ފުން ލޯބި (14)

” ޔަލް… އައި ރިއަލީ ލައިކް ޔޫ.. ވިލް ޔޫ ބީ މައި ގާލް؟.. ” ކާރު ފަހަތު ސީޓުގައޮތް ބޮޑު މާބޮނޑިއެއް ނަގާ އަހަރެންނާ ދިމާލަށް ދިއްކޮށްލަމުން ޔާނު ބުނެލިއެވެ.

ޔާނުގެ އެ ޖުމްލައިން ހިތަށް ލިބުނު އުފަވެރިކަން ބުނެދޭންވެސް ނޭންގުނެވެ. އަހަރެން އިސް އުފުލަަ ޔާނުއަށް ބަލާލީ ޖަވާބެއް ދޭން ވެގެންނެވެ. ނަމަވެސް އެ ވިދުން ގަދަ ދެލޮލުގެ ޖާދޫގަ ޖެހިފަ ބުނަން އުޅުނު އެތިވެސް ހަނދާންނެތުނެވެ. ދެމީހުން އެކަކު އަނެކަކަށް ބަލަން އެހެން ތިބެވުނީ ކިހާއިރަކު ކަމެއްވެސް ނޭންގުނެވެ.

” ޖަވާބެއް ނުދޭންތަ ތިހުންނަނީ”  ޔާނު މަޑު މަޑުން އަހަރެންގެ ކަންފަތްދަށުގަ ބުނެލިއެވެ.

” އޯކޭ މައްސަލައެއްނެތް.. ޔަލްގެ ޖަވާބަކީ ނޯ ކަމަށް މި ނިންމީ.. ޖަވާބެއް ނުލިބުނީމަ..” ޔާނު ލާނެތް ރާގަކަށް ބުނެލިއެވެ.

” ޔެސް” އަހަރެން މަޑުމަޑުން ޖަވާބު ދިނީމެވެ.

” ކީކޭ.. ދެންމެ އެއްޗެއް ބުނިންތަ…” ޔާނު އެހެން އެ ބުނީ ގަސްތުގަ އަަހަރެންނާ ދިމާކުރަން ވެގެންނެވެ.

” އައި ލަވް ޔޫ ސޯ މަޗް” ޔާނު އަހަރެންގެ ގައިގަ ބައްދާލަމުން ބުނެލިއެވެ. ކުރެވެމުން ދިޔައީ މުޅިން އާ އިހްސާސް ތަކެކެވެ. ދުވަހަކުވެސް އަަހަރެން ފިރިހެން ކުއްޖަކާ މިފަދަ ގޮތަކަށް ގާތް ނުވާތީ ލިބެމުން ދިޔައީ ބުނެދޭންވެސް ނޭންގޭ ފަދަ ހިތްހަމަ ޖެހުމެކެވެ. ޔާނު ދެން ކޮއްލިކަމަކުން ހިއްސުތަށް ގަނޑުވި ކަހަލައެވެ. ނަމަވެސް އަހަރެން ވަގުތުން ޔާނުއާ ދުރުވެލީ ދުވަހަކުވެސް އެކަހަލަ ކަމެއް ކޮށްފައި ނުވާތީ ކުޑަކޮށް ޖެހިލުންވެފަ އިނީމައެވެ. ޔާނުއަށްވެސް އެކަން ނަގައިގަނެވުނީ ކަންނޭންގެއެވެ. އިތުރަށް އޭނަ އެފަދަ ގޮތަކަށް އަހަރެންނާ ކައިރިވާކަށް ނޫޅެއެވެ. އަހަރެންގެ އަތުގަ ހިފާލައިގެން އެތަށް އިރެއްވަންދެން ވާހަކަ ދައްކަން އިނެވެ. ޔާނު އަަހަރެން ގެޔަށް ލައިދިނައިރު އެކެއް ޖަހަން އުޅޭނެއެވެ. އަހަރެން ކާރުން ފައިބައިގެން މަޑުމަޑުން ގެޔަށް ވެންނީ މަންމަމެން މީހަކަށް ހޭލެވިދާނެތީއެވެ. މީހަކަށް ނުފެނިގޮސް ކޮޓަރިއަށް ވަދެވުމުން ހިތްހަމަޖެހުނެވެ. ނަމަވެސް ކޮޓަރީގެ ލައިޓް ޖެއްސުމުން ދެން ފެނުނު މަންޒަރުން ބިރުންގޮސް ހަލާކުނުވީ ކިރިޔާއެވެ.  އެނދުގަ އިށީންދެލައިގެން އަހަރެންނާ ދިމާލައް ބަލަން އިން ބައްޕަ ފެނިފަ މީ ހުވަފެނެއްބާއޭވެސް ހިތަށްއެރިއެވެ. އަހަރެން ސިހުނު ވަރުންގޮސް އަތުގަ އޮތް މާބޮނޑިވެސް ދޫވެގެން ބިންމައްޗަށް ވެއްޓިއްޖެއެވެ.

” ޔަލްވީ… ބައްޕަ ހިޔެއް ނުކުރަން ދަރިފުޅުވެސް ތިހާ ވިޔާނުދާ ކުއްޖަކަށް ވެދާނެ ކަމަކަށް.. މިހާރު ގަޑިން ވީ ވަރު އިނގޭތަ؟… ” ބައްޕަގެ ނުރުހުންތެރި ބަސްތަށް އަމާޒުވީ އަހަރެންނަށެވެ. ބައްޕަ އެ ވިސްނަނީ މުޅީން ނުބައިކޮށް ކަމުގަ ވިޔަސް އަހަރެން ބައްޕައަށް ވިސްނަދޭނީވެސް ވަކި ކިހިނެތް ހެއްޔެވެ. މި ދަންވަރު ގަޑީގަ ޔާނުއާ އެކީ ގޮސް ވާހަކަ ދައްކާލަން ތިބެފަ އައޭ ބުންޏަސް އެކަކުވެސް ގަބޫލު ނުކުރާނެކަން އިނގެއެވެ. ނަމަވެސް އަހަރެން ޖެހިލުންވެ ހުރެ ބައްޕަ ކައިރީ ކަންވީގޮތް ކިޔާދިނީމެވެ. ޔާނު އާއެކު ދިޔައީ ރައިޑަކަށް ކަމާ ބައްޕަ އެ ހީކުރާ ކަހަަލަ ވިޔާނުދާ ކަމެއް ނުކުރާ ކަމަށް  ބުނެދިނީމެވެ. ބައްޕަ އެވާހަކަ ގަބޫލުކުރި ކަމެއް ނޫނީ ނުކުރާ ކަމެއް ނޭންގެއެވެ. ނަމަވެސް ދެން ޔާނުއާއެކު ބޭރަށް ނުދިޔުމަށް ނަސޭހަތްތެރިވިއެވެ. އެރޭ ވަރަށް ގިނައިރުވަންދެން ބައްޕަ އަހަރެންނަށް ނަސޭހަތްދޭން އިނެވެ. ބައްޕަގެ ނަސޭހަތްތައް ކަނުލާ އަޑު އަހަމުންދިޔައީމެވެ. ބައްޕަ އެރޭ ފުރާވާހަކަ ބުނީ އަހަރެން ދެރަކޮށްލާފަ ސަޕްރައިސް އެއް ދޭން ކަމަށާއި އަސްލު ފުރަން ހަމަ ޖެހިފަ އިނީ މާދަން ކަމުގަ ބައްޕަ ބުންޏެވެ.

ދުވަސްތަށް އެހެން ފާއިތު ވަމުން ދިޔަވަރަކަށް އަހަރެންނާ ޔާނުގެ ގުޅުންވެސް ދިޔައީ ބަދަހިވަމުންނެވެ. ޔާނުއާ ދިމާވަނީ ސުކޫލުން އެކަންޔެވެ. ބައްޕަގެ ނަސޭހަތުގަ އަޑުއަހައިގެން އަހަރެން ޔާނުއާއެކު ބޭރަށް ގޮސް ނުހަަދަމެވެ. ނަމަވެސް އެގޮތަށް މާ ގިނަ ދުވަހު ހިފަހައްޓައެއް ނުލެވުނެވެ. ބައްޕަ ދިޔުމުން އަހަރެނަށް މާބޮޑަށް މިނިވަންކަން ލިބެންފެށިއެވެ. އަދި މަންމައަށް ސިއްރުން ރޭގަނޑުގަޑީގަ ދެމީހުން އައީ ސިއްރު ބައްދަލްވުންތަށް ބާއްވަމުންނެވެ. އޭރު އަހަރެންނަށްވެސް މިކުރެވެނީ ކިހާ ބޮޑުކަމެއް ކަމެއް އިހްސާސްއެއް ނުކުރެވެއެވެ. އެޔަށް ވުރެ ބޮޑަށް އަހަރެން ހުރީ ޔާނުދެކެ ލޯބި ވެވިފައެވެ.

އަހަރެންނަށް ހޭލެވުނީ ފޯނު ރިންގްވާ އަޑަށެވެ.

” ހެޕީ ސިކްސް މަންތުސް ބޭބީ” ޔާނުގެ ފިރިހެންވަންތަ އަޑު އިވުމުން ނިދިވެސް ފިލާ ހިނގައްޖެއެވެ.

” ހެޕީ ސިކްސް.. ހާދަ ހަނދާންވެސް ގަދޭ ދޯ.. ޔަލް މިހިރީ ހަނދާން ނެތިފައޭ” ޔާނު އެދުވަސް ހަނދާން ހުރުމުން އަހަރެން ހުރީ ވަރަށް އުފާވެފައެވެ.

” ދެން ބޭބީ ދައްކާ ވާހަކަ.. ތި ލޯބި ލޯބި ދޫނިގަނޑު އަހަރެންނަށް ލިބުނު ދުވަސް އަހަރެން ކިހިނެތް ހަނދާން ނެތޭނީ.. އައި ވޯނާ ސެލެބްރޭޓް އިޓް ވިތު ޔޫ.. ލެޓްސް ގޯ އައުޓު” ޔާނު އެހެން ބުނެލުމުން އަހަރެން ގަޑި ބަލާލިއިރު ބާރަ ޖެހީއެވެ. ޔާނު މި ވިޝް ކުރީވެސް ބަރާބަރު ބާރަ ޖެހި އިރަށް ތާއޭ ހިތަށް އެރިއެވެ. އަހަރެން ދިހަ މިނެޓް ތެރޭ ނިކުންނާނެ ކަމަށް ބުނަމުން ފޯނު ބޭއްވީމެވެ. ތައްޔާރު ވެލައިގެން ނިކުތްއިރު ޔާނު ކާރުގަ އަހަރެންގެ އިނތިޒާރުގަ އިނެވެ.

” ކޮންތާކަށް ދަނީ ސެލެބްރޭޓް ކުރަން؟،…” ކާރަށް އަރާ ހަމަ ޖެހިލަމުން އަހަރެން ސުވާލުކޮށްލީމެވެ.

” އިޓްސް އަ ސަޕްރައިސް” ޔާނު އަހަރެންގެ އަތުގަ ހިފާލަމުން ބުންޏެވެ. ކާރުގޮސް މަޑުކޮށްލީ ގަނޑުވަރެއް ފަދަ ރީތި ގެއެއްގެ ކުރިމައްޗަށެވެ.

ކާރުން ފާބައިގެން އަހަރެންގެ އަތުގަ ހިފާލައިގެން ޔާނު ގެޔަށް ވަންނަން ހިނގައިގަތެވެ.

” ނުވެސް އަހާނަންތަ މީ ކޮންތަނެއް ތޯ” އަހަރެން ސުވާލެއް ނުކޮށް އިނުމުން ޔާނު އަހާލިއެވެ.

” ޔަ.. ސަޕްރައިސް އެކޭ ބުނީމަ މި އިނީ މަޑުން..” އަހަރެން ބުނީމެވެ.

” މީ އަހަރެންގެ ގެ.. މަންމަމެން ވީ ޔާއްކޮ ޑޮކަށް ދައްކަން އިންޑިއާއަށް ގޮސް… ސޯ މިހާރު އަހަރެން އެކަނި އުޅެނީ ގޭގަ..” ޔާނު ކިޔާދިނެވެ.

ޔާނު އަހަރެން ގޮވައިގެން ގެސް އޭނަގެ ކޮޓަރިއަށް ވެންނި އިރު މުޅިތަންވަނީ އެކި ވަރުގެ އުއްބައްތި ތަކުން ޒީނަތްނެރި ކޮއްފައެވެ. ހީވަނީ އަލަތު ކައިވެނީގެ ފުރަތަމަ ރެޔަށް ކޮޓަރި ޒީނަތްތެރި ކޮއްފަވާހެންނެވެ.

” އެނދުމަތީގެ ރަތް ފިނިފެންމާ ފިޔައިން ބޮޑު ހިތެއް ހަދާފަ ވާއިރު އޭގެ މެދުގަ ހާޓް ޝޭޕް ކޭކެއް ބަހައްޓާފަ ހުއްޓެވެ.

” ހެޕީ ސިކްސް މަންތުސް ބޭބީ.. ހޮޕް ޔޫ ލައިކްޑް ދަ ސަޕްރައިސް…” ޔާނު އަހަރެން ގައިގަ ބައްދާލަމުން ބުނެލިއެވެ.

” އައި ލަވް އިޓް…” އަހަރެން އުފަލުން ހުރެ ބުނެލީމެވެ.

“ހިނގާ ކޭކް ފަޅަން ދޯ..” ޔާނު ކޭކު ކައިރީ އޮތް ވަޅި ދެމުން ބުނެލިއެވެ. އަހަރެން ކޭކު ފެޅުމަށްފަހު ކޭކު ކޮޅެއް ނަގާ ޔާނު މޫނުގަ ހާކާލީމެވެ. ދެމީހުން އެގޮތަށް ސަކަރާތް ޖަހަން ވަރަށް ގިނައިރުވަންދެން  ތިބީމެވެ. ވާހަކަ ދައްކަން އިންދާ ޔާނު ކުއްލިޔަކަށް އަހަރެންގެ ތުންފަތުގަ ބޮސްދިނެވެ. އަހަރެންވެސް އިތުރަށް ޔާނުއާ ގާތް ވެލަމުން އެ ހަރަކާތުގަ ބައިވެރި ވެލީމެވެ. ނަމަވެސް އެކަން އެހެން މިސްރާބަކަށް ދާހެން ހީވެގެން އަހަރެން ޔާނުއާ ދުރުވެލީމެެވެ.

” ޔާނު އަހަރެން ބޭނުމެއް ނޫން މެރީ ނުކޮށް އެކަހަލަ ކަމެއް ކުރާކަށް…” އަަހަރެން ހިތުގަ އޮތް އެތި ޔާނު ކައިރީ ބުނީމެވެ.

” ބޭބީ ޓްރަސްޓް މީ.. އަހަރެން ޔަލް އަކަށް ދެރައެއް ނުދާނަމޭ.. ޓްވެލް ނިންމާފަ ދެމީހުން މެރީކޮށްގެން ކިޔަވަން ދާނީ ދޯ..” ޔާނު އަހަރެންނަށް ވިސްނަދިނެވެ.  އަހަރެންނަށް އެވާހަކަތަށް ގަބޫލް ކުރެވުނީ ކީއްވެކަމެއް ހުދު އަަހަރެންނަކަށްވެސް ނޭންގުނެވެ. ޔާނުގެ ކޮންމެ ހަރަކާތަކަށް އަހަރެން މަރުހަބާ ކިޔަމުން ދިޔައީ މިކުރެވެނީ ކިހާ ބޮޑު ފާފައެއް ކަމާމެދުގަވެސް ވިސްނާނުލެވިއެވެ. ދެމީހުން އެކަކު އަނެކަކުގެ ފަރާތުން ހުފާ ހޯދަމުން ދިޔައިރު ފަހުން ވެދާނެ ގޮތަކާ މެދުވެސް ވިސްނާނުލެވުނެވެ.

” ބޭބީ ދެރަވެދާނެތީ އަސްލު ކުރިން ނުބުނީ.. ބައްޕަމެން މިހާރު ނިންމައިގެން ތިބީ އެއްކޮށް އިންޑިއާ ބަދަލުވާގޮތަށް.. އަހަރެންވެސް މިހާރު މިހިރީ ބާރަ ނިމިފަ.. ދެން އެކަމް ބޭބީ ދެރަ ނުވައްޗޭ ބޭބީ ކިޔަވާ ނިމުނީމަ ދެމީހުން މެރީކޮށްގެން ކޯސް ހަދަން ދާނީ ދޯ.. އިނޑިއާއަށް ދާ ގޮަތަށް އަހަރެން މަންމައާ ބައްޕައާ ވާހަކަ ދައްކާނަން ކައިވެންޔާ ބެހޭގޮތުން..”  ޔާނު އަހަރެން ގެޔަށް ލައިދޭން އައި ގަޑީގަ ވާހަކަ ދެއްކިއެވެ. ޔާނު ފުރާތީ އެކަމާ ކިތަންމެ ދެރަވިޔަސް ކެތްކުރުން ނޫން ގޮތެއް ނެތްކަން ހިތަސް ވިސްނަދިނީމެވެ.  އެރޭ ދެމީހުން ވަކިވީ އަބަދަށް އެކީގަ އުޅުމަށް އެތަށް ހުވަފެންތަކެއް ދެކެމުންނެވެ. އެތަކެއް ވައުދު ތަކާ އަހުދުތަކެއް ކުރަމުންނެވެ. އޭގެ ދެދުވަސް ފަހުން ޔާނު ފުރައިގެން އިނޑިއާށްދިޔައެވެ. ދިޔަ ކޮޅުގަ ކޮންމެ ދުވަހަކުވެސް އަހަރެންނަށް މެސެޖްކޮށް ގުޅާހަދާނެއެވެ. މި ދުނިޔޭގަ އެއްކަމެއްވެސް އަބަދު އެއްގޮތަށް ނޯންނަ އުސޫލުން ކަންކަން ބަދަލުވާންފެށިއެވެ، އަހަރެންނަށް އެކަން ފާހަގަ ކުރެވިގެން ޔާނު އާ އެވާހަކަ ދެއްކުމުން ބުނީ މާ ބިޒީކޮށް އުޅޭތީ ކަމަށެވެ. އަހަރެންވެސް އެކަން ގަބޫލުކޮށްގެން ހުރި ނަމަވެސް ހިތުގެ އެއް ކަނަކުން ކަމެއް ގޯސްވާކަމުގެ އިހްސާސް ކުރެވެމުން ދިޔައެވެ.

އަހަރެންނަށް ހޭލެވުނީ ފޯނު ރިނގުވާ އަޑަށެވެ. ފޯނު ސްކްރީންއިން ޔާނުގެ ނަން ފެނުމުން އަހަރެން ހައިރާންވިއެވެ. މިހާ ހެދުނު ޔާނު ގުޅާތީ އަހަރެން އިނީ ހައިރާންވެފައެވެ. ފޯނު ނެގި އިރު އެއީ އަހަރެންގެ ދިރިއުޅުން އެފުއް މިފުށަށް ޖެހިގެންދާނެ ފޯނު ކޯލެއް ކަމެއް އަހަރެންނަށް ކުޑަކޮށްވެސް ރޭކާނުލައެވެ.

” ގުޑު މޯނިންގް ޔަލް…” އެކޮޅުން ޔާނުގެ ފިރިހެންވަންތަ އަޑު އިވުނެވެ.

” ގުޑު މޯނިންގް ބޭބީ..” އަހަރެންވެސް ނިދި އަޑުން ބުނެލީމެވެ.

” ޔަލް ވަރަށް ބޮޑު ވާހަކައެއް ދައްކަންވެގެން އަސްލު ޔަލްއަށް މިގުޅީ..” ޔާނު އެހެން ބުނިއިރު އަޑުގަވި ސީރިއަސް ކަމުން ދައްކަން އުޅެނީ ކިހާ ސީރިއަސް ވާހަކައެއްކަން އަހަރެންނަށް ނަގައިގަނެވުނެވެ. އެކަމް އަހަރެން ހީކުރީ ޔާނު ސަމާސާ ކުރަން އެކްޓް ކުރާކަމަށެވެ.

” ލެޓް މީ ގެސް.. މެރީ ކުރާވާހަކަ ދެއްކީދޯ މަންމަ މިނާ.. އެންޑް ބޭބީއަށް ކެތް ނުވީދޯ ޔަލް ހޭލަންދެންވެސް..” އަހަރެން ވަރަށް އުފަލުން ހުރެ ބުނެލީމެވެ.

” ނޯ ޔަލް.. ލެޓް މީ ޓޯކް ފަސްޓް… ވީ ކާންޓް ބީ ޓްގެދާރ.. އަހަރެން ޔަލްއާ އެކު އުޅެން ވަރަށް މަސެއްކަތް ކޮއްފިން.. އެކަމް އަހަރެންނަށް ލޮއެއްބެއް ނުވެވުނު… ނޭންގެ ކީއްވެ ކަމެއް.. އައި އޭމް ރިއަލީ ސޮރީ” ޔާނު އެބުނި ކޮންމެ ޖުމަލެއް އަހަރެން ކަންފަތަށް  އަޑުއިވެމުން ދިޔައީ ބާރު ގުގުރިއެއް ޖަހާހެންނެވެ. އަހަރެން އިނީ ޔާނު އެދައްކާ ވާހަކަ ގަބޫލު ނުކުރެވިފައެވެ.

” ތީ ދޮގެއް.. ބުނޭ ތީ ދޮގެކޭ.. ” އަހަރެންނަށް  މި އަޑުއިވުނީ ނުބައިކޮތް ކަންނޭންގެއޭ ހިތަށް އެރިއެވެ.

” މީ ދޮގެއް ނޫނޭ ޔަލް.. ހަގީގަތާ ކުރިމަތިލާން ދަސްކޮށްބަ.. ރިލޭޝަންޝިޕެއް ކުރިއަށްދާނީ ދެމީހުންވެސް ލޯބި ވެގެން.. އަހަރެން މިބުނީ އަހަރެންނަކަށް ޔަލް ދެކެ ލޮއެއްބެއް ނުވެވުނޭ.. އެއީ އަހަރެން ގަސްތުގަ ކުރާނެ ކަމެއްތަ.. މީ ދެމީހުނަށްވެސް އެންމެ ރަނގަޅުގޮތް ޔަލް.. ޔަލް އާއެކު އުޅުނަސް ޔަލް ދެކެ ލޯބި ނުވަންޔާ އަހަރެންނަށް ޔަލްއަށް ދެވޭނީ ކޮން އުފަލެއް..” ޔާނު އެ ބަސްތަކުން އަހަރެންގެ ހިތް ޒަހަމްވަމުން ދިޔައެވެ.

” ދެން ކީއްވެ ލޯބި ނުވާއިރު ލޯބީގަ ދަޅަ ދައްކައިގެން އަހަރެންނާ އެކު ހުރިހާ ގޮތަކަށް އުޅުނީ… އަހަރެން ހާދަ ލޯބިވެޔޭ ޔާމިންދެކެ… ޔާމިންދެކެ ލޯބި ވާވަރުން އަހަރެންނަށް ބޮޑެތި ފާފަތަކަށްވެސް އަރައި ގަނެވުނީ.. މިއަދު އަހަރެންގެ އަތުގަ ނެތް އެކަށްޗެއްވެސް…  ޔާމިން ބޭނުންވީ އަހަރެން ޔޫސް ކޮށްލަންދޯ.. އެ ބޭނުން ފުދުނީމަ ދޯ ރުޅިވީ..” އަަހަރެން ރުޅިގަދަވާން ފެށިއެވެ.

” ޔަލް ބުނަން ވާހަކައެއް އެކަން ކުރީ ހަމަ އެކަނި އަހަރެން ބޭނުންވެގެން ގަދަ ކަމަކުން ނޫނެއްނު.. ޔަލްވެސް ކުރަން އެއްބަސްވެގެން ދޯ.. ސޯ ޔޫސް ކުރިއެކޭ ޔަލް އަކަށް ނުބުނެވޭ..” ޔާނުގެ  ތަންކޮޅެއް ބާރަށް ބުނެލިއެވެ.

” ޔާމިން ތިހާ ބޮޑަށް ބަދަލް ތި ވީ ސަބަބު ބުނެބަ… އަހަރެންނަށްް އެވަރަށް ލޯބި ނުދެވެނީތަ… ޔާމިން ބުނީމެއްނު ގޮސްފަ މެރީ ކުރާވާހަކަވެސް ދައްކާނަމޭ… ދެން ކީއްވެތަ؟ އަހަރެންގެ ހިތް ގަބޫލެއް ނުކުރޭ މި ހުރިހާ ދުވަހު ޔާމިން އުޅުނީ ލޯބި ވާކަމަށް ހެދިގެން ކަމަކަށް… ސަމާސަ ކުރަނީ ދޯ ތި.. އަހަރެން އެ ރޭ އެކަން ނުކުރަން އުޅެން ފެށީމަ ބުނީމެއްނު ޓްރަސްޓް ކޮށްބަލާށޭ.. ދެން ކީއްވެތަ އަޅެ… ހެޔޮ ނުވާނެ އަހަރެންނަށް ތިހެން ނުހަދާ.. އަހަރެންނަކަށް ޔާމިންއާ ނުލާ ނޫޅެވޭނެ..” އަހަރެންނަށް ރޮވެން ފެށުނެވެ.

” ޔަލް ސޮރީދެން.. އަހަރެންވެސް އުންމީދެއް ނުކުރަން މިހެން ވާނެ ކަަމަކަށް..” އެހެން ބުނުމަށް ފަހު ޔާނު ފޯނު ކަނޑާލިއެވެެ. އަހަރެން ޔާނުއަށް ގުޅަން ވަރަށް މަސައްކަތް ކުރީމެވެ. ނަމަވެސް ޔާނު އަހަރެންެ ބުލޮކް ކޮށްލިއެވެ.  ޔާނުގެ ހަަމަ އެއްވެސް ވަރަކަށް އަހަރެންދެކެ ލޯބި ނުވަނީ ހެއްޔެވެ؟  އަހަރެން ރޮއެ އާދޭސް ކުރާއިރުވެސް އެ ހިތަށް އެއްވެސް އަސަރެއް ނުކުރަނީ ހެއްޔެވެ.

” ބޭބީ އަޅެ އަހަރެންނާ ވާހަކަ ދައްކަބަ.. ދެމީހުން ވާހަކަ ދައްކައިގެން ހިތްހަމަ ނުޖެހޭ ކަމެއް  އޮތިއްޔާ ރަނގަޅު ކުރާނީ.. އަހަރެންނަށް އިނގޭ ބޭބީވެސް އަހަރެންދެކެ ލޯބިވާކަން.. ހަމަ އެހާ ފަސޭހަތަ ތިހެން ބްރޭކްއަޕްވާން” އަހަރެން މެސެންޖަރއިން ޔާނުއަށް މެސެޖެއް ކޮށްލީމެވެ.

” ޔަލްއަށް އިނގޭތަ އަހަރެން ބްރޭކްއަޕްވި އަސްލު ސަބަބު” ޔާނު ރިޕްލައި ކޮއްލިއެވެ.

 ނުނިމޭ