ސޫރަ 6

އީތަން އޭނާގެ ހިޔާލުތަކުން ބޭރުވީ ރައްޔާން އައިސް އޭނާގެ ކޮނޑުގައި ޖަހާލުމުންނެވެ. ” އަނެއްކާ ދުނިޔެއަށް ދިޔައީތަ ” ރައްޔާން އަހާލިއެވެ. އީތަން ބޯޖަހާލިއެވެ. ރައްޔާން، ޕިސް ޕިސް ޖަހާލަމުން ދެފަރާތައް ބޯ ހޫރާލިއެވެ އީތަން ދިޔައީ އޭނާގެ ހިތުގައިވީ އެއްޗެއް ރައްޔާން ކުރިމަތީ ބޭރުކުރަމުންނެވެ. ރައްޔާނަކީ މުޅި އެޖެންސީއިންވެސް އީތަންގެ އެންމެ އިތުބާރުކުރެވޭ ގާތް އެކުވެރިއާއެވެ. ރައްޔާނަކީ ސަކަ މިޒާޖެއްގެ ވެރިއެކެވެ. އެހެންމީހުންގެ  ވާހަކަތައް އަހައި ހިތްހަމަޖައްސައިދިނުމަށް ރައްޔާނަކީ ދެ ވަނަ އެއް ނުވާފަދަ އެކުވެރިއެކެވެ.

*******************************************

މަޑު ނޫކުލައިގެ ބޮޑު ކޮޓަރިތެރޭގައި ޒަމާނީ ފަރުނީޗަރު ވަނީ ރީތި ތަރުތީބަކަށް އަތުރާލާފައެވެ. ކޮޓަރީގެ މެދުގައި ބެހެއްޓިފައިވާ ކިންގް ސައިޒް އެނދުގައި އޮށާވެލައިގެން އޮތް ޔާއިން އޮތީ އޭނާގެ ފޯނު ސްކްރީނަށް ގެއްލިފައެވެ. ފިޔާތޮށި ކުލައިގެ ތުންފަތަކާ ބޮޑު ލޮލަކާއީ ދިގު އެސްފިޔަތަކެއްގެ ވެރި އެ އަންހެން ކުއްޖާގެ ފޮޓާ ގަނޑުގައި އޭނާ ފިރުމާލިއެވެ.

އަޔާނީގެ މައުސޫމު ސޫރަ ފެންނަމުން ދިޔަ ފޮޓާގަނޑައް ބަަލަހައްޓައިގެން އޮތް ޔާއިންގެ ސިކުނޑީގައި ތަފާތު ހިޔާލުތައް އެނބުރެމުން ދިޔައެވެ. އޭނާ ވިސްނަމުން ދިޔައީ އަޔާނީއާއި އީތަން ދުރުކޮރެވޭނޭ ގޮތަކާ މެދުގައެވެ. އީތަން ދުނިޔެއަށް ކުރާ ދަތުރުތަކުގައި އޭނާގެ ފާރަވެރިއެއްހެން ޔާއިން މަސަތްކަތް ކުރެއެވެ. އެ ކަންތައްތަކުގެ ތެރެއިން ޔާއިންގެ ހިތުގައި އަަޔާނީގެ ސޫރަ ބިންވަޅުނެގުނެވެ. އީތަންއާ އަޔާނީގެ ދެމެދުގައި އެކަކު އަނެކަކަށްޓަކައި ވައި އިހްސާސްތައް ދިޔައީ ޔާއިންގެ ހިތުގައި ހަސަދަވެރުކަމުގެ އަލީފަން ގަނޑެއް ރޯ ކުރަމުންނެވެ.

އިރުކޮޅަކު ވިސްނަން އޮވެފައި ޔާއިން ފުންމައިގެން އެނދުން ތެދުވިީ އޭނާގެ ސިކުނޑިއަށް ރަނގަޅު ހިޔާލެއް އައުމުންނެވެ. ޔާއިން ވިސްނާލިއެވެ. އަޔާނީ މިހާރު އުޅެމުން އަންނަނީ އީތަންގެ މަންމަ ރާނިޔާއާއެކު މާލޭގައެވެ. ” އެހެންވީމަ އީތަންގެ މަންމަ މަރާލައި ފިއްޔާ އަޔާނީ ހާސިލްކުރަން ފަސޭަހަވާނެ… ” ނުބައި ވަސްވާސްތަކުން ޔާއިންގެ ސިކުނޑި ފުރިގެން ދިޔައެވެ. އީތަންގެ މަންމަ މަރާލުމުން މުޅި ދުނިޔޭގަވެސް އަޔާނީއަށް އަޅާލާނެ މީހަކު ނުހުންނާނެ ކަމަށް އީތަންއަށް ވިސްނުނީ އޭނާގެ ގަމާރު ކަމުންނެވެ. ރާނިޔާ ނެތް ދުވަހަކުން ވެސް ރަށުގައިތިބި އީތަންގެ އާއިލާގެ ފަރާތުން އަޔާނީއަށް ހިމާޔަތް ލިބޭނޭކަމެއް ޔާއިންއަކަށް ނޭގުނެވެ. ޔާއިންއަކީ އޭނާ ބޭނުންވާ އެއްޗެއް ހާސިލްކުރުމަށްޓަކައި މީހެއްގެ ފުރާނަ ދުއްވާލަންވެސް ފަސްނުޖެހޭނެ މީހެކެވެ. ޔާއިން އޭނާގެ ކޮޓަރީގެ ކަނާތްފަރާތުގައި ހުރި ޑްރެސިންގް ޓޭބަލް ކައިރީ ހުއްޓިލިއެވެ. އޭަަގައިވާ ވަތްގަނޑެއް ހުޅުވާލުމަށްފަހު އޭގެތެރެއިން ތޫނު ވަޅިއެއް ނަގައިފިއެވެ. ހަމަ އެވަތްގަނޑު ތެރެއިން ނެގި އަނގިއެއް އޭނާގެ ދެއަތައް މަހާލިއެވެ. އަނގި ލެއްވިފައިވާ އަތުން ، ތޫނު ވަޅިގައި އަތް އުނގުޅާލި އިރު އޭނާގެ ތުންފަތުގައި ނުލަފާ ހިނިތުން ވުމެއް ދުވެލިއެވެ.

**********************************************
ބަދިގޭ މޭޒު ކައިރީގައި އިށީނދެގެން ފޮތް ކިޔަން އިން އަޔާނީ ކޮނޑުގައި ކުޑަކުޑަ އަތަކުން ކޮށްޓާލިއެވެ. އަޔާނީ ފަހަތް ބަލާލިއެވެ. އީތަން ދޮންތަ އީނާލްގެ އެއްމާބަނޑު ދެކުދިން ކަމަށްވާ ކަައިލްއާއި ކައިނާ ތިބީ ހެވިފައި ސަލާމަށް އަތް ދިއްކޮށްގެންނެވެ. ” ފުރަން ދަނީތަ ” އަޔާނީ އެއިން ކޮންމެ ކުއްޖެއް މަޑު އަތްތިލައިގައި ހިފައި ސަލާންކޮށްލިއެވެ. ” ރަށަށް ދިޔައިމަ ދެން ނުހުންނާނެ… ކޮއްކޮމެން ގޮވައިގެން ހަވީރު ގަޑީގަ ބީޗައް ދާނެ  ދައްތައެއް ނުހުންނާނެ … ޔާނީ ދައްތަ ހިނގާ ކޮއްކޮ މެންނާއެއްކޮށް ރަށަށް ދާން ” ކައިނާ އޭނާގެ ތުއްތު އަޑުން ބުނެލިއެވެ. ކައިލްވެސް ކައިނާގެ  ވާހަކައަށް އެއްބަސްވުމުގެ ގޮތުން ބޯޖަހާލިއެވެ. ” ދައްތަ ކިޔަވާ ކޮލެޖް ކިޔަވާ ނިންމާފަ ދާނަށް ކޮއްކޮމެން ކައިރިއަށް ރަށަށް އިނގޭ.. އޭރުން ހަވީރު  ގަޑީގަ ތްރީ ކުދިން އެއްކޮށް ބީޗައްވެސް ދެވޭނެއެއްނު ދޯ..” އަޔާނީވެސް މަޑުމައިތިރި ރާގެއްގައި ލޯތްބާއެކު އެކުދިންނަށް ވިސްނައިދިނެވެ.

އެކުދިންނަށް އަޔާނީ ބުނިއެއްޗެއް ވިސްނުނީ ކަންނޭގެއެވެ. މައުސޫމު ހިނިތުންވުމެއް ރައްދު ކޮށްލަމުން ، މާމައާ ސަލާން ކުރަންށޭ ބުނަމުން ބަދިގެއާ ދިމާލަށް ދުއްވައިގަތެވެ. އަޔާނީ ދެފަރާތައް ބޯ ހޫރާލިއެވެ. ފޮށި ތަންމަތި ހިފައިގެން ކޮޓަރިން ނިކުތް އީނާލްއާ އޭނާގެ ފިރިމީހާ އާރިފްއާ ސަލާން ގަލާންް ކޮށްލަމުން އަޔާނީ އޭނާ ކިޔަވަންއިން ފޮތު ކިޔުމައިގެން މަސްއޫލުވިއެވެ.
އެކު ބަދިގެ ތެރޭގައި ފިޔާ ކޮށަން ހުރިރާނިޔާ ދިޔައީ އޭނާގެ ލޮލުން އަންނަމުން ދިޔަ ފެން އަތުގެ ނުފުށުން ފޮހެމުންނެވެ. ފިޔާ ކޮށާ ނިންމާލަމުން ތައްޓަކަށް އެ ފިޔާ ކޮޅުތައް އޭނާ އަޅާލިއެވެ.  އެވަގުތު އޭނާގެ ފަހަތުން މީހެއްގެ ހިލަމެއްވީހެން ހެން ހީވިއެވެ. އާމިރާ ފަހަތް ބަލާލިއެވެ. އެއާއެކު އޭނާގެ ހިތް ނުހުށްޓުނީ ކިރިއާއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.