ލޯތައް އޭނާއާއި އަމާޒުވެފައި ހުރުމުންނެވެ. ރައިފާގެ މިސްރާބު އެހެން ކަމުން އެދިމާލަށް ޖެހިއެވެ. ނަމަވެސް އެތާ އެތިބި މީހުން ފެނި އޭނާގެ ހިތުގެ ހިނގުންވެސް އިރުކޮޅަކަށް މަޑުޖެހިލި ފަދައެވެ. ކުރިމަތީގައި އެތިބީ އެއްގޮތަކަށްވެސް ފެންނާނެ ކަމަށް އޭނާ އުންމީދުކޮށްގެން ތިބި ބައެއް ނޫނެވެ. “ލިމްޔާ.. ލަމާން..” ރައިފާއަށް ހިތާހިތުން ކިޔާލެވުނެވެ.

އެތަނަށް އައިސް ހުއްޓިލީ ރައިފާއަށް ޒިވާ ހިނިތުންވެލި ނަމަވެސް އެކަން އިނގެނީ ޒިވާގެ ކުޑަ ވެފައިވާ ދެލޮލުންނެވެ. ލަމާން އާއި ލިމްޔާ ޒިވާމެންނާއި ދިމާލަށް ބަލައިލީ އެއީ ކާކުކަން އެނގެން ބޭނުންވީ ފަދައަކުންނެވެ. “މިއީ އަރޫފާ.. ރައްޓެއްސެއް.. އަރޫފާ މިއީ ލަމާން އާއި ލިމްޔާ.. ސްކޫލް ދައުރުގެ އަހަރެމެން ދެމީހުންގެވެސް ރައްޓެހިން.. ދެން އެއީ ރިފާ.. ލަމާންގެ ވައިފް..” ޒިވާ ރައިފާއަށް ލަމާން މެން ތަޢާރަފް ކޮށްދިނެވެ. އެކަން އޭނާ ނުކުރި ކަމުގައި ވީ ނަމަވެސް ރައިފާއަށް އެއީ ކޮން ބައެއްކަން ހަމަ ރަނގަޅަށްވެސް އިނގޭނެއެވެ. އެމީހުންނަށް އައިސްފައި ހުރި ބަދަލުން ރައިފާގެ ހައިރާންކަން އިތުރުވިއެވެ. ނަމަވެސް ލިމްޔާ އާއި ލަމާންގެ ކުރިމަތީގައި ހުންނަންވުމުން އޭނާއަށް ތަފާތު އުނދަގޫ ވަމުން ދިޔައެވެ. އެހެން ކަމުން އިރުކޮޅަކު ހުރުމަށްފަހު އޭނާ ކޮޓަރިއާއި ދިމާލަށް މިސްރާބު ޖެހިއެވެ.

ކޮޓަރިއަށް ވަތް ގޮތަށް ދޮރު ތަޅުލުމަށްފަހު އެނދާއި ދިމާލަށް ރައިފާ އައެވެ. އެއަށްފަހު ކޮނޑުގައި އަޅުވާފައި އޮތް ދަބަސް ނަގާ ހޫރާލިއެވެ. “އަހަރެންގެ ފަހަތުން އެންމެން މިއުޅެނީ ކީއްވެތަ؟ ހުރިހާ އުނދަގުލެއް މަށަށް ޖެހެނީ ކީއްވެތަ؟ އެންމެ ހިނދުކޮޅަކަށްވެސް ހަމަ ނޭވަ ނުލެވެޔޭ.. މީ ހުސް ހަމަ އެ ޒިވާ އާ ހެދި ވާ ކަންތައް.. އެކަމަކު އަދިވެސް ނާއިޝްވެސް ބުނާނެ މަ ކައިރީ މިކަން ހުއްތާލާށޭ ޒިވާގެ ކޮން ކުށެއްހޭ އޮތީ.. އެންމެންނަށްވެސް ގޯސް ވާނީ އަހަރެން.. އެކަމަކު މިފަހަރު އަހަރެން އެކަކުގެވެސް އަޑެއް ނާހާނަން.. ޒިވާ.. އަހަރެން ކުރިންވެސް ބުނީމެއްނު އަދި އަންނާނަމޭ.. ހެހެ.. މިހާރު މިހުރީ އައިސް.. ދެން މާ ގިނަ ދުވަހެއް ނެތް އަހަރެންގެ ބަދަލު ފުރިހަމަ ކުރާކަށް..” ވިހަ ހިނިތުންވުމަކާއެކު ރައިފާ އަމިއްލަ އަމިއްލައަށް ވާހަކަ ދައްކަމުން ދިޔައެވެ.

“ރައިފާ އަށް އިނގޭތަ ރައިފާއަށް ހަމަޖެހުމެއް ނުލިބިގެން އުޅޭ ސަބަބު؟ ރައިފާ ގެ ތި އުޅުމާ ހުރެ މި ހިތަށް ހަމަ ޖެހުމެއް ނުލިބެނީ.. ރައިފާ އެއްފަހަރުވެސް ވިސްނާލީންތަ ތިމާގެ އުޅުމާ މެދު.. ކުރެވުނު ކަންކަމާމެދު ވިސްނާލަން ކުޑަ ވަގުތު ކޮޅެއް ނަމަވެސް ހޭދަކޮށްލިންތަ؟ ނުކުރޭ.. ދީނާއި ދުރުވީ ވަރަކަށް މި ހިތުގެ ހަމަޖެހުން ދާނީ ގެއްލެމުން.. ﷲ މަތިން ހަނދުމަ ނުކުރިހާ ހިނދަކު މި ހިތަކަށް ހަމެޖެހުމެއް ނެތް..” ރައިފާއަށް ހުރި ގޮތަށް ހުރެވުނީއެވެ. އޭނާގެ ހިތް ބުނަނީ އެހެންނެވެ. ނަމަވެސް އޭނާ މިފަހަރުވެސް ދެކޮޅަށް ބޯ ހުރުވާލީ އެކަހަލަ ޚިޔާލު ކުރާކަށް ބޭނުމެއް ނޫނޭ ބުނާ ފަދައަކުންނެވެ.

“ހެލޯ.. ހޫމް.. ނެތޭ މިހާރު މަ އަތަކު އެޔެއް.. އާނ.. އެކޮޅުގަ ހުންނާނީ.. މަ ނުގެންނަން މާލެ އައި އިރަކު.. އެކަމު ވަރަށް އަވަހަށް އަހަރެން އެކޮޅަށް ދާން ކަމަށް މި އުޅެނީ.. އޭރަށް ފޮނުވޭތޯ ބަލާނަން..” ރައިފާ އަށް އެ ގުޅީ އޭނާ ކުރާ ވިޔަފާރީގެ ‘ކަސްޓަމަރެކެވެ’. ރައިފާ އެމީހާއާއި ވާހަކަ ދައްކާލީ ހިތްހަމަ ޖެހިލައިގެން ހުރެއެވެ. ދެން ވާނެ ގޮތަކާމެދު އޭނާ ކުޑަކޮށްވެސް ވިސްނާނުލައެވެ.

ޔައީޝް އާއި ޒިވާ ލަމާންމެންނާއި އެތަކެއް ވާހަކަތަކެއް ޙިއްސާ ކުރަމުން ދިޔައެވެ. އެ ދެމެދުގައި ވީ ދުރުކަން މިހާރު އެތައް ހާސް މޭލެއް ކައިރި ވެއްޖެއެވެ. އެންމެންވެސް ދިޔައީ އުފާވެރި ވަގުތުތައް ގުނަމުންނެވެ. ސައި ބުއިމަށްޓަކައި ކާމޭޒުކައިރިއަށް ފަސް މީހުން ދިޔައެވެ. ޒިވާ އެންމެންނަށް ސައި އަޅައިދީ ހެދިއެވެ.

“ދެން ދަމާ ދޯ.. ދެން ދުވަހަކުން ޔައީޝްމެން ގެންދާނީ އަހަރެމެން ގެއަށް…” ލަމާން ރިފާ އަށް ބަލައިލަމުން ބުނެލިއެވެ. “ޔައީޝް ވާނެ އިނގޭ ޒިވާ ގޮވައިގެން އަހަރެމެން ގެއަށް ދާން..” ލަމާން ޔައިޝް އަށް ބަލައިލަމުން ހިނިތުން ވެލައިފައި ބުނެލިއެވެ. އެހިނދު ޔައީޝްވެސް ބަދަލުގައި ހިނިތުންވެލަމުން ބޯ ޖަހާލިއެވެ.

ލަމަން މެން ދިއުމުން ޒިވާ އައިސް ސޯފާގައި އިށީނދެލިއެވެ. ޔައީޝްވެސް ގާތުގައި އިށީނދެލިއެވެ. “ޒިވް… މިހާރު ކުޑަކޮށް ލަސްވެއްޖެ ޗުއްޓީ ލިބޭ ދުވަސް.. ޖެނުއަރީ ހިސާބުގަ މިހާރު ލިބެނީ..” ޔައީޝް މާޔޫސް ވެލައިފައި ޒިވާ ގާތު ބުނެލިއެވެ. ޒިވާވެސް ހިނިތުންވެލައިފައި އެއީ މައްސަލައެއް ނޫންކަމަށްބުނެލިއެވެ. “ދެން މިހާރު މި އަހަރު ނިމެނީއޭ.. ވަރަށް އަވަހަށް ޖެނުއަރީ އާއި ހަމަޔަށް ދާނެ.. އެއީ ދެން އެވަރުކަމެއް ނޫނެއްނު.. ބާކީ ހަތަރު މަސް ދުވަސް އޮތީ..” ޒިވާ ޔައީޝް އަށް ބަލައިލަމުން ބުނެލިއެވެ.

އެންމެން އުފަލުގައި އުޅެމުން ދިޔަ އިރު ޒަޔާންވެސް އޭނާގެ މަސައްކަތަށް ކުޑަވެސް ހުރަހެއް އެޅިޔަކަ ނުދެއެވެ. ނަތީއްޖާއަކަށް ވެގެން ދިޔައީ ތަޙުޤީގަށް ދުވަހެއް ދުވަހަކަށް ކުރިއެރުން ލިބެމުން ދިޔުމެވެ.

ދުވަސްތައް އޭގެ ހަލުވި މުނުގައި ފާއިތުވަމުން ގޮސް ޒިވާމެން ބޭރަށް ފުރަން ދާން އޮތް ދުވަސްވެސް ކައިރިވެއްޖެއެވެ. އެމީހުން އެކި ތައްޔާރީތައް ވަމުން ދިޔައީ މަންމަމެން ގާތަށް ދެވޭތީއެވެ. ޒިވާ ހުރީ އެތަށް ދުވަހަކަށްފަހު ލޯބިވާ މަންމައާއި އާއިލާ މީހުންނާއި ބައްދަލުވާތީ ނުހަނު އުފަލުންނެވެ. “ދެން ވަރަށް އަވަހަށް މަންމަމެން ކައިރިއަށް ޒިއްޕުޑިންއަށް ދެވޭނެ.. މާދަން ފުރުން އޮތީ..” ޔައީޝް ޒިވާ ކައިރިއަށް އައިސް ހުއްޓިލަމުން ބުނެލިއެވެ. ޒިވާ ޔައީޝްގެ ގައިގައި ބައްދާލީ އޭނާއަށް ލިބުނު އުފަލެއްގެ ބޮޑުކަމުންނެވެ. މިއަދު ހެނދުނު އިރު އެރީއްސުރެ އުފަލުން އޭނާއަށް އުޅެވޭ ނޫޅެވޭ ގޮތެއްވެސް ނޭނގެއެވެ. ޔައީޝްވެސް ހުރީ ޒިވާގެ މޫނަށް އުފާވެރިކަން ވެރިވެފައި ވުމުން ހިނިތުންވެފައެވެ. “އަރޫފާ ކައިރިވެސް ނުބުނެވެއެއްނު އަދި.. އަންނާނަން ބުނެލައިފަ..” ޒިވާ ޔައިޝް ކައިރިން ދުރަށް ޖެހިލަމުން ހިނިތުންވެލައިފައި ބުނެލިއެވެ. ޔައީޝްވެސް ހިނިތުންވެލަމުން ބޯ ޖަހާލިއެވެ.

ޒިވާ ކޮޓަރިން ނިކުތް އިރު މުޅި ސިޓިން ރޫމު އޮތީ ފަޅަށެވެ. މުޅި ތަނަށް ވެރިވެފައިވަނީ މަރުފަދަ ހިމޭން ކަމެކެވެ. އެހެން ކަމުން ރައިފާ ވާނީ ކޮޓަރީގައި ކަން ޒިވާ ދެނެގަތެވެ. އެ ކޮޓަރީގެ ދޮރު ކުރިމަތީ ހުއްޓިލުމަށްފަހު އޭނާ ދެތިން ފަހަރަކު ޓަކި ޖަހާލިއެވެ. އިރުކޮޅެއް ފަހުން ދޮރު ހުޅުވާލީ ރައިފާއެވެ. އެއިރު އޭނާގެ މޫނު ވަނީ އަޅައިގެން ހުރި ނީޤާބުން ފޮރުވާލައިފައެވެ. ނަމަވެސް ޒިވާ ހުރީ ގޭގައި އަޅާކަހަލަ އާދައިގެ ބުރުގަލެއް އަޅާލައިގެންނެވެ. ޒިވާ ފުޅާ ހިނިތުންވުމެއް ރައިފާއަށް ދިނެވެ.

“އައްދޭ.. ހާދަ އުފާވެފަ ތިހުރީ ކިހިނެއްވީ އަނެއްކާ؟ އާދޭ އެތެރެއަށް..” ރައިފާ އަޑު ހަމަޔަކަށް އަޅުވާލަމުން ބުނެލިއެވެ. ޒިވާވެސް ރައިފާގެ ބުނުމަށް އެ ކޮޓަރިއަށް ވަނެވެ. ކޮޓަރީގެ ހުރިހާ ދިމާލެއްގައިވެސް ވަނީ ސާފުތާހިރު ކަމެވެ. އެހެން ކަމުން ރައިފާއަށް ޒިވާ ހިތާހިތުން އެކަމަށްޓަކައި ތައުރީފް ކޮށްލިއެވެ. “ވަރަށް ބޮޑަށް ސޮރީ އިނގޭ ކުރިން މިވާހަކަ ނުބުނެވުނީމަ.. އެކަމަކު ކަންތައްތައް ހަމަނުޖެހިގެން ހަމަ ނުބުނެވުނީ.. މިއުޅެނީ މާދަން ކެނެޑާއަށް މަންމަމެން ގާތަށް ފުރަން..” ޒިވާ ވާހަކަ ދައްކަން ފެށި އިރު މޫނުމަތީގައި މާޔޫސްކަން ވީ ނަމަވެސް ނިންމާލި އިރު ހުރީ ފުޅާ ހިނިތުންވުމެއް ވެރިކޮށްލައިގެންނެވެ.

ރައިފާއަށް އެ އަޑެ އިވުނީ ހޮނު ގުގުރިއެއް ފަދައިންނެވެ. އޭނާ ޒިވާއަށް ކުރާ ކަމެއް ކުރުމުގެ އެންމެ ފަހުގެ ތައްޔާރީތައް ވަމުން ދަނިކޮށް ޒިވާ އެ ކުރީ ކީއް ހެއްޔެވެ؟ ރައިފާގެ ބޮލަށް އެނބުރުން އަރައިގަތެވެ. “އެހެންތަ؟ ކާމިޔާބު ދަތުރަކަށް އެދެން.. ކޮން ދުވަހަކުން ދެން އަންނަނީ؟” ރައިފާ ހިތާ ދެކޮޅަށް ވާހަކަ ދެއްކިއެވެ. ނަމަވެސް ޒިވާ އަންނާނެ ތާރީޚެއް ބަލަން އޭނާ ހުރީ ޙަޤީގަތުގައިވެސް ބޭނުންވެފައެވެ.

“އެއްމަސް ފަހުން..” ޒިވާގެ ހިނިތުންވުން ފުންވެގެން ދިޔައެވެ. ރައިފާގެ މުނުމަތީގައި ހީވީ މީހަކު އެތިފަހަރަކުން ޖެހި ހެންނެވެ. އޭނާގެ ހުރިހާ ރޭވުމެއް ފެނަށް ވެގެން ދާތަން ދެކޭކަށް އޭނަގެ ހިތަކަށް ކެތެއް ނުވާނެއެވެ. އަނެއްކާ އޭނައަށް އެ ޖެހުނީ ދިގު އިންތިޒާރެއް ކުރާށެވެ. ރައިފާގެ ބޯ ހާސްވިއެވެ. އޭނާއަށް މިވަގުތު ޒިވާއާއި ވާހަކަ ދައްކަންވެސް އުނދަގުލެވެ. ނަމަވެސް އިރުކޮޅަކު ޒިވާއާއި ވާހަކަ ދައްކާލަން އިނީއެވެ. އެއީވެސް ޒިވާއަށް ޝައްކުވެދާނެ ކަމުގެ ބިރަށްޓަކައެވެ. “ފޫހިވަންޏާމު މައި އާ ޔާނީ ކައިރިއަށް ދައްޗޭ..” ޒިވާ ރައިފާގެ އަތުގައި ހިފާލަމުން ބުނެލިއެވެ. ރައިފާވެސް ބޯ ޖަހާލިއެވެ. އަދި ޒިވާ އަވަހަށް އެ ކޮޓަރިން ފޮނުވާލެވޭނެ ކަމަކާއި މެދު ވިސްނަން ފެށިއެވެ.

“ފެން ވަރާލަން މިދަނީ.. ފާޚާނާއަށް ވަންނަން ދަނިކޮށް އައިޝާ ގޮވީމަ އަނބުރާލައިފަ އަނެއްކާ އައީ.. ހެހެ..” ރައިފާ ވާހަކައެއް ހަދާލިއެވެ. ޒިވާވެސް އެހެން ހެއްޔޭ ކިޔައިފަ އިން ތަނުން ތެދުވެލަމުން ދޮރާއި ދިމާލަށް ދިޔައީ އެކޮޓަރިން ނިކުންނާށެވެ.

“ޕްރީތީ.. އަހަރެމެން ދިޔަޔަސް ހަމަ ޕްރީތީއަށް މީރުހާ އެއްޗެހި ހަދައިގެން ކައްކައްޗޭ.. ހަމައެކަނި އަހަރެމެންނަކަށް ނޫނެއްނު ދޯ މީރު އެއްޗެހި ހަދައިދޭން ޖެހޭނީ.. ޕްރީތިވެސް ވާނެ ރަނގަޅަށް ކާން.. މިހާރުވެސް ކާ ހެން.. އަހަރެމެން ދިޔައީމަ ނުކައި ނުހުންނައްޗޭ.. އަރޫފާވެސް ހުންނާނެއްނު ދޯ.. އެކަނި ވަންޏާ އަރޫފާ އާއެކު އުޅޭ އިނގޭ.. ބަދިގޭގަ ރުފިޔާ ބަހައްޓާ ތާނގަ ހުންނާނެ ރުފިޔާ ބަހައްޓައިފަ… އެއްޗެއް ގަންނަން ވެއްޖިއްޔާ އެތަނުން ނަގާ އިނގޭ..” ޒިވާ ހިނިތުން ވެލައިފައި ވާހަކަ ދައްކަމުން ދިޔައީ އެގޭގައި މަސައްކަތް ކުރަން ގެންގުޅޭ އިންޑިއާ ކުއްޖާ އާއެވެ. އޭނާގެ އުމުރުން އަދި ވާނީ ވިހި ވަރަކަށް އަހަރެވެ. ނަމަވެސް ހީވަނީ ސަތާރަ ވަރަކަށް އަހަރުގެ ކުއްޖެއް ހެންނެވެ. އެހާ ހިތްކެވެ. އެހެން ކަމުން އޭނާގެ ސިއްޙަތަށް ފަރުވާތެރިވުމަށްޓަކައި އަބަދުވެސް ޒިވާ އޭނާއަށް ނަސޭޙާތް ދެއެވެ.

މިވީ ކުޑަ ދުވަސްކޮޅު ތެރޭގައިވެސް ޒިވާ އާއި ޕްރިތީ ވަނީ ވަރަށް ބޮޑަށް ރައްޓެހި ވެފައެވެ. ވާނީވެސް އެހެން ނޫންހެއްޔެވެ؟ ޒިވާ އޭނާއާއި ދޭތެރޭ ކަންތައް ކުރަމުން އަންނަނީ އެއްބަނޑު އެއްބަފާ ކޮއްކޮއަކާއި ދޭތެރޭވެސް ކަންކުރާނެ ގޮތަށެވެ. ޕްރީތި އާއި ރައިފާއެއް ތަފާތެއް ނުކުރެއެވެ. ކައްކާއިރުވެސް ޒިވާ ޕްރީތީ ކައިރި ހުރެގެން އޭނާއަށް އެހީތެރިވެދެއެވެ. އެއްވެސް ކަހަލަ ބޮޑާ ކަމެއް ނުބަހައްޓައެވެ. އެހެން ކަމުން ޕްރިތީވެސް ޒިވާ އާއި ދޭތެރޭ ދެކެނީ ދައްތައެއް ފަދައިންނެވެ.

“އޯކޭ ދައްތާ… ކޮން އިރަކުން ދައްތަ އަންނަނީ؟” ދިވެއްސަށް އެންމެ ފަރިތަ ނޫނަސް ޕްރީތީއަށް އިނގުނު މިންވަރަކުން ޒިވާ ގާތު ބުނެލިއެވެ. ޒިވާވެސް ހިނިތުންވެލިއެވެ. އޭނާ އަންނަނީ ޕްރިތީއަށް ދިވެހި ބަސްވެސް ދަސްކޮށްދެމުންނެވެ. ޒިވާ ހިނިތުންވެލައިފައި ޕްރީތީގެ ސުވާލަށް ޖަވާބުދިނެވެ. އެހިނދު ޕްރީތީގެ މޫނަށް ވެރިވި އަސަރު ޒިވާއަށް ވަރަށް ރީތިކޮށް ފެނުނެވެ.

“އަޅޭ.. އެހާ ދެރަ ނުވައްޗޭ.. ވަރަށް އަވަހަށް އަންނާނަމޭ އިރާދަކުރެއްވިއްޔާ.. ޕްރީތީ ކައިރިއަށް ދައްތަ އަންނާނަމޭ.. ދައްތަ މަންމަ ކައިރިއަށް ގޮސްލަންވެގެން މި ދަނި.. ޕްރިތީވެސް ދާނަމެއްނު ދޯ މަންމަ ކައިރިއަށް.. އެގޮތަށް ހަމަ..” ޒިވާ ޕްރީތީގެ ކޮލުގައި ހިފަހައްޓާލަމުން ބުނެލިއެވެ. އެވަގުތު ޕްރީތީ ޒިވާއަށް ރީތި ހިނިތުންވުމެއް ރައްދު ކޮށްލިއެވެ. އަދި ޒިވާވެސް ބަލައިގެން އުޅުމަށް އޭނާ ބުނެލިއެވެ.

އާ ދުވަހަކަށް އިރު އަރައިގެން އައެވެ. ޒިވާ ހީވަނީ ފަޔަށް ހިނި އަރައިގެން އުޅޭ ހެންނެވެ. އެއްތާ މަޑެއް ނުވެއެވެ. “ކަލޭނޭ މަގޭ ޒިއްޕުޑިން ކިހިނެއްވެފަ ހުރި ދުވަހެއްތަ؟ ދޭ އޮށޯވެލަން.. މިހާރު މާ ގިނައިރު ތިހެން ތި  އުޅެނީ.. އިރު އެރީއްސުރެ އެއްތާ ދެފައި ނުޖަހާ ވިއްޔަ..” ޔައީޝް ޒިވާ ގާތު ހުއްޓިލަމުން ބުނެލިއެވެ. އެއިރު ޒިވާ އުޅެނީ މައިހާ އާއެކު ކޮންމެވެސް ފޮށިގަނޑެއް ތައްޔާރު ކުރާށެވެ. މައިހާ އާއި ޒަޔާން އަދި އާޔާނީ އާއި އޭނާގެ ކުޑަ ކުޑަ ޢާއިލާވެސް އެ ދެވުވަހު ޒިވާމެން ގެއަށް އައިސް އުޅުނީ ޒިވާމެންނަށް އެހީތެރިވެދޭށެވެ.

“ހެހެ.. ސްކޫލުގައވެސް ޔައީޝް ޒިވް އާ ދިމާލަށް ކިޔާނީ އެހެން.. ހެހެ..” މައިހާ ސްކޫލުގެ ހަނދާނެއް އާކޮށްލަމުން ބުނެލިއެވެ. އެވަގުތު އެންމެންވެސް ހިނި އައެވެ. “ތެދެއް ޒިވް.. ދެން ދޭބަލަ.. ލީން ގޮވައިގެން ދޭ އެހެން ވިއްޔާ.. އަހަރެމެން މިކަން ކޮށްލަފާނަން.. ޔައީޝް އަށް އިނގޭތަ؟ އަހަރެމެންވެސް އެތަށް އިރެއް ވާންދެން މިހާރު ތިހެން ކިޔައިފީމޭ.. ދެން އަރާމުކޮށްލަން ދާށޭ.. އެކަމަކު މިކުއްޖާގެ ބޯ ހަރުކަމުން ނުދިޔަ ވިއްޔަ..” އަޔާނީ ޒިވާގެ ބޮލުގައި ކުޑަކޮށް ޖަހާލަމުން ބުނެލިއެވެ. އެންމެން ކިޔަން ފެށުމުން ޒިވާ ހަތިޔާރު ބެހެއްޓިއެވެ. އެއަށްފަހު ކޮޓަރިއާއި ދިމާލަށް ހިނގައިގަތެވެ. އަލީނާވެސް ގޮވައިގެންނެވެ. ޒިވާ އެނދުގެ ފަޑީގައި ލައްވެލުމަށްފަހު އަލީނާ އެނދުގައި ބައިންދާލިއެވެ. އަލީނާވެސް ނުހިނގިއެއް ކަމަކު މިހާރު ތަންތާ އިނދެވެއެވެ. އޭނާގެ ޅަ ހަރަކާތްތައް ކުރަން އަލީނާ އިނީ އަޑު ލައްވާލަ ލައްވާލައެވެ. ޒިވާވެސް ހިނިތުން ވެލައިފައި އިރުކޮޅަކާއި އަލީނާ އާއި ލޯބިކޮށްލައެވެ.

އެ ދުވަސް ދިޔައީ އެކަހަލަ ގޮތަކަށެވެ. ރޭގަނޑު އަށެއް ޖަހަނީއެވެ. ޒިވާވެސް ތައްޔާރު ވެލުމަށްފަހު ކޮޓަރިން ނިކުތެވެ. އެއިރު ޔައީޝްވެސް ސިޓިން ރޫމުގައި އިނެވެ. ހަމަ އެއާއެކު މައިހާ އާއި ޒަޔާންގެ އިތުރުން އަދްޔަންވެސް އިނެވެ. އަޔާނީ އަށް ނާދެވުނީ އަލީނާ އެކަނިކޮށްފައި ނާދެވޭނެތީއެވެ. ޕްރީތީ އާއި ރައިފާ އާއި ވެސް ސަލާމް ކޮށްލުމަށްފަހު ޒިވާ އެންމެންނާ އެއްކޮށް ގެއިން ނިކުތެވެ. ނަމަވެސް އޭނާއަށް ފާހަގަ ނުވި ކަމަކީ ރައިފާ އާއި ސަލާމް ކުރި އިރު އެ ދެލޮގައި ވީ ނުރުހުމެވެ.

ފަސް ވަރަކަށް މިނެޓުގެ ދަތުރަކަށް ފަހު އެމީހުން ތިބި ފެރީ ހުޅުލެއާއި ގާތް ކުރިއެވެ. ޔައީޝްގެ އެހީގައި ޒިވާ ފެރީއިން ފެބިއެވެ. އެންމެން އެއާޕޯޓް ތެރެއަށް ވަދެގެން ދިޔައީ އިރުކޮޅަކުން ޒިވާމެންގެ ޗެކިން އޮތީމައެވެ. ޒިވާ އާއި ޔައީޝް އެކުވެރިންނާއި ވަދާޢީ ސަލާމް ކުރިއެވެ. އެއަށްފަހު އެތެރެއަށް ވަދެގެން ދިޔައެވެ.

ޗެކިން ވުމަށްފަހު ޒިވާމެން ތިބީ ފުރާނެ އިރެއްގެ އިންތިޒާރުގައެވެ. ޒިވާ މިހާރު ނުދެވިގެން ހީވަނީ އެހެން ފަދަ ކަމައް ހެންނެވެ. ޔައީޝް ހުރީ ޒިވާ އުޅާ ގޮތުން މަޖާވެފައެވެ. “ހިނގާ އަނބުރާ ގެއަށް ދާން.. މިހާރު ކޮން އިރެއް މިތާ ތިބޭތާ..” ޔައިޝް ޒިވާ ރުޅި އަރުވާލުމުގެ ބޭނުމުގައި ބުނެލިއެވެ. ކަންތައް ވީވެސް އެހެންނެވެ. “އަލަށްތަ ތި ދަތުރެއް ކުރަނީ؟ ހާދަ ކެތްތެރިކަމެއް ނެތޭދޯ.. ނުދާނަން ގެޔަކަށް..” ޒިވާ ލޯ އަލާލަމުން ހަށަން ބަނދެލައިފައި ބުނެލިއެވެ. ޔައިޝްގެ ހިނިގަނޑު ފަޅައިގެން ދާން އުޅުނު ނަމަވެސް ގަދަކަމުން އެތެރެއަށް ހިންދާލިއެވެ. ނަމަވެސް އޭނާއަށް ހުރެވުނީ ހިނިތުންވެފައެވެ. “އަދި އެބަ ހެޔެއްނު..” ޒިވާ އަނެއްކާވެސް ބުނެލިއެވެ. މިފަހަރު ޔައީޝް އަކަށް ކެތެއް ނުކުރެވުނެވެ. ހިފަހައްޓައިގެން ހުރި ހިނިގަނޑު ފަޅައިގެން ދިޔައެވެ.

އޭނާ ޒިވާގެ ކޮނޑަށް އަތް ވައްޓާލިއެވެ. “ހެހެ.. ނޫޅެމޭ ގެޔަށް ދާކަށް.. ދެން ޒިވް ވެސް ދޯ.. ހާދަ އަވަހަކަށޭ ތި ރުޅިވެސް އަންނަނީ.. ރުޅި މޫނު ހަދައިގެން މަންމަ ކުރިމައްޗަށް އެރީމަ ވާނީ ކޯންޗަކަށް؟ އެއިރަށް މަންމަ ހުރިހާ ކަމެއް ޖަހާނީ ޔައި ގެ ބޮލަށް ކަންނޭނގެ..” ޔައީޝް ޒިވާ ގާތު ހިނި އައިސްފައި އިނދެ ބުނެލިއެވެ. ޒިވާވެސް ހަމަ ޖެހިލިއެވެ.

އިރުގަނޑަކަށް ފަހު ޒިވާ އާއި ޔައީޝްވެސް ފުރަން ދާން ޖެހުމުން ތިބިތަނުން ތެދުވެލިއެވެ. އެއަށްފަހު ހިނގައިގަތެވެ.

ބޯޓަށް އަރަން ދިޔައިރު ޒިވާ ހުރީ ޔައީޝްގެ އަތުގައި ހިފާލައިގެންނެވެ. ބޮޑު ބޯޓަށް އެރުމަށްފަހު ޒިވާ އާއި ޔައީޝް އެމީހުންނަށް ޚާއްސަ ކުރެވިފައިވި ސީޓުގައި ހަމަޖެހިލިއެވެ. ޒިވާ ބޭނުން ވެގެން އޭނާ އިނީ ބިއްލޫރި ކުޑަ ދޮރާއި ވީ ފަރާތަށް އިން ސީޓުގައެވެ. އެއީ އޭނާއަށް ބޭރު ފެންނާނީ އެއިރުން ކަމުގައި ވާތީއެވެ. ޔައީޝް ހިނި އައިސްފައި އިނދެ ދެފަރާތަށް ކުޑަކޮށް ބޯ ހޫރުވާލީ އެއީ ޒިވާ ކުޑައިރުވެސް އުޅޭ ގޮތް ކަމަށް ނޫރީން ބުނެފައި ވާތީއެވެ. އޭނާއަށް ނޭނގޭ ޒިވާގެ އެތަށް ވާހަކައެއް ފަހުން ނުރީން ވަނީ ޔައީޝްއަށް ކިޔައިދީފައެވެ.

ޒިވާ ބޯޓަށް އެރުމަށްފަހު ޔައިޝް އެއީ އިން މީހެއް ކަމަށްވެސް ހަދާނުލިއެވެ. އޭނާގެ ނަޒަރު ހުއްޓިފައ ވަނީ ބޭރަށެވެ. ކުޑަވަމުން ދިޔަ މުތީތަކެއްފަދަ ރާއްޖޭގެ ރީތި މަންޒިލް ބަލަން އޭނާ އިނީ ހިނިތުންވެލައިގެންނެވެ. ﷲގެ ކުޅަދުންވަންތަ ކަމެވެ. ޒިވާ މާ ވަރަކަށް ބޭރަށް ގެއްލިފައި އިނުމުން ޔައީޝް އޭނާއަށް ޖެއްސުން ކޮށްލިއެވެ. ޔައިޝް ޒިވާގެ ކޮލުގައި ހިފާލުމުން ސިއްސައިގެން ގޮސް އޭނާ ޔައީޝް އާއި ދިމާލަށް އެނބުރިލިއެވެ. އެއަށްފަހު އަނެއްކާވެސް އޭނާ ކުރިން އިން ގޮތަށް އިނެވެ. ޔައީޝް މިފަހަރުވެސް ޖެއްސުން ކޮށްލިއެވެ. ޒިވާ ދެލޯ ހަނިކޮށްލިއެވެ. ޔައީޝް ގާތަށް އައީ ލާނެއް ހިންޏެކެވެ. އޭނާވެސް އެންމެފަހުން އަޅާނުލައި އިނީއެވެ.

އެހެން އިނުމަށްފަހު ރާއްޖެވެސް ލޮލުކޮޅަށް އޮބާލުމުން ޒިވާ ސީޓްގައި ހަމަޖެހިލިއެވެ. އެއަށްފަހު ގާތުގައި އިން ޔައީޝްގެ އަތުގައި ހިފާލިއެވެ. އެއިރު ޔައީޝް އިނީ ކުރިމަތީގައި އިން ސީޓުން މަޖައްލާއެއް ނަގައިގެން އެ ކިޔާލާށެވެ. ޒިވާ އެއިން އެއްޗެއް ކިޔާކަށް ނޫޅުނެވެ. ޔައީޝްވެސް އެހެންވެ ދެން އިތުރަށް އެކަމާއި އަޅާ ނުލީއެވެ. ފޮތަށް ގެއްލިފައި އިން ޔައީޝްއަށް ހޭވެރިކަމެއް ވީ އޭނާގެ ކޮނޑިގައި އެއްޗެއް ޖެހުމުންނެވެ. ބަލައިލި އިރު ޒިވާ އޮތީ އޭނާގެ ކޮނޑުގައި ބޯ އަޅާލައިގެންނެވެ. އޭނާއަށް އެ އޮތީ ނިދިފައެވެ. ޔައީޝް ޒިވާއަށް ބަލައިލީ ލޯބިން ފުރިގެންވާ ނަޒަރަކުންނެވެ. އެއަށްފަހު ޒިވާގެ ނިތްކުރިމައްޗަށް އޭނާ ބޮސް ދިނީ ޒިވާގެ ކޮނޑުގައި އަތް ވަށާލުމަށްފަހު އޭނާ އާއި އިތުރަށް ގާތް ކޮށްލަމުންނެވެ.

ދިގު ދަތުރަކަށްފަހު ކެނެޑާގެ އެއާޕޯޓަކަށް އެ ބޮޑު ބޯޓު ޖެއްސިއެވެ. އެއިރު ޒިވާވެސް ހޭލައިފިއެވެ. އޭނާގެ ހިތް އުފަލުން ނަށާލީ މަންމަ މެން ގާތަށް ދެވެން ދެން މާގިނައިރެއް ނެތޭ ހިތަށް އެރުމުންނެވެ. ޒިވާ ޔައީޝްއަށް ބަލައިލިއެވެ. އެއިރު ޔައީޝްވެސް އިނީ އޭނާއާއި ދިމާލަށް ބަލަހައްޓައިގެންނެވެ. ދެމީހުން ހިނިތުންވެލުމަށްފަހު ބޯޓުން ފޭބުމަށްޓަކައި އިށީނދެ އިން ސީޓުން ތެދުވެލިއެވެ. އެރި އިރެކޭ އެއްފަދައިން ޒިވާ ފޭބީވެސް ޔައީޝްގެ އަތުގައި ހިފަހައްޓައިގެން ހުރެއެވެ. އޭނާގެ ފަސްމަހުގެ ބަނޑުގައި ވެސް ކުޑަކޮށް އަތުން ހިފަހައްޓާލައިގެން ހުރެއެވެ.

ޓްރޮލީ އަކަށް ދަބަސް ތަކާއި ފޮށިގަނޑުތައް އަރުވައިގެން ދެމީހުން މިސްރާބު ޖެހީ އެ ބޮޑު އެއާޕޯޓުން ނިކުންނާށެވެ. ޒިވާއަށް އެތަން އާ ނަމަވެސް ޔައީޝްއަށް މުޅި އެތަން އެއްކޮށް ހިތުދަސް ކަހަލައެވެ. ދެމީހުން އެއާޕޯޓުން ނިކުތުމަށްފަހު މަޑުކޮށްލިއެވެ. “ކިހިނެއްވީ ތި މަޑު ކުރީ؟” ޒިވާ ޔައީޝް ގާތު އަހާލީ ފިނިކަން އިޙުސާސް ކުރެވުމުން ދެއަތް ދެއަތާއި މޮޑެލަމުންނެވެ. “ކާރު އަންނަންދެން.. އެޔޮށް އަންނަނީނު..” ޔައީޝް ޒިވާއަށް ބަލައިލަމުން ބުނެލުމަށްފަހު އެދިމާލަށް އަންނަމުން ދިޔަ ކާރަކަށް އިޝާރާތް ކޮށް ބުނެލިއެވެ.

“ހެލޯ ސަރ..” ކާރުން ފޭބީ ފިރިހެނެކެވެ. އޭނާ ޔައީޝްއާއި ސަލާމް ކޮށްލިއެވެ. އޭނާއަށް ބަލާލައިފިނަމަވެސް އެއީ ރާއްޖޭ މީހެއް ނޫންކަން އިނގެއެވެ. ދޮން މޫނެކެވެ. ކަޅުކަން ގަދަ އިސްތަށިގަނޑެކާއެކު އޭނާއަށް ލިބިފައިވަނީ އަޅި ކުލައެއްގެ ލޮލެކެވެ. ބަލާބެލުމަށް ތިރީހަކަށް އަހަރު ވެދާނެއެވެ. އޭނާ ވާހަކަ ދެއްކުމުން ޒިވާ ހުރީ ހައިރާން ވެފައެވެ. ސާފު ދިވެހި ބަހުން އޭނާ ވާހަކަ ދައްކަނީ އެންމެ ހުއްޓުމެއްވެސް ނައިހެވެ.

“ޒިވް މިއީ ޖެކް.. ގޭގެ ޑްރައިވަރ.. ޖެކް.. މިއީ އަހަރެންގެ ވައިފް ޒިވާ..” ޔައީޝް ދެމީހުން ދެމީހުންނަށް ތަޢާރަފް ކޮށްދިނެވެ. ޖެކް ވެސް ހިނިތުންވެލިއެވެ. އެއަށްފަހު ކާރަށް އަރައިގެން ގެއަށް ދާން މިސްރާބު ޖެހިއެވެ. “މަންމަމެންނަކަށް ހަމަ ނޭނގޭނެތަ؟” ޒިވާ ޔައީޝް ކައިރީ ބުނެލީ ޖެކް އެމީހުން ބަލައި އައުމުންނެވެ. “ހޫމް.. އަހަރެން ހަމައެކަނި ޖެކް ކައިރިއޭ ބުނީ އަންނާށޭ.. ޖެކް ނުބުނެޔޭ ދޯ މަންމަމެން ކައިރީ އެއްވެސް ވާހަކައެއް..” ޔައީޝް ހިނިތުންވެލައިފައި އިނދެ ޖެކް އަށް ދޯ އެއްލުމުން އޭނާވެސް ބޯ ޖަހާލިއެވެ. ޒިވާއަށް ހިތްހަމަ ޖެހުމުގެ ނޭވާއެއް ދޫކޮށްލެވުނެވެ.

ޒިވާގެ ނަޒަރު ހުއްޓިފައިވަނީ ސާފުކޮށް އޮތް މަގަށެވެ. ގަސްތަކުގައި ވަނީ ސްނޯ ހަރުލައިފައެވެ. އެއީ ޒިވާ އެންމެ ލޯބިކުރާ މޫސުން ކަމުން އޭނާގެ ހިނިތުންވުން ފުންވެގެން ދިޔައެވެ. އިރުގަނޑެއް ވާންދެން ދުއްވުމަށްފަހު ކާރު ހުއްޓާލީ ބޮޑު ގެއެއްގެ ކުރިމައްޗަށެވެ. ޒިވާ ކާރުން ފޭބިއެވެ. އެއިރު ޔައީޝްވެސް ހުރީ ކާރުން ފައިބައިގެންނެވެ. ބޮޑު ފުޅާ ގޭޓެއް ލައިފައި ވާއިރު އެތެރޭގައި ބޮޑުކޮށް ހުސް ޖާގަ އޮތެވެ. ގެއަށް ވަދެވެން އިނި ވޯކްވޭއެއް ހަދައިފައެވެ. މުޅި ގޭގައި ވަނީ ކާޕެޓް ވިނަ ހައްދާފައެވެ. ގެއާއި ތަންކޮޅެއް ދުރުގައި ބޮޑު ހިޔާދޭ ގަހެއް އިނެވެ. އެގަހުގެ ދަށުގައި ބެންޗެއް ބައިންދާލައިފައި ހުއްޓެވެ. ގޭގެ ވަށައިގެން އެތެރޭގައި މާގަސް ހައްދާފައިވެއެވެ. މުޅި ގޭވަޅު ތެރެއިން ފެންނާނީ ފެހިކަމެވެ. ނަމަވެސް އެ ފެހިކަން ވަނި ސްނޯ ތަކުގެ ސަބަބުން ކޮންމެވެސް ވަރަކަށް ފޮރުވިއެވެ.

ޒިވާ ހައިރާންވެފައި މުޅި ތަނަށް ބަލަން ހުރެވުނީއެވެ. ޔައީޝް ޒިވާގެ އަތުގައި ހިފާލިއެވެ. އެއަށްފަހު ރީތި ހިނިތުންވުމެއް ހަދިޔާ ކޮށްލިއެވެ. ދުވާލުގެ ވަގުތު ކަމުން އެންމެން ގޭގައި އުޅޭނެ ކަންވެސް ދެމީހުން ހަނދާނުގައި ބެހެއްޓިއެވެ. ވޯކް ވޭއިން ލައިފައި ބޮޑު ގެއާއި ދިމާލަށް ޒިވާ އާއި ޔައީޝް މިސްރާބު ޖެހިއެވެ. ޔައީޝް އޭނާގެ އަތުގައި އޮތް ތަޅުދަނޑިން މަޑުމަޑުން ގޭގެ ދޮރު ހުޅުވާލިއެވެ. އެއަށް ފަހު އެތެރެއަށް ނަޒަރު ހިންގާލިއެވެ. ބޮޑު ގެއެކެވެ. އެ ތަނަވަސް ގޭގައި މެދުގައި ސޯފާ ސެޓެއް ބަހައްޓާގައި ވެއެވެ. ދެފަރާތުން ބޮޑު ދެ ސިޑިން އެރެން ހުރީ ކޮޓަރިތައް ހުންނަ ބަޔަށެވެ. އެބައިގައި ސިޓިން ރޫމަށް ވީ ފަޅީގައި ކުޑަ ބެލްކަންޏެއް ވަށައިގެން ލުމަށްފަހު އޭގެ ފަހަތުގައި ދެން ހުރީ ހުސް ކޮޓަރިތަކެވެ. ސޯފާސެޓްގެ މަތީގައި ވާގޮތަށް އުސް ސީލިންގުގައި ބޮޑު ބޮޑު ޗާންދަލިއާއެއް ހަރުކޮށްފައި އިނެވެ. ވަރަށް ރިތި ގެއެކެވެ. އަދި އެހާމެ ބޮޑެވެ.

ގޭތެރެއިން އެކަކުވެސް ފެންނަން ނެތުމުން ޔައީޝް ހައިރާން ވިއެވެ. އޭނާ ގަޑި ބަލައިލީ އެއްޗެއް ޔަގީން ކުރާ ފަދަ ގޮތަކަށެވެ. “ނަސީބެއްނު.. މަންމަމެން ވާނީ ސައިބޮއެގެން މިގަޑީގަ ކޮޓަރީގަ.. އެކަމް އިރުކޮޅަކުން ނިކުންނާނެ.. ނަވޫ މެން ސްކޫލަށް ދާން ރެޑީ ވާން އުޅޭނީ މިހާރު.. ހިނގާ އަވަހަށް ދެންވެސް ކޮޓަރިއަށް ދެވޭތޯ ބަލަން..” ޔައީޝް ޒިވާ ގާތު ބުނެލިއެވެ. އެއަށްފަހު ކާރު ކައިރީ ހުރި ޖެކް އަށް އިޝާރާތް ކޮށްލީ ފޮށިތައް ނެގުމަށެވެ. ޒިވާ ހުރިތާ ބަހައްޓާފައި ޔައީޝްވެސް ދިޔައީ ޖެކް އަށް އެހީތެރިވުމަށެވެ. ދެ ފިރިހެނުން ވެގެން ދަބަސްތަކާއި ފޮށިގަނޑު ހިފައިގެން ގޮސް ސިޑިން އަރަން ފެށިއެވެ.

އެމީހުން މަޑުކޮށްލީ ޔައީޝް ދިން ތަޅުދަނޑިން ކުރިމަތީގައި ހުރި ކޮޓަރި ޒިވާ ހުޅުވަންދެނެވެ. މަދު ސިކުންތުކޮޅަކަށްފަހު ޒިވާ ދޮރު ހުޅުވާލުމުން އަވަހަށް އެމީހުން އެތެރެއަށް ދެމިގަތެވެ. ދަބަސްތައް ބެހެއްޓުމަށްފަހު ޖެކްވެސް ކޮޓަރިން ނިކުތެވެ. އެވަގުތު ޔައީޝް ދޮރު ލައްޕާލުމަށްފަހު ތަޅުލިއެވެ. ޒިވާ ހުރީ އެ ބޮޑު ކޮޓަރިއަށް ބަލާށެވެ. ވާނީވެސް އެހެން ނޫންހެއްޔެވެ؟ އެ ކޮޓަރި އެހާވެސް ބޮޑެވެ. ޔައީޗްވެސް މުޅި ކޮޓަރިއަށް ނަޒަރު ހިންގާލިއެވެ. އޭނާ ނެތް ނަމަވެސް މަންމަ އެ ކޮޓަރި ސާފުކުރާކަށް ޔައީޝްއަށް އިނގުނީ ކޮޓަރިގައި އެންމެ ހިރަފުސްކޮޅެއްވެސް ނެތުމުންނެވެ. އެ ބޮޑު ތަނަވަސް ކޮޓަރީގެ ހަތަރު ފާރުގައި ލައިފައިވަނީ ގަދަ ނޫކުލައެކެވެ. ހުދާއި އެކި ނޫ ކުލަތަކުން ރީތި ޑިޒައިނަކުން ފާރު ޒީނަތްތެރިކޮށްފައި ވެއެވެ. ބޮޑު ކިންގް ސައިޒްގެ އެނދުގައި އަޅާފައި އޮތީވެސް ނޭވީ ބްލޫ ކުލައިގެ ބެޑުޝީޓެކެވެ. ބާލިސްތައްވެސް ހުރީ އެކުލައިގައެވެ.

އެއްފަރާތުގައި ބޮޑު ބޮޑު ހެދުން އަޅުވާ އަލަމާރިއެއް ހުރި އިރު އެޔާ ކައިރީގައި ނޫ ކުލައިގެ ސޯފާ ސެޓެއް ހުއްޓެވެ. އެނދު އިން ބިތާ ދެން އެންމެ ކައިރިކޮށް އިނީ ބޮޑު ބެލްކަންޏެވެ. އެ ތާ އެއްކޮށް ވަނީ ބިއްލޫރި ޖަހައިފައަވެ. އެތަން ފޮރުވާލެވިފައވަނީ ކަނޑު ނޫކުލައިގެ ދިގު ދިގު ދޮރުފޮތި ތަކުންނެވެ. މުޅި ކޮޓަރިގައި ވަނީ ކާޕެޓު އަޅައިފައެވެ. މިހާރު ކެނެޑާއަށް ފިނި ކަމުން ކޮޓަރީގެ އޭސީވެސް ހުރީ ނިއްވާލައިފައެވެ.

ޒިވާ ސިހުނީ ޔައީޝް އޭނާގެ ދެކޮނޑުގައި ހިފާލުމުންނެވެ. ޔައީޝް ޒިވާ ގޮވައިގެން ގޮސް އެނދުގައި ބޭނދިއެވެ. “ކަމުދޭތަ މި ކޮޓަރި؟” ޔައިޝް ޒިވާ އާއި ސުވާލު ކޮށްލިއެވެ. އެވަގުތު ޒިވާ ބޯ ޖަހާލިއެވެ. “ދެން ދޭ ފްރެޝް ވެލައިގެން އަންނަން.. އެޔަށް ފަހު މަންމަމެން ސަޕްރައިޒް ކޮށްލަން ދާނީ ދޯ؟” ޔައީޝް ހިނިތުންވެލައިފައި ބުނެލިއެވެ. އެހިނދު ޒިވާވެސް އެކަމާއި އެއްބަސް ވަމުން ފެންވަރަން ބޭނުންވާނެ ސާމާނުތައް ބަލައި ފޮށްޓާއި ދިމާލަށް މިސްރާބު ޖެހިއެވެ. ޒިވާ ފާޚާނާއަށް ވަނުމުން ދެއަތް ފުޅާ ކޮށްލަމުން ޔައީޝް އެނދުގައި އޮށޯވެލިއެވެ. އަދި ފުން ނޭވާއެއް ފަޒާގެ ތެރެއަށް ދޫކޮށްލިއެވެ. ނަމަވެސް އޭނާ އެހެން އޮށްވާ ނިދީގެ ފުން ކަނޑަށް ގެނބިގެން ދިޔައެވެ.

(ނުނިމޭ)