އިންތިޒާރެއް މަ ނުކުރާނަމޭ (9)

…

މާޒީގެ ޞަފްހާތަކަށް ގެއްލިފާ އަހަންނަށް އޮވެވުނީ ކިހާ އިރަކު ކަމެއްވެސް ނޭނގެއެވެ. އެ ހިތްދަތި ދުވަސްތައް ހަނދާންވުމުން އަނެއްކާވެސް އަހަރެންގެ ލޯ ކަރުނުން ފޯވިއެވެ.

ޚަލަފްގެ ހިތުގައިވެސް އަންނަށްޓަކައި ތެދުވެރި ލޯތްބެއް ވާކަމާއި އެދުވަހު ޚަލަފް އެގޮތަށް ކަންތައް ކުރީ ސަރާގެ ބަލިހާލުގެ ސަބަބުންކަން އެނގުމުން ކޮންމެސްވަރެއްގެ ހިތްހަމަޖެހުމެއް ހިތަށް ލިބުނެވެ. ނަމަވެސް ޙާލަތު މިއަދު މިވަނީ ބަދަލުވެފައެވެ. ޚަލަފްއެކޭ އެއްފަދައިން އަހަރެންގެ ދިރިއުޅުމަށްވެސް ގިނަ ބަދަލުތަކެއް އައިސްފައިވެއެވެ. އަހަރެންގެ އެކަނިވެރި ޙަޔާތް އުފާވެރި ދިރިއުޅުމަކަށް ހަދަން ޝަމްމުވަނީ އެތަށް ގޮތަކުން މަސައްކަތް ކޮށްފައެވެ. އަހަރެންގެ ހުރިރާވެސް އުންމީދަކީ މިހާރު ޝަމްމުއެވެ. ޝަމްމުއާއިއެކު އުފާވެރި ދިރިއުޅުމެއް އުޅުމެވެ.

“ނާން އަހަންނަށް މާފް ކޮށްދޭނަންދޯ؟” އަހަރެންގެ ފޯނަށް އައި މެސެޖް ކިޔާލީމެވެ. އަހަރެން ޚަލަފްއަށް މާކުރިންވެސް މާފު ކޮށްފައިވާކަމާއި އެކަން ދެން ހަނދާން ނައްތާލުމަށް ބުނެ މެސެޖަށް ރިޕްލައި ކޮށްލީމެވެ. އެއާއިއެކު އަނެއްކާވެސް މާޒީގެ ޞަފްޙާތައް އަހަރެންގެ ޚިޔާލަށް އަންނަންފެށިއެވެ.

…

ސަރާއާއި ދޭތެރޭ އަހަރެންގެ ހިތުގާ އެއްވެސް ހިތްބުރަކަމެއް ނެތެވެ. އެމަޤާމްގައި އަހަރެން ހުރި ނަމަވެސް ކަންތައްކުރެވޭނީ އެހެންކަންނޭނގެއެވެ. އެންމެ ތުއްތުއިރުއްސުރެ ބައްޕައެއް ހުރެ އެބައްޕަގެ ލޯބިން މަޚްރޫމްވެފައެވެ. މަންމަގެ ހިތުގެ ބަލީގެ ސަބަބުން ސަރާ ދޫކޮށް ދާނީ ކޮންވަގުތަކުކަން ބުނެދޭންވެސް ނޭނގެއެވެ. އެހެންކަމަށްވީއިރު ތިމާ ލޯބިވާ ފަރާތް އެގޮތަށް އެހެންމީހެއްގެ އަތްމައްޗަށް ދޫކޮށްލަން އެދޭނީ ފަހެ ކާކުހެއްޔެވެ؟ ޚަލަފްފަދަ ރަނގަޅު އިންސާނެއް ތެޔޮ ނާށި ކާޅު ޖަހައިގަންނަ ފަދައިން އަތުލަންދެން މަޑުން ހުރެވޭނީ ކާކަށްހެއްޔެވެ؟ އަހަރެން ނަމަވެސް ނުހުންނާނަމެވެ.

އަހަރެން ޚަލަފްގެ ހަނދާންތަކާއި ދުރުވުމަށް ނުހަނު މަސައްކަތް ކުރީމެވެ. ނަމަވެސް އެނަން މިހިތުގައި ބިންވަޅުނެގިފައިވަނީ އެއަށްވުރެ ވަރުގަދަ ދެއްޔަކުންނެވެ. އެސޫރަ އަހަރެންގެ ދެލޮލުގެ ކުރިމަތީ އަބަދުވެސް ސިފަކުރެވެމުންދިޔައެވެ. ނަތީޖާއަކަށްވީ ކިޔެވުމަށް ދޭންވާ ސަމާލުކަންވެސް ކުޑަވެ އަހަރެން ބޭނުންވި ނަތީޖާއާއި ހަމައަށް ވާސިލް ނުވެވުމެވެ. އެހެންނަމަވެސް  ވަރަށް ހިތްވަރު ނެރެގެން ކުރި ބުރަ މަސައްކަތުން ފަހު ސެމިސްޓާރގެ އިމްތިހާނުން ފާސްވުންވެސް އެއީ އަހަންނަށް ވަރަށް ބޮޑު މިންވަރެކެވެ.

ޖެހިގެން އައި އަހަރު އަހަރެން އަމިއްލަ ރަށް ކަމައްވާ ވެލިދޫގެ  ނ. އަތޮޅު ތައުލީމީ މަރުކަޒުގައި ޓީޗަރެއްގެ ގޮތުގައި މަސައްކަތް ކުރަން ފެށީމެވެ. ސްކޫލްގައި ބިޒީ ޝެޑިއުލް އަކަށް މަސައްކަތް ކުރަމުންދާން ފެށުމުން ޚަލަފްގެ ޚިޔާލުތައް މަޑުމަޑުން ފުހެވެން ފަށައިފިއެވެ. ނަމަވެސް ރޭގަނޑު ނިދަން އޮށޯންނަ ވަގުތަކީ އަބަދުވެސް އެޚިޔާލުތައް ހިތުގައި ތާޒާވާ ވަގުތަކަށް ވަނީ ވެފައެވެ.

ދުވަސްތައް ފާއިތުވަމުންދެއެވެ. އަހަރެންގެ ގިނަ އެކުވެރިން މިހާރު ޙަޔާތުގެ ބައިވެރިޔާއާއިއެކު ދިރިއުޅުން ފަށައިފިއެވެ. ބައެއް މީހުންނަށް މިހާރު ކުދިންވެސް ލިބިއްޖެއެވެ. އެއިން ކޮންމެ މީހަކުވެސް އަހަރެން ފެނުމުން ކުރަނީ އެއް ސުވާލުތަކެކެވެ. “ކޮބާ އަދިވެސް ތިޔަ އުންމީދުކުރާ ޕްރިންސް އާ ދިމާ ނުވަނީ ހެއްޔެވެ؟ ކާވެނި ކުރަނީ ކޮންއިރަކުން ހެއްޔެވެ؟ އަދިވެސް ސައި ދޭކަށް ނުވޭހެއްޔެވެ؟” އަހަރެންގެ ޖަވާބަކީ އަބަދުވެސް އެއް ޖަވާބެކެވެ. “ދެން ތިކަމާވެސް އުޅެންވީއެ!”

ނަމަވެސް ޙަޤީޤަތަކީ އަހަރެން އެފަދަ ކަމަކަށް އަދި ތައްޔާރު ނޫންކަމެވެ. ކިތަންމެ ކުދިންނެއް އަހަރެންގެ ގާތުގައި އިންނަން އެހިއަސް އަހަރެންގެ ޖަވާބަކީ ސޮރީއެވެ.

ފަތިހުގެ ހަމަހިމޭން ވަގުތެވެ. ފަތިސް ނަމާދަށްފަހު އަހަރެންވެސް ދަބަސް ކޮނޑުއަޅައިގެން އަތިރިމައްޗަށް ނިކުތީމެވެ. މިއަދަކީ ސަރުކާރު ބަންދު ދުވަހަކަށްވުމުން ސްކޫލްގެ މުއައްޒަފުންގެ މެދުގައި ގުޅުން އިތުރަށް ބަދަހިކޮށް މަޖާ މާހައުލެއްގައި އުޅެލުމުގެ މަޤްސަދުގައި ފަޅުރަށަކަށް ދަތުރުދާންވަނީ ރާވާފައެވެ. އެހެންކަމުން ވަރަށް މަދު މީހަކު ނޫނީ ހުރިހާ މުއައްޒަފުން ކަހަލަ ގޮތަކަށް އަތިރިމައްޗަށް ނިކުމެ ތިއްބެވެ.

މޫދާއި މާ ދުރުނޫން ހިސާބެއްގައި ހުރި ހިރުނދު ގަހެއްގެ ދަށުގައި އިށީނދެލައިގެން އަހަރެން އިންއިރު އަހަރެންގެ ސިކުނޑީގައި އެނބުރެމުންދިޔައީ ޚަލަފްގެ ޚިޔާލުތަކެވެ. ވަރަށް ފާޅުގައި އަހަންނާއި ދުރަށްދާން ބޭނުންކަމަށް ބުނި ނަމަވެސް އަހަރެންގެ ހިތް އަދިވެސް އެސޫރަ ދެކެލުމަށް އިންތިޒާރު ކުރެވެނީއެވެ.

“އަފޫ!” އަހަރެންގެ ނަމުން މީހަކު ގޮވާލުމުން އަޑުއައި ދިމާއަށް ބަލާލީމެވެ. ސްކޫލްގެ ގިނަ މުއައްޒަފުން އަހަންނާ މުޚާތަބްކުރަނީ އެނަމުންނެވެ.

އިސްކޮޅުން މާ ދިގުނޫން ހަމުގެ ކުލަ އަލި ފިރިހެނެކެވެ. ބޮޑު ދެލޮލަކާއި ތޫނު ކަޅިރަވައެކެވެ. މަތިމަހާއި ތުނބުޅި ކުރުކޮށް ކޮށާލެވިފާވެއެވެ. ކަކުލާއި ހަމައަށް އަންނަ ޖިންސުބުރިއެއް ލައިގެން ހުސްގަޔާ ހުރިއިރު އެ ކަސްރަތީ ހަށިގަނޑު ފެންނަ ކޮންމެ އަންހެން ކުއްޖަކުވެސް ހިތްކިޔާނެކަން ގައިމެވެ. ނަމަވެސް އަހަރެން އިސްޖަހާލީމެވެ.

“ހާދަ އެކަނިވެރިކޮށް! ކޮން ފިކުރެއްގަ؟” އެ ނުދަންނަ މީހާ އައިސް އަހަރެންގެ ގާތުގައި އިށީންނަމުން ސުވާލުކޮށްލިއެވެ. އަހަރެން ފިކުރެއް ނުކުރަމޭބުނެ ދުރު ބަލަހައްޓައިގެން އިނީމެވެ.

“ދަތުރު އަންނަން ދޯންޏަށް އެރީއްސުރެ މިބަލަނީ. އަދިއެއް ތި މޫނުން އެންމެ ފަހަރަކުނޫނީ ހިނިތުންވުމެއް ނުފެނޭ. އަބަދުވެސް  ކޮންމެވެސް ޚިޔާލެއްގެ ތެރެއަށް ގެއްލިފަ ވަރަށް އެކަނިވެރިކޮށް އުޅޭތަން ފެންނަނީ. އެހެންވެ ބޭބެ ކައިރިން ނަން އަހައިގެން އެވަރަކުން މިއައީވެސް ތި އެކަނިވެރިކަން ފިލުވައިދެވޭތޯ؟ އަހަންނަށް ކިޔަނީ ހައިޝަމް. ޕްރިންސިޕަލް ޝަހީމްއަކީ އަހަރެންގެ އެއްބަނޑު އެއްބަފާ ބޭބެ.” ހައިޝަމް އަމިއްލައަށް ތަޢާރަފްވެލިއެވެ. އަހަރެންވެސް ހިނތުންވެލީމެވެ.

“ހިނގާބަލަ ހިނގާލަންދާން. ފޫހިވެފަ މިހުރީ. އެމީހުން އަދިވެސް ސައިބޮއި ނިމުންކަމަކަށް ނުހެދިވިއްޔަ.” ހައިޝަމްގެ އެދުމަށް އަހަރެން އިންތަނުން ތެދުވެ ހިނގައިގަތީމެވެ. އަހަރެންވެސް ބޭނުންވީ އެ ޚިޔާލުތަކާއި ދުރަށްދާށެވެ. އެހެންމީހުން ފަދައިން ހިނިތުންވެ އެދަތުރުގެ މަޖަލުގައި ބައިވެރިވާށެވެ.

ދެމީހުން ރާޅުފެންފަށުގައި ހިނގަމުން ދިޔައިރު ގިނައިން ދެކެވުނީ ހައިޝަމްގެ ލައިފް ކުރިއަށްދާ ގޮތުގެ ވާހަކައެވެ.

ހައިޝަމްގެ އުފަން ރަށަކީ ސ. ހިތަދޫ ކަމާއި އުޅެބޮޑުވީ މާލޭގައިކަމެވެ. ވަޒީފާ އަދާކުރަނީ ކަސްޓަމްސްގައި ކަމަށާއި ވެލިދޫއަށް އައިސް އެއުޅެނީ ޗުއްޓީއެއް ނަގައިގެން ބޭބެމެންނާއިއެކު މަޖާކޮށްލަން ކަމަށެވެ. އަދި އައިފަހުން މިވީ ދެދުވަސްކަމާއި އަދި ދެޙަފްތާވަރު މިކޮޅުގައި މަޑުކުރަން ގަސްތުކުރާކަމެވެ. މިހެންގޮސް އެތަށް ވާހަކައެއް ދެކެވުނުއިރު ހައިޝަމްގެ މަޖާ މިޖާޒުގެ ސަބަބުން އަހަންނަށް ހެވެއެވެ. ހާދަ އަނގަގަދަ މީހެކޭވެސް ބައެއް ފަހަރު ހިތަށް އަރައެވެ. އަހަރެން ހައިޝަމްއޭ ކިޔާ ވާހަކަ ދައްކަން ފެށުމުން ޝަމްމު ކިޔަސް އޯކޭކަމަށް ބުނެލިއެވެ.

އެނބުރި އެހެންމީހުން ތިބި ހިސާބަށް ދެވުނުއިރު އަހަރެންގެ މިޖާޒު މުޅީން ބަދަލުވެ ހިނިތުންވުމެއް މޫނުމަތީގައި ހުއްޓެވެ. އެމީހުންތިބީ ފައިގަތަޅާ ކުޅޭށެވެ. އަހަރެމެން ދެމީހުން އެއްކޮށް ފެނުމުން ޕްރިންސިޕަލް ދެމީހުން ކަމެއްހޭކިޔާ ދިމާކޮށްލުމުން އަހަރެން ހުރީ ރަކިވެފައެވެ. ދެންތިބި މީހުންވެސް އަހަންނާއި ދިމާކުރަން ފެށުމުން އަހަރެން އިތުރަށް ލަދުގަންނަގޮތްވިއެވެ. އެއާއި ޚިލާފަށް ޝަމްމުގެ މޫނުމަތިން ފެންނަންހުރީ ނުފިލާ ހިނިތުންވުމެކެވެ.

އެދަތުރަށްފަހު އަހަންނާއި ޝަމްމުގެ އެކުވެރިކަން ދިޔައީ ބަދަހިވަމުންނެވެ. ސްކޫލުން ގައަށް އައުމަށްފަހު ލިބޭ ހުސްވަގުތުތައް ގިނައިން ހޭދަކުރެވެނީ ޝަމްމުއާއި އެކުއެވެ. ޝަމްމުގެ އޯގާތެރިކަމާއި އުފާވެރި މިޖާޒުގެ ސަބަބުން އަހަރެންގެ ދިރިއުޅުމަށް އެތަށް ދުވަހަކަށްފަހު އާރޯކަން ގެނެސްދިނެވެ. ޝަމްމުއާއިއެކު ހޭދަކުރާ ވެގުތުތަކުގައި ނުފިލާ ހިނިތުންވުމެއް އަހަރެންގެ މޫނުމަތިން ފެންނަކަން އެހެން އެންމެންނެކޭ އެއްފަދައިން އަހަންނަށްވެސް ފާހަގަ ކުރެވުނެވެ. އެ އަޅާލުމާ އޯގާތެރިކަމުގެ ސަބަބުން ޚަލަފްގެ މަތިން ވަރަށް ހަނދާންވެއެވެ. ނަމަވެސް އެ ޞަފްޙާތައް މަޑުމަޑުން ހިތުން ފަށަ ފުހެލަން އަހަރެން މަސައްކަތް ފަށައިފީމެވެ.

ޝަމްމު ފުރާދުވަސް ކައިރިވަމުން ދިޔަ ވަރަކަށް އަހަރެންގެ ހިތް ނުތަނަވަސްވަނީއެވެ. އަނެއްކާވެސް އަހަރެން އެކަނިވާން އުޅޭކަމުގެ އިހްސާސުން އަހަރެންގެ ހިތް ރޮއްވަމުންދަނީއެވެ.

ޝަމްމު ފުރައިގެން ދިޔައީ އަހަނަށް ބަރާބަރަށް ގުޅާނެކެމާއި ކިތަންމެ ދުރުގައި ހުއްޓަސް އެބަދުވެސް ހާލުބަލާނެކަމަށް ބުނެއެވެ. ދިއުމުގެ ކުރިން އަހަރެންގެ ފަރާތުން އެދުނީ ހަމަ އެންމެ ކަމަކުއެވެ. އެއީ ޝަމްމު ދިއުމަށްފަހުވެސް ކުރީގައި އުޅުނުފަދަ އެކަނިވެރި ދިރިއުޅުމެއް ނޫޅެ އުފާވެރިކަމާއި ހިނިތުންވުމާއިއެކު ދިރިއުޅުމާއި ކުރިމަތިލުމަށެވެ. އަހަރެން ޝަމްމުގެ އެދުން ފުރިހަމަކުރަން މަސައްކަތް ކުރީމެވެ. ނަތީޖާއަކަށްވީ އަހަރެން ހީވެސް ނުކުރާފަދަ ހިތްވަރުގަދަ ކާމިޔާބު މީހަކަށް އަހަރެންވުމެވެ.

އަހަންނެކޭ އެއްގޮތައް ޝަމްމުވެސް އޭނާ ވަޢުދުވީ ަފަދައިން އަހަރެންގެ ހާލުބަލަމުން ގެންދިޔައެވެ. އިރު އަރާނީ ޝަމްމުގެ ފޯންކޯލަކުންނެވެ. އަދި ޝަމްމުގެ ގުޑް ނައިޓް މެސެޖެއް ނުލިބެނިސް އަހަރެންގެ ލޮލަށް ނިދިވެސް އަންނަ ކަމަކަށް ނުވެއެވެ. ނަމަވެސް ޙަޤީޤަތަކީ ޝަމްމުގެ އެ ގާތްކަމާއި އޯގާތެރިކަން ޚަލަފްގެ މަތިން ހަނދާންކޮށްދޭކަމެވެ. އެއީ ޚަލަފް ނަމައޭ ހިތަށް އަރާ ފަހަރުވެސް މަދެއްނޫނެވެ.

އެއްރެއެއްގެ އިރާކޮޅުގެ ވަގުތެވެ. އަހަރެން އިޝާ ނަމާދު ކޮށްލައިގެން ނިކުމެ ބޭރު ޖޯލީގައި އޮށޯވެލީ މިރޭ ބަތް ކާހިތް ނެތްކަމަށް ދޮންބެ ދައްތަ ކައިރީގައި ބުނެލާފައެވެ. ފޫހިވެފާ އޮތުމުން ޝަމްމުއަށް ގުޅާލީމެވެ. ނަމަވެސް ފޯނު ބިޒީ ކޮށްލުމުން ދެން އިތުރަށް ގުޅަން ނުހަދާ ވައިބާއަށް ވަދެލީމެވެ.

ޯފޯނަށް ބަލަހައްޓައިގެން އޮތުމަށްފަހު އަހަރެން ސިއްސައިގެންގޮސް ކޮޅަށް ތެދުވެވުނީ ވައި އަޑުން އަހަންނަށް އަފޫއޭ ކިޔާ ގޮވާލުމުންނެވެ. އަހަރެން ފުރަތަމަ ހުރީ ބިރުންނެވެ. އެއީ ޝަމްމު ކަމަށް ޤަބޫލްކުރަން ދަތިވެފައެވެ. ޝަމްމު އަވަސް އަވަހަށް ސޮރީއޭ ބުނެ ޖޯލީގައި އިށީނުމަށް އިޝާރާތްކުރުމުން އަހަރެން މަޑުމަޑުން އިށީނީމެވެ. ޝަމްމު އަހަރެން ބިރުގަނެފައި އިންވަރު ފެނި ކުރުސި ކިޔާލުމަށްފަހު ހޭންފެށިއެވެ. އަހަރެންވެސް އެ ހުނުމުގައި ބައިވެރިވީމެވެ.

“އަހަރެން ވަރަށް މުހިއްމު ކަމަކު މިފަހަރު މިއައީ” ޝަމްމު ވާހަކަދެއްކިއެވެ. އަހަރެން އަހައަހާވެސް އެއީ ކޮންކަމެއްކަން ނުބުންޏެވެ. އެންމެ ފަހުން ބުނީ ވަގުތު އައިސް ޖެހުމުން އެނގޭނެ ކަމަށެވެ.

ޝަމްމުގެ އެދުމަށް ޖެހިގެން އައި ރޭ ހިނގާލަން ދިޔައީމެވެ. ބަނދަރުމަތިން ހިނގަމުންގޮސް ތަންކޮޅެއް ދުރުގައި ގާގަނޑުމަތީ އިށީނުމަށް ޝަމްމު އެދުނެވެ. ދެމީހުން އެތަނުގައި އިރުކޮޅަކު ވާހަކަދައްކަން ތިބީމެވެ.

ޝަމްމުގެ އަތް އަހަރެންގެ އަތްމަތީ ބާއްވާލުމުން އަހަރެން ސިހިފައި އެމޫނަށް ބަލާލީމެވެ. އެ ބޮޑު ދެލޯ ހުއްޓިފައިވަނީ ސީދާ އަހަރެންގެ މޫނަށެވެ. އެދެލޮލުން ފެންނަން ހުރި މަސްތުކަމަކީ އެކަން މީގެ ކުރިން އިހްސާސްކޮށްފައިވާ އެއްވެސް މީހަކަށް ސިއްރުވާނެ ކަމެއްނޫނެވެ. އަހަރެން އިސްޖަހާލީމެވެ. ޝަމްމު ބުނަން އެ ބޭނުންވާ އެއްޗެއް އަހަންނަށް އެނގޭކަމުގެ އިހްސާސް ކުރެވުމުންނެވެ.

ނާން! އައިމް އިން ލަވް ވިތް ޔޫ! ވިލް ޔޫ ބީ މައި ވައިފް؟ އަހަރެންގެ އަތުގައި ހިފާލަމުން ޝަމްމުގެ ޖީބުން ރަން އަނގޮޓިއެއް ނަގާ އަހަރެންގެ އަތުގެ ތެރެއަށް ލައިދެމުން ޝަމްމު ބުނެލިއެވެ. އަހަރެން އިނީ ދޭނެ ޖަވާބެއް ނޭނގިފައެވެ.

އޯކޭ މިހާރު ޖަވާބެއް ނުދިނަސް. ވިސްނާފަ ޖަވާބެއްދީ! އަހަރެން އިންތިޒާރު ކުރާނަން. އަދި ނާންގެ ޖަވާބަކީ ޔެސް ކަމުގައިވިއަސް ނުވަތަ ނޯ ކަމުގައިވިއަސް ތި އަނގޮޓި ނާން އަތުގައި ބާއްވާ! ތީ އަހަެންގެ ފަރާތުން ދިން ހަދިޔާއެއް. ޝަމްމު އަހަންނާއި މުޚާތަބު ކުރީވެސް ނާން ކިޔާފައެވެ. އެހިތުގައި އަހްނަށްޓަކާ ވާލޯބި އަހަންނަށް އަނދާޒާ ކޮށްލެވުނެވެ.

ނިދަން އޮށޯވެ އޮތްއިރުވެސް އަހަންނަށް އޮވެވުނީ ޝަމްމުގެ ހަދިޔާކަމުގައިވާ ރަން އަނގޮޓި އަތަށް ލައިގެންނެވެ. އެހެން އޮވެގެން އޭގައި ޖަހާފައި އިން އެސް އަކުރުގައި އިރުއިރުކޮޅާ އިނގިލި ހިންގާލެވެއެވެ.

އަހަންނަށް ނިންމުމެއް ނިންމަން އުނދަގޫވަނީއެވެ. ޚަލަފްއަށްޓަކާ މިހިތުގައިވާ ލޯބި ޝަމްމުއާއި ގުޅުމުން ފުހެވިގެން ދާނެބާއެވެ! ޚަލަފްއަށްޓަކާ މިހިތުން ދެވިފައިވާ މަޤާމް ހުސްކޮށް ޝަމްމުއަށް އެމަޤާމް ހިބަކޮށް ދެވިދާނެ ހެއްޔެވެ؟ ޝަމްމުއާއި ކާވެނި ކުރުމަށްފަހު ޝަމްމު އެދޭފަދަ ލޯތްބެއް އަހަންނަށް ދެވިދާނެބާއެވެ! އަހަރެން އަދިވެސް ޚަލަފް އެނބުރި އަންނާނެކަމަށް އިންތިޒާރު ކުރަންވީ ހެއްޔެވެ؟ ނޫނެކެވެ! ޚަލަފްއަކީ މިހާރު މީހެއްގެ ހައްޤެކެވެ. ޝަމްމުފަދަ މީހަކު އަހަރެންގެ އަތުގައި ހިފުމަކީ އަހަންނަށް މާޒީ ހަނދާން ނައްތާލާ ދިރިއުޅުމާއިގެން ކުރިއަށްދާން ލިބުނު ފުރުސަތެކެވެ. ބީވެގެންދިޔަ ލޯތްބަކަށްޓަކައެއް އިންތިޒާރެއް އަހަރެން ދެން ނުކުރާނަމެވެ!