ބިރުވެރި ލޯބީގެ ވާހަކަ : މަރްޙަބާ

އެއީ ކަޅުފޮއި އަނދިރި ރެއެކެވެ.އެރޭގެ އަނދިރިކަމާއި އެކު ވަށައިގެން އިވެމުންދިޔަ އަޑުތައް އަދިވެސް އަހަރެންގެ ކަންފަތުގައި ގުގުމަމުންދާހެން އަހަންނަށް ހީވެއެވެ. ބިންދައިގެންދިޔަ ގަހާއި އެކު އިވުނު ބިރުވެރި ރުޔުމުގެ އަޑު އަބަދުމެ އިވޭހެން އަހަންނަށް ހީވެއެވެ. ގުގުރާލާ ކޮންމެ ފަހަރަކު ވިދާލައެވެ. ވިދުވަރުގެ އަލިން އަހަންނަށް ތަންތަން ވަކިކުރަން އެނގެއެވެ. ބިންމަތީގައި ހެދިފައިވާ ޗަކަތަކާއި އެކު އަހަރެން ދެމެމުން ދިޔަ މަންޒަރު ލޯމަތިން ސިފަވަމުންދެއެވެ. އަޑިއަށް ގޮސްފައިވާ އަހަރެންގެ އެއްފައިގައި އޭރު އެޅިވޭން މިހާރުވެސް އަޅާހެން ހީވެއެވެ. ގައިގެ އެތަން މިތަނުގައި ހުރި ޒަޚަމްތަކުގެ ލަކުނުތައް ފެންނަ ކޮންމެ ފަހަރަކު ހިތް ބިރުވެރިކަމުން ފުރިދެއެވެ،
*******************

އަތުގައި އޮތް ފޮޓޯގަނޑަށް އަހަންނަށް ބަލާލެވުނެވެ. އެރީތި ލޮލުން ބަލާލާހެން ހީވާންފެށިއެވެ. އެއްމިޔަކުން ހީލާ ހީލުން ލޮލަށް ފެންނަން ފެށިއެވެ. އެ ރީތި އަޑު އަހާހިތްވިއެވެ،
ކޯޓުން އަހަރެންނާ އޭނާ ނުކުތީ އެތައް ބައެއްގެ ހެޔޮ ދުޢާ އާއި އެކުއެވެ. އައު ކައިވެނީގެ ގޮށް ބާރަށް ޖަހާލީ އުފާވެރި ދިރިއުޅުމެއް އުޅުމުގެ ނިޔަތުގައެވެ. ލޯބީގެ ވަގުތުތައް ދެމީހުން ގުނަމުން ގޮސް މިހާރު އަހަރެން މިއީ އޭނާގެ ޙައްޤަކަށް ވެއްޖެއެވެ،އަހަރެންގެ އުމުރަކީ 18 އަހަރެވެ. ވިކާޝްއަށް 30 އަހަރު ވީ ނަމަވެސް، ބަލާބެލުމަށް އޭނާއަކީ ވަރަށް ޒުވާން ރީތި ފިރެހެންވަންތަ މީހެކެވެ.
” އާނ.. ވިކާޝް ބޭނުންވާ ގޮތައް އަހަރެން ކަންތައްކުރާނަން.. އަހަރެންގެ ހުރިހާ ވެސް މީހަކީ ތީ.. އަހަރެންގެ ނިންމުމަށް މަންމަމެން އެއްބަސް ވާނެ..”
އަހަރެން ފިރިމީހާ ގާތު ބުނީމެވެ. އޭނާގެ ކޮނޑުގައި ބޯއަޅާލަމުންނެވެ. ޖެހިގެން އައި ދުވަހު އަހަރެމެން މަންމަ އާއި ބައްޕަ ގާތު ވިކާޝްގެ ރަށަށް ބަދަލުވާ ވާހަކަ ދެއްކީމެވެ.
” އެކަމަކު އަހަރެމެންގެ ހުރީ ހަމަ އެންމެ އަންހެން ދަރިއެއް.. ވަރަށް ދެރަވޭ ދުރަށް ދާތި.”
މަންމަ ދެރަވެފައި ބުނެލިއެވެ. އަހަރެން ވިކާޝްގެ މޫނަށް ބަލާލީމެވެ. އޭނާ އިސްޖަހާލުމުން އަދިވެސް އެ ނިންމުން ބަދަލު ނުކުރާކަން އަހަންނަށް އެނގުނެވެ،
” ވިކާޝް މި ދަރި ރަނގަޅަށް ބަލަންވާނެ.. އެގޮތުގެ މަތިން އެންމެ ރަނގަޅު.. ތި ދެމަފރިންގެ އުފާތަކަށް ހުރަސްއަޅާކަށް ނެތިން. ވިކާޝްތިއީ ޝަނޫއަށްވުރެން ދޮށީ މީހަކަށް ވާތީ އަހަރެމެންނަށް ވަރަށް އިތުބާރު ކުރެވޭ…”
ބައްޕަ މަންމައަށް ބަލާލިއެވެ. އަހަރެން ހިތްހަމަޖެހުނީ ބޭނުންވި ރުހުން ލިބުނީމައެވެ،
*********************************
ވިކާޝްގެ ރަށަށް އަހަރެން އައީ ދޯންޏެއްގައެވެ. ވިކާޝް އާއި އެކުއެވެ.އަހަރެން އުއްމީދުކުރި ގޮތާއި ޚިލާފަށް އެއްވެސް މީހަކު އަހަރެމެންނަށް މަރުޚަބާ ކިޔާކަށް ނާދެއެވެ. ވިކާޝްގެ އާއިލާ މީހުން ނެތްކަން އަހަންނަށް އެނގެއެވެ. އެހެނަސް ރަހުމަތްތެރިން ތިބޭނެތާއެވެ،
” ކީއްވެ އެއްވެސް މީހަކު އަހަރެމެންނަށް މަރުޚަބާ ކިޔަން ނައީ ؟ ”
އަހަރެން ސުވާލުކުރީ އާދައިގެ ގޮތަކަށެވެ. ވިކާޝް ހީލިއެވެ. އޭނާގެ ޔުނިކް ހިނިތުންވުމެވެ. އެއް މިޔަކަނުން ލޯބި ގޮތަކަށެވެ.
” މަރުހަބާ ކިޔަން ނަޔަސް އަހަރެމެންނަށް މިއޮއް ދެވެނީނު ގެއަށް ”
އޭނާ އެހެން ބުނުމުން އަހަންނަށް ހެވުނެވެ،
” އެކަމު ވިކާޝްގެ ގެއަށް ވަނުމުގެ ކުރިން މަރުހަބާ ކިޔަންވާނެ އަހަންނަށް ވިކާޝް އެކަނި ނަމަވެސް… ”
އޭނާ ހުރީ ދެ ފޮށި ހިފައިގެން ވަރަށް ބަރު ބޮޑުވެފައެވެ. ކާރެއް ނުލިބިގެން ހިނގާފައި އަންނަން ޖެހުމުން އަހަރެންވެސް ދެރަވިއެވެ،
” ހޫމ.. އަބަދުވެސް އަހރެންގެ ގެއާއި އަހަރެންގެ ލައިފް ޝަނޫއަށް ވެލްކަމް ކިޔަ ކިޔަ ހުންނާނީ އޯކޭނު،.”
އަހަރެން އަނގަ ގަދަ ކަމުން އޭނާ ހުރީ ބޮލަށް އުނދަގޫވެފަހެން އަހަންނަށް ހީވިއެވެ،
ވިކާޝް އެހެން ބުނެލުމާއި އެކު ގޯތިތެރެއަށްވަނެވެ. އޭރު އަހަރެންގެ މިސްރާބު ހުރީ އަދިވެސް މަގު އޮތްވަރަށް ކުރިއަށް ދާށެވެ. ވާނީވެސް އެހެންތާއެވެ. ވިނަފަޅާ ބޯވެފައި އޮތް ފަޅު ޖަންގައްޔެއް ފަދަ ތަނަކަށް ވިކާޝް ވަންނާނެކަމަށް އަހަރެން ހިއެއް ނުކުރަމެވެ. މީހުން އުޅޭ ހިސާބުގަނޑު އަދި އެއޮތީ ދުރުގައެވެ. އަހަރެން ހުއްޓުނީމެވެ.އަދި ކުޑަކޮށް ފަހަތަށް ޖެހިލުމަށްފަހު، ވިކާޝްގެ ފަހަތުން ވަނީމެވެ. ގޯތިތެރޭގެ އެތަންމިތަނުގައި ވަނީ މިރިހި ފަޅާފައެވެ. މެދެއްހާ ހަމައެއްގައި ބިޔަ ހިތިގަހެއް ހުއްޓެވެ. އަހަރެން ހައިރާންކަމާއި އެކު ހިނގަމުން ދިޔައީމެވެ. ގެއާއި 15 ވަރަކަށް ފޫޓު ދުރުގައި ބަދިގެއާއި ކާގެ ހުއްޓެވެ. ވިކާޝް އޭރު ގެއަށް ވަދެފިއެވެ. އަހަރެން ގެއަށް ވަތްތަނުން ކެއްސަންފެށިއެވެ. ސިޓިންގރުމުގެ އެއް ފަރާތުގައި ބޮޑު ބޮޑާއްޓެއް ހުރި އިރު، އަނެއް ފަރާތުގެ ފާރުގައި ލައްކޮއްލާފައި ފަތްޖެހިނދެއް ހުއްޓެއް..ތަޅުމުގައި ފައި ޖައްސާލަން ނުކެރޭވަރަށް ވެލި ހުއްޓެވެ. ސިޓިންގ ރޫމުން ފެންނަން ހުރި ދެ ކޮޓަރީގެ ދޮރުން އެއް ކޮޓަރިއަށް ވިކާޝްވަނެވެ، އަހަރެން އެތަންމިތަނަށް ލޯ ހިންގަމުން އޭނާގެ ފަހަތުން ވަނީމެވެ. ކޮޓަރި ފެނުމާއި އެކު އަހަރެން ވަކިން އަޖައިބުވީމެވެ. ބާވެ ހަސްނެތިފައި އޮތް ތަރަފާއްޔެކެވެ. ތުނިވެގެން ދެފުށްޖެހިފައި އޮތް ގޮދަނޑި ގަނޑެއް އޮޅާލާފައި ތަރަފާލިމަތީއޮތެވެ. އަހަރެން އެތަންމިތަނަށް ބަލަމުން ދަނިކޮށް ކޮޓަރިތެރޭގައި ހުރި ލަކުޑި އަލަމާރީގައި ޖެހުނެވެ. އެއާއި އެކު އަލަމާރިން ދިޔައީ އަޑުކިޔައިގެންނެވެ. މީދާތައް ވަކަރުމަތިން އޭރުވެސް ދުވެއެވެ. ހުދުފާޑުގެ ތަރަފާއްޔެއްކަމުން މީދާ ސީ ލައިފައި ހުރިކަން އެނގެން ހުއްޓެވެ. ކޮޓަރީގެ އެއް ކަނެއްގައި ހުރި މޭޒުމަތީގައި އަޅާފައި އޮތް ފޮތިގަނޑަށް ހިރަފުސްއަރާ ފުރިފައިވެއެވެ. ވިކާޝް އެ ފޮތިގަނޑު ނެގުމަށްފަހު ތިރިއަށް ވައްޓާލިއެވެ. އަދި މޭޒުމަތީ ދެ ފޮށި ބެހެއްޓުމަށްފަހު އަހަންނަށް ބަލާލިއެވެ. އަހަރެން ގަދަކަމުން ހީލީމެވެ،
” މަރުޚަބާ ! މިއީ އަހަރެންގެ ގެ! އަހަރެމެން ދެމީހުންގެ ކުޑަކުޑަ ގަނޑުވަރު.. މިތަނުގައި އުޅޭނީ އަހަރެމެން ދެމީހުން އެކަނި.. ”
ވިކާޝް ހިނިތުންވަމުން އަހަރެންނާއި ދާދި ގާތަށްއައެވެ. އަހަރެންގެ މޫނުމަތިން ނުތަނަވަސްކަން ފާހަގަ ވާނޭކަން ގައިމެވެ، އެހެނަސް އެއިން އެއްވެސް ކަމެއް ވިކާޝްއަށް ފެނުނުކަމަކަށް ނަހަދައެވެ،
” ކޮ.. ކޮބާ ފާޚާނާ.”
އަހަރެން ދެން ސުވާލު އުފެދުނީ ފާޚާނާ އާޢި މެދުއެވެ. ކޮޓަރިއާއި ގެ އެފަދަ ޙާލެއްގައި ވީ އިރު ފާޚާނާ ހުންނާނީ ކިހާ ފެންވަރެއްގައި ބާވައޭ އަހަރެންގެ ހިތައް އެރިއެވެ،
” ގޭގެ ބިއްދަށުގައި ހުންނާނެ.. ހިނގާދަމާ..”
ވިކާޝް އަހަރެންގެ އުނަގަނޑުގައި އަތްއަޅުވާލިއެވެ. އަހަރެން އަނެއްކާވެސް ގަދަކަމުން ހީލީމެވެ. ބޭރަށް ނުކުމެ ގޮސްބަލާލި އިރު ކުޑަވަރެއްގެ ގިފިއްޔެއް ހުއްޓެވެ. ޓިނު ދޮރެކެވެ. ދޮރު ހުޅުވާލި އިރު މަތި އެއޮތީ ހާމައަށެވެ. ތިރި ފާޚާނާ ތައްޓެއް ބަހައްޓާފައި ވެއެވެ. ވަޅުމަތީގައި ޓިނުގަނޑެއް ބާއްވާފައި އޮތް އިރު ދަބަރުޖަހާފައި އޮތް ދާންޏެއްވެސް އޮތެވެ. ވިނަފަޅާ ޖަންގަލި ހެދިފައިވާތީ އަހަރެން ބިރުވެސް ގަތެވެ،
” މިތަނުން ފެންވަރާކަށް ނުކެރޭނެ…”
އަހަރެންނަށް ބުނެވުނެވެ. އެހާ ހާމަކަން ބޮޑު ތަނެއްގައި ފޭރާމާ ނުލާ ހުރުމަކީ އަހަންނަށް ވާނޭކަމެއްނޫނެވެ. ވިކާޝް އަހަރެންގެ ގައިގައި ބައްދާލިއެވެ،
” އޯހ ބޭބް! މާލޭގެ ދިރިއުޅުމާ ރަށްފުށުގެ ދިރިއުޅުން ވަރަށް ތަފާތުވާނެ..! ”
އޭނާ އެހެން ބުނުމުން އަހަރެން ކުޑަކޮށް ހިތްހަމަ ނުޖެހުނެވެ. އަހަރެން ރާއްޖެތެރޭގެ ރަށަކަށް މިއައީ އަލަކަށް ނޫނެވެ.
” އެކަމަކު…. ވިކާޝްއަށްވެސް އެނގެ އެއްނު…. ކިހިނެތް މިތާ ؟ ”
އަހަރެންނަށް ޝަކުވާ ކުރެވުނެވެ . ދެރަވެގެންނެވެ.އަހަރެން އުއްމީދުކުރި ގޮތަކަށް އެއްކަމެއްވެސް ނުވިއެވެ. ވިކާޝް އަހަރެންގެ އަތުގައި ހިފިއެވެ،
” އަހަރެން ބުނީމެއްނު އަހަރެންގެ އަމިއްލަ ގެއެކޭ ހުންނާނީ.. މިގޭގަ އުޅޭނީ އަހަރެމެން ދެމީހުން އެކަންޏޭވެސް ބުނީމެއްނު..އަހަރެން ދޮގެއް ނަހަދަމެއްނު..”
އޭނާ މާޔޫސްވެލާފައި ބުނެލިއެވެ. ތެދެކެވެ. އޭނާ އެހެން ބުންޏެވެ.އެކަމަކު އެއީ މިފަދަ ތަނެއް ކަމަކަށް އަހަރެން ހިއެއް ނުކުރަމެވެ.
” ދެން ހިނގާބަލަ ރޫމަށް… އަދި ކައިވެނި ކުރިފަހުން 3 ދުވަސްވެސް ނުވެ.. ދުރުގަ ހުންނަން ވަރަށް އުނދަގޫވެޔޭ…”
ވިކާޝް މަސްތީ ގޮތަކަށް އެހެން ބުނެލުމުން އަހަރެން ހައިރާންވީމެވެ.
” ކޮން…. ކޮން ރޫމަކަށް ؟ ”
އަހަރެން އެހެން ބުނުމުން އޭނާ ހޭންފެށިއެވެ، އަދި އަހަރެންގެ މޫނުގައި ދެއަތުން ހިފަހައްޓާލަމުން ބުނެލިއެވެ،
” ދެންމެ ވަނީމެއްނު.. އެއީ އެއްނު އަހަރެމެންގެ ރޫމު.. ”
އަހަރެން ސިހިގެން ދިޔައެވެ. އެހާ ހަޑި ރޫމެއްގައި އުޅެން އަހަންނަކަށް ނުކެރޭނެއެވެ. އަދި އެތަން ސާފުވެސް ކުރީކީ ނޫނެވެ. އަހަރެން ހިޔާލެއްގައި ހުއްޓާ ވިކާޝް އަހަރެންގެ އަތުގައި ހިފިއެވެ. އަހަރެން ގޮވައިގެން އޭނާ އެ ރޫމަށް ވަނެވެ. އަދި ދޮރު ލެއްޕުމަށްފަހު މަކުޑި އެޅުވިއެވެ. އޭނާ މަޑުމަޑުން ގޮސް އަތްލީ އޮޅާލާފައިވާ ހަންގަނޑެއްފަދަ ގޮދަނޑީގައެވެ. ގޮދަނޑި ވައްޓާލުމާއި އެކު ދުންތަކެއްހެން ހިރަފުސްތައް ބުރައިގެން ދިޔައެވެ، އަހަރެން ކިނބިއްސެއް އެޅީމެވެ. އޭނާ އައިސް ފަންކާ ޖައްސާލިއެވެ.އެހެނަސް ކަރަންޓް ނެތުމުގެ ސަބަބުން މަސައްކަތެއް ނުކުރިއެވެ..އެކަމާ ފަރުވާލެއް ނުބަހައްޓާ އޭނާ އައިސް އަހަރެންގެ އަތުގައި ހިފާލުމަށްފަހު ބޮސްދިނެވެ، އަހަރެންނަށް ބެލެނީ ތިރިއަށެވެ. މީދާ ގުއި ކޮޅުކޮޅަށް އެރޭތީ އަހަރެން ހުރީ ވަރަށް ފަކުރުވެސް ގަނެފައެވެ. ވެލިތަކާއި ކުނި ކޮޅުކޮޅުގައި ފައިޖެހޭތީ ފަޔަށް ހީރުން އަރަމުންދެއެވެ. މީދާތައް ދުވެފައި އުޅޭގޮތް ފެނި އަހަރެންގައި ވެސް ހިރުވާންފެށިއެވެ، ވިކާޝް އަހަރެންގެ އުނަގަނޑުގައި ހިފައިގެން ހުރެ ތަޅުމުގައިވާ ގޮދަނޑި އާއި ދިމާއަށް ދެއެވެ،
” ވިކާޝް،، ދެން ނޫން… ބަލާބަލަ ހިރަފުސްކަން.. އިހަށް ހިނގާ މިތަން ސާފުކުރަން.. ”
އަހަރެން ތެޅިގަނެފައި ބުނީމެވެ. އެހެނަސް އަހަރެންގެ ފަރާތުން އުފާ ހޯދުމަށް އެދި އެދި ހުރި ވިކާޝް އަންނަނީ އަހަންނާ ގާތަށެވެ. އަހަރެން އަވަސް އަވަހަށް ދުވެފައި ނުކުތީމެވެ. އަހަރެން ހެމުން ހެމުން ނުކުތީ ރުޅި ނާންނާން ވެގެންނެވެ، ފަހަތުން ވިކާޝްވެސް ނުކުތެވެ. އޭނާ އަންނަން ފެށުމުން އަހަރެން ފާރުގައި ތަތްވި ބޮނޑީގައި އަހަރެމެންގެ ކޮޓަރި އާއި ދާދި ގާތުގައި ހުރި ކޮޓަރީގެ ދޮރުގައި އަތްޖެހި އަތް ހަލާކުވިއެވެ.
” އައުޗް.. ”
އަހަންނަށް ތަދުވީ އެތާ އިން މޮހޮރެއްގެ ތޫނުކަން އަތަށް އިހުސާސް ވުމުންނެވެ. އަހަރެންކައިރިއަށް ރުޅިއައެވެ، ވިކާޝް އައިސް އަހަރެންގެ އަތުގައި ހިފުމަށްފަހު ފިރުމާލިއެވެ،
” އެތެރެއިން ޖަހާފަ އިން މޮހޮރެއްދޯ އެއީ،، ހާދަ ތޫނޭ..”
އަހަންނަށް ބުނެވުނެވެ. ވިކާޝް ހީލީ އަހަރެން ރުޅިއައީމައެވެ،މ
” ވަރަށް ބަނޑުހައިވެސް ވެއްޖެ.. ހިނގާބަލަ ކެފޭއަކަށް.. ކާންދާން.. އެކަމު މިހުރީ ފެންވެސް ނުވަރާ ”
އަހަރެން ލައިގެން ހުރި ހެދުމަށް ބަލާލީމެވެ. ދަތުރުމަތީގައި ލައިގެން ހުރި ހެދުމަށްވާތީ ކޮންމެވެސް ވަރަކަށް ރޫޖެހިފައި ހުއްޓެވެ. ވިކާޝް އަހަންނާއި ދުރަށް ހިނގައިގަންނަމުން ވާހަކަ ދެއްކިއެވެ،
” ދެން ދޭބަލަ ފެންވަރާލަން..'” އޭނާ އަހަރެންގާތު އެދުނެވެ. ދަރިއެއްގާތު ބައްޕައަކި އެދޭ ފަދައިންނެވެ. އަހަރެން ދެލޯ ބޮޑުކޮއްލީ އެ ގިފިލި މަތިން ހަނދާންވުމާއި އެކު ޖެހިލުންވެގެންނެވެ،
” ވިކާޝް،،، އަހަރެން ވާހަކައެއް ބުނަންތަ ؟ ”
އެގެއަށް ވަނުމާއި އެކު ބުނަން ބޭނުންވެފައިވާ ވާހަކަ ބުނުމަށް އަހަރެން ހިތްއެދެން ފެށިއެވެ. އޭނާ ބޯޖަހާލިއެވެ،
” އަހަރެންނަކަށް ނުކެރޭނެ މިގޭގަ އުޅޭކަށް.. ވަކިން ފާހާނާވެސް ބަދިގެ ކާގެ ވެސް.. ރޭގަނޑު ވިކާޝް ނެތިއްޔާ އަހަރެން ކިހިނެތް ؟…”
އަހަރެން އޭނާއަށް ވިސްނައިދިނުމަށް މަސައްކުރީމެވެ. ވިކާޝް އައިސް އަހަރެންގެ ދެކޮނޑުގައި ހިފާލިއެވެ،
” އަހަރެން ބޭނުމެއްނޫން އެއްވެސް މީހަކަށް ޝަނޫގެ ތި ރީތި ސިފަ ފެންނާކަށްވެސް.. ޝަނޫ ފެނުނިއްޔާ މިރަށުގެ ފިރެހެންކުދިން މޮޔަވާނެ،، ޝަނޫއަށް އުނދަގޫކުރަން ފަށާފާނެ.. އަހަރެންނަށް މާލޭގަ ޝަނޫގެ ގޭގަވެސް އުޅެވުނީސް.. އެކަމަކު… އަހަރެންގެ މަންމަގެ ދުނިޔޭގަ މިގެ ނޫން އެހެން ތަނެއްގަ އަހަރެން ދިރިއުޅުން ބިނާ ނުކުރާނަން ކަމަށް އަހަރެން ވައުދުވީން،، އެހެންވެ އަސްލު މިތަނަށް އަންނަން މަޖުބުރުވީ.. ”
ވިކާޝް ވަރަށް އޯގާތެރިކަމާއި އެކު ވާހަކަ ދެއްކިއެވެ. އަހަރެން ހީލީމެވެ. ޝަކުވާއިން ފުރިގެންވާ ފަދަ ގޮތަކަށެވެ. އޭނާގެ ނިންމުން ބަދަލު ކުރުމަށް އަހަރެން ވާހަކަ ދައްކަން ބޭނުންވިއެވެ.
” ހަމައެކަނި މިރޭ،،،، ރޫމެއް ހިފައިގެން ދާނީ،، މާދަމާ އަންނާނީ މިތަން ސާފުކުރަން.. އޭރުން ސަޅިއެއްނު. ޕްލީޒް..
”
އަހަރެން އާދޭސްކުރަން ފެށުމުން ވިކާޝް ހީލިއެވެ.
” އަހަރެންނަށްވެސް އެނގޭ ޝަނޫއަށް މިތާނގަ މިގޮތަށް ކެތް ނުވާނެކަން.. އެކަމަކުވެސް އަހަރެން އެހެންތަނަކަށް ދާން ބޭނުންނުވީ.. އެކަމަކު ދެން ޝަނޫ ހިތްހަމަ ނުޖެހެންޏާ އަހަރެން ހިނގައިދާނަން،. އެކަމު އެންމެ ރެޔަކަށް… މިރެއާއި މިޔަދު އެކަންޏަށް.. އަހަރެން ބަލާނަން މާދަމާ ރޭ ވާންވާއިރަށް ގެއަށް ކަރަންޓް ގުޅާލެވޭތޯ.. ”
ވިކާޝް އެއްބަސް ވުމުން އަހަރެން އުފާވިއެވެ، އަހަރެންނަށް ހިތްހަމަ ޖެހުމުގެ ނޭވާއެއް ލެވުނީ އަދިކިރިޔާއެވެ.
****************************
އަހަރެން ގޮވައިގެން ވިކާޝް ނުކުތެވެ. މަގުމަތިން ފެނުނީވެސް ދެތިން މީހުންނެވެ. އެމީހުން އަހަރެންނަށް ބަލަނީ ނުދަންނަ މީހަކާއި ދިމާއަށް ބަލާ ގޮތަށެވެ. ދެމީހަކު ދަންޏާ އަހަރެމެންނަށް ބަލަމުން ސިއްރުން ކޮންމެވެސް ވާހަކަ ތަކެއް ދައްކައެވެ. އަހަރެންގެ ހިތް ނުތަނަވަސް ވާންފެށީ އެހިސާބުންނެވެ. ވިކާޝް އެއިން އެއްވެސް މީހަކާ ދިމާއަށް ބަލައެއް ނުލައެވެ. އޭނާ ބާރު ބާރަށް ގޮސްވަނީ ގެސްޓް ހައުސްއަށެވެ. ކައުންޓަރގައި އިން ކުއްޖާ އަހަންނަށް ހީލުމަށްފަހު ވިކާޝް އާއި ވާހަކަ ދެއްކިއެވެ
” އަންހެނުންތަ ؟ ވަރަށް ކާމިޔާބޭ ދޯ.. ކިތަކެއް ؟ ”
އޭނާ އެހެން ބުނުމުން ވިކާޝް އަހަންނަށް ބަލާލިއެވެ. އަދި އެކުއްޖާއަށް ލޯއަޅާލިތަންވެސް އަހަރެން ދުށީމެވެ، އަހަރެން ހުއްޓާ އެފަދަ ވާހަކައެއް އޭނާ ބުނުމުން ވިކާޝް ލަދުގަތީކަން ގައިމެވެ.
” ހޫމ ވައިފް،،، ދެން ހަމަ ދެއްވި ވަރެއް ހޯދަންވީ ؟ އޭނަ އެބުނީ ކިތައް ކިޑްސް ހޯ ޝަނޫ ބޭނުންވަނީ ؟ ”
ވިކާޝް ޕޭމަންޓްކަންތައް ހަމަޖެއްސުމަސްފަހު އަހަންނަށް ބަލާލަމުން ބުންޏެވެ. އަހަރެން ލަދުން ހީލީމެވެ، އަހަރެން ހަމަޖެހިލީ އެ ރީތި ރޫމަށް ވަދެފައެވެ. ވިކާޝް އަހަރެން އުފުލާލިއެވެ،
” ދެން ވަރަށް ހަޑިކޮއްނޭ މިހުރީ… ފެންވަރަން ދާންވެއްޖެ.. ”
އަހަރެން ދެފައި ތަޅުވަން ފެށީމެވެ. ވިކާޝް އަހަރެން އެނދުމަތީގައި ބޭއްވުމާއި އެކު އަހަރެން ތެދުވީމެވެ،
” މިޙާރު ރަނގަޅު ވެއްޖެތަ؟ އިނީއްސުރެންވެސްގައިމު…. އަހަރެންވާ ކެތް ގަދައެއްނު… ”
އޭނާ އެހެން ބުނުމުން އަހަރެން ބާރުބާރަށް ހޭންފެށީމެވެ.
” ހޫމް..ހަމަ އެނގިހުރެ މެރީކުރީނު.. މިދަނީއޭ ފެންވަރަން…އާދޭ އެހެންވިއްޔާ އެއްކޮށް ފެންވަރާލަން ”
އަހަރެން ލޯތްބާއި އެކު ބުނެލީމެވެ. ވިކާޝް އެނދުމަތީގައި އޮތެވެ.
” ޝަނޫ ނިމުނީމަ އަހަރެން ދާނަން.. ”
އޭނާ އެހެން އެބުނީ ކީއްވެކަމެއް އަހަންނަކަށް ނޭނގެއެވެ. އިތުރު އެއްޗެއް ނުބުނެ އަހަރެން ފާޚާނާއަށް ވަދެ، ފެންވަރަށް ފެށީމެވެ. ތުވާލި އޮޅާލައިގެން ނުކުތްއިރު ވިކާޝްއަށް އޮތީ ނިދިފައެވެ. އަހަރެން ރީތިވެލުމަށްފަހު ވިކާޝްއަށް ގޮވާލީމެވެ.ފެންވަރަން ތެދުވާށޭ ދެތިން ފަހަރު ބުނެލީމެވެ. އެހެނަސް އެއްވެސް ޚަބަރެއް ނުވިއެވެ. އޫއްސޭ ބުނެ އަނެއް ފަރާތަށް ފުރޮޅިލީއެވެ. އަހަރެން ހިތްހަމަ ނުޖެހުނެވެ.އަހަރެން އައީ ފޮނި އުއްމީދެއްގައެވެ. ވިކާޝްގެ އަތުގެ ފިރުމުން ތަކަށް އެދިގެންނެވެ. އެހެނަސް އެއް ގޮތަކަށްވެސް އޭނާއެއް ނުހޭލިއެވެ. ގުގުރި ދަމަމުން ނިދީގެ ތެރޭގައި އޮތެވެ. އަހަރެން ހުރީ ވަރަށް ބަނޑުހައި ވެފައި ކަމުން ކާއެއްޗަކަށް އޯޑަރ ކުރީ އެތަނުގެ ކެފޭއަށެވެ. ދެމީހުންނަށް އޯޑަރ ކުރީމެވެ. ކާއެއްޗެހި ގެންނަން ވާއިރަށް ވިކާޝް ހޭލައްވާލުމަށް އަހަރެންވިސްނީމެވެ. އަހަރެން އޭނާގެ މޫނުގައި ބޮސްދޭން ފެށީމެވެ. ކުއްލިއަކަށް ބާރުބާރަށް އަހަރެން ފޮޅުވާލިއެވެ. އަހަންނަށް ތެދުވެސް ވިއެވެ. ނިދީގައި އެހެން ހެދޭނީ ނޭނގިގެންކަން އަހަންނަށް އެނގުނެވެ. އެހެނަސް މިއީ އަހަރެމެން ދެމީހުންގެ ކައިވެނީގެ ފުރަތަމަރެޔޭ އެއްގޮތަކުން ބުނުމުން ރަނގަޅުވާނެއެވެ، އަހަރެން ކޮންމެހެންވެސް އޭނާ ހޭލައްވާލަން ބޭނުމެވެ. ވިސްނަން އިންދާ ދޮރުގައި ޓަކިޖެހި އަޑަށް އަހަރެން މަޑުމަޑުން ދޮރު ހުޅުވީމެވެ. ދެ ޕާރސަލް ހިފައިގެން އައިސް ހުރީ ކުޑަކުޑަ ސޮރެކެވެ. އަހަރެން ރުފިޔާ ދިނުމަށްފަހު ދޮރު ލައްޕާލީމެވެ.
” އޭ ދެން ވިކާޝް.. ތެދުވެބަލަ. ނުވެސް ކައެއްނު ތިއޮތީ.. ނިންޖެއްވާ އެބަހުރިދޯ.. ”
އަހަރެން މޭޒުމަތީގައި އެއްޗެހިތައް އަތުރާލީމެވެ. އަނެއްކާވެސް ވިކާޝްއަށް ގޮވީމެވެ. އެހެނަސް އޭނާ ކަހާތާ ހިރުވާވެސް ނުލިއެވެ،
” ނުކާނަން.. ޝަނޫ ކައިގެން ނިދާލާ..”
އަހަރެން ސިހިފައި ބަލާލީމެވެ. އޭނާ ހަމަ ގުގުރި ދަމަނީއެވެ. އެހެނަސް އެ އަޑުގައި ނިދީގެ އަސަރުވެސް ނެތެވެ، ހަރުކަށި ގޮތަކަށް އޭނާ އެހެން ބުނުމުން އަހަރެން ދެރަވެސްވިއެވެ. އަހަރެންވެސް ހުރީ ގޮތުގައެވެ، އިތުރަށް ގޮވަން މަސައްކަތެއް ނުކުރަމެވެ. ކައިގެން އަހަރެންވެސް އޮށޯތީއެވެ، އަނެއްފަރާތަށް އެނބުރިގެންނެވެ،
ގަދަ ނިދީގައި އަހަރެން އޮތީމެވެ. ނިދީގެ ތެރެއިން އަހަރެން ބޭރުކުރުމަށް މީހަކު އަހަރެންގެ ދެލޯ ގަދަކަމުން ހުޅުވަން އުޅޭހެން ހީވިއެވެ. ސިހިފައި އަހަރެން ހޭލީމެވެ. ފާޑެއްގެ ހުވަފެނެކެވެ. ލޮލުގެ ތެރެއަށް މީހަކު އިނގިލި ކޮއްޕާލީއެވެ. ދެލޯ އުނގުޅާލުމަށްފަހު އެނބުރިލި އިރު ވިކާޝްއެއް ނެތެވެ. ގަޑި ބަލާލި އިރު ދެގަޑި ބައިވެއްޖެއެވެ. އަހަރެން ކޮޅަށް ޖެހުނެވެ. މޭޒުމަތީގައި ހުރި ވިކާޝްގެ ކާ އެއްޗެހި ކައި ހުސްކޮއްފައި ހުއްޓެވެ. ހަމައެވަގުތެވެ. އޭނާ ފާހާނާއިން ނުކުތެވެ.ފެންވަރައިގެންނެވެ. އަހަރެންނަށް ހަމަޖެހުމެއް ލިބުނީ ދެނެވެ. ފުންނޭވާއެއް ދޫކޮއްލަމުން އަހަރެން ހެޑްބޯޑުގައި ލައްވެލީމެވެ،
އަހަންނާއި ދިމާއަށް އޭނާ ބަލަމުންދަނީ ވަރަށް ލޯބިކޮންނެވެ. ޔަޤީނެވެ. ރޭގައި ނިދުނީމަ އެ އުޅެނީ އަހަރެން ރުޅިއަތުވެދާނެތީއެވެ. އަހަރެން އެއްޗެއް ބުނަން ވާއިރަށް އޭނާ ވާހަކަ ދެއްކިއެވެ.
” ފެންވަރައިގެން ނުކުތް ގޮތަށް އަދިވެސް ތިއިނީ ތިތާތަ ؟ ވަރަށް ސަޅި އިނގޭ ރޭގަ،،، ހީވެސް ނުކުރަން ޝަނޫ އެހާ ބެސްޓް ވާނެކަމަކަށް.. ދެރަނުވައްޗޭ.. ހިއެއްނުވޭ ޝަނޫގެ ފުރަތަމަ ފަހަރު ހެނެއް.. އެކަމަކު އަހަރެންނަށް އިނގޭ ޝަނޫގެ ފަސްޓް ޓައިމް ކަން މީ.. ”
ވިކާޝް ދައްކާ ވާހަކަ އަހަންނަށް ދެނެއެއް ނުގަނެވުނެވެ. އަހަރެން ފެންވަރައިގެން ނުކުތް އިރު އޭނާ އޮތީ ނިދާފައެވެ.
” ސާބަސް،، ޖެއްސުމަށްވެސް ވާހަކަ ދެއްކަން ހާދަ މޮޅޭ..”
އަހަރެން ބާލީސްނަގާ ބޯދަށަށްލަމުން އޮށޯތީމެވެ. ވިކާޝް އައިސް އަހަރެންނާ ދާދި ގާތުގައި އޮށޯތެވެ.
” ޖެއްސުމެއްނޫން.. މިރޭ ޝަނޫގެ ފަރާތުން އަހަންނަށް ލިބުނު އުފަލާ އަރާމް އެއީ އަހަރެން ހަނދާންނެތޭނެ ކަންތައްތަކެއްނޫން..”
އޭނާ އެހެން ބުނުމާޢި އެކު އަހަރެން ވިކާޝްގެ މޫނަށް ބަލާލީމެވެ. އަހަރެން ވިކާޝްއަކަށް އެއްވެސްކަމެއް ނުކުރަމެވެ. ދެން އޭނާ އެހެން ވާހަކަ ދައްކަންވީ ސަބަބެއް ނުވިސްނުނެވެ.
” ހަމަތެދެއް؟ ތިހާ ރީތި ކުއްޖަކުވެސް އަހަރެން އަދި ނުދެކެން،،،، ތިހާ ރޮމް ކުއްޖަކުވެސް ނުދެކެން.”
އަހަރެން ހާސްވީ ދެނެވެ. އަހަރެން ތެދުވީމެވެ. އަދި ހިނިތުންވެފަ އޮތް ވިކާޝްއަށް ބަލާލީމެވެ،