އަވްލީން (25 ވަނަ ބައި)

ދަންވަރު އެކެއްޖަހާ ބޮޑުވި އިރުވެސް ވިޝިކާއަށް ނުނިދެއެވެ. އެ ދުވަހު ދުވާލު މާގިނައިރު ނިދުމުން ވިޝިކާ ކައިރިއަށް ނިންޖެއްނައެވެ. ވައިފައި އޮންކޮށްލާފައި ވައިބާ ބަލައިލިއިރު ލަޔާން ފޮނުވާފައި ހުރި ފޮޓޯތަކެއް ފެނިގެން ބަލައިލިއިރު އެއީ ވިޝިކާއަށް ނޭނގި އޭނަގެ ގައިން ލަޔާން ނަގާފައި ހުރި ފޮޓޯތަކެކެވެ. އެ ފޮޓޯތައް ފެނުމުން ވިޝިކާއަށް ރުޅިއައުމުގެ ބަދަލުގައި ހިނިތުންވެލެވުނީ ލަޔާންގެ ހިތުގައިވެސް އޭނައަށް ހާއްސަ ކަމެއްނުވާނަމަ އެ ގޮތަށް ފޮޓޯ ނުނަގާނެއޭ ހިތަށް އަރާފައެވެ. “އަދިވެސް ނުނިދަނީތަ؟ މިހާރު ކުޑަކުދިން ނިދާހާއިރުވެއްޖެ. މިހާ ދަންވާއިރު ނުނިދަންޏާ ބޫގީމެން ވަންނާނެ ކޮޓަރިއަށް..” ވިޝިކާ ފޮޓޯތައް ބަލަން އޮއްވާ ލަޔާން މެސެޖެއްކޮށްލިއެވެ. އަދި ބިރުވެރި ސިފައެއްގައި ހުރި އެއްޗެއްގެ ފޮޓޮއެއް ފޮނުވާލިއެވެ.

ވިޝިކާ އެ މެސެޖު ކިޔާލާފައި ރެޕްލައިކުރަން އުޅެނިކޮށް ކޮޓަރީ ދޮރުގައި މީހަކު ޓަކި ޖަހާލިއެވެ.

………………………………………………………………….

ވިޝިކާ އެނދުން ތެދުވެގެންގޮސް ދޮރު ހުޅުވާލީ އެއީ ލަޔާންގެ ކަމެއްކަން އިނގޭތީއެވެ. ދޮރުކަނީގައި އަތް ވިއްދާލައިގެން ހުރި ލަޔާން ވިޝިކާ ދޮރު ހުޅުވާލާއިރަށް އެތެރެއަށް ދެމިގަތެވެ. “ހައި ސްވީޓް ހާޓް.. މިއައީ ބިރުން އުޅެދާނެތީ… އާދޭ ޖައްސާލަން..” ލަޔާން ވިޝިކާގެ އަތުގައި ހިފައިގެން އެނދާއި ދިމާލަށްދަމުން ބުނެލިއެވެ. އެވަގުތު ވިޝިކާ ކުއްލިއަކަށް އަތް ފޮޅުވާލާފާއި ދުރަށް ޖެހުމުން ލަޔާން ބަލައިލީ ލޯ ހަނިކޮށްލާފައެވެ. “ސާބަހޭ ނޫޅެމޭ ކަމެއް ކުރާކަށް.. ހަމަ އޮށޯވެލައިގެން ތިބޭނީއޭ.. މީނަ ހިތަށް އަރާނީ އަބަދުވެސް އެންމެ ގޯސްކޮށް..” ލަޔާން އަނެއްކާވެސް ވިޝިކާގެ އަތުގައި ހިފައިގެން ގޮސް އެނދުކައިރިއަށް ހުއްޓުނުއިރު އެދުމަތީގައި އޮތް ވިޝިކާގެ ފޯނަށް އަޒްހީން ގުޅާތަންފެނުމުން ފޯނު ނަގާ ބިޒީ ކޮށްލުމަށްފަހު އޮފްކޮށްލާފައި ކަބަޑު މަތީގައި ބޭއްވިއެވެ.

“ކީއްވެ ފޯނު ނިވާލީ.. ދެން އޭނަ ހިތަށް އަރާނީ ކީކޭ.. މަ އެތައް ފަހަރަކު ގުޅާ ގުޅާ ފޯނު ނުނަގާފަ އޭނަ ގުޅާއިރަށް ތި ބިޒީކޮށްލީ.” ވިޝިކާ ހާސްވެފައިހުރެ އެހެން ބުނުމާއެކު ލަޔާން ހޭންފެށިއެވެ. އަދި އޭރުން މި ކަންތައް ކުރެވުނީ އެންމެ ރަނގަޅަށޭ ކިޔާފައި ވިޝިކާގެ ދެ ކޮނޑުގައި ހިފާފައި އެނދުމަތީގައި ބޭންދިއެވެ. އަދި އެނދުގެ މެދެއްހާ ހިސާބުގައި އަރާ އޮށޯވެފައި ވިޝިކާވެސް އޮށޯންނަންއެދުނެވެ.

ފަސްވަރަކަށް މިނެޓުވީއިރުވެސް ވިޝިކާ އެ އިންތަނުން ގުޑާނުލުމުން ލަޔާން ހިތްހަމައެއްނުޖެހުނެވެ. “އަހަރެން ބުނީމަ ބުނާގޮތަށް ނުހަދަންޏާ ޖެހޭނީ ގަދަކަމުން ކުރުވަން. އެކަމަކު އޭރުން މާ ރަނގަޅެއްނުވާނެ. އެހެންމަ ރަނގަޅުވާނީ ބުނާގޮތަށް ހެދިއްޔާ..” ލަޔާން ކުޑަކޮށް ބޯ ހިއްލާލާފައި ވިޝިކާއަށް ބަލާލަމުން ބުންޏެވެ. އެ ގަޑީ ލަޔާންއާއި ޖަދަލުކުރަން ބޭނުންނުވުމުން ވިޝިކާ މަޑުމަޑުން އެނދަށް އަރާ އެއް އަރީގައި ކިރިޔާ އެނދުން ނުވެއްޓޭ ހިސާބު އޮށޯތެވެ. ވިޝިކާއޮތް ފަރާތަށް އެނބުރި ބަލާލާފައި ލަޔާން ހީލިއެވެ. އަދި ވިޝިކާގެ އުނގަނޑުގަ އަތް އަޅުވާލާ އޭނަ ކައިރިއަށް ދަމާލާފައި ފަހަތުން ބައްދާލިއެވެ.

” ދެން ނޭވާލާބަލަ…” ލަޔާން ކަންތައްކުރިގޮތުން ނޭވާލާންވެސް ހަނދާންނެތިފަ އޮތް ވިޝާކާގެ ކަންފަތާ ކައިރިވެލަމުން ލަޔާން ބުނެލިއެވެ. އަދި ވިޝިކާ ލައިގެން އޮތް ކުރު ޓޮޕް ކޮޅުގެ ދަށުން ބަޑުގައި އަތް އަޅުވާލިއެވެ. އެގޮތުގައި ތިބެ ދެމީހުނަށް ނިދުނުއިރު ވިޝިކާގެ ތުންފަތުގައި ނުފިލާ ހިނިތުންވުމެއް ހުއްޓެވެ. އަޒްހީންއާއެކު އެއަށްވުރެ މާ ގާތްކޮށް އުޅެވިފައި ހުރި ނަމަވެސް ލަޔާންގެ ބީހިލުމުން އެ ލިބޭ ހިތްހަމަޖެހުމާ އުފާވެރިކަން ނުލިބޭކަން ވިޝިކާއަށް ޔަގީނެވެ.

ފަތިސް ނަމާދު ބަންގީގެ އަޑަށް ހޭލެވުނު އަވްލީން ވިޝާކާއަށްވެސް ގޮވާ ހޭލެއްވީ ފަތިސް ނަމާދުކުރަން ތެދުވާށޭ ކިޔާފައެވެ. ވިޝާކާއަކީ ގަވައިދުން ނަމާދުކުރާ ކުއްޖަކަށްނުވެފައި އަމުދުން ފަތިސް ނަމާދު ކުރި ހަނދާނެއް ނެތުމުން ވިޝާކާއަށް ހުރެވުނީ ފަސްޖެހިފައެވެ. ނަމަވެސް އަވްލީން ކިޔާވަރުން ވުޟޫކޮށްގެން ނިކުމެ ފަތިސްނަމާދުކޮށްލުމުން ރޫހަށް އެ ލިބުނު ހިތްހަމަޖެހުމަކީ މީގެ ކުރިން ދުވަހަކުވެސް ވިޝާކާއަށް އިހުސާސްކުރެވިފައިވާ ކަމެއްނޫނެވެ.

ޑޮކްޓަރަށް ދައްކައިގެން ނެގި ބޭސް އުނގުޅާފަ ތަދަށްދިން ބޭސް ކެއުމުން އަވްލީންގެ ފައިގެ ތަދު ވަރަށް ބޮޑުތަން ރަނގަޅުވެފައިވެއެވެ. އެހެންކަމުން މަޑުމަޑުން ހިނގާލާފައި ވިޝާކާއާއި އެއްކޮށް ތިރިއަށް ދިޔައީ ސައި ހަދާށެވެ. ވިޝާކާގެ އެހީތެރިކަން ލިބެން ފެށުމުން އަވްލީންއަށް ހުރިހާ ކަމެއްގައިވެސް ފަސޭހަވެގެންދިޔައެވެ. އަވްލީން އުއްމީދުކުރަނީ އެގޮތަށް އަދި ވިޝިކާއާއި ސަބީނާގެ ރުހުންވެސް އޭނައަށް ލިބޭނެކަމަށެވެ.

ލަޔާންގެ މޭގައި ބޯ އަޅާލައިގެން ނިދިފައި އޮތް ވިޝިކާގެ ބޮލުގައި ލަޔާން މަޑުމަޑުން ފިރުމާލާފައި ބޮލުގައި ދަތްދޮޅި ޖައްސާލަމުން އެ ހަށިގަނޑުގައި ދެ އަތުން ވަށާލައި ލޯ މަރާލިއެވެ. ނަމަވެސް މީހަކަށް އޭނަ އެ ކޮޓަރިން ނިކުނަނިކޮށް ފެނިދާނެތި އެހެން މީހުން ތެދުވުމުގެ ކުރިއަށް އޭނަގެ ކޮޓަރިއަށްގޮސް ފެންވަރާ ތާޒާވެލައިގެން ނަމާދަށްދިޔައީ މަހުދީއަށްވެސް ގޮވާފައެވެ.

ހެނދުނު ސައިބޮއެގެން ޑިއުޓީއަށް ދާން ތައްޔާރުވާން ހުރި ލަޔާންއަށް ފޯނެއް އައުމުން ވާހަކަ ދައްކަމުން ތިރިއަށް ފައިބައިގެން ދިޔައީ ގަމީހުގެ ގޮށްތައް އަޅުވަމުންނެވެ. “ދައްތާ ފޯނެއް..” ލަޔާން ފޯނު ގެންގޮސް ސޯފާއި ޓީވީ ބަލަން އިން ސަބީނާއަތަށްދިނެވެ. ސަބީނާ ފޯނުން ވާހަކަ ދެއްކުމަށްފަހު ލަޔާންއަތަށް ފޯނު ދިންއިރު އިނީ ވަރަށް ހިނިއައިސްފައެވެ. “ލަޔާންގެ މަންމަ އާ މާމަ މާދަން މިރަށަށް އަންނަނީއޯ.. ދައްތަ ބުނިން މިގޭގައޭ ތިބެންޖެހޭނީ.. މިގޭ މަތީބައިގަ އަދި އިންނާނެއެއްނު ހުސްކޮޓަރިއެއް..” ސަބީނާ ލަޔާން އާއި ވާހަކަ ދައްކަން އިނުމަށްފަހު ތެދުވެގެން ދިޔައީ އަވްލީން ކައިރީގަ ކޮޓަރި ސާފުކުރަން ބުނާށެވެ.

ސަބީނާ މުޅިގެ ހޯދިއިރުވެސް އަވްލީން ނުފެނުމުން ރުޅިގަދަވާގޮތްވިއެވެ. ” މި ދެން ކިހާދެރަކަމެއް.. އެ އަވްލީންއެއްވެސް މުހިންމުކަމެއް ޖެހިގެން ހޯދަން އުޅޭއިރަކު ނުފެންނާނެ.. ކޮބާތަ އެ ވިޝާކާ.. ދެ މީހުން އެއްތާކު ކަންނޭގެވާނީ…” ސަބީނާ ފަތިވަރު އަމުނަމުން ފޯނު ނެގީ ވިޝާކާއަށް ގުޅާށެވެ. “ސާބަސް ސަބީނާ.. އެ މަންޖެ އެބަހުރި ބޭރު ރޯނުގަ އެއްޗެހި އަޅަން.. އެ މަންޖެ އެ ހުރިހާ ކަމެއް ކުރާއިރުވެސް ސަބީނާ ތި ހުންނަނީ އެ މަންޖެދެކެ އަބަދު ރުޅިއައިސްފަ.. ދެން އެ މަންޖެއަށްވެސް ފޯނެއް ގަނެދޭންވީއެއްނު. އޭރުން ސަބީނާއަށް އޭނަ ނުފެނިއްޖާ ގުޅާލެވޭނެއެއްނު..” ގޭތެރެއަށް ވަދެގެން ދިޔަ މާލިކު ސޯފާކައިރީގައި މަޑުކޮށްލަމުން ބުންޏެވެ.

“މަށަށް ކިހިނެއް އިނގެނީ އޭނަވާތަނެއް.. އެހެން ނޫނަސް އޭނައާ ދިމާލަށް އެއްޗެކޭ ބުނާއިރަށް މާލިކްއަށް ތިވާވަރެއްދޯ.. މަށަކަށް ފޯނެއް ނުގަނެދެވޭނެ. ތިއީއެއްނު އޭނާގެ ބޮޑުބޭބެ. މާލިކް އޭނައަށް ފޯނު ގަނެދިނީމަވީނު.. އޭރުން މަށަށްވެސް ފަސޭހަވާނެތާ…” ސަބީނާ ވާހަކަދައްކަމުން ހިނގައިގަތީ އަވްލީން ކައިރީގަ ކޮޓަރި ސާފުކުރަންބުނާށެވެ.

އަވްލިންއާއި ވިޝާކާ އަވަދިނެތި ގޭގެ މަސައްކަތްތައްކުރުމުގައި އުޅުނުއިރު ސަބީނާ ސޯފާގައި ޓީވީ ބަލަން އިނެވެ. “މަންމާ އަހަރެން އަންނާނަން ފިހާރައަކަށްގޮސްފަ.. ” ވިޝިކާ ގެއިން ނިކުންނަންދަމުން ސަބީނާއަށް ގޮވާލާފައި ބުންޏެވެ. “ކޮންއެއްޗެއް ގަންނަން… މަޑުކުރޭ ލަޔާން އެހެން ނޫނީ ދޮންބެ އައީމަ އެތަނުން މީހަކާއެކު ދާން…” ސަބީނާ ވިޝިކާއަށް ބަލައިލަމުން ބުނެލިއެވެ. ވިޝިކާ ތުންކޮޅު ދަމާލާފައި ގޮސް ވަކިން އިން ސޯފާ ގޮޑީގައި އިށީނދެގެން ފޯނާ ކުޅެންފެށިއެވެ.

ހޮސްޕިޓަލުން ނިކުންނަންދިޔަ މަހުދީއަށް މީހަކު ގޮވާލުމުން ފަހަތަށް އެނބުރި ބަލައިލިއިރު ޒީނަތު އައިސް މަހުދީއާ އަރާ ހަމަކުރަނީއެވެ. “މަހުދީ ޑިއުޓީ ނިންމާފަތަ ތިދަނީ. އަހަރެންވެސް ދާނަން މަހުދީއާއެކު. މިހާރު ތި ގެއަށް ނުދެވޭތާ ވަރަށް ދުވަސްވެއްޖެ….” ޒީނަތު ވާހަކަ ދައްކަމުން ކުރިއަށް ހިނގައިގަތުމުން މަހުދީވެސް ހިނގައިގަތެވެ، “މިހާރު ކިހިނެއް ހުންގަނޑު.. ކޮބާ މަންމަ؟ ކީއްކުރަން ހޮސްޕިޓަލަށް އައިސް ތިއުޅެނީ؟” މަހުދީ އެއްފަހަރާ އެތައް ސުވާލެއް ކޮށްލުމުން ޒީނަތު ކައިރިއަށް ހިނިއައެވެ.

“ޒީތު އަހަރެން ހަނދާންނެތިފައޭ މިހުރީ.. އެބަޖެހޭ ރައްޓެއްސެއްގެ ގެއަށް ޖައްސާލަން.. ޒީތު ހިނގާލާފަ ދާންވީއެއްނު. މިހާރުވެސް އޭނަ ހުންނާނެ އަހަރެން ލަސްވެގެން..” މަހުދީ ސައިކަލާ ހަމައަށް ގޮސްފައި ކުއްލިއަކަށް އެއްޗެއް ހަނދާންވިފަދަ ގޮތަކަށް ބުންޏެވެ. “އޯކޭ. އޭރުން އެހެން ފަހަރަކުން ދާނީ.. އެކަމަކު މަހުދީ ކީއްވެ އަހަރެން ގުޅީމަ ފޯނު ނުނަގަނީ.. މެސެޖް ކުރީމަ ރެޕްލައިވެސް ނުކުރޭ.. މަހުދީ މިހާރު އަހަންނާ ވަރަށް ދުރުވެއްޖެހެން ހީވަނީ..” ޒީނަތު ދެރަވެލާފައި ބުނުމުން މަހުދީ އެ ވާހަކަ ދައްކާނީ ފަހުން ކަމުގައިބުނެ ސައިކަލު ސްޓާޓްކޮށްލިއެވެ.

މަހުދީ ގޮސް ލަޔާން ގޮވައިގެން ގެއަށްދިޔައިރު އަވްލީންއާއި ވިޝާކާ ކޮޓަރި ސާފުކޮށް ނިމިގެން ތިރިއަށް ފައިބަނީއެވެ. “އެ އޮތް އައީއެއްނު..” މަހުދީއާއި ލަޔާން ފެންނައިރަށް ސަބީނާ ވިޝިކާ އާއި ދިމާލަށް ބަލައިލަމުން ބުންޏެވެ. ” ކިހިނެއްވީ މަންމާ؟” މަހުދީ ގޮސް އޭނާގެ މަންމަ ކައިރީ އިށީންނަމުން އަހާލިއެވެ. “ވިޝިކާ ފިހާރައަށްދާންވެގެންނޯ.. އެކަނި ގޮސްގެން ނުވާނޭ ބުނީމަ އެއިންނަނީ ލަޔާން އަންނަންދެން..” ސަބީނާ ލަޔާން އާއި އެކު ވިޝިކާ ފޮނުވުމުގެ ގަސްދުގައި ބުނެލިއެވެ. ވިޝިކާ އޭނަގެ މަންމައަށް ގޮވާލުމުން އަވަހަށް ދާށޭ ކިޔާފައި ތެދުވެގެންދިޔައެވެ.

މަހުދީ ހިނިއައިސްގެންހުރެ ލަޔާންއަތަށް ސައިކަލު ތަޅުދަނޑިދީފައި މައްޗަށްދާން ހިނގައިގަތެވެ. ތަޅުދަނޑި ހިފައިގެން ބޭރަށް ނިކުންނަންދިޔަ ލަޔާންއަށް ބަލަން ހުރެލުމަށްފަހު ވިޝިކާ ހިނގައިގަތީ ލަޔާން ދިމާކުރާނެކަން އިނގިހުރެއެވެ. “ބޭބީ އަހަރެންދެކެ ހަމަ އެހާ ލޯބިވޭތަ ބޭބީ މަންމަ ކައިރީ މިހާރު އަހަންނާއެކު ބޭރަށްދާން ބޭނުންވާ ވާހަކަ ބުނަންފެށީ…” ލަޔާން ސައިކަލަށް އަރާ އިށިނދެފައި ވިޝިކާ ގޮސް ސައިކަލާ އަރާ ހަމަވާއިރަށް ބުނެލިއެވެ. ” މަ ނުބުނަން. މަންމަ ދޮގު ހަދައިގެން އެހެން ބުނީ..” ވިޝިކާ ލަޔާންއަށް ލޯ އަޅާލަމުން ބުންޏެވެ. އަދި ސައިކަލު ފަހަތަށް އަރާ އިށީނދެފައި ފިހާރައެއްގެ ނަން ބުނަމުން އެ ފިހާރައަށްދާން ބުންޏެވެ. “ބައިދަވޭ ރޭގަ އަހަންނަށް ނިދުނީ އަންހެން ކުއްޖެއް ކައިރީބާއޭ ހިތަށްއަރާ.. މީހުން ކިޔާ ފިރިހެނެއް ކައިރީގައި އަންހެނެއް އޮތިއްޔާ ނިދަން އުނދަގޫވާނޭ.. ކަންކަން ބޭނުންވާނޭ.. ޖިސްމުގައި ހުޅުރޯވާނޭ… ބްލާ ބްލާ ބުލާ.. އެކަމަކު އަހަންނަށް ރޭގަ އެކަހަލަ އެއްވެސް ކަމެއްނުވޭ.. އެހެންވެ އަދި ބޮޑަށް ކައިރިވެލާ ބައްދާލީވެސް.. އެކަމް ހީވީ ކުޑަ ކުއްޖެއްގައި ބައްދާލެވުނުހެން.. އެހެންނުވާނީ.. ހިތުން ބޮޑުވެގެން އުޅުނަސް މީހާގެ މޭމަތި ބަލާލާފަވެސް މީހުން ބުނާނެ އަދި ކުޑަ ކުއްޖެކޭ..” ލަޔާން ސައިކަލު ދުއްވަމުން އެ ކައިރިއަށް އެނބުރިލާފައި ވާހަކަދައްކަމުންދިޔައެވެ.

ވިޝިކާ ކުއްލިއަކަށް ލަޔާންއާ ދުރަށްޖެހިލީ އޭނާގެ މޭމައްޗަށް ބަލައިލަމުންނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.