ކޮންމެ ވިންދެއްގައި… (4 ވަނަ ބައި)

ފަތިހު މެސެޖްކުރިފަހުން ނާއިލްގެ ޚަބަރެއް އަދި ނުވެއެވެ. ހިތްނުތަނަވަސް ވިއެވެ. ނަމަވެސް ދެވަނަ ސިކުންތުގައި އަހަރެންގެ ތުންފަތައް ހިނިތުންވުން ވެރިވީ ނާއިލް އުޅޭނީ އަހަންނަށް ދޭންބުނި ސަޕްރައިޒް ތައްޔާރުކުރުމުގައި ކަމަށް ހިތައް އެރުމުންނެވެ. އެކި ޚިޔާލުގައި ހުރެ ގަޑި ޖެހުމުން ފްލައިޓަށް އަރާ ހަމަޖެހިލަމުން މޭގައި އަތް އަޅާލެވުނެވެ. ފަހަރަކަށްވުރެ ފަހަރެއް އަވަސްވަމުންދިޔަ އަހަރެންގެ ހިތްހަމަޖެހިލާތޯއެވެ.

އަހަންނަށް މާލެ ދެވުނީ ހަތަރެއް ޖަހަން ގާތްވެފައިވަނިކޮށެވެ. ދޮންތައާއި ދޮންތަބޭއާއެކުގައި އެމީހުންގެ އެޕާޓްމެންޓަށް އައިސް ވަދެވުނުއިރު އަހަރެންހުރީ ވަރަށް ވަރުބަލިވެފައެވެ. ތިން ކޮޓަރީގެ އެޕާޓްމެންޓްގައި ދޮންތަގެ ދެމަފިރިންގެ އިތުރުން ދެން އުޅެނީ ކިޔަވަން އައިސް އުޅޭ އަހަރުމެންރަށު 2 ފިރިހެންކުދިންނެވެ. ވަގުތީ ގޮތުން ދެ ފިރިހެންކުދިންނަށް އެއްކޮޓަރިހަމަޖެއްސުމަށްފަހު ދޮންތަ ހުރީ އަހަރެން އަންނާތީ އަނެއްކޮޓަރި އަހަންނަށް ތައްޔާރުކޮށްދީފައެވެ.

ކޮޓަރިޔަށްވަދެވުމާއެކު ވެފައިހުރި ވަރުބައްޔާއެކު ވަރުދެރަ ލޮލަކުން އަހަންނަށް ބަލާލެވުނީ އެނދާދިމާއަށެވެ. އެހެނަސް ފުރަތަމަ އަހަރެން ވަނީ ފެންވަރާލާށެވެ. ނިކުމެ ތައްޔާރުވެލައިގެން ދޮންތައާއެކީގައި ބަދިގެޔަށްވަނީ ހައިވެފައި ހުރި ބަނޑަށް ކާއެއްޗެއްލުމަށެވެ. ސައިގެ ތެރެއިން އަހަރެން ބޭނުންވީ ދޮންތަކުރެން މިރޭ ބޭރަށް ދިޔުމުގެ ހުއްދަ އަތުލާށެވެ. އެހެނަސް ދޮންތަބޭ އިނުމާއެކު ފަސްޖެހެވުނު ނަމަވެސް ވަރަށް ހިތްވަރުކޮށްފައި މިރޭ ބޭރަށްދިޔުމުގެ ހުއްދައަށް އެދުނީމެވެ.

ހުއްދަ ދެމުން ދޮންތަ އަހަންނަށް ބަލާލީ ވަރަށް ތަފާތު ނަޒަރަކުންނެވެ. ހީވީ އަހަރެންގެ ކަންތައް އިނގިގެން ބަލާލިހެންނެވެ. އަހަރެންގެ ނިތްކުރިމަތިން ދާތިކިތައް ވިދަންފެށީ ހާސްވީވަރުންނެވެ. އެހެނަސް އެކަން ނުދައްކާވޭތޯ ވަރަށް މަސައްކަތްކުރީމެވެ. ކާމިޔާބުވާނެކަމުގެ އުންމީދެއްނެތަސް ވެހެވެ. އެހެނީ އަހަރެންގެ ދޮންތައަކީ އަހަރެންގެ މޫނުމަތީގެ ކުލަވަރު އަހަރެންގެ މަންމައަށްވުރެ މާ ރަނގަޅަށް ދެނެގަންނަ މީހެކެވެ. އަހަރެންގެ ކަންތައް ދުވަހަކު ދޮންތައަށް ފޮރުވޭކަމަކަށް ނުވެއެވެ. އެހާވަރަށް ދޮންތަ އެހުންނަނީ އަހަރެން ހިތުދަސްކޮށްގެނެވެ.

އަހަންނަށް ކޮޓަރިއަށް ވަދެވުނުއިރު މަޣްރިބްނަމާދު ބަންގީގެ އަޑުއިވެއެވެ. ސައިންނިމިގެން ރަށުކުދިންނާ ވާހަދައްކާލުމަށް ސިޓިންރޫމުގައި މަޑުކޮށްލެވުމުން މިހާ ވަގުތުދިޔައީއެވެ. އަވަހަށް ވުޟޫކޮށްލައިގެން އައިސް ނަމާދުކޮށްލީމެވެ. އެނދުގައި ކުޑަކޮށްހަމަޖެހިލަމުން އަހަރެންގެ ފޯނަށް ނަޒަރު ހުއްޓާލީމެވެ. އަހަރެން ހައިރާންވިއެވެ. ކޮންމެ ނަމާދަކަށް އަހަންނަށް ހަނދާންކޮށްދޭ އަހަރެންގެ ނާއިލް ކޮބައިހެއްޔެވެ؟ ގަޑިޔަކު އެއްފަހަރު އަހަރެން އުޅޭ ގޮތެއް ބަލައިލަން ގުޅާ އަހަރެންގެ ލޯބިވާ ކޮބައިހެއްޔެވެ؟ ފަތިހު އެކުރި މެސެޖަށްފަހު އެއްވެސް ހަބަރެއްނުވެއެވެ. އެންމެ ކުޑަމިނުން ގުޅާފައިނެއްތާނގައި މެސެޖެއްވެސް ނެތެވެ. އަހަރެން ވައިފައި ޖައްސާލުމަށްފަހު ވައިބަރ ކަނެކްޓް ކޮށްލީމެވެ. ރޭ 11 ޖެހިއިރު އޮންލައިންވިފަހުން އަދި އޮންލައިން ވެފައެއްނެތެވެ.

އަހަރެން ހާސްވާންފެށިއެވެ. އެހެނަސް ގޯސްގޮތަކަށް ނުވިސްނާވޭތޯ މަސައްކަތްކުރީމެވެ. ޔަގީނެއެވެ. އަހަރެންގެ ނާއިލްވާނީ މިރޭގެ ސަޕްރައިޒަށް ތައްޔާރުވުމުގައެވެ. އެހުންނަނީ މިރޭ ދިމާވުމުގެ ކުރިންނުގުޅާށެވެ. މައްސަލައެއް ނެތެވެ. އަހަރެންވެސް ނުގުޅާނަމެވެ. ކެތްކޮށްލައިގެން ހުންނާނީއެވެ.

“އީޝަލް” އެޚިޔާލުގައި އިންދަ އަހަރެން ސިއްސައިގެން ދިޔައީ ދޮންތަގެ އަޑުންނެވެ. އަހަރެން އަވަސްއަވަހަށް ހަމަޖެހިލަމުން ލައްބައޭ ބުނެލީމެވެ. “ދޮންތައަށް ކިޔައެއްނުދޭނަންތަ؟” މާތްކަލާކޯއެވެ. ހަމަ ރަނގަޅަށްވެސް ދޮންތަމިއައީ އަހަރެންގެ ސިކުނޑިއަށްވަދެ ހުރިހާއެއްޗެއް ކިޔައިގެންނެވެ. އަޅެފަހެ ޖިންނިއަކަށްވުރެ އެންމެ ތަންކޮޅެއްވެސް ދެރަހެއްޔެވެ؟ މިޖެހުނީ ހުރިހާވާހަކައެއް އަކުރުން އަކުރަށް ކިޔައިދޭށެވެ. އެނދު ހުރަހަށް ބަންޑުން އޮށޯވެލަމުން އަކުރުތަކަށް ބާރުލާފައި ދޮންތައަށް ގޮވައިލީމެވެ. ދޮންތައައިސް އަހަންނާއި ކައިރީގައި އިށީންދެ ހަމަޖެހިލިއެވެ.

“ދޮންތާ!” ހުރިހާ ވާހަކައެއްކިޔައިދީ ނިންމާފައި ދޮންތަ ފަރާތުން އެއްވެސް އިޝާރާތެއް ނުވެގެންބަލާލިއިރު ދޮންތަ ފާޑަކަށް ހައިރާންވެފަ އިނުމުން އަހަންނަށް ގޮވާލެވުނީ ތަންކޮޅެއްބާރަށެވެ. ދޮންތަ ސިހިފައި އަހަންނަށް ބަލާލިއެވެ. އަހަރެން ތެދުވެ ތިރިއަށް ދެފައިބާލައިގެން ދޮންތަކައިރީގައި އިށީންދެލީމެވެ. ދޮންތަ ބުނަން އުޅޭ އެއްޗަކަށް ސަމާލުވުމުގެ ގޮތުންނެވެ.

“ތިގޮތައް ނުވެސް ފެންނަ މީހަކަށް އިތުބާރުކުރަން ވެދާނެތަ؟ މިއީ ނުލާހިކު ގޯސްމީހުން އުޅޭ ޒަމާނެއް. ތިގޮތައް ނުދަންނަ މީހުންނާ ގުޅިގެން ބައްދަލުކުރަންދާތަނުން ކިތައްމެ ކުއްޖަކަށް އެބަހުރި ނުލާހިކު ދެރަގޮތް ދިމާވެފަ. ދޮންތައަކަށް ނުކެރޭނެ ކޮއްކޮ އެކަނި ފޮނުވާކަށް.” ދޮންތަ އެހެންބުނެލީ ހާސްވެފައި އިނދެއެވެ.

މިޖެހުނީ އަނެއްކަ އަނެއް ކަންތަކެވެ. އަހަރެން ދޮންތަ ރުއްސާނީ ކިހިނެއްހެއްޔެވެ؟ ދޮންތަ ނުކުރިޔަސް އަހަރެން އަހަރެންގެ ނާއިލްއަށް ފުރިހަމަ އިތުބާރުކުރަމެވެ. އަހަރެން ނާއިލްއާ ބައްދަލުކުރާނަމެވެ. ނާއިލް އެއީ އެހެންމީހުން ފަދަ ނުބައި މީހެއްނޫނެވެ. ކުޑަކުއްޖެއް ފަދައިން އަހަރެން ދޮންތަ ކައިރީގައި ކުސްތަޅަންފެށީމެވެ. ދޮންތަ އަހަންނަށް ވަރަށް ނަސޭޙަތްދިނުމަށްފަހު ދޮންތަބޭ އާއެކުގައި ފޮނުވަން އެއްބަސްވިއެވެ. އެހެނަސް ދޮންތަބޭ ހުންނާނީ މީހަކަށް ފާހަގަނުވާނެހާ އަހަންނާއި ދުރުގައެވެ. ދޮންތަ ގޮތްދޫނުކުރާނެކަން އެނގުމުން އަހަރެން އެއްބަސްވީމެވެ.

ޢިޝާ ނަމާދުކޮށްލައިގެން އަހަރެން ފެންވަރަންވަނީ ނާއިލްއާއި ބައްދަލުކުރަންދިޔުމަށް ތައްޔާރުވުމަށެވެ. ވަރަށް ގިނައިރުން ނަލަހެދިގެން އަހަންނަށް 9 ޖެހުމުގެ 15 މިނެޓްކުރިން ތައްޔާރުވެވިއްޖެއެވެ. ދޮންތަބޭ އަށް ގޮވާލުމަށްފަހު އަހަރެން ބޭރަށް ނިކުތްއިރު ދޮންތަ އެތެރޭގައި ހުރެ ހަނާއަޅާލިއެވެ. އަހަރެން ހިތްއަވަސްފައިހުރެ ޓެކްސީއަށް އެރިއިރު ދޮންތަބޭ ފަހަތުން ސައިކަލު ސްޓާޓް ކޮށްލިއަޑު އިވުނެވެ.

9 ޖެހިއިރު އަހަރެން އިނީ ފްލެމިންގޯ ރެސްޓޯރެންޓްގައެވެ. ނާއިލްގެ އިންތިޒާރުގައެވެ. އޭރު ދޮންތަބޭ އަހަންނާއި ދުރުގައި މީހަކަށް ކަމެއްފާހަގަ ނުވާނެހެން ހަމަޖެހިލަގެން އިނެވެ. އެހެނަސް އަދި ނާއިލްގެ ހަބަރެއް ނުވެއެވެ.

“އީޝަލް” މާޔޫސްވެފައި އިންދައި އަހަންނަށް ފަހަތް ބަލާލެވުނީ ފަހަތުން އަހަރެންގެ ނަމުން ގޮވާލި އަޑު އިވުމުންނެވެ.

-ނުނިމޭ-