ގެއްލިދިޔަ ހަޔާތް…..9

ތަކުރާރުކޮށް މިންހާގެ ފޯނަށް ގުޅުމުންވެސް ޖަވާބެއް ނުލިބުނެވެ. “އަނެއްކާ މިންހާއަށް ކަމެއް ވީބާ؟“ ރޭޝަމްއަށް ހަދާނެ ގޮތް ހުސްވިކަހަލައެވެ. މިންހާ ހުރިތޯ ވަށައިގެން ހޯދެން ފެށުނެވެ. ބަނދަރުމައްޗަކީ ހަލަބޮލި ސަރަހައްދަކަށް ވުމުން މީހުން ގިނަވެފައި ބާރު ބޮޑެވެ. ކޮންމެ މީހަކުވެސް އެމީހެއްގެ މަސައްކަތާއިގެން ކުރިއަށް ދާތަން ފެނެއެވެ. ކުއްލިއަކަށް ރޭޝަމްގެ ކޮނޑުމަތީގައި މީހަކު އަތް ބައްވާލިއެވެ. ސިއްސައިގެން ގޮސް ރޭޝަމްއަށް ފަހަތް ބަލާލެވުނެވެ. ރޭޝަމްގެ ކުރިމަތީގައި ހުއްޓިލައިގެން އިނީ މިންހާއެވެ. ލިބުނު ހިތްހަމަޖެހުމާއެކު ރޭޝަމްއަށް ބޭއިޚްތިޔާރުގައި މިންހާގެ ގައިގައި އޮޅުލައިގަނެވުނެވެ.

ބައި ގަޑިއިރު ފަހެވެ. މިހާރު ގަޑިން 12 ޖަހަނީއެވެ. ބަނދަރުމަތީގައި ތިބި ގިނަ މީހުންތައްވެސް އެމީހެއްގެ ގެއަށް ދިޔުމަށް މިސްރާބުޖަހަމުންދިޔައެވެ. ދަތުތުވެރިންނާ ދޯނިތަކުގެ ފަޅުވެރިން ދޯނިތަކަށް އަރަމުން ދިޔައެވެ. ބާރު ހިނގުމެއްގައި ރޭޝަމްވެސް އަވަހަށް ގެއަށް ދިޔުމަށް ހިނގައިގަތެވެ. އެގަޑީގައި އެކަނި ގެއަށް ދާންޖެހުމުން ރޭޝަމް ހުރީ ކިތަންމެހާ ވެސް ބިރުގެންފައެވެ. “ހާދަ ބާރަކަށް ތިދަނީ…“ ފަހަތުން މީހަކު ގޮވާލި އަޑަށް ރޭޝަމްގެ ހިތް ބާރަށް ތެޅިގަތެވެ. ދަންނަ އަޑަކަށް ނުވުމާއެކު، އެގަޑީގެ ގޮތުން އެއީ ފަހަތުން އަޅުވާލި މީހެއްކަން ރޭޝަމްއަށް ޔަގީންވިއެވެ. ފަސްއެނބުރި ބަލާލުމެއްނެތި ރޭޝަމް ކުރިއަށް ފިޔަވަޅު އަޅަމުންދިޔައެވެ. އެއާއެކު އެޒުވާނާ ގޮސް ރޭޝަމްއާ އަރާ ހަމަކުރިއެވެ. ބިރުންގޮސް ރޭޝަމްގެ ދެލޯ ފެންކަޅިވިއެވެ. ޖެހިލުންވެހުރެ ރޭޝަމް ހިނގަމުންދިޔައެވެ. ކުއްލިއަކަށް އެޒުވާނާ ރޭޝަމްގެ އަތުގައި ހިފިއެވެ. ސިހިފައި ވަގުތުން ރޭޝަމް އަތް ފޮޅުވާލިއެވެ. “ހާދަ ޗާލު މަންޖެއެކޭ… މިގަޑީގަ އެކަނި ބޭރުގަ އުޅޭކަށް ނުވާނެ،ހިނގާ އަހަރެންނާ އެކު ތަނަކަށް ޖައްސާލަން“ އަނެއްކާވެސް އޭނަ ރޭޝަމްގެ އަތުގައި ހިފިއެވެ. މިފަހަރު ކުރިއަށްވުރެ ބާރަށެވެ. ތަދު އިހުސާސްވުމާއެކު ބިރުންގޮސް ރޭޝަމްގެ އަތްފައި ތުރުތުރުއަޅަންފެށިއެވެ. ހަޅޭއްލަވައިގަންނަން ބޭނުންވިކަމުގައިވިޔަސް ދުލުން އެންމެ ބަހެއްވެސް ބޭރެއް ނުވިއެވެ. އެވަގުތު ރޭޝަމްއަށް ހުރެވުނީ އަނދިރި ގޯޅިގަނޑެއްގެ ތެރޭގައެވެ. ފިހާރަތަކާ ތަންތަން ބަންދުކޮށްފައި ހުރުމުން މަގުމަތި ފެންނަމުންދިޔައީ އަނދިރިކޮށެވެ.

އޭނަގެ ކިބައިން ސަލާމަތްވެވޭތޯ ރޭޝަމް މަސައްކަތްކުރަމުންދިޔައެވެ. އެވަގުތު މީހަކު އައިސް އެޒުވާނާގެ އަތް ފޮޅުވާލިއެވެ. އެއާއެކު އެޒުވާނާ ބިރެއް ފެނިގެން ދާހެން ދުވެ ފިލައިފިއެވެ. ރޭޝަމްއަށް ޝުކުރުގެ ނަޒަރަކުން ކައިރީގައި ހުރި މީހާއަށް ބަލާލެވުނެވެ. އެވަގުތު ރޭޝަމްގެ ދެލޯ ބޮޑުވެގެންދިޔައެވެ. އެއީ އެވަގުތު އެތަނުން ފެންނާނެ ކަމަކަށް ރޭޝަމް އުއްމީދުކުރި މޫނެއް ނޫނެވެ. އަދި ހަމައެހެންމެ ރޭޝަމްއަށް އެހީތެރިވެދޭނެ ކަމަކަށް ހިޔެއްވެސް ނުކުރާ އަތެކެވެ. “ނުރޮއި ދެންވެސް އަރާބަލަ ސައިކަލު ފަހަތަށް“ ޒާހިދުގެ އަޑު ތަފާތުވެފައި މަޑުމައިތިރިއެވެ .ބަސް ހުއްޓިފައި ރޭޝަމްއަށް ހުރެވުނީ ޒާހިދަށް ބަލާށެވެ. ރޭޝަމްއަށް ހޭވެރިކަންވީ ޒާހިދު އަނެއްކާވެސް ގޮވާލުމުންނެވެ. ވިސްނުންތެރިކަމާއެކު ރޭޝަމް ޒާހިދަށް ބަލާލިއެވެ. އެއްވެސް ހާލެއްގައި ޒާހިދާއެކު ދާކަށް ރޭޝަމް ބޭނުމެއް ނުވެއެވެ. އެހެނަސް އިތުރު ގޮތެއް ނެތުމުން މަޑުމަޑުން ގޮސް ސައިކަލު ފަހަތަށް އެރިއެވެ. އެއާއެކު ޒާހިދު ބާރަށް ސައިކަލު ދުއްވާލިއެވެ. ރޭޝަމް އިނީ ސައިކަލުގެ އެންމެ ފަހަތުގައެވެ. ޒާހިދުގެ ގައިގައި ކުޑަކޮށްވެސް ޖެހޭގޮތް ވާކަށް ރޭޝަމް ބޭނުމެއް ނޫނެވެ. ރޭޝަމް ދެކޭގޮތުގައި ޒާހިދަކީ އަނިޔާވެރިއެވެ.

ވަކި ހިސާބަކަށް ދެވުނުތަނާ ޒާހިދު އިހުނަށްވުރެ ސްޕީޑް ބާރުކޮށްލިއެވެ. ކުއްލިއަކަށް ލައިޓުގައި ޖެހުމާއެކު ޒާހިދު ސައިކަލު މަޑުކޮށްލިއެވެ. އެވަގުތު ކިތަންމެ ބޭނުން ނުވިޔަސް ރޭޝަމްއަށް ޒާހިދުގެ ގައިގައި ލަތްވެވުނެވެ. ޖެހިލުންވުމާއެކު އަވަސް އަވަހަށް ރޭޝަމް ފަހަތަށް ޖެހުނެވެ. ނަމަވެސް ރޭޝަމްގެ އެބީހިލުމުން ޒާހިދުގެ ހިތަށް ބުނެދޭން ނޭނގޭ ކަހަލަ ގޮތްތަކެއް ވިއެވެ. މިހާތަނަށް އެތައް އަންހެން ކުދިންނަކާ ޒާހިދު ގާތްވެފައިވެއެވެ. އެހެނަސް ރޭޝަމްއާ ގާތްވެވުމުން އެވީ ކަހަލަ ގޮތެއް މީގެ ކުރިއަކުން ދުވަހަކުވެސް ނުވެއެވެ. ސުވާލުގެ ނަޒަރަކުން ލޯގަނޑުން ޒާހިދު ރޭޝަމްއަށް ބަލާލިއެވެ. ރޭޝަމްއަށް އެކަން ފާހަގަ ވުމާއެކު ޒާހިދު އަވަހަށް ދުރަށް ބަލާލިއެވެ.

ގެއަށް ވަދެވުމާއެކު ރޭޝަމް އަވަހަށް ކޮޓަރިއަށް ގޮސް ވަނެވެ. ޒާހިދުވެސް ނިދުމަށްޓަކައި ކޮޓަރިއާ ދިމާލަށް ހިނގައިގަތެވެ. އެހެނަސް ހިތް އެދުނީ އެގޮތަކަށް ނޫނެވެ. އެހެންކަމުން އަނބުރާ ގޮސް ސިޓިންގ ރޫމުގައި ސޯފާގައި ޖައްސާލިއެވެ.

އިރުގަނޑެއް ފަހުން ރޭޝަމް ރަޖާގަނޑަކާއި ބާލީހެއް ހިފައިގެން ގޮސް ބަދިގެއަށް ވަނެވެ. އެމަންޒަރު ބަލަން ޒާހިދު ސޯފާގައި އޮތް ކަމެއް ރޭޝަމްއަކަށް ނޭނގެއެވެ. ރަޖާގަނޑު ބިންމަތީގައި ފަތުރާލަމުން ރޭޝަމް އަވަހަށް އޮށޯތެވެ. ކުއްލިއަކަށް އެއްޗެއް ވެއްޓުނު އަޑަށް ރޭޝަމްއަށް ތެދުވެވުނެވެ. އެވަގުތު ސިޓިންގ ރޫމުތެރެއިން ފޯނެއްގެ އަލި ފެނުނެވެ. އެއީ ޒާހިދުގެ ފޯނެވެ. ރޭޝަމްއަށް ބަލަން ހަދައިގެން އަތުގައި އޮތް ފޯނު ވެއްޓުނީއެވެ. ޒާހިދު އަވަހަށް ފޯނު ނަގާ މޭޒުމަތީގައި ބޭއްވިއެވެ. ޒާހިދު ނޫން މީހަކު އެގަޑީގައި އެތާނގަ ނުހުންނާނެކަން ރޭޝަމްއަށް ޔަގީންވުމާއެކު ތެދުވެ އެދިމާލަށް ހިނގައިގަތެވެ. މަޑު ފިޔަވަޅުތަކެއްގައި ގޮސް ރޭޝަމް ޒާހިދާ ކުރިމައްޗަށް ވާގޮތަށް އިން ސޯފާގައި އިށީނެވެ. ސިޓިންގ ރޫމު ތެރެއަށް ވެރިވެފައިވާ ފަނޑު އަނދިރީގެ ތެރެއިންވެސް އެކަކު އަނެކަކުގެ މޫނު ފެންނަން ހުއްޓެވެ. “ތޭންކްސް ވަރަށް ބޮޑަށް ހެލްޕް ވެދިނީތީ..“ ރޭޝަމް އިސްދަށަށް ޖަހާލިއެވެ. ހައިރާންކަމާއެކު ޒާހިދު ރޭޝަމްއަށް ބަލާލިއެވެ. އެގޮތަށް އިސްވެ ރޭޝަމް ވާހަކަދެއްކުން ވެގެންދިޔައީ ޒާހިދަށް ގަބޫލުކުރަން ދަތި ކަމަކަށެވެ. އާނއެކެވެ. ހިތުން ރުހުމުންނެއް ރޭޝަމް ޒާހިދަކާ އަނގައިންނެއް ނުބުނާނެއެވެ. ރޭޝަމް ޒާހިދާ ވާހަކަދައްކަން އެއައީ ޒާހިދުގެ ފަރާތުން އިތުރު ކަމެއް އޮޅުންފިލުވޭތޯއެވެ. އެކަމެއް ޒާހިދަކަށް ނޭނގެއެވެ.

“ތޭންކްސް ދެން ނުބުންޏަސް ހެޔޮ.. އެކަމަކު ބުނެދީފާނަންތަ އެގަޑީގަ ރޭޝަމް ކޮންތާކަށް ގޮސްފަ އައީ؟“ ޒާހިދު ހުރީ ޝައްކެއްގެ މަތީގައެވެ. “އެ..އީ.. ރައްޓިއްސެއްގެ ގެއަށް ގޮސް..ފަ..“ ރޭޝަމް ހަމަޖެހިލަމުން ވާހަކަދެއްކޭތޯ މަސައްކަތްކުރިއެވެ. “ޒާހިދު ޖޮބަކަށް ނުދަންތަ؟“ ރޭޝަމް ވާހަކަ އޮޅުވާލިއެވެ. “ހެ..ހެ، ޖޮބަށް ނުދިޔަސް ލާރި ލިބެޔޭ“ ޒާހިދު ހިނިގަނޑެއް ޖަހާލިއެވެ. “އެއީ ކިހިނެއް؟ ޑްރަގް ވިއްކައިގެންތަ؟“ ރޭޝަމްގެ ސުވާލު ސީދާ އަމާޒުކޮށްލީ ޒާހިދަށެވެ. ޒާހިދުގެ މޫނުމައްޗަށް ހާސްކަން ވެރިވެގެންދިޔަތަން ރޭޝަމްއަށް ރަނގަޅަށްވެސް ފާހަގަ ކުރެވުނެވެ. “ކިހިނެއްވީ އަނގައިން ނުބުނީ؟“ ރޭޝަމް އަނެއްކާވެސް ވާހަކަދެއްކިއެވެ. “ވާހަކައެއްނު މިދައްކަނީ.. ދެން ދަނީ ނިދަން“ ޒާހިދު ސޯފާއިން ތެދުވިއެވެ. އަދި ކޮޓަރިއާ ދިމާލަށް ހިނގައިގަތެވެ. “އަނެއްކާ ރޭޝަމް މިކޮޓަރިއަށް ވަނީބާ؟ ކަމެއް ނުވަނީސް އެގޮތަށް ސީދާ އެސުވާލެއް ނުކުރާނެ“ ޒާހިދަށް ކުރެވެމުން ދިޔަ ޝައްކު ޔަގީންވާންފެށިއެވެ.

ފުން ނޭވާއެއް ބޭރުކޮށްލަމުން ރޭޝަމް ނިދަން އޮށޯތެވެ. މިރޭ ރޭޝަމްއަށް ހަމަޖެހިގެން ނިދާލެވޭނެއެވެ. އެހެނަސް އިރުއެރުމާއެކު މަންމައަށް ގުޅާފައި ކިޔައިދޭންޖެހޭ ވާހަކަތަކެއް އެބަހުއްޓެވެ. ކިޔައިދޭން ބޭނުން ނުވިޔަސް ޖެހޭނީ ކިޔައިދޭށެވެ. ސަބަބަކީ މިންހާއެވެ. މިންހާ މަންމަ ކައިރިއަށް ރަށަށް ފޮނުވާލެވުނީތީއެވެ. ބަނދަރުމައްޗަށް މިންހާ ގެންދިޔައީ ރަށަށް ފުރާ ދޯނިން މިންހާ ފޮނުވާލުމަށެވެ. އެނޫން ގޮތެއް ނެތުމުންނެވެ.

ރޭޝަމްއަށް ފުން ނިންޖަކުން ނިދާލެވުނަސް ޒާހިދަކަށް ނުނިދުނެވެ. ރޭޝަމް އަކީ ޒާހިދު ވާހަކަދައްކާ ހިތުން ވާހަކަދެއްކި ފުރަތަމަ އަންހެން ކުއްޖާއެވެ. ޒާހިދު ދެކޭގޮތުގައި އަންހެނުންނަކީ ފިރިހެނުން ފޫހިފިލުވަން، ހިތްހަމަޖައްސާލަން ތިބޭ ބައެކެވެ. އެހެނަސް މިއަދު ފުރަތަމަ ފަހަރަށް އަންހެންކުއްޖަކު ޒާހިދަށް ހާއްސަ ވެއްޖެކަހަލައެވެ.

ކުއްލިއަކަށް ކޮތަރީގެ ކުޑަދޮރުން އެތެރެއަށް ފިނި ވައިރޯޅިއެއް ޖެހިލިއެވެ. އެއާއެކު ގެނބެމުންދިޔަ ފުން ޚިޔާލީ ދުނިޔެއިން ބޭރަށް ޒާހިދަށް ނިކުމެވުނެވެ. ޒާހިދަށް ހޭވެރިކަންވީ ދެނެވެ. ފުންމައިގެން ތެދުވެ ޑްރެސިންގ ޓޭބަލް ކައިރިއަށް ޒާހިދަށް ދެވުނެވެ. ފުން ނަޒަރަކުން ލޯގަނޑުން އަމިއްލަ ސޫރައަށް ޒާހިދު ކަޅިޖަހާ ނުލާ ބަލަންހުއްޓެވެ. “ނޫން… އަހަރެން އަންހެނުންނަށް ނަފްރަތުކުރަން… އެއީ މަކަރުވެރި ބައެއް، އެއްވެސް ހާލެއްގަ ރޭޝަމް އަހަރެންގެ ބަލި ފަޔަށް ވިޔަކަ ނުދޭނަން“ ޒާހިދު އަމިއްލަ ނަފްސާ ވާހަކަދައްކަމުންދިޔައެވެ.

“މަންމައަށް ހުރިހާ ހަގީގަތެއް މިންހާ ކިޔައިދޭނެ……. އަހަރެންގެ ވަރަށް ބޮޑު އެދުމެއް މަންމަ މިންހާއަށް އަޅާލުމަކީ…“ ރޭޝަމް ނަރީމާ ކައިރީ އެދުނެވެ. “އެކަމަކު މަންމަގެ ހިތް ބުނަނީ ކަމެއް ގޯސްވާން އުޅެނީއޭ.. ދަރިފުޅަށް ދެރައެއް ލިބިއްޖެއްޔާ މަންމަ މޮޔަވެދާނެ“ ނަރީމާގެ އަޑުގައި މާޔޫސްކަމެއް އެކުލެވިފައިވިއެވެ. “ދެން މަންމާ.. އަހަރެންނަކަށް ނުވާނެޔޭ ކަމެއް.. މަންމަ އަބަދުވެސް ބުނަމެއްނު ރަނގަޅަށް އުޅޭ މީހުންނަށް ދެރަގޮތެއް މެދުވެރިއެއް ނުކުރައްވާނޭ…“ ނަރީމާ ހިތްހަމަޖައްސައިދެވޭތޯ ރޭޝަމް މަސައްކަތްކުރިއެވެ.

“ ޒާހިދަށް ސައި ހަދާދީ!!!“ ލީޒާ ރޭޝަމްއަށް އަމުރުކޮށްލަމުން ސޯފާގައި ޓީވީ ބަލަން އިށީނެވެ. ރޭޝަމް އަވަސް އަވަހަށް ޒާހިދަށް ސައި ހަދައިދިނެވެ. އިރުކޮޅަކުން ޒާހިދު އައިސް ކާމޭޒުދޮށުގައި އިށީނެވެ. ރޭޝަމް ފެނުމާއެކު ޒާހިދުގެ ހިތުގެ ވިންދު އަވަސްވިކަހަލައެވެ. ރޭޝަމްއަށް ބަލަން ބޭނުންނުވިޔަސް ހިތް އެދެމުންދިޔައީ ބެލުމަށެވެ. އެންމެ ފަހަރަކު ނަމަވެސް އެމޫނު ދެކިލުމަށެވެ. ރޭޝަމްއާ ދިމާލަށް ބަލާލުމަށް ޒާހިދު އިސްއުފުލާލިއެވެ. އެވަގުތު ޒާހިދުގެ ފޯނު ރިންގުވާންފެށިއެވެ. ހަމައެއާއެކު ރޭޝަމް އެފޯނު މޭޒުމަތިން ނެގިއެވެ. ހައިރާންވެފައިހުރެ ރޭޝަމްއާ ދިމާލަށް ޒާހިދަށް ބަލާލެވުނެވެ. ޒާހިދު ހައިރާންވީ ރޭޝަމްއަށް އެގޮތަށް ކަންތައް ކުރަން ކެރުމުންނެވެ. އެންމެ ބޮޑަށް ނަފްސާ މެދު ސުވާލު އުފެދުނީ ރޭޝަމްގެ އެއަމަލުން ޒާހިދަށް ރުޅި އިސްނުކުރެވުނީމައެވެ. މިހާތަނަށް އެހެން އެއްވެސް މީހަކު ޒާހިދުގެ ފޯނު ނަގާފައެއް ނޯންނާނެއެވެ.

ފުން ނޭވާއެއް ބޭރުކޮށްލަމުން ޒާހިދު ގޮނޑިން ތެދުވިއެވެ. އަދި ރޭޝަމްއާ ދިމާލަށް ދެތިން ފިޔަވަޅު އަޅާލިއެވެ.

އެއާއެކު ރޭޝަމް ފޯނަށް ބަލާލުމަށްފަހު އަވަސް އަވަހަށް ޒާހިދަށް ފޯނު ދިއްކޮށްލިއެވެ. އަވަސް ހަރަކާތަކާއެކު ޒާހިދު ވަގުތުން ފޯނު ޖަހައިގަތެވެ. “އަހަރެންގެ އެއްވެސް އެއްޗެއްގެ މައްޗަށް އެކަކަށްވެސް ބާރުފޯރުވުމުގެ ހައްޤެއް މިއަދާ ހަމައަށް ދީފައެއް ނޯންނާނެ!!! ރޭޝަމްއަކަށް ވެސް ނުލިބޭނެ… މަގޭ އަތުން ފައިން ގޯހެއް ނެހެދެނީސް މަގޭ ކަންތައްތަކަށް ފާރަލާން މަސައްކަތް ކުރުން ހުއްޓާލާ!!“ ޒާހިދު ވައި އަޑަކުން ބުންޏެވެ. ރޭޝަމް ހުރީ ޒާހިދުގެ ދުލުން ބޭރުވެދާނެ ހޫނު ބަސްތަކަކަށް ތައްޔާރުވެގެންނެވެ. އެހެންކަމުން އެބަސްތަކުން ރޭޝަމްގެ ހިތަކަށް ބިރުވެރިކަމެއް ނުވަނެވެ. ޒާހިދު ބަދިގެއިން ނިކުމެގެން ދިޔުމާއެކު ރޭޝަމް އަވަސް އަވަހަށް ފޯނު ނެގުމަށްފަހު،ޒާހިދުގެ ފޯނަށް ގުޅި ނަންބަރު ސޭވްކޮށްލިއެވެ.

“މިންހާ ހިތްހަމަޖެހޭތަ އަނެއްކާ ތިރަށުގަ ހުންނަން؟ “ރޭޝަމް ވާހަކަދެއްކީ ސިއްރުންނެވެ. “އާނ.. ކީއްވެ ހިތްހަމަނުޖެހެންވީ؟ ރަނގަޅު މީހުންވެސް މިދުނިޔޭގައި އުޅޭކަން އަހަރެންނަށް ވެސް ގަބޫލުކުރެވިއްޖެ… ރޭޝަމްއަށް ޝުކުރު އަދާކުރާނެ ގޮތެއްވެސް ނޭނގެ އަހަރެންނަކަށް“ މިންހާގެ އަޑުގައި އުފާވެރިކަމެއް އެކުލެވިފައިވިއެވެ. “ތިހާ ޝުކުރު އަދާ ކުރަން ބޭނުމިއްޔާ އަހަރެންގެ މަންމަގެ ދެވަނަ ދަރިއަކަށް ވެގެން އުޅެންވީނު އަހަރެމެންނާއެކު…… އެގޮތް އެންމެ ރަނގަޅުތަ؟ “ރޭޝަމް ބޭނުންވީ ވެވުނު ހުރިހާ ގޮތަކުންވެސް މިންހާއަށް އެހީތެރިވާށެވެ. “އާނ.. ނަރީމައްތަ ވަރަށް ހެޔޮ އަހަރެންނަށް.. އެކަމަކު އަހަރެން ވަރަށް ބިރުގަނޭ އެބަ.. ރޭޝަމްއަށް ކަމެއް ވެދާނެތީ… އަނެއްކާ ޒާހިދު ކަމެއް ނުކުރޭތަ؟“ މިންހާ ހުރީ ހާސްވެފައެވެ. “ޒާހިދު ދޯ… އަހަރެން ކުޑަ ކުޑަ ހިތްވަރެއް ކޮށްލައިފިއްޔާ މިންހާ ސަލާމަތްކުރި ގޮތަށް އަދި އެތައް ކުދިންނެއް ސަލާމަތްކުރެވިދާނެ ޒާހިދުގެ ބޮލަށް ވަދެގެން…… ޒާހިދު ދެކެ މިހާރު ނުވޭ ޖެހިލުމެއް.. ނޭނގެ ކީއްވެ ކަމެއް“ ރޭޝަމް ކުޑަކޮށް ހިނިއަންނަ ގޮތްވިއެވެ. “އައްދެ… އެއީ ކީއްވެ ޖެހިލުން ނުވާންވީ؟ އެއީ ރޭޝަމްގެ ނަޒަރުގަ އަނިޔާވެރިއެއްނު“ މިންހާ ހުރީ ހައިރާންވެފައެވެ. “ކޮންމެ އަނިޔާވެރިއެއް އަދި ކުށްވެރިއެއްގެ ފަހަތުގައި ވެސް ކޮންމެވެސް ސިއްރުތަކެއް އަދި ހަގީގަތެއް ވާނެ… ކިތަންމެ ގޯސް މީހެއްގެ ވެސް ބަލި ފަޔެއް ވާނެ… ޒާހިދުގެ ވެސް ބަލި ފަޔެއް ވާނެ…“ ރޭޝަމް ވިސްނާލިއެވެ. “ދެން ތި ބަލި ފަޔެއް ހޯދަން އުޅެގެން އަނެއްކާ ޒާހިދު ރޭޝަމްގެ ބަލި ފަޔަށް ނުވެއްޖެއްޔާ ކިތަންމެހާވެސް ރަނގަޅު“ މިންހާ ސަމާސާކޮށްލިއެވެ. “އައްޗި… ތިހެން ވިޔަކަ ނުދޭނަން މަށެއް..ހެ..ހެ“ ރޭޝަމް ހުވާކުރިއެވެ.

”އޭނަ ހޯދުމަކީ އަހަރެންގެ ޒިންމާއެއްކަން އިނގެޔޭ.. މަވެސް މަސައްކަތް ދޯ މިކުރަނީ… އޭނަ ގެ ގެއަށްވެސް ދެވިއްޖެ އެއްނު…. މަށަށް ހީވަނީ އޭނަ މާލޭގަ ނެތީހެން“ ޒާހިދު ފޯނު ކަންފަތުގަ ޖަހާލައިގެން ހުރެ ސިޑިން މައްޗަށް އަރަމުންދިޔައެވެ. “އޭނަގެ ބައްޕަ މަރުވެއްޖެއެއްނު… ދެން އޭނަ މާލެ ދޫކޮށް ދާނީ އޭނަގެ ބައްޕަގެ ރަށަށްތަ އަނެއްކާ؟ ކޮންމެ ގޮތެއް ވިޔަސް ކަލޭގެ ފަރުވާކުޑަ ކަމުން އޭނަ ފިލީ.. ކަލެއަށް ޖެހޭނީ އޭނަ ހޯދަން“ އެކޮޅުން ވާހަކަދެއްކީ ޒާހިދުގެ ބޮޑަށް މަސައްކަތްކުރާ މީހެކެވެ. “އޭނަ ހޯދައިފިއްޔާ މަށަށް ލިބެންޖެހޭ އެއްޗެއް ވެސް އޮންނާނެ… އެކަމަކު..“ ސިޑިން ތިރިއަށް ފައިބަމުން އައި ރޭޝަމް ފެނުމާއެކު ޒާހިދުގެ ވާހަކަ މެދުކެނޑުނެވެ. ރޭޝަމް ހިނިތުންވެލިއެވެ. “ތީ ގޭމެއް…. އަހަރެން ކުޅޭ ގޭމު މާ މޮޅުވާނެ“ ޒާހިދު ރޭޝަމްގެ ކުރިމައްޗަށް އެރިއެވެ. “ކޮން ގޭމެއްގެ ވާހަކަ ތިދައްކަނީ؟“ ރޭޝަމް ފަހަތަށް ޖެހުނެވެ.“ ތީނަ ކުޅޭ ގޭމު އިނގޭނީ ތީނައަކަށްނު …..“ ޒާހިދު ރޭޝަމްއާ ގާތްވެލިއެވެ. ރޭޝަމްގެ ހިތުގެ ވިންދު އަވަސްވިއެވެ. ޒާހިދުގެ ހިތުގެ ހާލު މާ ބޮޑެވެ. ހިތް ތެޅެމުންދިޔަލެއް ބާރުކަމުން ބޭއިޚްތިޔާރުގައި ޒާހިދަށް މޭގައި އަތް އަޅާލެވުނެވެ. އަދި ފަހަތަށް ޖެހިލެވުނެވެ. “ދެންވެސް ބުނާނީ ބާރެއް ނުފޯރުވޭނެއޭތަ؟ލެޓްސް ބީ ފްރެންޑްސް“ ރޭޝަމް ހިނިތުންވެލަމުން ސަލާން ކޮށްލުމަށް އަތް ދިއްކޮށްލިއެވެ. ދެވިސްނުމެއްގައި ހުރެ ޒާހިދު ރޭޝަމްގެ އަތުގައި ހިފާލިއެވެ. އަދި ރޭޝަމްގެ ދެލޮލަށް ބަލާލިއެވެ. އެދެލޮލުގައި ވަނީ މައުސޫމުކަމެވެ. ސިހިފައި ރޭޝަމްގެ އަތް ޒާހިދުއަށް ފޮޅާލެވުނެވެ. އަދި ލޯ އަޅާލަމުން ސިޑިން މައްޗަށް ދުއްވައިގަތެވެ. ރޭޝަމްއަށް އެހުރި ފިޔަވަޅު މަތީގައި ހުއްޓި ހުރެވުނެވެ. ޒާހިދުގެ އެއަމަލު ސިފަކުރާކަށް ރޭޝަމްއަކަށް ނޭނގުނެވެ. ރޭޝަމް ޒާހިދާ އެކުވެރިކަން ބޭއްވުމުގެ ހަމަ އެކަނި ބޭނުމަކީ ޒާހިދުގެ ކޮޓަރިތެރެއިން ފެނުނު ފައިލްގެ ހަގީގަތް ހޯދުމެވެ. އެހެނަސް ޒާހިދު ކުއްލިއަކަށް އަތް ފޮޅުވާލި ސަބަބު މާބޮޑަށްވެސް ރޭޝަމް އެނގެން ބޭނުންވިއެވެ.(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.