“ހިތް” ލޭ ކޮށެވިފައި……06

ސަކީނާ ޖަޒްލީފަދަ ވާހަކަ ދެއްކުމުން މަޙްރޫމް ވެފައިވާ ކުއްޖެއް އޭނާގެ ދަރިފުޅުގެ ދިރިއުޅުމުގެ ބައިވެރިއަކަށް ހަމަހިލާ ވިޔަކަ ނުދޭނެއެވެ.
***************

އަނެއް ދުވަހުގެ ހެނދުނެވެ.ހެނދުނުގެ ނާޝްތާއަށްފަހު ރިސޯޓަށް ދިޔުމަށް ވާންޖެހޭ ހުރިހާ ތައްޔާރީއެއް ވަނީ ވެ ނިމިފައެވެ.މަންމަގެ އެދުމަށް ރުހާންވެސް މިއަދުހުރީ އޮފީހުން ޗުއްޓީއެއް ނަގައިގެން ގޭގައެވެ.ދެ ޢާއިލާ އެކައްޗަކަށް ވުމުގެ އުފަލުގައި މަޖާކޮށްލަންދާ ދަތުރުގައި ބައިވެރި ވުމަށެވެ.ހަތަރުދުވަސް ފަހުން ރިޝްފާއާއި ކައިލާންގެ ކައިވެނި ކުރެވުމުން ދެޢާއިލާގެ އުފާވެރިކަން ދެގުނައަށް އިތުރު ވެގެންދާނެއެވެ.

“ދަރިފުޅާ އަވަހަށް އާދޭ…ނުވައެއްޖަހާއިރު އެއީ މިކޮޅުން ފުރަން ނިންމާފަ އިން ގަޑި….”މަންމަގެ އަޑަށް ޖަޒްލީގެ އަތުގައި ހިފަހައްޓައިގެންހުރި ކައިލާން ސިހިފައި ޖަޒްލީގެ އަތް ދޫކޮށްލާފައި ބޭރަށް ނިކުންނަން ހިނގައިގަތެވެ.”ޖަޒްލީ ހަނދާންކޮށް ދޮރުތައް ތަޅުލާފަ ނިދަން އޮށޯންނާތި…އަހަރެމެން އަންނާނީ މިރޭ އެކޮޅުގަ ރޭ ކޮށްފަ…”ދޮރާށިން އެތެރެއަށް ވަދެގެން އައި ސަކީނާއަށް އެމަންޒަރު ފެނުނު ކަމަަށް ނުހަދާ ސިޓިންގ ރޫމަށް ބޯދިއްކޮށްލުމަށް ފަހު ބުނެލިއެވެ.ޖަޒްލީއަށް ލިބިފައިވާ މޮޅިވެރި ކަމުގައި އާނއެކޭ ބުނުމުގެ ގޮތުން ބޯޖަހާލެވުނެވެ.މަންމައަށް ނޫންކަމަށް ހަދަމުން އެއް އަތް ޖީބަށް ޖަހާލައިގެން އަނެއް އަތުން ފޯނާއި ކުޅެމުން ނިކުތް ކައިލާންގެ ހިތްވެސް ވަނީ މާޔޫސް ވެފައެވެ.އޭނާއާއި ރިޝްފާގެ ގުޅުމުގައި ގޮށްޖެހުމުގެ ވަގުތު ކައިރި ވަމުން އަންނައިރު އެކަން ހުއްޓުވޭނެ ގޮތެއް ނޭނގޭތީއެވެ.ބައްޕަވެސް އުޅެނީ ކައިލާންއާއި ދުރުން ދުރުންނެވެ.ބައްޕަ އެ ކައިވެނި ހުއްޓުވައި ނުދިނަސް އޭނާއަށް ބައްޕައާއި ދެކޮޅަށް ކުރެވޭނެ މާބޮޑު ކަމެއްވެސް ނޯންނާނެއެވެ.ކޮންމެ ގޮތެއް ވިޔަސް ޖަޒްލީ ފިޔަވާ އިތުރު ފަރާތަކަަށް އޭނާގެ ހިތަކުން ޖާގައެއް ނުދެވޭނެއެވެ.އަދި އިތުރު ލޯތްބަކަށް އެހިތުން ނުވެސް އެދެވޭނެއެވެ.

ލޯންޗުމަތީގައި ތެޅިތެޅިއޮތް ހިތަކާއިގެން ކަނޑުން ނަގަމުން ދިޔަ ކުދިކުދި ރާޅުތަކަށް ނަޒަރު ހުއްޓާލައިގެން މަޑުޖެހިފައި އިން ކައިލާން ފެނިފައި ރުހާން ކުޑަކޮށް ކައިލާންގެ އަތުގައި ހިފާލުމަށްފަހު ވަޓްސް އަޕް ބަޑީ އޭ ބުނެލިއެވެ.ކައިލާން ހަމަ ލައިފްއާއި ދޭތެރޭ ވިސްނާލީ އޭ ބުނެލިއެވެ.ހިތަށް ވަމުންދާ އުނދަގޫތަކަށް ލުޔެއް ހޯދުމަށް ދޮންބެގާތު ޖަޒްލީގެ ވާހަކަ ހިއްސާކުރުމަށް އެވަގުތު އޭނާ ހިތަށް އެރިއެވެ.ނަމަވެސް ދަތުރު މަތީގައި ދެޢާއިލާގެ ހާޒިރުގައި އެއީ އެހާ ފަސޭހަކަމަކަށް ނުވާނެތީ ދޮންބެއާއި އެކު އެކަނިވެވޭނެ ވަގުތަކަށް އޭނާއަށް ޖެހޭނީ ކެތްކޮށްލާށެވެ.އެކުވެރިޔާއާއި އެކު ފަހަތު ސީޓުގައި އިން ރިޝްފާގެ މޫނުމަތީގައިވަނީ އުޖާލާ ކަމެވެ.ކައިލާންއާއި އެކު އެކަނިވެލުމަށްޓަކައި ކުރެވޭ ފޮނި އިންތިޒާރަށް ނިމުން އަންނަން އުޅޭތީ އެހިތް އުފަލުން ނަށަނީއެވެ.ރިޝްފާ ކައިލާންއަށް އިރުއިރުކޮޅާ ބަލަމުންދާ ލަދުވެތި ބެލުންތަކުން ސަކީނާގެ މޫނުމަތީގައިވެސް ވަނީ އުފާވެރި ކަމެވެ.އޭނާގެ ދަރިފުޅުގެ ޙަޔާތަށްޓަކައި އޭނާ ނަގާފައިވާ ފިޔަވަޅާއި މެދު ފަޚުރުވެރިވާ ޙާލުގައެވެ.ރިޝްފާގެ ބައްޕަ އަލީ ވަހީދު ދައްކަމުން ދިޔަ އެމީހުންގެ ވިޔަފާރި ފުޅާކުރުމުގެ ވާހަކައަށް ސަމާލުކަންދީގެން އިން ހަސަންމަނިކު ވެސްވަނީ ބިރުވެރި ކަމެއްގެ ތެރޭގައެވެ.އެރޭގެ ހާދިސާއަށްފަހު ކައިލާންގެ ކުރިމަތީގައި އޭނާގެ އަގުވެއްޓިފައި ވާއިރު، ކައިލާންގެ ބަސްތައް އޭނާގެ ހިތާއި، ސިކުނޑީގައި ވަނީ ބިންވަޅު ނެގިފައެވެ.ރިޝްފާއާއި ކައިލާންގެ ކައިވެނި ހުއްޓުވުން ނޫންގޮތެއް ނޯންނާނެއެވެ.އަދި އޭނާގެ ދަރިފުޅުގެ ލޯބި އަނބުރާ ދުވަހެއްގައިވެސް ލިބޭނީ ޖަޒްލީއާއި ކައިލާން ގުޅުވައިދީގެންކަން އޭނާއަށް ހަމަ ރަނގަޅަށް އިނގެއެވެ.ކުރެވުނު ވިޔާނުދާ ޢަމަލުގެ ސަބަބުން ލޯބިވާ ދަރިފުޅުގެ ހިތުގައި އޭނާއަށްޓަކައި އެވަނީ ފޫހިކަމާއި، ރުޅިވެރިކަމެވެ.

ގޮނޑިސެޓުގައި އިށީނދެ ލައިގެން އިން ޖަޒްލީގެ ހިތަށް ވެރިވެފައިވަނީ ނުތަނަވަސް ކަމެވެ.ކުރެވެމުންދަނީ ކޮންމެވެސް ދެރަކަމެއް ވާން އުޅޭކަހަލަ އިޙްސާސެކެވެ.ކުއްލިއަކަށް ސިއްސައިގެން ގޮސް ރިންގުވަމުން ދިޔަ ފޯނަށް ބަލައިލެވުނެވެ.ޖަޒްލީ ގޮނޑިން ތެދުވެގެންގޮސް ފޯނުނަގައި ކަންފަތުގައި ޖައްސާލީ އެއީ ކައިލާންގެ ކޯލެއްކަން ކަށަވަރުވާތީއެވެ.އޭނާ ނިދަން ނުގޮސް އެއިންނަނީވެސް ކައިލާން ގުޅާނެ ވާހަކަ ބުނުމުން އެއަޑު އަހާލާ ހިތުންނެވެ.މުޅި ދުވަސް ހޭދަވެގެން ދިޔައީ ކައިލާންގެ ހަނދާނުގައެވެ.

“ހަލޯ…..ޖަޒްލީ….މިސް ޔޫ އަލޮޓް…ސޮރީ މާލަހުން ގުޅުނީމަ…ހަމަ ރޫމަށް އާދެވުނުހާ އަވަހަކަށް މިގުޅީ….ޖަޒްލީ…ވަރަށް ލޯބިވޭ….މިދަތުރު ނިމުނުހާ އަވަހަކަށް އަހަރެންގެ މީހަކަށް ޖަޒްލީ ހަދާނަން…މީ ކެތްކުރަން ދަތި އިޙްސާސެއް…ޖަޒްލީއާއި ވަކިން ހޭދަވާ ކޮންމެ ވަގުތަކީ މިހާރު އަހަރެންގެ ޙަޔާތުގަވެސް ބަރުދާސްތު ކުރަމުންދާ އެންމެ އުނދަގޫ ހިތްދަތި ވަގުތުތައް..”

ކައިލާންގެ ވާހަކަތައް އަޑު އަހަމުން ދިޔަ ޖަޒްލީގެ ދެލޮލަށް ޖަމާވެފައިހުރި ކަރުނަތައް އެއްވެސް ހިފެހެއްޓުމެއްނެތި ފާބައިގަތެވެ.އަދި އެހިތުގެ ރިހުން އިތުރުވެ ރުއިން މަޑު ގިސްލުމަކަށް ބަދަލުވިއެވެ.އެއަޑު ކައިލާންގެ ކަންފަތުގައި ޖެހުމުން އޭނާގެ ހިތަށް ކުރި އަސަރު ބުނެދޭންވެސް ދައްޗެވެ.އެހިތުގައި ޖަޒްލީ އެންމެ ފުރަތަމަ ޓަކިދިން ދުވަހުން ފެށިގެން އެއަޑު އަހާލާ ހިތުން ކައިލާންވަނީ ކެތްމަދުވެފައެވެ.ނަމަވެސް އެއީ ދުވަހަކުވެސް ނުވާނެ ކަމެއްކަން އިނގޭއިރުވެސް އެލޯތްބަށް އެދެވޭލެއް ބޮޑުކަމުން ޖަޒްލީ އޭނާގެ ޙަޔާތުގެ ބައިވެރިއަކަށް ހަދަން ނިންމީއެވެ.އޭނާގެ ހިތުގެ ރާނީގެ އަޑު ގިސްލުމުގެ ތެރެއިން އިވުމަށްވުރެ އެއަޑު ދުވަހަކުވެސް ނުއިވުން އޭނާއަށް މާ ހިތަށްފަސޭހަވާނެއެވެ.

“ޖަޒްލީ…ޕްލީޒް…ނުރޮއި ހުއްޓާލަބަލަ…އަހަރެންގެ ހިތަކަށް ކެތެއް ނުވޭ ފަޅި ސިކުންތަކަށްވެސް ޖަޒްލީ ރޯއަޑު އަހާކަށް…އަހަރެން ބޭނުމީ ޖަޒްލީ އަބަދުވެސް އުފަލުގަ ބަހައްޓަން..”.

**********

“ރީޝް…ކައީ ހަމަ ކައިވެންޏަށް ޤަބޫލުތަ؟…މިހެން މިބުނީ އޭނަ ތަންކޮޅެއް މަޑުޖެހިފަ ހުންނަހެން ހީވާތީ….”ކޮފީތަށިން ކޯވަރެއް ބޯލުމަށްފަހު ހަނާ ބުނެލިއެވެ.ރިޝްފާގެ ހިތަށް އެވަގުތު އުނދަގޫ އިޙްސާސެއް ކުރެވިގެން ދިޔައެވެ.އެކުވެރިޔާ އެބުނި ވާހަކައަށް ވިސްނާލަން އެވަގުތު އޭނާއަށް މަޖުބޫރު ވިއެވެ.އެއީ ކައިލާން އޭނާއާއި ދުރުން ދުރުން އުޅޭހެން އޭނާއަށްވެސް ހީވެފައިވާތީއެވެ.އެންމެން މޫދަށް އެރިގެން މަޖާ ކުރިއިރުވެސް ކަައިލާންގެ މޫނުމަތިން ފައުޅުވަމުންދިޔައީ ނުތަނަވަސް ކަމެވެ.އިރުއިރު ކޮޅުން އަތުގައި އަޅާފައި އޮތް ގަޑިއަށް ބަލަމުން ދިޔަ ގޮތުން ހީވީ ތަނަކަށްދާން ލަސްވެގެން އުޅޭހެންނެވެ.އެހެންވެ އޭނާ ދެތިންފަހަރަކު އެކަމާއި ސުވާލުވެސް ކުރިއެވެ.ނަމަވެސް ކައިލާންގެ ފަރާތުން މާ އެދެވޭ ޖަވާބެއް ނުލިބުމުން އޭނާ އަޅާނުލީއެވެ.އަނެއްކާ ކައިލާން އޭނާއާއި ކައިވެނިކުރަން ބޭނުން ނުވަނީބާވައެވެ.ރިޝްފާއަށް އޭނާގެ ޚިޔާލުތަކުން ނިކުމެވުނީ ހަނާ އޭނާގެ ކޮނޑުގައި ހިފާ ތަޅުވާލުމުންނެވެ.ރިޝްފާގެ މޫނުމައްޗަށް ވެރިވެފަައިވަނީ ހިތާމަވެރިކަމެވެ.ކޮންމެ ހާލެއްގައިވިޔަސް އޭނާ ކައިލާން ބޭނުމެވެ.އޭނާގެ ހިތުގެ ފިނިކަން އެހިތާއި ވަކިވެދާނެ ކަމުގެ ބިރު ހީވާންފެށީއެވެ.

“ހަނާ……ކައީ ދުވަހަކުވެސް އަހަރެންދެކެ ލޯބިވާވާހަކަ ބުނެފައި ނުވާއިރު އޭނާގެ އަމަލަކުންވެސް އެކަން ފައުޅުކޮށްފައެއް ނުވޭ…އަނެއްކާ މިކައިވެންޏަކީ ކައީގެ ރުޙުމާ ދެކޮޅަށް ކުރެވޭ ކައިވެންޏެއްބާ….”

ރިޝްފާ ފޯނު ނަގައި ކައިލާންއަށް ގުޅަން އުޅެނިކޮށް ހަނާ އޭނާގެ ފޯނު އަތުލަައި ވާހަކަ ދެއްކިއެވެ.

“ރީޝް ތިހުރީ ހަމަހޭގަތަ؟…އަމިއްލަ އަތުން އަމިއްލަ އުފާތައް ކަތިލާނީ މޮޔައެއް…..ކައީގެ ހިތުގަ ކޮންމެ އެއްޗެއް އޮތަސް ރީޝް ކައީދެކެ ލޯބި ވެއެއްނު…އިން ކޭސް ކައީގެ ހިތުގައި ރީޝްއަށް ލޯތްބެއް ނެތަސް ކައިވެނި ކުރެވުނީމަ ހުރިހާ ކަމެއް ބަދަލުވާނޭ….އޭރުން އެހިތް ޖެހޭނީ ރީޝްއަށްޓަކައި ހުޅުވާލަން…”

އެކުވެރިޔާގެ ވާހަކަ އަޑު އަހާފައި ރިޝްފާގެ ހިތަށްވެސް ކޮންމެވެސް ވަރެއްގެ ލުޔެއް ލިބިގެން ދިޔައެވެ.ހަނާ އެބުނީ މުޅިޔަކުން ދޮގު ވާހަކައެއް ނޫނެވެ.އަސްލު ޙަޤީގީ ލޯތްބަކީ ކައިވެނީގެ މަތިވެރި ގުޅުމުން ދެހިތް ގުޅުމަށްފަހު އެކަކު އަނެކަކަަށް އަޅާލާ، އުފެދޭ އިތުބާރާއި ޔަޤީންކަމެއްގެ ސަބަބުން ކުރިފަޅާ ސާފު ލޯބި ނޫން ހެއްޔެވެ.

“ހަސަން މަނިކު ކީކޭ ކިޔަންތަ ތިއުޅެނީ…..މަގޭ ދަރިފުޅަށް ރިޝްފާއަށް ވުރެ ވަކިން ރަނގަޅު ބައިވެރިޔަކު ނުލިބޭނެ…”

ނިދަން އެނދުގައި އޮށޯވެ އޮތް ސަކީނާ އޭނާގެ ފިރިމީހާ ދައްކަމުންދިޔަ ވާހަކައާއި ނުރުހިފައި ބުނެލިއެވެ.

“މަށެއް ނުބުނަމޭ ރިޝްފާއަކީ ގޯސް ކުއްޖެކޭ….އެކަމަކު ކައިލާންގެ ހަރަކާތްތަކުން ރިޝްފާއާ ގުޅެން ބޭނުން ނުވާހެން ހީވާތީ އަހަރެން މިހެން މިބުނީ…އެސޮރުގެ ދިރިއުޅުމަށް އަހަރެމެން ކީއްކުރަން އަތްގަދަ ކުރަންވީ….”

ސަކީނާ ކިތަންމެ ނުރުހިފައި އޮތަސް ހަސަން މަނިކު ބެލީ ދަރިފުޅުގެ ކައިވެނި ހުއްޓުވޭނެ މަގެއް ފެނޭތޯއެވެ.ނަމަވެސް އެކަމުން ސަކީނާގެ ރުޅިގަނޑު ގަދަވެ ހަސަން މަނިކާއި ދިމާއަށް ހަޅޭއް ލަވައި ގަތެވެ.

“ކައިވެންޏަށް ދެދުވަހަށް ވެފައި ވާއިރު ކޮންހާ މޮޅު ވާހަކައެއް ދައްކާކަށް..މަގޭ ކައިލާންއަށް ރަނގަޅުގޮތް މަށަށްވުރެ ބޮޑަށް އެނގޭނެ މީހެއް ނުހުންނާނެ….މަގޭ އަތުން ފައިން ގޯހެއް ހަދަން ބޭނުން ނުވަންޏާ ދެވަނަ ފަހަރަަށް ތިކަހަލަ ވާހަކައެއް ނުދައްކާ މަޑުން އޮވެގެން ނިދޭތޯ ބަލާ”.

ނިދޭތޯ އެތަށް އިރަކު އެނދުގައި ފުރޮޅި ފުރޮޅި އޮތް ޖަޒްލީގެ ލޮލަށް ނިދި ސަވާރުވެ ނިދުނުއިރު ހުރީ އެކެއްޖަހާފައެވެ.ހުވަފެނީ ޢާލަމެއްގައި ކައިލާންއާއިއެކު އުފާވެރި ވަގުތުތަކެއް ހޭދަ ކުރަމުންދިޔަ ޖަޒްލީއަށް ނިދިން ހޭލެވި ދެލޯ ބޮޑުކޮށްލެވުނެވެ.ހަމަ އެވަގުތު ބާރުގަދަ ދެއަތުން އޭނާގެ މޫނުގައި އެޅި ބާލީހާއިއެކު މުޅި މީހާގެ ޚަބަރު ހުސްވިއެވެ.

**************

“ކީކޭ… ލޯބިވަނީ ޖަޒްލީ ދެކެއޭ… ކައީއަށް އިނގޭތަ ތިކިޔޭ އެއްޗެއް..އަނެއްކޮޅުން ކައިވެނި ކުރަން ބޭނުން ނުވަންޏާ ކީއްވެ ރިޝްފާ ލައްވާ ރަން ކިޔުއްވީ. . އިނގޭތަ ތިކަން މަންމައަށް އެނގިއްޖިއްޔާ މަންމަ ޖަޒްލީއަށް ކޮށްލާނެވަރު…”

ކައިލާންގެ ވާހަކަ އަޑުއަހާފައި ރުހާންގެ ހިތަށް ހީވީ ހޫނު ފެންއެއްޗެއް އޮއްސާލިހެންނެވެ.ހިތަށް ލިބުނު ނުތަނަވަސް ކަމުގައި އޭނާގެ މޫނުމަތިންވެސް ކަންބޮޑުވުން ފައުޅުވެގެން ދިޔައެވެ. އެއްކޮޅުން ލޯބިވާ ކޮއްކޮއެވެ. އަނެއް ކޮޅުން އޭނާގެ ހިތުގެ މިލްކުވެރިޔާއެވެ. އާނއެކެވެ. ކައިލާންއަށް ޖަޒްލީ ފެނުމުގެ މާކުރިން އޭނާގެ ހިތުން ޖަޒްލީވަނީ ޖާގަ ހޯދާފައެވެ. ނަމަވެސް އެ ލޯބި ޙާސިލް ކުރުމުގެ ދަހިވެތި ކަމުގައި މުޅި އުމުރަށް މަންމަގެ ރުޅިވެރިކަމުގެ ޝިކާރަވެރިއަކަށް ޖަޒްލީ ވުމަށް ފަހަރެއްގައިވެސް އޭނާއަކަށް ނުރުހެވޭނެއެވެ. އެހެންވެ މިއަދާއި ހަމައަށްވެސް އޭނާ އެ އަންނަނީ އެ ލޯބި ރަނގަޅަށް އުފަން ނުވަނީސް ފަސްލާ ވަޅުލެވޭތޯ މަސައްކަތް ކުރަމުންނެވެ. އޭނާގެ އަތުތެރެއިން ހިމާޔަތް ދެވެން ނެތް ތަނުގައި މަންމަގެ ވަކިތަކުން އެ ކުށެއްނެތް މައުސޫމް ކުއްޖާ ސަލާމަތް ކުރެވޭތޯއެވެ. ނަމަވެސް މިވީ ކީއް ހެއްޔެވެ؟

“ދޮންބޭ ޕްލީޒް.. އަޅެ ދެން ކިހިނެތް ހަދާނީ… އަހަރެންވެސް ހިޔެއް ނުކުރަން ކަންތައްތައް މިހާ އަވަހަށް ނިމިގެންދާނެ ކަމަކަށް”

ރުހާންއަށް ހަމަ ބިމަށް އާދެވުނީ ކައިލާންގެ އަޑު އިވުމުންނެވެ. ކައިލާންގެ އަޑުގައިވާ ރިހުމުން އެކަނިވެސް އޭނާ ޖަޒްލީދެކެ ލޯބިވާވަރު ރުހާންއަށް އިޙްސާސް ކުރެވުނެވެ. ނަމަވެސް މައްސަލައަކީ މަންމަ ދުވަހެއްގައިވެސް ޖަޒްލީއާއި ކައިލާން ގުޅުމަށް ހިތްހަލާލު ނުދޭނެކަން އެނގޭތީއެވެ. އަދި މަންމަގެ ނުރުހުމުގައި ކައިވެނި ކުރިއަސްވެސް ދެމީހުން އުފަލުގައި އުޅުނަ ނުދޭނެކަން ޚުދު ކައިލާންއަށްވެސް އެނގޭނެއެވެ. ވީއިރު ކައިލާން ޖަޒްލީގެ ހިތުގައި އުއްމީދު އާލާކުރުވީތީވެސް ރުހާން ވަނީ ގޮތްހުސްވެ މާޔޫސްވެފައެވެ. ކޮއްކޮގެ ހިތަށް ލުޔެއް ގެނެސްދޭނެ ލަފުޒެއްވެސް ބޭރުކުރުމަށް އޭނާގެ ދޫ ވަނީ ނުކުޅެދިފައެވެ. ކައިލާން އާއި ޖަޒްލީގެ ގުޅުން ފަޅާއަރައިފިނަމަ މަންމަ ޖަޒްލީގެ ދިރިއުޅުން ޒަހަރަށް ހަދާނެކަންގައިމެވެ. ޖަޒްލީއަށްލިބޭ ކޮންމެ ހިތްދަތިކަމެއްގައި އޭނާގެ ދެލޮލުންވެސް ލޭކަރުނަ އޮހޮރޭނެއެވެ. އެހާވެސް ރުހާން ޖަޒްލީދެކެ ލޯބިވެއެވެ.

“ކައީ ދޮންބެ މިދައްކާ ވާހަކަ އަޑުއަހާ…. ދޮންބެއަށް އިނގޭ ކައީ ޖަޒްލީދެކެ ވަރަށް ލޯބިވާކަން… އެހެންވީމަ ޖަޒްލީއަށް ދެރަގޮތެއްވާން ނޭދޭނަމަ ތިވާހަކަ އިތުރު އެހެން މީހަކަށް ނާންގާ އިހަށް ދޮންބެއަށް ތިކަމާ ވިސްނާލަން ވަގުތުދީ…”

************

ޖަޒްލީއަށް މަޑުމަޑުން ލޯހުޅުވާލެވުނުއިރު އެއް އަތުން ބޮލުގައި އަތް އަޅައިލެވުނީ ފާޑަކަށް ބޮލަށް ބަރުވެފައިހުރި ކަމުގެ އިޙްސާސް ކުރެވުމުންނެވެ.އޭނާއަށް ތެޅިގަނެފައި ވަށައިގެންވާ މާޙައުލަށް ނަޒަރު ހިންގާލެވުނެވެ. ރީތި މާބޮޑުނޫން ކޮޓަރިއެކެވެ. އޮވެވުނީ ކުއީން ސައިޒުގެ އެނދެއްގައެވެ.

ހަމަ އެވަގުތު ކޮޓަރީގެ ކަނަކަށް ވާގޮތަށް ބަހައްޓާފައި ހުރި ޑްރެސިން ޓޭބަލްގެ ކުރިމަތީގައި އިން ގޮނޑީގައި ހަމަ ޖެހިލައިގެން އިން މީހާ ޖަޒްލީގެ ލޮލުގައި އަޅައިގަތީ އެމީހާ ކޮންމެވެސް މީހަކާއި ފޯނުން ވާހަކަ ދައްކާ އަޑު އިވުންނެވެ.

“އޯކޭ… ކައިލާން ބޭނުން ވާގޮތަށް މިކަން ނިންމާލަދޭނަން.. ދެން އެ މަންމަނު ކައިރިން ސަލާމަތް ނުވެގެން އުޅޭކަށް ނުޖެހޭނެ… “އެ ތޫނު ބަސްތަކާއިއެކު އެ ފޯނުކޯލް ނިންމާލުމަށްފަހު އެމީހާ އަނެއްކާވެސް އެހެން މީހަކަށް ގުޅުމަށްފަހު ވާހަކަ ދައްކަން ފެށިއެވެ.

“އޭ ބަޑީ… ކޮބާތަ ކަލޭ.. ހާދަ އިރެކޭ ތިވަނީ… އަވަހަށް އާދޭ މިކަން ނިންމާލަން… ކައިލާން ބުނީ އަހަރެމެން ބޭނުން ގޮތެއް ހަދާފަ އެއްލާލާށޯ… އެ މަންމަނަށް އެވަރުން ރަނގަޅު ފިލާވަޅަކަށް ފުދޭނެޔޯ… ”

ހޭނާރާ ކަމަށް ހެދިގެން އޮތް ޖަޒްލީގެ ހިތްވަނީ އިވިގެންދިޔަ ބަސްތަކާއިއެކު ކުދިކުދި ވެފައެވެ. ލޯމަރާ އެސްފިޔަތަކަށް ބާރުކުރެވެމުން ދިޔައީ ހިތުގައި ނަގަމުންދިޔަ ދިލަޔަށް ކެތް ނުކުރެވިގެންނެވެ. ޖަޒްލީގެލޮލުގެ އެސްފިޔަތަކާއި ހަނގުރާމަ ކުރަމުންދިޔަ ކަރުނަތައް އިސާހިތަކު ގަދަކަން ހޯދައިފިއެވެ. ކަރުނަ ތިއްކަކަށްފަހު ތިއްކެއް އެނިކަމެތި އަންހެން ކުއްޖާގެ ކޯތާފަތް ތެންމަމުން ދިޔައެވެ. އެމަންޒަރުފެނި ކޮޓަރިތެރޭގައި ހުރި މީހާގެ މޫނުމައްޗަށް ނުލަފާ ހިނިތުން ވުމެއް ވެރިވެގެން ދިޔައެވެ. އަދި މީހަކަށް ގުޅައިގެން ކަމަށް ހަދައި ދެތިން ފަހަރަކު ހަލޯއޭ ބުނެލުމަށްފަހު މިތަނަށް ރޭންޖު ދައްކަމުން ރަނގަޅަށް އަޑެއް ނީވެޔޭ ނެޓްވޯކް ލިބޭ ތަނަކަށް ގޮސް އެބަ ގުޅަމޭ ކިޔާފައި ކޮޓަރިން ނިކުމެގެން ހިނގައްޖެއެވެ. ފުރުސަތުގެ ބޭނުން ހިފައި ޖަޒްލީވެސް އަވަހަށް ތެދުވެ ކަރުނަތައް ފޮހެލުމަށްފަހު ދުވެފައިގޮސް ކޮޓަރިން ނިކުމެވޭތޯ ދޮރުގެ ތަޅުގައި ހިފާލިއެވެ.

**ނުނިމޭ***

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.