އައިޝާ 24

ެ. އެތެރެއަށް ބޯދިއްކޮށްލުމާއެކު ފެނުނު މަންޒަރުން އައިޝާ ނޭވާ ހުއްޓުނު ކަހަލައެވެ. އަޑު ނެތްތާކަށް ގޮވާލެވުނީ ހުޝާމްއަށެވެ.

އައިޝާގެ އަޑުއިވިފައި ހުޝާމް އައިކޮޅަށް ދުއްވައިގަތެވެ. ލޫޝާ ކޮޓަރިއަށް ދެވުނު އިރު ޓައިލްސްތައް މައްޗަށް ވެއްޓިފައި އޮތް ލޫޝާގެ ބޯ އައިޝާ އޭނާގެ އުނގަށް ލަނީއެވެ. އައިޝާ ލޫޝާއަށް ގޮވަންފެށިއެވެ. ހުޝާމްވެސް އަވަހަށް ފެންތައްޓެއް ހިފައިގެން އައިސް ލޫޝާގެ މޫނުގައި ކާތަމުން ގޮވަންފެށިއެވެ. ބިރުވެރިކަން އިތުރުވެގެން ދިޔައީ ލޫޝާ ލޯހުޅުވާލުމަށްފަހު އަނެއްކާވެސް ހޭނެތުމުންނެވެ.އެވަގުތު ލޫޝާގެ ނޭފަތުން ގިނަ އަދަދަކަށް ލޭފައިބާން ފެށިއެވެ. މިމަންޒަރު ފެނި އައިޝާއަށް ރޮވެން ފެށުނެވެ. ހުޝާމް ލޫޝާ އަތްމައްޗަށް ނަގަަމުން ކޮޓަރިން ބޭރަށް ނިކުތީ ހަބީބާއަށް ގޮވަމުންނެވެ. ހަބީބާ ދުވަމުން އައި އިރު ހުޝާމް ލޫޝާ ސޯފާގައި ބާއްވަނީއެވެ. ހަބީބާ އަވަހަށް ލޫޝާ ކައިރިއަށް ލެފި ލޫޝާއަށް ގޮވަންފެށިއެވެ. ހައިފާ ކައިރީ އެމްބިއުލާންސްއަށް ގުޅަން ބުނުމަށް ފަހު ހުޝާމް ޖެހިލީ ރޯންހުރި އައިޝާ ކައިރިއަށެވެ. އަދި މިވަގުތުމީ ކެތްތެރިވާންވީ ވަގުތު ކަމުގައި ބުނެ ހިތްވަރު ދިނެވެ.

” ހުޝާމް ކާރުގަ ދާންވީނު” ހަބީބާ ބުނެލިއެވެ.

” ނޫން ކާރުގަ ދިޔައިއްޔާ މާލަސް ވާނެ.. އަހަރެން ދާނަން ލޫޝާ ގޮވައިގެން އެމްބިއުލާންސް ގަ.. މަންމަމެން އާދޭ ކާރުގަ” ހުޝާމް ބުންޏެވެ.

އެމްބިއުލާންސް އައުމުން ހުޝާމް ލަސްނުކޮށް ލޫޝާ އަތްމައްޗަށް ލައިގެން ނިކުންނަން ދިޔައީ އައިޝާ ކައިރީގަވެސް އަންނަން ބުނެފައެވެ. ނަމަވެސް އައިޝާ ވަކި ހިސާބަކަށް ދިޔަތަނާ ހަބީބާ ހުއްޓުވިއެވެ. އަދި ހަބީބާއާއި އެކު ދާން މަޑުކުރުމަށް ބުންޏެވެ.

ހަބީބާ ތިރިއަށް ފައިބާ ޑްރައިވަރު ކައިރީގައި ކާރުން ގަރާޖުން ނެރުމަށް ބުންޏެވެ. ނެރުމާއެކު ހަބީބާ އާއި ހައިފާ އޭގެއަށް އެރިއެވެ. އައިޝާވެސް އަރަން ދިމާކޮށްލުމާއެކު ހަބީބާ ޑްރައިވަރު ކައިރީގައި ކާރު ދުއްވާލުމަށް ބުންޏެވެ. ކާރު ދުއްވާލުމާއެކު އައިޝާ ހުއްޓުނެވެ. ހަބީބާ ކަންތައް ކުރި ގޮތާމެދު ނުވިސްނާ އައިޝާ މައްޗަށް އަރާ ދަބަސް ހިފައިގެން އައިސް ޓެކްސީއެއްގައި ހޮސްޕިޓަލާ ދިމާއަށް އަށް މިސްރާބުޖެހިއެވެ.

އައިޝާއަށް ހޮސްޕިޓަލަށް ދެވުނުއިރު އެމަރޖެންސީ ރޫމުގެ ދޮރުމަތީގައި ހަބީބާ އާއި ހަބްޝާގެ އިތުރުން ހައިފާއާއި ހާމިދު ތިއްބެވެ. ހުޝާމް ނެތުމުން ހުޝާމްވީ އެތެރޭގައި ކަން އައިޝާއަށް އެނގުނެވެ. އައިޝާ މަޑުމަޑުން ހިނގާލާފައި ގޮސް އެމީހުން ކައިރިއަށް ހުއްޓި ލޫޝާ ކިހިނެއްތޯ ސުވާލުކުރިއެވެ. ނަމަވެސް އެކަކުވެސް އައިޝާގެ ސުވާލަށް ޖަވާބެއް ނުދިނެވެ. ކަޅިއަޅައިގެންފައި ހަބްޝާވެސް ހަބީބާވެސް މޫނު އަނބުރާލީއެވެ. ހައިފާ މަލާމަތްކުރުމުގެ ގޮތުން އަނގަމަތީ އަތް އަޅާފައި ހީލުމުން އައިޝާ ވަރަށް ބޮޑަށް ލަދުގަތެވެ. މިމަންޒަރު ބަލަން ހާމިދަށް ކެތްނުވުމުން އައިޝާއަށް ޖަވާބު ދިނުމަށް ގޮނޑީގައި އިށީނުމަށް ބުންޏެވެ. އައިޝާ އާއެކޭ ބުނުމަށްފަހު ހާމިދު އެދުނު ގޮތަށް ގޮނޑިބަރިން ގޮނޑިއެއްގައި އިށީނެވެ.

އިރުގަނޑެއްފަހުން ލޫޝާއޮތް އެނދުން ދަމަމުން ވަރަށް ދުވަމުން ކަހަލަ ގޮތަކަށް ގެންދަން ފެށިއެވެ. ފަހަތުން ހުޝާމްވެސް ވަރަށް ބާރަށް ދާންފެށިއެވެ. ވާނުވާ ނޭނގިފައި ތިބެ އެހެންމީހުންވެސް ހުޝާމްފަހަތުން ދާންފެށިއެވެ. ލޫޝާ އައި ސީ ޔޫ އަށް ވެއްދިތަން ފެނި ހަބްޝާ ރޯންފެށިއެވެ. ހާމިދުވެސް ގޮނޑީގައި އިށީނދެ މޫނުގައި އަތް އެޅިއެވެ. އައިޝާވެސް އަނގަމަތީގައި އަތް އަޅައިގެން ހުރިއިރު ލޯ ވަނީ ފެންކަޅިވެފައެވެ. ހުޝާމް ކައިރިއަށް ޖެހިލީ ހުޝާމް ދެރަވާނެވަރު އެނގޭތީއެވެ. އައިޝާ ކޮނޑުގައި އަތް އަޅާލުމާއެކު ހުޝާމް އައިޝާ މޫނަށް ބަލާލިއެވެ. އަދި ގަޔާ ކައިރިކޮށްލިއެވެ.

” ދޮންބޭ ކީކޭ ޑޮކް ބުނީ” އެއްވެސް މީހަކު ވާހަކަދެއްކޭ ހާލަތެއްގައި ނެތުމުން ވާހަކަ ދެއްކީ ހައިފާއެވެ.

“އިންޓަރނަލް ބްލީޑިންގް އެކޯ ބުނީ” ކުރަކި އަޑަކުން ހުޝާމްއަށް ބުނެވުނެވެ.

“ދެން ވީހާއަވަހަކަށް ބޭރަށް ގެންދެވޭތޯ އުޅެންވީނު..” ހަބީބާ ލޯފޮހެލަމުން ބުންޏެވެ. ހުޝާމްވެސް ބޯޖަހާލުމަށްފަހު އައިޝާއަތަށް ފިތާލުމަށްފަހު ކައުންޓަރާ ދިމާއަށް ހިނގައިގަތެވެ.

ވަރަށް ގިނައިރު އެތާ މަޑުކުރުމަށް ފަހު އައިޝާ ގެއަށް ދިޔައީ ހުޝާމް ބުނީމައެވެ. ހަބީބާއާއި ހަބްޝާއަދި ހައިފާވެސް ފޮނުވާލުމަށްފަހު އެތާނގައި މަޑުކުރީ ހާމިދާއި ހުޝާމެވެ.

“މާދަމާ ހެނދުނު ފުރަންވީ” ހާމިދުއިން ގޮނޑިއާއި ޖެހިގެން އިން ގޮނޑީގައި އިށީންނަމުން ހުޝާމް ބުނެލިއެވެ.

” ބޮޑުބެ ވަރަށް ދެރަވޭ އައިޝާއާއި ހުޝާމް ކައިވެނި ކުރިތާ މަހެއްވެސް ނުވަނީސް ދާންޖެހޭތީ.. މިރޭ ދާންވީނު އައިޝާ ކައިރީގަ މަޑުކުރަން.. ބޮޑުބެ މަޑުކޮށްލަފާނަން މިތާންގަ..” ހާމިދު ހުޝާމްގެ އިހްސާސްތައް ދެނެގަތް ކަހަލައެވެ. އެންމެ ރަނގަޅޭ ބުނުމަށްފަހު ހުޝާމް ގެއަށް ދާން މިސްރާބުޖެހިއިރު މެންދަމު އެކެއް ޖަހަން އުޅެނިކޮށެވެ. ގެއަށް ވަދެ ތަޅުލުމަށް އެނބުރުނު ވަގުތު ސޯފާމަތީގައި ނިދިފައި އޮތް އައިޝާ ފެނުނެވެ. ހުޝާމް އައިޝާއަށް ގޮވާކަަށް ބޭނުމެއް ނުވިއެވެ. ސޯފާކައިރީ ކުޑަކަކޫ ޖަހައިގެން އިށީނީ ރަނގަޅަށް އެމޫނަށް ބަލާލުމަށްޓަކައެވެ. އިރުއަރަންދެންވެސް މިހެން އިންނަން ހުޝާމް ބޭނުންވާ ކަހަލައެވެ. މިދުނިޔެ މަތީ ހުޝާމްއާއި ކުރިމަތިލާން މިޖެހެނީ ކޮންފަދަ އިމްތިހާނަކާ ހެއްޔެވެ. އެއްކޮޅުން އަލަތު އަނބިމީހާ މަރާ ހަނގުރާމަ ކުރަމުންދާއިރު އަނެއްކޮޅުން ދެވަނަ އަނބިމީހާއާއި ކައިވެނިކުރިތާ މާގިނަދުވަސްތަކެއް ނުވަނީސް މިޖެހެނީ ދުރަށްދާށެވެ. މިވަރުން ދެއަނބިންގެ ހައްޤުތައް ހުޝާމްއަށް އަދާ ކުރެވޭނެ ހެއްޔެވެ. މިކަމުގަ ކިތަންމެ ކުޑަ އިހްމާލެއް ވިޔަސް އެކަމުގެ އަޒާބު ލިބޭނެއެވެ.

ނިދިފައި އޮތް އައިޝާއަށް ހޭލެވުނީ މީހަކު ނޭފަތް ދަމާލި އަޑު އިވިފައެވެ. ކައިރީގައި އިށީނދެ އިން ހުޝާމްގެ ލޮލުން އައިސްފައިވާ ކަރުނަތައް ފެނުމުން އައިޝާ ފުންމައިގެން ތެދުވިއެވެ. އަދި ކިހިނިއްވިތޯ ސުވާލުކުރަންފެށިއެވެ. ހުޝާމް ވަކި ޖަވާބެއް ނުދީ އައިޝާގެ އުނގުގައި ބޯއަޅާލިއެވެ. މިކަމުން އައިޝާއަށް އަށް އިތުރު ހައިރާން ކަމެއް ގެނުވިއެވެ.

” މާދަމާ ހެނދުނު ފުރާގޮތަށް ހަމަޖެހިއްޖެ.. ވަރަށް ދެރަވޭ އައިޝާ މިކޮޅުގަ ބަހައްޓާފަ ދާން ޖެހޭތީ.. ނޭނގެ އެކޮޅުން އާދެވޭނީ ކޮންދުވަހަކު ކަމެއް.. ވަރަށް މިސްވާނެ އައިޝާ މަތިން..” ހުޝާމް މަޑުމަޑުން ކިޔާލިއެވެ. ވީގޮތް އެނގުމުން އައިޝާ ހަމަޖެހުމުގެ ނޭވައެއްލިއެވެ. އަދި އުނގުމަތީގައި ހުޝާމްގެ ބޯމަތީގައި އައިޝާގެ ކޯ ޖައްސާލިއެވެ.

” ކެތްތެރިވާންވާނެއްނު.. ކިތަންމެ ދުވަހެއްވިޔަސް ލޫޝާ ރަނގަޅުވިއްޔާ ކިހާ ރަނގަޅު.. އަހަރެންވެސް ވަރަށް މިސްވާނެ ހުޝާމް މަތިން..” އައިޝާ އެހެން އޮވެ ބުނެލިއެވެ. އިރުގަނޑެއް އެހެން ތިބުމަށްފަހު އައިޝާ ތެދުވިއެވެ. އަދި ހުޝާމްގެ ބޯ ގަދަކަމުން ހިއްލާލިއެވެ.

” ހީވަނީތަ އަހަރެން ހުޝާމް ދާއިރަށް ފިލާނެއޭ… އެނގޭ ފިލިޔަސް އޮތްތަނަކުން ހޯދާނެކަން..” ސަމާސާ ރާގަކަށް އައިޝާ ބުނެލިއެވެ. އައިޝާގެ މިސަމާސާއިން ހުޝާމްއަށްވެސް ހެވުނެވެ.

ހުޝާމް އައިޝާގެ އަތުގައި ހިފައިގެން ގެއިން ނިކުންނާން ދާން ހިނގައިގަތެވެ.

” ހުޝާމް ކޮންތާކަށް މިދަނީ” ހައިރާންވެފައި އައިޝާ އަހާލިއެވެ. ނަމަވެސް ހުޝާމް އިތުރު ބަހެއް ނުބުނެ އައިޝާގެ އަތުގައި ހިފައިގެން އެޕާޓްމެންޓްގެ ދޮރު ހުޅުވާލުމަށްފަހު މިސްރާބުޖެހީ ޓެރަހާ ދިމާއަށެވެ.  އެތަނަށް ދެވުމާއެކު އެންމެ ފުރަތަމަވެސް އައިޝާއާއި ހުޝާމްގެ ކަޅި ހުއްޓުނީ އުޑުމަތީގައިވާ ސާދަވިލޭރޭގެ ފުރިހަމަ ހަނދަށެވެ. ހަނދަށް ބަލާލުމަށްފަހު ހުޝާމް އައިޝާގެ މޫނަށް ބަލާލިއެވެ.

“މާޝާﷲ.. ފުރިހަަމަކަމުގެ މިސާލެއް” ހުޝާމްއަށް ބުނެވުނެެވެ. ހުޝާމްގެ ޖުމްލައިން އައިޝާގެ މޫނަށް ޖަންބުކުލަ އަރައިގެން ދިޔައެވެ. އިސްޖަހާލެވުނީ އެމޫނު ހުޝާމްއަށް ނުދެއްކުމަށްޓަކައެވެ.

ހުޝާމް އައީޝާގެ ދަތްދަޮޅިދަށް ދެއިނގިލި ލައްވާލުމަށްފަހު އެމޫނު މައްޗަށް އުފުލާލިއެވެ.

” އަހަރެން ބެލިޔަދީ… ޕްލީޒް.. ދެން ނޭނގެ ފެންނާނެ ދުވަހެއްވެސް.. ” ހުޝާމް ބުނެލިއެވެ. އައިޝާ ހީލަމުން ހުޝާމް މޭގައި ލައްވެލިއެވެ.ހުޝާމްވެސް އައިޝާ ގައިގާ ދެއަތް ވަށާލިއެވެ.

ހަތަރު ގަޑި ބައިވާންދެންވެސް ހުޝާމް އާއި އައިޝާ ތިބީ ޓެރަހުގައެވެ. އެތާ ބަހައްޓާފައި ހުރި އުނދޯލީގައި ހުޝާމް އިންއިރު ހުޝާމްގެ އުނގުމަތީގައި އައިޝާ އިނެވެ. އެއަށްފަހު ދެމީހުން މިސްރާބުޖެހީ ގެއަށް ދިއުމަށެވެ. ދެމީހުން އެކީގައި ދަމުނަމާދާއި ފަތިސް ނަމާދުކުރިއެވެ. އެއަށްފަހު އައިޝާ ހުޝާމްގެ ދަބަސް ތައްޔާރުކޮށްދިނުމަށްފަހު ސައިހެދިއެވެ. ސައިބޮއެ ނިންމާލުމަށްފަހު ހުޝާމް ދަބަސް ހިފައިގެން ދާން ހިނގައިގެވެ. ނަމަވެސް ކީއްވެ ކަމެއް ނޭނގުނެވެ. އައިޝާގެ ހިތަށް ފާޑެއްގެ ގޮތްތަކެއް ވާނެފެށިއެވެ. ގޮސް ގޮސްހުރި ހުޝާމްގެ އަތުގައި ހިފާލެވުނީ ބޭއިހްތިޔާރުގައެވެ. އައިޝާއަށް ރޮވެން އުޅޭހެން ހީވުމުން ހުޝާމް އައިޝާ ގައިގާ ބާރަށް ބައްދާލިއެވެ.

” އައި ލަވްޔޫ ހުޝާމް” އައިޝާއަށް ކުރެހިފައިވާ އަޑަކުން ބުނެވުނެވެ. އައިޝާގެ ދުލުން ފުރަތަމަ ފަހަރަށް އެލަފްޒު އިވުމުން ހުޝާމްއަށް ލިބުނީ ބުނެދޭންވެސް ނޭނގޭފަދަ ހިތްހަމަޖެހުމެކެވެ. ކުރިއަށްވުރެވެސް ބޮޑަށް ބައްދާލަމުން ހުޝާމްވެސް މާބޮޑަށް ލޯބިވެއޭ ބުނެލިއެވެ.

ހުޝާމް ފުރައިގެން ދިއުމުން މުޅިގޭތެރޭ ފަޅުވެފައިވާކަހަލައެވެ. އީޝަލްވެސް އައިސް އެތައް އިރަކު އެގޭތެރޭގައި އުޅުނުއިރުވެސް އައިޝާއަށް ފަޅުކަން އިހްސާސް ވަމުން ދިޔައެވެ. މާބޮޑަށް ހިތްނުތަނަވަސްވެ ބޮޑު ތޫފާނެއް އަންނަން އުޅެކަހަލަގެ އިހްސާސްތަކެއް ކުރެވެމުން ދިޔައެވެ. މިކަމާ ހެދި ދުވަހުގެ ބޮޑުބައި އައިޝާ ހޭދަކުރީ ގިނަގިނައިން ހެއްދެވިފަރާތް ހަނދުމަ ކުރުމުގައެވެ.  އެކަމުން އައިޝާއަށް އެތައް ގުނައަކަށް ހިތްހަމަޖެހުން ލިއްބައިދެއެވެ.

ހުޝާމްގެ ހަބަރެއްވީ އެރޭގެ ވަގުތެއްގައެވެ. ލޫޝާގެ ހާލަތަށް ވަކި ބަދަލެއް ނާންނަކަން އެނގުމުން އެކަމާ ހިތާމަކުރިއެވެ. އަދި ލޫޝާއަށް އަވަސް ޝިފާއަކަށް އެދި ދުއާކުރިއެވެ.

ހުޝާމް ދިޔަފަހުން އައިޝާގެ ކަމަކީ ހުޝާމގަނެދީފައި ހުރި ދީނީފޮތްތައް ކިޔުމާއި ކީރިތި ގުރުއާނުގެ ތަރުޖަމާ ހިތުދަސްކުރުމެވެ. ތިރީބަޔަށްވެސް ދަނީ މަދުފަހަރަކު އެވެ. އެގެއަށް ދާ ކޮންމެ ފަހަރަކު ހަބީބާގެ ވިހަގަދަ ބަސްތައް އިވި އައިޝާގެ ހިތްފަޅައިގެން ދާވަރުވެއެވެ. ނަމަވެސް އެކަހަލަ އެއްވެސް ވާހަކައެއް އައިޝާ ހުޝާމް ކައިރިއަކު ނުދައްކައެވެ. މަންމައާއި ދަރިއަކު ޖެއްސުމަކީ އައިޝާ އެއްވެސް އިރެއްގެ ބޭނުންވި ކަމެއް ނޫނެވެ.

އާދައިގެމަތިން މިއަދުވެސް ދީނީ ފޮތެއް ކިޔުމުގައި މަޝްއޫލުވެގެން އައިޝާ އިނެވެ. ހާރޫނު ފޯނެއް އައުމުން ނެގީ ވަރަށް ހަމަޖެހިލާފައެވެ. ނަމަވެސް ލިބުނު ހަބަރަކުން މުޅިން މާޔޫސްވިއެވެ. ސޮފއްޔާ ވީނުވީއެއް ނޭނގި ގެއްލިގެން ހޯދަނީއެވެ. ސައިފު ހެނދުނު ހޭލައިގެން ސައިދޭން ދިޔައިރު ސޮފިއްޔާއެއް ކޮޓަރިއަކު ނެތެވެ. އާންމު ތަޅުލާފައި ހުންނަ އެކޮޓަރީގައި ސައިހިފައިގެން ދިޔައިރު ހުރީ ތަޅު ހަލާކުކޮށްލާފައެވެ. ސައިފުގެ އަންހެނުން މަރިނާ ރޭގައި ނިދަން ވަންއިރުވެސް ކޮޓަރީގައި ހުރީ ރަނގަޅަށް ތަޅުލާފައެވެ. ހާރޫނު ބުނީ މިހާރު ފުލުހުންނަށް ރިޕޯޓް ކޮށްފައިވާނެ ކަމަށާއި އަދި ވެސް ސޮފިއްޔާގެ ހަބަރެއް ނުވާ ކަމަށެވެ. އަދި އަވަހަށް ގެއަށް އައިސްދޭން އެދުނީ އީޝަލް ރޮވަރުންނެވެ. އައިޝާވެސް އަވަހަށް މިދަނީއޭ ބުނުމަށް ފަހު ރެޑީވެގެން ދާން ދޮރުހުޅުވާލިއިރު ކުރިމަތީގައި ހުރި ހަބީބާފެނި ސިހޭގޮތްވިއެވެ.

” ތަނަކަށް ދަނީތަ” ރުންކުރު ގޮތަކަށް ހަބީބާ ސުވާލުކޮށްލިއެވެ. އައިޝަ ގެއަށް ގޮސްލަނީ ކަމުގައި ބުނީ ސޮފިއްޔާގެ ކަންތައް ސިއްރުކުރަމުންނެވެ.

” ފަހުންވެސް ދެވިދާނެއްނު.. އާދެބާ މަންމައަށް ކަމެއް ކޮށްލަދެން.. މާޝާވެސް ވީ އޭނަގެ ރަށައްގޮސް އަނެއްކޮޅުން ހައިފާވެއްޖެ ކޮލެޖަށް ގޮސް.. މިރޭ އަންނާނެ މަންމަގެ ރަހުަތްތެރިންތަކެއް ކެއުމަކަށް.. ހުޝާމް ބުނި އައިޝާ ވަރަށް މޮޅަށް ކައްކައޭ.. ހިނގާބާ މަންމައަށް މިކަން ކޮށްދޭން” ކުއްލިއަކަށް ހަބީބާގެ ރާގު ބަދަލުވިއެވެ. އައިޝާ ގައިގާ ފިރުމާވަރުން ހީވަނީ އެހެން ފަދަ ކަމެއް ހެންނެވެ.  ފުރަތަމަ ފަހަރަށް ހަބީބާ ކަމަކު ކިޔުމުން ނުކޮށްދީ އައިޝާއަކަށް ނުކެރުނެވެ. އަމިއްލަ އެދުން ގުރުބާންކޮށްލާފައި އައިޝާ ދިޔައީ ހަބީބާ ބުނިކަންތައް ކޮށްދޭށެވެ.

ހަބީބާގެ ކާއެއްޗެހީގެ ލިސްޓު ދިގުކަމުން ގޮސް ގަޑިއަށް ކެއްކޭ ވަރުވީ ހަމަކިރިޔާއެވެ. އެތައް ދާތަކެއް އޮހޮރުވުމަށްފަހު ކެއްކި އެއްޗެހިން މިރު ރަހައެއް ލާނެ ކަމަށް އައިޝާ އުއްމީދުކުރިއެވެ. ކޮޅަށް ހުރެ ހުރެ ދެފަޔަށް ވެސް ރިއްސާވަރުވެއްޖެއެވެ. މޭޒުމައްޗަށް ކާއެއްޗެހި އެރުވުމަށްފަހު ތަށިތައްވެސް އަތުރާލިއެވެ. އިރުކޮޅަކުން ހަބީބާ އޭނާގެ ރައްޓެހިންނާއެކު އަންނަތަން ފެނުނެވެ. ހަބީބާގެ އިތުރުން ތިން އަންހެނެކެވެ. އެމީހުންވެސް ތިބީ ހަބީބާ ގޮތަށް ވަރަށް ހެދިލައިގެންނެވެ. މޮޅެތި ވާހަކަ ދައްކަމުން ފަހަރަކު މީހެއް ތައްޓަށް ކާއެއްޗެހި އެޅިއެވެ.  އައިޝާ ކައިރީގައި މަޑުކޮށްލައިގެން ހުރީ ހަބީބާ އެކަމަށް އެދުމުންނެވެ.

” ހަބީ.. ހާދަ އޮއިލީއޭ މި.. މިހާ އޮއިލީ އެއްޗެހި ނުވެސް ކެރޭނެ ކާކަށް” އެތަނުން އެކަކު ބުނެލިއެވެ.

” އެންމެ ފަހަރަކު ކާލިޔަސް ކަމެއް ނުވާނެ.. އަޅެ ރަހަ ބަލާލަބަ” ހަބީބާ ބުނުމުން އެމީހާ އެތިކޮޅެއް ނަގާ އަނގައަށް ލިއެވެ. ނަމަވެސް އަނގައަށްލީވަރަށް ވުރެ ބާރަށް ޓިޝޫއެއް ނަގާ އަނގައިގާ ހުރި ކާއެއްޗެހިތައް އޭގެއަށް އަޅާލިއެވެ.

” މީކާކު ހެދި އެއްޗެއްތަ ހާދަ ނުބައޭ” އެމީހާ ބުނެލިއެވެ. ހަބީބާ ބަލާލީ އައިޝާއަށެވެ. އައިޝާ ހުރީ ގަބޫލު ނުކުރެވިފައެވެ.

“އައިޝާ ހެދި އެއްޗެހި މީ މުޅިންވެސް.. މީ އަހަރުމެންގޭ ބޮޑުކައްކާ.. ކީއްކުރާނީ އަހަރުމެންވެސް ތިބެނީ ކެތްކޮށްލައިގެން.. ” ހަބީބާގެ ޖުމްލައިން އައިޝާހެ ހިތުގެ އެންމެ ފުނަށް އަސަރުކުރިއެވެ.

” ކަލެއަށް ކައްކަން ނޭގެންޏާ ތިވަޒީފާ ދޫކޮށްލަންވީނު.. މިހިރަ ބަތަކުންވެސް ލާ ރަހައަކުން އަނގަޔަށް ހޮޑު އަންނަ ވަރުވޭ” އެތަނުން އެހެން މީހަކު ބުނެލިއެވެ. ގަތްލަދުން އައިޝާ ހުރީ ލޯދިމާކޮށްލަންވެސް ނުކެރިފައެވެ.

” ޗީޑި މީ އޮމްލެޓެއްތަ ނޫނީ ހޮޑު ގަނޑެއްތަ.. ހަބީބާ އަަހަރުމެން ތިގެނައީ ކޮންކަހަލަ ކެއުމަކަށްތަ.. މިއަށްވުރެ ރަނގަޅު ކައިރީ މިހިރަ ހޮޓަލުން ކެޔަސް” މިހެން ބުނެ އެންމެ ތެދުވެގެން ދާން ހިނގައިގަތެވެ. އެތަނުން އެކަކު ދިޔައީވެސް އެތާނގައި ހުރި ރިހަ ބޯތަށި އައިޝާ ބޮލަށް އަޅާލާފައެވެ. އެންމެ ފަހުން އެތާ ހުންނަން ކެތް ނުވެގެން އައިޝާ އެތަނުން ނިކުންނަން ދުއްވައިގަތެވެ. ދުވަމުން ދިޔައިރުވެސް އައިޝާއަށް ރޮވެނީއެވެ.

” އެކަމަކު ހަބީ.. ހާދަމީރޭ އެއެއްޗެހި” ހަބީބާ އާއި އޭނާގެ ރައްޓެހިން ވާހަކަ ދައްކަން ތިބީ ހަބީބާގެ ކޮޓަރީގައެވެ.

” އެތެދެއް.. އެހާމީރު ކާނާއެއް އަހަރެންވެސް ނުކަން އަދި.. ” އެތަނުން އެހެން މީހަކު ބުނެލިއެވެ.

” ދެންހެވޭ.. ތިކަން އެނގޭ އަހަންނަށްވެސް.. ބޭނުންވީ އެއައިޝާ ލަދުގަންނަވާލަން.. އެކަން ބަރާބަރަށްވެއްޖެ.. ކަލޭމެންނަށް ވަރަށް ޝުކުރު.. ދެން ހިނގާދާން ކާން.. މިހާރު އޭނަ ގޮސްދާނެ” ހަބީބާ އޭނާގެ ރައްޓެހިން ގޮވައިގެން އަނެއްކާވެސް ކާމޭޒު ކައިރިއަށް ދިޔައެވެ. އަދި މާޝައަށް ގޮވާލަމުން ރިހަ އެޅިފަހުރިތަން ސާފުކުރުމަށް ބުނެލިއެވެ.

-ނުނިމޭ-