މިލްކު ކޮށްލީ ހިތޭ……09

“ދަރިފުޅާ އަވަހަށް އާދޭ..ޔޫލްގެ ބައްޕަ އެބައިން ކާރުގަ ދަރިފުޅު ބަލާ އައިސް..ޝައިބާއާއި ދެކުދިން ދޭ ކާރުގަ…ބައްޕަ ދާނަން މަންމަ ގޮވައިގެން ސައިކަލްގަ..”ޒުހޭރުގެ އަޑަށް ފަލަކުއާއި ޝައިބާއަށް އެކީ ކަހަލަ ގޮތަކަށް އެކަކު އަނެކަކަށް ބަލައިލެވުނެވެ.

**************

ޝައިބާ ކިތަންމެ ބޭނުން ނުވިޔަސް އޭނާއަށް ޙަފްލާގައި ބައިވެރި ވުން ނޫން އިތުރު ގޮތެއް ނެތެވެ.ނުގޮސް ގޭގައި މަޑުކޮށްފިނަމަ ބައްޕަގެ އެތައް ސުވާލު ތަކަކާއި ކުރިމަތިލާން ޖެހޭނެއެވެ.ނުވިތާކަށް ފިޒާން މެންވެސް އެހާ ސުވާލު ގިނަ ކުރާނެއެވެ.ކޮންމެ ގޮތެއް ވިޔަސް އޭނާގެ އެހާ މަސައްކަތުންވެސް ފަލަކުއާއި ޔޫލް ދުރު ނުކުރެވުމުން ބަލި ގަބޫލު ކުރުން ނޫން ގޮތެއް ނެތެވެ.

*************

ހުރިހާ އެންމެންވެސް ތިބީ ކައިވެނި ކުރެވޭ ގަޑި ނުތަންވަޅު ވެފައިވާތީ މޭޒުކައިރީ ޖަހާފައި ހުރި ގޮނޑި ތަކުގައި އިށީނދެ ލައިގެން ކެތް މަދުވެފައެވެ.އަރޫޝާމެން ތިބީ ފަލަކުގެ އިންތިޒާރުގައި ގޭ ދޮރުމަތީގަައެވެ.

ރަތްކުލައިގެ ކާރުއައިސް މަޑުކޮށްލުމުން ޝައިބާއާއި އަރޫޝާގެ އެހީގައި އެބޮޑު ވެޑިން ޑްރެސްއާއި އެކު ފަލަކު ކާރުން ފޭބުމަށްފަހު އެތެރެއަށް ވަނުމަށް ހިނގައިގަތެވެ.ފަލަކު ދެއަތުން ހެދުމުގެ ދެފަރާތުގައި ހިފަހައްޓައިގެން ހުރިއިރު ފަހަތުން ހެދުމުގެ އެ ބޮޑު ލޭސް ފަސްބައިގައި ޝައިބާއާއި އަރޫޝާ ހިފައިދީގެން ތިއްބެވެ.

ޝިނާންއާއި ވާހަކަ ދައްކަން ހުރި ޔޫލްއަށް ފަލަކު ފެނުމުން އާޝޯޚު ވީވަރުން އޭނާގެ ދުލުގައި އޮތް ބަސްވެސް ހުއްޓުނެވެ.

“ހޭއި ބަޑީ…ތިވަރަށް ނުބެލިޔަސް ޝީ އިޒް އޯލް ޔޯސް އޭ”.ފުރުސަތުގެ ބޭނުންހިފައި ޝިނާންވެސް ޔޫލްއާއި ދިމާކޮށްލިއެވެ.އެވަގުތު ޔޫލްގެ މޫނު މައްޗަށް ލުއި ހިނިތުން ވުމެއް ވެރިވެގެން ދިޔައެވެ.ފަލަކުއަށްވެސް ޔޫލްގެ އެ އުފާވެރި މޫނު ފެނިފައި ހިނދުކޮޅަކަށް ނަމަވެސް ހުރިހާ ހިތާމަ ތަކެއް ހިތުން ފިލައިގެން ދިޔައެވެ.

ނަމަވެސް އެވަގުތު ދޮރާށި ހުޅުވާލުމަށްފަހު އެތެރެއަށް ވަދެގެން އައި ޒީލް ފެނިފައި ޔޫލްގެ ހިތުގައި ނަފްރަތާއި ހަސަދައިގެ ހުޅު ރޯވެގެން ދިޔައީ ބަސް ބުނާހާ ހިނދުކޮޅެއްގެ ތެރޭގައެވެ.އެތެރެހައްޓަށް އުނދަގޫ ވެގެން ދިޔަލެއް ބޮޑުކަމުން ޔޫލްގެ ދެބުމަ ގޮށްޖެހިގެން ދިޔައިރު ދެއަތްވެސް މުއްކަވާ ލެވުނީ ނުހަނު ބާރަށެވެ.

**********

ޒީލް ފެނުމުން ފަލަކުގެ ހިތަށްވެސް ނުބައި ގޮތެއް ވެގެން ދިޔައިރު އަވަސް ހަރަކާތަކާއިއެކު ކައިރީގައި އިން ގޮނޑީގައި އިށީނދެލައިގެން އިން ޔޫލްއަށް ބަލައި ލެވުނެވެ.ނަމަވެސް ޔޫލް އިނީ ފޯނަށް ބަލަހައްޓައިގެން ކަމުން އެ މޫނުމަތީގައި ވި އަސަރުތައް ފަލަކުއަށް ފެންނަ ގޮތެއް ނުވިއެވެ.

އޭގެ ފަސްވަރަކަށް މިނެޓްފަހުން ހަނީފްއާްއި އެކު ޣާޒީއާއި ހެކިވެރިން އައިސް ގޮނޑީގައި އިށީނުމާއިއެކު ކައިވެނީގެ މަޖިލިސް ފެށިގެން ދިޔައެވެ.ހަނީފްގެ ދެމަފިރިންނާއި ޒުހޭރުގެ މޫނުމަތިން އުފާވެރިކަން ފިޔަ ޖަހަމުން ދިޔައިރު އަފީފާއާއި ޝައިބާވެސް ހުރީ މޫނުމަތިން އުފާވެރިކަމުގެ ކުލަވަރު ދައްކައިގެންނެވެ.ނަމަވެސް ފިޒާންގެ ފަހަތުގައި ހުރި ޒީލްގެ ހިތް ވަނީ ކުދިކުދި ވެފައެވެ.އޭނާ ޕާޓީއަށް އެއައީވެސް ހުރިހާ ޑޮކްޓަރުން ޕާޓީގައި ބައިވެރިވާނެތީ އިތުރު އެހެން ގޮތެއް ނެތުމުންނެވެ.އެހެނެއްކަމަކު ފަލަކު އޭނައާއި އޮތް ރަޙުމަތްތެރި ކަމުގެ ގުޅުންވެސް ކަނޑާލާފައި ވާއިރު ފަލަކުގެ އުފަލުގައި ބައިވެރިވާން އަންނަން ކިހާ ލަދުވެސް ގަންނާނެތާއެވެ.

“އަނބި ޤަބޫލު ކޮށްފިން”

.މަޢުނަވީ ގޮތަކަށް ފަލަކުއަށް ބަލައިލުމަށްފަހު ޔޫލްގެ ދުލުން ބޭރު ކޮށްލި އެ ބަހާއިއެކު ފަލަކުއާއި ޔޫލްގެ ކައިވެނީގެ ގޮށް ޖެހިގެން ދިޔައެވެ.އިސްދަށަށް ޖަހާލައިގެން އިން ފަލަކުގެ ދެލޮލުން އެވަގުތު ވެއްޓުނު ކަރުނަތިކި އޭނާގެ މުށްކަވާލައިފައިވާ ގަނޑުފެން ކޮޅެއްފަދަ ފިނި އަތްތިލައިގެ ނުފުށަށް ހިނދިގެން ދިޔައެވެ.

ކައިވެންޏަށްފަހު ޙަފްލާގެ ކަންތައްތައް ފެށިގެން ދިޔައެވެ.ޔޫލްގެ ދެމަފިރިންނަށް މަރުޙަބާ ކިޔުމަށް އެތައް ޢިއްޒަތް ތެރިންނެއް ޙަފްލާގައި ބައިވެރި ވެފައި ވެއެވެ.ގިނަޢީ ހަނީފްގެ އެކުވެރިންނާއި ޔޫލްގެ ރައްޓެހިންނެވެ.ކޮންމެ މީހެއްގެ ދުލުންވެސް ދެމަފިރިންނަށް އެތަށް ތަޢުރީފަކާއި އައު ކައިވެނީގައި ބަރަކާތް ލެއްވުން އެދި ދުޢާގެ ބަސްތައް އޮއްސަމުން ދިޔައެވެ.އެ ބަސްތަކުން ފަލަކުގެ ހިތުގެ އެންމެ ފުނަށް އަސަރު ކުރަމުން ދިޔައިރު އިރުއިރުކޮޅާ ޔޫލްއަށް ބަލައިލެވެއެވެ.ނަމަވެސް ޔޫލް ހީވަނީ ފަލަކުއަށް ނުބަލަން ކަމަށް ހުވާ ކޮށްގެން ހުރި ހެންނެވެ.

ކައިވެނީގެ ޙަފްލާ ނިމުނުއިރު ހުރީ އެގާރަގަޑި ބައިވެސް ވެފައެވެ.ޒުހޭރުވެސް ހާ ޙަޔާތެއް ފަށާފައިވާ ދަރިފުޅަށް އުފާވެރި މުސްތަޤްބަލަކަށް އެދި ދުޢާ ކުރާޙާލު ދަރިފުޅުގެ ބޮލުގައި ލޯބިން ފިރުމާލިއެވެ.އަދި ކެތްތެރި ކަމާއިއެކު ދިރިއުމުގައި ދިމާވާ ގޮންޖެހުން ތަކާއި ކުރިމަތިލުމަށް ނަސޭހަތްތެރި ވިއެވެ.އަދި ފަލަކުގެ ފޮށި ގެންގޮސް ކޮޓަރިއަށް ލައިދިނުމަށްފަހު ބައްޕަމެން ދެން ދަނީއޭ ކިޔައި ގެއަށް ދިޔުމަށް ހިނގައިގަތެވެ.

ޔޫލްގެ ގާތުގައި ހުރި ސީމާ އައިސް ފެންކަޅި ވެފައިވާ ފަލަކުގެ ދެލޯ ފޮހެލައިދިނީ އުފަން މަޔަކު ފަދައިންނެވެ.މަންޒަރު ބަލަން ތަންކޮޅެއް ދުރުގައި ފޯނެއްގައި ހުރި ހަނީފްވެސް ފޯނު ޖީބަށް ލުމަށްފަހު އައިނު ނަގައި ދެލޯ ފޮހެލީ އެދެމައިންގެ ލޯބި ފެނުމުން އުފަލުންގޮސް އެދެލޮލަށް ކަރުނަ ޖަމާވެފައި ހުރީތީއެވެ.

ސީމާ ފަލަކު ގޮވައިގެން ގޮސް ޔޫލްގެ ކޮޓަރިއަށް ވަނުމަށްފަހު އެނދުމަތީގައި މަޑުމަޑުން ފަލަކު ބޭންދުމަށްފަހު ކޮޓަރިން ނިކުމެގެން ދިޔައީ ފަލަކުއާއި ވާހަކަ ދައްކަން އިރުކޮޅަކު މަޑުކޮށްލާފައެވެ.

ޔޫލްއައިސް ކޮޓަރިއަށް ވަދެ ދޮރު ތަޅުލިއަޑަށް ގަނޑުވެފައި އިން ފަލަކުއަށް ސިހިފައި ޔޫލްއަށް ބަލައިލެވުނެވެ.ނަމަވެސް ޔޫލް އެތެރެއަށް ވަދެގެން އައިސް ފަލަކުއަށް ބަލާލުމެއްވެސް ނެތި ފާހާނައަށްވަދެ ފެންވަރާލައިގެން ތުވާލި އަނދެގެން ނިކުމެ ސޯޓުބުރިއެއް ލުމަށްފަހު ފަލަކު އިށީނދެގެން އިން ފަރާތްނޫން އަނެއް ފަރާތުން އެނދަށް އަރައި އޮށޯވެ ހަމަޖެހިލާ ފޯނާއި ކުޅެން ކަމަށް ހަދާލީ ފަލަކުއަށް ބަލާލުމެއްވެސް ނެތިއެވެ.

ފަލަކުވެސް އެނދުން ތެދުވެގެން ގޮސް އޭނާގެ ހެދުންތައް އަޅައިގެން ގެނައި ފޮށި ހުޅުވުމަށްފަހު އޭގެން ނިދާ ހެދުމެއް ނަގައިގެން އައިސް ފާޚާނައަށް ވަންނަން އުޅެފައިވެސް އައިސް ޑްރެސިންޓޭބަލްގެ ކުރިމަތީ ހުއްޓިލީ އެބޮޑު ހެދުމާއިއެކު ފާޚާނަތެރޭގައި އުޅެން އުނދަގޫ ވާނެތީ ހެދުމުގެ ފަހަތުގައި ހުރި ގޮށްތައް ނައްޓުވައިގެން ފާޚާނައަށް ވަނުމަށެވެ.ނަމަވެސް އޭނާއަށް އުޅެއުޅެ ވަރުބަލުވީ އިރުވެސް އެގޮށްތައް ނެއްޓުވޭ ގޮތެއް ނުވިއެވެ.ވަރަށް މަސައްކަތުންވެސް ނެއްޓުވުނީ އެންމެ މަތީގައި އިން ގޮށް އެކަންޏެވެ.

އެންމެ ފަހުން ޔޫލްއަށް ކެތް ނުކުރެވިގެން ތެދުވެގެން އައިސް ފަލަކުގެ ހެދުމުގެ ގޮަށްތައް ނައްޓުވައިދޭން ފެށިއެވެ.ފަހަތުން އުނގަނޑާއި ހަމައަށް ހަރުކޮށްފައިވާ ޑައިމަންޑް ޝޭޕްގެ ވިހިގޮށް ނައްޓުވާލަދިންއިރު އެކަމުން ބުނެދޭން ނޭނގޭފަދަ އިޙްސާސެއް ކުރެވެމުން ދިޔައީ ހަމަ އެކަނި ފަލަކު އަކަށް ނޫނެވެ.ނަމަވެސް ޔޫލްއަކީވެސް ހުރިހާ ހިއްސުތަކެއް ސަލާމަތުން ހުރި ޒުވާންކަމުގެ ލޭ ހިނގަމުންދާ ފިރިހެނެއް ވިއްޔާއެވެ.ވީއިރު ކައިވެނީގެ އަލަތު ރޭ އަނބިމީހާގެ އުނގުން އުފާ ލިބިގަތުމަށް ނޭދެވޭނެ ހެއްޔެވެ؟

ހިތުގައި އުތުރި އަރަމުންދިޔަ ޖަޒުބާތުތަކުން ފަލަކު އަވަސްވެގަތީ ފާޚާނައަށް ދިޔުމަށެވެ.ނަމަވެސް ހަމަ އެ ސިކުންތުގައި އެބޮޑު ހެދުމުގެ ފެތުރިފައިވާ ފަސްބަޔަށް އެރި އަރި އަޅައިލައިގެން ގޮސް ވެއްޓެންދިޔަ ފަލަކުއަށް ހިފެހެއްޓުނީ ޔޫލްގެ އަތުގައެވެ.ޔޫލްވެސް އެކަހަލަ ކަމަކަށް ނުވިސްނާ ހުރުމުން ދެމީހުން ވެއްޓުނުއިރު ފަލަކުއަށް އޮވެވުނީ ޔޫލްގެ ގައިމަތީގައެވެ.ޔޫލްއޮތީ ނިދަންލީ ސޯޓާއިއެކު ހުސްގަޔާ ހަދާލާފައި ކަމުން ޔޫލްގެ ހަށިގަނޑުގެ ހޫނުކަން ފަލަކުއަށް އިޙްސާސް ވަމުން ދިޔައީ އިންތިހާ ދަރަޖައަށެވެ.އަނެއްކޮޅުން ފަލަކުގެ ހެދުމުގެ ކަރުން އެއްފަރާތު ކޮނޑުން ބޭލިފައި ވާއިރު އަވަސްވެފައިވާ ފަލަކުގެ ހިތުގެ ވިންދުވެސް ޔޫލްއަށް ދިޔައީ އިޙްސާސް ކުރެވެމުންނެވެ.ސާދަ ވިލޭރޭގެ ހަނދެއްފަދަ ރީތި އަނބިމީހާ އެފަދަ ހާލަތެއްގައި އެހާ ގާތުގައި ވުމުން ޔޫލްގެ ގަދަކަމުން ކޮންޓްރޯލް ކުރަމުންދިޔަ އިޙްސާސްތައް ކޮޅުންލިއެވެ.ފަލަކު ތެދުވަންވެގެން ޓައިލްސްތައްމަތީ އަތް އަޅައިލިތަނާ ޔޫލްގެނައި ކުއްލި ހަރަކާތަކާއިއެކު އޭނާއަށް އޮވެވުނީ ޓައިލްސްތައް މަތީގައެވެ.އަދި ޔޫލްގެ ބާމަތި ފުޅާ އެރީތި ފިރިހެންވަންތަ ހަށިގަނޑު އޭނާގެ ގައިމަތީ އޮތްއިރު އެ ހަށިގަނޑުގެ ބަރު ފަލަކުއަށް އިޙްސާސްނުވީ ޔޫލްގެ އެއްއަތް ފަލަކުގެ ގައިދަށަށްލާ އުނަގަނޑުގައި އަޅުވާލާފާއި ވާއިރު އަނެއް އަތުން ޓައިލްސްތައް މަތީ ވިއްދާލާފައި އޮތުމުންނެވެ.މޫނާއި މޫނު ކައިރި ވަމުންދިޔައިރު ދެމީހުންނަށްވެސް އެކަކު އަނެކެއްގެ ހޫނު ނޭވާތައް އިހްސާސް ކުރެވެމުން ދިޔައެވެ.ފަލަކުއަށް ލޯމަރާލެވުނީ އެންމެ ލޯބިވާމީހާ އޭނާގެ ފިރިއަކަށްވެ ފިރިމީހާގެ އަތުތެރޭގައި ފުރިހަމަ ޙައްޤާއިއެކު އެގޮތަށް ވެވުމުން ހިތަށް ކުރެވުންދިޔަ އުފާވެރި އިޙްސާސެއްގެ ބޮޑުކަމުންނެވެ.ޔޫލް ފަލަކުގެ ތުންފަތުގައި ބޮސްދިނީ ނުހަނު ލޯބިންނެވެ.ފަލަކުވެސް ޔޫލްގެ އެ ޙަރަކާތުގައި ބައިވެރި ވަމުންދިޔައީ ހިތާއި ފުރާނައިންނެވެ.

ނަމަވެސް ލޯމަރާލައިގެން އޮވެ ހިތުގެ އެދުމަށް އިޖާބަ ދެމުންދިޔަ ޔޫލްއަށް ހީވީ ފަލަކު އެދުވަހު ދުލުން ބޭރުކޮށްލި ތޫނު ހަންޖަރު ތަކެއްފަދަ ބަސްތައް އޭނާގެ ކަންފަތުގައި ގުގުމާލި ހެންނެވެ.އާނ އެކެވެ.ފަލަކު ހިތުގައި ވަނީ ޒީލްއެވެ.ޔޫލް ކުއްލިއަކަށް ފަލަކުގެ އުނަގަނޑުގައި އަޅުވާލާފައި އޮތް އަތް ދަމައިގަތުމަށްފަހު ތެދުވެގެން ގޮސް އަލަމާރިން ޓީޝާޓެއް ނަގައި ބޮލަށް މަހާލުމަށްފަހު ފަލަކުއަށް ބަލައިލުމެއްވެސް ނެތި ކޮޓަރިން ނިކުމެގެން ހިނގައްޖެއެވެ.އެ އޮތް ގޮތަށް ޓައިލްސްތައް މަތީގައި އޮތް ފަލަކުގެ ލޮލުން ފައިބަމުން ދިޔަ ކަރުނަ ތަކުން އޭނާގެ ދެކަންފަތް ތެންމަމުން ދިޔައެވެ.

ދެމީހުންވެސް އެކަކު އަނެކަކުދެކެ އިންތިހާއަށް ލޯބިވާއިރު އެދެމެދަށް ލެވިފައި އެވާ ޒީލްގެނަމުގެ ފާރު ދުވަހަކުވެސް ވެއްޓިދާނެ ބާވައެވެ.ކިންގު ސައިޒުގެ ބޮޑު އެނދުގައި ލައްގަނެލައިގެން ދެ ކަކުލުގައި އަތް އައަޅައިގެން އިނދެ ރޮމުންދިޔަ ފަލަކުއަށް ނިދުނީވެސް އެގޮތުގައި ވަނިކޮށެވެ.

އެތައްއިރަކު ރަސްފަންނުގައި އިނުމަށްފަހު ޔޫލް ގެއަށް އައި އިރު ހުރީ މެންދަމު ދޭއްވެސް ޖަހާފައެވެ.އެނދުކައިރީ ކުރުގެޅިގެން ނިދިފައި އިން ފަލަކު ފެނިފައި ޔޫލްގެ ރުޅިގަނޑު މައިތިރިވެ ހިތުގައި ހަމްދަރުދީ އުފެދުނެވެ.ފަލަކުގެ ގާތަށް ތިރިވެލުމަށްފަހު އެރީތި ރޮއިރޮއި ދުޅަވެފައިވާ މޫނުމައްޗަށް ވެއްޓިފައިވާ އިސްތަށިތައް ނަގައި ކަންފަތުގައި އަޅުވާލަ ދިނެވެ.އަދި ތެދުވެގެން ގޮސް އޭސީ ރިމޯޓް ނަގައި އޭސީގެ ފިނި މަޑުކޮށްލުމަށްފަހު އެނދުމަތީގައި އޮތް ބްލޭންކެޓް ގެނެސް ފަލަކުގެ ފިނިބޮޑުވެފައިވާ ހަށިގަނޑު ނިވާކޮށްލިއެވެ.

**********

ނުނިދިގެން ދެފަރާތަށް ފުރޮޅި ފުރޮޅި އޮތް ޝައިބާއަށް ހީވަނީ އޭނާގެ ނޭވާވެސް ހާސްވަނީ ހެންނެވެ.މުޅި އުމުރަށްޓަކައި މިރޭ ފަލަކު ޔޫލްގެ އަނބިމީހާގެ ޝަރަފު ލިބިގަނެފައި ވާއިރު ގައިމު އެ ހަށިގަނޑުން އިތުރު އެހެން މީހަކަށް އުފާ ޙާސިލް ކުރެވިފައި ނުވާކަންވެސް މިރޭ ސާބިތު ވެގެން ދާނެއެވެ.ޝައިބާގެ ހިތަށް އަރަމުންދިޔަ އެއްޗިހި ތަކުން މިރޭގެ ނިދިވެސް ވަނީ އޭނައާއި ހާސްމޭލް ދުރުގައެވެ.އެ ޚިޔާލު ތަކުން އޭނާގެ ހިތާއި ސިކުނޑީގެ ހަމަޖެހުންވެސް ވަނީ ނަގާލާފައެވެ.

***********

ފަލަކުއަށް ހޭލެވުނީ ފޯނުގެ އެލާމްގެ އަޑަށެވެ.އޭނާގެ ގައިމަތިން އަޅާފައިވާ ބްލޭންކެޓް ފެނިފައި އެނދުގައި ނިދާލާފައި އޮތް ޔޫލްއަށް ބަލައިލިއެވެ.އަދި ތެދުވެގެން ގޮސް ޔޫލްގެ ގައިމަތީގައި ބްލޭންކެޓް އަޅާލަދިނުމަށްފަހު ފާޚާނައަށް ވަދެ ފެންވަރާލައިގެން ނިކުމެ ފަތިސް ނަމާދު ކޮށްލިއެވެ.

ބޭރަށް ނިކުތްއިރު ސިޓިންގ ރޫމް ސޯފާގައި ތަސްބީހަ ހިފައިގެން ޛިކުރު ކޮށްލަކޮށްލަ އިން ސީމާއަށް ފަލަކު ފެނުމުން ހިނިތުންވެލިއެވެ.ފަލަކުވެސް ސީމާގެ ގާތުގައި އިން ގޮނޑީގައިި އިށީނދެލީ މަންމަަ ނިމެންދެންނެވެ.ސީމާ ނިމުމުން ގޮސް އެތަނުގައި ހުރި ބިއްލޫރި މޭޒުމަތީގައި ބާއްވާފައި އޮތް ޚަތިމާއި ތަސްބީހަ ގެންގޮސް ކޮޓަރިއަށް ލުމަށްފަހު ދެމައިން އެކުގައި ބަދިގެއަށް ވަދެ ހަތެއް ޖަހަންވާއިރު ހުރީ ހެނދުނުގެ ސައިތައްޔާރު ކޮށްފައެވެ.

ހެނދުނުގެ ސަޔަށް އިންސާފު ކުރެވެމުން ދިޔައިރު ތައްޔާރު ކޮށްފައިވާ ކުޅިމަހުގެ މީރު ރަހައަށް ހަނީފް ތަޢުރީފް ކުރަމުން ދިޔައިރު ޔޫލްއަށް ވެސް އެކަމަށް ހިތާއި ހިތުން އެއްބަސް ވެވުނެވެ.ސީމާވެސް ހުރީ ފަލަކުގެ ކެއްކުމުގެ ހުނަރު ފެނިފައި ވަރަށް ހިތްހަމަ ޖެހިފައެވެ.

ފަލަކުއާއި އެކު ސީމާވެސް ދަބަސް ޕެކް ކުރުމުގައި އެހީތެރި ވަމުންދިޔައެވެ.ޔޫލްގެ ކަންތައްތަކަށް ފަލަކުއަށް އަދި މާ ރަނގަޅަށް ނޭނގޭނެތީއެވެ.ސީމާ ޔޫލްގެ ދަބަހަށް އެއްޗިިިހި އަޅަމުން ދިޔައިރު ފަލަކުއަށް ޔޫލްއާއި ބެހޭ ވަރަށް ގިނަ އެއްޗިހި ކިޔައިދިނެވެ.އެމީހުން ހަނީމޫނަށް ދަނީ ޝިމްލާއަށް ކަމުން މިއީ އެތަނުގައި ފިނި މޫސުމް ކަމުގައި ވާތީ ފަލަކު ބަލިވެދާނެތީވެސް ސީމާހުރީ ކަންތައް ބޮޑުވެފައެވެެ.ނަމަވެސް އެއީ ޔޫލް ދާން ބޭނުންވާ ތަނަށްވާތީ އެކަމަށް އެއްޗެކޭ ނުބުނީއެވެ.

“ކޮބާ ޕެކްކޮށް ނިމުނީތަ؟….މިހާރު ނިކުމެގެން ގަޑިއަށް ދެވޭނީ”ޔޫލް އައިސް ދޮރުމައްޗަށް އަރާ ހުއްޓުމަށްފަހު އަހާލުމުން ސީމާ އާނ މިނިމުނީއޭ ކިޔައި ފަލަކުގެ އަތުގައި ހިފައިގެން ކާރަށް އަރަން ދާން ނިކުތެވެ.އެވަގުތު ފަލަކުގެ ބައްޕަވެސް ގުޅާފައި މިހާރު ވަގުތު މާ ކުޑަތަން ވެފައިވާތީ ބައްޕަ ހުޅުލޭއިން އެމީހުންނާއި ދިމާކުރާނެ ކަމަށް ބުންޏެވެ.ދަބަހާއި ފޮށި ކާރުގެ ޑިއްކީއަށް ލުމަށްފަހު ޔޫލްގޮސް ކާރުގެ ކުރީ ސީޓަށް އެރިއިރު ފަލަކު ގޮވައިގެން ސީމާ އިނީ ފަހަތު ސީޓުގައެވެ.އެމީހުންނަށް ޓާމިނަލްއާްއި ހަމައަށް ނުދެވެނީސް ކުއްލިއަކަށް ވައިގަދަކޮށްލާ ވާރޭ ވެހެން ފަށައިފިއެވެ.އެހެންވެ ހަނީފް ކާރު ދުވެލިވެސް ތަންކޮޅެއް މަޑުކޮށްލިއެވެ.

މަންމައަކީ ނުލާހިކު ބޯބަލި މީހެއްކަމުން ޔޫލްގެ އެދުމަށް ހަނީފްއާއި ސީމާ ހުޅުލެއަށް ނުގޮސް މަޑުކުރީއެވެ.ސީމާ ފަލަކު ފެރީއަށް އަރަން ދިޔައިރުވެސް ހީވަނީ އޭނާގެ އުފަން އަންހެން ދަރިފުޅު ތަނަކަށް ދާތީ އުޅޭ ހެންނެވެ.ފަލަކުއަށްވެސް އެގެއަށް އައިސް އަދި އެއްދުވަސްވެސް ރަނގަޅަށް ނުވެގެން އުޅޭއިރު ސީމާގެ އެ އަޅާލުމާއި އޯގާތެރިކަމުން މަންމަގެ ލޯބި ލިބުނު ކަމުގެ އިޙްސާސް ކުރެވެން ފަށައިފިއެވެ.

*********

ފެރީ ހީވަނީ ދެންމެ ދެންމެ ބަންޑުން ޖަހާލަފާނެ ހެންނެވެ.ނަގަމުންދިޔަ ބިޔަ ރާޅު ތަކުގެ ތެރޭގައި ފެރީ ނެގިނެގިފައި ޖެހެމުން ދިޔައިރު ފަލަކުއަށް އިނދެވުނީ ބާރަށް ޔޫލްގެ ފައިގައި ހިފަހައްޓާ ލައިގެންނެވެ.ރާޅާ ޖަހާލާ ކޮންމެ ލުތްކަކާއިއެކު އަތަށް ބާރުލެވެމުން ދިޔައިރު ޔޫލްއަށްވެސް ދިޔައީ އެހަރަކާތުން ކޮންމެވެސް ވަރަކަށް ތަދު އިހުސާސް ކުރެވެމުންނެވެ.އޭރުވެސް ވެހެމުންދިޔަ ވާރޭ ކޮންމެވެސް ވަރަކަށް ތުނި ކޮށްލާފައި ވީނަމަވެސް ޖެހެމުންދިޔަ ވަޔަކަށް ބަދަލެއް ނާދެއެވެ.ކަނޑުވެސް ދިޔައީ ހައްތަހާ ގަދަ ވަމުންނެވެ.ޔޫލްއަށް ފަލަކުގެ ފުރަގަހުން އަތް ގެންގޮސް ފަލަކުގެ އުނަގަނޑުގައި އަޅުވާލުމަށްފަހު އޭނާއާއި ކައިރިއަށް ދަމާލެވުނީ ބިރުންގޮސް ދާހިއްލަމުން ދިޔަ ފަލަކުގެ މޫނު ފެނިފައި އަނބިމީހާއަށް އޭނާގެ އަތުތެރެއިން ހިމާޔަތް ދޭން ބޭނުންވީތީއެވެ.އެމީހުންނަަށް ދެވިއްޖެތޯ ބަލަން ޔޫލްގެ ބައްޕަވެސް މިހާރު ދެފަހަރު ގުޅައިފިއެވެ.ނަމަވެސް ހާލަތުގެ ނާޒުކު ކަމުން ފޯނަށް ޖަވާބު ނުދެވިގެން އުޅެނިކޮށް ދެފަހަރުވެސް ކޯލް މިސްވީއެވެ.

ފަލަކުއާއި ޔޫލްއަށް ހުޅުލެއަށް ދެވުނުއިރު އެމީހުންގެ އިންތިޒާރުގައި ފަލަކުގެ ބައްޕަ ހުއްޓެވެ.ބައްޕައަށް ހިތްހެޔޮ ކުރުމަށް ބުނުމަށްފަހު ފަލަކު ޔޫލްއާއިއެކު އެތެރެއަށް ވަނުމަށް އަވަސްވެގަތީ ޗެކްއިން ވާ ގަޑި ހަމަވާން ކައިރިވެފައި ވާތީއެވެ.

ޗެކްއިން ވުމަށްފަހު ފްލައިޓަށް އެރުމުގެ ކުރިން ޔޫލް ބައްޕައަށް ގުޅާލިއެވެ.ދެކުދިންގެ ޚަބަރެއް ނުވެގެން ކަންތައް ބޮޑުވެފައިހުރި ސީމާއަށްވެސް ހަމަ ޖެހުމުގެ ނޭވާއެއް ލެވުނީ ދެކުދިންނާއި ވާހަކަ ދައްކައި ލެވުމުންނެވެ.ފަލަކުވެސް ބޯޓަށް އެރުމުގެ ކުރިން ޝައިބާގެ ފޯނަށް މެސެޖް ކޮށްލުމަށްފަހު ފޯނު ނިއްވާލިއެވެ.

**ނުނިމޭ**