ނޭނގި ހިތޭ ތި އަތުލީ 31

ބައްދަލުވުން ނިންމާފައި ހޮސްޕިޓަލުން ނުކުންނަން ދަނިކޮން މައުވަންއަށް ފޯނެއްއައެވެ. އެހެން ކަމުން އޭނަ ހިންގަމުން ދިޔައީ އެހެން މީހުންނަންވުރެ ތަންކޮޅެއް ފަހަތުގައެވެ. އެވަގުތު އެހެންލާފައި ދިޔަ އަންހެއްކުއްޖާ މައުވަންގެ ލޮލުގައި އަޅައިގަތެވެ. ނަމަވެސް މާބޮޑު ފަރުވާލެއް ނެތި ކުރިއަށް ހިނގައި ގަތެއް ކަމަކު މައުވަން ހުއްޓުނެވެ.

ކައިރީގައިހުރި އަންހެން ކުއްޖާގައިގައި ހިފަހައްޓާލައިގެން ކުޑަކޮށް ބަލިގޮތަކަށް ހިގާފައި އެދަނީ ރަފާއެވެ. އަތުގައި އަޅާފައި އިން މަލަންކޮޅުން އޭނަ އެދަނީ ހޮސްޕިޓަލުން ކޮންމެވެސް ޚިދުމަތެއް ހޯފާފައިކަން ދޭހަވެއެވެ. އިންޑިއާއަށް އަންނަމުން ރަފާ އޭނަ ގާތު ބުނެފައިވަނީ ރައްޓެހި ކުއްޖެއްބަލި ވާހަކަ ކަމުން މައުވަން އެމީހުން ކުރީ ކޮންކަމެއްތޯ ބަލާލާހިތްވިއެވެ.  ރަފާމެން ހޮސްޕިޓަލުން ނިކުންނަން މިސްރާބު ޖަހާފައިވުމުން މައުވަން ގަސްތުކުރީ އެމީހުން ހޮސްޕިޓަލުން ހޯދި ޚިދުމަތް ސާފުކޮށްލުމަށެވެ. ފުރަތަމަ ޖެހުނު ކައުންޓަރުން ސާފުވާގޮތެއްނުވިއެވެ. ބަލިމީހުންގެ ސިއްރު ހިފަހައްޓަންޖެހޭކަމަށްބުނެ އިންކާރުކުރިއެވެ. ތަނުގައި ބައިބޯކަމުން މައުވަންވެސް އިތުރަށް ބާރެއްނާޅައެވެ. ދެން ހިނގަމުންދިޔައީ ތަންކޮޅެއް މީހުންމަދު ކައުންޓަރެއް ފެނޭތޯއެވެ.

އަމީނާ އާއި މަލާކް ތިބީ ރޭގަނޑުގެ ކެއުމަށް އިންސާފްކުރާށެވެ. މާގިނަ ބާވަތްތަކެއް މޭޒުމަތީގައެއްނެތެވެ. ހުރީ ހަމައެކަނި ގަރުދިޔަ ކޮޅަކާއި ބަތް އަދި ލޮނުމިރުސް ތައްޓެކެވެ. މަލާކަކީ އަބަދުވެސް ދިވެހި ކެއުންތަކަށް ލޯބި ކުރާކުއްޖެއްކަމުން އޭނައަށް އެހީ ވަރަށް ފުރިހަމަ ކެއުމަކަށް ވެއެވެ. ދެމީހުން ކެއުމުގައި ތިއްބައި ސަލާން ގޮވާލާފައި ވަދެގެން އައީ ޝަރީފްއެވެ. “ބައްޕާ… އަވަހަށް ދުރުވޭކާން…” މަލާކް ވަގުތުން ކެއުމަށް ދައުވަތު ދިނެވެ. ޝަރީފް އިންކާރުކުރީ ދެންމެ ކޮފީއެއް ބޮއެގެން އައީ ކަމަށް ބުނަމުންނެވެ. “ބައްޕާ… ކަމަކުތޯ ތި ދުރުވީ…؟” ކައިނިމިގެން ތަށިދޮންނަން ދަމުން މަލާކް އަހާލިއެވެ. “ނޫނޭ… ދެންހަމަ ދަރިފުޅު ނުފެންނާތީވެ ދެކިލަން މިއައީ….” ޝަރީފްގެ ޖަވާބް އިވި ހީލަމުން ދެފަރާތަށް މަލާކް ބޯހޫރާލިއެވެ. އަދި ދޮވުނު ތަށި ފޮހެލާފައި ބަންޑުންޖަހާލިއެވެ. “ގައިމު މިއަދު ޑިއުޓީ ނިންމާފަ ގެއަށްވެސް އައީ ބައްޕަޔާއެކު ކާރުގަ…. އަޅުގަނޑަށް ހީވަނީ އަޅުގަނޑު ނުފެނިގެން ނޫންހެން ތި އުޅެނީ….” އަމީނާއަށް ނަޒަރެއްދެމުން މަލާކް ބުނެލިއެވެ. އެޔާއެކު ޝަރީފްއާއި އަމީނާގެ ހަތަރުކަޅި ހަމަވެގެން ދިޔައެވެ. ހަމަ އެސިކުންތުގައި އަމީނާ އެހެންދިމާލަކަށް ނަޒަރު ބަދަލުކޮށްލިއެވެ. ޓިޝޫއަކުންއަތް ފޮހެމުން ޝަރީފަށް އެއްލޯމަރާލަމުން މަލާކް ވަނީ ކޮޓަރިއަށެވެ. ނުބުންޏެއް ކަމަކު އެދެމީހުންނަން ފުރުސަތު ދީފައި އޭނަ ދިޔައީއެވެ.

މައުވަން  ދެންފެނުނީ ވޯޑެއްގައި ހުރި ނާރސިން ސްޓޭޝަންއެއްގެ ކައުންޓަރު ކައިރީ މަޑުކޮށްލައިގެން ހުރިތަނެވެ. އަދި އެތަނުގައި އެވަގުތު ތިބި ތިން ނަރުހުން ތެރެއިން ދެނަރުހުން ކޮންމެސްތާކަށް ޓްރޭތަކެއް ހިފައިގެން ދިޔުމުން މައުވަން ވަގުތުގެ ބޭނުން ހިފައި ކައުންޓަރާއި ގާތްވެލިއެވެ. އަދި އޭނަ ބޭނުންވާކަންތައް ހާމަކޮށްލިއެވެ. އެކުއްޖާވެސް ކުރީ އިންކާރެވެ. ދެން މައުވަން ފަރާތް ފަރާތަށް ލޯހިންގާލަމުން ޖީބުން ނެގި ސަތޭކަ ޑޮލަރު ކައުންޓަރު މަތީ ބާއްވާލިއެވެ. އަދި އިތުރަށްވެސް ދެވިދާނެކަމަށް ބުނެލިއެވެ. އެވަގުތު އެކުއްޖާވެސް ވަށައިގެން ވާ މާހައުލަށް ނަޒަރެއްދެމުން އޭގައި ހިފިއެވެ. ދެން އިރުކޮޅެއްގައި ކޮމްޕިއުޓަރ ކައިރީ  ކޮންމެވެސް ކަމެއްކުރަން އިނެވެ. އެއަށްފަހު މައުވަންއަށް ދިއްކޮށްލީ ރަފާގެ ޑިސްޗާޖް ސަމަރީއެވެ. ތަނުގެ ގޮތުން އެބަލަން ނުހަދަ މައުވަން ޝުކުރު އަދާކޮށްފައި ފަތްޖަހާލާފައި ކަރުދާސް ގަނޑުލީ ޖީބަށެވެ.

ވޭތުވެ ދިޔަ ދުވަސްތަކުގައި ޝަރީފްވަނީ އަމީނާގެ ކިބައިން އެތަކެއްފަހަރު މާފަށްއެދިފައެވެ. އަނގައިން ސީދާ މާފުކޮށްފީމޭ ނުބުންޏެއްކަމަކު އަމީނާވެސް މިހާރު  ޝަރީފާއި ވާހަކަދައްކައެވެ. އަދި އެގުޅުން ދަނީ ދުވަހެއް ދުވަހަކަށް ބަދަހިވަމުންނެވެ. ދެމީހުން ގިނަވަގުތު އެކަކު އަނެކަކާ ވާހަކަ ދެއްކުމުގައި ހޭދަކުރެއެވެ. އެކަމާ އެއްމެ އުފާވަނީ މަލާކެވެ. އޭނަ އުއްމީދު ކުރަމުން ދާ ދުވަސް ލަސްނުވެ އަންނާނެކަމުގެ ނިޝާންތައް ފެންނާތީއެވެ.

ޔަޒާން އެއްމެފަހުން މަލާކް މަތިން ހަނދާން ނަންތާލާފައި އެމެރިކާއަށް ބަދަލުވީއެވެ. ދިރިއުޅުމުގައި އެއްމެންނަން ލޯބި ހާސިލެއް ނުވާނެއެވެ. އަނިޔާ ކިތައްމެ ވަރަށް ދިނަސް ބައެއްފަހަރު ބައިވެރި އާޔާއެކު އެއްބަޔަކު އުޅެމުންދަނީ ލޯބި ވާކަމަށް ބުނަމުންނެވެ. އެއްފަރާތުން ވެވޭ ލޯބީގެ މައްޗަށް ދިރިއުޅުން ބިނާ ކުރުން އެއީ ހަމަޖެހޭ އުސޫލެއް ނޫނެވެ. ޔަޒާން ބަދަލުވީ  މަންމައާއި ކޮއްކޮވެސް ގޮވައިގެންނެވެ. ޒާނާ ހުރީ އޭނަގެ ލޯބިވެރިޔާއާއި ދުރަށް ދާންޖެހޭތީ ކިތައްމެހާވެސް ދެރަވެފައެވެ. އެކަމަކު ޔަޒާންގެ ނިންމުމަށް އިޚްތީރަމް ކުރުމުގެ ގޮތުން އިންކާރު ނުކުރީއެވެ.

“ކޮންކަމަކާ ތި ވިސްނަނީ؟” އަލާ އޭނަގެ ބަހުރުވައިން އަކްޔަން އާއި ސުވާލިކޮށްލިއެވެ. އޭރު އަކްޔަން އޮތީ އެނދުގައި އޮށޯވެ ނިއްކުރިމަތީ އެއްއަތް ބާއްވައިގެން ވިސްނުމަކަށް ގެއްލިފައެވެ. ” ދޮންބެ އާ ދޭތެރޭ މި ވިސްނެނީ… ކުރިން އޮތް ގާތް ގުޅުމެއް މިހާރަކުނެތް…. އަސްލުއަހަރެންގެވެސް ފޯލްޓް އޮބެންހެން ހީވަނީ ގުޅުން މިހާ ހީނަރުވުމުގަ….މިހެން ވާހަކަ ނުދައްކަ ހުރުމަށްވުރެ ރަނގަޅު ވާނެކަންނޭނގެ ގުޅުން ރަނގަޅު ކޮށްފަ އަނެއްކާވެސް ދޮންބެ އިސްލާހުކުރަން މަސައްކަތްކުރީމަ” އަކްޔަން އޭނަ ވިސްނަމުންދާ ކަންތައް އަލާއާ ހިއްސާކޮށްލިއެވެ. އަދި އަލާވެސް އެއީ ރަނގަޅު ގޮތްކަމަށް ބުނެލިއެވެ. އަކްޔަން ނިންމީ މައުވަން މާލެ އައިހާ އަވަހަކަށް އެކަންކުރުމަށެވެ.

ރަފާހުރީ އޭނަ ކުރަންދިޔަ ކަންތައް ނިންމާލެވުމުން އުފާވެފައެވެ. އަދި ތައްޔާރުވެގެން ހުރީ ދެތިންދުވަސް ތެރޭ މާލެ ދިއުމަށެވެ. މިހާރު މައުވަން އެއީ އޭނަގެ އެކަނި މީހެކޭ ހިތަށްއަރާ ކޮންމެފަހަރަކު ހިތް އުފަލުން ނަށާލައެވެ. ތަޤްދީރުގެ ރޭވުން ނޭނގި ހުރެ އިންސާނުން އާއްމު އުސޫލުން ހަދާ ޕްލޭންތަށް ރަފާވެސް ދިޔައީ ހަދަމުންނެވެ.

މައުވަންމެން ދަތުރު ނިންމާލާފައި މާލެ އާދެވުނީ ރޭގަނޑު ވަރަށް ލަސްވެފައި ހުއްޓައެވެ. އެހެންކަމުން ދިޔަގޮތަށް ގޮސް މައުވަން ޖައްސާލީ ނިދާލާށެވެ. ރަފާ ކޮޓަރީގައި ނެތުމުން އޭނަ ނިންމީ އަދި ރާއްޖެ ނާންނަނީ ކަމުގައެވެ.

މަލާކް ޑިއުޓީގައި އަވަދިނެތި އުޅެނިކޮށް ފޯނަން އައީ ނިއަމްގެ މެސެޖެކެވެ. އެދެފައި ވަނީ ކެންޓީނަން ސައިބޯން އައުމަށެވެ. މަލާކަށްވެސް މެސެޖް ކިޔާލުމާއެކު ބަނޑުހައިކަން އިހްސާސްވިއެވެ. އަދި މި ދަނީކަމަށް ބުނެ ރިޕްލައިކޮށްލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.