ޢަޞްރު (ފަންސާސްއަށްވަނަ ބައި)

“ޒުހުރާއަށް އެބަ އިނގޭތަ ތި ކިޔޭ އެއްޗެއް؟ ދަރިންނަށް ޝައްކުކުރަން ވާނީ ވެސް ވަކިވަރަކަށް. ޝިޔާ މިހާތަނަށް އައިއިރު ދުވަހަކުވެސް އަހަރުމެން ލަދުގަންނަވާލާ ފަދަ ކަމެއްކޮށްފަވޭތަ؟ ނުވޭ! ވީއިރު ޝިޔާގެ ބޮލުގަ އިލްޒާމް އެޅުވުމުގެ އެއްވެސް ޙައްޤެއް އަހަރުމެންނަކަށް ނެތް!” ނާސިރު ހަރު އަޑުން އަންގާލިއެވެ. ނާސިރު ފުރަތަމަ ފަހަރަށް ގޭގެ ތެރޭގައި އެފަދަ ގޮތަކަށް ވާހަކަ ދެއްކުމުން ޒުހުރާއާއި ޝިޔާވެސް ހުއްޓުމަކަށްއައެވެ. ހިމޭންކަމުގެ ވަގުތުކޮޅަކަށްފަހު ނާސިރު ޝިޔާގެ ކުރިމައްޗަށް ގޮސް ހުއްޓުނެވެ.

“ދަރިފުޅާ……މަންމައާއި ބައްޕައަށް މަޢާފުކޮށްދީ. މި ހުރިހާ ދުވަހު ދަރިފުޅުގެ ބަހަށް އިތުބާރު ނުކުރީ ދަރިފުޅު ރައްކާތެރިކުރުމަށްޓަކައި. މިއަދަށްފަހު ދަރިފުޅު އެއްޗެކޭ ބުނާއިރަށް އެއްވެސް މީހަކު އެއާމެދު ސުވާލުނުކޮށް ޤަބޫލުކުރާނެ. ދަރިފުޅު ތިއީ އެންމެ ކުޑައިރުއްސުރެ މަންމައާއި ބައްޕަގެ ބަސްއަހައިގެން ބޮޑުވީ ކުއްޖެއް. ބައްޕައަށް އެނގޭ މީގެ އަހަރުތަކެއް ކުރިން ދަރިފުޅު މަންމަ ބުނެގެން ދަރިފުޅަށް ކަމުދިޔަ ކުއްޖަކު ވެސް ދޫކޮށްލިކަން. އެކަމަށްޓަކައި ވެސް ބައްޕަ މަޢާފަށް އެދެން….” ނާސިރަށް އެހާ ހިސާބަށް ވާހަކަ ދެކެވުނު ތަނާހެން ރޮވިފައި ހުރި ޝިޔާ ނޫނެކޭ ބުނެލިއެވެ. ޝިޔާ އިތުރަށް އެއްޗެކޭ ބުނަން ބޭނުންވިއެއްކަމަކު އޭނައަށް ގިސްލެވެން ފެށިއެވެ. އަދި މޫނުގައި ދެއަތް އަޅާލަމުން ހުރި ދިމާލަށް ތިރިވެ ކައިރީގައި ހުރި ސޯފާގައި އިށީނދެވުނެވެ. އޭނަ މަންމައާއި ބައްޕަގެ ފަރާތުން މިފަދަ ލޯތްބަކަށް އުއްމީދުކޮށްގެން ހުންނަތާ ކިހާ ދުވަހެއް ހެއްޔެވެ؟ އެންމެ ފަހުން އޭނަގެ ބައްޕައަށް ވެސް އޭނަގެ އިޙްޞާޞްތައް ދެނެގަތުމުގެ ކުޅަދާނަކަން ލިބުނުކަމަށްޓަކައި ޝިޔާއަށް ޙަމްދުކުރެވުނެވެ. އޭނައަށް ގިސްލެވުން ހުއްޓާލެވުނު ވަގުތު ނާސިރު އަނެއްކާވެސް ވާހަކަ ދެއްކިއެވެ.

“ދަރިފުޅު ބޭނުމިއްޔާ ބައްޕައަށް މައްސަލައެއް ނޫން ދަރިފުޅު އެކުއްޖާއާއި ރައްޓެހިވިޔަސް. އެއީ މިރަށު ކުއްޖެއްތަ؟” ނާސިރު އެތާ ކައިރީގައި ހުރި ސޯފާއެއްގައި އިށީނދެ އަހާލިއެވެ. އެ ހިނދު އެމީހުންނަށް ނޭނގުނު ކަމަކީ އެގޭގެ ކުޑަދޮރު ކައިރިއަށް އައިސް ހުއްޓުނު މީހަކަށް ވެސް އެ މަންޒަރުތައް ފެނި އަޑުތައް އިވެމުން ދިޔަކަމެވެ. އެއީ އައިމަން ނޫން ދެވަނަ މީހެއްނޫނެވެ.

“ނޫން ބައްޕާ. އަހަރެން ބޭނުމެއްނޫން ރައްޓެހިވާކަށް. އެއީ ރަނގަޅު ގޮތެއްނޫން. އަސްލު އަހަރެން ޝުކުރުވެރިވަން މީގެ އަހަރުތަކެއް ކުރިން މަންމަ އެފަދަ ގޮތަކަށް އެ ގުޅުން ކަނޑާލަދިން ކަމަށްޓަކައި. އަހަންނަށް ސާފުކޮށް ވިސްނެން ފެށީ އެފަހުން. އަދި ގިނަގިނައިން ﷲ މަތިން ހަނދުމަކޮށް ﷲ އަށްޓަކައި ލޯތްބެއް އުފެދިގެން ދިޔައީ ވެސް އެފަހުން. ﷲ މޮޅަށް ދެނެވޮޑިގެންވަނީ އެކަމަކު އަހަންނަށް ހީވަނީ އެދުވަހު އެގުޅުން ކުރިއަށް ގެންދިޔަނަމަ މިއަދު ވެސް އަހަރެން ވީހީ އަނދިރިގަނޑެއްގެ ތެރޭގަ ހެން. އެހެންވިނަމަ އަހަންނަށް ދުވަހަކުވެސް ލޯ ހުޅުވާލުމުގެ ފުރުޞަތެއް ނުލިބުނީސް. މުޅި ޒުވާން ޢުމުރު ވޭތުކޮށްލީހީ އެއްކުއްޖަކަށްފަހު އަނެއްކުއްޖަކާ ރައްޓެހިވުމުގަ. އެކަމަކު ﷲ އަހަންނަށް ހިދާޔަތް ދައްކަވައި އަހަރެންގެ ޙަޔާތް ޒީނަތްތެރި ކުރެއްވި.” ޝިޔާ ކަރުނަތަކުގެ ތެރެއިން ހިނިތުންވުމަކާއެކީ ބުނެލިއެވެ. އެހިނދު ގޭގެތެރޭގައި ތިބި މީހުންނާއެކު ބޭރުގައި ހުރި އައިމަންގެ ވެސް ދެބުމަ ކައިރިވެފައިވިއެވެ.

“ދެން ދަރިފުޅު އެކުއްޖާ މަތިން ހަނދާނެއް ނުވޭތަ؟ ބައްޕައަށް ވަރަށް ހީވޭ ދަރިފުޅު ހަނދާންވާހެން.” ނާސިރު ދެންވެސް ކަންބޮޑުވުމަކާއެކީ އަހާލިއެވެ. އެއާއެކު އޭނައާއެކީ ބޭރުގައި ހުރި އައިމަނަށް ވެސް އެ ސުވާލުގެ ޖަވާބަކަށް އިންތިޒާރު ކުރެވުނެވެ.

“ހަނދާންވޭ…….އެއީ މިހާރު އަހަންނަށް އޮތް އިމްތިޙާނަކީ. ހަނދާންވާއިރު ވެސް ﷲ ރުހިވޮޑިގެންވާފަދަ ގޮތަކަށް މި ޙާލަތުގައި އުޅުން. އެއީ އެހެން ނޫނަސް އަހަންނަށް އެހާ ކަމުދާ މިޒާޖެއްގެ ކުއްޖެއްނޫން. ނަމާދު ކުރާކަމެއް ވެސް ޔަޤީނެއްނޫން. މި ގުޅުމުގެ މަތިން ހަނދާން ނައްތާލަން އަހަންނަށް އުނދަގޫވަނީ އަހަންނަށް ކޮންމެ ދުވަހަކު އައިމަން ފެންނާތީ. އަހަރެން ބޭނުންވަނީ އޭނައާއި ދުރަށްދާން. އަހަރެން މި ކޮޅަށް އައި މަޤްޞަދު ފުރިހަމަވެއްޖެ ބައްޕާ. ދެން ހިނގާ އަނބުރާ ދާން.” ޝިޔާ އެވަގުތުވެސް ހިތާއި ދެކޮޅަށް އެހެން ބުނެލީ އޭނަ ދެންމެ ބުނި ފަދައިން ﷲ ރުހިވޮޑިގެންވާފަދަ ގޮތަކަށް އުޅުމަށެވެ. އައިމަން އެންމެ ފުރިހަމަ ގޮތުގައި ތައުބާ ނުވަނީސް އޭނަގެ ހިތުގައި އައިމަނަށްޓަކައި އިޙްޞާޞްތަކެއްވުމުން އައިމަން ކުރާ ކޮންމެ ކަމެއް އޭނައަށްޓަކައި ޒީނަތްތެރި ވެދާނެތީ އޭނަ ބިރުގަނެއެވެ. އަދި އަމުދުން އަނެއްކާވެސް އޭނަ އިޙްޞާޞްތަކުގެ އޮޔާ ލައިގެން ގޮސްފިނަމަ އޭނައަކީ އައިމަން ﷲ ގެ ހަނދުމައިން ދުރުކުރާ މީހަކަށް ވާކަށް ބޭނުމެއްނުވިއެވެ.

ބޭރުގައި ޝިޔާގެ ވާހަކަތައް އަޑުއަހަން ހުރި އައިމަނަށް އިހުނަށްވުރެ ބާރަށް އޭނަގެ އަތް އެ ކުޑަދޮރުގައި ހިއްޕާލެވުނެވެ. މުޅި މީހާގެ ގައިން ތުރުތުރެއް ހިނގާލި ހިނދު އޭނަގެ ދެލޯ ރަތްވެފައިވިއެވެ. ޝިޔާ އަނެއްކާވެސް އުޅެނީ އޭނައާއި ވަކިވާން ހެއްޔެވެ؟ ޝިޔާ މުޅި ޢުމުރަށް އޭނައާއި ވަކިވެގެން ދަނީ ހެއްޔެވެ؟ އަނެއްކާވެސް އޭނަވީ އެ ހިތްދަތި އިންތިޒާރަށް އަނބުރާ ދާންހެއްޔެވެ؟ އެ ސުވާލުތައް ހިތަށްވެރިވި ވަގުތު އައިމަނަށް ނޭނގި އޭނަގެ ލޮލަށް ކަރުނަތައް ޖަމާވާން ފެށިއެވެ.

“އައްމު!” ގޭގެ ގޭޓު ކައިރީގައި ސައިކަލު މަތީގައި އިން އަޒާން ގޮވާލީ އައިމަން އިސްޖަހާލި މަންޒަރު ފެނުމުންނެވެ. އޭނަގެ އަޑަށް އައިމަން އޭނައަށް ފަސްދީގެން ހުރެ ލޯމަތިން އެއްއަތް ހިންގާލި މަންޒަރު އަޒާނަށް ފެނުނެވެ. އޭނަ ކަންބޮޑުވުމެއްގެ ތެރޭގައި ހުއްޓާ އައިމަން އާދައިގެ ހިނގުމެއްގައި އައިސް އޭނައާއި ހަމަ ކޮށްފިއެވެ.

“ހިނގާ.” އައިމަނަށް އެހެން ބުނެލެވުނީ ކުރެހިފައިވާ އަޑަކުންނެވެ.

“ވަޓްސް ރޯންގް؟” އަޒާން ސައިކަލުން ފައިބަމުން އެހެން އަހާލީ އައިމަންގެ މިލާފައިވާ މޫނު ފާހަގަވުމުންނެވެ. އައިމަން ޢިޝާ ނަމާދަށްފަހު އޭނައާއެކީ މިގެއަށް އައީ އޭނައަށް މިއީ ކޮން ގެއެއްކަން ވެސް ކިޔައިދިނުމެއްނެތިއެވެ. އެހެންކަމުން ވެދާނެ ގޮތެއް އޭނައަށް އަންދާޒާ ކުރާކަށް ވެސް ނޭނގެއެވެ.

“ކަމެއްނުވޭ! ހިނގާ ދެން.” އައިމަން އެހެން ބުނެ ސައިކަލަށް އަރަން އުޅުނެވެ. އެހެނަސް އަޒާން އޭނަގެ އަތުގައި ހިފައި މަޑުކުރުވިއެވެ.

“ޔޫ ހޭވް ޓު ޓެލް މީ!” އަޒާން ހިސާބެއްގެ ހަރުކަށިކަމަކާއެކީ ބުނެލިއެވެ. އައިމަން އޭނައަށް ބަލަން ހުރެފައި ފުން ނޭވައެއް ދޫކޮށްލިއެވެ.

**

އޭގެ 15 ވަރަކަށް މިނެޓް ފަހުން އައިމަނާއި އަޒާން ތިބީ ޕާކެއްގެ އުސް ފާރެއްގެ މަތީގައެވެ. ދެމީހުންގެ ނަޒަރު ވެސް ކުރިމަތީގައި އޮތް ތާރުމަގަށް ހުއްޓިފައިވީއިރު އެދެމެދަށް ވެރިވެފައި އޮތީ މަރު ހިމޭންކަމެކެވެ. އެ ހިމޭންކަން ނަގާލީ އަޒާނެވެ.

“ދެން ޝިޔާ ނާންނާނެ؟” އަޒާން އަހާލިއެވެ.

“ހިއެއްނުވޭ އަންނާނެހެނެއް.” އައިމަން މާޔޫސީ ގޮތަކަށް ޖަވާބުދިނެވެ. އެ ހިނދު އަޒާންގެ ހިތުގައި އޭނަގެ ކޮއްކޮއަށްޓަކައި ޙަމްދަރުދީއެއް އުފެދުނެވެ. އޭނަވަނީ މީގެ ދުވަސްތަކެއް ކުރިން އެފަދަ އިޙްޞާޞްތަކުން އަރައިގަނެފައެވެ. ﷲ ގެ ހަނދުމައިގެ އެހީގައި އެއީ ކިތަންމެހާ ވެސް ފަސޭހައިން ކުރެވޭނެ ކަމެއްކަން އޭނައަށް އެނގެއެވެ. އެހެނަސް މިހާ ދުވަސްވަންދެން ﷲ ގެ ހަނދުމައިން ދުރުގައިވި އޭނަގެ ކޮއްކޮގާތު އެފަދަ ވާހަކަތައް ދެއްކުމުގެ ކުރިން އަޒާން ބޭނުންވީ އޭނަގެ ކޮއްކޮއަށް ހިތްވަރު ލައިދޭށެވެ. އެކަމަށްޓަކައި އޭނަ އެންމެ ފުރަތަމަ ވެސް މޫޑު ބަދަލުކޮށްލުމުގެ ގޮތުން ޗޮއްކަނޑާލިއެވެ.

“ކާކުތަ އުޅެނީ ޝިޔާއެއް ނުލިބިގެން؟ ވީ ހޭވް ބެޓާރ ތިންގްސް ޓު ޑޫ ނޫންތަ؟” އަޒާން ނުހަނު ޖޯޝާއެކީ އެހެން ބުނެލުމުން އައިމަން އޭނައަށް ބަލާލިއެވެ. އަދި ހިނދުކޮޅެއްގެ ވިސްނުމަށްފަހު ވާހަކަ ދެއްކިއެވެ.

“ޔާ! އަދި އޭނަ ނޫނަސް އަހަރެން ޑޭޓް ނުކުރާ އެހެން އަންހެން ކުދިން ވެސް ދުނިޔޭގަ އެބަތިބި.” އައިމަން ހެވިފައިހުރެ އެހެން ބުނެލީ އަމިއްލަ ނަފްސަށް ހިތްވަރު ލައިދިނުމަށެވެ.

“ޑޭޓް ކުރާކަށް ނޫން ވީކީ. މަގޭ ކެމްޕެއިނަށް އެހީވާންވީ!” އަޒާން މޫނު ހަދައިގެން ހުރެ އެހެން ބުނެލުމުން އައިމަނަށް ހީލެވުނެވެ. އަޒާން އައިމަންގެ އެ ވާހަކައާ ދެކޮޅަށް ވާހަކަ ދެއްކީ އައިމަން އަނެއްކާވެސް ގޯސް މަގަކަށް އެޅޭތަން ދެކެން ބޭނުމެއްނުވީތީވެއެވެ.

“ހެހެ…..ޑޯންޓް ވޮރީ! ކެމްޕެއިނަށް އެހީވާނަން….އެއްވެސް ޝިޔާއެއްގެ ސަބަބުން ބްރޯއަށް ލިބެން އޮތް އެހީއެއް މެދުނުކެނޑޭނެ. އެއީ އެހެން ނޫނަސް ހާދަ ކަޓު ކުއްޖެކޭ. ޕިސް ޕިސް ޕިސް…….” އަޒާން މަޢުޟޫއު ބަދަލުކޮށްލުމުން ވެސް އައިމަން ތަކުރާރުކޮށް ގަދަކަމުން ޝިޔާއާއިމެދު ގޯސްވާހަކަ ދެއްކިއެވެ. އޭނަގެ ހިތުގައިވި އިޙްޞާޞްތައް ބަދަލުވާނެ ކަމުގެ އުއްމީދުގައެވެ.

“ޔޫ ނޯ…..އަސްލު އައްމު ބޭނުމިއްޔާ މިހާރު ވެސް ގޮއްސަ ޝިޔާގެ ބައްޕަ ކައިރި ކައިވެނީގެ ވާހަކަ ދެއްކިދާނެ. މިހާރު މެރީ ނުކުރިޔަސް އެ ވާހަކަ ދެކެވިފަ އޮތުން ގޯހެއް ނޫން ދޯ؟” އަޒާން އެހެން ބުނެލީ އައިމަން އޭނައަށް ކިޔައިދިން ވާހަކަތަކުން ޝިޔާއަކީ ރަނގަޅު ކުއްޖެއްކަން އޭނައަށް އެނގުނީތީވެއެވެ. އައިމަނަށް ކަމުދާ ފަދަ ރަނގަޅު ކުއްޖަކު އައިމަންގެ ޙަޔާތަށް އައުމަކީ އަޒާންގެ ވެސް އުއްމީދެވެ. އެހެނަސް……

“ޗި! ކާކުތަ އުޅެނީ އޭނައާއި އިންނަ ހިތުން؟ އެހެންނޫނަސް މަ އެގެއަށް ދިޔައިމަ ތީނައަށް އެ ހިދާޔަތެއް ލިބިފަ ނެތޭ ބުނެ އޭނަ މަ ފޮނުވާލިއްޔާޔޯ؟ މަ ނޫޅެން ދެން އޭނަ ފަހަތުން ދާކަށް ހުވާ! ހިނގާ ރައިޑަކަށްދާން. ފޫހިވާން ފަށައިފި.” އައިމަން އެހެން ބުނެ ފާރުމަތިން ފައިބާފައި ގޮސް އެތާހުރި ސައިކަލަށް އެރިއެވެ. އޭނަގެ ކޮއްކޮގެ މައުސޫމްކަމާމެދު ވިސްނަމުން އަޒާނަށް ހީލެވުނެވެ. އަދި ފާރުމަތިން ފައިބަމުން އޭނައަށް ވެސް އައިމަންގެ ހިދާޔަތަށްޓަކައި ދުޢާކުރެވުނެވެ.

**

އެރޭގެ 10:00 ޖެހި ވަގުތު ޝަފަޤް ނިދިފައި އޮތްވާ ހޭލެވުނީ ރީތިވާ މޭޒުމަތީގައި ވިސާމް އެއްޗެހި ބަހައްޓަމުން ދިޔަ އަޑަށެވެ. ދެލޯ ތަގުޅި ކޮށްފައި ހުޅުވާލިއިރު ކޮޓަރިއަށް ވެރިވެފައި އޮތް ފަނޑު އަލީގެ ތެރެއިން ރީތިވާ މޭޒު ކައިރީގައި ނިދާ ހެދުމުގައި ހުރި ވިސާމް އޭނައަށް ފެނުނެވެ. އެއޮތް ގަޑީގައި ވެސް ވިސާމް ބޮލުގަ ފުނާ އެޅުމަށްފަހު މޫނުބަލާ ލޯގަނޑުން ރީތިތޯ ބަލަމުން ދިޔަގޮތުން ޝަފަޤްގެ މޫނުމައްޗަށް ލާނެތް ހިނިތުންވުމެއް ވެރިވިއެވެ.

“ރީއްޗޭ ރީއްޗޭ. ތިހާވަރުން މޮޑެލްއަކަށް ވެވިދާނެ ހުވަފެނުގަ. ދެން އާދޭ އަވަހަށް.” ޝަފަޤް ބުނެލިއެވެ. އެ އަޑު އިވިފައި ވިސާމަށް ވަގުތުން ހީލެވުނެވެ.

“ހެހެ….މޮޑެލްއަކަށް ނުވިޔަސް އަހަރެން ރީތިތޯ ބަލާ މީހަކު ހުރީމަ ރީތިވާންވާނެއެއްނު؟” ވިސާމް އެނދުގެ ކައިރިއަށް އަންނަމުން އެހެން ބުނެ ޝަފަޤަށް އެއްލޯ މަރާލިއެވެ. ޝަފަޤްގެ ހިނިތުންވުން ފުންވެގެން ދިޔަ ވަގުތު ވިސާމްވެސް ރަޖާ ހިއްލާލަމުން އެނދަށް އަރައި ޝަފަޤްގެ ކައިރީގައި އޮށޯވެ ހަމަޖެހިލިއެވެ. އެއަށްފަހު ޝަފަޤާއިވީ ފަރާތަށް އެނބުރިލަމުން އޭނަގެ ބަނޑުގައި އަތް ޖައްސާލިއެވެ.

“ބޭބީ ކިހިނެއްތަ؟” ވިސާމް ލޯތްބާއެކީ އަހާލިއެވެ.

“ބައްޕި އައިމަ މިހާރު ރަނގަޅު.” ޝަފަޤް އޭނަގެ ނުފިލާ ހިނިތުންވުމުގައި އޮވެ ބުނެލިއެވެ. ޝަފަޤްގެ އެ ސީދާސާދާ ޖަވާބުން ވެސް ވިސާމަށް ހީލެވުނެވެ. އެއަށްފަހު އޭނަ ޝަފަޤްގެ މޫނަށް ވެއްޓިފައި ހުރި އިސްތަށިތައް ރީތިކޮށްލަދިނެވެ.

“އަހަރެން ވަރަށް ނަސީބުވެރި….ޝަފް އަހަރެންގެ ޙަޔާތުގައިވީތީ.” ވިސާމް އެހެން ބުނެލީ ޝަފަޤާއި ދިމާލަށް ފުން ނަޒަރަކުން ބަލަން އޮވެއެވެ. ޝަފަޤް އެއަށްވަކި އެއްޗެކޭ ނުބުނެ ނަޒަރު ތިރި ކޮށްލިއެވެ. ވިސާމް އިތުރަށް ޝަފަޤާއި ކައިރިވާން އުޅުނު ވަގުތު އޭނަ ކުއްލިއަކަށް މިރޭގެ ކުރީކޮޅު ހިނގިހާ ކަންތައްތަކުގެ މަތިން ހަނދާންވިއެވެ. މެހެނާޒްގެ މަރުގެ ޙަޤީޤަތާއި އޭނައަށް އަނިޔާކުރި މުޖުރިމުންނެވެ. މެހެނާޒް ތައުބާވެފައިވިކަމުގެ ހަނދާން އާ ވުމުން ވިސާމްގެ ކަންފަތުގައި ގުގުމާލީ މިއަދު ހަވީރު ނިހާލް ދެއްކި

ވިސާމް ނިހާލްގެ ވާހަކަ ޝަފަޤަށް ކިޔައިދިނެވެ. އަދި މެހެނާޒް ތައުބާވެފައިވަނިކޮށް އޭނަގެ ލަވަތައް އެހެން ފެތުރިގެން ދާން އޭނަ ބޭނުމެއްނުވާ ވާހަކަ ޙިއްސާކުރިއެވެ. އެކަމަށްޓަކައި އޭނަ ވީހާވެސް ގިނަ މީހުންގެ ކުރިމަތީގައި އެކަން ހުއްޓުވަން ބޭނުންވާ ވާހަކަ ބުންޏެވެ.

“މާ ޝާ ﷲ ވަރަށް ރަނގަޅު ޚިޔާލެއް ވިސާމް! ވިސާމް އަދިވެސް ފުދޭވަރަކަށް މަޝްހޫރު. ވިސާމް މީހުންގެ ހިތްތަކަށް އަސަރުކުރުވާ ފަދަ ގޮތަކަށް ވާހަކަ ދައްކައިފިއްޔާ ވަރަށް ގިނަ މީހުންގެ ހިތްތައް ބަދަލުވެގެންދާނެ އިން ޝާ ﷲ!” ޝަފަޤް ނުހަނު ޖޯޝާއެކީ ވިސާމަށް ހިތްވަރު ދިނެވެ.

“ހެހެހެ……އަދި މިހެން ބުންޏަސް މިއީ ހަމައެކަނި ޚިޔާލެއް އިނގޭ. ފަހަރެއްގަ ދެވޭނީ. މީހުން ބުނާނީ ކީކޭ ދޯ؟” ވިސާމް ބުނެލިއެވެ.

“އަނހާ! މީހުން ބުނާ އެއްޗަކަށް ވިސްނާކަށް ނުޖެހެއޭ ރަނގަޅު ކަމެއްކުރާއިރު.” ޝަފަޤް ހަނދާންކޮށްލަދިނެވެ.

“ހޫމް……..މަންމަ ވަރަށް އުފާވާނެދޯ އަހަރެން އެފަދަ ކަމެއްކުރާތަން ފެނިއްޖެއްޔާ؟” ޝަފަޤް ވާހަކަ ދެއްކިގޮތުން ވިސާމްގެ ހަނދާނަށް އައީ ރަޝީދާއެވެ. ދެންމެ ޝަފަޤް ބުނެލީ ރަޝީދާ ވަރަށް ގިނައިން ބުނާ ވާހަކައަކަށް ވާތީވެއެވެ.

“މަންމަ؟ މަންމަ ހުންނާނީ އުފަލުން ގޮސް ފޮޅިފަ! އިނގޭތަ؟ މަންމަ ވަރަށް ގިނައިން އައި ވިސާމް މާލޭގަ ހުރިއިރު. ވަރަށް ގިނަގިނައިން އަހާ ވިސާމް އުޅެނީ ކިހިނެއްހޭ. އަހަރެން ބުނިން މިހާރު ސުންނަތް ނަމާދުވެސް ކުރަން އުޅޭ ވާހަކަ. މަންމަ ހުރީ ވަރަށް އުފަވެފަ އެ ވާހަކައިން ވެސް. ވިސާމް……..މަންމައާ ބައްދަލުކުރަން ނުވޭތަ އަދިވެސް؟” ޝަފަޤް އެންމެ ފަހުން އަހާލިއެވެ. އޭނަ ހުރީ މި ހުރިހާ ދުވަހު އެ ސުވާލުކުރަން ޖެހިލުންވެފައެވެ. ނަމަވެސް މިރޭ ވިސާމް އަމިއްލައަށް މަންމަގެ ވާހަކަ ދެއްކުމުން އޭނައަށް ހިތްވަރެއް ލިބުނީއެވެ.

“ހިނގާ ދޯ މާދަމާ؟” އިންކާރު ކުރަންވީ ސަބަބެއް ނުފެނުމުން ވިސާމަށް ބުނެލެވުނެވެ. އެ ވާހަކައިން ޝަފަޤް ވީ އުފަލަކުން ފުރިހަމަ ހިނިތުންވުމަކާއެކީ ވިސާމްގެ ގައިގައި ބައްދާލެވުނެވެ. ވިސާމް ވެސް ޝަފަޤްގެ ގައިގައި ބާރަށް ބައްދާލިއެވެ. އެހިނދު މާދަމާ ކަންތައް ވާނެ ގޮތް ވިސާމްގެ ލޯމަތިން ސިފަވާންފެށިތާ މާ ގިނައިރެއް ނުވެ އެމޫނުމައްޗަށް ސީރިއަސްކަން ވެރިވިއެވެ. އެއީ މަންސޫރު އެގޭގައި ހުންނާނެކަން އެނގުންވުން ނޫން ސަބަބަކާ ލައިގެނެއްނޫނެވެ. އެ ޚިޔާލުން ވިސާމް އޭނަގެ ނިންމުން ބަދަލު ކުރަން ބޭނުންވިއެވެ. އެހެނަސް އޭނަ ދެން އިތުރަށް އޭނަގެ މަންމައާއި ދުރުގައި ހުންނާކަށް ވެސް ބޭނުމެއްނޫނެވެ. ޝަފަޤް ބުނާހެން މަންމައާއި ބައްދަލުކުރުމުގެ ފުރުޞަތު ފަހުން ދުވަހަކުން ނުލިބިދާނެއެވެ. އެހެންކަމުން މަންސޫރަށްޓަކައި ހިތުގައިވި ނަފްރަތު އޭނައާއި އޭނަގެ މަންމަ ވަކިކުރުވާ ސަބަބަކަށް ހަދާކަށް ވިސާމް އިތުރަށް ބޭނުމެއްނުވިއެވެ.

ޝަފަޤް ވިސާމާއި ކުޑަކޮށް ދުރުވެ އޭނަގެ ކޯތާފަތަށް ބޮސްދިނުމުން ވިސާމަށް އަނެއްކާވެސް އޭނަ ހާސްކުރުވަމުންދާ ޚިޔާލުތަކާއި ދުރަށް ދެވުނެވެ. އަދި ގަދަކަމުން އެ ޚިޔާލުތަކުގެ މަތިން ހަނދާން ނައްތާލަމުން ޝަފަޤާއެކީ މި ވަގުތުކޮޅުގެ ތެރެއަށް ގެނބިގެންދާން ނިންމިއެވެ. އެދެމީހުންގެ ޙަޔާތަށް ހިޔަނި އެޅިގެންދާނެ ފަދަ އެއްވެސް ކަމެއް ދެން ނުވާނެހެން އެ ދެމީހުންނަށް ހީވި ފަދައެވެ. އެހެނަސް އެއްވެސް އިންޒާރެއްނެތި ޠޫފާނެއް އަންނަން އުޅޭކަން އެދެމީހުންނަކަށް ވެސް ނޭނގެއެވެ.

**

އެރޭ 11:15 ވީ ވަގުތު ބާރު ސްޕީޑެއްގައި އައި ކަޅުކުލައިގެ ސްޕޯޓްސް ކާރެއް ގޮސް ޕޮލިސް ސްޓޭޝަންގެ ކުރިމައްޗަށް މަޑުކޮށްލައިފިއެވެ. އޭގެ މާ ގިނައިރެއްނުވެ އޭގެ ތެރެއިން އަވަސްއަރުވާލާފައި ފޭބީ ޒައިދެވެ. ޒައިދް ކާރުގެ ދޮރު ލައްޕާލުމަށްފަހު އެތާނގެ ގޭޓު ކައިރިއަށް މަޑުކޮށްލި ތަނާހެން ޔާސިރު ކޮންމެވެސް އެހެން މީހަކާއި ވާހަކަ ދައްކަމުން އެދިމާލަށް އަންނަމުން ދިޔަ މަންޒަރު އޭނައަށް ފެނުނެވެ.

“ޑޭޑް!” ޒައިދް ވައި އަޑުން ގޮވާލަމުން ގޮސް ޔާސިރުގެ ގައިގައި ބައްދާލިއެވެ. ޔާސިރު އޭނަގެ ދަރިފުޅުގެ ބުރަކަށީގައި ފިރުމަން ފެށިތަނާހެން ޒައިދް އަނެއްކާވެސް ދުރަށް ޖެހިލައިފިއެވެ.

“ތޭންކް ގޯޑް ޑޭޑް ސަލާމަތްވިކަމަށްޓަކައި. ތޭންކްސް އަ ލޮޓް ލޯޔާރ އަންކްލް!” ޒައިދް ނުހަނު އަސަރާއެކީ ޔާސިރުގެ ކައިރީގައި ހުރި މެދު ޢުމުރުގެ ފިރިހެން މީހާއަށް ވެސް ބުނެލިއެވެ. އެމީހާ ހީލި ހިނދު ޔާސިރު ކެއްސަން ފެށިއެވެ. އެއާއެކު އޭނައަށް ޑޭޑް ރަނގަޅުތޯ އަހާލެވުނެވެ.

“ދުވަހަކުވެސް ބަންދުނުވާ މީހަކު ބަންދުވާންވީމަ ވާނީ މިކަހަލަ ގޮތެއްދޯ؟” ޔާސިރު އޭނަގެ މިލާފައިވާ މޫނުމައްޗަށް ހިނިތުންވުމެއް ވެރިކުރުވަމުން ބުނެލިއެވެ. އެވަގުތު ޒައިދް އައި ރުޅީގައި އޭނަގެ ގޮށްމުއްކެވުނެވެ.

“މީ އެ އައިމަނާއި އަޒާން ޚާލިދުގެ ކަންތައް. އެމީހުން ވިސާމާއި ހަމައަށް އެ ސިޓީ ގެންދިޔައީ. އަދި ވަރަށް ހެވިފަ ތިއްބޭ މިތާނގަ ޑޭޑް ހައްޔަރު ކޮށްގެން ދިޔައިރު. މަރާލާނަން މަ އެމީހުން!” ޒައިދް ދަތްކުނޑި ވިކަމުން ބުނެލިއެވެ. ޒައިދަށް ބުނެލެވުނު ވާހަކައިން  ޔާސިރަށާއި އޭނަގެ ވަކީލަށް ވެސް ވަށައި ހޯދާލެވުނެވެ. އެމީހުންގެ ނަސީބު ރަނގަޅު ކަމުން އެ ވާހަކަ އިވޭ ހިސާބުގައި އެހެން މީހަކު ނެތެވެ.

“އަވަސްއަރުވާލައިގެން މޮޔަ ކަމެއް ނުކުރައްޗޭ ޒައިދް. މިފަހަރުވެސް މި ސަލާމަތްވީ ކިރިޔަ ކިރިޔާ. މަންސޫރު ޑޭޑްއާ ދެކޮޅަށް ވާހަކަ ދައްކައިފި ދުވަހަކުން ޑޭޑްގެ ސަލާމަތެއް ނޯންނާނެ. މިހާރުއްސުރެ ވެސް އޭނައަށް ގޮތެއް ހަދަން ފަށައިފިން. އޭނަ އަހަރުމެންނާ ދެކޮޅަށް އެއްޗެކޭ ބުނާނެހެނެއް ހިއެއްނުވޭ. ވަރެއްގެ ދީންވެރިއެއްވިއްޔާ އެއީ. އެކަމަކު އެ ހަލާކުކުރުވަނިވި ސިޓީ މިރަށަށް އައީމަ މަންސޫރާއި ދެކޮޅަށް ވެސް ފިޔަވަޅު މި އެޅީ އެއީވެސް ވިސާމްގެ ދޮންބައްޕައަށްވީތީ. މީހެއްގެ ހިތް ބަދަލުވާނެ ގޮތެއް ނޭނގޭ….ދަރިފުޅު ކަންބޮޑުނުވޭ. އެމީހުން އަހަރުމެންނަށް މި ޖެއްސި ޙާލުގެ ބަދަލު އެމީހުންނަށް ލިބޭނެ.” ޔާސިރު ޔަޤީންކަމާއެކީ ބުނެލިއެވެ. ޒައިދް ރުޅިވެރި މޫނަކާއެކީ ބޯޖަހާލީ އެއަށް އެއްބަސްވުމުގެ ގޮތުންނެވެ.

**

“އޯ މައި ގޯޑް އޯ މައި ގޯޑް….ދެން ކިހިނެއްތަވީ ރަޝީދައްތާ؟” އޭގެ އަނެއްދުވަހު ހުކުރުން ފައިބައިގެން އައިސް އަޒާން ކާރޕެޓް މަތީގައި އިނދެ ނުހަނު ޖޯޝާއެކީ ސޯފާގައި އިން ރަޝީދާ ކުރެން އެހިއެވެ. އޭނައާއި ޖެހިގެން އައިމަން ފާޑަކަށް ފޫހިވެފައި އިންއިރު ހަފްސާ ރަޝީދާގެ ކައިރީގައި މަޖައްލާއަކަށް ގެއްލިފައި އިނެވެ.

“ދެން އެމީހުން އަނެއްކާވެސް ހޭލެވުނީ. އެތައް އަހަރެއްފަހުން. ހޭލެވުނުއިރު ވެސް އެމީހުން ހީކުރީ އެންމެ ދުވަހެއް ނޫނީ އެއަށްވުރެ ވެސް މަދު ވަގުތުކޮޅަކަށްހެން އެމީހުންނަށް ނިދަން ތިބެވުނީ. ދެން އެންމެންގެ ތެރެއަށް ނިކުތީމަ މި އެނގުނީ އަސްލު ވީ ގޮތް……އެއީ ﷲ ސުބުޙާނަހޫ ވަތާޢާލާ އެކަލާނގެއަށް ތަބާވާ ޒުވާނުންނަށް އެހީވެދެއްވާ ގޮތް.” ރަޝީދާ ކިޔައިދޭހިތުން ކިޔައިދިނެވެ. އަޒާން ފޯރިއާއެކީ އޭނަގެ އަތުގައި އޮތް ފޮތުގައި ނުކުތާތައް ނަގަމުން ދިޔަ ގޮތުން އޭނައަށް އިނދެވުނީ ހިނިތުންވުމެއްގައެވެ.

“އޭ އައްމު! އަހަރެން ޕްރެޒިޑެންޓަކަށްވީ ދުވަހަކުން ކޭމްޕެއް ބާއްވާނީ އިނގޭ. އެ ކޭމްޕް ތެރެއަށް ސްޓޯރީ ޓައިމެއް ލާފަ މި ސްޓޯރީ ކިޔައިދޭނީ. ވަރަށް ބައިވަރު މީހުން އޭރު ކަހްފު ސޫރަތުގެ ޓްރާންސްލޭޝަން ބަލާނެ. އެންޑް އިވެންޗުއަލީ އެމީހުންގެ ހިތުގައި ޤުރުއާނަށް ލޯބި އުފެދޭނެ އިން ޝާ ﷲ. ކީކޭ ބުނަނީ؟” އަޒާން ފޯރީގައި ހުރިވަރުން މަޑުން ހުންނަން ވެސް އޭނައަށް ދަތިވިއެވެ.

“ޕްފްފްފްޓް! ސީރިއަސްލީ؟ އެންމެން ނިދާނީއެއްނު ސްޓޯރީ ޓައިމްގަ؟” އައިމަން ފަރުވާކުޑަ ގޮތަކަށް ބުނެލިއެވެ. އެއާއެކު އަޒާން ނުރުހުންވީ ވަރުން އޭނަގެ އުނގުމަތީގައި އޮތް ބާލީހުން އައިމަންގެ ބޮލުގައި ޖަހާލިއެވެ. އައިމަން އައުޗްއޭ ކިޔާލުމާއެކު އޭނަ ވާހަކަ ދެއްކިއެވެ.

“އަޑުއަހާ ހިތްވާ ގޮތަށޭ ކިޔައިދޭނީ!!!” އާދޭހުގެ ރާގަކަށް އަޒާން ބުނެލިއެވެ. އައިމަން ތިމަންނަ ދަނީއޭ ބުނެ ތެދުވެގެން ދާން ހިނގައިގަތެވެ. އަޒާން ވެސް ތެދުވެ އޭނައަށް ގޮވަމުން އޭނަގެ ފަހަތުން ގޮސް ކޮޓަރިއަކަށްވަނެވެ. އެމީހުންގެ ޙަރަކާތްތަކަށް ބަލަން އިން ރަޝީދާގެ ހިނިތުންވުން ފަނޑުވެގެން ދިޔައީ ފުރަގަހުގައި ހުރި ކޮޓަރިއެއްގެ ތެރެއިން މަންސޫރުގެ ކެއްސުމުގެ އަޑު އިވުމުންނެވެ. އެއާއެކު ރަޝީދާއަށް ފަސްއެނބުރި އެ ކޮޓަރީގެ ދޮރާއި ދިމާލަށް ނަޒަރު ހިންގާލެވުނެވެ. ލައްޕާލެވިފައިވި އެ ދޮރުގެ ފުރަގަހުން އަނެއްކާވެސް މަންސޫރުގެ ކެއްސުމުގެ އަޑު އައުމުން ރަޝީދާގެ މޫނުމައްޗަށް ކަންބޮޑުވުން ވެރިވިއެވެ.

ވޭތުވެ ދިޔަ މަހެއްހާ ދުވަހުގެ ތެރޭގައި މަންސޫރުވަނީ ވަރަށް ބޮޑަށް ބަލިވެފައެވެ. އެއީ ކީއްވެކަމެއް އެކަކަށްވެސް ނޭނގެއެވެ. އެކަން ފެށިގެން ދިޔައީ ހިއްލުމަކުންނެވެ. އޭގެ ޙައްލަކަށް ޑޮކްޓަރުން އިންހޭލާތައް ދިނެވެ. އިންހޭލާތަކުގެ އެހީގައިވެސް އެ ހިއްލުން ރަނގަޅުވީ ވަކި ވަރަކަށެވެ. ފަހަކަށް އައިސް މަންސޫރު ކެއްސަން ވެސް ފަށައިފިއެވެ. ދުވަހަކުވެސް ބަލި ނުވާވަރަށް ބަލިވެގެން ދިޔުމުން އޭނަ އޭނަގެ ނިމުމުގެ މަތިން ހަނދާންވަނީ ކަންނޭނގެއެވެ. ފަހަކަށް އައިސް އޭނަ އަބަދުވެސް އެދެނީ އެކޮޓަރީގައި ޤުރުއާން ޖަހާފައި ބެހެއްޓުމަށެވެ. އެއްރެއަކު ޤުރުއާން އަޑުއަހަމުން ދަނިކޮށް އޭނަ ވަރަށް ގަދައަށް ރޯންފެށިއެވެ. ރަޝީދާއަށް އެ މަންޒަރު ފެނުނެއްކަމަކު އޭނައަށް ކިހިނެއްވީތޯ އަހާކަށް ނުކެރުނެވެ. ހަމަ ގައިމުވެސް އާޔަތަކުން މަންސޫރުގެ ހިތަށް އަސަރެއް ކުރީކަން ރަޝީދާއަށް އެނގުންވީ އެދުވަސްފަހުން އޭނަ ވަރަށް ގިނައިން އޭނަ ގާތުން މަޢާފަށް އެދެން ފެށުމުންނެވެ. މަންސޫރުގެ މޫނުމަތިން ފެންނަ ހިތާމަވެރިކަމަކުން އޭނަ މަންސޫރަށް މަޢާފުކުރަން ބޭނުންވެއެވެ. ޒަވާޖީ ޙަޔާތުގެ ކުރީކޮޅު މަންސޫރުގެ ފަރާތުން އަނިޔާތަކެއް ލިބިފައިވިޔަސް އެފަހުން މަންސޫރުގެ އެ ސިފައެއް ރަޝީދާއަށް ފެނިފައެއްނެތެވެ. އޭނަ އުފަލުގައި ގެންގުޅެވޭތޯ މަންސޫރު އަބަދުވެސް މަސައްކަތް ކުރިއެވެ. އެހެނަސް ރަޝީދާގެ ހިތުގައި ދެންވެސް ނުފިލާ ނުރުހުންތެރިކަމެއްވިއެވެ. ވިސާމް އޭނައާއި ވަކިވީ މަންސޫރުގެ ސަބަބުންކަން އޭނަ ހަނދާނެއް ނުނެތެއެވެ. އޭނަގެ ދަރިފުޅު އޭނަ ފެންނަ ހިސާބުގައި ނެތްކަން އެނގުންވާ ކޮންމެ ހިނދަކު އެ ނުރުހުންތެރިކަން އިތުރުވެއެވެ.

ވިސްނުމެއްގެ ތެރެއަށް ރަޝީދާ ގެއްލިފައިވަނިކޮށް ގޭގެ ބެލް ޖެހި އަޑު އިވުނެވެ. އެ އަޑަށް ހަފްސާ އިންގޮތަށް އިނދެ ގޭގެ ނޯކަރަކަށް ގޮވާލިއެވެ. އެ ނޯކަރު ގޮސް ދޮރު ހުޅުވާލި ވަގުތު ރަޝީދާ އިނީ ދޮރާއި ދިމާލަށް ބަލަހައްޓައިގެންނެވެ. މާ ގިނައިރެއްނުވެ ދޮރުމަތިން ފެނުނު ސޫރައަކުން ރަޝީދާގެ ނޭވާ ކަރުގައި ތާށިވެ އޭނަގެ ދެލޯ ބޮޑުވިއެވެ. އޭނައަށް ހީވީ މާޒީގެ ދުވަސްތަކުން ދުވަހަކަށް އޭނައަށް ދެވުނީ ހެންނެވެ. މިއީ ޙަޤީޤަތެއްކަން ޤަބޫލުކުރަން ވެސް ދަތިވެފައިވަނިކޮށް އޭނައަށް އަޑެއް އިވުނެވެ.

“މަންމާ!” ދޮރު މަތީގައި ހުރި ވިސާމް ލުއި ހިނިތުންވުމަކާއެކީ އެހެން ގޮވާލި ވަގުތު ރަޝީދާގެ ދެލޯވީ ކަރުނުން ފުރިފައެވެ. އޭނައަށް ކޮޅަށް ތެދުވެވުނީ ކުއްލިއަކަށެވެ. އެއަށްފަހު އޭނަ އަވަސް ފިޔަވަޅުތަކެއްގައި ގޮސް މިހާ ދުވަސްވަންދެން އޭނައަށް ގެއްލިފައިވި އޭނަގެ ދަރިފުޅުގެ ގައިގައި ބައްދާލިއެވެ. އޭނައަށް ގިސްލެވެން ފެށީ އެ ދަރިފުޅު ވެސް ނުހަނު އޯގާތެރިކަމާއެކީ އޭނަގެ ގައިގައި ބައްދާލުމުންނެވެ. ހިތާހިތުން ﷲ އަށް ޙަމްދުކުރަމުން އޭނައަށް ވާހަކަ ދެކެވުނެވެ.

“ދަރިފުޅާ! ދެން ނުދައްޗޭ މަންމަ ދޫކޮށްލާފަ. ކުރީ ފަހަރުވެސް މިގޮތަށް އައިއްސަ ދަރިފުޅު ދިޔައީ….ދަރިފުޅަށް އެނގެއެއްނު މަންމަ ދަރިފުޅު ދެރަވާފަދަ ކަމެއް ނުކުރާނެކަން. އާދޭސް ކުރަން ދަރިފުޅާ ދެން ނުދާތި!” ރަޝީދާ ރޮމުން ރޮމުން ވިސާމްގެ ގައިގައި ބާރަށް ހިފަހައްޓައިގެން އޮވެ ބުނެލިއެވެ. އެ ހިނދު ވިސާމްގެ ލޮލަށް ވެސް ކަރުނަތައް ޖަމާވާން ފެށިއެވެ.

“ދެން ނުދާނަން މަންމާ….ދެން ނުދާނަން. އަހަންނާ މަންމަގެ ދެމެދަށް އެހެން އެއްވެސް މީހަކު ވަނަނުދޭނަން އަހަރެން. އަހަންނަށް މަޢާފުކޮށްދީ މަންމާ. މިހާރު އަހަންނަށް ވިސްނޭ މަންމައާއި ދުރުގައި އުޅެގެން ކިހާ ގޯސްކަމެއްކަން އަހަންނަށް ކުރެވުނީ. މަންމަ އަހަރެންގެ ފާފަތައް ފުއްސެވުމަށްއެދި ދުޢާ ކުރައްޗޭ.” ވިސާމް ހިނިތުންވާން މަސައްކަތް ކުރަމުން އަސަރާއެކީ ބުނެލިއެވެ. ރަޝީދާ ވަގުތުން އެވާހަކައަށް އާނއެކޭ ބުނެލިއެވެ. އެ ހިނދު އެތަނަށް ޝަފަޤާއި މިޝްކާ އައިތަން ފެނިފައި އޭނަ ވިސާމާއި ދުރުވެލައިފިއެވެ. އެއަށްފަހު ވަގުތުން އެތެރެއަށް އައުމަށް އެދި އެމީހުންނަށް މެހުމާންދާރީ އަދާކުރިއެވެ.

ވިސާމާއި ޝަފަޤް މިޝްކާއާއެކީ ރަޝީދާއާއި ވާހަކަ ދައްކަން ފެށިތާ މާ ގިނައިރެއްނުވެ އެތަނަށް އައިމަނާއި އަޒާނާއި ޚާލިދުވެސް އައެވެ. މިޝްކާ އެންމެނާއި ވެސް ނުހަނު ފަސޭހައިން އެކުވެރިވެލައިފިއެވެ. ޝަފަޤް ވެސް އެކުވެރިވާން ބޭނުންވިއެއްކަމަކު ހަފްސާގެ ފަރާތުން އޭނައަށް ލިބެމުން ދަނީ އޭނަގެ މިޒާޖު ކަމުނުގޮސްގެން އުޅޭ ފަދަ ނަޒަރުތަކެވެ. އެކަމާމެދު އަޅާނުލަންވެގެން ޝަފަޤް އޭނަގެ ފުރިހަމަ ހިނިތުންވުންތައް ހަފްސާއަށް ހަދިޔާ ކުރަމުން ދިޔައެވެ.

އެންމެން ވާހަކައިގައި ތިއްބާ އެ ވާހަކަ މެދުކެނޑިގެން ދިޔައީ ކުއްލިއަކަށް މަންސޫރު އާދަޔާ ޚިލާފަށް ގަދައަށް ކެއްސަން ފެށި އަޑަށެވެ. އޭނަ ނޭވާވެސް ކުރުވެގެން އުޅޭހެން ހީވުމުން އެންމެން އެކީގައި ކަހަލަ ގޮތަކަށް އެ ކޮޓަރިއާއި ދިމާލަށް ދިޔައެވެ. ޚާލިދު އެންމެ ކުރިން ގޮސް އެ ދޮރު ހުޅުވާލިއިރު އެނދުމަތީގައި އިން މަންސޫރު އުޅެނީ ފެން ތަށްޓެއް ބޯށެވެ. ފެންފޮދެއް ބުއި ތަނާހެން ކެއްސަން ފެށި ގޮތުން އޭނަ ކޮށި އަރައި ޙާލަތު އިތުރަށް ގޯސްވިއެވެ. ގެއިން މިކަން ޙައްލު ނުކުރެވޭނެކަން އެނގުންވި ތަނާހެން އެމްބިއުލާންސަކަށް ގުޅުނެވެ. މާ ގިނައިރެއްނުވެ އެމްބިއުލާންސެއް އައިސް މަންސޫރު ހޮސްޕިޓަލަކަށް ގެންދެވުނެވެ.

ހޮސްޕިޓަލަށް ގެންގޮސް އެމަޖެންސީކޮށް ފަރުވާ ދެވެން ފެށިތާ މާ ގިނައިރެއްނުވެ އޭނަ އައި.ސީ.ޔޫ އަށް ބަދަލުކުރެވުނެވެ. އެކަމާމެދު އޭނަ ހޮސްޕިޓަލަށް ގެނައި މީހުންގެ ތެރެއިން އެއްވެސް މީހެއްގެ މޫނުމަތިން ހިތާމަވެރިކަމެއް ނުފެނެއެވެ. އެންމެންގެ މޫނުމަތިން ވެސް ފެންނަމުން ދިޔައީ ހަމައެކަނި ކަންބޮޑުވުމެވެ. މަންސޫރު އެމީހުންނާއި ދޭތެރޭ ކަންތައް ކޮށްފައިވި ގޮތުން އެމީހުންގެ ހިތުން އޭނައަށް ކުޑަވެސް ޖާގައެއް ލިބިފައި ނެތް ފަދައެވެ.

އައި.ސީ.ޔޫ ގައި މަންސޫރަށް ފަރުވާ ދެވެން ފެށިތާ ދެ ދުވަސް ފަހުން އޭނަ މާލެ ގެންދިޔުމަށް ޑޮކްޓަރުން ލަފާ ދިނެވެ. ޚާލިދު ލަސްތަކެއް ނުކޮށް އެކަން ހަމަޖެއްސީ ހަމައެކަނި އިންސާނިއްޔަތަށްޓަކައެވެ. މަންސޫރު ފުރުވަން އޮތް ރޭ ވިސާމް ވެސް އެއާރޕޯޓަށް ދިޔައީ ވަކި ދާ ހިތުންނެއްނޫނެވެ. މަންސޫރު އޭނައަށް ދިން އަނިޔާތަކާއި އޭނަގެ އަންހެނުންނަށް ދިން އަނިޔާތަކަކީ އޭނައަށް ހަނދާން ނައްތާލެވޭނެ ވަރުގެ ކަންތައްތަކެއްނޫނެވެ. އެހެނަސް އޭނަ ދިޔައީ ބަލި ޙާލަތުގައި އޮތް މީހެއްގެ ހިތް އޭނައަށްޓަކައި ސާފުކުރުވޭތޯ ބެލުމަށެވެ. ޝަފަޤް އޭގެ މުހިއްމުކަން އޭނައަށް ކިޔައިދީފައިވާތީވެއެވެ. ވިސާމް އެއާރޕޯޓަށް ދިޔައިރު މަންސޫރު އޮތް އެމްބިއުލާންސްގެ ތެރޭގައި ހަފްސާއާއި ޚާލިދު މަންސޫރާއި ވާހަކަ ދައްކަމުން ދިޔައެވެ. އެމީހުންގެ ކުރިން ރަޝީދާ އެމްބިއުލާންސަށް އެރިކަން އެނގުމުން އޭނަ ދެއްކި ވާހަކައަކާމެދު ވިސާމް ސުވާލުކުރިއެވެ.

“ހަމަ މަޢާފުކުރަން އެދުނީ. ހިތް ސާފުކުރަން އެދެމުން ދިޔައީ. ކަރުނަތައް އެއްގޮތަކަށް ވެސް ނުހުއްޓޭ.” ރަޝީދާ ކިޔައިދިނެވެ. އޭގެ މާ ގިނައިރެއްނުވެ ހަފްސާއާއި ޚާލިދު އެމްބިއުލާންސް އިން ފޭބުމުން އެއަށްއެރީ އައިމަނާއި އަޒާނާއި ވިސާމެވެ. އެމީހުން އަރައި ދޮރު ލައްޕާލުމުން މަންސޫރު އެ ތިން މީހުންގެ މޫނަށް ވެސް ފަރުވާތެރިކަމާއެކީ ބަލާލިއެވެ.

“ބޭބެއަށް އެނގޭ ތި ތިންކުދިން ވެސް ތިބީ ބޭބެއަށް ނުރުހުންވެފަކަން. ނުރުހުންނުވާށޭ ބުނާކަށް ވެސް ބޭބެއަކަށް ނުކެރޭނެ. އެހާ ވެސް ބޮޑަށް ތިކުދިންނަށް ދެރަ ދެވިފަ ބޭބެއަށް ހުރީ. އަދި އަމުދުން ތިކުދިން މި ހުރިހާ ދުވަހު ދީނާއި ދުރުގަވީ ސަބަބަކީ ވެސް ބޭބެކަމަށްވުމީ ތިކުދިން ހަމަ ގަދައަށް ބޭބެއަށް ނަފްރަތު ކުރަންވީ ސަބަބެއް. އެކަމަކު އެހުރިހާ ކަމަކާމެދު ދެރަވެފައިވާ ހިތަކާއެކީ މި އެދެނީ ބޭބެއަށް މަޢާފުކޮށްދިނުމަށް…..ބޭބެގެ ތަޖުރިބާއިން ބޭބެ ތިކުދިންނަށް ދޭން ބޭނުން ނަޞޭޙަތެއް އެބައޮތް. އެއީ…….ދިރިއުޅުމުގަ ކިތަންމެ އަވަދިނެތިވެގެން ދިޔަޔަސް ﷲ ގެ ހަނދުމައިން ދުރުނުވާށޭ. ﷲ ގެ އާޔަތްތައް އުނގެނިފައި އެ އާޔަތްތަކާއި ދުރުވެގެން ދިޔައިމަ ވާނީ ބޭބެއަށް ވީ ކަހަލަ ގޮތެއް. ބޭބެ ދީން އުނގެނުނީ ވަރަށް އުނގެނޭ ހިތުން. އެކަމަކު އެހެން މީހުންނަށް ﷲ މަތިން ހަނދުމަކޮށްދިނުމުގެ ތެރޭގަ ބޭބެ އަމިއްލަ ނަފްސު މަތިން ހަނދާން ނައްތާލީ. އޭގެ ނަތީޖާއެއްގެ ގޮތުން ބޭބެގެ ހިތް ހަރުވެ ޝައިޠާނާ ގޯސް ޢަމަލުތައް ބޭބެއަށްޓަކައި ޒީނަތްތެރިކުރީ. ބޭބެއަކީ އެހެން މީހުން ވެސް ދީނާއި ދުރުވެގެން ދާ ސަބަބަކަށްވެގެން ދިޔައީ އެހެން……ﷲ އަށް ޙަމްދުކުރަން މި އިމްތިޙާނުގެ ތެރެއިން ވެސް ބޭބެއަށް އެކަން އެނގި ތައުބާވުމުގެ ފުރުޞަތު ލިބުނު ކަމަށްޓަކައި.” މަންސޫރަށް އެހާ ހިސާބަށް ވާހަކަ ދެކެވުނުއިރު އޭނަގެ ލޮލުގެ ކޮޅުން ކަރުނަތައް ފައިބައިގެން އައެވެ. އޭނަ ދެއްކި ވާހަކަތަކުން އައިމަނާއި ވިސާމަށް މާ ބޮޑު އަސަރެއް ނުކުރިއެއްކަމަކު އަޒާނަށް އިނދެވުނީ ރޮވެން ކައިރިވެފައެވެ. އޭނަ ހަމަ އެވަގުތު ދުވަހުގެ ހުރިހާ ވަގުތެއްގައި ވެސް ވީވަރަކުން ﷲ މަތިން ހަނދުމަކުރަން ނިންމިއެވެ. އަދި އެކަމަށްޓަކައި ވާގި ދެއްވުމަށް އެދި އޭނައަށް ﷲ ގެ ޙަޟްރަތަށް ދުޢާ ދެންނެވުނެވެ.

މަންސޫރާއެކީ ރަޝީދާ މާލެއަށް ދިޔައިރު ޚާލިދު ވެސް ދިޔައެވެ. އެކޮޅުގައި އެމީހުންނާއި ތިމާގެ އެހެން މީހުން އުޅޭތީ ޚާލިދު ދޭތެރެ ދޭތެރެއިން ރިސޯޓަށް ގޮސް ރަށަށް ވެސް އަނބުރާ ދަމުން ދިޔައެވެ. މަންސޫރުގެ ޙާލު އިހުނަށްވުރެ ރަނގަޅުވާން ފެށި ވާހަކަ އެނގުމުން ޚާލިދު ރަށަށް ކުރާ ދަތުރުތައް ގިނަ ކުރިއެވެ. އަޒާނާއި އެއްވަރަށް އޭނައާއި ހަފްސާވެސް އަޒާންގެ ކެމްޕެއިނަށް ފޯރި ހިފާފައި ހުރި ވަރުންނެވެ.

އަޒާން ސްޓޫޑެންޓް އެސޯސިއޭޝަންގެ ރައީސަކަށްވުމަށް ކުރަމުން ދިޔަވަރުގެ ކެމްޕެއިނެއް އެހެން އެއްވެސް ބައިވެރިއަކަށް ނުވެވެއެވެ. ޕޯސްޓަރުތަކާއި އެސަމްބްލީގައި ދެވުނު ސްޕީޗްތަކާއި ވަކިވަކި ކްލާސްތަކަށް ވެސް ގޮސް ކުރެވުނު މަސައްކަތުގެ ނަތީޖާއަކަށްވެގެން ދިޔައީ އަޒާން ނުހަނު ފަސޭހަކަމާއެކީ އިންތިޚާބު ކާމިޔާބު ކުރެވުމެވެ. އެ ކާމިޔާބީ ލިބުނު ދުވަހު އޭނައަށް ޙަމްދުކުރެވުނީ ﷲ އަށެވެ. އެންމެން އޭނަގެ “ގަދަ” ކަމުގެ ވާހަކަ ދެއްކިއެއްކަމަކު އޭނައަށް މި ކާމިޔާބީ ލިބުނީ ހަމައެކަނި ﷲ ގެ ޙަޟްރަތުންކަން އޭނައަށް ހިތުގެ އަޑިން ޤަބޫލު ކުރެވުނެވެ. އެހެނަސް އެރޭ އޭނަގެ ޢައިލާ މީހުން ވެސް އޭނައަށް މަރުޙަބާ ކިޔުމުގެ ގޮތުން ބޭއްވި ޕާޓީގައި ދެއްކީ އެއްކަހަލަ ވާހަކަތަކެވެ.

“ގަދަ ގޮލައެކޭ މީ. ޒާންވަރެއްނެތް ހަމަ!” އައިމަން އަނގައިގައި ކޭކު ބަހައްޓައިގެން ހުރެ ސޯފާގައި އިނދެ ބުނެލިއެވެ. ހަފްސާ އާއި ޚާލިދު ވެސް އަސްލުވެސް އޭ ކިޔައި ހޭންފެށިއެވެ.

“މޯމް، ޑޭޑް، ޕްލީޒް! އަހަންނަށް މި މަޤާމް ލިބުނީ ހަމައެކަނި ﷲ ގެ އިރާދަފުޅުން. ވާއި ޑޯންޓް ޔޫ ސީ އިޓް؟ އަހަރެން ކުރީގަ އުޅުނީ ކިހިނެއްތަ؟ އަހަރެން މިހެން މި އުޅެނީ ހަމަ ﷲ އަހަރެންގެ ހިތަށް ދެއްވެވި ސާބިތުކަމެއްގެ ސަބަބުންނޭ.” އަޒާން އޭނަގެ ޢާއިލާއަށް ވިސްނައިދެވޭތޯ ބެލިއެވެ.

“ޕްލީޒް ޒާން! ތިހާ އޯލްޑް ފެޝަންޑްކޮށް ވާހަކަ ދެއްކީމަ ތިކަހަލަ ޔަންގް ބޯއިއަކާ ނުވެސް ގުޅޭ. އަހަރުމެންނަށް އަދި ވަގުތު އެބައޮތޭ ތިކަންތައްތަކާމެދު ވިސްނަން! ނޮޓް ރައިޓް ނައު!” ޚާލިދު ބުނެލިއެވެ.

އަޒާން އޭނަގެ ޢާއިލާއަށް ނަޞޭޙަތްދޭން އުޅުނު ވަރަކަށް އެމީހުންގެ ފަރާތުން އަޒާނަށް ފެންނަމުން ދިޔައީ ފަރުވާ ކުޑަކަމެވެ. އޭނަގެ ހިތްވަރުން އައިމަން މިހާރު ހުރިހާ ނަމާދަކަށް ދިޔަޔަސް މަންމައާއި ބައްޕަ ނަމާދަށް ނުދާތީ އޭނަ ކަންބޮޑުވެއެވެ. އެކަމުގެ ޙައްލަކަށްޓަކައި އޭނަ ނަމާދު ވަގުތު ޖެހުމުން އެމީހުންނަށް ގުޅައި މެސެޖުތައް ވެސް ފޮނުވަމުން ދިޔައެވެ. އެކަމާމެދު ވެސް އެމީހުން އިތުރަށް ނުރުހުންވުން ނޫންކަމެއް ނުވިއެވެ. ދުނިޔޭގައިވި ކޮންމެ އެއްޗެއް ގަނެވޭނެ ފަދައިން ﷲ އަށް ތައުބާވުމަށް ވަގުތުވެސް ގަނެވޭނެހެން އެމީހުންނަށް ހީވާ ފަދައެވެ. އެކަމާމެދު އަޒާން އިންތިހާއަށް ކަންބޮޑުވަމުން ދިޔައެވެ. އޭނަގެ ޢާއިލާގެ އެއްވެސް މީހަކު ނަރަކައަށް ވަންނާކަށް އޭނަ ބޭނުމެއް ނުވެއެވެ. އެ ތަނަކީ ކުޑަ ހިނދުކޮޅަކަށް ވެސް މަޑުކުރަން ރަނގަޅު ތަނެއް ނޫންކަން އޭނައަށް ޔަޤީންވެފައިވާތީވެއެވެ. އެހެންކަމުން ކޮންމެވެސް އެއްގޮތަކަށް އޭނަގެ ޢާއިލާގެ އެންމެން ތައުބާވުމަށް މަގެއް ފަހިކޮށްދެއްވުމަށްއެދި އަޒާނަށް ދުޢާ ކުރެވެމުން ދިޔައެވެ. އެމީހުންނާއެކީ ސުވަރުގެއަށް ދާން އެދެވުނު މިންވަރުންނެވެ.

އެއްދުވަހުގެ ހަވީރު ވަގުތު އަޒާނާއި އައިމަން ފުޓުބޯޅަ ޕްރެކްޓިސްއަށްޓަކައި ރަށުގެ ބޮޑު ސްޓޭޑިއަމަށް ދިޔައެވެ. އެދުވަހު އައިމަންގެ އެދުމުގެ މަތިން އަޒާން އޭނަ ޢާއްމު ގޮތެއްގައި ލައި އުޅޭ ނޫކުލައިގެ ޖޯޒީ އައިމަނަށް ދިނެވެ. އަދި އޭނަ ލައިގެން ހުރީ އައިމަން ޢާއްމު ގޮތެއްގައި ލައި އުޅޭ ރަތް ކުލައިގެ ޖޯޒީއެވެ. އޭގެ ސަބަބުން ޕްރެކްޓިސްގެ ތެރޭގައި ބައެއް ކުދިން ވެސް އެދެމީހުން އޮޅޭ ގޮތްވިއެވެ. އެކަމާމެދު އެމީހުން މަޖާ ނަގަމުން ދިޔައެވެ.

ޕްރެކްޓިސް ނިންމާލުމަށްފަހު ހުރިހާ ކުދިން ދާން ފެށުމުން އައިމަނާއި އަޒާން އާދައިގެ މަތިން ގޮސް އިށީނީ ސިޑި ބަރި ތަކުގެ މަތީގައެވެ. ދެމީހުން ފެންބޮމުން ބަލި ފިލުވަން ތިއްބާ އައިމަންގެ ދަބަހުގައި އޮތް އޭނަގެ ފޯނަށް މެސެޖެއްއައެވެ. އައިމަން ދަބަސް ހުޅުވައި ފޯނު ނަގައި ބަލާލިއެވެ. އެއާއެކު އޭނައަށް ހީލެވުނެވެ.

“ޒައިދް އަމިއްލައަށް މަޖާވެގެން އަހަންނަށް މަރުގެ އިންޒާރު އެބަ ފޮނުވާ.” އައިމަން މާ ބޮޑު ފަރުވާލެއްނެތި ބުނެލިއެވެ.

“ވަޓް؟ އެއީ ކީއްވެ؟!” އަޒާން ކަންބޮޑުވުމަކާއެކީ އަހާލިއެވެ.

“އެއީ އަހަރުމެންނާހެދި އޭނަގެ ބައްޕަ ޖަލަށް ދިޔައީތީ. ބޮޑަށް ރުޅި އަންނަނީ މަށަށް. މަށާ ހެދި ޝިޔާ ވެސް ގެއްލުނީމަހެން ހީވަނީ.” އައިމަން ބުނެލިއެވެ.

“އިއްނާލިއްލާހި. އައިމަން ބަލައިގެން އުޅެއްޗޭ. ހަމަ ނޭނގޭ ކޮށްފާނެ ކަމެއް. މާތް ﷲ އަޅަމެން ރައްކާތެރި ކުރައްވާށި. އާމީން!” އަޒާން ވަގުތުން ދުޢާކޮށްލިއެވެ. އެއަށްވެސް އައިމަން ހީލިއެވެ.

“ޑޫޑް ޗިލް އައުޓް! އަހަރުމެންނަށް ކަމެއް ނުކުރެވޭނެ އޭނައަކަށް. އަދި ކަމެއް ކުރެވުނަސް ބައްޕަ އަތުގަ ލާރި އެބަހުރި އެކަމެއް ރަނގަޅުކުރަން……ދެން މާ ވާހަކަ ދިގު ނުކޮށް އަވަހަށް ސައިކަލަށް ތެޔޮ އަޅަން ދޭބަލަ. ފައިގަ ރިއްސައިގެން މިއުޅެނީ ކުޑަކޮށް. އެކަމަކު ރައިޑަށް ދާންވާނެ. މިއަދު މަޣްރިބް ނަމާދަށް ބަންގި ގޮވާއިރަށް ޓާރގެޓް ކުރަންވާނީ ފޭދުއާ ހަމައަށްދާން.” އައިމަން ހެވިފައި ހުރެ ބުނެލިއެވެ. އަޒާން ޗޮއްކަނޑާލިއެވެ.

“އެހާ ބާރަށް ދުއްވާކަށް ނުވާނެ.” އަޒާން ކޮޅަށް ތެދުވެލަމުން ބުނެލިއެވެ.

“އޯކޭ ކާފާ އޯކޭ! ދެން ދޭ!” އައިމަން ބުނެލިއެވެ. އަޒާން މާޔޫސްކަމާއެކީ އޭނައަށް ފަސްދީފައި ސިޑިން ފައިބަން ފެށިއެވެ. އަދި އެންމެ ފަހު ހަރުފަތަށް އަރައި އަނެއްކާވެސް އައިމަނަށް ބަލާލިއެވެ.

“މަރުވެދާނެ މިއަދު ވެސް އައިމަން. ލަސްނުކޮށް ﷲ އަށް ތައުބާވުން އެންމެ ރަނގަޅީ. ނަރަކައަކީ ތި ހީކުރާވަރަށްވުރެ ބިރުވެރިތަނެއް އައްމު.” އަޒާން ފެންކަޅިވެފައިވި ދެލޮލާއެކީ އެހެން ބުނެލި ގޮތުން ނޭނގޭ ސަބަބަކާހުރެ އައިމަންގެ ހިތަށް ބިރުވެރިކަމެއް ވަނެވެ. އޭނަ އަޒާނަށް ބަލަން ހުރެފައި އަޒާން ހިނގައިގަތުމުން ވެސް އޭނަގެ ފަހަތުން ދެވުނެވެ. އަޒާން ގޮސް ސައިކަލަށް އަރައި ދުއްވާލިއިރު އައިމަން ހުރީ ސްޓޭޑިއަމްގެ ގޭޓު ކައިރީގައެވެ. އަޒާން ސައިކަލުން ގޮސް ތާރު މަގަށް އެޅެން އުޅުނު ވަގުތު އައިމަން އިސްޖަހާލަމުން ސްޓޭޑިއަމްގެ އެތެރެއަށް ދާން އުޅުނެވެ. އެ ހިނދު އިވުނު ބާރު އަޑު ފައްގަނޑެއްގެ ސަބަބުން އައިމަނަށް ލިބުނު ސިހުމާއެކީ ކުރިމައްޗަށް ބަލާލެވުނެވެ.

“ޒާން!!!” އައިމަންގެ އަޑު މުޅި ޞަރަޙައްދުގައި ގުގުމާލިއެވެ.

ނުނިމޭ