ތަޤްދީރު (22)

ލޯމަރައިގެންހުރެ ޔާނިކް ހިނގަމުންދިޔައީ އެތަނުގައި ދުވަމުންދިޔަ ކުޑަ ޒީވާން އަތުލުމަށެވެ. ޔާނިކް އުޅެމުންދިޔަގޮތުން މަޖާވެފައި އަތްޖަހަމުން މުޅިއެތަނުގައި ޒީވާން ދުވަމުންދިޔައެވެ. ލޯމަރައިގެންހުރުމުގެ ސަބަބުން އެދިމާއަށްއައި މަލްހާއެއް ޔާނިކްއަކަށް ނުފެނެއެވެ. ކުއްލިއަކަށް އޭނާއަށް ގެނެވުނު އަވަސްހަރަކާތާއިއެކު ނުވިސްނައި ބަގީޗާތެރެއަށް ނުކުތް މަލްހާގެ ގައިގައި ޖެހިފައި ދެމީހުން އެދިމާއަށް ވެއްޓެންދިޔައެވެ. މަލްހާގެ ބާރުހަޅޭކާއިއެކު ދެލޯހުޅުވައިލަމުން ކަންބޮޑުވެފައި ޔާނިކް އޭނާގެ ގައިދަށުގައިއޮތް މަލްހާއަށް ބަލައިލިއެވެ. ދެލޯމަރައިބާރުކޮށްލައިގެން މަލްހާ އޮތްގޮތުން އޭނާއަށް ވަރަށް ބޮޑަށް ތަދުވެއްޖެކަން ޔާނިކްއަށް އެނގުނެވެ. މިމަންޒަރުބަލަން ތަންކޮޅެއްދުރުގައިހުރި ޒީވާން އެނބުރިގަންނަމުން ހޭންފެށިއެވެ. ދެމީހުންވެއްޓުނުގޮތުން އޭނާއަށް މަޖާވީއެވެ. ޒީވާންގެ ހުނުމުގެއަޑަށް އެސްފިޔަތައް ތަޅުވައިލަމުން ދެލޯހުޅުވައިލުމަށްފަހު މަލްހާ ސީދާ ޔާނިކްގެ ފުންދެލޮލަށް ބަލައިލިއެވެ. އެބަލައިލުމުން ޔާނިކްގެގައިން ހީބިނަގައިގެންދިޔައިރު އެހިތުގެތެޅުން އަވަސްވެގެންދިޔައެވެ.

ތެޅިފަނެފައި މަލްހާ ޔާނިކްއާއި ދުރުވެލިއެވެ. ނޫންކަމަށް ހަދައިލަމުން ޔާނިކްވެސް މަލްހާއާއި ދުރުވެލިއެވެ. އޭރުވެސް ހުއްޓުމެއްނެތި ޒީވާން އަތްޖަހައިފައި ހެމުންދިޔައެވެ. މަލްހާގެ ދޮންމޫނަށް ލަދުވެތިކަމުގެ ރަތްކުލަވެރިވެފައިވީއިރު ޔާނިކް ހުރީ ބަސްހުއްޓިފައި އެމޫނަށް ބަލަހައްޓައިގެންނެވެ. ހިތުތެރޭގައި ތައުރީފުގެ އެތައްބަސްތަކެއް އުތުރިއަރަމުން ދިޔައެވެ. އެހެނަސް އެއިން އެއްވެސް ބަހެއް ދުލާއިހަމައަށް ގެންނަން އޭނާހުރީ ނުކުޅެދިފައެވެ.

ކަޅުކުލައިގެ ގަޔަށްދޫ އަބާޔާއަކާއި ކަޅު ބުރުގަލެއް އަޅައިގެންހުރިއިރު މަލްހާގެ މައުސޫމްކަން އެތައްގުނައެއް އިތުރުވެފައިވާކަހަލައެވެ. އިސްޖަހައިލައިގެންހުރިއިރު ތިރިކޮށްލައިފައިވާ އެރީތިދިގު އެސްފިޔަތައްފެނިފައި ޔާނިކްގެ ހިތްހީވީ އޭގެ މަގާމްދޫކޮށް ނުކުމެފާނެހެންނެވެ.

ޔާނިކްހުރިގޮތްފެނި ލަދުގަނެފައިހުރި މަލްހާ އިސްޖަހައިލައިގެންހުރެ ޒީވާން އާއި ދިމާއަށް ހިނގައިގަތެވެ. އެކުޑަ އަތުގައި ހިފައިލަމުން އަވަސް އަވަހަށް ޔާނިކްގެ ލޯކުރިމަތިން ދުރަށްދިއުމަށް މަލްހާ ހިނގައިގަތްއިރު ލުއި ހިނިތުންވުމަކާއެކު މަލްހާގެ ކޮންމެ ހަރްކާތަކށް ގެއްލިފައި ޔާނިކް ހުރިތަނުގައި ހުއްޓެވެ. އެތަނުން ގުޑިލަންވެސް އޭނާ ބޭނުންނުވާފަދައެވެ. ދެންމެވީކަންތައް ހިތަށް ގެންނަމުން ޔާނިކް ހިނިތުންވެލިއެވެ. އެއާއެކު މަލްހާ އޮފީހަށްވަތް ދުވަސްކޮޅު އެދެމީހުން ދެމެދުގައި ހިނގައިދިޔަ ކުޑަ އެކްސިޑެންޓް ޔާނިކްގެ ހަނދާނަށް އައެވެ. މޭގައި އެއްއަތުން ފިރުމައިލަމުން ޔާނިކް ދެލޯމަރައިލީ ހިތްހަމަޖެހިފައި ހުރެއެވެ. އެހިތުގެ އެދުން ފުރިހަމަކުރަން އޭނާ ހާދަހައި ބޭނުމެވެ. މަލްހާ އޭނާގެ ހައްގަކަށް ހަދެމަށްޓަކައި ޔާނިކްވަނީ ކެތްމަދުވެފައެވެ. އެހެނަސް އަދި ކެތްކުރަން އޭނާ ބޭނުންވީ މަލްހާއަށް ވަގުތުދިނުމުގެ ގޮތުންނެވެ.

** ** **

“މިއަދު އީނާލް ފާއިޒާ ގާތުގައި ކޮންވާހަކައެއްތަ ދެއްކީ؟” ނިދުމަށްޓަކައި އެނދުގައި އޮށޯވެގެންއޮތް ލުތުފީ ފާއިޒާ ގާތުގައި އަހައިލިއެވެ. އެއާއެކު ފުންވިސްނުމަކަށް ގެއްލިފައޮތް ފާއިޒާ ލުތުފީއާއި ދިމާއަށް އެނބުރިލިއެވެ. ފާއިޒާގެ ޖަވާބެއްގެ އިންތިޒާރުގައި އޮތްފަދަގޮތަކަށް ލުތުފީ ފާއިޒާ އާއި ދިމާއަށް ބަލަހައްޓައިގެން އޮތެވެ.

“ޔާނިކްގެ ވާހަކަ ބުނީ. އޭނަ.. އޭނަ ލޯބިވާ ކުއްޖާގެ ވާހަކަ. ލުތުފީ. އަހަރެންނަށް ހީވަނީ އަހަރެމެންނަށް ޔާނިކްއާ މެދުގައި ކަންތައްމިކުރެވެނީ ރަނގަޅަކަށް ނޫންހެން. ލޯބިވުމަކީ ކުށެއްނޫނެއްނު. އެހެންނޫނަސް އެޖުއްޖެއްދެކެ ލޯބިވެއޭ ކިޔާފަ ޔާނިކް އެދެމެދަށްވަންނާކަށް މަސައްކަތްކުރީކީވެސްނޫން. ކެތްތެރިކަމާއެކު އެލޯތްބަށް އިންތިޒާރުކުރީ. ލުތުފީ ތިހެން ކަންތައްނުކޮށްބަލަ އޭނާއާއި ދޭތެރޭ. ހެޔޮނުވާނެ. އަހަރެންގެ ދަރިފުޅު އުޅޭ ހާލު ބަލާކަށް އަހަރެންނަކަށް ކެތެއްނުވާނެ.” ކަންބޮޑުވެފައި ފާއިޒާ ދައްކަމުންދިޔަ ކޮންމެވާހަކައެއް ކަނުލައި އަޑުއަހަން ލުތުފީ އޮތެވެ. ދޭނެ ޖަވާބަކާއި މެދުގައި އޭނާ ވިސްނަމުންދާކަން އެމޫނުމަތީގެ ކުލަވަރުން އެނގި ހާމަވަމުންދިޔައެވެ.

“ލުތުފީ. ކޮންމެވެސް އެއްޗެކޭ ބުނެބަލަ.” ތެދުވެ އެނދުގެ ފަޑީގައި ލެގިލަމުން ފާއިޒާ އާދޭހުގެ ރާގަކަށް ބުނެލިއެވެ. “އަހަރެން ކީކޭ ބުނަންވީ؟ އަހަރެން ވަރަށް ވިސްނައިފިން ތިކަމާ. ޔާނިކް ބޭނުންވާގޮތް ހަދައިދެންވެސް ބޭނުން. އެކަމަކު އޭނާ ކިތަންމެ ބޭނުމަސް މީހެއްގެ އަންބެއް ކިހިނެއް..” ސުވާލު ފުރިހަމަކުރާނެގޮތެއް ލުތުފީގެ ސިކުނޑިއަކަށް ނުވިސްނުނެވެ. ލުތުފީ ބުނަންއުޅުނީ ކީކޭކަން ފާއިޒާއަށް ވިސްނުނެވެ.

“އެކުއްޖާ ހުރީ މިހާރު ވަރިކޮށްފަ.” ލަސްލަހުން ފާއިޒާ ބުނެލި ޖުމުލައާއެކު ސުވާލުގެ ނަޒަރަކުން ލުތުފީ ބަލައިލިއެވެ. “ވަރިކޮށްފައޭ؟ ކީއްވެ؟ އަނެއްކާ ކޮންކުއްޖެއް އެއީ؟” ދެކެވެމުންދިޔަ ވާހަކައިގެން ސަބަބުން ލުތުފީއަށްވެސް އޮށޯވެއޮންނަން އުނދަގޫވުމުން ތެދުވެ އިނށީދެލަމުން ފާއިޒާގެ މޫނަށް ބަލައިލިއެވެ. “މަލްހާ. ޔާނިކްގެ ޕީއޭ. އީނާލްގެ ވަރަށް ގާތް އެކުވެރިއެއް.” އެހެންބުނެލުމަށްފަހު ރާއިދާއި ލިވްޔާ މަލްހާ އާއި މެދުގައި ކަންތައްކުރި އިހާނެތިގޮތުގެ ވާހަކަތައް ކިޔައިދިނެވެ. ޔާނިކް އުޅޭހާލުފެނި ކެތްނުވެގެން މިއަދު އީނާލް އެގެއަށްއައީ އޭނާގެ ދޮންބެއަށްޓަކައި އޭނާގެ މައިންބަފައިން ގާތުގައި އެވާހަކަތައް ދެއްކުމުގެ ބޭނުމުގައެވެ. ހުރިހައި ވާހަކައެއް ފެށިގެން ނިމެންދެން އީނާލް ފާއިޒާއަށް ކިޔައިދިނެވެ. ހައިރާންކަމާއެކު އީނާލް ދެއްކި ކޮންމެވާހަކައެއް ފާއިޒާ އަޑުއެހިއެވެ. އެއާއެކު އެހިތުގައިވެސް މަލްހާއާއި މެދުގައި ހަމްދަރުދީ އުފެދުނެވެ. އަމިއްލަ ދަރިފުޅުގެ އުފަލާއިމެެދުގައި ވިސްނަައިލެވުނެވެ. ޔާނިކްގެ އުފަލަކީ މަލްހާކަމަށްވަންޏާ އޭނާ އެކަމާއިވެސް ރުހިގަބޫލެވެ. އެފަދަ ގޮތަކަށް ޔާނިކް އޭނާގެ ދިރިއުޅުން ބޭކާރުކުރާތަން ބަލާކަށް އޭނާގެ މައިލަގޮނޑިއަކަށް ކެތެއްނުވާނެއެވެ.

“ކީކޭ ބުނާނީދޯ؟ މިޒަމާނު ކަމެއްކުރަންވެއްޖިއްޔާ އެއްބަނޑު އެއްބަފާ ކުއްޖަކަށް ބަލައިލުމެއްވެސް ނެތްވިއްޔަ. އަހަރެން ހަމަ ހައިރާންވެއްޖެ އޭނާގެ ކޮއްކޮއަށް ތިހެންކަންތައްކުރަން ކެރުނީތީވެސް. ޕިސްޕިސް.” ދެފަރާތަށް ބޯހޫރުވައިލަމުން ލުތުފީ ބުނެލިއެވެ. ފާއިޒާވެސް ލުތުފީގެ ވާހަކައަށް އެއްބަސްވިއެވެ.

“އަހަރެން ތިކަމާ ޔާނިކްއާ ވާހަކަދައްކާނަން. އެއަންހެންކުއްޖާ ގަބޫލުވެއްޖިއްޔާމުންތާ ތިކަންވެސް ކުރެވޭނީ. އެހެންވީމަ ޔާނިކްއާ ވާހަކަދައްކާފަ އަހަރެން ގޮތެއްނިންމާނަން. ދެން އެކަމާ ފާއިޒާ އެހަައިވަރަށް ނުވިސްނާ. މިހާރު ވަރަށް ލަސްވެއްޖެ. ދެން ނިދަމާ ހިނގާ.” ލޯތްބާއެކު ފާއިޒާގެ ބޮލުގައި ފިރުމައިލަމުން ލުތުފީ ބުނެލިގޮތުން ނުތަނަވަސްވެފައިވާ ފާއިޒާގެ މޫނުމައްޗަށް ހިނިތުންވުމެއް ވެރިވިއެވެ. އޭނާގެ ފިރިމީހާއަށް އޭނާ އިތުބާރުކުރެއެވެ. އަބަދުވެސް ކުރާނެއެވެ.

** ** **

އަތުގައިއޮތް ފޯނަށް އިރުކޮޅަކު ބަލަންހުރުމަށްފަހު ފުންނޭވާއެއްލަމުން ލިވްޔާ އާބިދާގެ ނަމްބަރަށް ގުޅައިލިއެވެ. ދެފަހަރަކު ރިންގްވުމަށްފަހު އާބިދާ ފޯންނެގިއެވެ.

“ދަރިފުޅާ. ކިހިނެއްތަ؟” އޯގާތެރިކަމާއެކު އާބިދާ އަހައިލިއެވެ. “ރަނގަޅު. މަންމަ ކިހިނެއް؟” ލިވްޔާގެ އަޑުގައިވި ހާސްކަން އާބިދާއަށް ވަގުތުން ފާހަގަވިއެވެ. ލިވްޔާގެ ސުވާލަށް ޖަވާބުދިނުމުގެ ބަދަލުގައި އާބިދާވެސްކުރީ ސުވާލެކެވެ.

“ދަރިފުޅާ. ހުރިހައިކަމެއް ރަނގަޅުތަ؟” އާބިދާގެ އެސުވާލާއިއެކު ލިވްޔާ ދެލޯމަރައިލަމުން ހަމަޖެހެން މަސައްކަތްކުރަމުންދިޔައެވެ. “އަހަރެން.. މަންމާ. އަހަރެން އަަސްލު ވާހަކައެއްބުނަން ގުޅީ.” ހިތްއަވަސްވެފައިވާ ހާލު ލިވްޔާ ބުނެލިއެވެ. ކޮންވާހަކައެއްހޭ ބުނެލަމުން އާބިދާވެސް ލިވްޔާ ދައްކަން އެއުޅޭ ވާހަކައަކށް ސަމާލުވެލިއެވެ.

“މަންމާ.. ރާއިދް.. ރާއިދް.. އަހަރެން ގާތުގައި ކައިވެންޏަށް އެދެފި.” އިރުކޮޅެއްގެ ހަމަހިމޭންކަމަށްފަހު އަޅައަޅައިގަންނަމުން ލިވްޔާ ބުނެލިއެވެ. އެއާއެކު އާބިދާގެ ދެލޯބޮޑުވެގެންދިޔައެވެ.

“ކީކޭ؟ ލިވީއަށް އެބައެނގޭތަ ތިކިޔޭ އެއްޗެއް؟ އެއީ ލިވީގެ ދޮންތަބެއެއްނު. މީހުން ކީކޭ ކިޔާނީ؟” ނުރުހުންވެފައި އާބިދާ ބުނެލިގޮތުން ލިވްޔާގެ ހިތަށް ތަދުވިއެވެ. ކޮންމެގޮތެއްވިއަސް ވަރިހަމައެވެ. އޭނާ ރާއިދްއާއި ކައިވެނިކުރާނެއެވެ.

“މިހާރު އެއީ އަހަރެންގެ ދޮންތަބެއެއްނޫނެއްނު. ދޮންތަ އަމިއްލައަކަށްނު އޭނަ ދޫކޮށްލާފް ދިޔައީ. ދެން މީހުންކިޔާނެ އެއްޗެއް ދޯ. އަހަރެން ބޭނުމެއްނޫން އެކަމާ ވިސްނާކަށް. މީހުން އެއްޗެއް ނުކިޔާ ގޮތަކަށް ނުއުޅެވޭނެ. އެހެންނޫނަސް ދޮންތައާއިހެދި ރާއިދް ހާދަ ހިތާމައެއްކޮށްފިއޭ މަންމާ. އަހަރެންނަކަށް ކެތެއްނުވޭ އޭނަ އެއުޅޭ ހާލު ބަލާކަށް. އަހަރެން.. އަހަރެން ބޭނުން ރާދުއާ ކައިވެނިކުރަން. ހަމަގައިމުވެސް ދޮންތައަށް ނުދެވުނު ލޯބި އަހަރެން ރާދުއަށް ދޭނަން.” ލިވްޔާގެ ވާހަކަތަކށް ދޭނެ ޖަވާބެއް އާބިދާއަކަށް ނުވިސްނުނެވެ. އެހެނަސް ލިވްޔާބުނި ކޮންމެ ޖުމުލައެއް އޭނާ ހިތުގެއަޑިން ގަބޫލުކުރިއެވެ. މަލްހާ އުޅޭނެގޮތަކަށް އުޅެފައި ރާއިދް ދޫކޮށްލައިފައި ދިޔައީއެވެ. އެކަމާ ރާއިދް ހިތާމަކުރާނެވަރު ވިސްނައިލުމެއްނެތިއެވެ. ވީއިރު ރާއިދް މަލްހާގެ އުފަލާއިމެދުގައި ވިސްނަންވީ ކީކުރަންހެއްޔެވެ؟

“އޯކޭ. ބައްޕައާ ވާހަކަދައްކައިލުމަށްފަހު މަންމަ ލިވީއަށް ޖަވާބެއްދޭނަން. އެކަމަކު ލިވީއަށް ރާއިދާއި އެކީގައި އުފަލުގައި އުޅެވޭނެތަ؟” ވަރަށް ވިސްނައިލުމަށްފަހު އެންމެފަހުން އާބިދާ ގޮތެއްނިންމިއެވެ. އާބިދާގެ ޖަވާބުން ލިވްޔާ ހިތްހަމަޖެހުނެވެ.

“އާން. އަހަރެންނަށް ޔަގީން އޭނަ އަހަރެން ގެންގުޅޭނީ ވަރަށް އުފަލުންކަން. މަންމަ އެކަމާ ކަންބޮޑުނުވޭ. ބައްޕައާ ވާހަކަދައްކައިލުމަށްފަހު އަހަރެންނަށް އަންގާލާ.” އެނދުމައްޗަށް ވެއްޓިގަންނަމުން ލިވްޔާ ބުނެލިއެވެ. އާއެނކޭ ބުނުމަށްފަހު ކޯލު ކުރުކޮށްލަމުން އާބިދާ ފޯނު ބޭއްވިއެވެ. އެއާއެކު ތެދުވެލަމުން ލިވްޔާ އެނބުރިލިއެވެ.

“އަހަރެންގެ މިހުވަފެން އަހަރެން ފުރިހަމަކުރާނަން. ޔެސް ޔެސް. ރާދު. ތީ ހަމައެކަނި އަހަރެންގެ ހައްގެއް. އޮންލީ މައިން. ހަހަހަ.” ހެމުންހެމުން އަމިއްލާ ނަފުސާއި ވާހަކަދައްކަމުން ލިވްޔާ ދިޔައީ ހިތްހަމަޖެހިފައި ހުރިވަރުންނެވެ.

** ** **

ސަލީމާއި އާބިދާ އެތައްއިރަކު އެކަކު އަނެކަކާ މަޝްވަރާކުރުމަށްފަހު ނިންމީ ލިވްޔާ އާއި ރާއިދްގެ ކައިވެނި ވީހައިވެސް އަވަހަކަށް ކުރުވުމަށެވެ. ލިވްޔާ ރާއިދާއި އެކުގައި އުޅެން ބޭނުންނަމަ އެދެމެދަށް ހުރަސްއަޅަކަށް ސަލީމް ބޭނުމެއްނުވިއެވެ. އެކަމާ އާބިދާވެސް އެއްބަސްވީ ލިވްޔާގެ އުފަލާއި މެދުގައި ވިސްނުމަށްފަހުގައެެވެ.

އުމުރުގެ ފަރަގު ބޮޑު ނަމަވެސް އެކަމާ ވިސްނާކަށް އާބިދާއާއި ސަލީމްކުރެ އެކަކުވެސް ބޭނުމެއްނުވިއެވެ. އެއަށްވުރެބޮޑަށް އެމީހުންގެ ހަގުދަރީގެ އުފާއެމީހުނަށް މުހިއްމެވެ.

މައިންބަފައިންގެ މިނިންމުމުން އެންމެބޮޑު ހަމަޖެހުމެއްލިބުނީ ލިވްޔާއަށެވެ. ވަގުތުން ރާއިދަށް މިޚަބަރު ދިނެވެ. ރާއިދްވެސް ހީވަނީ އުފަލުން މޮޔަވެދާނެހެންނެވެ. ދެމީހުން އަވަހަށް އެމީހުންގެ ކައިވެންޏަށް ތައްޔާރުވާންފެށީ އިތުރަށް ލަސްކުރަން ބޭނުންނުވުމުންނެވެ.

** ** **

އުޑުމަތިބަނަ ދުވަހެކެވެ. ވައިވެސް އިރެއް އިރަކަށް ދިޔައީ ބާރުވަމުންނެވެ. އުޑުމައްޗަށް ނަޒަރު ހިންގައިލަމުން މަލްހާ ބަގީޗާ ތެރެއަށް ނުކުތެވެ. އެހެންމީހުން ކުރިމަތީގައި ހިނިތުންވި ނަމަވެސް އެކަނިވާ ކޮންމެ ވަގުތަކު ރާއިދްމަތިން އޭނާ ހާދަހައި ހަނދާންވެއެވެ. މުޅި ދުނިޔެއަށް ސިއްެރުން އަދިވެސް މަލްހާ އެކަމާ ހިތާމަކުރެއެވެ.

އެހެނަަސް ފާއިތުވަމުންދިޔަ ވަގުތާއެއްކޮށް މަލްހާގެ ހިތާމަތައްވެސް ލުއިވަމުންދިޔައެވެ. ގޭގެ ސިޓިންރޫމްގައި ޔާނިކްއާއެކުގައި ޒީވާން ސަކަރާތްޖަހަން ހުރުމުން މަލްހާ ބޭނުންވީ އެކަނި އެތަނުގައި ވަގުތުކޮޅެއް ހޭދަކޮށްލާށެވެ.

ކުއްލިއަކަށް ގޭގެ ގޭޓް ހުޅުވުނުއަޑަށް ސިހިފައި މަލްހާ ފަހަތަށް އެނބުރި ބަލައިލިއެވެ. ގޭޓުން ވަދެގެންއައި ރާއިދް ފެނުމުން މަލްހާގެ ހިތް ހިނދުކޮޅަކަށް ހުއްޓުނުކަހަލައެވެ. ދެލޯބޮޑުކޮށްގެން ރާއިދާއި ދިމާއަަށް ބަލަންހުރި މަލްހާގެ ތުންފަތްމައްޗަށް ހިނިތުންވުމެއް ވެރިވިއެވެ. އެދިމާއަށް އޭނާއަށް ހިނގައިގަނެވުނީ ބޭއިޚުތިޔާރުގައެވެ. އެންމެފަހުން ރާއިދް އޭނާ ބަލައި އައީއެވެ. އޭނާގެ ރާއިދް އެނބުރިއައީއެވެ. ކުޑަކޮށް ހިނގުން ބާރުކޮށްލަމުންގޮސް މަލްހާ ރާއިދްގެ ގައިގައި ބާރަށް ބައްދައިގަތެވެ. އެމޭގައި މޫނުފޮރުވައިލަމުން ރާއިދްގެ އުނަގަނޑުގައި ދެއަތްވަށައިލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.