ޔާރުމިވަނީ ލޯތްބޭ ޙަޤީގީ (ފަންސަތިރީސްވަނަ ބައި)

މިޝަލްގެ، އިންތިޒާރަށް ނިމުން އައީ، ޝިއުރީމެން ދަތުރުކުރި ލާންޗް ބަނދާރައި ގާތްކުރުމުންނެވެ. ރަތްކުލައިގެ ޝޯލެއް އަޅައިލައިގެން ހުރި ޝިއުރީ، ލާންޗުން ފައިބާން އަންނަތަން ފެނުމުން، މިޝަލަށް ކޮޅަށް ތެދުވެވުނީ ބޭއިޚްތިޔާރުގައެވެ.

________________________________________

ކުރިއާއި މާ ބޮޑު ތަފާތެއް ނެތްނަމަވެސް، އޭރަށްވުރެ، ޝިއުރީ ދޮންވެފައި، ހިކިހެން ހީވެއެވެ. އެހެނަސް، އެ ރީތިކަމަކަށް ކުޑަވެސް ބަދަލެއް ނާދެއެވެ. މިޝްޔާމެންނާއި ވާހަކަދައްކަން ހުރެފައި، ޝިއުރީ ހީލިތަން ފެނުމުން މިޝަލްގެ ހިތަށް އެނގުންވެލިއެވެ. ޝިއުރީގެ ގާތަށް ދިއުމަށް އޭނާގެ ހިތް އެދި ގޮވަނީއެވެ. އެހެނަސް، އޭނާއަށް އެފަދަ ހިތްވަރެއް ކުރާކަށް ނުކެރުނެވެ. ޝިއުރީދެކެ ވާ މަތިވެރި ލޯތްބެއްގެ ސަބަބުން، އޭނާ ހިތްހަމަ ނުޖެހޭކަމެއް ކުރާކަށް މިޝަލްގެ ހިތެއް ނޭދެއެވެ. މިޝަލް ދެކޭ ގޮތުގައި ޝިއުރީގެ ހިތްހަމަ ޖެހުމަކީ، އޭނާގެވެސް ހިތްހަމަ ޖެހުމެވެ. އެކަމުން އޭނާގެ ހިތަށް ކޮންމެފަދަ އަނިޔާއެއްވިޔަސް ވެހެވެ. ޙަޤީގީ ލޯތްބަކީ އެއީއެވެ.

********************

“އަޅޭ…… ވަރަށް ގިނަ ދުވަސްކޮށްލާފަ އެންމެން އެއްކޮށް މި ދިމާވީ….. ވަރަށް މިސްވި….” ތިން ކުދިންގެ ގައިގައި ވަކިވަކިން ބައްދާލަމުން ޝިއުރީ ބުނެލިއެވެ. ދުވަސްތަކަކަށްފަހު، އެކުވެރިން ފެނުމުން، އޭނާގެ ހިނިތުންވުން ފިލައި ނުދެއެވެ.

“ޝިއު ތި ހުންނަނީ މާލެ ދިޔަ ގޮތަށް ރަށަށް ނާންނާކަންނު…..” އައިނު ރަނގަޅުކޮށްލަމުން އަޔާނީ ބުނެލިއެވެ. އޭނާ ހުރީ ރުޅިއައިސްފައިކަމަށް ހެދިގެންނެވެ. ތުންފިއްތައިގެން ހުރި ގޮތުން ޝިއުރީގެ ހިނިގަނޑު ފަޅައިގެން ދިޔައެވެ. އެންމެން ހޭން ފެށުމުން، އަޔާނީއަށްވެސް އެ ގޮތުގައި ނުހުރެވުމުން، އޭނާވެސް ހޭން ފެށިއެވެ. ހިނިއައިސްފައި ހުރި ޝިއުރީ، ލޯބިގޮތަކަށް އަޔާނީގެ ނޭފަތު ކުރީގައި ހިފާލިއެވެ.

“ޝިއުވެސް ދެން މި ރަށުން ވަޒީފާއެއް ހޯދަން އުޅޭ….. އޭރުން އަހަރެމެންނާއި އެކީ ރަށުގައި އުޅެވޭނެއެއްނު…. އަޅައިގެން ހުރި ނޫކުލައިގެ ޝޯލް، ވަޔާ އުދުހޭތީ، އޭގެ ކަނުގައި ހިފަހައްޓާލައިގެން ހުރެ ޔަލްވީ ބުނެލިއެވެ.

“ތިކަމާ އުޅެންވީ…. އަހަރެން ހާދަ ހަނދާންވެއޭ ސްކޫލް ދުވަސްވަރު މަތިން…. އަބަދު ސްކޫލްގައި އުޅެން ޖެހޭނެނަމަ ދޯ… އޭރުން އަބަދުވެސް އެންމެން ގާތުގައި ހުރެވޭނެއެއްނު….. އެކަމަކު، މައްސަލައަކީ އިމްތިހާންތައް ހަދަން ޖެހޭތީ….” ޝިއުރީ މިހެން ބުނުމުން އެންމެން މަޖާވެފައި ހޭންފެށީ އެކަމަށް ތާއީދު ކުރަމުންނެވެ.

ކުޑަކުދިންތަކެއް ފަދައިން ހަތަރު ކުދިން އަތުގުޅާލައިގެން ތިބެ، ގެއަށް ދާން ހިނގައިގަތީ، ޝިއުރީގެ ފޮށި ހިފައިގެން ދިޔަ އޭނާގެ ބައްޕަ، ހާރޫންގެ ފަހަތުންނެވެ. ދިޔަ މަގުމަތީ ސްކޫލް ދައުރުގައި ހިނގި އެކި މަޖާ ކަންތައް ހަނދާންކޮށް އެ ވާހަކަތައް ދައްކާ، ހީ ސަމާސާ ކުރިއެވެ.

“އޭ….. އޭނަ އަދިވެސް މި ރަށުގައިތަ އުޅެނީ…..؟؟؟ މިހާރު، ހާދަ ސްމާޓްހެން ހީވޭ…” ގެއަށް ދިޔަ މަގުމަތީ، ފިހާރައެއްގެ ކައިރީގައި ހުރި ރާހިލް ފެނުމުން ޝިއުރީއަށް އަހައިލެވުނެވެ.

“ހޫމް….. މި ރަށަށް އައި ގޮތަށް ދާން ނޭނގިފައި އެ ހުންނަނީ…. ހިތް ކިޔާ ކުއްޖަކު ފެނުނީމަ، ދެން ވާނީވެސް އެހެންތާ…. އަނެއްކާ ޝިއު އޭނައަށް ހިތްކީތަ…..؟؟؟؟؟؟ ހިތްކިޔަސް ލިބޭނެހެނެއް ހިޔެއްނުވެ…. އެ ސޮރުގެ ހިތް މިރަށުގެ މަންޖެއަކަށް ދީފި….” ޝިއުރީގެ ގައިގައި ކޮށްޓާލުމަށްފަހު، މިޝްޔާއަށް އިޝާރާތްކޮށްލަމުން މަޖާވެލާފައި ޔަލްވީ ބުނެލިއެވެ. ޔަލްވީ ބުނަން އުޅޭ އެއްޗެއް ދޭހަވުމުން، ދެ ލޯ ބޮޑުކޮށްލައިގެން ހުރި ޝިއުރީއަށް އޭނާގެ އަނގަމަތީ އަތް އަޅައިލެވުނެވެ.

“ވަގު މަންޖެ…. އެ ކަހަލަ ކަންތައްގަނޑެއް ހިންގާލިއިރު އަހަންނަށް އަންގާވެސް ނުލާ……” ހިނގުން ހުއްޓާލުމަށްފަހު، މިޝްޔާގެ އަތުގައި ހިފާލަމުން، ރާގު އަޅުވާލާފައި ޝިއުރީ ބުނެލިއެވެ. ކަންތައްގަނޑެއް ނުހިންގަމޭ ބުނެ، އެ ވާހަކައަށް ސަމާލުކަމެއް ނުދީ މިޝްޔާ ކުރިއަށް ހިނގައިގަތެވެ. ވާ ނުވާ ނޭނގިފައި ހުރި ޝިއުރީ، ޔަލްވީއަށް ބަލައިލަމުން ލޮލުގެ އިޝާރާތުން ކިހިނެއްވީހޭ އަހާލިއެވެ.

“އެ ތެދެއް…. އޭނައެއް ކަންތައްގަނޑެއް ނުހިންގައޭ…. މިޝް، ކިޔަވާ ނިންމާފަ ރަށަށް އައިފަހުން، ރާހިލް ހުންނަނީ އޭނައަށް ވާވަރު ބަލަބަލާ…. މިޝް ލިބޭތޯ ކަންނޭނގެ، މިޝަލްވެސް ވަރަށް ގާތްކޮށްލައިގެން އުޅެނީ….. މިހާރު ލޯބިވެސް ހުށަހަޅައިފި…. އެކަމަކު، މި މަންޖެ ވަގުތުން އިންކާރު ކުރީ….. އެހެންވިޔަސް، އަހަންނަށް ހީވަނީ އޭނަ ހުއްޓާލާނީ މިޝް ކާމިޔާބުކޮށްފަހެން…..” ޝިއުރީމެންނާއެކު، މިޝްޔާގެ ފަހަތުން ހިނގައިގަންނަމުން އަޔާނީ ކުރުގޮތަކަށް ކިޔައިދިނެވެ.

“އަސްލުވެސްތަ؟؟؟؟ އަޅެ ތި މީހުން ހާދަ ގޯހޭ….. އަހަންނަށް އެ ވާހަކަ ނުވެސް ކިޔައިދޭ….. އަހަރެން ރުޅި ތި މީހުންނާ…..” ކުޑަކުއްޖެއް ފަދައިން ތުން ދަމާލަމުން ޝިއުރީ ރުޅި ހަދާލިއެވެ. ޝިއުރީ، ތުންކޮޅު ހަދާލައިގެން ހުރި ގޮތުން ތިން ކުދިން އެއްފަހަރާ ހޭންފެށިއެވެ.

“އަހަންނަށް ހީވަނީ، މީނާ ރަށަށް ނައިސް މާލޭގަ ހުރެގެން ޑްރާމާ ކުޅެން ދަސްކުރީހެން…. ހީވަނީ ހަމަ ޑްރާމާ ކްއީންއެއްހެން…. އެކްޓް ކުރަން، ވަރަށް މޮޅު އެނގޭ…… ދެން ތިހާ ވަރަށް ނުފުއްވަ ހިނގާބަލަ….. މިޝް އެހާ ހިތްހަމައެއް ނުޖެހޭނެ އެ ވާހަކަ ދައްކާކަށް…. އެހެންވެއޭ އަހަރެމެންވެސް އެ ވާހަކަ ނުދައްކަނީ…. މިއަދު ދެން އޭނަ ފެނުނީމަ އަހަރެންނަށް އެ ވާހަކަ ފެށުނީ މި…..” ޝިއުރީގެ އަތުގައި ހިފައިގެން ހުރެ ކުރިއަށް ދަމުން އަޔާނީ އޮޅުން ފިލުވައިދިނެވެ.

މިޝް، ކީއްވެތަ އޭނަގެ ހުށަހެޅުމަށް އިންކާރު ކުރީ…..؟؟ ކިހާ ރަނގަޅު މީހެއް އެއީ…. އަނެއްކާ މިޝްއާއި ނުލާހިކު ގުޅޭ…..” ޝިއުރީ ބުނަން ބޭނުންވީ އޭނާ ޒިކާނާއިވެސް ވައްތަރު ވާހަކައެވެ. އެހެނަސް ،މިޝްޔާގެ އުފާވެރި މޫޑު ޚަރާބުކޮށްލަން ބޭނުން ނުވާތީ، އެ ބަސްތައް އޭނާގެ ހިތުތެރޭގައި ފޮރުވާލީއެވެ.

“ހަމަ ޝިއުތަ އެހެން ތި އެހީ….؟؟؟؟  އެހެންވީއިރު، ޝިއު ކީއްވެތަ ދޮންބެގެ ލޯތްބަށް އިންކާރުކުރީ….؟؟؟ ގައިމުވެސް ދޮންބެއަކީ ގޯސް މީހެއްނޫން…. ނުލާހިކު ރީތި… އަޚްލާގު ރަނގަޅު… ވަޒީފާއެއްގައި އުޅޭ މަޑުމައިތިރި، އޯގާތެރިއެއް…. ޝިއު ދޮންބެއާއި ނުގުޅުނީ، ދޮންބެގެ ކޮން ސިފައެއް ކަމުނުގޮސްގެންތަ…..؟؟؟؟؟” ފިޔަވަޅުތައް މަޑު ޖައްސާލުމަށްފަހު، ޝިއުރީއަށް ބަލަން ހުރެ، މިޝްޔާ، އެތައް ސުވާލެއް އޭނާއާއި ކުރިމަތިކުރުވިއެވެ. އެ ސުވާލުތައް އިވިފައި ޝިއުރީ، ހިމޭންވިއެވެ. އަޔާނީއާއި، ޔަލްވީ، އެކަކު އަނެކަކަށް ބަލާލީ، އެއީ އެ މީހުންނަށް އަދި ނޭނގޭ ވާހަކައަކަށް ވުމުން، ހައިރާންވީވަރުންނެވެ.

“މިޝަލް ކޮންއިރަކު ޝިއު ގާތު ރައްޓެހިވާން އެހީ….؟؟؟ އެއްފަހަރު މިޝްޔާގެ މޫނަށް އަދި އަނެއް ފަހަރު ޝިއުރީގެ މޫނަށް ބަލައިލަމުން ޔަލްވީ ސުވާލުކޮށްލިއެވެ. އަޔާނީވެސް އެ ދެމީހުންނަށް ބަލަން ތިބީ ޖަވާބެއްގެ އިންތިޒާރުގައެވެ.

“އެއީ މީގެ ފަސް އަހަރުކުރީގެ ވާހަކައެއް… އެކަމާ، މިކަމާ ހާސްބައި ތަފާތު…. އަހަންނަށް މިޝަލާއި ދޭތެރޭ ދެކެވެނީ ބޭބެއެއްގެ ޙައިޞިއްޔަތުން…. އެހެން ނޫނަސް އަހަރެން މިޝަލްދެކެ ލޯތްބެއް ނުވެ…. ލޯބި ނުވާ މީހަކާ ގުޅިގެން ކިހިނެއް އުޅޭނީ…..؟؟؟” ޔަލްވީގެ ސުވާލަށް ޖަވާބު ދިނުމަށްފަހު، ޝިއުރީ މިޝްޔާއަށްވެސް ޖަވާބުދިނެވެ.

“ތީ އަހަރެންވެސް ބުނަން މިއުޅޭ ވާހަކައަކީ…. ކިތަންމެ ރީތިވެފައި، ރަނގަޅުވިޔަސް، ލޯބި ނުވާ މީހަކާއެކީ، ކިހިނެއް އުޅޭނީ…..؟؟؟ ރާހިލްގެ ލޯތްބަށް އަހަރެން އިންކާރުކުރީ އެހެންވެ….. އަހަންނަށް އެނގޭ ޝިއުވެސް ދޮންބެއާއި ނުގުޅުނީ ދޮންބެދެކެ ލޯބި ނުވާތީކަން…. އެހެންވެ، އެކަމާ ބެހޭގޮތުން، އަހަރެން ޝިއުއާއި ވާހަކަ ނުދެއްކީ…. އެކަމަކު، ވަރަށް ތެދަށް، އަހަރެން ބުނަންތަ ވާހަކައެއް…..އަހަންނަކަށް ހިއެއް ނުވެ، ދޮންބެ ޝިއުދެކެ ލޯބިވާ ވަރަށް، މި ދުނިޔޭގެ އެކަކަށްވެސް ޝިއުދެކެ ލޯބިވެވޭނެހެންނެއް….. ޝިއުދެކެ ލޯބި ވެވުނީއްސުރެ މިއަދާ ޖެހެންދެންވެސް ދޮންބެ އެ ހުންނަނީ ޝިއުގެ އިންތިޒާރުގައި….. ޙަޔާތުން ދުވަސްތައް ފާއިތުވެގެން ދާއިރުވެސް އެހެން އަންހެން ކުއްޖަކާ ނުގުޅެން އެ ހުންނަނީ ދޮންބެ ޝިއުދެކެ ވާ މަތިވެރި ލޯތްބެއްގެ ސަބަބުން….. އެންމެ ފަހަރަކުނަމަވެސް، ވަރަށް ފުންކޮށް ޝިއު އެކަމާ ވިސްނާލަބަލަ… ” ޝިއުރީއަށް ބަލަން ހުރެ މިޝްޔާ އެތައް ވާހަކައެއް ދެއްކިއެވެ. ޝިއުރީ އިސްޖަހާލީ، މިޝްޔާ އެ މައުޟޫއަށް ވާހަކަ ދެއްކުމުންނެވެ. އެ ވާހަކަތައް އަޑު އަހަން ބޭނުން ނުވިކަމުގައިވިޔަސް މިޝްޔާ ހުއްޓުވާކަށް އޭނާއަކަށް ނުކެރުނެވެ.

“އަހަންނަށްވެސް ހީވަނީ މިޝް އެ ދެއްކީ ރަނގަޅު ވާހަކަތަކެއްހެން…. އަދި އަދަށް ދާންދެންވެސް މިޝަލްގެ ޙަޔާތަށް އަންހެންކުއްޖަކު އައިކަމެއް އަހަންނަށް އެނގިފައެއް ނެތް…. މިޝް ބުނިހެން އޭނަ އެހުންނަނީ ހަމަ ޝިއުގެ އިންތިޒާރުގައި ކަންނޭނގެއެއްނު…. ޝިއު އެކަމާ ފުންކޮށް ވިސްނާލަން ފެނޭ….” ޝިއުރީގެ އަތުގައި ހިފާލަމުން އަޔާނީ މިހެން ބުނުމުން ޝިއުރީ ވަކި އެއްޗެއް ނުބުނެއެވެ.

********************

ހަނދުވަރުގެ ރިހިއަލި މޫދަށް އެޅިފައިވާއިރު، ފެންނަނީ ނުހަނު ހިތްގައިމު ގޮތަކަށެވެ. އޮއިގަދަކަމުން ރާޅުތައް އުފުލިފައިވާ ތަންތަންކޮޅަށް ހަނދުވަރުގެ އަލި އެޅިފައިވުމުން، ހީވަނީ ކުދި މުތީތަކެއް ވިދާ ބަބުޅަމުންދާހެންނެވެ. ރަށުގެ ތުނޑީފަރާތުގެ އޮލަ ފަސްގަނޑުމަތީ އިށީނދެލައިގެން ތިބި އަޔާނީއާއި އަފްލާކް، ޤުދުރަތުން ފުރިގެންވީ އެ ހިތްގައިމު މަންޒަރުން އުފާ ހޯދަމުން ދިޔައެވެ. އަޔާނީ އިނީ އަފްލާކްގެ ކޮނޑުގައި ބޯ އަޅާލައިގެންނެވެ. އަފްލާކް އިނީ ފުރަގަހުން އަޔާނީގެ ކޮނޑުގައި ހިފަހައްޓާލައިގެންނެވެ.

“ޔާނީ…..  މި ގޮތަށް ސިއްރުން ބައްދަލްކުރާކަށް، ދެން އަހަރެން ބޭނުމެއް ނޫން….؟؟؟ އަހަރެން ބޭނުންވަނީ، ވީ އެންމެ އަވަހަކަށް މި ގުޅުމުގެ ވާހަކަ މަންމަމެންނާއި ހަމައަށް ގެންދަން….  މިހާރު، ކިޔަވައި ނިމިގެން ޔާނީ ތި އުޅެނީ ވަޒީފާގައި….. އެހެންނޫނަސް މަންމަމެން ބުނީ ކިޔަވާ ނިމެންދެން ދުރުގައި ތިބުމަކަށްނު…. މިހާރު ދެން މި ދެމެދަށް ކިޔެވުންވެސް ހުރަހެއް ނާޅާނެ…. އަހަރެން ބޭނުން ވީހާވެސް އަވަހަށް ޔާނީއާއި ކައިވެނި ކުރަން…..” އަޔާނީގެ މަޑުމަޑު އަތްތިލައިގައި ހިފާލަމުން، އޭނާގެ ދެލޮލަށް ބަލަން އިނދެ އަފްލާކް ބުނެލިއެވެ. އަފްލާކަށް ބަލާލުމަށްފަހު، ކޮޅަށް ތެދުވެ އަޔާނީ ހިނގައިގަތީ ރާޅުޖަހާ ހިސާބަށެވެ. ދެ ޖީބަށް އަތް ޖަހާލައިގެން ހުރެ، އަފްލާކްވެސް އަޔާނީގެ ގާތަށް ގޮސް އޭނާއާއި އެއްހަމައެއްގައި މަޑުކޮށްލިއެވެ. ޖެހެމުން ދިޔަ ފިނިފިނި ވައިރޯޅިން ހަށިގަނޑު ރޫރޫ އަޅައިގަތުމުން އަޔާނީއަށް މޭ މަތީ ދެ އަތް ހުރަސްކޮށްލެވުނީ ފިނިވީ ވަރުންނެވެ. ހަނދުވަރުގެ ރިހި އަލިން ޖަރީވެފައިވާ މޫދަށް ބަލަން ހުރި އަޔާނީ ފުންނޭވާއެއް ބޭރުކޮށްލަމުން، އަފްލާކަށް ބަލާލިއެވެ. އޭރު އަފްލާކްވެސް ހުރީ އަޔާނީގެ ޙަރަކާތްތަކަށް ބަލާށެވެ. އަޔާނީގެ މޫނަމަތިން އަފްލާކަށް ފެނުނީ ނުތަނަވަސްކަމެވެ. އެކަމާއި ބެހޭގޮތުން ސުވާލުކުރުމުން، އޭނާ އަނެއްކާވެސް ފުން ނޭވާއެއް ފަޒާގެ ތެރެއަށް ދޫކޮށްލިއެވެ.

“ކީއްވެގެން ކަމެއް ނޭނގެ… އަހަރެންގެ ހިތްބުނަނީ މަންމަމެން އަނެއްކާވެސް އެހެން ބަހަނާއެއް ދައްކާނޭ އަހަރެމެން ދުރުކުރުވަން…. އެހެންވެ މަންމަމެންނަށް އަންގަން ބޭނުން ނުވެގެން މި އުޅެނީ…. އަހަރެންވެސް ބޭނުން ދެން ލަސްނުކޮށް ކައިވެނި ކުރަން……އަފޫގެ އަންބަކަށް ވުމަށް އެދި، އަހަރެން މި ދެކޭ ހުވަފެންތަކުގައި، ޙަޤީގީ ކުލަ ޖެހެން އަހަރެންވެސް ބޭނުންވޭ…. އެކަމަކު، އަނެއްކާވެސް މަންމަމެން އަހަރެމެން ދުރުކުރުވަން އުޅެފާނެތީ، ބިރުގަންނަނީ…. ” އަފްލާކްގެ މޫނަށް ބަލަން ހުރެ އަޔާނީ، އޭނާގެ ހިތުގައިވާ އުދާސްތައް ބޭރުކޮށްލިއެވެ. އޭނާގެ މޫނުމަތީގެ ކުލަވަރުތަކުންވެސް ނުތަނަވަސްވެފައިވާވަރު ދޭހަކޮށްދެއެވެ.

“ޔާނީ މާ ބޮޑަށް ހާސްވަނީއޭ….. މަންމަމެން އޭރު އަހަރެމެން ދުރުކުރުވީ ޔާނީ ކިޔަވާތީއެއްނު…… މިހާރު ތި ހުރީ ކިޔަވާ ނިމި މޮޅު ނަރުހަކަށްވެފައި….. އަހަންނަކަށް ހިޔެއްނުވެ، މަންމަމެން ދެން އަހަރެމެން ދުރުކުރަން އުޅޭނެހެންނެއް….. އެހެން ނޫނަސް ކައިވެންޏާއި ހަމައަށް ދެވޭނީވެސް މަންމަމެންނާ ވާހަކަ ދައްކައިގެންނު ދޯ….” އަޔާނީގެ ދެ ކޮނޑުގައި ހިފަހައްޓާލަމުން އަފްލާކް ބުނެލިއެވެ.  އެ ވާހަކަތަކަށް އެއްބަސްވުމުގެ ގޮތުން އަޔާނީ ބޯ ޖަހާލިއެވެ. އަފްލާކް އަޔާނީގެ ގައިގައި ކުޑަކޮށް ބައްދާލުމުން، އަޔާނީ، އަފްލާކެގެ މޭގައި ބޯ އަޅާލިއެވެ. އަޔާނީގެ ބޮލުގައި ދަތްދޮޅި ޖައްސާލައިގެން ހުރެ އަފްލާކް ވިސްނަމުން ދިޔައީ، އަމްހާމެންގެ ގާތުގައި އެ ވާހަކަތައް ދައްކާނެ ގޮތަކާއި މެދުއެވެ.

********************

މިޝްޔާއަށް ދިނުމަށްޓަކައި، މާލެއިން ގެނައި ހަދިޔާ ކޮތަޅުތައް ހިފައިގެން، އެ ގެއަށް ވަންނަން ދިޔަ ޝިއުރީއަށް ހުއްޓެވުނީ ގެއިން ނުކުންނަން އައި މިޝަލް ފެނުމުންނެވެ. އޭރު ދެ މީހުންނަށްވެސް ތިބެވުނީ ދޮރު ކައިރީގައި، އެކަކު އަނެކަކަށް ކުރިމަތިވާގޮތަށެވެ. މިޝަލް، އެ ހުރި ފިޔަވަޅުމަތީ، ޝިއުރީއަށް ބަލަން ހުރީ، ހުއްޓުން އަރާފައެވެ. އޭނާގެ އަމިއްލަ ނަފްސު އޭނާގެ އިޚްތިޔާރުން ބޭރުގައިވާ ކަހަލައެވެ.  އެތެރެއަށް ނުވަދެވިފައި ހުރި ޝިއުރީ އިސްޖަހާލީ، މިޝަލްގެ ބެލުންތަކުން އުނދަގޫވާން ފެށުމުންނެވެ. އެވަގުތު، ކޮޓަރިން ނުކުތް މިޝްޔާއަށް މި މަންޒަރު ފެނުމުން، އެ ދެމީހުންނަށްޓަކައިވެސް، އޭނާގެ ހިތުގައި ޙަމްދަރުދީ އުފެދުނެވެ. މިޝަލް، ޝިއުރީދެކެ އިންތިހާއަށް ލޯބިވާކަމާއި، ޝިއުރީ ނުލިބުމުން، އޭނާ ދެރަވާނެވަރު މިޝްޔާއަށް އަންދާޒާކޮށްލެވެއެވެ. ހަމަ އެހެންމެ، އެފަދަ ޙާލަތެއްގައި ޝިއުރީއަށް އުނދަގޫވާނެވަރުވެސް، އޭނާއަށް ވިސްނެއެވެ. ސަބަބަކީ، މިވަގުތު އޭނާވެސް އެފަދަ ފައްތަރެއްގައި ވާކަމެވެ.

“ޝިއު، އާދޭ އެތެރެއަށް…..” މިޝްޔާގެ އަޑަށް ދެ މީހުންނަށް ސިހިފައި އެ ދިމާއަށް ބަލައިލެވުނެވެ. މިޝަލަށް ކުރެވުނު ކަންތައް ރޭކާލީ ދެނެވެ. ޝިއުރީއަށް އެތެރެއަށް ވަނުމަށް ތަންދެމުން، އޭނާ އެއްފަރާތްވެލިއެވެ. މިޝަލަށް ބަލާލުމެއްވެސް ނެތި، އެތެރެއަށް ވަންގޮތަށް ޝިއުރީ މިސްރާބުޖެހީ އަނެއް ފަރާތަށް ދިއުމަށެވެ. ދެރަވެފައިހުރި،  މިޝަލް މިޝްޔާއަށް ބަލައިލަމުން ގަދަކަމުން ހީލިއެވެ. ޝިއުރީގެ ޢަމަލުތައް ހުރިގޮތުން މިޝަލްގެ ހިތަށް އަސަރުކޮށްފައިވާވަރު މިޝްޔާއަށް ސިއްރުކުރަން ބޭނުންވާތީއެވެ. އެހެނަސް މިޝްޔާއަށް އެކަންތައް ސިއްރެއް ނުވެއެވެ.  މިޝަލް ނުކުމެގެން ދިޔަތަން ބަލަން ހުރެފައި މިޝްޔާވެސް ޝިއުރީގެ ގާތަށް ދިޔައެވެ.

********************

މިޝްޔާ، ފިހާރައިން ނުކުތީ މެންދުރަށް ކައްކަން ބޭނުންވާ ބައެއް ސާމާނު ގަނެގެންނެވެ. ވަކި ހިސާބަކަށް ނުދެވި އުޅެނިކޮށް، މީހަކު އައިސް ދާދި ގާތުގައި މަޑުކޮށްލުމުން އޭނާ ބަލައިލިއެވެ. އޭރު މިޝްޔާގެ ގާތުގައި ހުރި ރާހިލް އޭނާގެ ލޮލުގައި އަޅާފައި އިން އަވިއައިނު ނަގަނީއެވެ. ރާހިލް ހިނިތުންވެލުމުން، މިޝްޔާވެސް ހިނިތުންވެލީ، އެނޫން ގޮތެއް ނެތިގެންނެވެ. ރާހިލް ފެންނަ ކޮންމެފަހަރަކު، ޒިކާން މަތިން ހަނދާންވާތީ، މިޝްޔާއަށް އުނދަގޫވަނީއެވެ. ރާހިލް ފެންނަ ހިސާބުގައި ހުންނަން ބޭނުންވިކަމުގައިވިޔަސް، އެއީ ރާހިލް ދެކޭހިތުން ނޫންކަން އޭނާވެސް ދަނެއެވެ.

ރާހިލްގެ ލޯތްބަށް، މިޝްޔާ އިންކާރުކުރީ، އޭނާއަށް ރާހިލް، ކަމުނުދާތީއެއް ނޫނެވެ. ރާހިލާއި، ޒިކާންގެ ސިފަ އެއްގޮތް ވުމުންނެވެ. ލޯބިނުވާއިރު، ހަމައެކަނި ޒިކާނާއި ސިފައެއްގޮތްވުމުގެ ސަބަބުން، ރާހިލާއި ގުޅިއްޖެނަމަ، މިޝްޔާ ދެކޭ ގޮތުގައި އެއީ، ރާހިލަށް އޮޅުވާލެވުނީއެވެ. އެއްވެސް މިހަކަށް އޮޅުވާލައިގެން ގުޅިގެން އުޅޭކަށް އޭނާ ބޭނުމެއް ނުވެއެވެ. އެފަދަ ގޮތަކަށް ފެށޭ ގުޅުމެއް މާ ގިނަ ދުވަހަށް ދެމި އޮންނާނެކަމަކަށް އޭނާ ނުދެކެއެވެ. ރާހިލާއި ދުރުން އުޅެން މިޝްޔާ މަސައްކަތް ކުރާ ސަބަބަކީ އެއީއެވެ. އެހެނަސް، ފާޅުގައި އެހެން ބުނާން ކެރޭނީވެސް ފަހެ ކިހިނަކުން ހެއްޔެވެ.

ރާހިލަށް ހިނިތުންވެލަމުން، ހަލުވި ހިނގުމެއްގައި މިޝްޔާ ހިނގައިގަތީ، އޭނާގެ ކިބައިން އަވަހަށް ސަލާމަތްވުމަށެވެ. އެހެނަސް، ރާހިލް ހުރީ އެހާ ފަސޭހައިން މިޝްޔާގެ ފަހަތުން ނެއްޓޭގޮތަކަށް ނޫނެވެ.

“ޕާސްތާ ހަދަންތަ ތިއުޅެނީ….؟؟؟” މިޝްޔާއާއި އެއްހަމައެއްގައި ހިނގަމުން ދިޔަ ރާހިލް ސުވާލުކޮށްލީ މިޗްޔާގެ އަތުގައި އޮތް ކޮތަޅު ފެނުމުންނެވެ. ރާހިލަށް ބަލައިލުމެއްނެތި، މިޝްޔާ ބޯ ޖަހާލިއެވެ. އޭނާއާއި ވާހަކަ ދައްކަން ޖެހުމުން މިޝްޔާ ހުރީ އުނދަގޫވާގޮތްވެފައެވެ.

“އަހަރެންނަކަށް ނުލިބޭނެތަ…..؟؟؟؟” މިޝްޔާގެ މޫނަށް ބަލާލަމުން ރާހިލް އަހާލިއެވެ. މިޝްޔާއަށް ރާހިލާއި ދިމާއަށް ބަލާލެވުނީ ވާހަކަދެއްކުމުގައިވެސް ޒިކާނާއި އެއްގޮތް ގޮތެއް ހުންނާތީއެވެ. އެފަދަ ވަގުތުތަކުގައި، ޒިކާން ގާތުގައި ވާ ކަހަލަ އިޙްސާސެއް އޭނާއަށް ކުރެވެއެވެ.

“އޭއި ހާދަ ވަރަކަށް ތި ވިސްނަނީ…..” ރާހިލްގެ މޫނަށް ބަލަހައްޓައިގެން ހުރި މިޝްޔާ ސިހުނީ، ރާހިލް، އޭނާގެ މޫނު ކުރިމަތީ އަތްހިންގާލުމުންނެވެ.

“ނޫނޭ… ކާން އަންނާތި…..” ރާހިލް އެހާ ރީތިކޮށް އެހުމުން މިޝްޔާއަށް އިންކާރުކުރާކަށް ނުކެރުނެވެ.

“އޯކޭ…. މިޝަލްއާއި އެކީ ދާނަން….” މިޝްޔާއާއި ދިމާއަށް އެއް ލޯ މަރާލަމުން، މިހެން ބުނެފައި އޭނާ ދިޔައީއެވެ. މީހާ ހަމައަކަށް އެޅުމަށްޓަކައި، މިޝްޔާ، ފުން ނޭވާއެއް ބޭރުކޮށްލިއެވެ. ހީވަނީ އެތައް އިރަކު ނޭވާ ހިފަހައްޓާލައިގެން ހުރެފައި ދޫކޮށްލިހެންނެވެ.

********************

“ޔާލް ހާދަ އަވަހަކަށް ތި ނުކުތީ…. އަންނަ ހަފްތާގައެއްނު ޗުއްޓީ ހަމަވާނީ……” ޔަލްވީ އައިސް ސްކޫލް އޮފީހަށް ވަނުމާއިއެކު ކައުންޓަރުގައި އިން  ޒިހުނާ ސުވާލުކޮށްލިއެވެ.

“ހޫމް…. ބައްޕަ މިހާރު ވަރަށް ބޮޑުތަން ރަނގަޅުވެއްޖެ…. އެހެންވެ އެ ރަށުގައި ހަފްތާއެއްކޮށްލާފައި ހުކުރު ދުވަހު ހެނދުނު ރަށަށް އައިސްފިން….. ދެން ރަށުގައި ހުރިއްޔާ ގޭގަ ހުންނާނެކަމެއް ނެތްތާ ދޯ…..” “ފިންގަރ ޕްރިންޓް އެޓެންޑެންސް މެޝިނަށް” އޮބާލުމަށްފަހު، ކައުންޓަރު ކައިރިއަށް އައިސް މަޑުކޮށްލަމުން ޔަލްވީ ބުނެލިއެވެ. އޭނާއާއި އެއްބަސްވުމުގެ ގޮތުން ކައުންޓަރުގައި އިން ޒިހުނާވެސް ބޯ ޖަހާލިއެވެ.

“ޔާލް ދެން ނުޖެހޭނެ ފޫހިވެގެން އުޅޭކަށް…. މިދިޔަ ހަފްތާގައި އައި.ޓީ ޓެކްނީޝަންވެސް ވަޒީފާއަށް ނުކުމެއްޖެ…..” ޔަލްވީގެ އަތުގައި ހިފާލަމުން ހިނިއައިސްފައި އިނދެ ޒިހުނާ ބުނެލިއެވެ.

“ކޮން ބައެއްތަ އެ މަޤާމަށް ކުރިމަތިލާފައި ތިބީ….؟؟؟؟ ކާކު ހޮވުނީ….. މި ޒިހޫމެން ސިއްރުވެރިކަމުން އެކަހަލަ އެއްޗެއްވެސް ނުބުނެދޭނެ…..” ޒިހުނާގެ ގައިގައި މަޑުމަޑުން ޖަހާލަމުން ޔަލްވީ މިހެން ބުނެލުމުން އޭނާ ފެށީ ހޭށެވެ.

“ހެހެހެ….. ކީއްކުރަންތަ އެ މަޤާމަށް ކުރިމަތިލީ ބަޔަކު ބަލަނީ……؟؟؟؟ ހޮވުނު މީހާ އިންނާނެ ޕްރިންޓިންގ ރޫމްގަ…. އަމިއްލައަށްގޮސް ބަލާބަލަ އެއީ ކާކުތޯ…. އޭނަ ފެނުނީމަ ޔާލް ހޭ ނެތިގެން ނުވެއްޓޭނެކަމެއްވެސް ނޭނގެ…. އެހާވެސް ރީތި ބިޓެއް އެއީ…. އަހަރެން ހިތަށް އަރާ ޔާލްގެ ބަދަލުގައި އަހަންނަށް އެތާ ގޮސް އިނދެވޭނެނަމައޭ……” މަޖާވެފައި ވާހަކަ ދައްކަމުން ދިޔަ ޒިހުނާ ފަހު ޖުމްލަ ބުނެލީ ހުވަފެނީ ގޮތަކަށެވެ. ޔަލްވީގެ ގާތަށް ހިނިއައީ އެހެންވެއެވެ. ހަމަ ދުނިޔޭގައި އިންނާށޭ ބުނެ، އަތްދަބަހުން ޒިހުނާގެ ގައިގައި ޖަހާލުމަށްފަހު، ޔަލްވީ އެ ތަނުން ނުކުތީ، ޕްރިންޓިންގ ރޫމަށް ދިއުމަށެވެ.

ޕްރިންޓިންގ ރޫމްގެ ދޮރު ތަޅުގައި ހިފާލި ވަގުތު، ޖެހެލި ވައިރޯޅިއާއިއެކު، ޔަލްވީ އަޅައިގެން ހުރި ޝޯލް، މޫނުގައި އެޅުނެވެ. މޫނު މަތިން ޝޯލް އެއްފަރާތްކޮށްލަމުން، ޔަލްވީ އެތެރެއަށް ވަނެވެ. ޝޯލްގައި ޖަހާފައި އިން ޕިން، ކުޑަކޮށް ނެއްޓިފައި އިނުމުން، އެ ރަނގަލުކޮށްލުމަށްފަހު، އިސް އުފުލާ ބަލާލިވަގުތު، އެތެރޭގައި، އޭނާއާއި ދިމާއަށް ބަލަހައްޓައިގެން، ހުރި ޒުވާނާ ފެނުމުން، ޔަލްވީއަށް ހައިރާންކަމެއް ލިބުނެވެ.

ނުނިމޭ

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.