ނޫރު (ހަތަރުވަނަ ބައި)

“އައިމް ސޮރީ…..އައިމް ސޯ ސޮރީ.” އެއަތެއްގެ ވެރިއަކު ބުނެލި އަޑު އަފާފަށް އިވުނެވެ. އެއަށްފަހު އޭނައަށް ވީނުވީއެއް ނޭނގި އޭނަގެ ހޭނެތުނެވެ.

**

އަފާފް ދެން ހޭއެރިއިރު އޭނަގެ ލޯމަތީގައި އެއްޗެއް އެޅިފައިވިކަން އޭނައަށް އިޙްޞާޞްކުރެވުނެވެ. ހީވާގޮތުން އޭނަގެ ދެލޯ މަތީގައިވަނީ މަޑު ކަފަކޮޅުތަކެއް އެޅި، ބަނދެވިފައެވެ. އޭގެ ސަބަބުން ލޯ ހުޅުވާލަން ނުކުޅެދުމުން އަފާފަށް ދެބުމަ ކައިރިކޮށްލަމުން އޭނަގެ ދެލޯ މަތީގައި އެއްއަތް އަޅާލެވުނެވެ.

“އަފޫ!” އޭނައަށް އެ އޮވެވުނު ތަނުގެ ތެރެއިން ބައްޕަގެ އަޑު އިވިގެން ދިޔުމުން އަފާފަށް އެދިމާލަށް އޭނަގެ މޫނު އަނބުރައި ތެދުވެލެވުނެވެ. އެ ހިނދު އޭނަ ލައިގެން ހުރީ ވެސް އޭނަ އާއްމުގޮތެއްގައި ލާ ކަހަލަ ހެދުމެއް ނޫންކަމާއި އޭނަގެ ކަނާތް އަތް ކޮންމެވެސް އެއްޗަކާއި ގުޅިފައިވިކަން އޭނައަށް އިޙްޞާޞް ކުރެވުނެވެ.

“ބް….ބައްޕާ! މީ ކޮންތާކުތަ އަހަރުމެން މިތިބީ؟ އަހަރެން މިހިރީ ބުރުގާވެސް ނާޅާ. ކޯޗެއްތަ އަހަރެން ލޯމަތީގަ މިހިރީ؟” އަފާފް ހިސާބެއްގެ ކަންބޮޑުވުމަކާއެކީ ސުވާލުކުރަމުން ގޮސް އޭނަގެ ލޯމަތީގައި އެޅިފައިވި އެއްޗެއް ނަގާލަން މަސައްކަތް ކުރިއެވެ.

“ނޫން އަފޫ މަޑުކުރޭ. އަފޫގެ ލޮލަށް ވަރަށް ބޮޑު ޒަޚަމެއްވެގެން ހޮސްޕިޓަލަށް ގެނެއްސަ ތިއޮތީ. މަޑުކުރޭ ޑޮކްޓަރަކު ގެންނަންދެން……ޑޮކްޓާރ!” ބައްޕަ ދެއްކި ވާހަކަތަކަށްފަހު ބައްޕަގެ އަޑު ފޭދިގެން ދިޔަދިޔަހެން ކުއްލިއަކަށް އަފާފްގެ ހަނދާނަށް ހުރިހާ ކަމެއް އަންނަން ފެށިއެވެ. އޭނައާއި އޭނަގެ ބައްޕަ މިތިބީ އޮސްޓްރޭލިޔާގައި ކަމާއި އޭނަ މިތަނަށް އައީ ދަސްވެނިވުމަށްކަމެވެ. އޮސްޓްރޭލިޔާއަށް އައީ އަރަޝްވެސް ގޮވައިގެން ކަމާއި އަރަޝްއާމެދު އޭނަގެ ހިތުގައި އުފެދިފައިވި އިޙްޞާޞްތަކެވެ. އެއަށްފަހު އޮސްޓްރޭލިޔާއިން އޭނައާއި ދިމާވި އާ އެކުވެރިއެއްކަމުގައިވާ ލޫސީއާއި، އެކުއްޖާއާއި އޭނައާއި ދެމެދު ދެކެވުނު ވާހަކަތަކެވެ. އެންމެ ފަހުން އޭނަ ލޫސީއާ ބައްދަލުކުރަން ދިޔަ ރޭ އެތާނގައި ފެށިގެން ދިޔަ މާރާމާރީއާއި ކުއްލިއަކަށް ފިރިހެނަކު ބާރު އަޑަކުން އޭނަގެ ނަން ގޮވާލި ހިނދުކޮޅުގައި ކަންތައްވެގެން ދިޔަ ގޮތެވެ. އެ މަންޒަރު ލޮލަށް ސިފަވެގެން ދިޔަ ހިނދު އަފާފްގެ ދެލޯ މެރިފައިވިއެއްކަމަކު އެ ދެލޯ އޭނައަށް އިތުރަށް ތަގުޅިކޮށްލެވުނެވެ. އެ ވަގުތުކޮޅުގައި އޭނައަށް އިޙްޞާޞްކުރެވުނު ތަދު އެވަގުތުވެސް އޭނައަށް އިޙްޞާޞްކުރެވުނު ފަދައެވެ. އޭނަގެ ހިތް ބާރަށް ތެޅެން ފެށީ އެރޭގެ އެވަގުތު އޭނަގެ ހިތަށް ވަތް ބިރުވެރިކަމެއްގެ ސަބަބުންނާއި، ހިނދުކޮޅެއްގެ ތެރޭގައި ދެން އޭނައަށް ވާންއުޅޭ ގޮތް އަންދާޒާ ކުރެވުމުންނެވެ. ބިރުވެރި ޚިޔާލުތައް އޭނަގެ ސިކުނޑިއަށް ވެރިވާން ފެށުމުން އަފާފަށް ބޯހޫރުވާލެވުނެވެ. އެވަގުތު އަނެއްކާވެސް ބައްޕަގެ އަޑު އިވިގެން ދިޔައެވެ.

“މިއޮތީ، ޑޮކްޓާރ. ހޭއެރީ ހަމަ ދެންމެއަކު.” ބައްޕަ އިނގިރޭސި ބަހުން އެހެން ބުނެލިއިރު ބައްޕަގެ ފިޔަވަޅުތަކާއި އެހެން ދެބައެއްގެ ފިޔަވަޅުތަކުގެ އަޑުވެސް އަފާފަށް ވަރަށް ސާފުކޮށް އިވުނެވެ.

“ކިހިނެއްތަ މިހާރު؟ މިސް، އަފާފް؟” ފިރިހެން ޑޮކްޓަރަކު އިނގިރޭސި ބަހުން އަހާލި އަޑު އަފާފަށް އިވުނެވެ. އަފާފް ހާސްކަން މަތީގައި ހުރެވެސް އޭނަ ރަނގަޅުކަމަށް ބުނެލައިފިއެވެ. ޑޮކްޓަރު ދެންވެސް އޭނަގެ ލޮލަށް ތަދުވޭތޯ ސުވާލުކުރިއެވެ. އަފާފް ނޫނެކޭ ބުނެ ތެދު ޖަވާބެއް ބުނީ އިތުރު ސުވާލެއް ކުރަން ކެތްމަދުވެފައި އިނދެއެވެ. އޭނަ އެ ސުވާލުކުރަން ނުކުޅެދިފައި ވަނިކޮށް އެންމެފަހުން ޑޮކްޓަރު ނަރުސް ކުއްޖާ ގާތު އޭނަގެ ލޮލުގައި އެޅިފައިވި ފޮތިގަނޑު ނަގާލަން އެންގިއެވެ. ނަރުސް ކުއްޖާ އެކަންކުރަން ފެށި ވަގުތު އަފާފަށް އިނދެވުނީ ނޭވާ ހިފަހައްޓާލައިގެންނެވެ. ފޮތިގަނޑާއެކީ ކަފަކޮޅުތައްވެސް އޭނަގެ ލޮލާއި ވަކިވެގެން ދިޔަ ވަގުތު އަފާފް މަޑުމަޑުން ލޯ ހުޅުވަން ފެށީ އަލި ކުރެވިފައިވި ކޮޓަރިއެއް އޭނައަށް ފެނިގެންދާނެ ކަމުގެ އުއްމީދުގައެވެ. އެހެނަސް ކަންވެގެން ދިޔައީ އޭނަގެ އެންމެ ބިރުވެރި ޚިޔާލުތަކާއި އެއްގޮތަށެވެ. ދެލޯ ހުޅުވައި ނިމުނުއިރުވެސް އޭނައަށް ފެނިގެން ދިޔައީ މުޅިންވެސް އަނދިރިކަމެވެ. ހިތަށް ވެރިވެގަތް އިންތިހާ ދަރަޖައިގެ ހާސްކަމާއެކީ އަފާފަށް އަވަސްއަވަހަށް އެސްފިޔަ ޖެހެން ފެށިއެވެ. އެހެނަސް ދެވަނަ އެއްޗެއް އޭނަގެ ލޯކުރިމަތިން ފެންނަ ގޮތެއްނުވިއެވެ. ފެންކަޅިވަމުން ދިޔަ ވަގުތު ދެއަތުން ބާރަށް ދެލޯ އުނގުޅާލެވުނީވެސް އޭނަގެ ކުރިމަތިން މަންޒަރުތައް ސާފުވާނެކަމުގެ އުއްމީދުގައެވެ. އެހެނަސް…..

“އެއްވެސް އެއްޗެއް އެބަފެނޭތަ ދަރިފުޅާ؟” ބައްޕަ އެ ސުވާލުކޮށްލި ވަގުތު އެ އަޑުގައި ހިތާމައިގެ ތުރުތުރެއް އެކުލެވިގެން ދިޔައެވެ.

“ބައްޕާ މިތާނގަ ބޮކިތައް ދިއްލީމައެއްނޫންތަ ފެންނާނީ؟” އަފާފް ރަނގަޅަށް ވިސްނެން އޮތް އެންމެ ފަހު ޚިޔާލު ސިކުނޑިއަށް އައުމާއެކު އެ ސުވާލުކޮށްލީ ނުރުހުންތެރިކަމާއެކީގައެވެ.

“މިތާނގަ……ބޮކިތައް ދިއްލިފަހުރީ އަފޫ.” ބައްޕަ ބުނެލި އަޑުއިވުނެވެ. އެއާއެކު އަފާފް ހިނދުކޮޅަކަށް ހުއްޓުންއެރީ ޙަޤީޤަތާއި ކުރިމަތީލާން އޭނަގެ ހިތާއި ސިކުނޑި އެއްބަސްވުމުންނެވެ. މާގިނައިރެއް ނުވެ އަފާފްގެ ދެލޯ ކަރުނުން ފުރިގެން ދިޔައީ މިއީ އޭނަގެ އުފާވެރި ޙަޔާތުގެ ނިމުންކަމަށް އޭނަގެ ހިތުގެ ކަނަކުން ގޮވާލުމުންނެވެ. ހަމަ އެއާއެކު އޭނައަށް ދެން ދިރިއުޅުމުގައި ނުކުރެވޭނެ ކަންތައް ހިތަށްއަރަމުން ދިޔަދިޔަހެން އޭނައަށް ގިސްލެވެން ފެށިއެވެ. އޭނައަށް އަޑުން އަޑު ނަގައި ރޯން ފެށުނީ އޭނަ ފަދަ ބަދުނަސީބުވެރިއެއް މި ދުނިޔޭގައި ވެސް ނުހުންނާނެކަމަށް ހިތް ބުނުމުންނެވެ. ރުއިމުގެ ތެރެއިން އޭނަގެ ބައްޕައާއި ޑޮކްޓަރު ވާހަކަ ދެއްކިއެއްކަމަކު އަފާފަށް އެއަކަށް ސަމާލުކަމެއް ނުދެވުނެވެ. އޭނައަށް އަޑު އިވުނުހާ ވެސް ވާހަކައަކީ ހަމަ ގައިމުވެސް މިވަގުތު އޭނަގެ ލޮލުގެ ފެނުން އަނބުރާ ގެންނަން ކުރެވޭނެ ކަމެއްނެތް ވާހަކައެވެ.

އެރޭވެގެން ދިޔައީ އަފާފްގެ ޙަޔާތުގައި ފެށިގެން ދިޔަ އަނދިރި ބާބެއްގެ ފެށުމަކަށެވެ. އަފާފްގެ މުޅި އެރޭ ވޭތުވެގެން ދިޔައީ ރުއިމުގެ ތެރޭގައެވެ. ބައްޕަގެ އެއްވެސް ނަޞޭޙަތެއް އަޑު ނޭހުނު ތާނގައި ބައްޕަ، މަންމައަށް ގުޅައިދިނުމުން މަންމައާއި ވާހަކަ ދައްކަން ވެސް އޭނައަށް ކުރެވުނީ އިންކާރެވެ. އެގޮތަށް ކަންތައް ކުރެވުމުން ޚުދު އަފާފް އަމިއްލައަށް ދެރަވިއެއްކަމަކު އޭނައަށް ވެސް އޭނަގެ ޢަމަލުތައް ކޮންޓްރޯލް ނުކުރެވޭ ފަދައެވެ. އޭނަގެ ލޯ ކުރިމަތިން ފެންނަމުން ދިޔަ އަނދިރިކަމުގެ ހިތާމަ އެވަގުތުވީ އޭނަގެ ބޮލަށް ސަވާރުވެފައެވެ. ވާނީވެސް އެހެންތާއެވެ. މިއީ އޭނައަށް މިހާ ބޮޑު މުޞީބާތެއް ކުރިމަތިވީ ފުރަތަމަ ފަހަރެވެ. މިހުރިހާ ދުވަހު ކަންތައް ވަމުން ދިޔައީ އޭނަގެ ހިތް އެދޭ ގޮތަށެވެ. އެހެނަސް މިއަދު އޭނައަށް އޭނަގެ އެދުމާއި ދެކޮޅަށް މި ލިބުނީ ކިހާ ބޮޑު ގެއްލުމެއް ހެއްޔެވެ؟ ދުނިޔޭގައި ތިބި ހުރިހާ މީހުންގެ ތެރެއިން ހަމަ އޭނައަށް މި އިމްތިޙާން ކުރިމަތިވާންވީ ކީއްވެ ހެއްޔެވެ؟

އަފާފްގެ ވިސްނުން ހުރި ގޮތުގެ ބޭނުން ޝައިޠާނާއަށް އެންމެ ރަނގަޅު ގޮތުގައި ހިފުނީ ކަންނޭނގެއެވެ. އެރެއަށްފަހު އަފާފް ނަމާދުގެ މަތިން ހަނދާންނެތޭ ގޮތްވިއެވެ. ބަންގި ގޮވާ އަޑުވެސް ނުއިވޭތީ ކުރީކޮޅު އަފާފަށް ނަމާދު ވަގުތުތައް ފާއިތުވަމުން ދިޔަކަން ނޭނގުނީއެވެ. އެހެނަސް ދެ ތިން ދުވަސް ފާއިތުވީއިރު އޭނައަށް ނަމާދުތައް އެޅެމުން ދިޔަކަން އަފާފްގެ ހިތަށް އެނގުންވިއެވެ. އެނގުންވިއެއްކަމަކު އަފާފް އެކަމާ އަޅާލާހިތެއްނުވީ ކީއްވެކަމެއް އަފާފަކަށް ވެސް ނޭނގުނެވެ. އޭނައަށް ހަމަ ހުއްޓުމެއްނެތި ވިސްނެމުން ދިޔައީ އޭނަގެ ލޮލުގެ ފެނުން އަނބުރާ ގެނެވޭނެ ގޮތަކާއި މެދުގައެވެ.

ހުސެއިނާއި ޝާދިޔާ ވެސް ކަންބޮޑުވީ އަފާފްގެ ނަމާދަށްވުރެ އޭނަގެ ޞިއްޙީ ޙާލަތާއި މެދުގައެވެ. އަފާފަށް އެއްވެސް އެއްޗެއް ރަނގަޅަށް ނުކެވޭތީވެއާއި އޭނަ އަބަދުވެސް ނެގިމަޑުވެފައި ހުންނަ ހުރުމާއި މެދުގައެވެ. އެމީހުންގެ ދަރިފުޅަށް އެފަދަ ޙާލެއްގައި ނަމާދު ކުރެވޭނީ ފަހެ ކިހިނަކުންކަމަށްބުނެ ދެމީހުންވެސް އަމިއްލަ ހިތްތައް އެކަމާމެދު ހަމަޖައްސައިގެން ތިބިއެވެ. އަފާފަށް ﷲ މަތިން ހަނދާންކޮށްދީ ނަމާދުކުރަން ނަޞޭޙަތްތެރިވުމުގެ ބަދަލުގައި އެމީހުން އެންމެ މުހިއްމު ކަމަކަށް ބެލީ އަފާފް ކައުންސެލަރެއްގެ ގާތަށް ގެންދިޔުމަށެވެ.

މިގޮތުން ހޮސްޕިޓަލުން ދޫކުރެވުނު ދުވަހު ސިޑްނީގެ މަޝްހޫރު ކައުންސެލަރެއްގެ ގާތަށް އަފާފް ގެންދެވުނެވެ. ހަފްތާއެއްހާ ދުވަހުގެ ކައުންސެލިންގްއަށްފަހު އަފާފް މަދުމަދުން ވާހަކަ ދައްކަން ފެށިއެވެ. އެހެނަސް ޖުމްލަކޮށް އޭނަގެ ޝަޚުޞިއްޔަތަށް މާ ބޮޑު ބަދަލެއް ނައުމުން ހުސެއިން ޝާދިޔާގެ އެދުމުގެ މަތިން އަފާފް އަނބުރާ މާލެއަށް ގެނައެވެ. ކޮންމެ ކައުންސެލަރެއްގެ ގާތަށް ގެންދިޔަޔަސް ވާނީ އެކައްޗެކޭ ބުނެ އޭނަ މަންމަ ކައިރިއަށް އައުމުން ވެސް ރަނގަޅުވެދާނެ ނޫންހޭ ބުނަމުންނެވެ.

ހުސެއިން އެމީހުންގެ ދެލޯފަދަ ދަރިފުޅާއެކީ މާލެއަށް އަނބުރާ އައީ އެއްރެއެއްގެ 9:00 ޖެހި ވަގުތެވެ. ޓާރމިނަލްގެ އެންމެ ކުރީގައި ޝާދިޔާ އޭނަގެ ބޭބެއަކާއެކީ އެމީހުން ބަލާ އައިސް ހުއްޓެވެ. އަފާފް އައިސް އޭނައާއި ހަމަވުމާއެކު ޝާދިޔާ ރޮއިގެންފައި އަފާފްގެ ގައިގައި އޮޅުލައިގަތެވެ. އެއިން އަފާފްގެ ހިތަށް އެއްވެސް އަސަރެއް ނުކުރާ ފަދައެވެ. އެއްދިމާލަކަށް ކަޅި ހުއްޓައިގެން ހުރިއިރު އޭނަގެ މޫނުމަތީގެ ކުލަވަރަށް ހަމަ އެއްވެސް ބަދަލެއް ނާދެއެވެ.

އެރޭ ގޭގައި ޝާދިޔާ ކައްކާފައިހުރީ ވެސް އަމިއްލައަށެވެ. އަފާފަށް އެންމެ ކަމުދާނެ ކާއެއްޗެއްސެވެ. އެހެނަސް އެރޭވެސް އަފާފް ކެއީ އެންމެ ބަހެއް ވެސް ބުނެނުލާ އިނދެ، މަދު އެތިކޮޅެކެވެ. ކައި ނިމުމަށްފަހު ޝާދިޔާ އަފާފް ގޮވައިގެން އޭނަގެ ކޮޓަރިއަށްދާން އުޅުނު ވަގުތު އެގޭގެ ބެލް ޖަހާލި އަޑު އިވުނެވެ. ގޭގެ މަސައްކަތު މީހަކު ގޮސް އެދޮރު ހުޅުވާލިއިރު ދޮރު މަތީގައި ހުރީ އަރަޝް ނޫން ދެވަނަ މީހެއްނޫނެވެ. ހުސެއިނާއި ޝާދިޔާއަށް އެކީގައި އަރަޝްގެ ނަން ކިޔާލެވުނު ވަގުތު އަފާފަށް ވެސް ބޭއިޚްތިޔާރުގައި އެ ފަރާތަށް މޫނު އަނބުރާލެވުނެވެ.

“ސަލާމް.” އަރަޝް ސީރިއަސްކަމާއެކީ ގޮވާލުމުން ހުސެއިން ކާ މޭޒުދޮށުގައި ހުރެ ތެދުވެލިއެވެ.

“އަ….އަރަޝް ދަރިފުޅާ…..އޮސްޓްރޭލިޔާގަ ކަންދިމާވި ގޮތުން ބޭބެ ދަރިފުޅު މަތިން ހަނދާން ނެތުނީ. ވަރަށް ހިތާމަވެރި ގޮތެއް ދިމާވެގެން މިއުޅެނީ.” ހުސެއިން އަރަޝްގެ ގާތަށް ދަމުން ހަދާލީ ދޮގެކެވެ. އޭނަ އަރަޝްގެ މަތިން ހަނދާން ހުއްޓެވެ. އެހެނަސް އޭނައަށް ގުޅަން ޖެހިލުންވީ، މި ދިމާވި ޙާދިސާގެ ސަބަބުން އެތައް އިންތިޒާރަކަށްފަހު ހަމަޖެހިގެން ދިޔަ އަފާފްގެ ކައިވެންޏަށް ބުރޫ އަރާފާނެތީވެއެވެ. އަރަޝްގެ އަނގައިން ދެން ނިކުތް ބަސްތަކުން ހުސެއިންގެ އެ ބިރު ޙަޤީޤަތަކަށްވިއެވެ.

“އަޅުގަނޑަށް އެނގޭ. ކޮންމެވެސް ގޮތަކަށް އަޅުގަނޑަށް އަޑު އިވުނީ އަފާފް ހޮސްޕިޓަލުގަ އޮތް ވާހަކަ. މިހާރު އަޅުގަނޑުގެ ޢާއިލާ އެންމެނަށް ވެސް އެނގޭ އަފާފަކީ ލޯފަން ކުއްޖެއްކަން. ވަރަށް ބޮޑަށް މަޢާފަށް އެދެން. އެކަމަކު އަޅުގަނޑުގެ މަންމައާއި ޢާއިލާގެ އެއްވެސް މީހަކު ބޭނުމެއްނުވޭ އެފަދަ ނުކުޅެދުންތެރިކަމެއް ހުންނަ ކުއްޖަކު އަޅުގަނޑުމެންގެ ޢާއިލާއަށް ވަންނަން. އައިމް ސޮރީ.” އަރަޝް ސާބިތު މޫނަކާއެކީ ދެއްކި ވާހަކައިން ފުރަތަމަ ފަހަރަށް ގޮތް ހުސްވި ހުސެއިނާއި ޝާދިޔާއަށް އެކަކު އަނެކަކަށް ބަލާލެވުނެވެ. އެއަށްފަހު އެދެމީހުންނަށް ވެސް ބަލާލެވުނީ އަފާފާއި ދިމާލަށެވެ. އެ ހިނދު އަފާފްގެ އެއްލޮލުން ކަރުނައެއް ފައިބައިގެން އައިތަން ފެނިފައި ހުސެއިން ކެތްނުވެގެން ދެންވެސް ވާހަކަ ދެއްކިއެވެ.

“އަރަޝްގެ ޢާއިލާއަށް ކަމުނުދިޔަސް އަރަޝްއަށް ކަމުދެއެއްނު؟ އެއީއެއްނު މުހިއްމު ކަމަކީ؟ އަފާފަކީ ހުރިހާ ގޮތަކުން ވެސް ރަނގަޅު، މޮޅު ކުއްޖެއް. އަރަޝްއަކަށް މުޅި މި ރަށުން ވެސް އެފަދަ ކުއްޖެއް ލިބޭނެހެނެއް ހިއެއްނުވޭ.” ހުސެއިން އޭނަގެ ދަރިފުޅަށްޓަކައި ވާހަކަ ދެއްކިއެވެ.

“އަޅުގަނޑުވެސް ވަކި ބޭނުމެއްނޫން އަމިއްލައަށް އެއްވެސް ކަމެއްނުކުރެވޭފަދަ އުނިކަމެއް ހުންނަ ކުއްޖަކާއެކީ މުޅި ދިރިއުޅުން ވޭތުކުރާކަށް. އަޅުގަނޑަށް މިހާރު ވެސް އެހެން ޢާއިލާއަކުން ކައިވެންޏަކަށް އެދިފަވަނީ. އަޅުގަނޑު ނިންމައިފިން އެ އެދުން ޤަބޫލުކުރަން.” އަރަޝްގެ ހިތުގައި އަފާފާއި އޭނަގެ ޢާއިލާއަށްޓަކައި ކުޑަވެސް ޙަމްދަރުދީއެއްނެތް ފަދައެވެ. އޭނަ އެންމެ ފަހަކަށް ދެއްކި ވާހަކައިން އަފާފްގެ ލޮލުން އިތުރު ކަރުނަތަކެއް ފައިބައިގެން އައިއިރު ހުސެއިން ރުޅިން ރަތްވިއެވެ. އޭނަ އަރަޝްއާއި ދިމާލަށް ހަރު އަޑުން އެއްޗެހި ގޮވަން ފެށިތަނާހެން އަރަޝް އޭނައަށް ފަސްދީފައި ދާން ހިނގައިގަތެވެ. ޝާދިޔާ އަފާފް އަތުލަފިކޮށްގެން އަނެއްކާވެސް ކޮޓަރިއާއި ދިމާލަށް މިޞްރާބުޖެހީ އެތާނގައި ހުރެގެން އަފާފަށް އިތުރު ހިތްދަތިކަމެއް ނުލިބޭނެކަން އެނގުންވީތީވެއެވެ.

ޝާދިޔާ މަސައްކަތް ކުރިއެއްކަމަކު އަރަޝްގެ ބަސްތަކުން އަފާފްގެ ހިތުގައި ފުން ޒަޚަމްތަކެއް އުފެދިފައިވިއެވެ. ނިދުމަށްޓަކައި މަންމަ އޭނަ ތާޒާވެލަން އެހީވެދީ ހެދުން ބަދަލުކުރުވައި ބޮލުގައި ފުނާ އަޅަމުން ދިޔަ ވަގުތު އަރަޝްގެ ބަސްތައް އޭނަގެ ކަންފަތުގައި ގުގުމަމުން ދިޔައެވެ. އެ ބަސްތައް އޭނައަށް ޤަބޫލުވާން ނެގީ މަދު ވަގުތުކޮޅެކެވެ. އޭނައަކީ އުނިކަމެއް ހުރި ނުކުޅެދުންތެރިއެއްކަމަށް އޭނައަށް އަމިއްލަ ނަފްސުގާތު ބުނެވުނު ވަގުތު އަފާފްގެ ލޮލަށް ޖަމާވި ކަރުނަތަކާއެކީ އޭނައަށް ގިސްލެވެން ފެށިއެވެ. ހަމައެއާއެކު އަރަޝް ބުނިހެން އޭނައާއެކު މުޅި ދިރިއުޅުން ވޭތުކުރާނީ ކާކުތޯ އަފާފްގެ ހިތަށްއެރިއެވެ. އަރަޝް ކަހަލަ “ރަނގަޅު” ޒުވާނަކު އޭނައަށް އިންކާރު ކޮށްފިނަމަ ދެން އޭނައާއި އިންނަން އެއްބަސްވާނީ ކާކު ހެއްޔެވެ؟

އަފާފް އަމިއްލަ ޚިޔާލުތަކުގައި އިނދެ ރޯން ފެށުމުން އޭނަގެ މަންމަ އޭނައަށް ނަޞޭޙަތްތެރިވިއެވެ. އެހެނަސް އުއްމީދުން މަޙްރޫމްވެފައިވި ހިތެއްގެ ސަބަބުން އަފާފް އެއަށްދިނީ ބީރު ކަންފަތެކެވެ. ކޮންމެއަކަސް މަންމަ ރުއިން ހުއްޓާލުމަށް ހަރުކަށި ގޮތަކަށް ބުނުމުން ރުއިން ހުއްޓާލީ އެހެން ހަދައިގެން ވެސް މަންމަ ދިޔުމުން އޭނަ އެކަނިވެލުމަށެވެ. ފަހަކަށް އައިސް އޭނަ އަބަދުވެސް ބޭނުންވަނީ އޭނަގެ ހިތާމަވެރި ޚިޔާލުތަކާއެކީ އެކަނި ހުންނާށެވެ. އަފާފްގެ އެ އެދުން ފުރިހަމަވިއެވެ. އޭނަ މަންމަ ބުނިގޮތަށް ކަރުނަތައް ފޮހެލަމުން މަންމަގެ އެހީގައި އެނދުގައި އޮށޯތުމުން މަންމަ ކޮޓަރިން ނިކުމެގެން ދިޔައެވެ. އޭގެ މާ ގިނައިރެއްނުވެ އަނެއްކާވެސް އަރަޝްގެ ބަސްތައް އަފާފްގެ ސިކުނޑިއަށް ވެރިވެ އޭނަގެ ލޮލަށް ކަރުނަތައް ގިނަވިއެވެ. އޭނައަށް އަނެއްކާވެސް ގިސްލެވެން ފެށިއެވެ. މޭގައި އުފެދުނު ތޫނު ތަދެއްގެ ސަބަބުން އަފާފް މޭމަތީގައި އަތްއަޅާލަމުން ތެދުވެލިއެވެ. އެއަށްފަހު އޭނަގެ ޙަޔާތް ހިތާމަވެރިވާ ސަބަބުތަކުގެ މަތިން ހަނދާންވެ އިތުރަށް ރޮވެންފެށިއެވެ. އޭނަވެސް އެހާވަރަށް ރޯކަށް ބޭނުމެއްނޫނެވެ. އޭނައަށް ހުއްޓޭނެނަމައޭ އެވަގުތުވެސް އޭނަގެ ހިތް ބުނަމުން ދިޔައެވެ. އެހެނަސް އޭނަގެ މޭތެރޭގައި އޮތް ހިތާއި ދެކޮޅަށް އޭނައަށް އެހީވެދޭނެ ހަމަ އެއްވެސް ފަރާތެއް ނެތް ފަދައެވެ.

އަފާފް މުޅި ރޭ ހޭދަކުރީ ބައެއްފަހަރު ތެދުވެ ރޮއިރޮއިފައި އަނެއްފަހަރު އޮށޯވެ ނިދޭތޯ މަސައްކަތް ކުރުމުގައެވެ. މިގޮތުން އެރޭ 10 ވަނަ ފަހަރަށް އޮށޯވެފައި ތެދުވެލެވުނު ވަގުތަކީ ފަތިސް ނަމާދަށް ބަންގި ގޮވަން ފެށި ވަގުތެވެ. އެ ހިނދު އަފާފް ހުއްޓުންއެރިއެވެ. އެތައް ދުވަހެއް ފަހުން ފުރަތަމަ ފަހަރަށް ހަރުއަޑުން “ﷲ އަކްބަރު” އޭ ކިޔުނު އަޑު އިވިފައި އަފާފަށް ހީވީ އޭނަ އެ ބަސްތައް އަޑުއެހީ ފުރަތަމަ ފަހަރަށް ހެންނެވެ. އެ ބަސްތައް ތަކުރާރުވަމުން ދިޔަދިޔަހެން އޭގެ މާނަވެސް އަފާފްގެ ސިކުނޑި އޭނައަށް ހަނދާންކޮށްދިނެވެ. ﷲ ގެ މާތްކަމާއި މަތިވެރިކަން އެހެން ހުރިހާ އެއްޗަކަށްވުރެ ބޮޑުކަމަށް ބުނަމުން ދިޔަ ބުނުމުގެ މާނަ އެދުވަހުގެ އެ ހިނދުކޮޅުގައި މުޅިން ތަފާތު ގޮތަކަށް އަފާފަށް ނެގުނެވެ. މި ހުރިހާ ދުވަހު އޭނަގެ ހިތާއި ސިކުނޑި ތެރޭގައި ބޮޑުކަމެއްގެ ގޮތުގައި އޭނަ ނަގައިގެން އުޅޭ މުޞީބާތުގެ މަތިން އޭނައަށް ވިސްނުނެވެ. އެކަލާނގެ މާތްކަމާއި މަތިވެރިކަން ހުރިހާ އެއްޗަކަށްވުރެ ބޮޑު ރަސްކަލާނގެއަށް ނުފިއްލެވޭނެ މުޞީބާތެއްވާނެ ހެއްޔެވެ؟ އެކަމާމެދު ވިސްނުމުން އަފާފްގެ ލޮލަށް ކަރުނަތައް ޖަމާވެގެން ދިޔައީ ހިތާމަވެރިކަމުގެ ސަބަބުންނެއްނޫނެވެ. އެއީ ހަމަ ގައިމުވެސް ތަފާތު އިޙްޞާޞެކެވެ. އެ އިޙްޞާޞްގެ ތެރޭގައި އިނދެ އަފާފް އެ ބަންގީގެ އަޑު އިތުރަށް އެހިއެވެ. ޝަހާދަތުގެ ކަލިމަތައް ތަކުރާރުވާން ފެށުމުން އަފާފަށް އެކަލިމަތައް ކިޔެން ފެށީ ކަރުނަތަކުން ފުރެމުން ދިޔަ ދެލޮލާއެކީގައެވެ. އޭނަ މި ހުރިހާ ދުވަހު ނަމާދާއި ދުރުގައިވީ އެކަލިމަތަކާއި ކިހާ ދުރުވުމުންކަން އޭނައަށް އިޙްޞާޞް ކުރެވުނެވެ. ބަންގީގައި ނަމާދަށް އަވަހަށް އައުމަށް އެންގުމުގެ ކުރިން ވެސް އަފާފްގެ ހިތް އެކަމަށްޓަކައި ކެތްމަދުވިއެވެ. ބަންގި ނިމުނުތަނާހެން އޭނަ މަންމާއޭ ކިޔައި ބާރަށް ގޮވާލިއެވެ. ހަމައެއާއެކު ހުސެއިނާއި ޝާދިޔާ އެކޮޓަރިއަށް އައީ ކަމެއްވެގެން އުޅެނީކަމަށް ހީކޮށެވެ. އެހެނަސް އަފާފް އޭނަ ނަމާދު ކުރަން ބޭނުންވާ ވާހަކަ ބުނުމުން އެމީހުންނަށް ވެސް ލިބުނީ ޙައިރާންކަމެކެވެ. ޝާދިޔާ ވަގުތުން އަފާފަށް ވުޟޫކުރުމަށް އެހީތެރިވެދިނެވެ. އެއަށްފަހު އަފާފް ޤިބްލައާއި ކުރިމަތި ކުރުވިއެވެ. ހަމަ އެއާއެކު އަފާފް ދާދި ދެންމެއަކު އޭނައަށް ހިތްހަމަޖެހުމެއް ގެނެސްދިން ބަސްތަކުން އޭނަ ނަމާދު ފެށިއެވެ. އެ ހިނދު އޭނައަށް އިޙްޞާޞް ކުރެވުނީ ބަޔާންކުރަން ދަތި ހިތްހަމަޖެހުމެކެވެ. އޭނައަށް ރޮވެން ފެށީ ހިތާމަވެރިކަމާއި އުފާވެރިކަމެއްގެ ތެރޭގައެވެ. އުފާވީ އެތައް ދުވަހެއްފަހުން އޭނައަށް ﷲ ރުހިވޮޑިގެންވާފަދަ ކަމެއް ކުރެވޭތީވެއެވެ. ހިތާމަވެރިކަމުގެ ސަބަބަކަށްވީ މީގެ އިރުކޮޅެއް ކުރިއާއި ޚިލާފަށް އެއްގޮތަކަށް ވެސް އޭނައަށް ކުރިމަތިވެފައިވި އިމްތިޙާނެއްނޫނެވެ. އެ ހިތާމައިގެ ސަބަބަކަށްވީ އޭނަ އެތައް ދުވަހެއް ވަންދެން އޭނަދެކެ އެންމެ ބޮޑަށް ލޯބިވެވޮޑިގެންވާ ފަރާތުގެ ހަނދުމައިން ދުރުގައިވިކަމެވެ. އެ ހަނދުމައިން ދުރުވާން ޖެހުނީ އޭނައަށް ކުރިމަތިވި މުޞީބާތެކެވެ. އެހެންކަމުން އެ ނަމާދުގައި ކިޔަވަން އަފާފް ޚިޔާރު ކުރީ ބަޤަރާ ސޫރަތުގައި މުޞީބާތްތަކާއި ބެހޭގޮތުން އައިސްފައިވި އާޔަތްތަކެވެ. އެ އާޔަތްތައް ކިޔަވަމުން ދިޔައިރު އަފާފްގެ ލޮލުން މުޅިންވެސް އޮހެމުން ދިޔައީ އުފާވެރިކަމުގެ ކަރުނަތަކެވެ. މި މުޞީބާތުގެ ތެރެއިން ﷲ އެ އާޔަތްތަކުގައ ސިފަކުރައްވާފައިވާ މީހުންގެ ތެރެއިންވުމުގެ ފުރުޞަތެއް އޭނައަށް ލިބުނު ކަމަށްޓަކައެވެ. ހަމަ އިސާހިތަކު އޭނަގެ ލޯ ކުރިމަތިން ފެންނަމުން ދިޔަ އަނދިރިކަމަށްޓަކައި އަފާފަށް ޙަމްދު ކުރެވުނެވެ.

ނަމާދުކޮށް ސަލާމް ދިން ވަގުތު އަފާފްގެ މޫނުމަތީގައިވީ އުޖާލާވި ހިނިތުންވުމެކެވެ. އޭނައަށް ދެއަތް މައްޗަށް ނަގައި ކޮށްލެވުނީ އެންމެ ދުޢާއެކެވެ. އޭނަގެ ޙަޔާތުގައި ކޮންމެ ގޮތަކަށް ކަންތައްވިޔަސް ﷲ ހަނދުމަކުރުމަށްޓަކައި އޭނަގެ ހިތުގައި ޖޯޝެއް ލެއްވުމެވެ.

އެދުވަހުން ފެށިގެން ވެސް އަފާފްގެ އެ ދުޢާގެ އަސަރުތައް އޭނައަށް ފެންނަން ފެށިއެވެ. އޭނައަށް ދަސްވެފައިވާ ޒިކުރުތައް ކިޔަން ދުވަހަކުވެސް ހަނދާން ނައްތާނުލަން ޢަޒުމް ކަނޑައަޅައި ކޮންމެ ހަފްތާއަކު އާ ޒިކުރެއް ދަސްކުރަން އަފާފް ނިންމިއެވެ. އެ ޢަޒުމްތަކާއި އެއްގޮތަށް އޭނައަށް އުޅެވެން ވެސް އުޅެވުނެވެ. އޭނަ ހަމަ އެދުވަހު މުޅިން އާ ޖޯޝަކާއެކީ ޤުރުއާން ފަށައިގެން އަޑުއަހަން ފެށިއެވެ. އަދި އޭނައަށް މާނަ ދަސްނުވާ އާޔަތްތަކާއި ބެހޭ ލެކްޗަރުތައް އަޑުއަހަން ފެށިއެވެ.

މި ހުރިހާ ކަމެއްގެ ސަބަބުން އޭނައަށް ދަސްވަމުން ދިޔަ އެއްޗެހި ޙިއްޞާ ކުރުމަށް މުޅިން އާ ރޫޙެއް އަފާފްގެ ހިތުގައި އުފެދުނެވެ. މިގޮތުން އޭނަގެ ފޭސްބުކް ޕޭޖް އޭނަ އަމިއްލައަށް ނުހިންގޭނެތީ ބައްޕަގާތު އެދިގެން އޭނައަށް އެފަދަ ކުދިކުދި ކަންތައްތަކުގައި އެހީވެދޭނެ ކުއްޖަކު ހޯދައިދިނުމަށް އެދުނެވެ. ފައިހާ ކިޔާ ޒުވާން ކުއްޖަކު އަފާފްގެ އެހީތެރއެއްގެ ގޮތުގައިވީ ދުވަހުން ފެށިގެން އަފާފް މަސައްކަތް ފެށިއެވެ. އެންމެ ފުރަތަމަ ކަމަކަށްވެސް ފައިހާގެ އެހީގައި ބަދަލުކޮށްލީ އެ ޕޭޖުގެ ކަވާރ ފޮޓޯއެވެ. އެ ފޮޓޯއަށްލީ މިފަހަކަށް އަފާފްގެ ހިތަށް އެންމެ އަސަރު ފޯރުވި އާޔަތެވެ. އެއީ މާތް ﷲ އެކަލާނގެއަށް އީމާންވާ މީހުން އަނދިރީގެ ތެރެއިން އަލިކަމުގެ ތެރެއަށް ގެންނަވާކަމަށް ވަޙީކުރައްވާފައިވި އާޔަތެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.