އެހެނަސް ހަމަ ލޯތްބޭ ވެވެނީ (ދިހަވަނަބައި)

ރެހާން ރާއިންއާއެކުގަ ހިނގާފައި ގެޔަށް ދިޔައީ ދާމަގުމަތީގައި ތަޅުދަނޑި ނަގާނެކަމަށް ބުނަމުންނެވެ. ރާއިން ހީވަނީ ހިނގާފައި އުޅެންޖެހިގެން ޝަކުވާކުރާއިރުގަ ކުޑަކުއްޖެއްހެންނެވެ. އެހެންކަމުން ގެޔަށްވަނުމުގެ ކުރިން ރެހާން ދިޔައީ ތަޅުދަނޑި ބަލައެވެ. ގޭތެރަށް ދިޔައިރު ރީނާޒް ސިޓިންރޫމް ސޯފާގައި ވާހައެއް ހިފައިގެން އޮތެވެ.
“ދޮންބެ ތަޅުދަނޑި ބަލާ ދޯ ތިއައީ؟ ނާޒް ކޮޓަރި ސައިޑް ޓޭބަލް މަތީގަ އިންނާނެ. ގެނެސްދެންވީތަ؟ ” ކަމެއް ޖެހިގެންނޫނީ ރެހާން މިގެޔަށް ނުވަންނާނެކަން ރީނާޒްއަށް އެނގެއެވެ. ރެހާން އެނަގާނެކަމަށް ބުނަމުން ސިޑިޔާ ދިމާއަށް ހިނގައިގަތެވެ. ރެހާންގެ ކޮއްކޮ ވަރަށް ޝައުގުވެރިކަމާއެކީގައި ފޮތެއް ކިޔާލަން އޮތުމުން އޭނަޔަށް އުނދަގޫކުރާކަށް ރެހާން ބޭނުމެއް ނުވިއެވެ. ކޮޓަރިޔަށް ވަންނަން ދިޔަ ރެހާން މަޑުޖެހިލީ ދެމީހަކު ސިއްރުން ވާހަކަ ދައްކާ އަޑު އިވުމުންނެވެ. އާސިމާގެ ކޮޓަރީ ދޮރު ކުޑަކޮށް ހުޅުވިފައި ހުރުމުން ކިޔާއެއްޗެއް ތަންކޮޅެއް ސާފުކޮށް އަޑުއަހާލުމަށް ރެހާން ކައިރިވެލިއެވެ.
“ރަށަށް އައިއްސަ އެއްދުވަސް ވިއިރުވެއް ރެއިން އަހަންނަށް ފެނިވެސް ނުލާ. ގައިމު މިހާރު މިހުންނަނީ ރެއިންއަށް އެންމެ ކަމުދާގޮތަށް ބުރުގާވެސް އަޅައިގެނެއްނު، އަދިވެސް އެ ފުއްބަސްތާ މަތިން ހަނދާން ނައްތާލާކަށް ނުވޭތަ އޭނާ؟ ” ޖަނާން ވާހަކަ ދައްކަމުން ދިޔައިރު ކެއްމަދުވެފައި ވާވަރު އިނގެއެވެ. މިހުރިހާ ދުވަސް ވަންދެންވެސް ޖަނާން މަސައްކަތް ކުރަމުން އެދަނީ ރެހާން ކާމިޔަބު ކުރެވޭތޯއެވެ.
“ހަމަޖެހިބަލަ. ޖެނީއަށްވެސް އިނގެދޯ ރެއިން އެމަންޖެ ދެކެ ރުޅިއަންނަވަރު. ދެން ކީއްވެ އޭނަ ޖެނީއާ ނުގުޅެންވީ. އެ ބަސްތާގަނޑާ ބަލާފަ ޖެނީސް ހާސްބައި ރީތި. އެހެންނޫނަސް ޖެނީއަށް ހީވޭތަ އަހަރެންގެ އެ މޮޅު ޕްލެން ފަނުފުލުން ދިޔަދޭނެހެން. އަސްލު އަހަރެން ހިތަށް އަރަޔޭ ރެއިން ހާދަ ވިސްނުމެއް ނުހުރެޔޭ. ކުޑަކޮށް ވިސްނާލިނަމަވެސް އެނގޭނެދޯ އެކަހަލަ ސަޅި ފިރިހެނަކު ބަސްތާއަކާ ހިތާވެގެން ނޫޅެނެކަން” އާސިމާ ދިޔައީ ޖަނާންއަށް ވިސްނާދެމުންނެވެ.
” ދައްތަޔަށް އެކަނި ހުރިހާ ކްރެޑިޓެއް ނުލިބޭނެ. އެރޭ އަހަރެން ރެއިން ރަނގަޅަށް ވާވައްދާ ނުލިނަމަ އޭނަ ގެޔަށް ގެނައުންވެސް ވީހީ ބޮޑުކަމަކަށް. އަހަރެން ހީވެސް ނުކުރަމޭ ރެއިން އެހާ ފަސޭހައިން މަޅިގަ ޖެހޭނެ ކަމަކަށް.” ޖަނާން ވާހަކަ ދައްކަމުން ދިޔައީ ފަހުރުވެރިކަމާ އެކުގައެވެ
“އަސްލުވެސް ހަމަ އޮންޓައިމްއަށް ރެއިންއަށް އެތަނަށް އާދެވުނީ. އެ ފިރިހެން ކުއްޖާއަށް ކޮޓަރިން ނުކުމެވުނު ގަޑިއަށް. ނަސީބެއް ކައިކައިގެން އެމަންޖެވެސް ނިދަންމިޔަރެއްހެން ނިދާލާކަން.” އާސިމާ ދިޔައީ އެރޭގެ ހަނދާންތަށް އާކުރަމުންނެވެ.
“އާ ރެއިންއަށް ކިހިނެއް އިނގެނީ އެރޭގަ އެއްވެސް ކަމެއް ނުވާކަމެއް. އަހަރުމެން ދެއްކި މަންޒަރެއް ވިއްޔަ ރެއިންއަށް ފެންނާނީ. ބައްޕަ އެކްސިޑެންޓްވެސް ވީ އެކަން އިނގިގެން ރުޅިއައިސް ގެއިން ނުކުމެގެން ދިޔަ ފަހުން ކަމަށް ބުނުމުން އެހެން އެއްޗެއް ނުވެސް ވިސްނޭނެއެއްނު. ރެއިންއަށް ކިހިނެއް އިނގެނީ އަހަރެމެން އެހެން މޮޅު ވާހަކައެއް ހަދާލިޔަސް” ޖަނާން ހިނިގަނޑެއް ޖަހާލިއެވެ. އޭރު ރެހާންގެ ލޮލުން އަލިފާންކަނި ބުރައެވެ. ރުޅިއައިސްގެން އަތުންފައިން ގޯހެއް ނެހެދެނިސް އެގެއިން ނުކުމެގެންދާން ރެހާން ހިނގައިގަތެވެ. އެދެއަންހެނުންވެގެން ހަލާކުކޮއްލީ ކިތަށް މީހުންގެ ދިރިއުޅުންކަމެއްވެސް ނޭނގެއެެވެ. ޔަގީނަށްވެސް އެލިސްޓުގެ އެންމެ ކުރީގައި ރެހާންގެ ނަން ހިމެނޭނެއެވެ.
ގެޔަށް ވަދެގެން އައި ރެހާން ސިޓިންރޫމްގައި އިން ރާއިންއަށް ބަލާލުމެއްނެތި ދިޔަގޮތަށް ވަނި ކޮޓަރިއަށެވެ. ރުޅިއައިސްފައި ހުރުމުން އެ ރުޅި ކޮޓަރީގެ ދޮރަށް ބާލަނީއޭ ރާއިންގެ ހިތަށް އެރިއެވެ. ކޮންމެވެސް ބޮޑުކަމެއް ވީމަ ނޫނީ އޭނާ ގޮވީމަ އަޅާވެސްނުލާ ރެހާންއެއް ނުދާނެއެވެ. އެހެންކަމުން ރާއިން ތެދުވެގެންގޮސް ރެހާންގެ ކޮޓަރީގައި ޓަކިޖަހާ ގޮވާލިއެވެ. ރެހާން “ލީވް”އޭ ބުނިއަޑު ނޫން އެހެންއަޑެއް ނީވުނެވެ. އެއަޑުންވެސް ރުޅިއައިސްފައިވާ މިންވަރު ރާއިންއަށް ދެނެގަނެވުނެވެ. ރެހާން ހަމަޔަކަށްއެޅޭހާއިރު ކޮށްފައި ޒާމިން ގޮވައިގެން އައިސް ބައްދަލުކުރުމުން ފަހަރެއްގަ ކިޔާދީފާނެޔޭ ރާއިންގެ ހިތަށް އެރިއެވެ
” ހަލޯ ޒާމިން. މިރޭ ފްރީވިއްޔާ އަހަރުން ގެޔަށް ޖައްސާލަންވީނު. މުހިންމު ކަމަކު.” ރާއިންއަށް ފެނުނު އެންމެ ރަނގަޅު ގޮތަކީ ޒާމިންއާއެކުގަ ރެހާންކުރެން ވީގޮތް އޮޅުން ފިލުވުމެވެ. ޒާމިންވެސް އިޝާކޮއްގެން އަންނާނެކަމަށް އެއްބަސްވިއެވެ.
އިރުއޮއްސިގެން ދިޔައިރުވެސް ރެހާން ކޮޓަރިޔަކުން ނުނިކުމެއެވެ. ރާއިން ދެތިން ފަހަރު ކާން ގޮވުމުންވެސް ބަނޑުހައި ނުވާކަމަށްބުނެ ނުނިކުތީ ރާއިންއާ ކުރިމަތިލާން ބެނުން ނުވާތިއެވެ. އިޝާއަށް ބަންގިގޮވުމުން ރާއިން ނަމާދަށް ދިޔަކަން ޔަގިންވުމުން ރެހާންވެސް ނަމާދުކޮއްލައިގެން ބޭރަށް ނުކުތެވެ. އަމިއްލައަށް ކޮފީތައްޓެއް ހަދާލުމަށްފަހު ބަދިގެޔާވީ ފަރާތުން ހަދާފަ ހުންނަ ފެންޑާޔަށް ނުކުތެވެ. ހަނދުވަރުގެ ރިހިއަލިން މުޅިތަންވަނީ އަލިވެފައެވެ. ނަމަވެސް ރެހާންގެ ހަޔާތުގައިވަނީ ކަޅުފޮއި ރެޔެއްގެ އަނދިރިކަމެވެ. ދެއަންހެނަކު ވެގެން އޭނާގެ މުޅި ދިރިއުޅުމުގައި ހުޅު ޖަހައިފިއެވެ. އެހެންމީހުން ކިޔާހާ އެއްޗެއް ގަބުލުކުރުމުގެ ސަބަބުން ރެހާންއަށް ކުރެވުނީ މާފު ނުލިބޭވަރުގެ ކުށެކޭ އޭނަ ހިތަށް އެރިއެވެ. ލޮލަށްފެނުނު މަންޒަރެއްގެ ހަގީގަތް ބަލާނުލުމުގެ ސަބަބުން ރެހާންގެ އަތުން ހަލާކުވެގެން އެދިޔައީ ކުށެއްނެތް ކުއްޖެއްގެ ދިރިއުޅުމެވެ. އެވެސް ރެހާންގެ ހިތުން ޖާގައެއް ދިން ފުރަތަމަ ކުއްޖާއެވެ. އުމުރަށް އެކީގައި އުޅެން ވައުދުވީރު އެކަހަލަ ކަމެއް ދިމާވާނެޔޭ ރެހާންގެ ހިތަކަށް ނާރައެވެ. ރެހާންއަށް މި ވެވުނީ ކިހާ ބޮޑު ހިޔާނާތެއްހެއްޔެވެ؟ ބައްޕަޔަކު އޭނާގެ ދަރިފުޅު އަމާނެއްތެގެ ގޮތުގައި ހަވާލުކުރުމުން އެކުއްޖާޔާމެދު ކަންތަށް ކުރެވުނީ ކިހާ އިހާނެތިކޮށް ހެއްޔެވެ. އެދުވަހު އެންމެފަހަރަކުވެސް އޭނާގެ ވާހަކަ އަޑުއަހާލިނަމަ މިހެނެއްނުވީހެވެ.
ގޭތެރޭގެ އެތަންމިތަން ބަލަމުން ރާއިންމެން ދިޔައީ ރެހާންގެ ހިލަމެއް ނުވާތީއެވެ. ގޭތެރެއިން ރެހާން ނުފެނުުމުން ދެމީހުންވެސް އޭނަ ގޮސްދާނެ ތަނަކާމެދު ވިސްނިއެވެ. ރެހާންއަށް ފޯނުކުރަން ނިންމީ އެރުން ރެހާން ގެނެސްގެން އޭނަޔާ ވާހަކަ ދައްކަން ފަސޭހަވާނެތީއެވެ. ފޯނު ރިންގުވާ އަޑާދިމާއަށް ރާއިންމެން މަޑުމަޑުން ދިޔައެވެ. ބަދިގެފަރާތުން ބޭރަށް ނުކުމެވޭއިރު ހުންނަ ފެންޑާގެ ސޯފާގައި ރެހާން އެމީހުންނަށް ފުރަގަސްދީގެން އިންތަން ފެނުމުން ދެމީހުންވެސް ގޮސް ރެހާންގެ ދެފަރާތުގައި އިށީނެވެ. ހަދުވަރުގެ އަލިން މޫނުފެންނަވަރުވުމުން ރާއިންމެންނަށް ރެހާން އިންގޮތްފެނި ހައިރާންވިއެވެ. އުޅަނބޮށި ކަކުލުގައި ވިއްދާލައިގެން އިންއިރު ދެއްތުން މޫނު ވަނީ ފޮރުވާލައިގައެވެ. އިނގިލިގެ ކަރަވައިގެ ތެރެއިން ފައިބައިގެން އަންނަ ތާޒާ ކަރުނަތަށް ފެނުމުން ރެހާން ރޮނީކަން އެނގުނެވެ.
“ހެއި ބުރޯ ރޮނީތަ އަނެއްކާ. މަންމަޔަށް ކަމެއްވީތަ؟ ” ރެހާންފަދަ ބޮޑު ފިރިހެނެއް ކަރުނަ އަޅާރޯނީ ކޮންމެވެސް ބޮޑުކަމެއް ދިމާވީމަކަން ޒާމިންއަށް އިގުނެވެ. އަތުން ރަނގަޅަށް މޫނު ފޮހެލަމުން ރެހާން މޫނުން އަތްނެގީ ނުރޮމޭ ބުނަމުންނެވެ.
“ކަމެއް ވެއްޖެ އިނގޭ ބުރޯ. މިއަދު ތަޅުދަނޑި ހިފައިގެން އައިރަށް އަހަންނަށް އެނގިއްޖެ ކަމެއްވެފަ ހުރިކަން.އެގެއިން ވީކަމެއްވީ.. ކިހިނެއްތަވީ؟ ” ރާއިންވެސް އިނީ ދެރަވެފައެވެ. އޭނާ ރެހާން ދެކެނީ އާއިލާ މީހެއްގެ ގޮތުގައެވެ.
“ތެދެއް ވީގޮތް އަހަރުމެންނަށް ކިޔާދީބަލަ. އަހަންނަށް އެނގޭ ރެހާންގެ އަހަރެމެން ނޫންބަޔަކު ނެތްކަން. ކިޔާދިނީމަ ރެހާންއަށްވެސް ފަސޭހަ ވާނެ. ވީގޮތް އިނގުނީމަ ފަހަރުގަ އަހަރުމެންނަށްވެސް ހެލްޕެއް ވެވިދާވެ” ޒާމިންވެސް ބެނުންވި އޭނާގެ އެކުވެރިޔާއަށް ދިމާވެގެން އުޅޭ ކަމެއްގެ ހައްލު ހޯދައިދޭށެވެ.
” އެއްވެސް ކަމެއްގަ ހެލްޕެއް ނުވެވޭނެ. އިޓްސް ބިޔޯންޑް ރީޗް. އައި އޯލްރެޑި ރުއިންޑް މައި ލައިފް” ރެހާން ބުނެލިއިރި އެއަޑުގައި އެތަށްހާާސް އިހުސާސްތަކެއް އެކުލެވިގެން ވެއެވެ. އެ ދިރިއުޅުން އަނބުރާ ލިބޭނެކަމަކަށް އޭނާ ގަބޫލެއް ނުކުރެއެވެ. އެނާ ކޮށްފައިވަނީ މާފު ހައްގު ކުށެއް ނޫނެވެ.
“ކިޔާދިނީމަ ދޯ އިނގޭނީ. އަހަރުމެންނާ ޝެއާ ކޮއްލަނިކޮށް ލުޔެއްވެސް ލިބިދާނެ” ރާއިންވެސް ޒާމިންގެ ވާހަކަޔާ އެއްބަސްވެލިއެވެ. ރެހާން އޭނާގެ ހަޔާތުން އެތަކެއް ދުވަހެއްކުރިން ލައްޕާލެވިފައިވާ ޞަފްޙާތަށް އޭނާގެ އެކުވެރިންނަށް ކިޔައިދޭން ނިންމީ އެވާހަކަތަށް ހިއްސާކުރާނެ ފަރާތެއް ބޭނުންވެފައި އިންލެއް ބޮޑުކަމުންނެވެ. އެއިހުސާސްތަށް ބޭރު ނުކުރެވިއްޖެނަމަ އޭނާ މޮޔަ ވެދާނެއެވެ. ވާހަކަތަށް ކިޔައިދޭން ފެށުމުން ރެހާންއަށް ހީވި އޭނާގެ މާޒީ ސިފަވާހެންނެވެ.

6 އަހަރު ކުރި..
މަޑު ހިންގުމެއްގައި ޓާމިނަލްއިން ނުކުމެގެން ސަނާޝްއައީ ދަބަސްތަށް ލާފައިވާ ޓްރޮލީ ހިފައިގެންނެވެ. އޭރު ދުރުގައި އޭނާގެ ބައްޕަޔާއި އެކުގައި ބައްޕަގެ އެންމެގާތް އެކުވެރިޔާ އިމްރާން އޭނަބަލާ އައިސް ހުއްޓެވެ. އެމީހުންނަށް ލުއި ހިނިތުންވުމެއްދެމުން ސަނާޝް މަޑުމަޑުން ހިނގަމުން ދިޔައެވެ.
“އަހާ ބައްޕަގެ ރަންދޫނި ހާދަ ބޮޑުވެއްޖެޔެ ދޯ” ސަނާޝްގެ އަތުގައި ހިފާލަމުން ލަތީފު ބުންޔެވެ. ދުވަސްގަނޑަކަށްފަހު އޭނާގެ ދަރިފުޅު ފެނުނުއިރު އައިސްފައިވާ ބޮޑެތި ބަދަލުތަކުގެ ސަބަބު އޭނާޔަށް އިނގެޔެވެ. މަންމަޔަކާ ނުލައި ބޮޑުކުރި ދަރިފުޅަށް ފުރިހަމަ ހިމާޔަތެއް ދެވިފައި ނުވާތީ ލަތީފް ދެރަވެއެވެ. އެކަމަކު އެއީ އޭނާއަށް ބާރު ފޯރުވޭ ހިސާބެއްގައި ހިނގާދިޔަ ކަމެއްނަމަ އެކަން ހުއްޓުވުމަށް އޭނާގެ ފުރާނަވެސް ލަތީފު ގުރުބާން ކުރީހެވެ. އެކަމަށް ނުކުޅެދިފައިވާ ލަތީފު މިއަދު ބޭނުންވަނީ އޭނާގެ ދަރިފުޅަށް އުފާވެރި ހަޔާތެއް ހޯދައި ދިނުމެވެ.
“ސަނާޝް ދަރިފުޅު އެބުނާހެން ހާދަ ބޮޑޭ މިހާރު. ހުރިހާކަމެއް ރަނގަޅުދޯ؟” އިމްރާން ސަނާޝް ދެކެނީ އޭނާގެ އަމިއްލަ ދަރިއެއްގެ ގޮތުގައެވެ. ސަނާޝްވެސް އާއެކޭ ބުނުމުގެ ގޮތުން ބޯޖަހާލިއެވެ. އިމްރާ އޭނާ ވަރަށް އިހްތިރާމް ކުރާމީހެކެވެ. ބައްޕަގެ ރަހުމަތްތެރިން ތިބިނަމަވެސް މިހާ ހިތްހެޔޮ މީހަކު އޭނާ ނުދެެކެއެވެ. މާލޭގެ މުއްސަނދި މީހަކު ރަށްފުށުގެ އާދައިގެ މަސްވެރިޔަކާ ދެމެދު އެއޮންނަ އެކުވެރިކަމަކީ މުޅި ދުނިޔެއަށް ނަމޫނާއެއްފަދަ އެކުވެރިކަމެއްކަން ސަނާޝް ގަބޫލުކުރެއެވެ. މާގިނަ ވާހަކަތަކެއް ދެއްކުމެއްނެތި ގެޔަށްދިޔުމަށް ކާރަށް އެރީ ސަނާޝް ވަރުބަލިވާނެކަން އެނގޭތީއެވެ.
އިމްރާނާއި ލަތީފު ދިމާވެފައިވަނީ މީގެ އަހަރުތަކެއް ކުރިން އައިޖީ އެމްއެޗުންނެވެ. ދެމީހުންގެވެސް އަންހެނުން ވިހަން ވެއްދީ އެކުއެކީގައި ކަމަށް ވުމުން އެތަނުން އެމީހުންގެ ރަހުމަތްތެރިކަން ފެށުނެވެ. ލަތީފު ކަހަލަ އާދައިގެ މީހަކު އަންހެނުން ވިއްސަން މާލެ ގެންނަން ޖެހުނި ރަށު ސިއްހީމަރުކަޒުން ކުއްޖާގެ ހާލަތު މާ ރަނގަޅު ނޫންކަމަށް އެންގުމުންނެވެ. އެކަނިމާއެކަނި ބޮޑު ހޮސްޕިޓަލްތެރޭގައި އުޅެންޖެހުނު ލަތީފަށް އިމަރާންފަދަ ވާހަކަ ދައްކާލާނެ އެކުވެރިއެއް ލިބުމުން އުފާވިއެވެ. ދެމީހުންވެސް ލިބެން އުޅެ ކުއްޖާއާބެހޭ ގޮތުން ވާހަކަ ދައްކަމުން ދިޔައެވެ. އިމްރާންގެ ދެވަނަ ދަރިފުޅުކަމުގައި ވިޔަސް ލަތީފުގެ ފުރަތަމަ ކުއްޖާކަމަށްވުމުން ބައްޕައަކަށް ވުމުން ކުރެވޭ އިހްސާސްތަށް އިމްރާން ކިޔައިދެމުން ދިޔައެެވެ. ދެމީހުންގެ އެކުވެރިކަން އިތުރަށް ލާމެހިގެން ދިޔައީ ލަތިފް ކޮށްދިން ހެޔޮއަމަލުގެ ސަބަބުންނެވެ. އިމްރާންގެ އަންހެނުންގެ ފުރާނަޔަށް ނުރައްކާވިހިނދު ލޭ ބޭނުންވެގެން ބުނުމުން ލޭހަދިޔާކުރަން ލަތީފް ފަހެއް ނުޖެހުނެވެ. އޭނާގެ އަންހެނުން ވިހަން ވައްދާފައި ވިނަމަވެސް ލަތީފް އެވަގުތު މުހިންމު ކަމުގައި ދެކުނީ ލޭހަދިޔާ ކުރުމެވެ. ލަތީފުގެ ހެޔޮ އަމަލުގެ ސަބަބުން އިމްރާންގެ އަންހެނުންގެ ފުރާނަ ސަލާމަތް ވިއެވެ. ނަމަވެސް އެވީވަގުތުކޮޅު ތެރޭގައި އޭނާގެ މުޅި ހަޔާތަށް ބޮޑު ހުސްކަމެއްއަޔެވެ. ލަތީފުގެ އަންހެނުން ވިހެއުމަށްފަހު މަރުވީ ލޭ މަދުވެގެންނެވެ. އެވަގުތު ލަތީފް އިމްރާނަށް އެހީނުވެ އަންހެނުން ގާތުގައި މަޑުކުރިނަމަ އެހެނެއް ނުވީހެވެ. ލަތީފުގެ މިހިތާމައިގައި އިމްރާން ބައިވެރިވިއެވެ. ލަތީފަކީ އަބަދުވެސް އޭނާގެ ނަޒަރުގަ މާތް މީހަކަށް ވެގެން ދިޔައެވެ. ލަތީފްވީ ގުރުބާނީގެ ބަދަލުގައި އޭނާގެ އަންހެން ދަރިފުޅަށް ފަހި މުސްތަގުބަލެއް ހޯދައިދިނުމަށް ވެދެވެން ހުރިހުރިހާ ކަމެއް ކޮށްދިނުމަށް އިމްރާން ވައުދުވިއެވެ.
ބޮޑު ބިލްޑިންއެއްގެ ކުރިމައްޗަށް ކާރު ހުއްޓާލުމުން ސަނާޝް ބޭރުބަލާލިއެވެ. ބައްޕައަށްޓަކައި މާލެ އައިކަމުގައި ވިޔަސް މިތަނަށް އޭނާގެ އެއްވެސް ޝައުގުވެރިކަމެއް ނެތެވެ. ނަމަވެސް ބައްޕަގެ އެދުމުގައި ކޮޅުފައިން ޖަހަން ނުކެރުނީއެވެ. އިމްރާންބެގެ ހެޔޮކަމުގެ ބަދަލު އެގޮތަށް އަދާކުރަން އޭނަ ބޭނުން ނުވީއެވެ. އިމްރާންބެ އެވަރުގެ ބޮޑުހަރަދެއް ނުކުރިނަމަ ސަނާޝްކަހަލަ ކުއްޖަކަށް ކިޔެވުމަށް އެފަދަ ފުރުސަތެއް ނުލިބެނެއެވެ. އެހެންކަމުން ސަނާޝް ނިންމީ އިމްރާންގެ ދަރިފުޅާ ކައިވެނި ކުރާށެވެ. އެއީ ބައްޕަގެވެސް އެދުމަކަށް ވާތީއެވެ. އެކައިވެނިން އެނާ ހިމާޔަތްތެރިކަން ނޫން އެހެންކަމެއް ބޭނުމެއް ނޫނެވެ. އަދި އިމަރާންބެގެ ވާހަކަ ހުރިގޮތުން އެބުނާ ދަރިފުޅަކީވެސް ދިރި އުޅުމެއް ފަށަން މާބޮޑު ޝައުގުވެރިކަން ހުރި ކުއްޖެއް ނޫންކަން އެނގެޔެވެ. މިހާ ދުވަސްވެގެން ދިޔައިރުވެސް އެ ހިތް ހުސްކޮއް އޮތުމުގެ ސިއްރަކި އެޔޭ ސަނާޝް ހިތާހިތުން ކިޔާލިއެވެ. ޢިމްރާންގެ ދަރިފުޅުގެ ފަރާތުން ސަނާޝްއަށް ބޭނުންވާ ހިމާޔަތް ލިބިގެންދާނެކަމުގެ ގެރެންޓީ ދިނެވެ. އިމްރާންވެސް ބޭނުންވަނީ ސަނާޝްއަށް ދިމާވެފައިވާ ކަންކަމުގެ ސަބަބުން އޭނަޔަށް ރަނގަޅު ފިރިޔަކު ހޯދައިދިނުމެވެ. އެމަގާމަށް އޭނާގެ ދަރިފުޅަށްވުރެ އިތުބާރުކުރެވޭނެ ދެވަނަ މީހަކު ނުހުންނާނެއެވެ. އިމްރާންގެ ދަރިފުޅުވެސް އެކައިވެންޏަށް އެއްބަސް ވުމުން އޭނަހުރީ ވަރަށް އުފަލުންނެވެ.

ސޯފާގައި އިށީނދެގެންއިން ސަނާޝްއިނީ ފިނިވެފައެވެ. މިއީ އޭނާގެ ވާންއުޅޭފިރިމީހާއާ ބައްދަލުވާނެ ފުރަތަމަ ފަހަރުކަމަށް ވުމުން ބަޔާންކުރަން ނޭނގޭފަދަ އިހްސާސް ތަކެއް ކުރެވެމުން ދެއެެވެ. އިސްޖަހާލައިގެން އިން ސަނާޝްއަށް އެތާގައި މީހަކު މަޑުކޮއްލިކަންވެސް ނޭނގުނެވެ.
” ދަރިފުޅާ. މީ ސަނާޝް. ވަރަށް ބަސްއަހާ ރަނގަޅުކުއްޖެއް. ސަނާޝް މީ ބޭބެގެ އެންމެ ލޯބިވާ ދަރިފުޅު ރެއިން.” ފުރިހަމަނަމާއެކު ތައާރަފްކޮއްދިންނަމަވެސް ސަނާޝްއަށް އަޑުއިވުނީ ރެއިންއޭ ބުނި ހިސާބަށެވެ. އިސްއުފުލާ ބަލާލި ސަނާޝް އިނީ ކަޅިޖަހާލަންވެސް ނޭނގިފައެވެ. ކުރިމައްޗަށް ވާގޮތަށް ހުއްޓިލައިގެން ހުރި އިސްކޮޅުންދިގު ބައިމަތި ފުޅާ ޒުވާނެކެވެ. ހުދު ގަމީހަކާ ކަޅު ފަޓުލޫނެއްގައި ބެގީކޮއްލައިގެން ހުރުމުން ހީވަނީ އޮފީހައްދާން ތައްޔާރުވެގެން ހުރިހެންނެވެ. ތުނިކޮށް ކޮށާފައިވާތުނބުޅިންނާއި ޒަމާނާއެންމެ ގުޅެނެގޮތަށް ކޮށާލައިފާ އިސްތަށިގަނޑުން ފެޝަނަށް ލޯބިކުރާ ޒުވާނެއްކަން ފާޅުވެއެވެ.
“ހައި ސަނާޝް. ރަނގަޅުތަ؟” ރެހާން ހިނިތުންވެލަމުން ސަލާމަށް އަދިއްކޮއްލިއެވެ. ބޯޖަހާލަމުން ސަނާޝް އަށްވެސް ހިނިތުންވެލެވުނެވެ. ބައްޕަ އޭނަޔަށްޓަކާ ހޮވާފައި މިހުރީ ކޮންކަހަލަ އަންހެން ކުއްޖެއްބާއޭ ރެހާންގެ ހިތަށް އެރިއެވެ. ފުރަތަމަ ދުވަހުވެސް ލޮލުން އޭނާ ކައިލައިފިއެވެ. ކުޑަކޮށް ފަލަކޮށް ހުއްޓަސް ބަލައިލާކަށް ހުތުރެއް ނޫނެވެ. ރެހާންއަށް ބޮޑަށް ސަނާޝް ސިފަވީ ކުޑަކުއްޖެއްހެންނެވެ. ބަޓާކްރީމްކުލައިގެ ބޮޑުދެލޮލުން ބަލަހައްޓައިގެން ހުރި ގޮތުންވެސް ސަނާޝްގެ މައުސޫމްކަން ދެނެގަނެވެއެެވެ. މިގަޑިގައި މަޑުކޮއްލެވެން ނެތުމުން އެންމެންގެ ކިބައިން މާފަށް އެދެމުން ރެހާން ދިޔައެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.