ދެބަދުނާމް

( ތޭރަވަނަބައި )
ތަކުރުބޭ ހިނަވައި ކަފުންކުރުމަށްޓަކައި އެ ހަށިގަނޑު ގެންދިޔައީ ތަކުރުބޭގެ ގެއަށެވެ. ސެނާވެސް އޭނާގެ މާމަގެއަށް ބަދަލުވިއެވެ.
އަނިޔާވެރިކަމާއިރަހުމުކުޑަކަމުން ފުރިގެންވާފަދަގޮތަކަށް މަރާލާފައިވާ ތަކުރުބޭގެ މަރުގެ ޚަބަރު ރަށުތެރެއަށް ފެތެރުމާއެކުހެން މީހުންތައް ބިރުން ތެޅިފޮޅޭން ފެށިއެވެ. ހިތްބަލިމީހުން ރޮއިރޮއިފައި އެވާހަކަދައްކަމުން އެމީހުންގެ ޢާއިލާމީހުން ކޮބައިތޯ ބަލަމުންދިޔައިރު ހިތްވަރުހުރި ބައެއްމީހުން ރަށުތެރެއަށްނުކުމެ މީހުންތައްހަމައަކަށްއެޅުވޭތޯ މަސައްކަތްކުރަމުން ހިތްވަރާ ނަސޭހަތްދެމުންދިޔައެވެ.
ތަކުރުބޭގެމޫނުފެނުނު އެންމޭންނާއި އެކަމާބެހޭ ފުރިހަމަމަޢުލޫމާތު ލިބިފައިވާ އެންމޭންވެސް ބުނަމުންދަނީ ތަކުރުބޭގެމަރަކީ އިންސާނަކު ގަސްދުގައިކޮށްފައިވާ ކަމެއްކަމަށް ގަބޫލު ނުކުރެވޭކަމަށެވެ. ހަމައެހެންމެ އެއްވެސް މީހަކަށް އެހެން މީހަކާމެދު އެފަދަރަހުމުކުޑަ އަމަލެއްކުރާން ނުކެރޭނެކަމަށެވެ. އަދި އެއީ މީހަކު ކޮށްފައިވާ ކަމެއްނަމަ އެކަމާގުޅުންހުރި ކޮންމެވެސް ހެއްކެއް ފެންނާން ހުންނާނެކަމަށެވެ.
ތަކުރުބޭގެ މަރުގެ ޚަބަރު ލިބުމާއެކުހެން ބޮޑުކަތީބު ވަޖީހާއި ކުޑަކަތީބު ފާރިސް ތަކުރުބޭމެން ގެއަށްދިޔައެވެ. އަދި ވެގެންއުޅޭގޮތް އޮޅުންފިލުވިއެވެ.
ތަކުރުބޭގެ މަރުގެސަބަބުން ރަށުތެރެއަށް ވެރިވެފައިވާ ހަމަހިމޭން ކަމާއި މާޔޫސްކަމާއެކު ވަގުތުތައް ފާއިތުވަމުންއައިސް އާދުވަހަކަށްއިރުއަރައިފިއެވެ. ރޭގައި މަރުވި ތަކުރުބެ ހިނައިވައިކަފުންކޮށް ވަޅުލީ ހެނދުނުއެވެ.
އާދަޔާހިލާފުގޮތަކަށް ޖުމާނާ މަރުވުމުން ސެނާ އާއި ރިސާމަށް ލިބުނު ހިތާމަޔާހިތްދަތިކަމަށް މާގިނަދުވަހެއް ނުވަނީސް އެކަމުގެ އަސްލުހޯދައި، އެޢާއިލާއެކަމުން ސަލާމަތްކުރުމަށް މަސައްކަތްކުރަމުންދިޔަ ތަކުރުބޭވެސް މަރުވީއެވެ. އެފަދައިން ކަންތައްވުން ވެގެންދިޔައީ ރިސާމުގެ ހިތާމައާއި ހިތްދަތިކަން އިތުރުވެގެންދިޔަ ކަމަކަށެވެ.
ރިސާމުގެ ގެއަށް ދިމާވެފައިވާ ނުރައްކަލުން އެއާއިލާ ސަލާމަތް ކުރާން އުޅުމުގެތެރޭގައި ތަކުރުބެ މަރުވުމުން ރަށުބައެއްމީހުންގެ ނަފްރަތުގެ ބެލުންތަކާއި ނުރުހުމުގެ ބަސްތައް ރިސާމަށް އަމާޒުވަމުންދިޔައެވެ. އެހެނަސް މިއަދަކު އޭނާއަކަށްވެސް ކުރެވޭނެކަމެއްނެތެވެ.
ޖުމާނާގެ މަރާއި ތަކުރުބޭގެ މަރާމެދު ވިސްނާ ފިކުރުކުރަމުންދިޔަ ރިސާމުގެ ވިސްނުން އެންމެފަހުންހުއްޓުނީ ގިފިލިތެރޭގައިވާދެރުކަށެވެ. އެއްކާށިން ފަޅާފައިވާ އެދެރުކާއި ގިފިލިތެރޭގައި ހިނގާފައިވާއެދެމަރާ ގުޅުމެއްވާކަމުގައި ރިސާމަށް ގަބޫލުކުރެވޭން ފެށިއެވެ. ރިސާމަށް އެފަދައިން ގަބޫލުކުރެވޭންފެށީވެސް ސަބަބެއް ނެތިއެއްނޫނެވެ. އެ ގިފިލިތެރޭގައި ހިނގާދިޔަ އާދަޔާހިލާފު އަނިޔާވެރި ދެމަރުވެސް ހިނގާފައިވަނީ އެކާށިން ދެރުއްފެޅިފަހުންނެވެ. ހަމައެހެންމެ އެއިން ކޮންމެމަރެއްގެފަހުން އެދެރުކުގެ ފަންތަކުން ލޭ ފެނިފައިވެއެވެ.
ތަކުރުބޭ މަރުވުމުން އެއާއިލާއަށް ލިބުނު ހިތާމައާއި ހިތްދަތިކަމާ އެކު ވަގުތުތައް ފާއިތުވަމުންދިޔައެވެ.
ރަށުގެ މަދުބައެއްގެ ފަރާތުންނަމަވެސް ރިސާމަށް ކުރިމަތިވަމުން ދިޔަ ނުރުހުމުގެ ބަސްތަކާއި ނަފްރަތުގެ ބެލުންތަކަށް ކެތްނުކުރެވުމުން ރިސާމު ގޮސް ތަކުރުބޭގެ ޢާއިލާ މެންބަރުންނާއި ބައްދަލުކޮށް މަޢާފަށް އެދުނެވެ.
ރަށުގެ މަދުބައެއްގެ އަމާލާއި ބަސްމަގު އެހެންހުރި ނަމަވެސް، ޙަޤީޤަތް ގަބޫލުކުރާ އެޢާއިލާއިން ރިސާމަށް މަޢާފްކުރިއެވެ.
ވަގުތުތައް ފާއިތުވަމުން އިރުއޮއްސޭވަގުތު ގާތްވަމުން ދާވަރަކަށް ރަށުތެރެއަށް ވެރިވަމުންދިޔަ ހަމަހިމޭންކަމާއި ފަޅުކަން އިތުރުވަމުން ދިޔައެވެ. ހަމައެހެންމެމީހުންގެ މޫނުމަތިން ފެންނަމުންދާ ނުތަނަވަސްކަމާއި ކަންބޮޑުވުން އިތުރުވަމުންދިޔައެވެ.
އޮއްސުނުއިރާއެކުހެން މަގުތަކުން މީހުންފެނުން ވަރަށް މަދުވެއްޖެ އެވެ. މިސްކިތާއިދިމާއަށްދާ މަދުމީހަކު ފިޔަވާ އެހެންމީހަކު ނުވެސްފެނެއެވެ.
ޖުމާނާގެ މަރާއި ރިސާމުގެ މަރާމެދު ވިސްނާ ފިކުރުކުރަމުންދިޔަ ރިސާމަށް ދެން ހަދާނެގޮތްހުސްވެ ހަތަރުއުދަރެސް ފެނުޖެހޭވަރު ވެއްޖެއެވެ. ހަމައެހެންމެ ކެތްތެރިކަން ކޮޅުންލައިފިއެވެ. އަދި ގިފިލިތެރޭގައިވާދެރުކާމެދު ގޮތެއް ނިންމާންލަސްވެއްޖެ ކަމުގައިވެސް ނިންމިއެވެ.
އެމީހުން ދިރިއުޅެމުންދާ ގެއާއިދިމާއަށް ރިސާމު ހިނގައިގަތްއިރު ވަގުތާއި ހާލަތު އޭނާއަށް ނުވެސްވިސްނޭ ކަހަލައެވެ.
ރަށުތެރޭންނާއި މަގުތަކުން ފެންނަމުންދާ ހަމަހިމޭންކަމާއި ފަޅުކަމަށް މާބޮޑު ސަމާލުކަމެއްނުދީ ރިސާމު ދިޔަގޮތަށްގޮސް ގެއަށްވަދެ، ހޮޅިބުރިތަކާއި ބޮކިތައް ދިއްލާލިއެވެ.
ގިފިލިތެރެއަށް ވަދެގެންދިޔަ ރިސާމުގެ ހިތުގައި ޖުމާނާގެ މަރާއި ތަކުރުބޭގެމަރު ފިޔަވާ އެހެންއެއްވެސްއެއްޗެއް ނުވާކަހަލައެވެ.
ރިސާމުހުރީ ގިފިލިތެރޭގައެވެ. ގިފިލިތެރޭގައި ހިނގާފައިވާދެމަރާ އެތަނުގައިވާ ދެރުކާއި ކޮންމެވެސް ގުޅުމެއް ވާކަމުގައި ރިސާމުގެ ހިތްބުނަމުންދިޔަ ކަހަލަ އެވެ. ކުޑައިރުކޮޅަކު ހިމޭނުން ހުރުމަށްފަހު ވަށައިގެން ހޯދާލަމުން ހިނގައިގަތް ރިސާމު ދިޔަގޮތަށްގޮސް މަޑުކުރީ އެދެރުއް ކައިރީގައެވެ. އަދިވަރަށް ސަޢުޤުވެރިކަމާއެކު ދެރުކާއި ދިމާއަށް ބަލާލަމުން ގުދުވެ ދެރުކުގައެކުގައި ކަހަލަގޮތަކަށްހިފިއެވެ. އޭނާ މަސައްކަތްކުރީ ދެރުއް އެކުގައި އުފުރާލާށެވެ.
ވަރަށްގަދައަށް ވިދާލުމާއެކުހެން ބާރުގުގުރިއެއްގެ އަޑު އިވުނެވެ. އެއީވިއްސާރަވުމުގެ އަލާމާތަކަށްވާތި ރިސާމު އެކަމަކަށް އަޅައެއްނުލައެވެ. އޭނާ އުޅުނީ އެ ދެރުއް އުފުރާލެވޭތޯއެވެ. ވަރަށްހިތްވަރާއެކު އެދެރުއް އުފުރާލުމަށް މަސައްކަތްކުރަމުންދިޔަ ރިސާމު ސިއްސައިގެން ދިޔައީ އޭނާއާ ވަރަށްގާތުން ތުއްތުތުއްތު ކުއްޖަކު ރޮއިގަތް އަޑު އިވުމުންނެވެ. އެއާއެކުހެން އެމަސައްކަތް ހުއްޓާލުމަށްފަހު ވަށައިގެން ހޯދާލެވުނީ އެއްވެސް އިހްތިޔާރަކާ ނުލައެވެ. އެހެނަސް އެތަނަކުން އެކަމާގުޅުންހުރި އެއްވެސްކަމެއް ނުފެނުނެވެ. އެހެންވެ ރިސާމު ނިންމީ އެއީ ކައިރިގެއަކުން އިވުނުއަޑެއް ކަމަށެވެ.
ރިސާމު އޭނާގެ މަސައްކަތާއިގެން ކުރިޔަށްދިޔައެވެ. ކުއްލިއަކަށް ކަހަލަގޮތަކަށް ރުކުގެފަންތައް ވަރަށްގަދައަށް ތެޅިލުމަށްފަހު ދެރުއް ދޭތެރޭން ބިންގަނޑު ފަޅާފައިނުކުތް އަތަކުން ރިސާމުގެކަރުގައި ހިފިއެވެ. ސަލާމަތަށްއެދި ރޮމުން ހަޅޭލަމުން ވެސް ރިސާމު މަސައްކަތް ކުރަމުންދިޔައީ އެއަތް އޭނާގެ ކަރުން ނައްޓާށެވެ. ނަމަވެސް ކަރުބެދިފައިވާތީ ރަނގަޅަކަށް އަޑެއް ނުނިކުމެއެވެ. ކުއްލިއަކަށް ކަހަލަގޮތަކަށް ރިސާމުގެ ކަރުބުޑުން ނުކުތް ވޭނީއާހެއްގެ އަޑާއެކުހެން ރިސާމުގެ ނޭވާހޮޅި ބުރިވެގެންދިޔައެވެ. އެއާއެކުހެން ރުކުގެފަންތަކަށާއި މުޅިހިސާބަށް ލޭބުރައިގެންދިޔައެވެ. އިސާހިތަކު ރިސާމުގެ ނޭވާހުއްޓި އޭނާ މަރުވެއްޖެއެވެ.
ގޭގައި ހިނގާދިޔަ ހާދިސާތަކުގެ ސަބަބުން ސެނާއަކަށް ގެއަށް ދާކަށް ނުކެރުނެވެ. އެހެންވެ އޭނާ އުޅެމުންދިޔައީ އޭނާގެ މާމަ ގޭގައެވެ.
ރިސާމު ހޯދުމަށްޓަކައި ވަދީފާއި ފިރާސް، ޖުމާނާމެން ގެއަށް ދިޔައީ އަށެއްޖަހާކަން ހާއިރެވެ. އެހެނަސް އޭރު އޭނާ ގެއަކުނެތެވެ.
ނުނިމޭ