ލޯބިވަން………(ދެވަނަބައި)

އެއްމިޔަކަމުން ހީލަމުން ދަބަސްއަޅުވާލަމުން ބޭރަށް ނިކުތް މުލައިލްގެ ލޮލުގައި ރީތިވެލައިގެން ހުރި ޔާނީ އަޅައިގަތެވެ. ކަޅުކުލައިގެ ސްކަރޓާއެކު ފެހި ގަމީހުގެ އަޑިން މުލައިލްފަދައިން ކަޅުކޯޓެއް ލުމަށްފަހު ހަމަ އެފަދަ ޓައީއެއްވެސް އަޅާފައި އޮތެވެ. އެދިގު އިސްތަށިގަނޑު ރީތި ގޮތަކަށް ގަތާލެވިފައިވީއިރު ޔާނީފެންނަނީ ވަރަށް ތާޒާކޮށެވެ. “ކޮން ވަހެއް އެދުވަނީ؟ ޗީ ޗީ…ޔާނީ..ކޮންކަހަލަސެންޓެއްތަ ސްކޫލަށް ދާއިރު ދެން ތި ޖެހީ..ބްލެހް” މުލައިލް ދިޔަ ގޮތަށްގޮސް ޔާނީއާ ބެހިލިއެވެ. ނަމަވެސް މުލައިލްގެ އަޑުވެސް އެހުމެއްނެތި ޔާނީ ނިކުތީ ބޭރަށެވެ.

“ހޭއި. ރުޅި އައިތަ؟ ސޮރީ ސިސް” ޔާނީގެ ފަހަތުން ނިކުތް މުލައިލް މައާފަށް އެދުނެވެ. “ހެހެ.. އެ މޮޔަގަނޑާ. ތި އަނގައިން ނިކުންނަ ބޭކާރު ބަހަކާ ހެދި ދެރައެއް ނުވާނެ އިނގޭ. އަސްލު ވަރަށް ނާވަސް. އޭލެވެލް ގެ ފުރަތަމަ ދުވަސް ވީމަ. ސެކަންޑްރީ ކިޔެވީ އެތަނުން ކަމަށް ވިޔަސް ވަރަށް ހާސްވޭ އެބަ އަނެއްކާވެސް.” އެހެން ބުނުމާއެކު މުލައިލް އެކި އެކި މަޖާވާހަކަ ކިޔާދީ ޔާނީ ހެއްވާލިއެވެ. ޔާނީ ހެއްވާލެވުމުން މުލައިލްވެސް ހިނިތުންވެލުމަށްފަހު ޔާނީގެ އަތުގައި ހިފާލައިގެން ސްކޫލާ ދިމާއަށް ހިނގައިގަތެވެ.

ލާލީ އިންޓާރނޭޝަނަލް ސްކޫލުގެ ދޮރުމަތީ ހުއްޓިލައިގެން ތިބި މުލައިލް އަދި ޔާނީއަށް ގިނަބައެއްގެ ނަޒަރު ހުއްޓެމުން ދިޔައީ ޔާނީއަކީ ފާއިތުވި އަހަރުގައިވެސް މުޅި ސްކޫލަށް ރީތި ނަން ހޯދައިދީ މުޅި ސްކޫލަށްވެސް މަޝްހޫރު ކުއްޖެކެވެ. އަދި މުލައިލް އަކީ އާ ކުއްޖެއްކަމުން ނާ ދެމީހުން ތިބީ އަތުގައި ހިފާލައިގެން ކަމުން ބަލަމުން ދާ މީހުންވެސް މަދެއް ނޫނެވެ.

މުޅި ސްކޫލުގައި ލެވިފައިވަނީ ފެހިކުލަޔާއި އަޅިކުލައެވެ. ގޭޓުގެ އެތެރެއިން ފެންނަމުން ދިޔައީ ދެ ޖިންސުގެ ކުދިން މަސްހުނިވެގެން އުޅެމުން ދިޔަ މަންޒަރެވެ. މުލައިލްއަށް ސިފަވީ ބޭރުގައި އޭނާ ކިޔަވަން އުޅުން އިރުގެ ސްކޫލު މަތިންނެވެ. “ޔާނީ. މިހާރު މާލޭގެ ސްކޫލުތައް ހީވަނީ ހަމަ ބޭރު ހެން ދޯ. އެއްވެސް މައްސަލައެއް ނޫންދޯ މިހެން އަތުހިފައިގެން އުޅުމަކީ.” ހައިރާންވެފައި ހުރި މުލައިލް އަހާލިއެވެ.

“ހްމް. އަސްލު އެހާ ކަމަކު ނުދޭ ދެން މިހާރު މާ ކޫލްވެގެން އުޅޭތީ. ދެން ބޭރުގެ ގޮތަށް ލޮކާޔާ އެއްޗެހިވެސް ހުރޭ. ހަމަ ބޭރުގެ ހައި ސްކޫލެއްހެން ކަންކަން އޮންނަނީ. ދެން އަނެއްކަމަކީ އެއްވެސް ބޮޑު ގަވައިދެއްވެސް ނޯވޭ. ދެން އިނގޭނު. މިހާރުގެ ހާލަތު. ގްރޭޑް އަށަކުން ފެށިގެން ބާރަޔަށް މިތާ ކިޔަވަދެނީ. އިތުރު ސުވާލެއް؟” ޔާނީ ވަރަށް ތަފްސީލުކޮށް ކިޔާދިނުމަށްފަހު އޮޅުން އަރާ އިތުރު ކަމެއް އޮތްތޯ އަހާލިއެވެ. ހީލަމުން ކުރިންރޭވެސް ޖެއްސި އެކްޓް ޖެއްސުމަށް އެދެމުން ދެމީހުން އެކުގައި ކްލާހާ ދިމާއަށް ހިނގައި ގަތެވެ. ޔާނީ ކްލާހަށް ވަނުމާއެކު މުލައިލް މަތީ ފްލޯއަށް މިސްރާބުޖެހީ ގްރޭޑް ބާރައިގެ ކުދިންނަށް ހާއްސަކުރެވިފައިވާ ފަންގިފިލާ ހުންނަނީ މަތީގައިކަމަށް ވާތީއެވެ.

ޔާނީ ކްލާހަށް ވަނުމަށްފަހު ހަމްނާ އަދި ލީނާ ގާތުގައި ގޮސް އިށީނެވެ. “އޭ އެއްކަލަ ސޮރު ދޯ އެއީ. މި ސްކޫލަށް ދޯ އެންމެ ފަހުން ޖޮއިން ކުރީ. ހުވާ އޭނަ ހާދަ ރީއްޗޭ.” ހަމްނާ އެހެން ބުނެލުމާއެކު ޔާނީއަށް ހެވުނެވެ. ނަމަވެސް ނުވާކަމަށް ހަދާލުމަށްފަހު މަޑުމަޑުން ކްލާސްތެރެއަށް ނަޒަރު ހިންގާލިއެވެ. މުޅިންވެސް މިދިޔައަހަރު އޭނާއާއެކު އޯލެވެލް ހެދި އެކުވެރިންނެވެ. ނަމަވެސް ކްލާހުގެ ކަނެއްގައި ވަރަށް އެކަނިވެރި ކޮށް އިން ކުއްޖެއް ފެނުމާއެކު ޔާނީ އެދިމާއަށް ހިނގައިގަތެވެ. “ހޭއި. އެމް ޔާނީ.ތީ؟” ސަލާމަށް އަތް ދިއްކޮށްލަމުން ޔާނީ އެނުދަންނަ އަންހެން ކުއްޖާއަށް ގޮވާލިއެވެ.

ފޮތެއްގައި ކުރަހަމުން ދިޔަ އެނުދަންނަ ކުއްޖާ ހީލަމުން ޔާނީއާއި ސަލާމް ކޮށްލިއެވެ. “ހޭއި. އެމް ޔާނިލާ. ގާތް މީހުން ކިޔަނީ ޔާނީ.ހެހެ. އެކަމް ޔޫ ކޭން ކޯލް މީ ނިލް.” ހީލަމުން އެކުއްޖާ އެހެންބުނެލުމާއެކު ޔާނީވެސް ހޭންފެއްޓީ ދެމީހުންނަށް އެއްނަމެއް ކިޔާތީއެވެ. ފުރަތަމަ ގަޑިފެށިގެން ދިޔައިރުވެސް ޔާނީ އަދި ޔާނިލާ ތިބީ ގާތުގައެވެ. ދެމީހުން ތަފާތު ވާހަތަށް ހިއްސާކުރަމުން ދިޔައީ ބީރައްޓެހިކަން ފިލުވާލުމަށެވެ. ނަމަވެސް ޔާނީއާ ހިލާފަށް ޔާނިލާއަކީ ބަސްމަދު، މަޑުމައިތިރި ކުއްޖެކެވެ. ގިނަފަހަރަށް ހިނިތުންވުމަކުން ފުއްދާލާއިރު އެ މޫނުމަތިން ފެންނަނީ މަޑުމޮޅިކަމެވެ. އެންމެ ފުރަތަމަ އައި ޓީޗަރު ކިޔަވަދޭން ފެށުމާއެކު ޔާނީވެސް ފޮތެއްނަގާ ލިޔަން ފެއްޓިއެވެ.އަދި ރަނގަޅަށް ޔާނިލާއަށް ބަލާލިއެވެ. އޮޅަލި ކުލައެއްގެ ހަންގަނޑެކެވެ. ކަނދުރާއާ ހިސާބަށް އަރާ ފަން އިސްތަށިގަނޑެވެ. ދިހުން އަރަމުން ދިޔަ އިސްތަށިގަނޑުގެ އިތުރަށް އެރީތި ކުއްޖާ ފުރިހަމަކޮށްދެނީ އެދިގު ބޯ އެސްފިޔަ ތަކުންނާ ފިޔާތޮށިކުލައިގެ ތުންފަތެވެ. ރީތި ކުއްޖެކެވެ. ނަމަވެސް ޔާނީއަށް އެކުއްޖާގެ މޫނުމަތިން ފެނުނީ ހިތާމައެވެ. ޔާނިލާއަށް ބަލަމުން ދިޔަ ޔާނީ ސިއްސައިގެން ދިޔައީ ކުއްޖަކު ސަލާމް ގޮވާލި އަޑަށެވެ.

“ސޮރީ ސާރ. އަޅުގަނޑުގެ ފުރަތަމަ ދުވަސްމީ. އެކަމްވެސް ލަސްވީ. ފްލައިޓް ޑިލޭވީ. ސޮރީ. ބަޓް އެކްސް ކިއުޒްމީ.” އެކުއްޖާ ކަންފަތްކާރިއަށް ލައްވާފައިވާ އިސްތަށިކޮޅު ރީތިކޮށްލަމުން ބުނެލިއެވެ. އެވަގުތު ކްލާހުގައި އެންމެ އަނގަގަދަ އަދި އަޑުގަދަ ނިޔަމް ތުނބުންފުމެލިއަޑު މުޅި ކްލާހުގައިގުގުމާލިއެވެ. ކިޔަވައިދޭން ހުރި ދިވެހި ޓީޗަރު ހީލަމުން ކްލާހަށް ވަނުމަށް އެދުމަށްފަހު އެކުއްޖާގެ ނަން އަހާލިއެވެ. “އަލާނިޔާ” ނަން ބުނެލުމުން އޭނާ ގޮނޑީގައި އިށީނދެ ހަމަޖެހިލިއެވެ. އެޔާއެކު ޕްރެޒެންޓޭޝަން ކިޔަދޭން ފެށުމާއެކު ހުރިހާ ކުދިންވެސް ފިލާފަޅައިގެން އުޅެންފެށިއެވެ.

މުލައިލްމެންގެ ކްލާސްވީ ވަރަށްވެސް މަޖާ ކްލާހަކަށެވެ. އެންމެ ފުރަތަމަ ގަޑީގައި އޮތީ ފިޒިކްސް ކަމުން ޓީޗަރު އުޅުނީ ކުދިންގެ ހާލުއަހުވާލު އޮޅުންފިލުވުމުގައެވެ. ފަހަރަކު ކުއްޖެއްގެ ނަން އަހަމުން ގޮސް އެންމެ ފަހުން މުލައިލްގެ ނަން އަހާލިއެވެ. މިއީ އިނގިރޭސިން ވާހަކަ ދައްކާ ގަޑިއެއްކަން ނަސީބެކޭ މުލައިގެ ހިތަށް އެރިއެވެ. އަވަސް އަވަހަށް ކޮޅަށް ތެދުވަމުން މުލައިލް އިނގިރޭސިން ވާހަކަ ދައްކަން ފެއްޓިއެވެ. ހަމަ ހީވަނީ ބޭރު ކުއްޖެއްހެނެވެ. “އަހަރެންގެ ނަމަކީ މުލައިލް. ކުރިން ކިޔެވީ ލަންޑަން އިންކް ހައިސްކޫލްގަ. ތިމީހުން އަހަންނަށް އެލް ކިޔަސް އެންމެ ރަނގަޅު.” މުލައިލް ހީލަމުން އިށީނެވެ. އޭރު ހައިރާންވެފައި ހުރިހާކުދިންވެސް ދިޔައީ މުލައިލްއާ ދިމާއަށް ބަލަމުންނެވެ.  މުލައިލްއާ ޖެހިގެން އިން ޝާމިލް ވެސްމެއެވެ. އަދި މަޑުމަޑުން މުލައިލް އާދިމާއަށް އަންހެން ކުދިންތައް ބަލަމުންދާކަމަށް ބުނެލުމުން މުލައިލް ވެސް ޝާމިލްގެ ވާހަކައިގައި ބައިވެރި ވުމުގެ ގޮތުން ބޯހަހާލިއެވެ. ކިޔެވުން ފެށިގެން ދިޔުމާއެކު އެކިކުދިންގެ ހުރި މޮޅުކަމާ ގާބިލުކަން މުލައިލްއަށް ފާހަގަ ވަމުން ދިޔައެވެ. ސަކަރާތްބޮޑު އެހެނަސް މޮޅު ކްލާހެކެވެ.

ފުރަތަމް ތިން ގަޑިއަށްފަހު ދެން އޮތީ ބްރޭކް ގަޑިކަމުން އެއްބަޔަކު ދިޔައީ ގެޔަށެވެ. ނުވަތަ ރެސްޓޯރެންޓަކަށެވެ. ނަމަވެސް ޝާމިލް މުލައިލް ގާތުބުނެފައިވަނީ އެމީހުން އަބަދުވެސް ކެންޓީނަށް ދާކަމަށެވެ. އެހެންކަމުން ދެކުދިން އެއްކޮށް ކެންޓީނަށް ވަތްއިރު ޔާނީގެ އިތުރުން ހަމްނާ އަދި ލީނާވެސް މޭޒެއްގެ ދަށުގައި ތިއްބެވެ. އަދި ހަމައެހެންމެ ކުރިން ނުދެކޭ ކުއްޖެއްވެސް އެމީހުންގާތުއިނެވެ. ނަމަވެސް އިސްޖަހައިގެން އިނުމުން ރަނގަޅަށް ފެންނަގޮތެއް ނުވިއެވެ. ބާރގާއެއް ގަނެލައިގެން މުލައިލްމެން ގޮސް ޔާނީމެންގާތު ހަމަޖެހިލިއެވެ. “ހެއި. އިއްލު. މީޓް އަވާ ނިއު ފްރެންޑް. ޔާނިލާ” އެޔާއެކު އެކުއްޖާ އިސްއުފުލާ މުލައިލްއާ ދިމާއަށް ބަލާލަމުން ފުރިހަމަ ހިނިތުންވުމެއް ރައްދުކޮށްލިއެވެ. ފެނުނު މަންޒަރުން މުލައިލްގެ ފައިދަށުން ބިންގަނޑު ދެމިގެންދިޔަފަދައެވެ.

މުޅި ގަޑި ނިމިގެން ދިޔައިރުވެސް މުލައިލްގެ މިޒާޖަކަށް ބަދަލެއް ނާދެއެވެ. ޔާނީވެސް ހީކުރީ ފުރަތަމަ ދުވަސް ވީމަ ވީގޮތެއް ކަމަށެވެ. ނަމަވެސް ހަގީގަތަކީ މުލައިލްގެ ސިކުނޑި ފުރި ބާރުވެފައި ވާކަމެވެ. އެތާ ދައްކަމުން ދިޔަ އެއްވެސް ވާހަކައެއް އޭނާއަށް އަޑު ނީވޭކަމެވެ. ގަޑި ނިމުނުކަން އަނގައިދޭ ބެލް ޖެހުމާއެކު އެމީހަކު އެމީހެއްގެ ކްލާހަށް ދާން މިސްރާބު ޖެހީ ގަޑިއަށް ކްލާހަށް ވަންނާށެވެ. ޖެހިގެން އައި އެއްވެސް ގަޑިއެއްގައި މުލައިލްއަކަށް ކިޔެވުމަކަށް ސަމާލުކަމެއް ނުދެވުނެވެ. އެހެންކަމުން ސްކޫލު ނިމުމާއެކު ޔާނީ ހޯދައިގެން ބޮލުގައި ރިއްސަނީކަމަށް ބުނެ އަވަހަށް ގެޔަށް ދާން އެދުނެވެ. ދެމީހުން އެކުގައި ނިކުމެގެން ދަނިކޮށް ވަރަށް ބާރަށް ކުއްޖަކު ގޮވާލިއެވެ. “އެލްލް” އެވަގުރު ދުވެފައި ކަހަލަ ގޮތަކަށް އަލާނިޔާ އެދިމާއަށް އާދެއެވެ. “ހޭއި. ވަރަށް އަޑުއަހައިފިން ތި އާކުއްޖާގެ ވާހަކަ. މީ އަލާނިޔާ. ފްރެންޑްސް.”

އަލާނިޔާ ފަރިތަކަމާއެކު އިނގިރޭސިން ބުނެލިއެވެ. މުލައިލް ހީލަމުން އާނ އެކޭ ބުނެލުމަށްފަހު ދަނީކަމަށްބުނެ ޔާނީގެ އަތުގައި ހިފައިގެން ހިނގައިގަތެވެ. އޭރު އަލާނިޔާ އަނގަ ނަގައިގެން އެހުރި ގޮތަށް ހުއްޓެވެ. “އަހަރެން ހަމަ އެހާ މަޝްހޫރުތަ؟” މުލައިލް ވައްތަރެއް ޖައްސާލަމުން އަހާލިއެވެ. އެޔާއެކު ހިނިގަނޑެއް ޖަހާލަމުން އެއީ ލީނާމެންގެ ކަމެއް ކަމަށް ބުންޏެވެ. މުލައިލްވެސް ކްލާހުގައި ވީކަންކަން ހިއްސާކުރަމުން ސަކަރާތް ޖަހަމުން ދިޔައީ ސިކުނޑިއަށް ލުޔެއް ލިބޭތޯއެވެ. ކަން ވީވެސް އެހެނެވެ. ޔާނީގެ ސަބަބުން އޭނާގެ އެތެރެހަށީގައި ހަލަބޮލި ވަމުން ދިޔަ ހިތާ ސިކުނޑިއަށް ހަމަޖެހުމެއް ލިބުނެވެ. ނަމަވެސް އެއީ ވަގުތީ ހަމަޖެހުމެއްކަން ހުދު މުލައިލްއަށްވެސް އިނގެއެވެ. ގެޔަށް ވަނުމާއެކު ޔާނީ ފެންވަރަން ދަނީކަމަށް ބުނެ ދިޔައެވެ. މުލައިލްވެސް ލަސް ފިޔަވަޅު ތަކެއް އަޅަމުންގޮސް ކޮޓަރިއަށް ވަނެވެ. އަދި އެއްކަލަ ތަންވިރު ނަގާ ބަލާލިއެވެ. އެއީ ހަމަ އެ މޫނެވެ. އެ އިސްތަށިގަނޑާ އެތުންފަތެވެ. ޔާނީލާ އަކީ ކާކުބާވައެވެ.؟

އެތަސްވީރު ބާއްވާލުމަށްފަހު ދެން މުލައިލް ވިސްނަން ފެށީ ފަހުން ދިމާވި ކުއްޖާއާ މެދުގައެވެ. އޭނާގެ ނަމަކީ އަލާނިޔާކަން އިނގުނީއްސުރެ މުލައިލްގެ ހިތް ބިރު ގަންނަނީ އެވެ. އެ ނަމަކީ ދެން ދުވަހަކުވެސް އަޑުއިވޭނެނަމެއް ނޫންކަމަށް ހީކޮށްގެން ހުރި މުލައިލް އަނެއްކާވެސް ހައިރާން ކޮށްލައިފިއެވެ. މީ ކޮން ކަންތައްގަނޑެއް ބާވައެވެ؟ އެއްކޮޅުން އެތަސްވީރެވެ. އަނެއްކޮޅުން އަލާނިޔާ ނަމަކަށް ކިޔާ އެނުދަންނަ އަންހެން ކުއްޖާއެވެ. މުލައިލް ރާއްޖެ އައުމަށް ނިންމި ނިންމުމަކީ ރަނގަޅު ނިންމުމެއްބާވައެވެ؟ ނޫނީ މިއީ ކުރިޔަށް އޮތް ނުރައްކަލަސް ތައްޔާރުވުމަށް ދިން ފެހި ސިގްނަލެއް ބާވައެވެ؟  އެއޮތްގޮތަށްއޮވެ މުލައިލްއަށް ނިދުނީ ސުވާލުމާކެއްގެ ތެރެއަށް އޭނާ ގަންބާލާފައެވެ.

***************************************************************

މުލައިލްގެ ދުވުމަކަށް ބަދަލެއް ނާދެއެވެ. މުލައިލްގެ ފަހަތުން ބޮޑު ކަތިވަޅިއެއް ހިފައިގެން އެމީހަކު ދުވަމުން ދިޔައީ މުލައިލްގެ ދުވަސްދުއްވާލުމަށްކަން ވަރަށް ރަނގަޅަށް އިނގެއެވެ. އެމީހާގެ ކިބައިން ސަލާމަތްވުމަށް ދުވަމުން ދިޔަ މުލައިލް ވެއްޓުނެވެ. ދަންވަރު ގެ އަނދިރި ވަގުތު ކަމުންނާ ޖަންގައްޔެއްގެ މެދުގައި ކަމުން ތަނެއްދޮރެއް ވަކި ވަނީކީވެސް ނޫނެވެ. އިސްއުފުލާ މުލައިލް ކުރިއަށް ބަލާލިއެވެ. ދެންމެ ފެންނަން އޮތް މަގެއް މިހާރަކުނެތެވެ. އެނާ އެވަނީ ބައިވަރު ގަސްތަކެއްގެ މެދުގައެވެ. އެގަސްތައްވެސް ފެންނަމުން ދިޔައީ އަރާކާއެއްޗެހިތަކެއް ފަދައިންނެވެ. ގައިގެ ހުރިހާ ލޯލިތަކެއް ކޮޅަށްޖެހިގެން ދިޔައިރު މުލައިލްއަށް ލޯމަރާލެވުނެވެ. އައި ނައިތަނެއް ނޭންގެއެވެ. އެއްކަލަ މީހާ އައިސް މުލައިލްގެ ބަނޑަށް އެވަޅި ހަރާލިއެވެ. މުލައިލްގެ ވޭނީ ހަޅޭކުގެ އަޑު މުޅި ސަރަހައްދުގައި ގުގުމާލިއެވެ. އެއަޑު ގެ ނާމާންކަންވެސް ވަކި ކުޑައެއްނޫނެވެ. އެވަގުތު ބައިވަރު ކާޅުތަކެއް އެދިމާލުން މައްޗަށް އުދުއްސައިގަތް މަންޒަރު އެ މާހައުލު އިތުރަށް ބިރުވެރި ކޮށްލިއެވެ.

****************************************************************

ނުނިމޭ…