ނޭންގިހިތޭ ގެންދެވީމަ މިތުރާ… (11)

އިޝާނަމާދުން ފައިބައިގެން ޝަކީބްއާއި އެކިގައި ގެއަށް އައި ފަރޫންގެ ދެލޯ ހޯދަމުންދިޔައީ އަލްޔާގެ އެރީތިސޫރައެެެވެ. ފަރޫންއަށް އަލްޔާ ފެނުމުން އެވަނީ ކިހިނެއްކަމެއްވެސް ނޭންގެއެވެ. އިނގޭހާވެސްކަމަކީ ލޭގެ ހިނގުން އަވަސްވެފައި ހިތުގެތެޅުން ބާރުވެގެން ދާކަމެވެ. އަތްފަޔަށް ފިނިވެގެންދާކަމެވެ. “ޝަކީބް އާދޭ ފަރޫންގޮވައިގެން ކާން.. މިހާރު އަލްޔާވެސް ނަމާދުކޮށްލައިގެން ނިކުންނާނެ.. ” ސޯފާގައި އިން ޝަކީބްއަށް ނާދިޔާ ގޮވާލިއެވެ. އެވަގުތު އަލްޔާވެސް ކޮޓަރިން ނިކުމެގެން ކާގެއާ ދިމާއަށް ދިޔައެވެ. ފެށުނީއްސުރެ އާއިލާއެއްކޮށް އެއްސުފުރާމަތީން ކެއުމަކީ ޝަކީބްގެ އާއިލާގެ އެންމެ ކަމުދާ ރީތިއާދައެެެވެ. ކާން އިން އިރު ކުރިމަތީގައި އިން އަލްޔާއަށް ފަރޫން ބަލަނީ ގަސްތަކުނޫނެވެ. ހަމަބެލެނީއެވެ. ފަރޫންގެ ނަސީބުރަނގަޅުކަމުން އެއިންކަމެއް ޝަކީބް އަދި ނާދިޔާއަށްވެސް ފާހަގައެއްނުވެއެވެ.

އަލޫކް އިބާގުޅާފައި މިރޭބޭރަށް ނުދަންހޭ އަހާލުމުން ބޮލުގަ ރިއްސައޭބުނެ ބޭރަށް ނުނިކުތީ ހުދުއޭނާއަށްވެސް އެވާގޮތް ނުވިސްނުމުންނެވެ. އެންމެފުރަތަމަ ދުވަހުވެސް އިބާއަކީ އަލޫކް އަށް ކަމުނުދާ ކުއްޖަކަށްވެފައި ކުއްލިއަކަށް އިބާ ހަމަ ފެންނައިރަށް އަބަދު އިބާކައިރީގައި ހުންނަން ބޭނުންވަނީ ކީއްވެކަމެއް އަލޫކް ވިސްނާ ވިސްނާވެސް ނޭންގުނެވެ. އެހެންނަމަވެސް ލޯމަތިން ގެއްލުމުން އިބާދެކެ ނަފްރަތުކުރެވެނީ ވަކިވަރެއް ބަލާފައެއްނޫނެވެ. ނަމަވެސް އެއިން އެއްވެސް ކަމެއް އަދި އެއްވެސްމީހަކަށް ހިއްސާކުރަންވެސް އަލޫކްބޭނުމެއް ނުވެއެވެ.

ކުއްލިއަކަަށް ފޯނު ރިންގްވާންފެށީ ފަރޫން ކައިނިންމައިގެން އަލޫކްގެ އާއިލާއާއެކުގައި ވާހަކައިގައި އިންދައެވެ. ” ހެލޯ… ކީކޭ ލޫ.. ” ފަރޫން ފޯނަށް ބަލާލުމަށް ފަހު އެއްކައިރިއަކަށް ޖެހިލާފައި ފޯނުކަންފަތުގައި ޖައްސާލަމުން ވާހަކަދެއްކިއެވެ. ” ފަރޫން އަހަންނަ މިއިވުނީ ރަނގަޅުވާހަކައެއްތަ.. އިބާ މިހާރު ލޫކް އަތުއަޅުވާލީތަ.. މަންމަބުނި އަންނަ ހަފްތާގަ މެރީކުރާވާހަކަ އިބާ ބުންޏޯ.. ކިހިނެއްމިވީ.. ކީއްވެ އޭނަގެ ޓާގެޓަކަށް ލޫކްއެވީ އަދި އެހާ އަވަހަށް ކައިވެނި.. ” ލޫޔާގެ ހިތް ނުތަނަވަސް ވެފައިވާލެއް ބޮޑުކަމުން ވާހަކަދެއްކުނީ އަވަސްއަރުވާލާފައެވެ. ” ނޭންގެ ލޫ ތިވާހަކަދައްކަން .. އެކަަމަކު.. ލޫކްގެ ފެމިލީއިން އެކަހަލަ ވާހަކައެއްނުވެސްދައްކާ އެކަމަކު.. ” އެހެން ބުނެފައި ފަރޫން އަށް ފެނުނުމަންޒަރާއި އަލޫކްގެ ފަރާތުން އެކަމުން ލިބުންޖަވާބު ލޫޔާއަށް ފަރޫން ކިޔާދިނީ މިކުރެވެނީ ކިހާވަރެއްގެ ކަމެއްކަން ނޭންގޭހާލުގައެވެ. އޭރުލޫޔާގެ ލޮލުން ހޯސްލާފައި ކަރުނަތަށް ފައިބަމުންދިޔައިރު އަރުތެރެވަނީ ބެދި އަޑު ނުނިކުންނަވަރު ވެފައެވެ. ފަރޫން ލޫޔާއަށް ދެފަހަރަކު ގޮވާލާފައި އަޑެއްނީވުމުން ފޯނުކަނޑާލާފައި އަލުން ގުޅިއިރުވެސް ލޫޔާގެ އަޑުބޭރެއްނުވެއެވެ. އެތެރެ އެތެރޭން ބަޑިފަޅައިގެންގޮސް މީހާ ތުރުތުރުލާގޮތްވެ މޭގަރިއްސާވަރުން ލޫޔާހުރީ މޮޔަވާވަރުވެފައެވެ.

އެންމެ ފުރަތަމަ ބައްޕައެއްގެ ފަރާތުން އެންމެބޮޑަށް ރައްކާތެރިކަމާއި ލޯބިބޭނުންވި ދުވަހު އެބައްޕަވެސް ލޫޔާދޫކޮށްދިޔައީ މާދުރަށެވެ. އެއަށްފަހު ބޭބެއެއްފަދައިން ދެކުން ގާތްއެކުވެރިޔާއެވެ. ދެން އެމީހަކާއެކު އުމުރުދުވަހު އުޅެވޭނެ ކަމަށް އުންމީދުކޮށް ގުޅުނު ބައިވެރިޔާއެވެ. މިހާރު އެހުރިހާދުވަހު ހިތުގައި ފޮރިވިފައިވި ލޯބިހޭލިހިނދު އެފަރާތެއްދެކި ލޯބިވެވުނު ބައިވަރިޔާއެވެ. އެއިން އެކަކުވެސް ލޫޔާއަށް ލިބެންނެތީހެއްޔެވެ. ނޫނީ ދުނިޔޭގަ ހަމަ އެއްވެސް އުފަލެއް ލިބުން ނެތީހެއްޔެވެ. ލޫޔާއަށް އެހެންއޮވެ ނިދުން އިރުވެސް ގިސްލެވެމުންދިޔައެވެ. ހިތަށްކޮށްފައިވާ ފުންއަސަރެއްގެ ސަބަބުން އެހިތް ފަނާވެދާހާވަރުވިއެވެ.

ޖެހިގެން އައިދުވަހު ހެނދުނުގެ ނާސްތާކުރިއިރު އަލޫކް ގުޅާފައި ކައިވެނިކުރަން އުޅޭވާހަކަ ބުނިކަމަށް އިއުލާންކޮށްލިއެވެ. އެއާއެކު ފަރޫން ކޮށިއެރުމުން ނާދިޔާއައިސް ބުރަކަށީގައި ފިރުމާލާފައި ފެންތަށިދިނުމުން ފަރޫންއަށް ކުރެވުނީ އާދަޔާހިލާފް އިހްސާސެކެވެ. މިއިން ދުވަހަކު މަންމައާއި ބައްޕަގެ އަޅާލުމާއި ލޯބި ނުލިބިހުރެފައި ކުއްލިއަކަށް އެހެންބައެއްގެ ފަރާތުން އެފަދަގާތްކަމެއް ލިބުމުން ފަރޫން ހުރީ ވަރަށް އުފާވެފައެވެ. އެކަމުގައި އަލޫކްއަށް ފަރޫން ހިތުގެ ފުންމިނުން ޝުކުރުވެރިވެއެވެ. ” އަހަ.. ދަރިފުޅާ ކިހިނެއް ތިހެދީ.. މަސްހުނި މާކުޅީތަ.. ” ފަރޫންއަށް ވީގޮތްފެނިފައި ޝަކީބްއަހާލިއެެެވެ.

އަލޫކް ގުޅާފައި ހުރިހާކަމެއް ބުނެދީފައިވުމުން ޝަކީބްއާއި ނާދިޔާބެސް ފަރޫންއަށް ކަންތަށް ކޮށްދެމުން ގެންދިޔައީ އަމިއްލަދަރިއަކަށް ކަންތަށް ކޮށްދޭހާ ލޯބިންނެވެ. އަދި ފަރޫންއަށް މުހާތަބުކޮށް ހަދަނީވެސް ދަރިފުޅުގެ ނަމުންނެވެ. އެއިން ކޮންމެފަހަރަކު ފަރޫންގެ ހިތަށް ބަޔާންނުކުރެވޭހާ އުފާވެރިކަން ވެރިކުރިވައެެވެ. ” މީ.. ރޮށިކޮޅެއް ތާށިވީ ކަރުގަ. ” ފަރޫން އަވަހަށް އޮޅުވާލީ އަލޫކް އޭނަގެ ބައްޕަކައިރީގައި އެވާހަކަބުނުމުން ދެން އެކަން ހުއްޓުވަން އުޅުނުން ގޯހެއް ހިނގައިފާނެކަމުގެ ބިރުހީވުމުންނެވެ. ” އެހެންތަ ރަނގަޅަށް ހަފައިގެން ކައްޗޭދަރިފުޅަާ.. ބޭބެ މިހިތަށްއަރަނީ އަލޫކް ކުއްލިއަކަށް ކައިވެނިކުރަން މިނިންމީ ކީއްވެބާއޭ.. އަނެއްކާ ދަރިފުޅަށް އިނގޭތަ އެއީކޮންކުއްޖެއްކަން.. ” ޝަކީބުހިތުގައި އެކަމުގައި ގޯހެއްއުޅޭ ހިތަށްއެރުމުން ފަރޫންއާއި ސުވާލު ކޮށްލިއެވެ. ” އަޅުގަނޑާ ތިކަހަލަވާހަކައެއް އަދި ނުދައްކާ ބޭބޭ.. ބޭބެމެންކައިރީގައި ބުނެފަ އަޅުގަނޑަށް އަންގަން މަޑުކޮށްލީ ކަމަށް ތިވާނީ.. ” މަސްނޫވީ ހިނިތުންވުމެއް މޫނުމައްޗަށް ވެރިކުރުވަމުން ފަރޫން ހިތާއި ދެކޮޅަށް ދޮގެއްހަދާލީ އަލޫކްގެ މައިންބަފައިން ކުރިމަތީގައި އަލޫކްގެއަގު ހިފަހަށްޓަން ބޭނުންވީވަރުންނެވެ.

ހެނދުނު ހޭލެވުމާއެކު އަލޫކްއަށް ރޭގަ ވީކަންތަށް ހަނދާންވުމާއެކު ބޮލުގައި ހިފާއްޓާލެވުނެވެ. ރައްޓެއްސަކާއި ވައިބަރ އިން ވާހަކަައްކަން އިންދައި ކުއްލިއަކަަށް ކޯލެއްއައުމުން ނުބަލާނެގުނުއިރު ގުޅީ އިބާއަށް ވުމާއެކު ވަގުތުން އޭނާ ވީޑިއޯ ޖެއްސިއެވެ. އެއާއެކު އަލޫކް އަށް ބޭއިހްތިޔާރުގައި އިބާއާއި ވާހަކަދައްކަން ފެށި ކައިވެނީގެ ވާހަކަ މައިންބަފައިންނަށް އަންގާހިސާބަށްވެސް ދިޔައީއެެވެ. އިބާ ހަމަފެނުމާއެކު އަލޫކްއަށް ނަފްސުކޮންޓްރޯލް ކުރަން މިހާއުނދަގު ވާންވީ ސަބަބެއް އަލޫކްއަށް އަދިވެސް ވަނީ ނުވިސްނިފައެވެ. ކިތަންމެ ބޭނުން ނޫންނަމަވެސް މިވީގޮތުން ދެން މިއަދު އަލޫކް އިބާކައިރިއަށް ރަންކިޔަން ފޮނުވާނެއެެެވެ. މައިންބަފައިންނަށް އެކަން އަންގާފައި ދެން ކުއްލިއަކަށް ހުއްޓާލީމަ އެކަމުގެ އައިބުކަންވެސް އޮންނާނޭ އަލޫކްގެ ހިތަށް އެރީއެވެ. އަދި އަވަހަަށް ފަރޫންއަށް ގުޅާ ވާހަކަތަކެއް ދެއްކުމަށްފަހު ހަމަޔަކަށް ތައްޔާރުވެލައިގެން ކޮފީހަޓަށް ދިޔައެވެ.

ހެނދުނު ހެނދުނާހޭލައިގެން އަރުޝަދު އާއި އަލީ އެތަށްއިރެއް ވާންދެން ތިބިނަމަވެސް ލޫޔާގެ ހަބަރެއްނުވިއެވެ. ކަންތަށްބޮޑުވެ ފޯނުނެގިއިރު ދޮރުގައި ޓަކިދެވުން އަދަދެއްވެސް ނޭންގެއެވެ. އަރުޝަދު އަވަހަަށް ފަރޫންއަށް ގުޅާފައި އެހަބަރުދިނެވެ. އެވަގުތަކީ ނާދިޔާއައިސް ފަރޫންކައިރީގައި މަޑުކޮށްލިވަގުތު ކަމުން ދެކެވެުނު ވާހަކައާއި މެދު ސުވާލުކޮށްލިއެވެ. ވަގުތުން ފަރޫން ލޫޔާގެ ހަބަރެއް ނުވާވާހަކަ ބުންޏެވެ. އަދި އެތާންގައިތިބީ ދެފިރިހެނުނަނަށްވީމަ އެމީހުނަށްވެސް ތަޅުދަނޑިއޮތަސް ވަންނަން ނުކެރިފައި ތިބިވާހަކަވެސް ބުނެލިއެވެ. ” ދަރިފުޅާ އަލްޔާ ގޮވައިގެން ދޭބަލައެގެއަށް، އަލްޔާއަށް އެތެރެއަށް ވަދެވޭނު.. ދައްތަ މިއުޅެނީ މެންދުރަށް ކެއްކުމުގަ އެހެންނޫންނަމަ ދައްތަ ދާނަން.. ގޮސްސަ ދައްތަޔަށް ހަބަރުވާތި..” ނާދިޔާ އެހެން ބުނުމާއެކު އެތެރެއަށްވަދެ އަލްޔާއަށް ގޮވާލާފައި ފަރޫންއާއި އެކުގައި ގޮސްދިނުމަށް އެދުނެވެ. ފަރޫންއަށް އަލްޔާ ނިކުތްތަން ފެނުމާއެކު ހުރިހާކަމެއް ހަނދާން ނެތުންފަދައެވެ. އަލްޔާގެ އެރީތި ހިނިތުންވުން ފެނުމާއެކު ފަރޫންގެ ލޭގައި ކަރަންޓްބާންޔެއް އުފެދިގެން ދިޔައެވެ. ހިތްއޭގެ މަގާމުން ނިކުމެގެން ދާނެހާ ބާރަށް ތެޅެން ފެށުމާއެކު އަތްފަޔަށް ފިނިވެގެންދިޔައެވެ. ” ހިނގާދާން.. ” އަލްޔާއައިސް އެހެންބުނުމާއެކު ފަރޫން ސިއްސައިގެންގޮސް ހަމަބިމަށް އާދެވުނެވެ. ވީރަތްކާއެކު އިތުރުއެއްޗެކޭ ނުބުނެ އަވަހަށް އަލްޔާ ގެފަހަތުން ފަރޫން ހިނގައިގަތެވެ.

އަލޫކް ކޮފީހަޓް ގައި އިންދާ އިބާ ދެފަހަރަށް ގުޅިއެވެ. ނަމަވެސް އަލޫކް ފޯނުނަގާހިޔާލެއް ނުކުރެއެވެ. ނަމަވެސް މިއަދު ރަންކިޔަން ފޮނުވާނަމޭ ބުނެވިފައި އޮތުމާއެކު ކުރިމަތީގައި އިން މީހާއަށް އަލޫކް ބަލާލީ އެތެރެ އެތެރޭން ހީލަހީލައިނދެއެވެ. ” ކޮންނަމެކޭތަ ކިޔަނީ.. އަހަރެން ވަރަށްވަރުން ކަލޭމިހޯދީ ތެދަށް ނުބުނީޔާ މިއަދު ކޮންމެވެސް އެއްގޮތަކަށް މިކަން ނިންމަން އަހަރެން މިހުރީ.. ” އަލޫކް ފަރޫން ބުނިގޮތަށް ވާހަކަކުރިއަށް ގެންދިޔައެވެ. ” އަހަރެން .. އަހަރެންނަށް ކިޔަނީ ސަލީމް.. އަހަރެން ގަސްތަކުނޫން ހެޔޮނުވާނެ އަހަންނަށް ގޮތެއްނަހަދާތި.. އަހަރެންގެ އެބަތިބި ބަލަންޖެހޭ ތިންދަރިންނާއި އަންބަކުވެސް. ” ސަލީން އިނީ ބިރުން ވިރިވިރިއެވެ. ” އެހެންވީޔާ ކޯއްޗެއް އެދުވަހު ސަލީމް އަހަރެންގެ ކޮފީއަށްއެޅީ .. ކާކުބުނެގެން.. ކިހާވަރެއްދީގެން.. ” އަލޫކް އެއްފަހަރާ ހުރިހާ ސުވާލެއް އަމާޒުކޮށްލިއެވެ. ” އެއީ .. އެއީ.. އަހަރެންބުނެފާނަން.. އެކަމަކު އެއްބަސްވޭ އަހަރެންނަށް ގޮތެއްނަހަދާނެކަމަށް އެދުވަހުވެސް އަހަރެން އެކަން ކުރީ އަހަރެން އުޅޭތަނިގެ ކުލިނުދެއްކިއޮއްވަ އެދައްކަދޭން އެމީހާ އެއްބަސްވުމުން.. ” އެެެން ބުނިއިރު ސަލީމްގެ ލޮލަށް ކަރުނަ ޖަމާވެއްޖެއެވެ. އެތަން ފެނި އަލޫކްގެ ހިތަށް ހަމްދަރުދީވަނެއްކަމަކު ސުވާލުތަކުގެ ޖަވާބުހޯދާފަ ނޫނީ ހުއްޓާނުލަން އަޒުމުގައި ހުއްޓެވެ. ނަމަވެސް ކަމެއްނުކުރާނީ ތެދަށްބުނީމަކަމުގައި ބުނެލިއެވެ.

” އެއީ މަޝްހޫރު ވިޔަފާރިވެރިޔާ ނަސްރީނާގެ ފިރިމީހާގެ ދަރިފުޅު އިބާ ޔާސިރު އަހަރެންނާ ހަވާލުކުރި ކަމެއް.. އަަހަރެންނަކީ އޭނަގެ ބައްޕަގެ ރިސޯޓްގައި މަސައްކަތްކުރާ މީހެއް.. އެދުވަހު އިބާ ކޮފީއަށް އެޅީ ކަރުދާސް ގަނޑަކުންނެގި ރަބަރު ޕަކެޓްއެއްގައި ހުރި ފާޑެއްގެ ކުނޑިއެއް.. އޭގައޮތް ތަވީދެއްވެސް.. ނަމަވެސް އެވަގުތު އަހަރެންނަށް ކުލިނުދެއްކިގެން ނިކުންނަން ޖެހިފައިވާތީ އިތުރުގޮތެއްނެތީމަ ހަނުހުރީ.. ” ސަލީމްގެ ވާހަކަ އަޑުއަހަން އިން އަލޫކްއަށް ކަންތަށް ވަމުންދާގޮތް ލޯމައްޗަށް ސިފަވާންފެށިއެވެ. ނަމަވެސް ހަމަޖެހިލުމަށް ފުންނޭވާއެއް ލުމަށްފަހު ސަލީމްކުރެ ހެކިވެރިއަކަށް ވެދިނުމަށް އެދުނެވެ. ” ކީކޭ.. ހަމަ އިންނަނީތަ.. ހަގީގަތް އެނގުނީމަވެސް .. ” ސަލީމް ކުއްލިއަކަށް އެސުވާލުކޮށްލުމުން އަލޫކް ބޯޖަހާލުމުން ސަލީމްވެސް އަލޫކްއަށް އާބަސްދިނީ އިތުރުމީހަކު ހެކިވެރިއަކުވެސް ހޯދާގޮތަށެވެ. ” މިރޭވާނެ ރަންކިއުއްވަން.. މާދަމާ ރަސްމީގަޑީގަ ފޯމެއްނަގާ ފުރާފަ ލާންވާނެ.. އަހަރެންބޭނުންވީހާ އަވަހަކަށް މިކަންކުރަން.. ” އަލޫކް ހިތުގައި އެތަށް ކަމެއްރާވާލަމުން ބުނެލިއެވެ.

ފަރޫން ދަމުން ގުޅާފައި ދިއުމުން އަރުޝަދުއާއި އަލީ ތަޅުދަނޑި ހިފައިގެން ތިބީ ތައްޔާރަށެވެ. އަލްޔާ ދޮރުހުޅުވާލާފައި ވަދެފައި ދޮރުލައްޕާލީ ލޫޔާ ނިދަންލާފައިވާ ހެދުން ތުނިކަމުންނެވެެ. މަޑުމަޑުންގޮސް ބަލާލި އަލްޔާއަށް ފާހަގަވީ ލޫޔާ މާބޮޑަށް ފިނިވެގެން އުޅޭފަދަގޮތަކަށް މިހާ ބޮނޑިވެގެން އޮތްކަމެވެ. އަވަހަށް ލޫގަނިތުގައި އަތްޖަހާލުމާއެކު އަލްޔާއަށް އަތްދަމައިގަނެވުނީ ހޫނުގަދަކަމުންނެވެ. އަވަހަށް ފޯނުނަގާ މަންމައަށް ގުޅާފައި އެވާހަކަ ބުނުމުން ނާދިޔާވެސް މިދަނީއޭބުނީ ލޫޔާ އެއޮތްގޮތަށް ހޮސްޕިޓަލަށްވެސް ނުގެންދެވޭނެތީ އަލްޔާއަށް އެކަމުގައި އެހީވެދިނުމަށެވެ. އަލްޔާ ދޮރުހުޅުވާފައި ބޭރުގައި ތިބިމީހުނަށްވެސް ލޫޔާ ހުންއައިސްފައިވާ ވާހަކަ އަންގާ އެންބިއުލޭންސް އަށް ގުޅާލުމަށް އެދުނެވެ. އޭރު ނާދިޔާ ބާރުހިނގުމުގައި އައިސް އެގެއަށް ވަންނަނީއެވެ. ދެމައިން އެކީގައި ލޫޔާ ރީޔިކޮށްގެން ނިކުތްއިރު އެމްބިއުލޭސް އައިސް އޮތުމުން އަަަވަހަށް ލޫޔާ ހޮސްޕިޓަލަށް ގެންދެވުނެވެ.

އަލޫކްގެ އެދުމުގެ މަތީން ހަވީރުވީއިރު ސަލީމް އާއި އެކު އަލޫކް ހަމަޖެއްސި އިތުރުމީހަކު އިބާކައިރިއަށް ރަންކިއުއްވަން ދިޔައެވެ. ސަލީމްކައިރީގައި ދެންހުރި މީހާފެނުމާއެކު އިބާ ހީވީ ބިރުވެރިއެއްޗެއް ފެނުންހެންނެވެ. ދެލޯތަންމިނަށް ބޮޑުވެގެންދިޔައިރު އެއީ އަލޫކް ގަސްތުގައި ދިންލަނޑެކޭވެސް ހިތަށް އެރިއެވެ. ނަމަވެސް އެވަގުތު ބޭކާރުކޮށްނުލާ ހެކިވެރިން ބުނިގޮތަށް އިބާ ކަންތަށްކުރީ ދެންވެސް އަލޫކްއަށް އޭނަ ފެންނައިރަށް އިބާބޭނުންގޮތަކަށް ހުރިހާކަމެއްވެސް ބަދަލުކޮށްލެވޭނެ ކަމުގެ ޔަގީންކަން އޮތުމުންނެވެ. އޭރުވެސް ސަލީމް ކައިރީގައި އިން ހުމާމް ކަޅިޖަހާނުލާ ދިޔައީ އިބާގެ ހަރަކާތްތައް ބަލަމުންނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.