އިންތިޒާރެއް މަ ނުކުރާނަމޭ (10)

ޝެލީގެ ފަރާތުން ޚަލަފްގެ ކާވެނި ސަރާއާއި ކުރެވުނުކަން އެނގުނު ދުވަހުން ފިށިގެން އަހަރެން ވާނީ އަމިއްލަ ނަފްސަށް ވަޢުދެއް ވެފައެވެ. ދެން ދުވަހަކުވެސް ފަސްއެނބުރި ނުބެލުމަށެވެ. މާޒީ ހަނދާންކޮށް ކަރުނަ ނޭޅުމަށެވެ. ނަމަވެސް މިހާތަނަށްވެސް އަހަންނަށް ކުރެވުނުހާވެސް ކަމަކީ ކޮންމެވެސް ދުވަހަކުން ޚަލަފް އެނބުރި އަންނާނެކަމަށް އިންތިޒާރުކުރުމެވެ. ނަމަވެސް ދެން އިތުރަށް އިންތިޒާރުކުރުމުގެ މާނައެއް ކޮބާހެއްޔެވެ؟ އަހަރެން ޝަމްމުއާއި މެރީކުރަން ރެޑީކަމަށް ބުނުމުގެ ކުރިން އަހަރެންގެ ފުރަތަމަ ލޯބި ބީވެގެން ދިޔަގޮތް ކުރުގޮތަކަށް ޝަމްމުއަށް ކިޔީދިނީމެވެ. އަދި އަހަރެން ޝަމްމުދެކެ ލޯބިވެވޭތޯ މަސައްކަތް ކުރާނެކަމަށް ބުނީމެވެ. ޝަމްމު ވަރަށް އުފާކުރިއެވެ. އަދި އަހަރެންގެ ހިތް ޝަމްމު އަތުލާނެކަމުގެ ޔަޤީންކަންވެސްދިނެވެ.

މަޖާ މިޖާޒެއްގެ ދެމީހުން ކަމުގައި ވިއަސް ޝަމްމުއާއި ޚަލަފް މުޅީން ތަފާތެވެ. ޚަލަފްއާއި ޚިލާފަށް ޝަމްމު އަހަރެންނާއި މާބޮޑަށް ގައިގޯޅިވެއެއް ނޫޅެއެވެ. ކައިވެންޏަށް ފަހުގައި ނޫނީ ދެމީހުން މަސްހުނިވެގެން އުޅެން ބޭނުން ނުވާ ވާހަކަ ފާޅުގައި ބުންޏެވެ. އަހަރެން މިކަމާ ވަރަށް އުފާކުރީމެވެ. އެއީ އަހަރެންވެސް ބޭނުންވާ ގޮތެވެ. ޝަމްމުއާއިމެދު އޮންނަ ޔަޤީންކަން ކުޑަވާފަދަ އެއްވެސްކަމެއް ވާކަށް އަހަރެންވެސް ނޭދެމެވެ.

ހުދުކުލައިގެ ބޮޑު ވެޑިން ޑްރެސްގައި އަހަރެން ހުރީ ހިނިތުންވެލައިގެންނެވެ. ކޮށްފައިވާ މޭކަޕްގެ ސަބަބުން އަހަރެންގެ މޫނުމަތި އަލިވެފާ އޮމާންކަމަށް ދައްކާއިރު ޝަމްމުގެ ފަރާތުން އިރުއިރުކޮޅާ އިވިގެންދާ ތަޢުރީފުގެ ބަސްތަކުން އަހަރެން ހުރީ ރަކިވެފައެވެ.

“ޝަމްމުވެސް މިރޭ އެހެން ރޭރެއަށްވުރެ ހެންސަމްއޭ!” އަހަރެން ބުނެލީމެވެ. “އަދި ތިއަށްވުރެ ގިނައިން މިރޭ ތަޢުރީފު ކުރާނެ! ދެމީހުން އެކަނިވީމަ” ޝަމްމު  އަހަރެން އިތުރަށް ރަކިކޮށްލިއެވެ.

ޝަމްމު ހުދު ގަމީހަކާއިއެކު ކަޅު ޓައީއެއް އަޅާފައިވާއިރު ލައިގެންހުރި ނޫކުލައިގެ ކޯޓާއި ފަޓުލޫނުގެ ސަބަބުން ހަޤީޤަތުގައިވެސް ޝަމްމުގެ ފިރިހެންވަންތަކަން މިރޭ އިތުރަށް ދައްކުވައިދެއެވެ. އަހަރެން މިއަދު މިހުރި މަޤާމަށް އެދިގެން އެތަކެއް އަންހެންކުދިންނެއް އުޅެފައި ވާނެކަން ގައިމެވެ.

ޕާޓީއަށް އަންނަ މެހެމާނުން ގިނަވަމުން ދިޔަ ވަރަކަށް އަހަރެން ދިޔައީ ފިނިވަމުންނެވެ. މިކަން ޝަމްމުއަށް ފާހަގަ ކުރެވުނުހެން ހީވެއެވެ. ޝަމްމު އަހަންނާއި އިތުރަށް ކައިރިވެލަމުން އަހަރެންގެ އަތަށް ފިތާލިއެވެ.

އަހަރެން އެއްލި ކަޅިއަކުން ފުރަތަމަވެސް ލޮލުގައި އަޅައިގަތީ ކަޅު ގަމީހަކާއި ކަޅު ފަޓުލޫނެއް ލައިގެން ފިރިހެންވަންތަ ހިނގުމެއްގައި އަހަރެމެންނާއި ދިމާއަށް ހިނގާލާފައި އެއަންނަ ޒުވާނާއެވެ. އެރީތި ސޫރައަށް މާބޮޑު ބަދަލެއް އައިސްފައެއްނެތެވެ. އެއީ އެ ސޫރަ ދެކެލުމަށް ތާއަބަދު އަހަރެންގެ ހިތް އިންތިޒާރު ކުރަމުންއައި ސޫރައެވެ. އެސޫރައެއް އަހަރެންގެ ހިތުގެ އެންމެ ފުންމިނުގައި ރައްކާކުރެވިފައިވާ ސޫރައެވެ. އަހަންނަށް ލިބުނު ހައިރާންކަމުން ޝަމްމުގެ އަތުގައި ހިފައިގެންހުރި އަތް ދޫވެގެން ދިޔައެވެ. އަހަރެންގެ ގައިން ބާރު ދޫވާހެންވެސް ހީވިއެވެ.

އަހަންނެކޭ އެއްގޮތަށް ޚަލަފްގެ މޫނުމަތިންވިސް ފެންނަމުންދަނީ ހައިރާންކަމެވެ. އަހަރެންނާއި މިތަނުން ބައްދަލުވާނެކަން ކުރިން އެނގިފައި ނެތްކަން އެމޫނުމައްޗަށް އަރާ ފައިބަމުންދާ ކުލަވަރުތަކުން ހެކިދެއެވެ.

“ހެލޯ ބްރޯ! މީޓް މައި ވައިފް އަފްނާން، ޔޫ ކެން ކޯލްހާ އަފޫ އޯރ ނާން، އޯ މިސިސް ހައިޝަމް. ނާން ދިސް އިޒް މައި ބެސްޓް ބަޑީ މުހައްމަދު ޚަލަފް ޝޯޓްކޮށްލާފަ މުފް އެން ހިސް ލަވިން ވައިފް ސަރާ. ސަރާ ކަމް މީޓް މައި ވައިފް. އަމް ސޯ ސޯ ހެޕީ ޔޫ އަރ ހިއަރ މޭން.” ޝަމްމުގެ މޫނުމަތީވަނީ ފުޅާ ހިނިތުންވުމެކެވެ.

އަހަންނަށް ވީގޮތް ރޭކާލާކަށް މާ ގިނައިރުތަކެއް ނުނެގިއެވެ. ޝަމްމުގެ ބެސްޓް ބަޑީއެއްގެ ވާހަކަ އަބަދުވެސް އަހަރެންގެ ކައިރީ ދައްކައެވެ. އެއީ ކުޑައިރުއްސުރެ އެއް ކްލީހެއްގައި ވަރަށް ގިނަދުވަހު އުޅުމުން އެކުވެރި ވެފައިވާ ދެކުދިންނެވެ. ކައިވެނި ކުރެވެންވާއިރަށް އެމީހަކަށް ނާދެވިގެންވެސް ހުރީ ދެރަވެފައެވެ. ނަމަވެސް ޝަމްމުގެ އެންމެގާތް އެކުވެރިޔާ މުފް އަކީ ޚަލަފްއަށް ވެދީނެކަމަކަށް ދުވަހަކުވެސް އަހަންނަށް ހީކުރެވިފައި ނެތެވެ. އަނެއްކޮޅުން ޝަމްމު އަބަދުވެސް ރައްޓެހިންގެ ގާތުގައި އަހަރެންގެ ވާހަކަ ދައްކަނީ އަފޫ އޭ ކިޔައިގެންނެވެ. އެއީ އެންމެ ފުރަތަމަ އަހަންނާއި މުޚާތަބްކުރި ނަމުންނެވެ. އެހެންކަމަށްވީއިރު ޚަލަފްއަށްވެސް ޝަމްމު ކާވެނިކުރީ އަހަންނާއިކަން ނޭނގި އޮވެދާނެއެވެ.

ޚަލަފް ދިއްކޮއްލި އަތުގައި ހިފާލުމަށްފަހު އެމޫނަށް ފުންކޮށް ނަޒަރު ހިންގާލީމެވެ. ދެމީހުންގެ ހަތަރުކަޅި ހަމަވި ވަގުތު ޝަކުވާއިން އަހަރެންގެ ހިތް ފުރުނެވެ. އަތް ދޫކޮށްލަންވެސް ނޭނގިފާ އަހަންނަށް ހުރެވުނެވެ.

“އަހަންނާ ސަލާމެއް ނުކުރާނަންތަ؟” އަހަންނާއި ދިމާއަށް ދިއްކޮށްލެވިފައިވާ ސަރާގެ އަތަށް ބަލާލެވުނެވެ. އަވަސް އަވަހަށް ޚަލަފްގެ އަތުން އަތް ދޫކޮށްލަމުން ސަރާއާއި ސަލާމްކޮށްލީމެވެ. އަދި ގަދަކަމުން ހިނިތުންވެލީމެވެ. ސަރާގެ މޫނުމަތީގައިވެސް ފެންނަންހުރީ ހިނިތުންވުމެކެވެ. ސަރާގެ ބޮޑު ބަނޑު ލޮލުގައި އަޅައިގަތީ އެވަގުތެވެ. އަހަރެން އެދެމީހުންނަށް މަރްޙަބާ ކީމެވެ.

އަހަރެންގެ މިޖާޒު މުޅީން ބަދަލުވެއްޖެއެވެ. އެތަށް ދުވަހަކަށްފަހު ލޯކުރިމަތިން އެ ސޫރަ ފެނުމުން އަހަރެންގެ ފަސްއަޅާ ފޮރުވާފައިވާ މާޒީ އަނެއްކާވެސް އަހަރެންގެ ލޯ ކުރިމަތިން ސިފަވަމުން ދަނީއެވެ. އަހަރެން ފެންކަޅިވެފައިވާ ދެލޮލުން ޚަލަފްގެ ކޮންމެ ޙަރަކާތަކަށް ބަލަމުން ގެންދިޔައީމެވެ. ޚަލަފްވެސް އިރު އިރުކޮޅާ އަހަންނަށް ނަޒަރު ހުއްޓާލައެވެ. އެއަށްފަހު އިސްޖަހާލަނީ ކުއްވެރިއެއް ފަދައިންނެވެ.

ޕާޓީ ނިމުމަށްފަހު އެކި މީހުން އެކި ދިމާއަށް ގޮސް ނިމިއްޖެއެވެ. އަހަރެމެން ދާން ހަމަޖެހިފައިވަނީ ޝަމްމު އަހަރެމެން ދިރިއުޅުމަށްޓަކައި ކުއްޔަށް ހިފާފައިވާ އެޕާރޓްމެންޓަށެވެ. ޕާޓީއަށް އައުމުގެ ކުރިން އަހަރެންގެ ފޮށިވެސް ވާނީ އެގެއަށް ފޮނުވާލެވިފައެވެ.

ކާރުގައި އިންއިރުވެސް އަހަންނަށް ވިސްނެމުން ދިޔައީ ޚަލަފްއާއި ދޭތެރޭގައެވެ. ކުށްލިއަކަށް ހިތަށް އައި ޚިޔާލެއްގެ ސަބަބުން އަހަންނަށް ލޯމަރާލެވުނެވެ.

ޝަމްމު ބުނެފެއިވަނީ އެ އެޕާރޓްމެންޓަކީ ދެކޮޓަރީގެ ތަނެއްކަމަށެވެ. ގާތް އެކުވެރިއަކާއިއެކު ޝެއާވާގޮތަށް ހިފާފައިވާ ތަނެއްކަމަށެވެ. އަނެއްކާ… އަހަރެންގެ ބޮލަށް ބާރުވަމުންދިޔައީ ސިކުނޑީގައި ގިނަވަމުންދިޔަ ސުވާލުތަކުގެ ސަބަބުންނެވެ.

“ވެލްކަމް މައި ލަވް.” އެޕާރޓްމެންޓްގެ ދޮރު ހުޅުވާލަމުން ޝަމްމު ބުނެލިއެވެ. އޭރު ކުރިމަތިން ފެންނަމުންދާ މަންޒަރުން އަހަންނަށް ހީވީ ބިންގަނޑު ފައިދަށުން ދެމިގަތް ހެންނެވެ. ސޯފާގައި ޖެހިޖެހިގެން އިށީނދެލައިގެން ނުހަނު ގާތުގައި އެތިބީ ޚަލަފްއާއި ސަރާއެވެ. ޝަމްމު އެބުނި ރައްޓެއްސަކީ ޚަލަފްއެވެ. އާއެކެވެ! އަނެއްކާވެސް ޚަލަފްއާއި އެއް ފުރާޅެއްގެ ދަށުގައި އުޅެން އަހަންނަށް މަޖުބޫރުވީއެވެ.

ކީއްވެ ހެއްޔެވެ؟ އަހަރެން ޚަލަފްއާއި ދުރަށްދާން މަސައްކަތް ކުރި ވަރަކަށް ކުރިމައްޗަށް އަންނަނީ ކީއްވެހެއްޔެވެ؟ އަހަރެން ތި ޚިޔާލުތައް ހިތުން ފުހެލަން މަސައްކަތު ކުރިވަރަކަށް އެ ހަނދާންތައް އާކޮށްދެން ތިއުޅެނީ ކީއްވެހެއްޔެވެ؟ އަހަރެން އުފާވެރި ދިރިއުޅުމަކަށްއެދި ކުރިއަށް އެޅި ފިޔަވަޅުވެސް ހުއްޓުވަން މަސައްކަތް ތި ކުރަނީ ކީއްވެހެއްޔެވެ؟ އަހަރެންގެ ކުށަކީ ކޮބީކަން އަންގާނުލާ ދުރަށް ކޮއްޕާލުމަށްފަހު މިހިތަށް އިތުރު ޒަހަމްދޭން އަދިވެސް ބޭނުންވަނީ ހެއްޔެވެ؟ އަދިވެސް މިހިތަށް ކުރެވުނު އަނިޔާއިން ނުފުދުނީ ހެއްޔެވެ؟

ކޮންމެ ދުވަހަކު ޚަލަފްގެ އަތުތެރޭ އެހެން މީހަކު ވާތަން ދެކެން އަހަންނަށް ކެތްވާނެހެއްޔެވެ؟ ކޮންމެ ދުވަހަކު އެހެންމީހަކަށް ލޯބިދޭތަން ދެކެން އަހަރެންގެ ދެލޮލަށް ކުޅަދާނަވެގެންވާނެ ހެއްޔެވެ؟ ނޫނެކެވެ. ތިފަދަ ރަހުމްކުޑަ މީހަކަށް ނުވާށެވެ! އަހަރެންވީ ތެދުވެރި ލޯބީގެ ބަދަލް ޚަލަފް އަބަދުވެސް ދޭން ބޭނުންވަނީ އަނިޔާއިން ހެއްޔެވެ؟ މިހިތް ވަރަށް ރޮއްވައިފީމެއްނުން ހެއްޔެވެ؟ އަހަރެން ވަރަށް ކެތްކޮށްފީމެވެ! އެކަމަކު ދެން ކެތެއް ނުވާނެއެވެ. ޒަހަމްވެފައިވާ މިހިތުގެ ރޯ ފާރުތައް އިތުރަށް ފުންނުކުރާށެވެ! އަހަންނަށް އިހްސާސްވަމުން ދިޔައީ އަހަރެންގެ ވަށައިގެންވާ ތަންތަން އެންބުރެމުންދާކަމެވެ. ދެން ވީގޮތެއް ނޭނގެއެވެ.

ހޭވެރިކަން ވީއިރު އަހަރެން އޮތީ ކޮޓަރީ އެނދުމަތީއެވެ. ދެލޯ ހުޅުވާލުމާއިއެކު އަހަންނަށް ފެންނަމުން ދިޔައީ މިރެއަށްޓަކާ ކޮޓަރި ޒީންތްތެރި ކޮށްފައިވާ މިންވަރެވެ.

ކޮޓަރީގެ އެކި ހިސާބުގައި ބަހައްޓާފައިވާ އުއްބައްތިތަކުގެ އަލި ފިޔަވާ އެއްވެސް އަލިކަމެއް ނެތްއިރު ކޮޓަރީގެ ރީތިކަން އިތުރުކޮށްދެއެވެ. އެނދުގެ ވަށައިގެން ރަތްކުލައިގެ ކުދި މާތަކަކުން ތައްޔާރުކޮށްފައިވާ މާފަތިތައް އެލުވާލެވިފައިވެއެވެ. ތެދުވަމުން އެނދަށް ނަޒަރު ހިންގާލިއިރު އަހަންނަށް އޮވެވުނީ ރަތް ފިނިފެންމާ ފިޔައިން އެނދުމަތީ ޑިޒައިން ކޮށްފައިވާ ހިތުގެ މަތީގައެވެ. އަހަރެންގެ މަގަތުގައި އިށީނދެލައިގެން އިން ޝަމްމުގެ ލޮލަށް ނަޒަރު ހިންގާލީމެވެ. އެ މަސްތުން ފުރިގެންވާ ލޮލުން ޝަމްމު އަހަންނަށް ބޭނުންވާވަރު ހާމަވެގެންދެއެވެ.

“ލޯބި ނިދާލާ ދެން މިރޭ. މިއަދު މާ ބިޒީކޮށްލައިގެން އުޅުނީމެ ވަރުބަލިވެފަ ތިހުރީ.” އަހަރެންގެ ފަނިފޮދު ބޮއި ނިމުމުން ހިތުގެ އެދުން ސިއްރުކުރަމުން ޝަމްމު ބުނެލިއެވެ. ޝަމްމުގެ ރަނގަޅުކަމާއި އަހަރެންދެކެ ވާ ލޯބި އެވަގުތުކޮޅުގައިވެސް ހާމަވެގެންދިޔައެވެ. އެހެންކަމުން ޝަމްމު މާޔޫސްކޮށްލާކަށް އަހަރެން ބޭނުމެއް ނުވިއެވެ. އަވަސް ޙަރަކާތަކާއިއެކު އަހަރެން ޝަމްމުގެ މޭގާ ބޯއަޅާލީމެވެ. ޝަމްމުގެ އަތް އަހަރެންގެ ވަށާލިއެވެ. އަދި ލޯބިން ފުރިގެންވާ ބެލުމަކުން އަހަންނަށް ބަލާލިއެވެ. ލަސްތަކެއްނުވެ ދެމީހުން އަލަތު ކާވެނީގެ ލައްޒަތު ލިބިގަތުމަށް ދަތުރު ފަށައިފީމެވެ.

އާ ދުވަހަކަށް އިރު އަރައިފިއެވެ. ހުރިހާ އެންމެންނެކޭ އެއްފަދައިން އަހަރެންވެސް ތައްޔާރުވަމުން ދިޔައީ ދަތުރު ދިއުމަށެވެ. ކާވެންޏަށްފަހު ދަތުރުދާން މާ ކުރިއްސުރެ ޝަމްމު ވަނީ ރާވާފައެވެ. މާލެ އަތޮޅު ކުޑަވާލިގިއްޔަށް ދާން ހަމަޖެހިފައިވާއިރު މި ދަތުރުގައި ޢާއިލާގެ މީހުންނާއި ޝަމްމުގެ ބައެއް ރައްޓެހިންވެސް ބައިވެރިވިއެވެ. ޚަލަފްއާއި ސަރާވެސްމެއެވެ.

އަހަރެން ހުރީ ދަތުރު ދާހިތްވެސް ކެނޑިފައެވެ. ނަމަވެސް ޝަމްމުގެ އުފަލަށްޓަކާ އަހަރެން ދަތުރުދާން ނިންމީއެވެ. އަހަރެން ނުގޮއްސިނަމަ ދަތުރު ފަނިވެދާނެތީއެވެ.

ލާންޗު ކުޑަ ވިލިނގިންޔާއި ގާތްވުމުން ބައެއް މީހުންގެ ހަޅޭކުގެ އަޑު އިވުނެވެ. އެންމެންވެސް ތިބީ ވަރަށް އުފާވެފައެވެ. އަހަރެންވެސް މިރަށަށް ދަތުރު އައީ އަދި އަލަށްކަމުން ފޯނުގައި ރީތި ގޮތްގޮތަށް ނަގާފައިވާ އެރަށުގެ މަލަމަތީގެ ފޮޓޯތައް ސޭވްކޮށްލީމެވެ.

ހެނދުނުގެ ސަޔަށްފަހު އެންމެންފެށީ ފައިގަތަޅާ ކުޅޭށެވެ. އަހަރެން ކުޅޭހާތް ނެތުމުން ތަންކޮޅެއް ދުރުގައި ގޮނޑުދޮށުގައިހުރި ރުކެއްގައި ބުރަކަށި ޖައްސާލައިގެން މޫދަށް ނަޒަރު ހުއްޓާލައިގެން ހުރީމެވެ.

ވިލުނޫ ކުލައިގެ މޫދުގެ ތެރެއިން ފޮނުއަރުވަމުންއައިސް ދޮންވެލިގަނޑު މައްޗަށް ރާޅު ބިންދާލާ މަންޒަރު ބަލަން ހުންނަ މީހެއްގެ ހިތަށް ފިނިކަން ލިއްބައިދޭހާ ހާތްގައިމެވެ. ނަމަވެސް އެ މަންޒަރަކުން އަހަރެންގެ ވިރެމުންދާ ހިތަށް ފިނިކަމެއް ލިއްބައެއް ނުދިނެވެ. އެއަށްވުރެ މިހިތަށް ލިބެމުންދިޔަ ވޭނާއި ހޫނު މާވަރުގަދައެވެ.

“ނާން! އަމް ހިއަރ ފޯރ ޔޫ.” ފަހަތުން އަހަރެންގެ ހަށިގަނޑުގައި ބާރަށް ބައްދާލެވިފާވުމުން އަހަރެންގެ މާޔޫސްވެފައިވާ ހިތަށް ފިނިކަމެއް ލިބުނެވެ. އެމޫނު އަހަރެންގެ މޫނުގައި ޖެހިފައިވާއިރު ތުނބުޅީގެ އިސްތަށިތައް އަހަރެންގެ ކޯތާފަތުގައި ފިރުމަމުން ދިޔައެވެ.

“ޚަލަފް!” އަހަރެންގެ ދުލުން ބޭރުވީ އެންމެ ލަފްޒެކެވެ.