އެ ތޫފާނީ ރޭ (13)

އަހަރެންގެ ސިފަޖެހިގެންހުރި އެނުބައި މީހާ އަހަރެންގެ ލޯބިވެރިޔާ ގެންގޮސް ރެއިލިންގެ މަތީ ބޭންދުމަށްފަހު އަތްދޫކޮށްލީ އަހަރެންގެ ކުރިމަތީއެވެ. މައިޝާ ކައްސާލައިގެން ތިރިއަށް ވެއްޓުނުއިރު ނުކުޅެދޭ މީހެއް ފަދައިން އެދިމާއަށް އަތްދިއްކޮށްގެން އެއިންގޮތަށް އަހަރެން އިނީމެވެ. ދެން ފެނިގެން ދިޔައީ އަހަރެން ދުވަހަކުވެސް ނުދެކޭފަދަ ބިރުވެރި ސިފައެއްގައިވާ އެއްޗެކެވެ. އަހަރެންގެ ސިފައިގާ ހުރި އެތި އޭގެ އަސްލު ސިފައަށް ބަދަލުވުމަށްފަހު ވައިގެތެރެއަށް ގެއްލިގެންދިޔައީ ވަޔާދާ ސައިބޯނި ބޮކިތަކެއް ފަދައިންނެވެ. އެއާއިއެކު އަހަންނަށް ކޮޅަށް ތެދުވެވިއްޖެއެވެ. ފަޔަށް ލެވުނުހާ ބާރެއްލާފައި ގޮސް ރެއިލިންގެ ކައިރިއަށް ހުއްޓެމުން ތެޅިތެޅިއޮތް ހިތަކާއިއެކު ތިރިއަށް ބަލާލީމެވެ. ދިހަބުރީގެ އެ ޢިމާރާތާއި ދިމާއިން ތިރީގައިތިބި މީހުންތައް އެއްދިމާއަކަށް އެއްވާމަންޒަރު ފެންނަމުންދިޔައެވެ.

އަވަސް ފިޔަވަޅުތަކެއް ނަގަމުން ދުވެފައި ގޮސް އެއްވެފައިވާ މީހުންގެ ކައިރިއަށް އަހަރެން ހުއްޓިލީމެވެ. އެތެނުގައި ގިނައިން ތިބީ އަހަރެމެންގެ ޢާއިލާގެ އެންމެ ގާތް މީހުންނަށް ވީއިރު އެއެންމެންގެ މޫނުމަތިން ފެންނަމުންދިޔައީ ހާސްކަމެވެ.

މީހުންތައް ދުރުކުރަމުން އަހަރެން އެތެރެއަށް ދެމިގަތީމެވެ. ފެނުނު މަންޒަރުން އަހަރެންގެ ހެއަށް ގޮތްވިއެވެ.

ލޯ ހުޅުވާލުމާއިއެކު ދިއްލާފައިވާ ބޮކިތަކުގެ އަލި ލޮލަށް އެޅުމުން އުނދަގޫވެގެން ދެލޯ އުނގުޅަމުން އަހަރެން އެނދުން ތެދުވެ ވަށައިގެންވާ މާހައުލަށް ނަޒަރު ހިންގާލީމެވެ. އެއީ އަހަރެންގެ ކޮޓަރިއެވެ. އެނދުކައިރީގައިހުރި ސައިޑް ކަބަޑް މަތީ ބަހައްޓާފައިހުރި ރަތް ފިނިފެންމާތައް ޖަހާފައިވާ މާޓުކުރި ފިޔަވާ އެހެން ތަފާތުކަމެއް ކޮޓަރިއަކުން ނުފެނެއެވެ. އަހަރެންގެ ދާދި ކައިރީގައި މަންމަ ހުއްޓެވެ. މިލާފައިވާ މޫނާއިއެކު ގަދަކަމުން ހިނިތުންވެލަމުން ޖޫސްތައްޓެއް ދިއްކޮށްލުމުން އަހަރެން އެއްނޭވައިން އެ ބޯލީމެވެ.

ނޭނގޭ ފަޅުކަމެއް އަހަންނަށް އިޙްސާސްވަމުން ދިޔައެވެ. މަންމަ އަރާމުކޮށްލާށޭ ބުނެފައި ބޭރަށް ނިކުތުމުން ބެލްކަންޏާއި ދިމާއަށް އަހަރެން މިސްރާބުޖެހީމެވެ. އަހަންނަށް ކުއްލިއަކަށް ހުއްޓެވުނީ އެއްޗަކަށް ފައިން އެރުމުންނެވެ. ބަލާލިއިރު ރަތް ފިނިފެންމާ ފިޔައެކެވެ. އަހަރެން އެފިޔަ ނަގާ އެއަށް އެއްފަހަރު ކޮޓަރިތެރެއަށް އެއްފަހަރު ބަލާލީމެވެ.

ފޯނުބަލާ އެނބުރި ކޮޓަރިއަށް އައިސް ވަން މަންމައަށް މިމަންޒަރު ފެނި ފެންކަޅިވެފައިވާ ހާލު އަހަންނަށް ބަލާލަމުން ތަންކޮޅެއް އަޑުހަރުކޮށް ޔޫސުފްއަށް ގޮވާލިއެވެ. “އަހަރެން ނުބުނަންތަ ކޮޓަރި ރީތިކޮށް ސާފުކުރާށޭ. އެހެރަ މާޓުކުރިވެސް ނަގައްޗޭ ބުނިންދޯ” ޔޫސުފް އައުމުން މަންމަ ވާހަކަދެއްކީ ނުރުހުންވެފައެވެ. އަހަރެން ވިސްނާލީމެވެ. ކުއްލިއަކަށް އަހަރެންގެ ހަނދާނަށް އައީ މައިޝާގެ ލެއިން ތަތްތެޅިފައިވާ މޫނެވެ. ހުއްޓިފައިވާ ކަޅިއެވެ.ފަޅިފަޅިވެފައިވާ ބޮލުގެ ނާށިގަނޑުގެ ތެރެއިން ބުރައިގެން ގޮސްފައިވާ ލޭތަކާއި ސިކުނޑީގެ ބައިތަކެވެ. ޗަސްވެފައިވާ އެ ތުނި ހަށިގަނޑުގައިވާ އެކިވަރުގެ ޒަޚަމްތަކެވެ.

“މަންމާ! މައިޝާ ކޮބާ؟ އަހަރެން އޭނަ ކައިރިއަށް ނުގެންދިޔައީ ކީއްވެ؟” އަހަރެން ކާރުގެ ތަޅުދަނޑި އަތުގެ ތެެއަށްލާ އަތް މުއްކަވާލަމުން ބުނީމެވެ.

“މައިޝާ މިހާރު މިދުނިޔެއަކުނެތް!” މަންމަގެ ބަސްތައް ހީވީ އަހަރެންގެ ކަންފަތުގެ ތޫރި ފަޅާލަފާނެ ހެންނެވެ. އަހަރެން ނޫނެކޭ ބުނެ ހަޅޭއްލަވައިގަތީމެވެ. އެވަގުތު މަންމަގެ ފޯނު ރިންގުވާންފެށުމުން މަންމަ ފޯނު ނަގައި ވާހަކަދައްކަން ފެށިއެވެ. އަދި އަހަރެންގެ އަތަށް ފޯނު ދިއްކޮށްލިއެވެ. “ޑޭޑް!” އަހަރެންގެ އަޑު ބެދިއްޖެއެވެ.

އެންމެ ފަހު ފަހަރަށް އަހަރެން މައިޝާގެ މޫނު ދެކެލުމަށް ދިޔައީމެވެ. އެ މޫނުމަތީވަނީ ހިނިތުންވުމެކެވެ. އެއީ އަހަރެންގެ ހިތް ފަތަޙަކުރި ހިނިތުންވުމެވެ. އަހަންނަށް ހުރެވުނީ މައިޝާ އަހަރެން ދޫކޮށްލާފައި ދިޔައީކަމަށް ޤަބޫލްކުރަން ދަތިވެފައެވެ. ނަމަވެސް ޙަޤީގަތް ބަދަލެއް ނުކުރެވޭނެއެވެ. މައިޝާ ވަޅުލާފައި ގެއަށް އަންނަންދެންވެސް އަހަރެންގެ ލޮލުން އެންމެ ކަރުނަތިއްކެއްވެސް ވައްޓައެއްނުލަމެވެ. މީހުންގެ ކުރިމަތީގައި އަހަރެންގެ ބަލިކަށިކަން ދައްކަން ބޭނުންނުވީއެވެ.

***

އަލްވިންގެ އަޑުބެދުނީހެން ހީވެއެވެ. ދައްކަމުންދިޔަ ވާހަކަ މެދުކެނޑުނީއެވެ. ކަނާތުގެ ބޮޑުވާއިނގިލިން ލޮލުން ވެއްޓުނު ކަރުނަތިކި އެއްފަރާތްކޮށްލަމުން އައިސް އަލަމާރިއާއި ދިމާއަށް ހިނގައިގަތެވެ.

ބަސްހުއްޓިފައި އަލްވިންއާއި ދިމާއަށް ބަލަހައްޓައިގެން އިން ޝިްލާގެ ކޯތާފަތްވަނީ ތެމިފައެވެ. ނަމަވެސް އެއިންގޮތައް ޝިމްލާއިނީ އެކަރުނަތައް ބޭނުން މަންޒިލަކަށް ދާން ދޫކޮށްލައިގެންނެވެ.

އަލްވިން ބިއްލޫރި ތައްޓެއް ގެނެސް ކޮފީ ޓޭބަލްމަތީ ބަހައްޓާލުމަށްފަހު އެއަށް ފެންއެޅިއެވެ. އަދި ޓިޝޫބޮނޑިން ޓިޝޫއެއް މައިޝާއަށް ދިއްކޮށްލިއެވެ. މައިޝާ ނޭފަތް ދަމާލުމަށްފަހު އޭގައި ހިފިއެވެ. އަލްވިން އަނެއްކާވެސް ކުޑަދޮރާއި ދިމާއަށް ހިނގައިގަތީ އަތުގައި އޮތް ފެންފުޅިން ފެންކޯވަރެއް ބޯލުމަށްފަހުއެވެ.

***

ނަމަވެސް ގެއަށް ގޮސް ކޮޓަރިއަށް ވަނުމާއިއެކު އަހަރެން ބަލިކަށި މީހަކަށްވިއެވެ. އަޑުން އަޑު ނަގާ ރޮއިގަނެވުނެވެ. ގޮށް މުއްކަވާފައި ފާރުގައި ޖެހުނު ވަރެއްގެ އަދަދެއް ނޭނގެއެވެ. އަހަންނަށް މައިޝާ އޭތީގެ އަތްދޮށުން ސަލާމަތް ނުކުރެވުނީތީ އަމިއްލަ ނަފްސަށް އަޑުލީމެވެ.

ޖެހިގެން އައި ދުވަހު މުޅި ސޯޝަލް މީޑިއާގައި މައިޝާގެ މަރުގެ ވާހަކަ ތަފާތު ގޮތްގޮތަށް ދެކެވުނު. އަލްވިން އެންމެ ދެރަވީ އޭނަ އަމިއްލައަށް މަރުވީއޭ ކިޔައިގެން ގިނަމީހުން ވާހަކަދެއްކީމަ. އަސްލު ކަންތައް ވެފައޮތްގޮތުން ގިނަ މީހުންނަށް އެހެން ހީވިއަސް ދެފަރާތުގެ ޢާއިލާއަށް އެކަން ޤަބޫލުކުރަން ދަތިވި. ދެން ހުރިހާ އެންމެންގެ ސުވާލުތަކުގެ އަމާޒުފަތްގަނޑަކަށްވީ އަހަރެން. ހަޤީޤަތް އެނގެނީ އަހަންނަށް އެކަނި. ނަމަވެސް އެމީހުންގެ ކުރިމަތީ ހަޤީޤަތް ހާމަކުރާނެހާ ހިތްވަރެއް އަހަންނަކަށް ނުލިބުނު. “އަހަރެން މަންމަމެންގެ ގާތަށް އައުމަށްފަހު އެނބުރި ދިޔައިރު މައިޝާ ފެންނަން ނެތްކަމާއި އެވަގުތު ތިރިން ހަޅޭއްލަވާއަޑު އިވިގެން ބަލާލިއިރު މީހުންތައް އެއްވާތީ ފެނުމުން އަވަހަށް ތިރިއަށް އައީ.” އަހަރެން ބަޔާނުގައި ބުނިން. އަހަރެން މަންމަމެންގެ ގާތަށް ފޭބިއިރު އެތާ އިތުރު މީހުންވެސް އޭރު ތިބުމުން ޕޮލިހުންވެސް ނިންމީ އަހަރެންގެ ވާހަކަ ތެދުކަމަށް. މައިޝާ ރެއިލިންމަތީ އިށީނުމުން ވާރޭ ވެހުމުގެ ސަބަބުން ކައްސާލީހެންނޭ ހީވަނީ ބުނީ. އެކަމަކު ހުރިހާކަމެއް ހިނގީ އަހަރެންގެ އިޙުމާލުންކަމަށް މައިޝާގެ ބައްޕަމެން ޤަބޫލްކުރީ. އެހެންވެ އޭގެ ފަހުން އަހަންނާއި އަދި މިޢާއިލާއާއިވެސް އެއްވެސް ގުޅުމެއް އެމީހުން ނުބާއްވާ.

އެދުވަހަށްފަހު މައިޝާގެ މަރާއިއެކު އަހަރެންގެ ހިތްވެސް މަރުވިފަދަ. ދުނިޔޭގެ އުފާތައް އަހަންނަށް މާ މުހިއްމު އެއްޗަކަށް ނުވި. އެހަނދާންތައް އަބަދުވެސް އާވެ އާވެ ހުންނަނީ. ވިއްސާރަ ރެއެއްގައިވިއްޔާ ހިތުން އެބިރުވެރިކަން ފިލާނުދޭ. އަހަރެން އަމިއްލަ ނަފްސު ކުށްވެރިކުރިން އަހަންނަށް މައިޝާ އެދުވަހު ސަލާމަތް ނުކުރެވުނީމަ. އެގޮތަށް ވާރެއާއި ތެމެން ދޫކޮށް ނުލެވުނު ނަމައޭ އަބަދުވެސް ހިތަށް އަރާ. އެކަމަކު ދެން ކިތަންމެ ހިތާމައެއް ކުރިއަސް މައިޝާ އެނބުރި ނާންނާނެކަންވެސް އެނގޭ. އެހެންވިޔަސް އަހަރެންގެ ހިތް އެހެން ފަރާތަކަށް ނުލެނބުނު. ކިތަންމެ އަންހެން ކުދިންނެއް އަހަރެންގެ އިޝާރާތަކަށް ބަލަބަލާ ތިބެނީ. ނަމަވެސް އަހަރެން އެއިން އެއްވެސް ކަމަކަށް ޝައުޤެއް ނެތް. އަހަރެން ލޯބިކުރީ އެކަނިވެރިކަމަށް.

***

އަލްވިން ޝިމްލާއާއި ދިމާއަށް އެނބުރިލިއެވެ. އަދި އެ މައުސޫމް މޫނަށް ފުންކޮށް ނަޒަރު ހިންގާލިއެވެ.

“އަހަރެންގެ މަރުވެފައިވާ ހިތަށް ދިރުން ގެނެސްދިން ހަމައެކަނި މީހަކީ ތިއީ. އަހަރެންގެ ނިވިފައިވާ ބައްތީގެ ހުޅުކޮޅު އަލުން ދިއްލެން އުޅޭކަމުގެ އިޙްސާސް ފުރަތަމަ ފަހަރަށް ކުރެވުނީ ޝިމް ފެނުމުން. ދެވަނަ ފަހަރަށް އަހަރެންގެ ހުއްޓިފައިވާ ހިތުގައި ވިންދު ޖަހާލީ ޝިމްއަށްޓަކައި. މައިޝާއެއް ދެން އެނބުރި ނާންނާނެ. މައިޝާގެ ހަނދާނުގައި އެއްވެސް އަލިކަމެއްނެތް ދުނިޔެއެއްގައި ހަތްމަސްދުވަސް އަހަރެން ވޭތުކޮށްފިން. އަހަރެން ދެން ބޭނުމީ ޝިމްއާއިއެކު އަލުން އާފެށުމަކުން ފަށަން. އަހަންނަށް މިހާރު ބޭނުމީ ޝިމްލާގެ އޯގާތެރިކަމާއި އަޅާލުން. ތިޔަ ލޯތްބާއި ނުލާ ދެން ކެތެއްނުވާނެ. އަލްވިން ވަރަށް ވަރަށް ލޯބިވޭ ޝިމްދެކެ. ވިލް ޔޫ ބީ މައިން ފޯރ އެވާރ” ޝިމްލާގެ ދެއަތުގައި ހިފައިގެން ޝިމްލާގެ ކައިރީގައި ސޯފާގައި އިށީނދެއިން އަލްވިންގެ ދުލުން ފުރަތަމަ ފަހަރަށް ޝިމްލާއަށްޓަކައި ހިތުގައިވާ ލޯބި ފާޅުކުރިއެވެ. ޝިމްލާ ދެލޯ ބޮޑުކޮށްލައިގެން ހައިރާންވެފައި އިންއިރު އެކޯތާފަތް މައްޗަށް ފިޔާތޮށިކުލަ އަރަމުންދިޔައެވެ. ޝިމްލާ ހިނިތުންވުމެއް ހަދިޔާ ކޮށްލަމުން މަޑުމަޑުން ބޯޖަހާލިއެވެ. އަދި އަލްވިންގެ ހަށިގަނޑުގައި ބާރަށް ބައްދާލިއެވެ.

“އަލްވިން!” ޚިޔާލީ ދުނިޔެއަށް ގެއްލިފައިހުރި އަލްވިންއަށް ހޭވެރިކަންވީ ޝިމްލާ ގޮވާލުމުންނެވެ. އަލްވިންގެ ލޯ އަމާޒުވެފައިވަނީ ސޯފާއިން ތެދުވެގެން އަލްވިންއާއި ދިމާއަށް ހިނގާލާފައި އަންނަ ޝިމްލާއަށެވެ. އޭރު ދެހިތުގެ ތެޅުންވެސްވަނީ އަވަސްވެފައެވެ.

ޝިމްލާއަށް އެޅުނީ ދެތިން ފިޔަވަޅެވެ. އަލްވިންއަށް ޝިމްލާހުރި ހިސާބަށް ނުދެވެނިސް ޝިމްލާ ބަނޑުވަތަށް ވެއްޓިއްޖި ޚަބަރު ހުސްވެއްޖެއެވެ. އަލްވިން ދުވެފައި ގޮސް  ޝިމްލާ އަތްދަނޑި މައްޗަށް އުފުލާލުމަށްފަހު ސޯފާގައި ބޭއްވިއެވެ. އަދި ކައިރީގައި ހުރި ފެންފުޅިން ފެންފޮދެއް ޝިމްލާގެ މޫނުގައި ކާއްތާލިއެވެ. ނަމަވެސް އަދިވެސް ޝިމްލާ ހޭއަރާގޮތެއް ނުވިއެވެ. ހަމަ އެވަގުތު މުޅި އެޕާރޓްމެންޓުން ކަރަންޓް ދިޔައެވެ. އަލްވިން ޝިމްލާގެ މަގަތުގައި އިށީނދެ ޝިމްލާގެ އަތުގައި ހިފާލިއެވެ. އޭނާގެ ހިތް ބިރުގަންނަންފެށީ އިންތިހާއަށެވެ.

އަނެއްއަތުން ޖީބުގައި އޮތް ފޯނު ނެގުމާއި އެކު ކަރަންޓް އައެވެ. ދެން އަނެއްކާވެސް ބޮކިތައް ނިވިދިއްލެން ފަށައިފިއެވެ. އަލްވިންއަށް ވަށައިގެންވާ މާހައުލަށް ނަޒަރު ހިންގާލެވުނީ ބިރުވެރިކަން ވަށާލައިފިކަމުގެ އިޙްސާސް ކުރެވުމުންނެވެ. އަލްވިންއަށް ބޭއިޚްތިޔާރުގައި ޝިމްލާގެ ދެއަތް ގެނެސް މެއާލާ ބޮނޑިކޮށްލެވުނެވެ. އެ މައުސޫމް ކުއްޖާއަށް އެއްވެސް ގެއްލުމެއް ވެދާނެތީ އަލްވިންގެ ހިތް ނުތަނަވަސްވަނީއެވެ. އަލްވިން އެއްއަތުން މަޑުމަޑުން ޝިމްލާގެ މޫނުގައި ފިރުމާލިއެވެ. އެދެލޮލުން ފެންނަމުންދަނީ އިންތިހާ ދަރަޖައިގެ ލޯތްބެވެ.

ބާރު ގަދަ އަތަކުން އަލްވިން ދުރަށް ހޫރާލިއެވެ. ހޫރާލިލެއް ބާރުކަމުން ކައިރީގައިހުރި ކޮފީ މޭޒާއިއެކު އަލްވިންގެ ހަށިގަނޑު ގޮސްޖެހުނީ ކުޑަދޮރުތަކާއި ދިމާލުން ފާރުގައެވެ. ފާރުގައި ޖެހިފައި މުށިތައް މައްޗަށް ވެއްޓުމާއިއެކު މޭޒުގެކަން އަލް ވިންގެ ނިތްކުރީގައި ވަރަށް ބާރަށް ޖެހި އެތަނުން ލޭއަންނަންފެށިއެވެ. އަލްވިން ގަދަކަމުން ލޯ ހުުުޅުވާ ޝިމްލާ ކޮބައިތޯ ބަލާލިއެވެ. ކުރިމަތިިިން ފެނުނު މަންޒަރުގެ ސަބަބުން އަލްވިން އެހާލުގައިވެސް ކޮޅަށް ތެދުވަން މަސައްކަތްކުރިއެވެ.

-ނުނިމޭ-

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.