ކުރިން އެނގުނުނަމަ (ހަތާވީސްވަނަ ބައި)

އާދުވަހަކަށް އިރުއެރީ އާ އުއްމީދު ތަކަކާއެކުގައެވެ. ޒީކް ހުރީ ބޭބެގެ އިންތިޒާރުގައެވެ. ރުއާން ކައިރީގައި ދައްކަން ބޭނުންވާ އެތައް ބައިވަރު ވާހަކަތަކެއް އޭނާ އެބަހުއްޓެވެ. ޒީކް މެންނާއި އެކުގައި އުޅުމަށް އަބަދުގެ އަބަދަށް އެމީހުންގެ ކައިރިއަށް އަންނާށޭ ބުނަން ބޭނުންވެއެވެ. ނަމަވެސް ރުއާން އަންނާނެ ބާވައެވެ.

ޒީކް އުނދޯލީގައި އިށީދެލައިގެން އިނެވެ. ހުދުކުލައިގެ ދޫ ޓީސާޓަކާއި ފައިތިލައާ ހަމައަށް އަންނަ ދޫ ހަރުވާޅުގައި ޒީކް ފެންނަނީ މައުސޫމް ގޮތަކަށެވެ. ދެފައި ހަލުވާލަ ހަލުވާލާއިން ޒީކް އިންއިރު ޖެހެމުން ދިޔަ ވައިރޯޅިތަކުން އުނދޯލި މަޑުމަޑުން ހެއްލެމުން ދިޔައެވެ. ބޮލުގައި ހުޅިއެއް ޖަހާލާފައި ވުމުން އެއޮމާން ދޮން ކަނދުރާ ވަނީ ހާމަވެފައެވެ. އަލްޔަން އަށް ޒީކް ފެނުމުން އުނދަގޫ ކޮށްލާހިތް ވިއެވެ. ޒީކްގެ ފުރަގަހުން އަލްޔަން މަޑުމަޑުން އުނދޯއްޔާ ކައިރިވަމުން ދިޔައެވެ. ޒީކް އިނީ މަގަށް ކުރި މަތި ލައިގެން ކަމުން ސައިކަލުގައި އައިސް މަޑުކޮށްލި ރުއާން ފެނުމާއެކީ ފުންމައިގެން އުނދޯލިން ޒީކްއަށް ތެދުވެވިއްޖެއެވެ. އުނދޯއްޔަށް އައި ލޮޅުމާއެކީ ހެލިގަތީ ބާރަށެވެ. އޭރު އުނދޯއްޔާ ފޫޓެއްހާ ކައިރިވެފައި ހުރި އަލްޔަންއަށް ލިބުނީ ކުއްލި ސިހުމެކެވެ. އުނދޯލިއައިސް އަލްޔަންގެ ފައިގައި ޖެހުމާއެކު ނުވެއްޓުނީ ކިރިޔާއެވެ. ފަޔަށް ކޮންމެވެސް ވަރަކަށް ތަދުވެސް ވިއެވެ.

ޒީކް ދުވެފައި ގޮސް ރުއާންގެ ކުރިމައްޗަށް ހުއްޓެމުން ރުއާންގެ ގައިގާ ބައްދާލިއެވެ. ރުއާންއަށް ލިބުނު ކުއްލި ސިހުމާއެކު ޒީކް ގަޔާ ދުރުކޮށްލަން މަސައްކަތްކުރިއެވެ. ނަމަވެސް ޒީކް ރުއާންގެ ގައިގާ ހިފަހައްޓާލާފައި ހުރީ ރުއާންއަށް ފަސޭހައިން ދުރުކޮށްލެވޭ ވަރަށް ވުރެ ބާރަށެވެ. ދުވަހަކުވެސް ލޯމަތިން ގެއްލެން ބޭނުން ނުވާތީ ކަންނޭގެއެވެ. އަލްޔަންއަށް އެދިމާއަށް ބަލާލެވުނު ވަގުތު ފެނުނު މަންޒަރުން ހީވީ ހިތް ފޮތިފޮތި ކޮށްލިހެންނެވެ. ޒީކްއާއި މެދުގައި ހިތުގައި ޝަކުވާ އުފެދުނެވެ. ރުއާންއަށް އެގޮތަށް މައާފު ކުރެވުނުއިރު އޭނާއާއި ދޭތެރޭ އެހާ ގާތްކޮށް އުޅެން ޒީކް ބޭނުން ނުވާތީއެވެ.

“އޭ ޒީކް” ރުއާން ޒީކްގެ އަތް ނައްޓުވާލަމުން ބުނެލިއެވެ. ރުއާންއަށް އެއީ ބޭބެކަން ޒީކްއަށް އެނގިއްޖެކަން ވިސްނިއްޖެއެވެ. އެހެން ނޫންނަމަ ޒީކް މިފަދަ ގޮތޮކަށް ރުއާންއަށް ބަލައިވެސް ނުލާނެކަން އެނގެއެވެ. ޒީކްވެސް ރުއާންއާއި ދުރަށް ޖެހިލަމުން ރުއާންގެ މޫނަށް ބަލާލިއެވެ. އަދި ރުއާންގެ މޫނަށް ބަލާލަމުން ރުއާންގެ މޭގައި ދެއަތުން ތަޅައިގަތީ ކުޑަކުއްޖަކު ކުއްޖަކު ފަދައިންނެވެ.

“އަދިވެސް ބޮޑެއް ނުވޭތަ؟” ރުއާން ޒީކްގެ ދެއަތުގައި ހިފަހައްޓާލަމުން ބުނެލިއެވެ. އެވަގުތު ޒީކްއަށް މަގުމައްޗަށް ނަޒަރު ހިންގައި ލެވުނުއިރު މީހުން މަދު މަގުމަތީގައި މަޑުކޮށްގެން ތިބި ދެތިން މީހަކު ލޮލުގައި އަޅައިގަތުމުން މޫނު މައްޗަށް ވެރިވި ލަދުވެތިކަމާއެކު ގޯތިތެރެއަށް ވަންނަން ދުއްވައިގަނެފިއެވެ. އޭރު އަލްޔަންވެސް އައިސް އެތަނަށް ހުއްޓެނީއެވެ.

“ރުއާން ތީ ކޮންކަމެއް؟” އަލްޔަން އެހެން އަހާލީ ހިތްހަމަނުޖެހިފައެވެ. ޒީކްގެ ގައިގާ އެހެން ފިރިހެނަކު އިނގިލި ކުރި ޖައްސާލަންވެސް އަލްޔަންގެ ހިތެއް ނުރުހެއެވެ.

“ކޮބާ؟” ވީގޮތް ރަނގަޅަށް އެނގޭ އިރުވެސް އަލްޔަން ތަޅުވާލުމުގެ ބޭނުމުގައި ފަރުވާކުޑަ ގޮތަކަށް ރުއާން ބުނެލިއެވެ.

“ނޭނގިގެންތަ ތިހެން ތިބުނަނީ. ޒީކްއާއި ދުރުގަ ހުންނާތި. ޒީކްއާއި ކައިރި ވިޔަސް ….” އަލްޔަންގެ ޖުމަލް ފުރިހަމަ ނުކޮށް ހުއްޓާލިއެވެ. ހިތުގެ ހައިޖާނު މާބޮޑުވުމުން މިވަގުތު ރަނގަޅު ވާހަކައެއް ނުދެއްކޭނެކަން ވިސްނުނީ ކަމަށްވެސް ވެދާނެއެވެ.

“ކީއްކުރާނީ ކީއްކުރެވޭނީ އެހެން ނޫނަސް އަހަރެން މިހެން ހުރިހާ ދުވަހަކު އަލްޔަންއަށް ދުވަހަކުވެސް ޒީކްއެއް ނުލިބޭނެ” ރުއާން އަލްޔަން އިތުރަށް ރުޅި އަރުވާލުމުގެ ބޭނުމުގައި ބުނެލިއެވެ. ކަންތައް ވީވެސް އެހެންނެވެ. އަލްޔަންއަށް ރުޅި ކޮންޓްރޯލް ނުކުރެވުނީއެވެ. ރުއާން ލައިގެން ހުރި ގަމީހުގެ ގިރުވާނުގައި ދެއަތުން ހިފީ ދުވަހަކުވެސް އެފަދައެއްޗެއް ރުއާންގެ އަގައިން ބޭރުވިޔަ ނުދޭނަމޭ ބުނާފަދަ ގޮތަކަށެވެ. ނަމަވެސް ރުއާން ލާނެތް ހިނިތުންވުމެއް މޫނު މައްޗަށް ވެރިކުރުވައިގެން ހުރީއެވެ.

“އަލްޔަން ކީއްތަ ތިކުރަނީ” ޒީކް އެތަނަށް ނިކުތީ އެމީހުން އެތެރެއަށް ނުވަދެ ލަސްވުމުންނެވެ.

އަލްޔަން ރުއާންގެ ގަމީހުން ދޫކޮށްލަމުން ޒީކްއަށް ބަލާލިއެވެ. އަދި އެތެރެއަށް ބާރުބާރަށް އެތެރެއަށް ވަދެގެން ހިނގައްޖެއެވެ. ރުއާން އައިސް ޒީކް ކައިރިއަށް ހުއްޓެމުން ސިއްރުސިއްރުން ޒީކް ކައިރީގައި ވާހަކަ ތަކެއް ދައްކައިފިއެވެ. އެއާއެކު ބާރުބާރަށް ޒީކް ހޭން ފަށައިފިއެވެ. ރުއާންއަށް އެމަންޒަރު ބަލަން ހިނިތުންވެފައި ހުރެވުނެވެ. ޒީކް އެހާ އުފާވެފައި ހިނިތުންވެލައިގެން ހުރި ތަން ފެނުނު މީ ފުރަތަމަ ފަހަރެވެ. އެ ހިނިތުންވުމުން ޒީކްގެ ރީތިކަން އެތައް ގުނައެއް އިތުރުވެފައި ވާތަން ފެނުމުން އެތައް ފިރިހެނުން އޭނާގެ ކޮއްކޮއަށް ކަޅި އަޅާނެކަން އެނގުމުން ހިތްނުތަނަސްވާގޮތް ވެއްޖެއެވެ. ދެމީހުން އެކުގައި ގޭތެރެއަށް ވަދެގެން އަންނަ ތަން ފެނުމުން ހަފީޒާވެސް ހުރީ ވަރަށް ހިތްހަމަޖެހިފައެވެ. އުފާވެރި އާއިލާ އަނެއްކާވެސް ފުރިހަމަ ވެއްޖެކަމުގެ އިހްސާސް ކުރެވިގެން ހިނގައްޖެއެވެ.

އެދުވަސް ވޭތުވެގެން ދިޔައީ ޒީކްއާއި ރުއާންގެ ހަޔާތަށް އައި އެންމެ އުފާވެރި ދުވަސްގެ ގޮތުގައެވެ. އެކިއެކި ކަންތައްތައް ދެމީހުން އެކަކު އަނެކަކަށް ކިޔައި ދެމުން ދިޔައީ އުފަލާއެކުގައެވެ. ޒީކް އަބަދުވެސް ރުއާންގެ ފަހަތުން އުޅެމުން ދިޔައިރު ހަފީޒާ އެމަންޒަރުތައް ބަލަމުން ދިޔައީ އުފަލާއެކުގައެވެ. ނަމަވެސް އަލްޔަން ހިތްހަމަނުޖެހިފައި ހުރެ ރުއާންގެ ހަރަކާތްތަކަށް ފާރަވެރިވަމުންދިޔައެވެ. ރުއާންއާއި މެދުގައި އަލްޔަންގެ ހިތުގައި ރުޅިވެރިކަމުގް ހުޅުކޮޅުރޯވަމުން ދިޔައެވެ. ހަގީގަތަކީ ކޮބައިކަން ނޭނގިހުރެއެވެ. އަލްޔަންއަށް ވެފައި ހުންނަ ގޮތް ފެންނަ ކޮންމެ ފަހަރަކު ޒީކްއާއި ރުއާންގެ ގާތަށް އަންނަނީ ލާނެއް ހިންޏެކެވެ. އެކަކުވެސް ހަގީގަތް ބުނެދޭކަށް ބޭނުމެއްވެސް ނުވެއެވެ. ބަދިގޭގައި ކައްކަން އުޅުނު ވަގުތުގައި ރުއާން ޒީކްއަށް އެހީވަމުން ދިޔައިރު އަލްޔަންވެސް އެތަނުގައި އެމީހުންނާއި ބައިވެރިވެވޭތޯ އުޅުނެވެ. ނަމަވެސް ޒީކްއާއި ރުއާން އަލްޔަން އެއްވެސް ސަމާލުކަމެއް ނުދިނުމުން އެންމެފަހުން ނިކުމެގެން ދިޔައީއެވެ. ހަވީރު ވަގުތުވުމުން ދެމީހުން އެކުގައި އަލްޔަން ކައިރީގައި ބުނެވެސް ނުލައި ސައިކަލުގައި ދުއްވާލަން ދިޔުމުން އަލްޔަންގެ ރުޅިވެރިކަން އިންތިހާއަށް ދިޔައެވެ. ޒީކް ގެއްލިދާނެ ކަމުގެ ބިރުވެރިކަން ހިތުގައި އުފެދިގެން ދިޔައެވެ. ދަތުރު އަވަސް ކޮށްގެން މާލެދާން ބޭނުންވިއެވެ.

ރޭގަނޑުގެ ހަމަހިމޭން ވަގުތެވެ. އިޔާންއާއި އާލިން ގެއަށް ނާންނާތީ ސިޓިންގ ރޫމުގައި މިސައިބާ އިށީދެލައިގެން އިނެވެ. ހިންދީ ސީރީޒްގެ ތެރެއަށް ގެއްލިފައިން މިސައިބާ ސިއްސައިގެން ދިޔައީ އިޔާންއައިސް ކައިރީގައި އިށީނުމުންނެވެ.

“ހިނގާ ކާން” މިސައިބާ ބުނެލިއެވެ.

“ރައްޓެހި ކުދިންތަކަކާއެކު ބޭރުން ކައިގެން މިއައީ” އިޔާން ޓީވީއަށް ބަލާލަމުން ބުނެލިއެވެ.

“އާލް އަންނަނީ ކޮންއިރަކުންތަ؟ ގޭތެރެ ހާދަ ފަޅޭ… ފޫހިކޮށްދާ ދުވަސްތަކެއް” އިޔާން މިސައިބާގެ މޫނަށް ބަލާލިއެވެ.

“މަންމާ ބުނެބަލަ؟” މިސައިބާގެ ފަރާތުން ޖަވާބެއް ނުލިބުމުން ތަންކޮޅެއް ބާރަށް ބުނެލިއެވެ.

“ކީކޭ” ޓީވީގެ ތެރެއަށް ގެއްލިފައި އިން މިސައިބާ އަހާލިއެވެ.

“އާލް އަންނަނީ ކޮންއިރަކުންތަ؟” އިޔާން ސުވާލު ތަކުރާރުކޮށްލިއެވެ.

“ވަރަށް އަވަހަށް އަންނާނަމޭ ބުނި ޒީކް ގޮވައިގެން” މިސައިބާ ޓީވީ ބަލަން އިނދެ ބުނެލިއެވެ.

“ޒީކްއޭ” އަލްޔަންއަށް އޭނާއަށް ކަންފަތަށް އިވުނު ނަމާއި މެދުގައި ޝައްކު އުފެދުނީ ކަންނޭގެއެވެ.

“ހޫމް ޒީކްއާއޭ އަލްޔަން އިންނަން އުޅެނީ” މިސައިބާ އަނެއްކާވެސް ބުނެލިއެވެ. އިޔާންގެ ހިތުގައި ހީވީ މީހަކު މަރުތޭލަކުން ޖެހިހެންނެވެ. ހިތުގެ ހިނގުން ކުޑަ ހިނދުކޮޅަކަށް މަޑުޖެހިގެން ދިޔަ ކަހަލައެވެ. މިސައިބާ އިނީ ޓީވީއަށް ބަލަން ކަމުން އިޔާންގެ މޫނަށް ވެރިވި ކުލަތަކާއި އަސަރުތަކެއް ނުފެނުނެވެ. ގިނަ އިރުތަކެއް ނުކޮށް ތެދުވެގެން އިޔާން ހިނގައި ގަތީ ކޮޓަރިއާއި ދިމާއަށެވެ.