ވިންދު ލޯބިން ޖެހި ހިތެއްގައި (15)

ފަހަތުގައި ހުރި ޔުމްނާއަށް ބަލާލި ވަގުތު އެ ލޮލުގައި އަޅައިގަތީ އެމީހުންނާ ދިމާއަށް ދުވެފައި އައި ފަންސަހާކަށް މީހުންނެވެ. އެ ހުރިހާ އެންމެންނާ ކުރިމަތިލާނެހާ ހިތްވަރެއް އޭނާގެ ނުހުންނާނެކަން އާރިކްއަށް އެނގެއެވެ. ކޮންމެވެސް ގޮތެއް ނުވިސްނައިފިނަމަ މިފަހަރު އެ ދެމީހުންގެ ދުވަސް ދާނެއެވެ.

“ރެޕަންޒެލް.. އަރާބަލަ!” ހާސްވެފައި އާރިކް ޔުމްނާއަށް އެ ގޭޓުގެ މައްޗަށް އަރަން އެހީވެދިނެވެ. ޔުމްނާ ސަލާމަތުން އަނެއް ފަރާތަށް ފޭބުމާއެކީ އާރިކް ހަލުވިކަމާއެކު ގޭޓުމަތިން ފުންމާލިއެވެ. ޔުމްނާގެ އަތުގައި ހިފައިގެން އޭނާ ދުވަމުން ދިޔައިރު އިރުއިރުކޮޅާ ފަހަތް ބަލާލެވެއެވެ.

ވަކި ހިސާބަކަށް ގޮސްފައި ޔުމްނާ ހުއްޓުނީ އިތުރަށް އެންމެ ފިޔަވަޅެއް އަޅާހާ ހިތްވަރު އެ ހަށިގަނޑުގައި ނެތުމުންނެވެ. ވަރު ހުސްވެފައިވާ އެ ހަށިގަނޑު ވެއްޓެން ދިޔަ ވަގުތު އާރިކް ހުޝިޔާރުކަމާއެކު ހިފަހައްޓާލިއެވެ.

“އާރިކް.. އަ..ހަންނަކަށް ދެން ނުދުވެވޭނެ..” ޔުމްނާ ބަލި ގޮތަކަށް ބުނެލިއެވެ. އާރިކް ބަލާކަށް ނުހުރެ ޔުމްނާގެ ހަށިގަނޑު އަތްދަނޑި މައްޗަށް ނަގައިގެން ދެކޮޅު ހޯދާ ބަލާލިއެވެ. އެވަގުތު އެ ލޮލުގައި އަޅައިގަތީ ޕާކުކޮށްފައިވާ ސައިކަލެއްގެ މަތީގައި ފޯނުން ވާހަކަދައްކަން އިން ޒުވާނެކެވެ. އާރިކް އެދިމާއަށް ގޮސް ފައިން ޖެހިޖެހިއިނުން އެ ޒުވާނާ ސައިކަލުމަތިން ވައްޓާލިއެވެ. އަދި ޔުމްނާއާއެކު ސައިކަލަށް އެރުމަށްފަހު ދުއްވާލިއެވެ. އޭރު ފަހަތުން ބަރުގޮނު އަޅާ އަޑު އާރިކްއަށް އިވެމުން ދިޔައެވެ. ސާލިމްގެ މީހުން ސައިކަލާއި ޖިޕުތަކުގައި އެމީހުންގެ ފަހަތުން އަންނަން ފެށިއެވެ.

** ** **

އަޝްފާންއާއެކު ގޭތެރެއަށް ވަދެގެން އައި އަރޫޝާއަށް ޖުވައިރިޔާގެ މޫނު ފެންނައިރަށް ކޮންމެވެސް ކަމެއް ގޯސްވެއްޖެކަން އެނގުނެވެ. އޭނާ ގޮސް ޖުވައިރިޔާ ގާތު އިށީންދެ، ކިހިނެއްވީތޯ އަހާލިއެވެ.

“އާރިކް އަނެއްކާ ވެސް ކޮންމެވެސް ތަނަކަށް ހިނގައްޖެ.. މާލޭގަ މަޑުވާ މީހެއްތަ އެއީ؟” ޖުވައިރިޔާ ނުރުހިފައި ބުނެލިއެވެ.

“ބަހައްޓަބަލަ މަންމާ.. ދޮންބެ ދާތާކަށް ގޮސްދާނެއެއްނު؟” އަރޫޝާ ބުނެލިއެވެ. އެވަގުތު ޖުވައިރިޔާ ސޯފާއިން ތެދުވެގެން އޭނާގެ ކޮޓަރިއާ ދިމާއަށް ހިނގައިގަތެވެ. ހީވާގޮތުން އަރޫޝާގެ ވާހަކައިން އޭނާގެ ހިތް އިތުރަށް ނުރުހުނީއެވެ. ޖުވައިރިޔާ ދިއުމުން އަރޫޝާ ދެފަރާތަށް ބޯ ހޫރާލިއެވެ.

“އާރިކްބޭބެ ދިޔައީތަ؟ ދެން އަންނަނީ ކޮންއިރަކުންނޯ؟” އަރޫޝާ ގާތު އިށީންނަމުން އަޝްފާން އަހާލިއެވެ. އާރިކް އޭނާއަށް އެކަމުގައި އެހީވާނަމޭ ކިޔާފައި އެ ހެދީ ކިހިނެއް ހެއްޔެވެ؟

“ހުމްމް.. ދެން އަންނާނީ ގާތްގަނޑަކަށް 2 މަސް 3 މަސް ކޮށްފަ..” އަރޫޝާ ދެއަތް އުރާލަމުން ބުނެލިއެވެ. އެއާއެކު އަޝްފާންގެ ހިތް މާޔޫސްވެގެން ދިޔައެވެ. އާރިކް އަންނާނެހާ ދުވަހެއް ވަންދެން އޭނާއަށް މާލޭގައި މަޑުކުރެވޭކަށް ވެސް ނެތެވެ. އާރިކްގެ އެހީއާ ނުލާ މާދަމާ ޔުމްނާ ހޯދަން ފަރީދުގެ ގެއަށް ދާނީއޭ އެހިތަށް އެރިއެވެ.

** ** **

ޔުމްނާ އަތްދަނޑި މައްޗަށް ލައިގެން ހޮޓެލްއެއްގެ ކޮޓަރިއަށް އާރިކް ވަނެވެ. އޭނާ މަޑުމަޑުން ޔުމްނާގެ ހަށިގަނޑު އެނދުމަތީގައި ބާއްވާލިއެވެ. އަދި އެ ދޮން މޫނަށް ފުންކޮށް ބަލާލިއެވެ. ދެލޯ މެރިފައި ވީއިރު އެ މޫނުމަތީގައި އެމީހުން ޔުމްނާއަށް އަނިޔާކޮށްފައި ވާކަމުގެ ނިޝާންތައް ވިއެވެ. އެ ފިޔާތޮށި ކުލައިގެ ދެތުންފަތް ހިކިފައި ވީއިރު އޭނާ ވަރުބަލި ވެފައިވާ މިންވަރު ހާމަވެއެވެ. އެ ފަންދިގު އިސްތަށިގަނޑު އެކި ގޮތްގޮތަށް ހޭވިފައިވިއެވެ. މި ލޯބި ކުއްޖާއަށް އޭނާއާ ހެދި މި ދިމާވީ ކޮންފަދަ ކަންތައްގަނޑަކާ ހެއްޔެވެ؟

އާރިކް ޔުމްނާގެ މޫނަށް ފެންފޮދެއް ވިއްސާލުމާއެކު ލަސްލަހުން އެސްފިޔަތައް ތަޅުވާލަމުން ޔުމްނާ ދެލޯ ހުޅުވާލިއެވެ. އާރިކް ފެނުމުން އޭނާއަށް ހަމަޖެހުމުގެ ނޭވައެއް ލެވުނު ނަމަވެސް އެހިތުގައި އަދިވެސް ބިރުވެރިކަން އުފެދިފައި ވިއެވެ.

“އެމީހުން؟” ޔުމްނާ ދެފަރާތް ހޯދާލަމުން އަހާލިއެވެ.

“ޝްޝްޝް.. ރެޕަންޒެލް.. އެމީހުންނެއް ނެތޭ.. އަން މި ފެންފޮދު ބޯލަބަލަ..” ޔުމްނާގެ ތުނބުގައި ފެންތައްޓެއް ޖައްސަމުން އާރިކް ބުނެލިއެވެ. ކަރު ހިއްކާފައި ހުރުމުގެ ސަބަބުން ޔުމްނާ އެ ފެންފޮދު އެއްނޭވައިން ހުސްކޮށްލިއެވެ.

“އާރިކް.. އެ..އެއީ ކޮން ބައެއްތަ؟ ކީއްވެތަ އެމީހުން އަހަރެން ގެންދިޔައީ؟ އާރިކްއާ އެމީހުންނާ..” ޔުމްނާ ފަތިފައްޗަށް ސުވާލުތައް އަމުނަންފެށި ނަމަވެސް އާރިކްގެ ކުއްލި ހަރަކާތާއެކު އޭނާގެ ޖުމްލަ މެދުކެނޑިގެން ދިޔައެވެ. ކުއްލިއަކަށް އާރިކް އޭނާގެ ތުންފަތުގައި ބޮސްދޭން ފެށުމުން އޭނާ ހުރީ ގުޑިލަންވެސް ނޭނގިފައެވެ. ދެލޯ ބޮޑުކޮށްގެން އޭނާއަށް ހުރިގޮތަށް ހުރެވުނީއެވެ.

އާރިކް ދުރަށްޖެހިލުމާއެކު ޔުމްނާ އޭނާގެ މޫނު އަނެއްފަރާތަށް އަނބުރާލިއެވެ. ޔުމްނާ ހިތްހަމަނުޖެހުނީކަން އެނގުމުން އާރިކްގެ ހިތް ދެރަވިއެވެ. ކުރެވުނު ކަންތަކާމެދު ލަދު ގަނެ، ދެރަވެސްވިއެވެ. އަވަސްއަވަހަށް އޭނާ އެނދުން ތެދުވެ ހިންދެމެލިއެވެ.

“އަހަރެން… އަންނާނަން ރެޕަންޒެލްއަށް ކާއެއްޗެއް ހިފައިގެން.. އައިސްފަ ހުރިހާ ވާހަކައެއް ކިޔައިދޭނަން… އެއްވެސް ތަނަކަށް ނުގޮސް އިންނައްޗޭ..” އާރިކް އެހެން ބުނުމަށްފަހު އެ ކޮޓަރިން ނިކުމެގެން ދިޔައެވެ. ކޮޓަރީގެ ދޮރު ލެއްޕޭ އަޑު އިވުމާއެކު ޔުމްނާ އެދިމާއަށް ބަލާލިއެވެ.

“އަޅެ،، ކިހިނެއްތަ ދެންމެ އެވީ؟ ކީއްވެތަ؟” ޔުމްނާ ހިތާ ދިމާލުން މޭގައި އަތްޖައްސާލަމުން އަމިއްލަ ނަފްސާ ސުވާލުކޮށްލިއެވެ. އާރިކް އޭނާއާ ގާތްވުމުން އެ ހިތް އާދަޔާ ޚިލާފަށް ބާރަށް ތެޅެނީ ކީއްވެގެން ހެއްޔެވެ؟ އެ ހިތް ދެވިފައިވީ އަޝްފާންއަކަށް ނޫން ހެއްޔެވެ؟ ދެން އޭނާއަށް އާރިކްއާމެދު އެފަދަ ގޮތަކަށް ދެކެވެނީ ކީއްވެގެން ހެއްޔެވެ؟ އެހެންނޫނަސް އޭނާއަކީ މީހެއްގެ އަންބެކެވެ. އާރިކް އޭނާގެ ކިބައިން ވަގުތުގެ ނާޖާއިސް ފައިދާ ނެގިޔަ ދީގެން ނުވާނެއެވެ.

އާރިކް އެނބުރި އައުމުން ޔުމްނާ މޫނުމަތިން ނުރުހުންވާ ގޮތް ދައްކާލިއެވެ. އާރިކް އައިސް ކުރިމަތީގައިވާ މޭޒުމަތީގައި ކާއެއްޗެހި ބެހެއްޓުމާއެކު ޔުމްނާ އަވަސް އަވަހަށް ކާންފެށީ ބަނޑުހައިވެފައި ހުރިލެއް ބޮޑުކަމުންނެވެ. ޔުމްނާ ކަމުން ދިޔަ ވަގުތު އާރިކް އޭނާގެ ވާހަކަ ކިޔައިދޭން ފެށިއެވެ. އިސްއުފުލާ އާރިކްއަށް ނުބެލި ކަމުގައި ވިޔަސް ޔުމްނާ ގެންދިޔައީ އެ ވާހަކަތައް ކަނުލާ އަޑުއަހަމުންނެވެ.

###

ފަސް އަހަރު ކުރި…

“ދޮންބޭ! ހިނގާބަލަ ދާން ހޮސްޕިޓަލަށް ކޮއްކޮ ބަލާލަން.. ބައްޕަ ދެންމެ ގުޅާފަ ބުނީ އަވަހަށް އަންނާށޯ..” އުމުރުން ތޭރަ އަހަރުގެ އަރޫޝާ އާރިކްގެ ކޮޓަރިއަށް ވަންނަމުން ބުނެލިއެވެ. އެއަޑުންވެސް އޭނާ އުފާވެފައި ހުރި މިންވަރު ހާމަވެއެވެ. އާރިކް އިނީ މާދަމާ ސްކޫލަށް ދާންވާއިރަށް ނިންމަންޖެހޭ މުހިންމު ފިލާވަޅެއް ހަދަން ނަމަވެސް އަރޫޝާގެ އެ ޖުމްލައާއެކު އޭނާއަށް ކޮޅަށް ތެދުވެވުނެވެ. އެ މޫނުމަތީގައި ދުވެލީ ފުން ހިނިތުންވުމެކެވެ.

“ހިނގާ އަވަހަށް ދާން.. އަރޫ ޓެކްސީއަކަށް ގުޅާބަލަ..” އާރިކް ގަޔަށް ޓީޝާޓެއް މަހާލަމުން ބުނެލިއެވެ. އެވަގުތު އަރޫޝާ ފޯނުގެ ނަންބަރުތަކަށް ފިތަން ފެށިއެވެ.

އޭޑީކޭގެ ދޮރުމައްޗަށް ޓެކްސީ ހުއްޓުމާއެކު އަރޫޝާ ފުންމަމުން ކަހަލަ ގޮތަކަށް ހޮސްޕިޓަލު ތެރެއަށް މިސްރާބުޖެހިއެވެ. އާރިކްވެސް ހެވިފައި ހުރެ އަރޫޝާގެ ފަހަތުން ދިޔައެވެ.

“އައި އެމް ސޯ އެކްސައިޓެޑް ދޮންބޭ! އަންހެން ކުއްޖެއް ވިއްޔާ އަރޫ ބޭނުމީ އަޒްކާ ކިޔަން.. ބޯއީއެއް ވެއްޖިއްޔާ ބޭނުމީ އަރުޝަލް ކިޔަން..” ޖުވައިރިޔާ ބާއްވާފައި އޮތް ޕްރައިވެޓް ކޮޓަރިއަށް ދެވެންދެން އަރޫޝާގެ އަނގަ ނުހުއްޓެއެވެ.

ކޮޓަރިއާ ހަމައަށް އާދެވުމާއެކު އާރިކް ގޮސް ތަޅުގައި ހިފައި ކުޑަކޮށް ހުޅުވާލިއެވެ. ނަމަވެސް އެތެރެއިން އިވެން ފެށި އަޑުތަކުގެ ސަބަބުން ދެމީހުންވެސް ހުރި ފިޔަވަޅު މަތީގައި ގަނޑުވިއެވެ.

“އަހަރެން ބޭނުމެއް ނޫން މި ކުއްޖާއެއް.. އަހަރެން ބޭނުންވީ ފިރިހެން ދަރިއެކޭ ރަޝީދު.. ދެން މި ކުއްޖާގަނޑު ގޮވައިގެން އަހަރެންވީ އުޅެން..” ޖުވައިރިޔާ ރަޝީދު ގާތު ބުނާ އަޑު އިވިގެން ދިޔައެވެ.

“އަންހެން ދަރިއެއް ލިބުނަސް ކީއްތަވީ؟ އެއީ ހަމަ އަހަރެމެންގެ ދަރިއެއްނު؟ ވީއިރު ޖުވައިރިޔާ އެއްވެސް އެއްޗެއް ނޭނގޭ އެ ތުއްތު ކުއްޖާއަށް ކޮން ނަފުރަތެއް ތި ކުރަނީ؟” ރަޝީދު ނުރުހިފައި ބުނެލިއެވެ.

“އަހަރެން އާއިލާ އެންމެން ގާތު ބުނާނަން ވިހޭތަނުން މި ކުއްޖާ މަރުވީއޭ… ރަޝީދުވެސް ކަންތައް ކުރަންވާނީ އެ ގޮތަށް..” ޖުވައިރިޔާ ބުނެލިއެވެ.

“ބަލަ ޖުވައިރިޔާ މޮޔަވީތަ؟” ރަޝީދުގެ އަޑު މިފަހަރު ކުރިއަށްވުރެ ބާރުވިއެވެ. އެވަގުތު އަރޫޝާ ދޮރުފަތް ބާރަކަށް ހުޅުވާލީ އިވެމުންދާ ވާހަކަތައް އަޑުއެހުމަށް އެ ހިތަށް ކުޅަދާނަ ނުވުމުންނެވެ. އެއާއެކު ޖުވައިރިޔާ އާއި ރަޝީދު ހިމޭންވިއެވެ. އަރޫޝާ މަޑުމަޑުން ހިނގާފައި ގޮސް ޖުވައިރިޔާގެ އަތުތެރޭގައި އޮތް ލޯބި ދޮން ފުއްގަނޑެއް ފަދަ ކުއްޖާއަށް ބަލާލިއެވެ. އެ މައުސޫމް ކުއްޖާދެކެ ޖުވައިރިޔާ ރުޅިއަންނަންޖެހޭ އެއްވެސް ސަބަބެއް ނެތެވެ.

ދޮރުމަތީގައި ހުރި އާރިކްގެ ދެއަތް ވަނީ މުއްކެވިފައެވެ. ޖުވައިރިޔާ އަކީ އެހާ ރަހުމުކުޑަ މީހެއް ކަމަކަށް އޭނާ ހިޔެއް ނުކުރެއެވެ. ޖުވައިރިޔާ ރަޝީދުއާ އިނީ ފައިސާގެ ދަހިވެތިކަމުގައިކަން އޭނާއަށް އެނގުނު ނަމަވެސް އޭނާ ހީކުރީ ފަހުން ޖުވައިރިޔާ ރަޝީދު ދެކެ ލޯބިވާ ކަމަށެވެ. ނަމަވެސް އެހެނެއް ނުވިތާއޭ އެހިތަށް އެރިއެވެ. ރަޝީދުގެ ދަރިއެއް ދެކެ ނުވި ލޯތްބެއް އޭނާ ރަޝީދު ދެކެ ވެދާނެ ހެއްޔެވެ؟ ރަޝީދު އަކީ އާރިކްގެ ދޮންބައްޕައަށް ވިޔަސް އޭނާ ރަޝީދުއަށް ހާދަ ޤަދަރެއް ކުރެއެވެ.

“ބައްޕާ ބޭބީއަށް ކިޔާނީ އަޒްކާ ދޯ؟ އަޅުގަނޑު ބޭނުމީ އަޒްކާ ކިޔަން..” އަރޫޝާ އެ ތުއްތު ފުރާނަ އުރާލަމުން ބުނެލިއެވެ. ޖުވައިރިޔާގެ މޫނުމަތިން އެއްވެސް އަސަރެއް ފާޅުނުވިކަމުގައި ވިޔަސް ރަޝީދު ހިނިތުންވެލިއެވެ.

“ބައްޕައަށް ރީތި ތި ނަން ވެސް.. އެހެންވީމަ އަޒްކާ ދޯ ކިޔާނީ؟” ރަޝީދު ލޯތްބާއެކު ބުނެލިއެވެ.

“ލޯބި ލޯބި އަޒްކާ..” އަރޫޝާ އަޒްކާގެ ކޮލަށް ބޮސްދެމުން ބުނެލިއެވެ.

ތިން ދުވަސް ފަހުން ޖުވައިރިޔާ ގެއަށް ބަދަލުކުރެވުނެވެ. އަޒްކާގެ ކަންތައްތަކުގައި ޖުވައިރިޔާ ފަރުވާކުޑަ ކުރާކަން އާރިކްއަށް އެނގެއެވެ. ވުމާއެކު ހުސްވަގުތެއް ލިބޭއިރަށް އޭނާ ހުންނަނީ އަބަދު އަޒްކާ ފެންނަ ހިސާބުގައެވެ. އަރޫޝާ ވެސް އެ ދުވަހު ހޮސްޕިޓަލުން އިވުނު ވާހަކަތައް އަޑު ނީވޭ ކަމަށް ހަދައިގެން ހުރީ އެވާހަކަ ދައްކައިފިނަމަ ޖުވައިރިޔާގެ ރުޅި ގަދަވުން ނޫންކަމެއް ނުވާނެތީއެވެ.

އޭގެ ގާތްގަނޑަކަށް ތިންމަސް ދުވަސްފަހުން އާރިކް ސްކޫލުން ގެއަށް އައިއިރު ގޭތެރެއިން އެއްވެސް މީހެއްގެ ހިލަމެއް ނުވެއެވެ. އޭނާ އެންމެ ފުރަތަމަ ވެސް މިސްރާބުޖެހީ ޖުވައިރިޔާގެ ކޮޓަރިއާ ދިމާއަށެވެ. ގެއަށް އަންނަ ގޮތަށް އޭނާގެ ހިތަށް ހަމަޖެހުމެއް ލިބެނީ އަޒްކާގެ ސޫރަ ފެނުމުންނެވެ. އޭނާ މަޑުމަޑުން ގޮސް ކޮޓަރީގެ ދޮރު ހުޅުވާލިއެވެ. އެވަގުތު ބޮޑު އެނދުމަތީގައި ބާއްވާފައި އޮތް އަޒްކާ އެ ލޮލުގައި އަޅައިގަތެވެ. ނިދާލާފައި އޮތް އިރު އެ މޫނުމަތިން ފެންނަމުން ދިޔައީ މައުސޫމްކަމެވެ. ޖުވައިރިޔާ އޭރު ހުރީ ކޮޓަރީގެ ކުޑަދޮރު ދޮށުގައި އާރިކްއަށް ފުރަގަސްދީގެންނެވެ. ފޯނު ކަންފަތުގައި ޖަހާފައި ވީއިރު އޭނާ ދައްކަމުން ދިޔަ ވާހަކައަށް އާރިކް ސަމާލުކަން ދިނެވެ. އޭރު އޭނާ ކޮޓަރިއަށް ވަތްކަމެއް ޖުވައިރިޔާއަކަށް ނޭނގެއެވެ.

“މަ ކަލޭ ބުނި ވަރަކަށް ލާރި ދީފާނަމޭ.. އެ ކުއްޖާ ކަލޭ ގެންދޭ..” ޖުވައިރިޔާ އެހެން ބުނުމާއެކު އާރިކްއަށް ލިބިގެން ދިޔައީ ޝޮކެކެވެ. އަޒްކާ ދެކެ ކިތަންމެ ރުޅިއަޔަސް ޖުވައިރިޔާ އަޒްކާ ވިއްކާލަފާނެއެކޭ އެހިތަކަށް ދުވަހަކުވެސް ނާރައެވެ.

“މިހާރު އެއާރޕޯޓުގައިތަ ތި ހުރީ؟ އަހަރެން މިހާރު އެ ކުއްޖާ ގެންދަންވީތަ؟ އާނ އޯކޭ.. އެހެންވީމަ މި ދަނީ އިނގޭ ގަޑިއެއްހާ އިރު ތެރޭގަ..” ޖުވައިރިޔާ އެހެން ބުނެ ފޯނު ބޭއްވިއިރު އެމޫނުމަތިން ހިތްހަމަޖެހުމުގެ އަސަރުތައް ފާޅުވާން ހުއްޓެވެ. އެންމެފަހުން އޭނާ އެ ކުޑަ ކުއްޖާގަނޑުގެ ކިބައިން ސަލާމަތްވަނީއޭ އެހިތަށް އެރިއެވެ. ނަމަވެސް އޭނާ ފަހަތަށް އެނބުރެލި ވަގުތު ދޮރުމަތީގައި ހުރި އާރިކް ފެނުމުން އެ މޫނުމަތީގެ ކުލަވަރު ބަދަލުވެގެން ދިޔައެވެ.

“އާރިކް؟ ކީއްވެ އެހާ އަވަހަށް ސްކޫލުން ތިއައީ؟” ޖުވައިރިޔާ ހާސްވެފައި އަހާލިއެވެ. އަނެއްކާ އޭނާ ދެންމެ ދެއްކި ވާހަކަތައް އާރިކްއަށް އަޑުއިވުނު ހެއްޔެވެ؟

“ތީ ހަމަ މި ތުއްތު ކުއްޖާ ވިހޭ މައިމީހާބާއޭ އަހަރެންގެ ހިތަށް އަރާ!” އާރިކް ދަތްކުނޑި ވިކާލަމުން ބުނެލިއެވެ. އޭނާގެ ދެއަތް މުއްކެވިފައި ވީއިރު ރުޅިއައިސްގެން އެ ހަށިގަނޑު ތުރުތުރު އަޅައެވެ.

“އާރިކް.. އަހަރެން މި ކަންތައް ކުރަނީ އަހަރެމެން ދެމީހުންގެ އުފަލަށޭ.. އަޒްކާގެ ކިބައިން ސަލާމަތް ވެވުނީމަ އަހަރެމެންނަކަށް ނީންނާނެ އެއްވެސް ހުރަހެއް.. ދެން އަރޫޝާ.. ހަހަހަ.. އެއީ ތާކު ހުރި ބޮޑު މޮޔައެއް.. އަހަރެމެން ބަލަންވީ ރަޝީދުގެ ކިބައިން ހުރިހާ މުދަލެއް އާރިކްއަށް ލިބޭތޯ.. އެހެންވީމަ..” ޖުވައިރިޔާ އައިސް އާރިކްގެ އަތުގައި ހިފައިގެން ވާހަކަދައްކަން ފެށި ނަމަވެސް އާރިކް އެއަތް ފޮޅުވާލަމުން ޖުވައިރިޔާގެ ވާހަކަ މެދުކަނޑާލިއެވެ.

“ހުއްޓާލާ! އައިވް ހޭޑް އިނަފް.. ލަދުގަނޭ ތީ އަހަރެންގެ މަންމައޭ ބުނަން.. ފައިސާ ފައިސާ ފައިސާ! އެއީ ދޯ މަންމައަށް މުހިންމު އެއްޗަކީ! އެހެން އެއްވެސް މީހެއްގެ އުފަލެއް މަންމައަކަށް މުހިންމެއް ނޫން ދޯ!” އާރިކް ބާރަކަށް ބުނެލިއެވެ. އެ ދެލޮލުން ޖުވައިރިޔާއަށްޓަކާ ފެނިގެން ދިޔައީ ނަފުރަތެވެ.

“އާރިކްއަށް އަދި ނުވިސްނެނީ.. ފަހުން އަދި ވިސްނޭނެ..” ޖުވައިރިޔާ މަލާމާތުގެ ރާގަކަށް ބުނެލިއެވެ. އަދި އަވަސް ހަރަކާތަކާއެކު އެނދުމަތީގައި ނިދާފައި އޮތް އަޒްކާ ގައިގައި ފޮތިގަނޑެއް އޮޅާލުމަށްފަހު އުރާލިއެވެ.

“ކޮންތާކަށް ތި ދަނީ އަޒްކާ ގޮވައިގެން؟؟ ނުދެވޭނެ!” އާރިކް ދެއަތް ފުޅާކޮށްލަމުން ކޮޓަރީގެ ދޮރު ބައްދާލިއެވެ.

“އަޒްކާ ތަޅުންގަނޑު މައްޗަށް ހޫރާނުލަނީސް ތަން ދައްކާ!” ޖުވައިރިޔާ ނުރައްކާތެރި ގޮތަކަށް ބުނެލިއެވެ. އެއާއެކު އާރިކްއަށް އެއްފަރާތްވާން މަޖުބޫރުވިއެވެ. އަޒްކާއަށް އެއްވެސް ގެއްލުމެއް ވާކަށް އެ ހިތެއް ނޭދެއެވެ.

“ބައްޕައަށް ގުޅާނަން! ފުލުހުންނަށްވެސް ގުޅާނަން!” ޖުވައިރިޔާ ދޮރުން ނިކުންނަން ފެށުމުން އާރިކް ގޮވާލިއެވެ. އެއާއެކު ޖުވައިރިޔާ ފަހަތަށް އެނބުރި، ނުލަފާ ގޮތަކަށް ހީލިއެވެ.

“ރަޝީދުގެ މީޓިންގް ނިމެން އަދި އެބައޮތް ތިން ގަޑިއިރު.. އެނގެއެއްނު އެއީ މީޓިންގް ގަ ހުންނައިރު ފޯނު ނަގާ މީހެއް ނޫންކަން؟ ދެން ފުލުހުންނަށް ހުށައަޅައިގެން ތިކަން ވާނެތަ؟ އަޒްކާގެ ނަން މި އާއިލާގެ ރަޖިސްޓްރީގައި ހިމެނިފައެއް ނުވާނެ..” ޖުވައިރިޔާ އެހެން ބުނެފައި ނިކުމެގެން ދިޔައެވެ. ކާރަށް އަރާ ދުއްވާލިތަން ބަލަން އާރިކް ހުރިއިރު އޭނާގެ ހިތް ބާރުބާރަށް ތެޅެނީއެވެ. އެ ސިކުނޑި އެވަގުތު ވަނީ ބޮޑު ހާސްކަމެއްގެ ތެރޭގައެވެ. ކުރަންވީ ނުކުރަންވީ ކަމެއް އޭނާއަށް ނޭނގޭ ކަހަލައެވެ.

އާރިކް އެވަގުތު ސިކުނޑިއަށް އައި އެންމެ ރަނގަޅުވާނެހެން ހީވާ ގޮތަށް ކަންތައް ކުރިއެވެ. މަގުމަތިން ޓެކްސީއެއް ނަގައިގެން ހުޅުލޭ ފެރީޓާމިނަލްއާ ދިމާއަށް މިސްރާބުޖެހިއެވެ. އޭރު އޭނާ ގެންދިޔައީ ހުއްޓުމެއްނެތި ރަޝީދުގެ ފޯނަށް ގުޅަމުން ނަމަވެސް ރަޝީދު ޖަވާބެއް ނުދިނެވެ.

އާރިކްއަށް ފެރީޓާމިނަލްއަށް ދެވުނުއިރު ޖުވައިރިޔާ އަރައިގެން ހުރި ފެރީ ނައްޓާލަނީއެވެ. ވުމާއެކު އޭނާއަށް ޖެހުނީ ދެން އޮތް ފެރީ ނައްޓާލަންދެން މަޑުކުރާށެވެ.

އާރިކް އެއާރޕޯޓު ތެރެއަށް ވަދެ އެކި ކޮޅުކޮޅު ހޯދަން ފެށިއެވެ. ދެއަތުން ބޮލުގައި ހިފަހައްޓައިގެން ހުރިއިރު އޭނާއެކޭ ހަތަސްއުދަރެސް ފެނުޖެހިފައިވާ މީހެކޭ އެއްގޮތެވެ. އާރިކްއަށް ޖުވައިރިޔާ ފެނުނީ އެއާރޕޯޓު ތެރޭގައި އެނބުރޭތާ ތިރީސް ވަރަކަށް މިނެޓު ފަހުންނެވެ. އަޒްކާ އުރައިގެން ޖުވައިރިޔާ ކޮންމެވެސް މީހަކާ ވާހަކަދައްކަން ހުރިތަން ފެނުމުން އާރިކް އެތަނާ ދާދި ކައިރީގައި ހުރި ތަނބެއްގެ އަނެއްފަރާތުގައި ނިވާވެލިއެވެ. ސިއްރުސިއްރުން އޭނާ ބޯދިއްކޮށް ބަލާލި ވަގުތު ޖުވައިރިޔާ ގާތުގައި ހުރި މީހާ ފެނި އެހިތް ބިރުވެރިކަމުން ފުރިގެން އައެވެ. ކަޅުކުލައިގެ ބޮޑު ކޯޓެއް ލާފައި ހުރި އެ ފިރިހެންމީހާ ނުލާހިކު ބިޔަވެފައި ދިގެވެ. އަޅައިގެން ހުރި އަވިއައިނުގެ ސަބަބުން އެ ނުރައްކާތެރި ދެލޯ ވަނީ ފޮރުވިފައެވެ. އޭނާއަށް ލިބިގެން ވަނީ އެފްރިކާ މީހުން ހުންނަ ކަހަލަ ކަޅު ހަންގަނޑެކެވެ. އާރިކް އޭނާގެ ފޯނުން އެމީހާގެ ފޮޓޮއެއް ނަގައި ރައްކާކޮށްލިއެވެ. އެވަގުތު އޭނާގެ ފޯނުން އެޅުނު ފްލެޝްއާއެކު ޖުވައިރިޔާ އާއި އެމީހާ އެދިމާ ބަލާލިއެވެ. އާރިކްއަށް ދެލޯ ބޮޑުކޮށްގެން އެދިމާއަށް ބަލަން ހުރެވުނެވެ.

(ނުނިމޭ)