އެ ވަޢުދު (4)

އަމްނާގެ އެނދުގެ ބޯލާކޮޅާއި ދިމާލުގައި ހުރި ހާތިބު ހުރީ އަމްނާގެ މައިސޫމު މޫނަށް ބަލަހައްޓައިގެންނެވެ. އައްބާސް ދެއްކީ މުޅިއަކުން ދޮގު ވާހަކަތަކެއް ނޫނެވެ. ނަމަވެސް އަމްނާ ދޫކޮށްލުމުގެ ކުޅަދާނަކަމެއް އޭނާގެ އެބަލިކަށި ހިތަކު ނެތެވެ. ހަށަން ބަނދެގެން ހުރި ހާތިބުގެ ކަރުގައި ހިޔާލީ ފޮލައިގެ ރަހަ ލާން ފެށުމާއި އެކު ހެން ހަށަން މޮހާލުމަށްފަހު އަމްނާއާއި ދިމާއަށް ފުމެލީ އަމްނާ ނިދިން ހޭލައްވާލުމަށެވެ. އެ އަރާމު ނިންޖަން އެޅޭ ހުރަހަކަށް ވާން ނޭދުނެއްކަމަކު އިތުރަށް އިންތިޒާރު ކުރެވޭކަށްވެސް އޭނާއަކަށް ނެތެވެ.

ފުން ނިންޖަކުން ނިދާލައިފައި އޮތް އަމްނާއަށް ހޭލެވުނީ ހޫނު ވައިރޯޅިއެއް މޫނަށް ޖެހުމުންނެވެ. މަޑުމަޑުން އެސްފިޔަތައް ތަޅުވާލުމަށްފަހު ތެދުވުމާއިއެކު އަރިމަތީގައި ކޮޅަށްހުރި ހާތިބު ފެނުމާއިއެކު މިފަހަރު ސިހުމެއް ނުލިބެއެވެ. ނަމަވެސް އަނެއްކާވެސް އެހިތަށް ބިރުވެރިކަން ވެރިވީ އޭނާގެ ނިކަމެތިކަން ހަނދާންވުމުންނެވެ.

“ކޮބާ ޖަވާބު؟ ވަގުތު ހަމަވީ.” ހާތިބު އަތުގެ އިޝާރާތުން އަމްނާއަށް އެންގިއެވެ.

މޫނު މައްޗަށް ވެއްޓެމުން ދިޔަ އިސްތަށިކޮޅު އެއްފަރާތް ކުރަމުން އަމްނާ އޭނާގެ ޖަވާބައިގެން ކުރިއަށް ދިއުމަށްޓަކައި ހަމައަކަށް އެޅިލިއެވެ. އެއަށްފަހު އިޝާރާތްތަކެއް ކުރަމުން ދިޔައެވެ. “އަހަރެން އެއްބަސް. މި ގުޅުމަށް އެއްބަސް.”

އަމްނާގެ ޖަވާބު އިވުމާއި އެކު ހާތިބު އަށް ހީވީ ދެޢީދު އެއްފަހަރާ ލައިގެން ހެނެވެ. ކުޑަ ކުއްޖެއް ފަދައިން ފުންމާލުމަށްފަހު އަތް ޖަހާލީ ވީ އުފަލެއްގެ ބޮޑުކަމުންނެވެ. ފިރިހެނެއް ކަމަކު އިހުސާސުތަކެއް ވާނެ ނޫން ހެއްޔެވެ؟ ” ފުރަތަމަ ކަމަކަށް އަހަންނަކީ ހާތިބު. އަމްނާއަށްވުރެ އުމުރުން ބޮޑުވާނީ 3 އަހަރު. ނުކިޔެވިއެއް ކަމަކު ހުނަރުތަކެއްވޭ. އަހަރެން އުޅެނީ ހަމަ މިރަށުގަ. ޢާއިލާއެއް ނެތް. އިތުރު ކަމެއް އެނގެން ބޭނުންތަ؟

އަމްނާ ހުރީ އަޖައިބުވެފައެވެ. ޖިންނިއެއް ކަމަކު އަމްނާއަށް އުފަލާއި އަރާމު ހޯދައިދޭނެއޭ އޭނާގެ ހިތް ދިޔައީ ތަކުރާރުކޮށް ބުނަމުންނެވެ. ނަމަވެސް މިކަން އޭނާގެ މައިންބަފައިންނަށް އަންގާނީ ކިހިނެއް ހެއްޔެވެ؟ ނާންގަ ސިއްރުން އުޅުމަކީވެސް އުނދަގު ކަމަކަށް ނުވާނެއެވެ. ހާތިބަކީ އާދަޔާ ޚިލާފު ބާރުތަކެއް ލިބިގެންވާ ފަރާތެއް ކަމުން އޭނާ ހާސްވާންވީ ކީއްވެ ހެއްޔެވެ؟ ކިތަންމެ ހަމަޖެހޭކަން ދައްކަން އުޅުނަސް ހާތިބު ދެކެ ގަންނަ ބިރާއި އެއްވަރަށް މިހާރު އިތުރު ހީއެއް އެއްވެސް އުފެދިއްޖެއެވެ. ކަމެއް ގޯސްވާން އުޅޭކަހަލައެވެ.

ދެކޮޅަށް ބޯ އަނބުރާލުމަށްފަހު ހަމަޖެހިލީ ކުށްހީ އެއް ނުކުރުމަށެވެ. އެކުށްހީ ޙަޤީޤަތަކަށް ވެއްޖެނަމަ ހަދާނެ ގޮތް ވިސްނާ ވަރަށްވުރެ އޭނާގެ ސިކުނޑިއަށް ވަނީ ބާރުވެފައެވެ. ހާތިބުގެ ވާހަކަތަކުން އިނގުނު ގޮތުގައި އެދެމީހުންނަކީ މިހާރު ހަލާލު ދެމަފިރިންނެވެ. ޖިންނިންގެ އުސޫލުގައި އޮންނަ ގޮތުން ނަމަ އެއްބަސް ވުމުން ކައިވެނި ކުރެވުނީއެވެ. މި ބެދުނު މަޅީގެ ހިލަމެއްވެސް އަމްނާއަށް ނުވާ ޙާލު އޭނާ ހިތްހަމަ ޖެހުނީ ނުރައްކަލުން ސަލާމަތްވި ކަމަށް ހީކޮށެވެ.

ދުވަސްތައް ހަލުވިކަމާއި އެކު ވޭތުވަމުން ދިޔައެވެ. ހާތިބާއި އަމްނާގެ ދެމެދުގައިވި ދުރުކަންވެސް ދިޔައީ މަޑުމަޑުން ފުހެވެމުންނެވެ. އަމްނާ ހާތިބު ދެކެ ގަންނަ ބިރުވެސް މުޅިންހެން ކެނޑިއްޖެއެވެ. ނަމަވެސް އަދިވެސް އެހިތުން ހާތިބަށް ލޯބީގެ ގޮތުން ޖާގައެއް ދެވިފައެއް ނުވެއެވެ. ހާތިބާއި ދުރުވާން ކިތަންމެ ބޭނުމަސް އެކަން ވާން ނެތީ އޭނަގެ މަޖުބޫރީ ހާލަތުގެ ސަބަބުންނެވެ. ހާތިބު ގެ އެދުންތައް ފުއްދަމުން ދިޔައިރު ހީވީ ސާހިބުގެ އަމުރުތަކަށް އަޅަކު ތަބަޢަވަމުން ދިޔަހެނެވެ. ހަފްތާއަކު ތިންފަހަރު ނަމަވެސް އަމްނާ ހާތިބުގެ އެދުމުގެ މަތިން ރަށުގެ ތުނޑިއަށް ދަނީ ދަންވަރުގެ ހަމަހިމޭން ވަގުތުގައެވެ. އަމްނާގެ އެދުމުގެ މަތިން އަމްނާގެ މައިންބަފައިންނަށް އެދެމީހުންގެ ގުޅުން އެނގިދާނެތީއެވެ. ނަމަވެސް ފަރުދާގެ ފުރަގަހުގައި ރޭވެމުންދާ ކުޅިގަނޑުގެ ހިލަމެއްވެސް އެދެމީހުންނަށް ރޭކާނުލައެވެ. ހާތިބުގެ ސަމާލުކަން ކުޑަކޮށްނަމަވެސް އެކަމަށް ދިންނަމަ އެނގިގެން ދާނެ ކަމީ ޝައްކެއްވެސް އޮތް ކަމެއް ނޫނެވެ. އެއަށްވުރެ އޭނާވަނީ ދުނިޔަވީ އުފަލަށް ފެންބޮވައިގެންފައެވެ. އަމްނާއަށް ވުރެ މުހިއްމު އެކަށްޗެއްވެސް މިދުނިޔެމަތީގައި ނެތް ފަދައެވެ.

އަމްނާ ދަންވަރު ތުނޑިއަށް ދާ ވާހަކަ ތުންތުން މަތިން އަމްނާގެ މައިންބަފައިންނަށް ވަނީ އަޑު އިވިފައެވެ. ނަމަވެސް އެދެމަފިރިންގެ ލޮލަށް ނުފެންނާތީ އެކަން ޤަބޫލު ނުކުރެވެނީއެވެ. އެހެންކަމުން އެއީ ދޮގުކަން ރައްޔިތުންނަށް ސާބިތުކޮށްދިނުމަށްޓަކައި 1 ހަފްތާ އަމްނާއަށް ފާރަލުމަލުމަށް ވަނީ ނިންމައިފައެވެ. އެގޮތުން މިއީ އެދެމަފިރިން އަމްނާއަށް ފާރަލާތާ 6 ވަނަ ރެއެވެ. ގަޑިން 11 ޖެހުމާއި އެކު އާދައިގެ މަތިންހެން ގޭތެރެ ނިވާލުމަށްފަހު ދޮރުތައް ތަޅުލިއެވެ. އަމްނާ ކޮޓަރީގައި ކަން ޔަޤީންކުރުމަށްފަހު އެމީހުންގެ ރޭވުމައިގެން ކުރިއަށް ދިޔައެވެ. ނާދިރާ ސިޓިން ރޫމު ސޯފައިގެ ފަހަތުގައި ފިލާ އިނީ އަމްނާގެ ކޮޓރީގެ ދޮރު ފެންނާނެ ގޮތަށެވެ. ކާސިމް ހުރީ ގޭގެ ކުރިމަތީހުރި ގެއެއްގެ ދޮރުދޮށުގައި ހުރި އަނދިރި ގަނޑުގައެވެ. މަގުމަތިންދާ މީހަކަށްވެސް އޭނާ ފާހަގަ ނުވާނެކަން އެއީ ޔަޤީންކަން އޮތް ކަމެކެވެ. 30 12 ވީއިރުވެސް އަމްނާގެ ހިލަމެއް ނުވުމުން ނާދިރާ އިންތަނުން ތެދުވަން އުޅުނެވެ. ހަމަ އެވަގުތެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.