ނޭނގި ހިތޭ ތި އަތުލީ 17

ދެން ފެނުނީ މައުވަން އައިސް މަލާކް އަތުގައި ހިފައި ކޮޅަށް ނެގިތަނެވެ. އަދި އަނގައިން ބުނުމަކާނުލާ އަތުގައި ހިފައި ގަދަކަމުން ކޮޓަރިއަށް ވެއްދިއެވެ. އަދި މައުވަން ގޮސް އޮށޯތީ އެނދުގައެވެ. ހައިރާން ކަމާއެކު މަލާކް ހުރީ ކޮޅަށް ބަލާށެވެ. އިރުކޮޅަކުން ގޮސް ކުރީން މައުވަން އޮތްތަނުގައި އޭނަގޮސް ޖައްސާލިއެވެ.

ޖެހިގެން އައި ދުވަހު ދެމީހުން ޑިއުޓީއަށް ދާން ނިކުތީ އެކީގައެވެ. މައުވަން ސައިކަލަށް އެރުމަށް ބުނުމާއެކު މަލާކް ދެބަހެއްނެތި އެރިއެވެ. މަލާކްގެ މި އަމަލުން މައުވަން ހިތްހަމަ ޖެހުނެވެ. އޭނައަށް ނޭންގުނީ އެއީ އަމީނާ ފަހަރެއްގައިވެސް މަތީގައި ބަލަށް ހުރެދާނެކަމަށް މަލާކް ކުރިކަމެއްކަމެވެ.

ވަކިހިސާބަކަށް ދުއްވާފައި މަލާކް އެންގީ މައުވަންއަށް ސައިކަލު ހުއްޓުމަށެވެ. ވާނުވާ ނޭނގިހުރެ މައުވަން އެކަން ކުރިއެވެ. މަލާކް ސައިކަލުން ފައިބައިފައި ބުނެލީ އޭނަގެ ސައިކަލު އެތަނުގައި ހުރީ ކަމަށާއި ދެން ދާނީ އޭގައިކަމަށެވެ. މައުވަންއަށް ހުރެވުނީ ބުނާނެ އެއްޗެއް ނޭނގިފައެވެ. އެހެން ހުރެފައި އޭނަވެސް ސައިކަލު ދުއްވާލިއެވެ. މަލާކްގެ ސައިކަލު ފަހަތުންނެވެ.

އާދައިގެ މަތީން ބްރޭކް ގަޑީގައި މައުވަން އާއި ނިއަމް ބައްދަލުކުރިއެވެ. މައުވަން ބުނި ގޮތުގައި ނިއަމް ކަހަލަ ބައިވެރިއަކު އޭނަގެ ކޮއްކޮއަށް ލިބުނު ކަމަށްޓަކައި އުފާވެއެވެ. އަދި އޭނަ ނުގަބޫލް ވެދާނެތީ  ލައިހާގެ ލޯތްބަށް ފުރަގަސް ދިނީ ނިއަމްގެ މޮޔަކަމުން ކަމަށް ބުނެލިއެވެ. އެވަގުތު އިތުރު ޑޮކްޓަރުންތަކަކާއެކު ކެންޓީނަން ވަދެގެން އައި މަލާކް ފެނިފައި ނިއަމް އަތުން ހަނާއަޅާލައިފައި އައުމަށް އަންގާލިއެވެ. މަލާކް މިސްރާބް އެދިމާލަށް ބަދަލު ކޮށްލިއެވެ. މަލާކް އައުމުން ނިއަމް އެދުނީ އެމީހުންނާއެކު ކޮފީގައި ބައިވެރި ވުމަށެވެ. “ހާދަ ދިމާނުވެއޭ މިހާރު ދޯ! ކިހިނެއްތަ ކަންތައްތައް؟ ނިއަމް އަހާލިއެވެ. މަލާކް ރަނގަޅޭބުނެ ޖަވާބްދިނެވެ. “އޭ ހިނގާބަލަ ތިންމީހުން ވެގެން މިރޭ ދިމާވެލަން. އަބަދު މިތަނުން ވިއްޔަ މި ދިމާވަނީ.” ނިއަމް ޚިޔާލެއް ހުށައެޅިއެވެ. މަލާކް މަޑުކުރީ މައުވަން އެއްޗެއް ބުނޭތޯއެވެ. އެކަމަކު އޭނަ އެއްޗެއް ނުބުނުމުން މަލާކް ބުނެލީ އެއީ ރަނގަޅު ޚިޔާލެއް ކަމުގައެވެ. އެއާއެކު މައުވަންއަށް ބަލާލެވުނީ މަލާކްގެ މޫނަށޭވެ. މައުވަން ބުނެލީ މިރޭގޭގައި މުހިއްމު ކަމެއް އޮންނަކަމުގައެވެ.

ޑިއުޓީނިންމާފައި އަކްޔަން ގެއަށް އައިއިރު ގޭތެރޭގައި މީހުންގަނޑު އުޅެނީ ހަލަބޮލި ކޮށްލައިގެންނެވެ. މިރެއަށް ރަނގަޅު ކާއެއްޗެއް ތައްޔާރު ކުރުމާއި ގޭތެރެ ފޮޅުމާއި އެކިކަން ކަމުގައެވެ. އެހެން މީހުން އަވަދިނެތި އުޅުނެއް ކަމަކު އަކްޔަން ގެ މިލާފައިވާމޫނުން ބަސްބުނުމަކާ ނުލާ އޭނަގެ ހުރިހާ އިހްސާސެއް އެހެން މީހުންނަން ބުނެދޭފަދައެވެ. އަކްޔަން ކޮޓަރިއަށް ވަނުމުން އެތަން ބަލަން ހުރެފައި ޒާނާ ވެސް އެކޮޓަރިއަށް ވަނެވެ. ޒާނާ ބޭނުންވީ އަކްޔަންގެ މޫނުމަތީން އެއްވެސް އުފާވެރިކަމެއް ފެންނަން ނެތް ސަބަބު އޮޅުން ފިލުވާށެވެ. ޒާނާ އަހާލުމާއެކު އަކްޔަން ހުރިހާވާހަކައެއް ކިޔާދިނެވެ. އޭރު ހަޤީޤަތިގައިވެސް އަކްޔަން ހުރީ ވާހަކަ ދައްކާލާނެ މީހަކަށް ބޭނުންވެފައެވެ. މަލާކްވެސް ގޭގައި ނޫޅޭތީއާއި އެކުގައެވެ. ޒާނާ ވެސް ހިތްހަމަ ނުޖެހުނީ އޭނަގެ މަންމަ އާއި ނަސީމާދެކެއެވެ. އަދި އެދެމީހުންނާ ވާހަކަ ދައްކާނެ ކަމަށް ބުނެ ނިކުމެގެން ދިޔައެވެ.

ގަޑިން ރޭގަނޑު ނުވައެއް ޖެހިއިރު މަޒްހަރުމެން ގޭގެ އެއްމެން ތިބީ ސިޓިންރޫމްގައެވެ. ޔަޒާން ފިޔަވައެވެ. އޭނަ މުހިއްމު ކަމެއްގައި ބޭރަށް ދިޔައީއެވެ. ހަމައެވަގުތު އަކްޔަން އިންނަން ހަމަޖައްސާފައިވާ އަންހެންކުއްޖާ އާއި އޭނަގެ އާއިލާ އައެވެ. ގެއަށް ވަދެގެން އައި އަންހެން ކުއްޖާފެނި ސިހުމެއް ލިބުނީ މައުވަންއަށެވެ. އެ ކުއްޖާއާއި ހަތަރު ކަޅިހަމަވެގެން ދިޔަވަގުތު ނުލަފާ ގޮތަކަށް މައުވަން އާދިމާލަށް އޭނަ ހީލިއެވެ.  ނަސީމާ އެމީހުން އިށީނަން ތަންދެއްކިއެވެ. އަދި ގޭގެ އެއްމެން ތަޢާރަފް ކޮށްދިނެވެ. އެއާއިލާއިން ވާހަކަ ދެއްކީ އަންހެން ކުއްޖާގެ ބައްޕަ އަލީއެވެ. އަދި ދެން އެއިނީ އޭނަގެ އަންހެނުން ފަހީމާ އާއި ދަރިފުޅު ރަފާ ކަމުގައި ބުނެލިއެވެ. އެކިވާހަކަ ދެއްކުމަށް އިރުކޮޅެއް ހޭދަކޮށްލުމަށް ފަހު އެއްމެން ދިޔައީ ކާށެވެ. އަދި އެއަށްފަހު އަކްޔަން ދިޔައީ ރަފާ ގޮވައިގެން ގޯތިތެރޭގައިވާ ބަގީޗާއަށެވެ. ނަސީމާ ބުނެގެންނެވެ.

“އަހަރެން މިކައިވެނި ކުރަން މިއުޅެނީ މަންމަ އަހަންނަން މަޖްބޫރު ކޮށްގެން. އަދި އަހަރެން ލޯބިވާ އެހެން ކުއްޖަކު ހުރޭ” އަކްޔަން އިއްވާލިއެވެ. ރަފާ ބުނެލީ އޭނަ އަކްޔަން އާއި އިންނަން މިއުޅެނީ ލޯބިން ކަމުގައެވެ. އަދި އަކްޔަންގެ ތި ލޯބި ހަނދާންނެތޭވަރަށް ލޯބި ދޭނަންކަމަށް ރަފާ ބުނެލިއެވެ. އަކްޔަންއަށް ކައިވެނި ހުއްޓުވަން ބުނާކަށް ގަސްދެއްނުކުރިއެވެ. އަދި އޭނަ ދެއަތްބަންވިއަސް އޭނަ ލޯބިވާ ކުއްޖާއާއި އިންނާނެ ކަމުގައި ބުނެލިއެވެ. ރަފާ ބުނެލީ ރަފާއާއި އިނދެފިނަމަ އަކްޔަން ތި ޚިޔާލު ކުރަން ހިތަށްވެސް ނާރާނެ ކަމުގައެވެ. އެވަގުތު އަކްޔަން އަށް ގޮވަމުން މައުވަން އެތަނަށް އައެވެ. އަދި އަލީ ގޮވާކަމަށް ބުނުމުން އަކްޔަން ވަނީ ގޭތެރެއަށެވެ. “ހައެ މައިލަވް” އަކްޔަން އެތެރެއަށް ވަނުމާއެކު ރަފާބުނެލިއެވެ. ރަފާ އަކީ މައުވަން ކިޔަވަން އުޅުނު ދުވަސްވަރު ރައްޓެހިވެގެން އުޅުނު ކުއްޖެކެވެ. ދެމީހުންއެކީ އަހަރަކަށްވުރެ ގިނަދުވަސް އުޅުނެވެ. ރަފާއާއި މައުވަން ރުޅިވީ ލޯބި ނުވާތީ އާއި އަދި ރަފާގެ އުޅުންވެސް މައުވަންއަށް ކަމުނުދާތީއެވެ. ރަފާ މައުވަން އާއި ރައްޓެހިވެގެން ހުރެ އެހެން ކުދިންނާއި ގުޅުން ބާއްވައެވެ. ރަފާ ބުނާގޮތުން ނަމަ އެއީ މައުވަންވެސް އުޅޭގޮތެވެ. އެހެންވެ އެ ގޮތަށް އުޅުމުގެ ހައްގު އޭނައަށްވެސް އޮންނާނެއެވެ. އެކަހަލަ ކޫސަނި މައްސަލަ ޖައްސައި މައުވަން ރަފާއާއި ރުޅިވީއެވެ. ރަފާ އަކީ އެދުވަސްވަރު މުޅި ކޮލެޖަށްވެސް މަޝްހޫރު ކުއްޖެކެވެ. ފިރިހެން ކުދިންނާއި ހެދި ހުންނަނީ މޮޔަވެފައެވެ. އަދި އެދުވަސްރު އެތަނުގައި ކިޔަވަން ހުރި ރަފާގެ ކަޒިން ބޭބެއަކަށް އެވާހަކަތަށް މައުވަން ކިޔާދިނެވެ. އަދި އޭނަ ރުޅިވީވެސް އެކަމުގައި ނަސޭހަތްދީ ހައްލު ނުވެގެން ކަމުގައި މައުވަން ބުންޏެވެ. އެކަމުގެ ސަބަބުން އާއިލާ ތެރޭގައި ރަފާގެ އަގުވެއްޓި ފަހުން ކިޔަވަންވެސް ދާންޖެހުނީ އެހެން ޤައުމަކަށެވެ. އަދި އެވެސް މަންމައާއި އެކީއެވެ. އޭގެ އިތުރުން އޭނަގެ ބައްޕަ އެތަން ޒަމާނެއް ވަންދެން އޭނައާއި ވާހަކަ ނުދައްކައި ހުއްޓެވެ.އެކަމުގެ ބަދަލު މައުވަންގެ ކިބައިން ހިފާނެ ވާހަކަ ރަފާވަނީ ބުނެފައެވެ. މިއޮތީ އެދުވަސް އައިސްސަކަމަށް މައުވަންއަށް ޤަބޫލް ކުރަންޖެހުނެވެ. ނޭނގި ހުއްޓައި މި ޖެހުނީ އަނެއްކާ އަނެއް ކަންތައް ގަނޑެވެ. މައުވަން އެއްމެ ކަންބޮޑުވީ މިކަމުގެ ތެރެއަށް އަކްޔަން ރަފާ ވައްދާފައިވާތީއެވެ. “ކަލޭ ކީއްކުރާނަމޭ ހިތާތަ ތި އުޅެނީ” މައުވަން ރަފާއަށް ބުނެލިއެވެ. “އަހަރެން މީގެ ތިން އަހަރު ކުރިން ކުރާނެކަމަށް ބުނެފަ އޮތްކަމެއް ކުރަން މިއުޅެނީ” ރަފާ ޖަވާބު ދިނީ ނުލަފާ ފާޑަކަން ހެވިލާފައެވެ. “އެކަމަކު ކަލޭ ނުޖެހެ މިކަމުގެ ތެރެއަށް މަގޭ ފެމެލީ ވައްދާކަން” ކިތައްމެ ރުޅި އައިސް ހުއްޓެއްކަމަކު މައުވަން ވާހަކަ ދެއްކީ މަޑުންނެވެ. “އަހަރެމެން ދެމީހުންގެ ތެރެއަށް ފުރަތަމަ ފެމެލީ ވެއްދީ ކެލޭ. އެކަން ހަނދާންކުރާތި” މައުވަން މޫނުގައި ޖެހޭނުޖެހޭ ހިސާބަށް ޝަހާދަތް އިނގިލި ދިއްކޮށްލަމުން ރަފާ އިއްވާލިއެވެ. އަދި މައުވަން އަށް އިތުރު އެއްޗެއްބުނާނެ ފުރުސަތެއް ނުދީ ގޭތެރެއަށް ވަންނަން ހިނގައިގަތެވެ.

އެރޭ ދެ އާއިލާ ވަކިވީ އެއްމަސް ފަހުން ކައިވެނި ކުރަން ނިންމާފައެވެ. އެވަރުވެސް ލަސްކަމަށް ބުނެ ރަފާ ޝަކުވާކުރިއެވެ. އެކަމަކު ދެ އާއިލާއިންވެސް ރަނގަޅު ފެންވަރުގެ ޕާޓީ އެއް ބާއްވަން ބޭނުންވާތީވެ މަސްދުވަސް ފަހުން ކުރަން ނިންމީއެވެ. އެކި އެކި ތައްޔާރީތަށް ވުމަށްޓަކައެވެ. އެވާހަކަތަކުގައި އަކްޔަން ބައިވެރިއެއް ނުވެއެވެ. ކޮންމެ އެއްޗެއް އަހާލިއަސް އަކްޔަން ބުނަނޫ ނަސީމާއަށް ފެންނަ ގޮތެއް ނިންމުމަށެވެ.

ކުރީރޭ ގެ ހާދިސާއަށްފަހު މައުވަން މަލާކްއާއި މާބޮޑަކަށް ވާހަކައެއް ނުދައްކައެވެ. ހަމައެކަނި އަމީނާގެ ކުރިމަތީގައި ބުނެލާއެއްޗެއް ބުނަނީއެވެ. މިކަމުގެ ސަބަބުން މަލާކަށް އުނދަގޫ ވަމުން ދިއައެވެ. މައުވަންގެ އެ ހިމޭންކަމުން މަލާކަށް ނޭނގި އޭނަގެ ހިތުގައި ފޮރުވިފައިވާ އިހްސާސްތަކެއް ހޭލިކަހަލައެވެ. މައުވަން އޭނައާ ވާހަކަ ދައްކާތޯ އިންތިޒާރު ކުރެވެއެވެ. ރުޅި އައިސްގެން ނަމަވެސް އެއްޗެއް ބުނޭތޯއެވެ. އެކަމަކު ތިން ދުވަސް ވެގެން ދިޔައިރުވެސް މައުވަންގެ އުޅުމަކަށް ބަދަލެއް ނައެވެ. މަލާކް ގަސްތުކުރީ ޒާދު އާއެކު ގިނަވަގުތު ހޭދަކުރާށެވެ. މައުވަން އެއްޗެއް ބުނޭތޯއެވެ. ކުރީފަހަރުވެސް ޒާދު އާއެކީ އުޅުމުން މައުވަން ވަނީ ރުޅިއައިސްގެން އޭނައާދިމާލަށް އެއްޗެހި ކިޔާފައެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.