ވަޓް ޑިޑް ޔޫ ވޯންޓް؟ އެގަނޑީ ބިޒީތޯ އަހާލީމަ.” ޒިވްޔާ މަޑުމަޑުން ބުނެލިއެވެ. އެއާއެކު އިޒިކިއަލަށް މަޖުބޫރުވީ އޭނާގެ އަނގައިގެ ކޮލުގައި ދަތް އަޅާލާށެވެ. ޒިވްޔާ އިސްވެ ވާހަކަ ދެއްކުމުން އޭނާއަށް ކުރި އަސަރާއި، އެހިނދު ތުންފަތްމައްޗަށް ވެރިވާން އުޅުނު ހިނިތުންވުން ފޮރުވާލާށެވެ.
“ކަމެއްވީކީ ނޫން. ޒިވްސް ލެޕްޓޮޕަށް ގެއްލިފަ އިން ގޮތުން ހަމަ އަހާލީ.” އިޒިކިއަލް ދޮރުގައި ލެނގިލިއެވެ.
==========================
ދުރުދުރުން ހިނގާލާފައި އައި އައިކަނަށް ޒިވްޔާ ފެނިފައި ހުއްޓުން އެރިއެވެ. ޒިވްޔާ ހުރީ އިޒިކިއަލާއި ވާހަކަ ދައްކާށެވެ. އެއީ މިހާރަކަށް އައިސް އައިކަނަށް ވަރަށް ވެސް ގިނައިން ފާހަގަ ވާ ކަމެކެވެ. ޒިވްޔާ އާއި އިޒިކިއަލްގެ ދެމެދުގައި ކޮންމެވެސް ކަހަލަ ގުޅުމެއް ވާ ކަމެވެ. މިއަދު ވެސް ހުސް ކްލާސްރޫމެއް ތެރޭގައި ޒިވްޔާ އެއިނީ އިޒިކިއަލް އޭނާގެ އެސައިންމެންޓްތަކާ މެދު ޝަކުވާ ކުރާ އަޑު އަހާށެވެ.
އޭރު ޒިވްޔާގެ ތުންފަތްމަތީގައި ފަނޑު ހިނިތުންވުމެއްވިއެވެ. އާއެކެވެ. ޒިވްޔާ ހުރީ ހިނިތުންވެލައިގެނެވެ. އައިކަންގެ ފިޔަވަޅުތައް މަޑު ޖެހުނެވެ. ޒިވްޔާގެ އެ ރީތި ހިނިތުންވުން ފެނިފައި ހަމަ ރަނގަޅަށް ވެސް އޭނާގެ ހިތަށް އެނގުން ވެލައިފިއެވެ. ނަމަވެސް އޭނާގެ ދެއަތް މުށްކެވިގެން ދިޔައީ އެ ހިނިތުންވުން އަމާޒުވެފައިވަނީ އޭނާއަށް ނޫންވީމައެވެ. އެ ހިނިތުންވުމުގެ ބަލަދުވެރިއަކަށް އިޒިކިއަލް ވާންވީ ކީއްވެ ހެއްޔެވެ؟ އޭނާ އިރުކޮޅެއް ވަންދެކަށް އެމަންޒަރު ބަލަހައްޓައިގެން ހުއްޓެވެ.
އެއްލިކަޅިއަކުން އިޒިކިއަލަށް ދޮރުދޮށުގައި ހުރި އައިކަން ފެނުނެވެ. އޭނާ ދައްކަމުން ދިޔަ ވާހަކަ މެދުކަނޑާލަމުން އެއްބުމަ އަރުވާލީ އައިކަން އެމީހުނާއި ދިމާއަށް ހިނގައިގަތުމުންނެވެ. އެއާއެކު އިޒިކިއަލްގެ ހިތުގެ ކަނަކުން ސިގްނަލް އަޅަންފެށިއެވެ. ނަމަވެސް އޭނާ އެކަމެއް މޫނުމައްޗަކުން ހާމައެއް ނުކުރިއެވެ.
އައިކަން އައިސް ހުއްޓުނީ ޒިވްޔާ އާއި އިޒިކިއަލާއި ދެމީހުން ކުރިމަތީގައެވެ. “ކޯއްޗެއްތަ އެހާ މަޖަލީ؟” އައިކަން ބަލާލީ ސީދާ ޒިވްޔާ އާއި ދިމާއަށެވެ. ވަގުތުން ޒިވްޔާގެ ހިނިތުންވުން ފިލައިގެން ދިޔައެވެ. އައިކަނަށް ހީކުރެވުނީ އެ ހިނިތުންވުން ފިލައިގެން އެދިޔައީ ޒިވްޔާ އޭނާ ދެކެ ކުރާ ނަފްރަތުގެ ފުން ކަމުންނެވެ.
ނަމަވެސް ހަޤީގަތަކީ އެއީބާވައެވެ؟ ނޫނެކެވެ. ޒިވްޔާއަށް އައިކަން ފެނުމާއެކު އޭނާގެ ހިނިތުންވުން ފިލައިގެން ދާން ހިނދުކޮޅެއް ވެސް ނުނެގިއެވެ. އޭނާގެ ހިތުގެ ވިންދު އަވަސް ވެގެން ދިޔައިރު އޭނާ ނޭވާވެސް އަވަސްވިހެން ހީވިއެވެ. އޭނާގެ މުޅި ގައިން ހީބިހި ނަގައިގަތްއިރު، ބަނޑުތެރޭގައި ކޮކާ އުދުހެން ފެށިހެން ހީވިއެވެ. އެ އަސަރުތަކަކީ މިހާރު އޭނާއަށް އާ އެއްޗެއްސެއް ނޫނެވެ. އޭނާއަށް އެހެން ވާނީ ހަމައެކަނި އެންމެ މީހެއް ފެނުމުންނެވެ. އޭނާގެ ހިތް މިލްކު ކުރި ސާހިބެވެ. އައިކަނެވެ. ކިތަންމެ ވަރަކަށް އޭނާއަށް އެ އިހުސާސްތަކާއި ކުރިމަތިލާން ޖެހުނަސް ދުވަހަކުވެސް އެޔަކަށް ނުވެ ހޭނެވުނެވެ.
“ނަތިން.” ޒިވްޔާ މަޑުމަޑުން ޖަވާބު ދިނެވެ.
އިޒިކިއަލް ޒިވްޔާއަށް ބަލާލިއެވެ. އެހިނދު އައިކަން ފެނުމުން ޒިވްޔާއަށް ވީ ގޮތް އިޒިކިއަލަށް ވަރަށް ސާފުކޮށް ފެނުނެވެ. ޒިވްޔާގެ ނޭވާ އަވަސްވީގޮތެވެ. ހިންދިރުވާލި ގޮތެވެ. އޭނާގެ ދެކޮނޑު ތެދުކޮށްލެވުނު ގޮތެވެ. އަތުގައި އޮތް ފޮތުގައި އޭނާގެ އިނގިލިތައް ބާރުކޮށްލެވުނު ގޮތެވެ. ޒިވްޔާގެ ދެލޮލުން ފެނުނު ޖަޒްބާތެވެ. އިޒިކިއަލްގެ ހިނިތުންވުން ފިލައިގެން ދިޔައެވެ. އޭނާއަށް ޒިވްޔާގެ ސިއްރު ފަޅާ އަރައިފިއެވެ.
ޒިވްޔާގެ ދެލޮލުން އެފެނުނީކީ ބިރެއް ނޫނެވެ. ރުޅިވެރި ކަމެއް ވެސް ނޫނެވެ. ލޯތްބެވެ. އާއެކެވެ. އިންތިހާ ލޯތްބެވެ. އެތަކެއް ޝަކުވާއެވެ. ވޭނެވެ.
އިޒިކިއަލަށް ހީވީ އޭނާގެ ހިތުގެ ހިނގުން ހުއްޓުން ހެނެވެ. ނަމަވެސް އެއީ ހަމަ ހީވި އެއްޗެކެވެ. ނަމަވެސް އޭނާގެ ހިތުގައި ރިއްސާލި ގޮތަކީ ހީވި ހީވުމެއް ނޫނެވެ. އެއީ ހަމަ ހަޤީގަތެވެ. އޭނާ ވަގުތުން ބޭނުންވީ އައިކަން އެތަނުން ފައްސާލުމަށެވެ. އޭނާއަށް ރަނގަޅަށް އައިކަންގެ ގޮތް އެނގެއެވެ. އައިކަންގެ ހަޤީގަތެވެ.
އިޒިކިއަލް އައިކަނަށް ބުނަން ބޭނުންވިއެވެ. މިތަނުން ހަމަ މިހާރު ދާށެވެ. އައިކަނާއި ކުރިމަތިލާކަށް ޒިވްޔާ އަދި ތައްޔާރެއް ނޫނެވެ. އައިކަން އެހާ ބޮޑަށް ޒިވްޔާއަށް އުނދަގޫ ނުކުރުމަށެވެ. ލިމިޓުގައި ހުރުމަށެވެ. އައިކަން ޒިވްޔާގެ ކައިރިން ޖަވާބުތަކަށް އެދުމުގެ އެއްވެސް ހައްޤެއް ނެތް ކަމެވެ. އެއޯ ޒިވްޔާގެ އެކަނި ހައްޤެއް ކަމެވެ. އެއީ ޒިވްޔާ އާއި ބެހޭގޮތުން އައިކަނަށް ނޭނގޭ އެތައް ކަމެއް އިޒިކިއަލަށް އެނގޭތީއެވެ. ޒިވްޔާގެ ވޭނެވެ.
ނަމަވެސް އިޒިކިއަލް ދެވަނަ ފަހަރަށް ޒިވްޔާއަށް ބަލާލި ހިނދު އޭނާއަށް ހީވީ އޭނާގެ ދުލުގައި ތަޅު އެޅުނު ހެނެވެ. އޭނާއަށް އައިކަނަށް ނޭނގޭ އިތުރަށް ހަޤީގަތެއް ވެސް މިހާރު އެނގޭތީއެވެ. ޒިވްޔާގެ ހިތުގެ ހާލެވެ. އައިކަން ދެކެ ޒިވްޔާ ވާ ލޯތްބެވެ. ޒިވްޔާއަށް ހާމަ ކުރެވޭނެ ވަރަށް ވެސް ބޮޑަށެވެ. ފަހަރުގައި ޒިވްޔާ އައިކަން ދެކެ ލޯބި ވަންޏާ ވާން ޖެހޭނެ ވަރަށް ވުރެ ވެސް މާ ބޮޑަށެވެ. އެކަން އެނގުމުން އިޒިކިއަލަށް ލިބުނީ އިތުރު ވޭނެވެ. ކެކުޅުމެވެ.
އެހެނަސް… އިޒިކިއަލްގެ ހިތުގައި ކިތަންމެ ވޭނެއް އެޅިޔަސް އޭނާއަށް ވަރިހަމައެވެ. އޭނާއަކީ އެހެންމީހުން ފަދައިން ޒިވްޔާގެ ނިންމުންތަކަށް ގޮތް ކިޔާ، ޒިވްޔާ އަށް އެންމެ ރަނގަޅު ގޮތް ކަމަށް ބުނެ ގޮތް ނިންމާ މީހަކަށް ވާކަށް އޭނާ ބޭނުމެއް ނުވިއެވެ. ޒިވްޔާގެ ހިތް އެދެނީ އައިކަނަށް ނަމަ އޭނާއަކީ އެދެމެދަށް ވަންނަން ކާކު ހެއްޔެވެ؟
އައިކަން ގޮނޑިއެއް އޭނާގެ ކައިރިއަށް ދަމާލައި އޭގައި އަތް ވިއްދާލިއެވެ. “ކޮން ކަމަކާތަ ތި ވާހަކަ ދެއްކީ ދެންމެ؟”
“ނަތިން.” ދެންވެސް ޒިވްޔާގެ ޖަވާބަކަށް ވީ އެޔެވެ.
“ތީތަ މިހާރަކަށް އައިސް ޒިވްޔާއަށް ކިޔަން އެނގޭ ހަމައެކަނި ބަހަކީ؟ ނަތިން؟”
ޒިވްޔާ އައިކަނާއި ދުރަށް އޭނާގެ މޫނު އަނބުރާލިއެވެ. އައިކަންގެ ކަތުރުކަށިގަނޑު ވާންވެގެން ދިޔައެވެ. “ޔޫ ހޭވް ބީން އެވޮއިޑިން މީ.” އައިކަން ކައިރިވެލިއެވެ.
މޭޒު އަޑީގައިވި އިޒިކިއަލްގެ ދެއަތް މުށްކެވިގެން ދިޔައެވެ. އޭނާ ބުނަން ބޭނުންވިއެވެ. ހަމަ މިހާރު ހުއްޓާލާށެވެ. ޒިވްޔާއަށް ‘ސްޕޭސް’ ދޭށެވެ.
މިފަހަރުވެސް އިޒިކިއަލް އެއްވެސް އެއްޗެކޭ ނުބުނިއެވެ. ޒިވްޔާއަށް ބޭނުންވަނީ އައިކަން އެތަނުން ދާން ނަމަ، ޒިވްޔާ އަމިއްލައަށް އެކަން އައިކަނާއި ދިމާއަށް ބުނާނެއެވެ. އިޒިކިއަލް ކިތަންމެ ވަރަކަށް އައިކަން ދެކެ ހިތްހަމަނުޖެހުނަސް މިހާރު މިއީ މުޅިން ތަފާތު ހާލަތެކެވެ. ޒިވްޔާ އައިކަން ދެކެ ލޯބިވާ ނަމަ ޒިވްޔާއަށް ގޮތް ނިންމަން ވާނީ ޒިވްޔާ އަމިއްލަ އަށެވެ.
“އަހަރެންނަށް ގޯހަކަށް ކަމެއް ކުރެވުނީތަ؟” އައިކަން ސުވާލު ކުރިއެވެ. އެއާއެކު ޒިވްޔާގެ އިނގިލިތައް އޭނާގެ އަތުގައިވާ ފޮތުގައި އިތުރަށް ބާރުކޮށްލެވުނެވެ.
އެމަންޒަރު އިޒިކިއަލަށް ވަރަށް ސާފުކޮށް ފެނުނެވެ. އޭނާއަށް ޒިވްޔާ ސިއްރު ކުރަމުން ދިޔަ އިހުސާސްތައް ވަރަށް ސާފުކޮށް ފެނުނެވެ. އޭނާ ޒިވްޔާގެ ދަތްދޮޅީގައި ހިފާ އޭނާ އާއި ދިމާއަށް އަނބުރާލަން ބޭނުންވިއެވެ. އަދި ބުނަން ބޭނުންވިއެވެ. ޒިވްޔާ ކިޔައިދޭން ބޭނުން ނުވާ އެއްވެސް އެއްޗެއް އެއްވެސް މީހަކަށް ކިޔާދޭކަށް ނުޖެހޭނެއޭއެވެ. އެއީ އައިކަން ވިޔަހެވެ. އިޒިކިއަލް ބޭނުންވީ ޒިވްޔާ ގޮވައިގެން އައިކަނާއި ވީހާ ވެސް ދުރަށް ދާށެވެ. ނަމަވެސް އެއީ އޭނާއަށް ވާޏެ ކަމެއް ނޫނެވެ. ޒިވްޔާގެ މަޑުމުށި ކުލައިގެ ރީތި ދެލޯ އައިކަނަށް އަމާޒުވެފައި ހުރި ހިނދަކު އެއީ ވާނެ ކަމެއް ނޫނެވެ. އެހިތުގައި އައިކަނަށް އެފަދަ ދަރަޖައެއް ދެވިފައި ވާއިރަކު އިޒިކިއަލަކީ ޒިވްޔާއަށް މުހިންމު މީހަކަށް ނުވާނެއެވެ. އެހެންކަމުން އިޒިކިއަލް އިންގޮތަށް އިނީއެވެ. މަޑުންނެވެ. އޭނާގެ މުޅި ހަށިގަނޑާއި ހިތް ޒިވްޔާ އައިކަންގެ ކިބައިން ރައްކާކުރަން އެދި އަޑު ލަމުން ދިޔައިރު ވެހެވެ.
“ޒިވްޔާ.” އައިކަން ގޮވާލިއެވެ. މިފަހަރު ޒިވްޔާ އިސްއުފުލައި އައިކަނަށް ބަލާލިއެވެ. “ވަޓް؟”
“ކީއްވެތަ މަށާ ވާހަކަ ނުދައްކަނީ؟” އައިކަންގެ ދެލޮލުން ފެނިގެން ދިޔައީ ދިލަ ވޭނެވެ. ޒިވްޔާގެ ތުންފަތް ކުޑަކޮށް ހުޅުވެގެން ދިޔައިރު ހީވީ އެއްޗެއް ބުނަން އުޅުނު ހެނެވެ. ނަމަވެސް އޭނާގެ ދުލަކުން ހަމަ ހިލާ އެންމެ ބަހެއް ވެސް ބޭރެއް ނުވިއެވެ.
އިޒިކިއަލް ދުރަށް ބަލާލީ އޭނާއަށް އިތުރަށް ކެތް ނުވެގެނެވެ. އޭރު އައިކަން މަޑުކޮށްގެން ހުރީއެވެ. ޒިވްޔާގެ ޖަވާބެއްގެ އިންތިޒާރުގައެވެ. ޒިވްޔާ އިސްދަށަށް ޖަހާލި ހިނދު އޭނާގެ އަޑު ބޭރު ވެގެން އައީ ކިރިޔަ ކިރިޔާއެވެ. “ނޭނގެ.” އެއީ ހަޤީގަތާއި އެންމެ ކައިރިކޮށް ވެސް އޭނާއަށް ދެވެން އޮތް ހަމަ އެކަނި ޖަވާބެވެ.
އައިކަންގެ ދެބުމަ ގޮށްޖެހިގެން ދިޔައެވެ. “ނޭނގެޔޭ؟”
ޒިވްޔާ ދެފަރާތަށް ބޯ ހޫރާލިއެވެ. އެއާއެކު އައިކަންގެ ގާތަށް އައީ ހިންޏެވެ. އެ ހުނުމުގައި އެއްވެސް އަސަރެއް ނެތެވެ. އައިކަން ބަލާލީ އިޒިކިއަލަށެވެ. އެއާއެކު އޭނާގެ މަސްނޫޢީ ހިނިތުންވުން ބަދަލު ވެގެން ދިޔައީ ނުރައްކާތެރި ހިނިތުންވުމަކަށެވެ. “އެކަމަކު މީނަޔާ ވާހަކަ ދެއްކޭދޯ.”
އިޒިކިއަލް އައިކަނަށް ބަލާލިއެވެ. ދެމީހުންގެ ދެލޯ ބައްދަލުވީ ހިނދު އިޒިކިއަލްގެ ދެލޮލުގައި ވިދުވަރެއް ދަތުރުކޮށްލިއެވެ. އޭނާ އެއްޗެކޭ ބުނަން ބޭނުންވިއެވެ. ޒިވްޔާ ހެއްވާލުމުގެ ބާރު ލިބުމަކީ ގަދަ ކަމުން ޒިވްޔާގެ ސަމާލުކަން ހޯދުމެއް ނޫން ކަމެވެ. އެހެންނަމަވެސް އިޒިކިއަލް ޒިވްޔާއަށް ބަލާލަމުން އޭނާގެ ދުލުގެ ކުރީގައިވީ ބަސްތައް ދިރުވާލިއެވެ. އެއީ މިއީ އިޒިކިއަލާއި ބެހޭ ކަމެއް ނޫނެވެ. އެއީ ދުވަހަކު ވެސް ވާނެ ކަމެއް ނޫނެވެ. މިއީ އައިކަނާއި ޒިވްޔާ އާއި ދެމެދު ވީ ކަމެކެވެ.
“ޔޫ ކޭން ޓޯކް ޓު ހިމް. ޔޫ ކޭން ސްމައިލް އެޓް ހިމް. ޔޫ ކޭން ލާފް.. ވިތު ހިމް.” އައިކަން އޭނާގެ ވާހަކަ ކުރިއަށް ގެންދިޔައެވެ. “އެކަމަކު އަހަރެން ޒިވްޔާ އާ ވާހަކަ ދައްކަން ފެށީމަ، ޔޫ ސަޑެންލީ ފޮގެޓް ހައު ވޯޑްސް ވޯކް؟”
ޒިވްޔާ އިތުރަށް އިސްޖަހާލިއެވެ. އޭރު އޭނާގެ ތުންފަތް ތުރުތުރު އަޅަން ފަށައިފިއެވެ.
އެމަންޒަރު ފެނިފައި އިޒިކިއަލްގެ މެޔަށް ތަދުވިއެވެ. ޒިވްޔާ އެގޮތަށް ދެކޭކަށް އޭނާގެ ހިތެއް ނޭދެއެވެ. އޭނާ އެންމެ ރުޅި އައީ ޒިވްޔާއަށް އޭނާ ކޮށްދެވޭނެ ކަމެއް ނެތީމައެވެ. އެއީ ޒިވްޔާއަށް ރައްކާތެރިކަން ފޯރުކޮށްދިނުމަކީ ޒިވްޔާ އަމިއްލަ ނިންމުންތައް ނިންމުމުގެ ފުރުސަތު ނިގުޅައި ގަތުން ކަމުގައި ނުވާތީއެވެ. އެއީ ޒިވްޔާގެ ނިންމުމުގެ ސަބަބުން އިޒިކިއަލަށް ކިތަންމެ ވޭނެއް ލިބުނަސް ވެހެވެ. ޒިވްޔާ ދުވަހަކު ވެސް އިޒިކިއަލް އިޚްތިޔާރު ނުކުރިޔަސް ވެހެވެ.
އެންމެފަހުން އައިކަން ފުން ނޭވާއެއް ދޫކޮށްލިއެވެ. “އެންމެ ރަނގަޅު.” އޭނާގެ ހިތުގައި އަޅަމުން ދިޔަ ވޭން ފޮރުވާލަމުން އައިކަން އިތުރަށް ތިރިވެލިއެވެ. ޒިވްޔާ އާއި އެއްވަރަށެވެ. “އެކަމް ހަނދާން ކުރާތި. އައިމް ނޮޓް ގިވިން އަޕް.” އެއާއެކު ޒިވްޔާ އިސްއުފުލައި އައިކަނަށް ބަލާލިއެވެ. އޭރު އައިކަން ހުރީ އެއްމިޔަކަނުން ހިނިތުންވެލައިގެނެވެ. އެދެލޮލުގައި ވާދައިގެ ކުލަވަރެއް އުފެދިފައިވީ ކަހަލައެވެ. އައިކަން ދެން ބުނެލި ބަސްތައް އިވިފައި ޒިވްޔާގެ އަތްފައި ފިނިވެގެން ދިޔައެވެ.
އެބަސްތަކަށް ފަހު އައިކަން އެ ކްލާސްރޫމުން ނުކުމެގެން ދިޔައެވެ. އައިކަން ނުކުމެގެން ދިޔަ ދިމާލަށް ބަލަހައްޓައިގެން ޒިވްޔާއަށް ހުރެވުނީއެވެ. އޭރުވެސް އޭނާގެ ކަންފަތްދޮށޫގައި އައިކަންގެ ބަސްތައް ތަކުރާރު ވަމުން ދިޔައެވެ. ހާއްސަކޮށް އެންމެފަހު ބަހެވެ.
“އައި ވިލް ގެޓް ޔޫ ޓު ޓޯކް ޓު މީ އެވެންޗުއަލީ، ޑަރލިން.”
=====================
އުންމީދު ކުރަން މިބައި ވެސް ކިޔުންތެރިންނަށް ކަމުދާނެ ކަމަށް.
ޝައިމްސް
މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.
Other Articles
