ތިޔަ ލޯބީގެ ހައްޤުގައި (19)

“ތީތާ މައްސަލައަކީ. އެއީ އަހަރެންގެ ފޮތެއް ނޫނޭ. ނިކްގެ ފޮތެއް. އޭނަ ހަނދާންނެތި އޮފީހުގައި ބާވާފަ ދިޔައީމަ އޭނަ އަތަށްދޭން އަސްލު ހިފައިގެން އައީ. މިހާރު އެފޮތް ބޭވުނު ތަނެއްވެސް ނޭނގެ. ނިކްއަށް އެފޮތް ގެއްލުނުކަން އެނގިއްޖެއްޔާ އަހަރެން މަރާނެ.” ދަތްދޮޅީގައި އަތްކާތައިލަމުން ކަންބޮޑުވެފައި އާކިލް ބުނެލި ޖުމުލަތަކުން ވަޓްއޭ ކިޔައި މިއުޝީނަށް ބާރަށް ހަޅޭލަވައިގަނެވުނެވެ. ބުނާނެ އެއްޗެއް ނޭނގި ހުއްޓުން އަރައިފައި މިއުޝީން އިންްއިރު އާކިލް ދެންމެ ބުނެލި ކޮންމެ ޖުމުލައެއް އޭނާގެ ކަންފަތްކައިރީގައި ގުގުމަމުން ދިޔައެވެ.

ހަގީގަތުގައިވެސް މިއޮއްހުރިހައި ދުވަހު ނިކްޔަލް ލޯބިވީ އޭނާ ދެކެ ހެއްޔެވެ؟ ނިކްޔަލް އެބުނާ އޭނާގެ ހިތުގެ ރާނީއަކީ ހަމަ މިއުޝީން ހެއްޔެވެ؟ ނިކްޔަލް އިންތިޒާރުކުރީ އޭނާއަށް ހެއްޔެވެ؟ މީގެ 4 އަހަރު ކުރިން ފެށިގެން އޭނާއަށް ކޮންމެ ދުވަހަކު ލޯބީގެ ކާޑަކާއި އެއްކޮށް މާބޮނޑި ފޮނުވަނީވެސް ހަމަ ނިކްޔަލް ހެއްޔެވެ؟

ވީއުފަލެއްގެ ބޮޑުކަމުން މިއުޝީންގެ ހިތް އުފަލުން ނަށައިގަތެވެ. އޭނާއަށް ބޭއިޚްތިޔާރުގައި ހިނިތުންވެލެވުނެވެ.

މިއުޝީންގެ މޫނަށް އަަރައިފައިބަމުންދިޔަ ކުލަވަރަށް ބަލަން ހެވިފައި އާކިލް ހުއްޓެވެ. އިރުކޮޅަކު އެހެން ހުރުމަށްފަހު ދަނީކަމަށްބުނެ އާކިލް ހިނގައިގަތްއިރުވެސް އެއިންގޮތަށް ހުއްޓުން އަރައިފައި މިއުޝީން އިނެވެ. އެނބުރި ހިނގައިގަތް އާކިލްގެ މޫނުމަތީގައި ކާމިޔާބީގެ ހިނިތުންވުމެއް ވިއެވެ. އޭނާ އެހުރިހައި ވާހަކައެއް ދެއްކީ ހަގީގަތުގައި މިއުޝީން އެފޮތް ކީކަމަކަށް ނޫނެވެ. ނަމަވެސް މިއުޝީންގެ އަމަލުތަކުން އޭނާ އެފޮތްކީކަން އާކިލްއަށް އެނގުނެވެ.

** ** **

ދަބަހުގައިއޮތް ފޮތް ނަގަމުން މިއުޝީން އެފޮތަށް ބަލައިލީ ލޯތްބާއެކުގައެވެ. ފޮތުގެ ކޮންމެ ގަނޑެއްގައި ލޯތްބާއެކުގައި ފިރުމަމުން ދިޔައީ ނިކްޔަލް އޭނާގެ ގާތުގައި ހުރެފިނަމަ ފިރުމައިލާނެހައި ލޯބިންނެވެ.

ހެވިފައި އަމިއްލަ ޚިޔާލުތަކަށް ގެއްލިފައިއިން މިއުޝީން ސިހުނީ މޭޒުމަތީގައި އޮތް އޭނާގެ ފޯން ރިންގްވާން ފެށުމުންނެވެ. ފޯން ނަގަމުން ބަލައިލިއިރު ގުޅަކީ ރަޝާ އެވެ. ފުންނޭވާއެއްލަމުން ފޯން ކަންފަތުގައި ޖައްސައިލުމާއެކު ރަޝާ މިއުޝީން ގާތުގައި މިރެއަށް އޮތް ޕްލޭން ކިޔައިދިނެވެ. އަދި މިރޭމީ މި އެކްޓްގެ ފަހުރޭކަމަށް ބުންޏެވެ. ޝަޔާން އޭނާގާާތުގައި މިރޭ ބައްދަލުކޮށްލަން އަންނަންބުނި ވާހަކަވެސް މިއުޝީން ހަނދާންވީ ރަޝާ ގުޅުމުންނެވެ. ދެމީހުން ހުރިހައި ޕްލޭނެެއްކޮށް ނިންމައިލުމަށްފަހު ފޯން ބޭވިއިރު މިއުޝީންގެ ހިތަށް ބަޔާންކުރަންދަތި ހަމަޖެހުމެއްވަނީ ލިބިފައެވެ.

** ** **

އޮފީސް ނިންމައިލުމަށްފަހު ގެއަށްދާން ނުކުތް މިއުޝީންގެ ލޮލުގައި ނިކްޔަލް އަޅައިގަތުމާއެކު އެމޫނަށް ބަލައިލީ ލޯބިވެތި ނަޒަރަކުންނެވެ. ނިކްޔަލް ހިނިތުންވެލުމާއެކު މިއުޝީންގެ ދޮންކޯތާފަތަށް ޖަންބުކުލަ ވެރިވެގެންދިޔަ މަންޒަރުފެނި ނިކްޔަލް ހައިރާންވިއެވެ. މިއުޝީނަށް ކިހިނެއްވެފައިހުރި ދުވަހެއްބާވައޭ އޭނާގެ ހިތަށްއެރިއެވެ.

ހުއްޓުންއަރައިފައި މިއުޝީން ބަލަން ހުރުމުން ނިކްޔަލް އައިސް އޭނާގެ ކުރިމަތީގައި ހުއްޓުނެވެ. އަދި ފުއްޓައްކެއް ޖަހައިލަމުން ހޭންފެށިއެވެ. ނިކްޔަލްގެ މިއަމަލުން މިއުޝީން ރަކިވިއެވެ.

“ބުނީމެއްނު މިރޭ ޝަޔާނާ ބައްދަލުކުރަންދާ ވާހަކަ. އަހަރެން ދަންތަ ޑްރޮޕް ކޮށްދޭން.” މިއުޝީން ދޭނެ ޖަވާބަކާއިމެދުގައި ވިސްނައިލަމުން ނިކްޔަލް އަހައިލިއެވެ. ވަގުތުން އާނއެކޭބުނެ މިއުޝީން އެއްބަސްވީ ޝަޔާން އޭނާގާތުގައި ޓެކްސީއެއްގައި އައުމަށް ބުނެފައިވާތީއެވެ. އެހެންނޫނަސް ނިކްޔަލްގެ ގާތުގައިވުމަށް އެހިތް އެދޭވަރުން ކެތްކުރާނީވެސް ކިހިނެއްހެއްޔެވެ؟

އިރުކޮޅަކު ވާހަކަދައްކަން ތިބުމަށްފަހު ދެމީހުންވެސް ގެއަށް ދިއުމަށްޓަކައި ހިނގައިގަތެވެ. އޭރުވެސް މިއުޝީންގެ ލޯކުރިމަތީގައި ސިފަވަމުން ދިޔައީ ނިކްޔަލްއާއެކުގައި ހޭދަކުރެވިފައިވާ އެކި ދުވަސްތަކެވެ.

** ** **

ލޯގަނޑު ކުރިމަތީގައިހުރެ އިޒާނާ މިއުޝީން ކިޔައިދެމުންދިޔަ ގޮތަށް އޭނާ ތައްޔާރުކޮށްދެމުންދިޔައެވެ. މާވަރަކަށް ރީތިވަނީ ކޮންތަނަކަށް ދާންވެގެންތޯ އަހައި އަހައިވެސް މިއުޝީން ވަކި ޖަވާބެއް ނުދިނެވެ. ފަހުން ބުނާނެކަމަށްބުނެ އެސުވާލު އޮއްބައިލަނީއެވެ. ތައްޔާރުވެ ނިމުނުތަނާ ނިކްޔަލް ގުޅިއެވެ. އަދި ބަލައި އައިސްއިންވާހަކަ ބުނުމުން ހެވިފައި އަވަސް އަވަހަށް މިއުޝީން ދަބަސް ހިފައިގެން ކޮޓަރިން ނުކުމެގެން ދިޔައެވެ.

މިއުޝީން ކާރަށް އެރުމާއެކު ފުރަތަމަވެސް އެނޭފަތިގައި ޖެހުނީ ނިކްޔަލް ޖަހައިފައިހުރި ސެންޓްގެ މީރުވަހެވެ. ދެލޯމަރައިލީ ލިބުނު ހިތްހަމަޖެހުމަކުންނެވެ. އެހުރިހައިއިރު ނިކްޔަލްގެ ނަޒަރު ހުއްޓިފައިވީ މިއުޝީންއަށެވެ.

ރަތްކުލައިގެ ޕާކިސްތާން ހެދުމުގައި މިއުޝީން ނުހަނު ލޯތްބެވެ. ކޮށްފައިވާ މަޑު މޭކަޕްގެ ސަބަބުން އެދޮންމޫނު އިތުރަށް ފުރިހަމަކަށް ދައްކައެވެ. ނިކްޔަލްއަށް ހިންދިރުވައިލެވުނެވެ. ޝަޔާނާއި މެދުގައި އެހިތުގައި ހަސަދައިގެ އޮއިވަރެއް އުފެދުނެވެ. ހިތަށް ތަދުވި ނަމަވެސް ހިނިތުންވެލަމުން ނިކްޔަލް ކާރު ދުއްވައިލިއެވެ.

ކާރުގައި އިން އިރުވެސް ދެމީހުންކުރެ އެކަކުވެސް އެހައިގިނަ ވާހަކައެއް ނުދައްކައެވެ. ނިކްޔަލްއާއި އެހައި ގާތުގައި އިންނަންވުމުން މިއުޝީންގެ ހިތް އޮބިނޯންނަވަރަށް ތެޅެމުންދިޔައެވެ. މުޅިމީހާ ފިނިވެ ބަޔާންކުރަންދަތި އުފަލެއް އިހުސާސުވަމުން ދިޔައެވެ. ނިކްޔަލް އޭނާދެކެ ލޯބިވާވަރު މިއަދު ކިތަންމެ ރަނގަޅަކަށްވެސް އިހުސާސުވެއްޖެއެވެ.

ކާރު އައިސް ޝަޔާންބުނި އެޑްރެސްކައިރިއަށް މަޑުކޮށްލުމުން މިއުޝީ ް މެސެޖްކޮށްފައި އޭނާ އައި ވާހަކަ ބުނެލިއެވެ. ނިކްޔަލްއަށް ހިނިތުންވުމެއް ދެމުން މިއުޝީން ކާރުން ފޭބުމުން ނިކްޔަލްވެސް މިއުޝީނާއެކުގައި ކާރުން ފޭބިއެވެ.

“މިއު.” ނިކްޔަލްގެ އަޑަށް މިއުޝީންބަލައިލިއެވެ. އެތަނަށްވެރިވެފައިވާ ފަނޑުއަލިކަމުގެ ތެރެއިން ނިކްޔަލްގެ ލޮލަށް ޖަމާވެފައިވާ ކަރުނަތައް މިއުޝީނަށް ނުފެންނަކަން އެއީ ނަސީބޭ އޭނާގެ ހިތަށް އެރިއެވެ. ނިކްޔަލް ފޮރުވަން އުޅުނުނަމަވެސް އެއަޑުގައިވި ހިތްދަތިކަން މިއުޝީނަކަށް ސިއްރެއްނުވިއެވެ. ނިކްޔަލްގެ އަޑުން މިއުޝީންގެ ގައިން ހީބިހި ނަގައިގެން ދިޔައިރު އެހިތުގައިވެސް ރިއްސައިލިއެވެ. ލޯބިވާމީހާއަށް އެނގިހުރެ ހިތާމައެއް ދޭން ބޭނުންވާނީ ކާކުހެއްޔެވެ؟

“ގުޑް ލަކް.” އިސްޖަހައިލަމުން ތުންފަތުގައި ދަތްއަޅައިލައިފައި ނިކްޔަލް ބުނެލިއެވެ. ބަދަލުގައި މިއުޝީންވެސް ބޯޖަހައިލީ ދޭނެ ވަކިޖަވާބެއް ނޭނގުމުންނެވެ.

އެވަގުތު އެގެއިން ނުކުމެގެން އައި ޝަޔާންފެނި ނިކްޔަލް އަނެއްފަރާތަށް މޫނުއަނބުރައިލިއެވެ. އެމަންޒަރުބަލަން އޭނާއަށް ހާދަހައި އުނދަގުލެވެ. އެހެނަސް އެނޫންގޮތެއްވެސް ނެތެވެ.

ނިކްޔަލްއާ ދިމާއަށް ބަލައިލުމަށްފަހު ޝަޔާން މިއުޝީންގެ އުނަގަނޑުގައި ހިފަހައްޓައިލަމުން އެގެއާއި ދިމާއަށް ހިނގައިގަތެވެ. ތުންފަތުގައި ދަތްއަޅައިލަމުން ނިކްޔަލް އާއި ދިމާއަށް ބަލައިލުމަށްފަހު މިއުޝީންވެސް ޝަޔާންއާއި އެކުގައި ހިނގައިގަތެވެ. އިރުއިރުކޮޅާ ފަހަތް ބަލައިލެވެނީ ނިކްޔަލް އެންމެފަހަރަކު ނަމަވެސް އޭނާއާއި ދިމާއަށް ބަލައިލައިތޯއެވެ. ނަމަވެސް އެދެމީހުނަށް ފުރަގަސްދިން ގޮތަށް ނިކްޔަލް ހުރީއެވެ.

އެއްވެސް ހިފެހެއްޓުމެއްނެތި ނިކްޔަލްގެ ދެލޮލުން ކަރުނަ އޮހޮރެމުންދިޔައެވެ. މިއޮއް ހުރިހައި ދުވަހު އޭނާކުރި ދިގު އިންތިޒާރުގެ ނިމުމަކީ މިއީ ހެއްޔެވެ؟ އެލޯބި އޭނާގެ އަތުން އެހެން މީހެއްގެ އަތަށްދިނީ ޚުދު އޭނާއެވެ. މިއުޝީން ހުއްޓުވުނު ނަމައެވެ. ލޯބިވާވަރު ބަޔާންކޮށްދެވުނު ނަމައެވެ. ނަމަވެސް..

ވީދެރައިން ނިކްޔަލްއަށް އަމިއްލަ ނަފުސްދެކެ ރުޅި އާދެވުނެވެ. ގައިހުރިބާރަކަށް ކާރުގައި އަތުން ޖެހީއެރުޅިގަނޑު މައިތިރިވޭތޯއެވެ. ދެތިންފަހަރު އެހެން ޖަހައިލުމަށްފަހު ނިކްޔަލްއަށް ރޮއިގަނެވުނީ ބޭއިޚްތިޔާރުގައެވެ. މިއުޝީން އޭނާއަށް ގެއްލުނީއެވެ. ދެން ދުވަހަކުވެސް އެލޯތްބެއް އޭނާއަކަށް ނުލިބޭނެއެވެ.

ލޮލުން އޮހޮރެމުންދިޔަ ކަރުނަތައް ފުހެލަމުން ނިކްޔަލް ކާރަށް އަރައި ދުއްވައިލީ ގެއަށްދިއުމުގެ ނިޔަތުގައެވެ. ބާރު ދުވެއްޔެއްގައި ކާރު ދުއްވަމުންދިޔައިރު ހުއްޓުމެއްނެތި އެލޮލުން ކަރުނަ އޮހޮރެމުން ދިޔައެވެ.

ކާރު ގަރާޖަށް ލުމަށްފަހު ބާރު ހިނގުމެއްގައިގޮސް ގެއަށްވަނެވެ. ފަޅުވެފައިވާ ސިޓިންރޫމްގައި ދިއްލައިފައިވާ މަޑު އޮރެންޖް ކުލައިގެ ބޮކިން ގޭގައި އުޅޭ ނޯކަރުން ނިދީކަން އެނގުނެވެ. ރުއިން ހުއްޓަންކުރި ހުރިހައި މަސައްކަތެއްވީ ނާކާމިޔާބެވެ. ވަކި ހިސާބަކަށް ދެވުނުތަނާ ފައިގެ ވަރު ދޫވާހެން ނިކްޔަލްއަށް ހީވިއެވެ. އިތުރަށް ކެތްނުވުމުން ހުރިތަނަށް ރޮމުން ގިސްލަމުން ނިކްޔަލް ތިރިވިއެވެ. އެއާއެކު މުޅިގެ ގުގުމައިގެން ދިޔައީ ނިކްޔަލްގެ ވޭނީ ހަޅޭކުގެ އަޑުންނެވެ. އެވަރުންވެސް އެހިތަށް ލުޔެއްނުލިބުނެވެ. ވާނީވެސް އެހެންނޫންހެއްޔެވެ؟ އެހިތުގެ ޝިފާއަކީ މިއުޝީންނެވެ. އެނޫން މީހަކަށް އެހިތަށް ހަމަޖެހުމެއް ގެެނެސް ދެވޭނެހެއްޔެވެ؟

** ** **

ޝަޔާން މިއުޝީން ގޮވައިގެން އެރީ އެގޭގެ ޓެރަހަށެވެ. އެމުޅިތަންވަނީ ރަތާއި ހުދުކުލައިގެ ފިނިފެންމަލުން ޖަރީކޮށްފައެވެ. މިއުޝީން ހިސާބަކަށް ހައިރާންވި ނަމަވެސް މަޑު ހިނގުމެއްގައި ގޮސް ޝަޔާން ދެއްކި ގޮނޑީގައި އިނށީނެވެ. ވަށް މޭޒުވަނީ ހުދިކުލައިގެ ގޮތިގަނޑަކުން ނިވާކޮށްފައެވެ. ދެފަރާތުގައި ދެގޮނޑި ހުރިއިރު މޭޒުމަތީގައި އެކި ބާވަތުގެ ރަހަ މީރު ކާތަކެތި ހުއްޓެވެ.

މިއުޝީން އިނށީނުމުން ކުރިމައްޗަށްހުރި ގޮނޑީގައި ޝަޔާންވެސް އިނށީނެވެ. އަދި ކާން ފަށަން ބުނުމުން ޖެހިލުންވެފައި އިނދެ މިއުޝީން ކާންފެށީ ޝަޔާންގެ ކޮންމެ އަމަލަކަށް ސަމާލުވެ އިނދެއެވެ.

ކައި ނިމުމުން ކައިރީގައިއޮތް ފޮތިކޮޅުން ތުންފުހެލުމަށްފަހު ދަހިވެތި ނަޒަރަކުން ޝަޔާން މިއުޝީންގެ ގަޔަށް ބަލައިލިއެވެ. އެތަންފެނުމުން ވީފޫހިން މިއުޝީން ދުރަށް ނަޒަރު ހުއްޓައިލިއެވެ.

އިރުކޮޅަކު އެހެން އިނުމަށްފަހު ޝަޔާން މޭޒުމަތީގައި އޮތް މިއުޝީންގެ މަޑު އަތްތިލައިގައި ހިފައިލިއެވެ. ސިހިފައި ދެލޯބޮޑުކޮށްލަމުން މިއުޝީން ޝަޔާންގެ މޫނަށް ބަލައިލިއިރު އެހިތް ނެގިނެގިފައި ޖެހެއެވެ. ނަމަވެސް ހިތްވަރުކޮށްގެން އިނީ އޭނާއަށް އެއްވެސް ދެރައެއްނުލިބޭނޭ ހިތަށް އަރުވައިލަމުންނެވެ.

މޭޒު ދޮށުން ޝަޔާން ތެދުވުމާއި އެކީގައި ޖެހިލުންވެފައިއިން މިއުޝީންވެސް ތެދުވިއެވެ. ޝަޔާންކުރަން އުޅޭ ކަމެއް ރަޝާ ވަނީ މާކުރިންވެސް މިއުޝީން ގާތުގައި ބުނެފައިކަމުން ހިތްވަރުކޮށްލަމުން އޭނާއަށް ކާމިޔާބު ދެއްވުންއެދި ދުޢާކޮށްލިއެވެ.

މިއުޝީންގެ އަތުގައި ހިފައިގެންގޮސް ޝަޔާން ހުއްޓިލީ އެޓެރަހުގެ މެދަށެވެ. އަދި ހިނިތުންވެލަމުން އެއްކަކޫ މައްޗަށް ތިރިވެލުމަށްފަހު މިއުޝީންގެ ދޮންމޫނަށް ނަޒަރު ހިންގައިލިއެވެ.

“މިއު. އަހަރެން ވަރަށް ލޯބިވޭ މިއުދެކެ. ވިލް ޔޫ މެރީ މީ؟” އެއްމިޔަކަނުން ހިނިތުންވެލުމަށްފަހު ލައިގެންހުރި ކޯޓުގެ ޖީބުން ފިނިފެންމަލެއްނަގައި މިއުޝީނަށް ދިއްކޮށްލަމުން ޝަޔާން އަހައިލިއެވެ. ބޮޑުވެގެންދިޔަ ދެލޮލާއެކު މިއުޝީން ޝަޔާންގެ އަތުތެރެއިން އޭނާގެ އަތްތިލަ ވަގުތުން ދަމައިގަތެވެ.

“ނޫން. އައި އެމް ސޮރީ ޝަޔާން. އައި ކާންޓް މެރީ ޔޫ. އަދި ކިރިޔާ އަހަރެންނަށް އިހުސާސުވީ އަހަރެން ޝަޔާންދެކެ ލޯބިނުވާކަން. އަސްލު އަހަރެން ލޯބިވަނީ އެހެން މީހެއްދެކެ.” މޫނަށް ވައްތަރެއް ޖައްސައިލަމުން އެމަލުގައި ހިފައި ހޫރައިލަމުން ފޫހި ރާގަކަށް މިއުޝީން އެހެން ބުނެލުމާއެކު ހުއްޓުން އަރައިފައި ޝަޔާން ތެދުވިއެވެ. ގަސްތުގައި މިއުޝީން އެހެން ބުނީ ޝަޔާން ރުޅިއަރުވައިލުމަށެވެ. ކަންތައްވީވެސް މިއުޝީން ބޭނުންވިގޮތަށެވެ. ހައިރާންކަން ރަސްކަންކުރަމުންދިޔަ ޝަޔާންގެ މޫނުމައްޗަށް ވަގުތުން ރުޅިވެރިކަން ވެރިވިއެވެ.

ޮ
“ހަނދާންވޭތަ އެއްޒަމާނެއްގަ އަހަރެންވެސް ޝަޔާންދެކެ ލޯބިވެގެން ލޯބިހުށައެޅި ދުވަހު ޝަޔާން އަހަރެންނަށްދިން ޖަވާބު؟ ހަނދާނެއް ނުވޭދޯ.” އެހެންބުނެލަމުން އަތުގައިހުރި ބާރެއްލައިފައި މިއުޝީން ޝަޔާންގެ ކަންކަށިމަތީގައި ޖެހިއެވެ. ވީތަދުން ޝަޔާންގެ ރުޅި އިތުރަށް ގަދަވިއެވެ. ދަތްކުނޑި ވިކައިލަމުން މިއުޝީންގެ ކަރުގައި ހިފައިގެންގޮސް ފާރުގައި ޖައްސައިލިއެވެ. އޭރު މިއުޝީން މަސައްކަތްކުރަމުން ދިޔައީ ޝަޔާންގެ އަތްދަށުން ސަލާމަތްވެވޭތޯއެވެ.

“އައްޗި. ކަލޭ ހީކުރީ އަހަރެން މިއުޅެނީ ކަލޭދެކެ ލޯބިން ކަމަށްތަ؟ ޗީ. އަހަރެން ބޭނުމީ ހަމައެކަނި ކަލޭގެ ތިރީތި ހަށިގަނޑު. ކަލޭ ކޮންމެ މީހެއްދެކެ ލޯބިވިއަސް އަހަރެންނަށް ހެޔޮ. އެކަމަކު އެމީހަކަށްވެސް ތިހަށިގަނޑު ލިބޭނީ އަހަރެން ބޭނުންކޮށް ބާވީމަ.” ނުލަފާ ހިނިގަނޑަކާއެކު މިއުޝީންގެ ކަރުގައިއޮތް ދޯޕައްޓާ ނަގައި އެއްލައިލަމުން ޝަޔާން ބުނެލިއެވެ. ދެލޯބޮޑުކޮށްލަމުން ޝަޔާންގެ މޭގައި އަޅައި ދުރަށް ކޮށްޕައިލެވޭތޯ މިއުޝީންކުރި ހުރިހައި މަސައްކަތެއްވީ ބޭކާރެވެ. އޭރު އެދެލޮލަށްވަނީ ކަރުނަ ޖަމާވެފައެވެ. ނަމަވެސް އެހަށިގަނޑަށް ދަހިވެތިވެފައިހުރި ޝަޔާންގެ ހިތަށް ރަހުމުގެކަންފުޅެއް ވަތްހެނެއްވެސް ހިއެއްނުވިއެވެ. ނުލަފާ ފާޑަކަށް ހިނިތުންވެލަމުން ޝަޔާން މިއުޝީނާ ގާތްވެލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.