ތިޔަ އަސަރު 22

ކާއިން އަޝްވާ ކައިރިއަށް ޖެހިލައި އަޝްވާގެ ނިތްކުރީގައި ބޮސްދިނެވެ. އަދި އަޝްވާގެ ގައިގައި ބައްދާލިއެވެ. ވަރަށް ލޯބިން ނުހަނު އޯގާތެރިކަމާއި އެކީގައެވެ.

އެމީހުން އެހެން ތިއްބައި އެތަނަށް މަލަކާ އައިސް ވެގެން އުޅޭ ގޮތް އޮޅުންފިލުވިއެވެ. ކާއިން މަލަކާއާއި އަޝްވާ ހަވާލުކުރުމަށްފަހު ޝަނުމް ހޯދަން ދިޔައެވެ. ޓެރަހުގެ ދޮރުން ނިކުތުމުގެ ކުރިން ކާއިން އަޝްވާއަށް ބަލާލިއެވެ. މަލަކާގެ ކޮނޑުގައި ބޯ އަޅައިގެން އަޝްވާ އޮތެވެ. މޮޅިވެފައިވާ މޫނަކާއި އެކީގައެވެ.

ކާއިން އެދަނީ ޝަނުމް އާއި ވާހަކަ ދައްކާށެވެ. އަޝްވާއަށް ދެރައެއް ދިނީތީ އޭގެ ސަބަބު އަހާށެވެ. އަދި ޝަނުމްއަށް އޭނާ އަތުން އެބީވީ ކިހާ މުހިއްމު މީހެއްކަން އަންގައި ދޭށެވެ.

ލޯބިވާ މީހެއް ގެއްލުމުން ވާ އިހުސާސް ކާއިންއަށް ވެސް ކުރެވެން ފެށުނެވެ. އެބިރުވެރިކަން ވެރިވެގަތެވެ. ޝަނުމް އޭނާގެ ނިންމުން ބަދަލުކޮށް ފިނަމަ އަޝްވާ ޝަނުމްއާއި ގުޅޭނެއެވެ. އޭރުން ކާއިން ހުންނަން ޖެހޭނީ ދުރުގައެވެ. އަޝްވާ އެއިން ހާލުގައެވެ. ނަމަވެސް ކާއިންއަށް ފަރުވާލެއް ނެތެވެ. އޭނާއަށް މުހިއްމީ އަޝްވާގެ ހަމަޖެހުމެވެ. ބޭނުމީ އެ ހިތް އުފާކޮށްދޭށެވެ. އަޝްވާ ލޯބިން ހިނިތުންވެލާ ތަން ދެކޭށެވެ.

ލޯބީގެ ތައާރަފަކަށް ގުރުބާންވުން ވެސް ބުނެވިދާނެއެވެ.

ކާއިން އެގެޔަށް އައީ އޭނާގެ ލެޕްޓޮޕުގައި ހުރި މައުލޫމާތުތައް އަޝްވާ އަށާއި ޝައިމްއަށް ދައްކަން ކަމުގައި ވިޔަސް އެކަން ފަސްކޮށްލުމަށްފަހު ކާއިން އަވަސްވެގަތީ އަޝްވާއަށް އެހީވެދިނުމަށެވެ.

ކާއިން ބާރު ހިނގުމެއްގައި ގޮސް ޝަނުމް ގެ ކޮޓަރީގެ ދޮރު ހުޅުވާލިއެވެ. އެވަގުތު ޝަނުމް އިނީ އެނދުގެ ހެޑް ބޯޑުގައި ލެގިލައިގެން އަތުގައި އޮތް ފޯނަށް ގެއްލިފައެވެ. ކާއިން އައުމާއި އެކީ ޝަނުމް ފޯނު އުގުމަތީ ބޭއްވުމަށްފަހު ކާއިންއަށް ބަލާލިއެވެ. ޝަނުމް މި ގެޔަށް ބަދަލުވީ ފަހުން ދެމީހުން އެކުގައި ހޭދަކުރި ވަގުތުތައް ގިނަވި ނަމަވެސް ކާއިން އާއި ޝަނުމް އާޢި ދޭތެރޭ އެހާ ރަގަޅު ގުޅުމެއް އުފެދިފައި ނެތެވެ. އަޝްވާ ޝަނުމް ދެކެ ލޯބިވާތީ ކާއިން ހުންނަނީ އަބަދުހެން ޝަނުމްއަށް ފާރަލާށެވެ. ކާއިން އަޝްވާ އާއި އެކީ އުޅޭތީ ޝަނުމް ހުންނަނީ ކާއިންގެ އަމަލުތައް ބަލަބަލައެވެ.

“އަޝްވާ ދެކެ ލޯބިވެއޭ ބުނެ ކޮން ދޮގުތަކެއް ހެދީ.. އަހަރެން އަޝްވާއާއި އަބަދުހެން ދިމާ ކުރަނީ އަޝްވާ ފަލަކަމުން އަޝްވާ ދެކެ ލޯބިވާނެ މީހެއް ނުލިބޭނޭ ކިޔާފަ. އެކަމަކު ޝަނުމް އައިސް ދެއްކި ދަޅައެއްގެ ސަބަބުން އަޝްވާ އުފާވި ވަރެއް ނޭނގޭތަ.. ” ރުޅި އައިސް ހުއްޓަސް ކާއިން ވާހަކަ ދެއްކީ މަޑުމައިތިރި ކަމާއި އެކީގައެވެ.

“އަހަރެން އަދިވެސް އަޝްވާ ދެކެ ލޯބިވަން.. އެކަމަކު އަހަންނަށް ނެތް އަޝްވާއާއި އެކީ އުޅެވޭކަށް… އެހެންނޫނަސް އަހަރެން ދުރަށް ދިޔައިމަ ކާއިންއަށް އަޝްވާ ހޯދަން ފަސޭހަވާނެ އެއްނު” ޝަނުމް ބުނެލިއެވެ. ހިތަށް ތަދުވި ނަމަވެސް އޭނާއަށް މި ނިންމުން ނިންމަން މަޖުބޫރެވެ. އަޝްވާގެ އުފަލަށްޓަކައެވެ.

ޝަނުމްގެ ފަހު ޖުމްލައިން ކާއިންގެ ރުޅިގަނޑު ކެކިގެން ދިޔައެވެ. އެއްވެސް ހާލަތެއްގައި އަދި އެއްވެސް ސަބަބަކާއި ހެދި އަޝްވާއަށް ދެރައެއް ލިބުމަކީ އޭނާ އެދޭނެ ގޮތެއް ނޫނެވެ. އެޔަށް ވުރެ ބޮޑަށް އޭނާ އަޝްވާއަށް އަޅާލައެވެ.

“ހަނދާން ކުރާތި.. އަޝްވާއަށް ދެރައެއް ދީފައި އެއްވެސް މީހަކަށް ހަމަޖެހިގެން ނޫޅެވޭނެ. އެއީ ޝަނުމް ކަމުގައި ވީ ނަމަވެސް އަހަރެންގެ ފަރުވާލެއް ނެތް” ކާއިން ޝަނުމް ކައިރިއަށް ޖެހިލައި ޝަހާދަތް އިނގިލި ދިއްކޮށްލަމުން ބުނެލިއެވެ. އެވަގުތަކީ މީކާއިލް ފާހަނާގައި ހުރެފައި ނުކުތް ވަގުތެވެ. ޝަނުމް އާއި ދިމާލަށް ކާއިން އިނގިލި ދިއްކޮށްގެން ހުރުމުން މީކާއިލް ކާއިންއަށް ބާރަށް ގޮވާލިއެވެ. ޝަނުމް މީކާއިލްއަށް ބަލައި ދެކޮޅަށް ބޯ ހޫރުވާލީ އެއީ އެވަރު ކަމެއް ނޫނޭ ބުނުމުގެ ގޮތުންނެވެ.

“އެއްވެސް މީހެއް އެމީހެއް ލޯބިވާ މީހެއްގެ ހިތް ހަލާކު ނުކޮށްލާނެ.. އަދި އެހެން މީހަކަށް ދެރައެއް ދީފައި އަނެކާއަށް އުފަލުގައި ނޫޅެވޭނެ. އަޝްވާއަށް ތި ދިން ހިތާމަ ކޮންމެވެސް ދުވަހަކުން ޝަނުމްވެސް ކުރާތަން ދެކެން އަހަރެން ހުންނާނަން” މީކާއިލް ގޮވާލުމުން ކާއިންއަށް ކުރި އަސަރެއް ނެތެވެ.

“ކާއިންވެސް މީހަކާއި ދިމާލަށް ހިތުހުރިހައި އެއްޗެއް ކިޔާލުމުގެ ކުރިން ހަގީގަތް ބަލާލުން ބުއްދިވެރި” ކާއިން ވާހަކަ ދައްކާ ނިމުނު ތަނާ މީކާއިލް ބުނެލިއެވެ. މީކާއިލް އެހެން ބުނުމުން ކާއިން ސުވާލުގެ ނަޒަރުން މީކާއިލްއަށް ބަލާލުމަށްފަހު ކުރިމަތީގައި ހުރި ޝަނުމްއަށް ބަލާލިއެވެ.

ކާއިން ބަލާލުމާއި އެކު ޝަނުމް އޭނާގެ އުނގުމަތީގައި އޮތް ފޯނު ހުޅުވައި އޭގައި އިން ފޮޓޯއެއް ކާއިންއަށް ދައްކާލިއެވެ. ކާއިން ދިޔައީ ސިހިގެންނެވެ. އެތައް ފަހަރަކު އޭގައިވާ މައުލޫމާތުތައް ކިޔާލިއެވެ. ގަބޫލުކުރަން ދަތިވެފައެވެ.

ކާއިން ޝަނުމް އަތަށް އޭނާގެ ފޯނު އަބުރައި ދިނެވެ.

“އަޝްވާ އަހަރެން ދެކެ ލޯބިވޭތަ” ކާއިން ދިއްކޮށްލި ފޯނުގައި ހިފާލަމުން ޝަނުމް އަހާލިއެވެ.

އިރުކޮޅަކު ވިސްނަން ހުރެފައި ކާއިން ދެކޮޅަށް ބޯ ހޫރުވާލީ ނޫނެކޭ ބުނުމުގެ ގޮތުންނެވެ. ޝަނުމް ފަދައިން ކާއިންވެސް ބޭނުމީ އަޝްވާ އުފަލުގައި ބަހައްޓަން ކަމަށް ވާތީއެވެ. އަދި މި ދޮގުގެ ސަބަބުން އަޝްވާއަށް ޝަނުމް މަތިން ހަނދާން ނައްތާލަން ފަސޭހަވެގެން ދާނެ ކަމަށް ކާއިންއަށް ހީވުމުންނެވެ.

ޝަނުމް އާއި ވާހަކަ ދައްކާލުމަށްފަހު ކާއިން އެކޮޓަރިން ނިކުތްއިރު އަޝްވާ ނިދަން ކޮޓަރިއަށް ވަދެއްޖެއެވެ. އެހެންކަމުން ކާއިން ދެން ދިޔައީ ޝައިމް އާއި ބައްދަލުކޮށްލާށެވެ. އޭނާއަށް ފެނުނު މައުލޫމާތުތައް ހިއްސާކޮށްލުމަށެވެ.

“މިކަން ފަޅާއަރައިފި ނަމަ ކާއިންގެ ބައްޕަގެ އިތުރުން ކާއިންވެސް ޖަލަށް ލެވޭނެ..” ކާއިންއަށް ބަލާލަމުން ޝައިމް ބުނެލިއެވެ.

“އެނގޭ ތިކަން.. އެކަމަކު ބައްޕައަށް މީ ހެދުނު ގޯހެއްކަން ވިސްނި މިކަން ދޫކޮށްލަން އުޅޭތާ ކޮން ދުވަހެއް.. އަހަރެން ރޭދުވާ މިހޭދަކުރަނީ ބައްޕައާއި މިކަމާ އޮތް ގުޅުން ކަނޑާލެވޭތޯ.. ހުރިހައި ހެއްކެން ހެން ނައްތާވެސް ލެވިއްޖެ. ބައްޕަމެން އެހެން ގެޔަކަށް ބަދަލުކޮށް އެމީހާއި ބައްދަލުނުކުރެވޭނެ ގޮތް ހެދިއްޖެ.. އަހަންނަކަށް ނޭނގެ ދެން ކަންތައް ކުރަންވީ ގޮތެއް” ކާއިންގެ ވިސްނުމަށް އެއްވެސް ކަމެއް ނައެވެ. ދިރިއުޅުމުގައި ދިމާވަމުން މިދާ ހުރިހާ ކަމުން ބޯ ގޮވަން ފަށައިފިއެވެ.

“ކާއިންއަށް އަންނާނީ މަސްތުވާތަކެތީ ގެ ހުކުމެއް އެކަންޏެއް ނޫން.. މީހުން ރަހީނުކޮށްގެން މަރާލި ކަމުގެ ތުހުމަތުވެސް އަންނާނެ. އަދި ކޮބާ ޝަނުމްއަށް ލިބުނު އަނިޔާ.. އެހުރިހާ ކަމަކުން ސަލާމާތްވާން ކޮންމެވެސް ގޮތެއް ހޯދަން އެބަ ޖެހޭ.. އެކޮޅުގައި ނެތްތަ ކާއިންއަށް މިކަމުގައި އެހީވެދޭނެ މީހެއް؟ ކާއިންގެ ބައްޕަ ކުރިކަމެއް ނޫންކަން ސާބިތުކޮށްދޭނެ ވަރުގެ މީހެއް ހުރެއްޖެނަމަ މިކަމުން ސަލާމަތްވެވިދާނެހެން އަހަންނަށް ހީވަނީ” ޝައިމް އޭނާއަށް ފެންނަ ގޮތަށް ބުނެލިއެވެ. ކާއިން އޭނާގެ ބައްޕައަށްޓަކައި ކޮންމެ ފަދަ ކަމެއް ވެސް ކުރަން ތައްޔާރަށް ހުންނާނެކަން އެނގޭތީއެވެ.

ޝަނުމް ހަބަރު ދިން ގޮތުން ނަމަ އެދޯނީގައި ރަހީނުކޮށްގެން ތިބި މީހުން މަރުވެފައިވަނީ މަސްތުވާތަކެތީން އޯވާރ ޑޯސްވެގެންނެވެ. ހަމަލާ ދޭން ތިބި މީހުންގެ ތެރެއިން އެއްމެ އިސްކޮށް ހުރި މީހާ ވަނީ ބާކީ ތިބި ފަޅުވެރީންގެ ގަޔަށް ބަޑި ޖަހައި މަރާލާފައެވެ. އަދި ހައްޔަރު ކުރަން އުޅުމުން އޭނާވަނީ އަމިއްލައަށް މަރުވެފައެވެ. ސުވާލު އުފެދޭ ސަބަބަކީ މިއީއެވެ. ސަލާމަތް ނުވާނެކަން އެނގި އެއްމެ ދޯންޏަކުން އައިސް ހަމަލާ ދޭންވީ ކީއްވެ ހެއްޔެވެ؟ އެމީހުންގެ މޫނުގައި އެވަނީ ކޮން ނަންބަރުތަކެއް ހެއްޔެވެ؟ އަމިއްލައަށް މަރުވާންވީ ކޮން ސަބަބަކާއި ހެދި ހެއްޔެވެ؟ މިކަމުގައި ފޮރުވިފައިވާ މާނައެއް ވާނެކަން ޔަގީނެވެ.

ޝައިމް އެހެން ބުނެލުމުން ކާއިން އެމެރިކާގައި ހުންނަ އޭނާގެ ބައްޕައަށް ވާގިވެރިވެދޭ ފަރާތަކާއި ގުޅާލިއެވެ.ހަމަލާ ދޭން ފޮނުވީ ކާއިންގެ ބައްޕައާއި ގުޅުމެއް އޮތް ބަޔެއް ތޯ ބެލުމަށެވެ.

“ކާއިންގެ ބައްޕަގެ އަތެއް މިކަމުގައި ނޯންނާނެ.. އަހަރެން މިދަނީ އެކަންތައް ވަރަށް ގާތުން ބަލަމުން.. މިކަން ކުރި ބަޔެއްގެ މަގުސަދަކީ ކާއިންގެ ބައްޕަ އަށް އިންޒާރު ދިނުން. އެމީހުންނާއި ވަކިވެއްޖެނަމަ ލިބޭނެ ގެއްލުން އަންގައި ދިނުން.. އެމީހާ ވަނީ މީގެ ކުރިން އޭނައާއި ގުޅުން ކަނޑާލި އެތައް ބަޔަކަށް އިންޒާރު ދީ އެމީހުން ދިރިއުޅެން އުނދަގޫ ވާވަރުކޮށްފަ.. އެކަމަކު ދިވެހިރާއްޖެއަށް މިދިން ހަމަލާއަކީ އޭނާގެ އެކަނި މަގުސަދެއް އޮވެގެން ކުރި ކަމެއް ކަމަށް ލަފާނުކުރެވޭ” އެމީހާ ދިން މައުލޫމާތުން ކާއިންގެ ހިތުގައި އިތުރު ބިރުވެރިކަމެއް އުފެދުނެވެ.

“ކީއްވެ ތިހެން ތިބުނީ.. މަސްތުވާތަކެތީގެ އިތުރުން ދެން އިތުރު ކޮން ކަމެއް އަހަރެންގެ ބައްޕަ ކޮށްގެން އުޅެނީ؟” ކާއިން އަވަސް އަވަހަށް ބުނެލިއެވެ. އަދި އިން ގޮނޑިން ތެދުވެ ބެލްކަންޏަށް ނުކުތެވެ. އެދެމީހުން ދައްކާ ވާހަކަ ޝައިމްގެ އިތުރުން އެހެން މީހަކަށް އަޑުއިވެދާނެތީއެވެ.

“ކާއިންގެ ބައްޕަ ކުރި ކަމެކޭ ނުބުނަން ދޯ.. އަހަރެން މިހެން މިބުނީ މީގެ ތިން ހަފުތާ ކުރިން އަހަރެން އޭނާ އުޅޭ ގެޔަށް ދިޔައިރު އެތަނުން ޒުވާން އުމުރުގެ އަންހެން ކުއްޖަކާއި ފިރިހެން ކުއްޖެއް ނިކުމެގެން ދިޔަ ތަން ދުށިން.. އަހަންނަށް އެއީ ދިވެހީންކަން ޝައްކުވެގެން އެތާގައި އުޅޭ އަހަރެންގެ ރައްޓެހި ސެކިއުރިޓީ ގާރޑެއް ކައިރީ އަހާލުމުން ބުނީ އެމީހުންނާއި ހައްސާނުއާއި ގުޅުމެއް ވާހެން ހީވެއޭ.. އަހަރެން އެއީ މަސްތުވާތަކެތީގެ މައްސަލައެއް ހޭ އަހާލުމުން އޭނަ ބުނީ އެދެމީހުން އައި ބޭނުން ނޭނގޭ ކަމަށް” އެމީހާ އޭނާއަށް އެނގޭ ވަރަކަށް ކިޔައިދިނެވެ. ކާއިންގެ ބައްޕަ، ހައްސާނުއާއި ބެހޭ ގޮތުން އެދެމީހުން ދެއްކީ ކޮން ވާހަކައެއް ހެއްޔެވެ؟ އެއްމެ ކުޑަ މިނުން އެދެމީހުންނަކީ ކޮން ބައެއް ކަން އެނގޭ ނަމަ ކާއިންއަށް އެދެމީހުންގެ މަގުސަދު ހޯދަން ފަސޭހަވާނެއެވެ.

އެމީހާ އާއި ވާހަކަ ދެއްކުމަށްފަހު ކާއިން ސިޓިންރޫމަށް ދިޔައިރު ޝައިމް ކާއިންގެ ލެޕްޓޮޕް ނަގައިގެން އިނެވެ. ކާއިން ގޮސް އެމީހާއާއި ދެއްކި ވާހަކަތައް ޝައިމް އާއި ހިއްސާކޮށްލިއެވެ. އަދި އޭނާ ފުރާނަ ފަދައިން ލޯބިވާ ބައްޕައަށް އެހީވެދޭނެ ގޮތެއް ހޯދުމަށް ޝައިމް ކައިރިން ހިޔާލު ހޯދިއެވެ.

“ތި ކުއްޖަކީ ހަނާ އަށް ނުވާނެތަ؟ ކާއިން ބުނީމެއްނު ހަނާ އަކީ ކާއިންގެ ބައްޕަގެ ވިޔަފާރީގެ ޕާރޓުނާރުގެ ދަރިފުޅޭ.. ފަހަރެއްގަ ހަނާ އޭނަގެ ބައްޕަގެ އެދުމަށް ކާއިންގެ ބައްޕައަށް ގެއްލުމެއް ދީފަން އުޅެފާނެއެއްނު.. އަނެއްކޮޅުން ކާއިންގެ މަންމަގެ އެހީތެރިކަންވެސް އެމީހުންނަށް ލިބިދާނެ” ޝައިމް އޭނާއަށް ވިސްނުނު އެއްމެ މޮޅު ގޮތް ބުނެލިއެވެ.

“ނުވާނެ ތިހެން.. ހަނާ ރާއްޖެއިން ބޭރަށް ނުދާތާ ދެ މަސް ވެދާނެ.. ތިވާނީ ކޮންމެވެސް އެހެން މީހެއްގެ ކަމަކަށް” ފަހަރަކު ކަމަކާއި ވިސްނަން ޖެހުމުން ކާއިންއަށް އޭނާގެ ބައްޕައަށް ގެއްލުމެއް ދީފާނެ އެހެން މީހެއްގެ ނަން ހިޔާލަކަށް ނައެވެ. އެހެނަސް ކާއިން ހުރިހާ ކަމެއް މީ އެއްކަމެއްގެ ގޮތުގައި ވިސްނައިފިނަމަ އޭނާއަށް ހޯދަން އުޅޭ ޖަވާބު ލިބިދާނެ ހެއްޔެވެ؟

ކާއިން އާއި ޝައިމް ވާހަކައިގައި ތިއްބާ ޝަނުމް އެތަނަށް އައުމުން ކާއިން އޭނާ ދައްކަމުން ދިޔަ ވާހަކަ މެދު ކަނޑާލިއެވެ. އެއްވެސް ކަމެއް ޔަގީން ނުވަނީސް އިތުރު މީހަކާއި މިކަން ހިއްސާކުރަން ބޭނުން ނުވާތީއެވެ.

“ޝަނުމް އެދޯންޏާއި ބެހޭ ގޮތުން އެއްވެސް މައުލޫމާތެއް ލިބިއްޖެތަ” ޝަނުމް އައިސް އެމީހުން އިށީދެގެން ތިބި ސޯފާގައި އިށީނުމުން ޝައިމް އަހާލިއެވެ. ކާއިން ހުރީ އޭގެ ވާހަކައެއް ޝަނުމް ކައިރީ ނުދައްކަން ކަމަށް ވިޔަސް ޝައްކު ނުވާނެހެން ޝައިމް އެހެން އަހާލުމުން ކާއިން ޝައިމްއަށް ބަލައި ދެލޯ ބޮޑުކޮށްލިއެވެ. ޝަނުމް އަށް ނުފެންނަ ގޮތަށެވެ.

“ދިވެހި މަސްވެރިކަމުގެ ދޯންޏެއް ކަމަށް ލަފާ ކުރެވެނީ.. އަހަރެންވެސް ޑިޔުޓީއަށް ނިކުތީމަ އިތުރު މައުލޫމާތު ލިބޭނީ” ޝަނުމް ބުނެލިއެވެ. ޝަނުމް އައުމުން ކާއިން އޭނާގެ ލެޕްޓޮޕް ލައްޕާލި ގޮތުން ޝަނުމްއަށް ކާއިން ކޮންމެވެސް އެއްޗެއް ފޮރުވަން އުޅުނު ހެން ހީވިއެވެ. އެހެންނަމަވެސް ޝަނުމް އެޔަށް މާބޮޑު ފަރުވާލެއް ނުދެއެވެ.

“ކާއިންގެ ގެއްލުނު ލެޕްޓޮޕު ފެނިއްޖެތަ މިހާރު” ތިން މީހުންގެ މެދަށް ވެރިވި ހަމަހިމޭންކަން ނަގާލަމުން ޝަނުމް ބުނެލިއެވެ.

“ކާއިން މީ އަމިއްލައަށް މާ މޮޅުވެގެން އުޅޭ މީހެކޭ.. ޕޮލިހަށް ވެސް ހުށަނާޅާ ތިމަންނަ އެކަނި މަސައްކަތްކޮށްގެން ލެޕްޓޮޕް ހޯދަނަމޭ ކިޔައިގެން އެއުޅެނީ” ކާއިންއަށް ބަލާލުމަށްފަހު ޖެއްސުމުގެ ރާގަކަށް ޝައިމް ބުނެލިއެވެ.

“ކާއިން ބޭނުން ނަމަ އަހަރެން ތިކަމުގައި އެހީވެދީފާނަން..އޭގައި ވަރަށް މުހިއްމު އެއްޗެހި ހުންނާނެތަ؟” ޝަނުމް އަހާލިއެވެ.

“އަހަރެން އެކަނި އަހަރެންގެ އަމިއްލަ ކަންތައް ކުރެވޭނެ ގާބިލްކަން އެބަ ހުރި.. އަދި އަހަރެން އެހީތެރިކަން ބޭނުން ވެއްޖެނަމަ އެކަން ކޮށްދޭނެ އެތައް ބައިވަރު ބަޔަކު އެބަ ތިބި” ކާއިން އެހެން ބުނެލުމަށްފަހު އޭނާގެ ލެޕްޓޮޕު ހިފައިގެން ދާން ހިނގައިގަތެވެ. ކާއިން އަދިވެސް ހުރީ ޝަނުމް ދެކެ ހިތްހަމަނުޖެހިފައެވެ. ޝަނުމްގެ ސަބަބު އޭނާއަށް ގަބޫލުކުރެވުނަސް މެއެވެ.

ޖެހިގެން އައި ދުވަހެވެ. އަޝްވާ އޮފީހަށް ދިޔުމުގެ ކުރިން ހެނދުނުގެ ސައި ތައްޔާރު ކުރުމަށް ހަފީޒާއަށް އެހީވެ ދިނުމުގައި އުޅުނެވެ.

“އަޝްވާ ދޭބަލަ ޝަނުމްއާއި މީކާއިލްއަށް ގޮވާލާފަ އަންނަން.. ދައްތަ މިދަނީ ބައްޕައަށް ގޮވާލާފަ އަންނަން” ހުރިހާ އެއްޗެއް މޭޒު މައްޗަށް ނަގާ ނިމުމާއިއެކު ހަފީޒާ ބުނެލިއެވެ. އަޝްވާއަށް ހަފީޒާގެ ބަހަށް ދެކޮޅު ހަދަން ނުކެރުމުން ތުވާލިން އަތް ފުހެލުމަށްފަހު ޝަނުމް އުޅޭ ބަޔަށް ދާން ހިނގައިގަތެވެ.

ޝަނުމްގެ ކޮޓަރީގެ ދޮރު ކުރިމަތީގައި އަޝްވާ ހުންނަތާ މިހާރު ދިހަ މިނެޓް ފާއިތުވެ ދަނީއެވެ. ހަނދާނަށް އަންނަމުން ދިޔައީ ރޭ އެ ފިޔަވަޅު މަތީގައި ހުރެ އޭނާއަށް އަޑުއިވުނު ވާހަކަތަކެވެ. އެވޭންދެނިވި ބަސްތަކެވެ.

“އަޝްވާ.. ކިހިނެތްވެފަ” މީކާއިލް ދޮރު ހުޅުވާލުމާއިއެކު އަޝްވާއަށް ސިހުން ލިބި ފަހަތަށް ޖެހުނެވެ.

“ދައްތަ ބުނި މީކާއިލްއާއި ޝަނުމްއާއި ދެމީހުން ސައިބޯން އަންނާށޭ” އެހެން ބުނެލުމަށްފަހު އަޝްވާ އުޅުނީ ދާށެވެ.

“ޝަނުމް ފެންވަރަން ހުރީ.. އަހަރެން އެބަ ޖެހޭ ސައިބޯން ދިޔުމުގެ ކުރިން ތާކަށް ގޮސްލަން. އަޝްވާ މަޑުކޮށްލަންވީނު ޝަނުމް ގޮވައިގެން ތިރިއަށް ގޮސްލަން” އަޝްވާ މަޑުކޮށްލަން ޖެހުނީ މީކާއިލް އެހެން ބުނެލުމުންނެވެ. މީކާއިލް ދިޔުމުން އަޝްވާ ގޮސް ސޯފާގައި އިށީދެލީ ޝަނުމް ނިމޭނެ އިރެއްގެ އިންތިޒާރުގައެވެ.

ޝަނުމް ފެންވަރައިގެން ނިކުތް އިރު މީކާއިލް ކޮޓަރީގައި ނެތެވެ. އެއް އަތުގެ އެހީގައި ފަޓުލޫނު ލެވުނު ކަމުގައި ވިޔަސް ގަމީސް ލާން އަދިވެސް އުނދަގޫތަކާއި ކުރިމަތިއެވެ. އެހެންކަމުން ގަމީސް ހިފައިގެން ޝަނުމް ބޭރަށް ނިކުތީ މީހެއްގެ ހިލަމެއް ވާތީ  އެއީ މީކާއިލް ކަމަށް ހީކޮށެވެ.

“އޭ… ގަމީސް ލާން ކުޑަ އެހީއެއް ވެދީ ބަލަ.. އަދިވެސް އެއަތުން އެއްވެސް ހަރަކާތެއް ކުރެވޭ ވަރު ނުވޭ” އިސްޖަހައިގެން ހުރެ ޝަނުމް އެހެން ބުނެލި އިރު އޭނާއަށް އެވާހަކަ ދެއްކެނީ އަޝްވާއާއި ކަމެއް ނޭނގެއެވެ.

ޝަނުމްގެ އަޑު އިވުމާއި އެކީ އަޝްވާ ކޮޅަށް ތެދުވިއެވެ. އެތައް އިހުސާސްތަކެއް ހިތު ތެރެއަށް ޖަމާވެ މޫނުމަތިން އެ ކުލަވަރު ދައްކަން ފަށައިގަތެވެ.

“އަޝްވާ!!” މީކާއިލް އެއްޗެކޭ ނުބުނުމުން ޝަނުމް ބަލާލިއެވެ. ޝަނުމްއަށް ލިބުނީ ހައިރާންކަމެކެވެ.

ޝަނުމް އޭނާގެ ނަން ބުނެލުމުން އަޝްވާ އިސްޖަހައިގެން ހުރެ އެތަނުން ދާން ހިނގައިގަތެވެ. އަޝްވާ ހީކޮށްގެން ހުރީ ޝަނުމް އާއި ކުރިމަތިލެވޭނެ ހިތްވަރު އޭނާގެ ގައިގައި ހުންނާނެ ކަމަށެވެ. އެހެންނަމަވެސް ޝަނުމް ފެނުމާއި އެކު އެއީ އޭނާއަށް ކުރެވުނު ކުށް ހީ އެއްކަން އެނގުނެވެ.

“އަޝްވާ ދަނީތަ” އަޝްވާ ދާން އުޅުމުން ޝަނުމް އޭނާގެ ވައަތުން އަޝްވާގެ އަތުގައި ހިފެހެއްޓިއެވެ. ޝަނުމް ހަމައެކަނި މަޑުކުރަން ބުނުމުން އަޝްވާ މަޑުނުކުރާނެކަން އެނގޭތީއެވެ. ޝަނުމް އޭނާގެ އަތުގައި ހިފުމުން އަޝްވާ އުޅުނީ ޝަނުމްގެ އަތް ފޮޅުވާލުމަށްފަހު ދާށެވެ. އެހެންނަމަވެސް ޝަނުމް ހުރީ އެކަމަށްވެސް ހުޝިޔާރު ވެގެންނެވެ. އަޝްވާގެ އަތުގައި ބާރަށް ހިފަހައްޓައިގެން ހުރެ ޝަނުމް އަޝްވާގެ ކުރި މައްޗަށް އެރިއެވެ. އަދި އަޝްވާގެ ދަތްދޮޅީގައި ހިފައި އިސްއުފުލައި ދިނެވެ. ޝަނުމް އަޝްވާގެ މޫނަށް ރަނގަޅަށް ބަލާލިއެވެ. އެއްޗެއް ހޯދަން އުޅޭހެންނެވެ.

“އަހަންނަންނަށް މާފު ނުކުރާނަންތަ” އަޝްވާގެ މޫނަށް ބަލާލަމުން ޝަނުމް ބުނެލިއެވެ. ޝަނުމް ސީދާ އަޝްވާ ކައިރީ އޭނާއަށް އަޝްވާއާއި ކައިވެނި ނުކުރެވޭނެކަން ނުބުންޏަސް ކޮންމެވެސް ގޮތަކުން އަޝްވާއަށް އެކަން އެގިއްޖެކަން އެގެއެވެ. އެހެންނޫން ނަމަ ކާއިން އެވާހަކަތަކެއް ނުދެއްކީހެވެ.

“އަހަރެން ރުޅި އަންނަ ވަރުގެ ކަމެއް ޝަނުމް ނުކުރަމެއްނު…” ގަދަކަމުން ހިނިތުންވެލަމުން އަޝްވާ ބުނެލިއެވެ.

“އެހެންވީމަ ތީގެ މާނައަކީ އަދިވެސް އަޝްވާއަށް އަހަރެން ދެކެ ލޯބިނުވެވެއޭ ދޯ” ޝަނުމް ބުނެލިއެވެ. އޭނާއަށް އަޝްވާ ލިބެން ނެތް ކަމުގައި ވިޔަސް އެލޯބިން މަހުރޫމް ވީތީ ހިތާމަ ކުރާ ހާލުގައެވެ.

އަޝްވާ އެޔަށް ވަކި ޖަވާބެއް ނުދީ ހިނިތުންވެލިއެވެ. ހިނިތުންވުމަކީ ހަމައެކަނި އުފާވެރިކަމުގެ ރަމްޒެއް ނޫނެވެ. ހިތާމައާއި ކެތްތެރިކަންވެސް އޭގެ ފަހަތުގައި ވެއެވެ. އަޝްވާގެ އެހިނިތުންވުމުގެ ސަބަބުން ޝަނުމްއަށް އޭނާގެ ޖަވާބު ލިބުނު ކަހަލައެވެ. އުއްމީދުކޮށްގެން ހުރި ޖަވާބު ކަމުގައި ނުވިޔަސްމެއެވެ.

“އަހަންނަށް މާފުކުރޭ ، އަހަރެން ލޯބިވަމޭ ބުނުމުން އަޝްވާ…” ޝަނުމްގެ ވާހަކަ މެދު ކަނޑާލަން ޖެހުނީ އަޝްވާ ޝަނުމްގެ ތުންފަތް މަތީ ޝަހާދަތް  އިނގިލި ޖައްސާލުމުންނެވެ.

“ޝަނުމް މާފަށް އެދެންވީ ސަބަބެއް ނެތް.. ކުށް ކުރީ އަހަރެން.. މީހެއް އަހަރެން ދެކެ ލޯބިވުމަކީ އަހަރެން މާ ބޮޑަށް އުއްމީދުކޮށްގެން ހުރި ކަމަކަށް ވުމުން އަހަންނަށް  މީހެއް ދެއްކި ދަޅައަކަށް ހެއްލުނީ… އަހަރެންގެ ނަސީބުގައި ނެތް ލޯތްބެއް ހޯދަން އަހަންނަށް އުޅެވުނީ.. ” އަޝްވާ ބުނެލިއެވެ. ޝަނުމްގެ ދެލޮލަށް ބަލަމުން އޭނާގެ ވީރާނަވަމުން ދާ ހިތުގެ ޝަކުވާތައް އިއްވާލިއެވެ.

“އަޝްވާ އަހަންނަށް މިހެން ކަންތައް ކުރަން ޖެހުނީ އަހަންނަށް…” މިފަހަރުވެސް އަޝްވާ ޝަނުމް ހުއްޓުވިއެވެ.

“އާން! އެއީ ކޮންމެވެސް ސަބަބެއް އޮތީމަ އެއްނު.. އެކަމަކު ޝަނުމް! އަހަރެން ކައިރީ ސަބަބު ނުބުނާތި.. ޝަނުމް އަހަރެން ދެކެ ލޯބިވީ ކީއްވެގެންހޭ އެހީމަ ޝަނުމް ދިން ޖަވާބު މިކަމަށްވެސް ދީ.. ބުނޭ އަހަރެން ދެކެ ފޫހި ތިވީ އެއްވެސް ސަބަބެއް ނެތިއޭ.. ބުނޭ އެހެން..” އަޝްވާއަށް ރަގަޅު ގޮތަކީ މިއީ ކަމަށް ވުމުން ބުނެލިއެވެ. ވަރަށް ހިތްވަރުން ނުރޯން އަޒުމް ކަނޑައަޅައިގެން ހުރެއެވެ. ލޯބިވާން އެއްވެސް ސަބަބެއް ނޯންނާނެ ކަމަށް ޝަނުމް ބުނީ އެސަބަބު ދިޔުމުން އެލޯބިވުން ހުއްޓިދާނެތީއެވެ. ހަމަ އެގޮތަށް ފޫހިވާން ސަބަބެއް ނެތް ނަމަ އަޝްވާއަށް ޝަނުމް މަތިން ހަނދާން ނައްތާލަން ފަސޭހަވާނެއެވެ.

އެހެން ބުނެލުމަށްފަހު އަޝްވާ މަޑުނުކޮށް އެތަނުން ދާން ހިނގައިގަތެވެ. ޝަނުމް އެތައް ފަހަރަކު ގޮވުމުން ވެސް އެޔަށް އިޖާބަ ނުދީއެވެ.

ޝަނުމްއަށް އަމިއްލަ ނަފުސު ކުށްވެރި ކުރެވުނެވެ. އަޝްވާއަށް އޭނާ ހަގީގަތް ކިޔާ ދޭނީ ކިހިނަކުން ހެއްޔެވެ؟ ލޯބީގެ ކަނޑުގައި އޮޔާދަމުންދާ  ހިތަށް ލިބެމުންދާ ވޭން އަޝްވާއަށް ވުރެ ވަކި ކުޑައެއް ނުވާނެކަން ޔަގީނެވެ. އަޝްވާއަށް ނޭގުނަސް އަޝްވާއަކީ ޝަނުމްގެ ހިތުގެ މިލްކުވެރިޔާއެވެ. އެލޯތްބަކަށް ހިތް ބޭގަރާރުވަމުންދާ  މިތުރާކީ އަޝްވާއެވެ. އެ އޯގާތެރިކަމަށް ފެންބޮވައިގެންފާ ފިރުމުންތައް ލިބޭނީ އަޝްވާގެ ދެއަތުން އެކަންޏެވެ. މުޅި އުމުރަށް ޝަނުމް އަޝްވާގެ ނަން އޭނާގެ ހިތުގައި ފޮރުވާނެއެވެ. ފަޑުނުވާ ހަނދާންތަކަކާއި އެކީގައެވެ. ލޯ މަރާލާ ކޮންމެ ދުވަހަކު އެހިނިތުންވުން ޝަނުމްއަށް ސިފަވާނެއެވެ.

ނަމަވެސް ނުނިމި އޮތް އިންތިޒާރަކާއި އެކީ ޝަނުމް ދިރިއުޅޭނީ ފަހެ ކިހިނަކުން ހެއްޔެވެ؟ އަޝްވާ އަކީ އޭނާގެ ހައްގަކަށް ވާން ހާދަ ބޭނުމެވެ. ނަމަވެސް ހާލު ހުރި ގޮތަކީ މިއީއެވެ.

ޖެހިގެން އައި ދެތިން ދުވަހު ޝަނުމް އަށް އެއްވެސް ގޮތަކަށް އަޝްވާ އާއި ބައްދަލުވާ ގޮތެއް ނުވިއެވެ. އޮފީހުގައި ނޫޅޭ ނަމަ އަޝްވާ ގިނަ ވަގުތު ހޭދަ ކުރަނީ ކާއިންގެ ކޮޓަރީގައެވެ. ނޫނީ ލައިބްރަރީގައެވެ. ރީމްމެން ގެޔަށް އަންނަން އޭނާއަށް އެތައް ދައުވަތެއް ލިބުނު ކަމުގައި ވިޔަސް އޭނާގެ ހިތަށް ލިބިފައިވާ ޒަހަމް އިތުރުވެދާނެތީ ރީމް އާއި ބައްދަލުކުރަން ބޭނުން ނުވަނީއެވެ.

ކޯސްގާރޑު ހުދު ޔުނީފޯރމުގައި ޝަނުމް ފެންނަމުން ދިޔައީ ވަރަށް ވެސް ހަރުދަނާ ކޮށެވެ. ގައުމުގެ ދިފާއުގައި ނިކުތުމުން އެއްމެންގެ މެދުގައި ޝަނުމްއަށް އޮތް އިހުތިރާމް ވަރަށްވެސް ބޮޑުވެއްޖެއެވެ. ޖަލްސާއަށް ހާޟިރުވި އެތައް ބަޔަކު ޖަލްސާ ފެށުމުގެ ކުރިން ޝަނުމް ކައިރިއަށް އައިސް އޭނާއަށް ފަށްފަށުން ޝުކުރު އަދާކުރިއެވެ. އަދި އެއްމެހާ ދިވެހީން ޝަނުމް އެ ދެއްކި ނަމޫނާގައި ހިފައި ގައުމާއި ދީނުގެ ހައްގުގައި ތެދުވެއްޖެނަމަ އެއްވެސް އަދުއްވަކަށް މިފަސްގަނޑުގައި ފައި ނުޖެއްސޭނެ ކަމަށް ބުންޏެވެ.

ޝަނުމްއަށް އެތައް ބަޔަކު ޝުކުރު އަދާކުރަމުން ދިޔައިރު އެތައުރީފުގައި ޝަނުމް އާއި ޖެހިގެން ހުރި ހަފީޒާވެސް ބައިވެރިކުރުވިއެވެ. މަންމައާއި ބައްޕައެއްގެ ލޯބި ޝަނުމްއަށް ދީ ޝަނުމް ފަދަ ވަތަން ދެކެ ލޯބިވާ ދަރިއަކަށް ތަރުބިއްޔަތު ދިނީތީއެވެ.

“މީ ބޮޑުދައިތަގެ ހަޔާތުގައި އައި އެއްމެ އުފާވެރި ދުވަސް.. ބޮޑުދައިތައަށް ޔަގީން ދަރިފުޅުގެ މައިންބަފައިން ވެސް މިހާ އުފާވާނެކަން… ” މީހުން މަދުވުމުން ޝަނުމްގެ އަތުގައި ހިފާލަމުން ހަފީޒާ ބުނެލިއެވެ.  ޝަނުމް އެޔަށް ޖަވާބު ނުދީ ހިނިތުންވެލިއެވެ. ޝަނުމް އަކީ އޭނާގެ މަންމަމެންގެ ވާހަކަތައް މާ ގިނައިން ދައްކާ މީހަކަށް ނުވި ނަމަވެސް އެތައް ދުވަހަކު އެތައް ފަހަރަކު މަންމައާއި ބައްޕަ އޭނާ ކައިރީގައި ހުރި ނަމައޭ ހިތަށް އަރައެވެ. މަންމައާއި ބައްޕަގެ ފާފަ ފުއްސެވުމަށް އެދި ކޮންމެ ދުވަހު ﷲ ހަޟުރަތުގައި ދުއާ ދަންނަވައެވެ. ސުވަރުގެއިން ބައްދަލުވާނެ ކަމަށް އުއްމީދުކުރެއެވެ. މައިންބަފައިންގެ ލޯބިން މަހުރޫމް ވެފައިވާ ކޮންމެ މީހަކަށް ޝަނުމްގެ ހިތަށް ކުރާ އަސަރު އެގޭނެއެވެ.

ޝަނުމް އާއި ހަފީޒާ ވާހަކަ ދައްކަން ތިއްބައި ޖަލްސާ ފެށުމުގެ ކުރިން ގޭގެ އެހެން މީހުން އެތަނަށް އައެވެ. އެއްމެން އައިސް ޝަނުމް އާއި ސަލާމް ކޮށް މަރުހަބާ ކިޔެވެ. އަޝްވާ ފިޔަވައެވެ. އަޝްވާ ހުރީ ދުރުގައި ފޯނުން މީހަކާއި ވާހަކަ ދައްކާށެވެ. އެއްމެނާއި ސަލާންކޮށް ނިމުމުން ޝަނުމް އަޝްވާ ކައިރިއަށް ދިޔައެވެ. އަޝްވާ ޝަނުމްއަށް އޭނާ އެހެން ނިންމަން ޖެހުނު ސަބަބު ބަޔާންކޮށްދޭން ފުރުސަތު ނުދިނަސް ޝަނުމް ބޭނުންވަނީ އަޝްވާގެ ހިތް އޭނާއަށް ސާފުކޮށް ދިނުމެވެ. އެހެންނޫންނަމަ އޭނާއަށް އަޝްވާ ކުރިމަތީގައި އުޅެން އުނދަގޫވާނެކަން ޔަގީނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.