“ޒާޔާ. ކިހިނެތް ހަދަން ތިއުޅެނީ؟” ހަސްނައިން އަހައިލިއެވެ. ޒާޔާ ބަލައިލީ ޒާމިލްއަށެވެ. އަދި ޒާމިލް އަޅައިގެން ހުރި ޔުނީފޯމަށް ބަލައިލިއެވެ. އެވަގުތު އޭނާގެ ތުންފަތަށް މާނަފުން ހިނިތުންވުމެއް ވެރިވިއެވެ. “އަހަރެން ބޭނުމެއް ނޫން ކުއްލިއަކަށް ހުރިހާ ކަމެއް ކުރާކަށް. އެކަހަލަ މަކަރުވެރި މީހަކު ދަލުގަ ޖެއްސޭނީ ވަރަށް ކެތްތެރިވެގެން. މަޑުމަޑުން ކުރިއަށް ދެވޭނީ. އަހަރެންގެ ފިރިމީހާއާ ދަރިފުޅުވެސް އަހަރެން މިނިވަން ކުރާނަން.” ޒާޔާ ބުންޏެވެ. އެއްފަހަރު ހަސްނައިންއަށް އަނެއްފަހަރު ބައްޕައަށް ބަލައިލުމަށްފަހު ޒާޔާ އަނެއްކާވެސް ވާހަކަ ދެއްކިއެވެ. “އަހަރެންގެ ހައްގު އަހަރެން ހޯދަން މަސައްކަތް ކުރިއްޔާ އަހަންނާ ހަމައަށް އެ އަންނާނެ އިންޝާﷲ… އެއީ… އަހަރެން އިން މަގާމް… ކޮމިޝަނަރ އޮފް ޕޮލިސް.”
*********
ގޭތެރޭގެ ހަމަހިމޭން މާހައުލަށް ސާބިތުކަމާއެކީ ޒާޔާ އެ އިއްވާލި ބަސްތަކުން އޭނާގެ އަމިއްލަ ނަފްސަށް އިތުބާރު އޮތް މިންވަރު ހާމަވެގެން ހިނގައްޖެއެވެ. މިފަހަރަކީ ޒާޔާ މަޑުން ހުންނާނެ ފަހަރެއް ނޫންކަން އަންގައިދޭ ކަހަލައެވެ.
ނިހާނަށް ހީވީ އެތައް އަހަރުތަކަކަށްފަހު އޭނާގެ އަސްލު ދަރިފުޅު އޭނާއަށް ލިބުނު ހެންނެވެ. ހިތުގެ ކަނެއްގައި ނުތަނަވަސްކަން ރަސްކަން ކުރަމުން ދިޔަޔަސް ދަރިފުޅުގެ ވިދަމުން ދިޔަ ދެ ލޮލުން ސާބިތުކަމުގެ އަސަރުތައް ފެނުމުން އެ ހިތަށް ވެރިވި ހިތްހަމަޖެހުމާއި އުފާވެރިކަން ބަޔާންކުރަން ދައްޗެވެ. އަބަދުގެ ވެސް ދުޢާއަކީ ދަރިފުޅު ކުރާ ކޮންމެ ކަމެއްގައި ދަރިފުޅަށް ކާމިޔާބު މިންވަރުކުރެއްވުމެވެ.
********
މެންދަންވެ ދުނިޔެ ހަމަހިމޭން ވެއްޖެއެވެ. އުޑުމަތި ސާފެވެ. ތަރިތައް ވިދާ ބަބުޅަމުން ދިޔައެވެ. މެދު އުޑުގައި ހަނދު ރަނިކަން ކުރަމުން ދިޔައެވެ. ކުޅަދުންވަންތަކަމުގެ ވަރުގަދަ ހެކިތައް ދައްކުވައިދޭ މި މަންޒަރުތަކަށް ބަލަން ގޭގެ ޓެރަހުގައި ހުރި އުނދޯއްޔެއްގައި ރާމިޝް އޮތެވެ. އޭނާގެ ނަޒަރު އުޑާ ދިމާލަށް ހުއްޓިފައި ވިޔަސް އޭނާގެ ވިސްނުން ހުރީ އެހެން ކަމަކާ މެދުއެވެ. ފޯނާ ކުޅޭހިތް ނުވީތީ މޭމަތީގައި ފޯނު ބާއްވާލައިގެން އޮތީއެވެ. އެހެންޏާ ރާމިޝްއަކީ އެގޮތަށް އޮންނައިރު ފޯނާ ކުޅެން އޮންނަ މީހެކެވެ.
ދިމާވި އެކްސިޑެންޓަށްފަހު ރާމިޝްއަށް، އޭނާގެ ހިތް، ދިރިއުޅުމާމެދު ވިސްނަން މަޖުބޫރު ކުރުވައިފިއެވެ. މަރުގެ އެތިފަހަރަކުން އެ ސަލާމަތްވީ ކޮން ގޮތަކުން ބާވައެވެ. އަނެއްކާ ޒަމްލާއަކީ ކޮންކަހަލަ ކުއްޖެއް ހެއްޔެވެ؟ ސިކުންތުކޮޅަކަށް ކުރިމަތިން ފެނިފައި ގެއްލުނީއެވެ. އެކަމަކު އެހެން ވާނީ ކިހިނެއް ހެއްޔެވެ؟ މިއީ އަނެއްކާ ރޫޙާނީ ކަމެއްބާއެވެ. އެފަދަ ކަންކަމަކީ ރާމިޝް ވެސް ޤަބޫލުކުރާ ކަންތައްތަކެވެ. އެކަމަކު އެކަހަލަ ކަމެއް ރާމިޝްއަށް ޖެހެން އޭނާއަށް ކުރެވުނީ ކޮންކަމެއް ހެއްޔެވެ؟
ރާމިޝް ހިތަށް އެރިއެވެ. ޒަމްލާއަކީ ހާދަހާވާ ތަފާތު ކުއްޖެކެވެ. އެކަހަލަ މިޒާޖެއްގެ ކުއްޖަކާ މިއިން ޒަމާނަކު ދިމާވެފައެއް ނުވެއެވެ. ޒަމްލާ ލޮލަށް ފެނުނު ދުވަހުން ފެށިގެން ފޫހިފިލުވުމަށްޓަކައި ސޯޝަލް މީޑިއާގައި ވާހަކަ ދައްކަމުން ދިޔަ ހުރިހާ އަންހެނުން މަތިން ފޫހިވެއްޖެއެެވެ. ޒަމްލާ އޭނާއަށް މި ޖެއްސީ ކޮންކަހަލަ ޖާދޫއެއް ހެއްޔެވެ؟
ޒަމްލާގެ ޖާދޫގައި ޖެހުނުވަރުން އާދައިގެ މަތިން ކޮންމެ ދުވަހަކުވެސް ގޭތެރެ ހުސްވާނެ ވަގުތަކަށް ރާމިޝްއަށް އިންތިޒާރު ކުރެވެމުން ދިޔައެވެ. ކިތަންމެ ގިނަ އަންހެނުންނަކާ ވާހަކަ ދެއްކިޔަސް މިގޮތަށް އަންހެން ކުއްޖެއްގެ ފަހަތުން، އެ ކުއްޖަކު ދެކިލަން ރާމިޝްއަށް އުޅެވިފައެއް ނެތެވެ. ޒަމްލާ ހަމަ އެހާ ތަފާތީއެވެ. ގޭތެރޭގައި އެކަނިވާ ވަގުތެއް ވިއްޔާ ޒަމްލާގެ ކޮޓަރި ދޮރުގައި ޓަކި ދެވެއެވެ. ޒަމްލާ ދޮރު ނުހުޅުވިޔަސް ޓަކި ދެވެއެވެ. ތަޅުލާފައި ހުންނަ ދޮރު ކައިރީ ހުރެގެން ޒަމްލާއަށް އަޑުއިވޭނެ ވަރަށް އެތައް ވާހަކައެއް ރާމިޝް ދައްކައެވެ. އެތައް ސުވާލުތަކެއް ކުރެއެވެ. ރާމިޝްއަށް ނޭނގޭ ކަމަކީ އޭނާގެ އަމަލުތައް އެހެން ހުންނާތީ އެ ނިކަމެތި ކުއްޖާއަށް އުނދަގޫވަމުންދާ ކަމެވެ.
ރާމިޝް ވަރަށް ވިސްނިއެވެ. ދިރިއުޅުމުގެ އެތައް ކަމަކާ އެތައް ގޮތަކަށް ވިސްނިއެވެ. ޒަމްލާއާ ދޭތެރޭ އެވަރަށް ވިސްނެއެވެ. ޒަމްލާ ހާސިލުކުރަން އެ ހިތުގައި އުފެދުނު ޝައުގުވެރިކަން ދެ ގުނަ ބޮޑުވެއްޖެއެވެ. އެ ރެއިން އެ ރެއަށް ޒަމްލާ ނޫން ކުއްޖަކު ތިމަންނަ ބޭނުން ނުވާކަމަށް ނިންމިއްޖެއެވެ. ޒަމްލާގެ ނަން ހިތުގައި ބިންވަޅުނެގިއްޖެއެވެ. އެހެން ފަރާތަކަށް އެ ނަން ރާމިޝްގެ ހިތުން ފުހެނުލެވޭނެ ދަރަޖައަކަށެވެ.
********
ރާމިޝްއަށް ޒަމްލާއާ ދޭތެރޭ ވިސްނޭ ފަދައިން ޒަމްލާއަށް ވެސް ރާމިޝްއާ ދޭތެރޭ ވިސްނެމުން ދިޔައެވެ. އެކަމަކު ޒަމްލާގެ ނަޒަރިއްޔާތު ތަފާތެވެ. އޭނާާއަށް އުނދަގޫވެއެވެ. ވަރަށް އުނދަގޫވެއެވެ. އިންތިހާއަށް ބިރުގަނެއެވެ. ބިރުގަންނަނީ ރާމިޝް އެހެން ކަންތައް ކުރުމުން އެކަމުގެ ޒިންމާ ވެސް ނަގަން ޖެހޭނީ ޒަމްލާއަށްކަން އިނގޭތީއެވެ. އިޒްވާއަކީ ކިހާވަރެއްގެ މީހެއްކަން ޒަމްލާއަކަށް އޮޅިފައެއް ނެތެވެ.
އެހެނަސް ޒަމްލާއަށް ނަގައިގަންނަން އުނދަގޫވި ކަމަކީ ރާމިޝް އެހެން އުޅޭއިރު މިއިން ދުވަހަކު އިޒްވާގެ ފަރާތުން އެއްވެސް އިޝާރާތެއް ލިބިފައި ނުވާތީއެވެ. އެއީ އިޒްވާގެ އާދަ ކަންނޭނގެއެވެ. އެއްދުވަސްކޮޅަކު ޒަމްލާއާ ދިމާލަށް އެއްޗެހި ނުގޮވާ އުޅެފާނެއެވެ. ދެން ޖެހިގެން އަންނަ މަދު ދުވަސްކޮޅު ފާއިތުވެގެން ދާނީ އިޒްވާ ގޭގައި ހުރިއްޔާ ޒަމްލާއާ ދިމާއަށް އެއްޗެހި ކިޔުމުގައެވެ.
މީގެން އެއްވެސް ކަމަކާ ޒަމްލާއަށް ކުރިމަތިލާން ނުކެރިގެން މިއުޅެނީ ކީއްވެ ހެއްޔެވެ؟ އަމިއްލަ ދިފާއުގައި އެންމެ ބަހެއް ވެސް ބުނެވޭކަށް ނެތެވެ. އިސް އުފުލާ އިޒްވާއާ ހަތަރުކަޅި ހަމަކުރާކަށް ނުކެރެއެވެ. ކެރޭނީ ވެސް ކިހިނަކުން ހެއްޔެވެ؟ ފުރާވަރު އުމުރަށް އެޅުނީއްސުރެ މިއަދާ ހަމައަށް އެއްވެސް ފަރާތަކުން ލޯތްބެއް، އޯގާތެރިކަމެއް އެ ހިތަށް އިހުސާސްކުރެވިފައި ނުވެއެވެ. އެ އުމުރުގައި ގާތް މީހުންގެ ފަރާތުން ލޯބި ބޭނުންވެއެވެ. އަޅައިލުން ބޭނުންވެއެވެ. އެއްވެސް ޖެހިލުންވުމަކާ ނުލައި ހުރިހާ ވާހަކައެއް އެ ފަރާތްތަކާ ޚިއްސާ ކުރަން ބޭނުންވެއެވެ.
ޒަމްލާއަށް ގެއްލިފައިވީ އެ ފުރުޞަތެވެ. މައިންބަފައިން ގާތުގައި ނެތެވެ. ވީ ކޮންތާކު ކަމެއް ނޭނގެއެވެ. ޒަމްލާ ހަނދާން ހުންނަން ފެށީއްސުރެ އޭނާގެ މަންމަ އާއި ބައްޕަ އޭނާ ދެކެ ނުހަނު ލޯބިވެއެވެ. އެހެންވީމާ މިހާރުވެސް އެ ލޯބި އެ ގޮތުގައި އޮންނާނެ ކަމަށް ޒަމްލާއަށް ޤަބޫލުކުރެވެއެވެ. އެކަމަކު މަންމަމެން އޭނާ ބަލައި ނާންނަނީ ކީއްވެތޯ ހިތަށް އަރާ ކޮންމެ ފަހަރަކު ހިތުގައި ޖެހޭގޮތްވެއެވެ. ލޮލުން ކަރުނަ އާދެއެވެ.
ރާމިޝްއަށް ޒަމްލާއާ ދޭތެރޭ ދެކެވުނީ ރަނގަޅަށޭ ބުނެވިދާނެއެވެ. ޒަމްލާއަކީ ތަފާތު ކުއްޖެކެވެ. ސާފު ހިތެއްގެ ވެރިއެކެވެ. ގިނަ ކުދިންނާ ޚިލާފަށް މިހާ ގިނަ އަހަރުތަކެއް ފާއިތުވެގެން ދިޔައިރު ވެސް އެ ހިތުގައި ޒަމްލާގެ މައިންބަފައިންނަށް ޓަކައި ނަފްރަތުގެ އަލިފާނުގެ ކަންޏެއް ވެސް ޖެހިފައި ނެތެވެ. ހިތުގެ އަޑިން ޤަބޫލުކުރެވެނީ މަންމަމެން އަދި އަންނާނެކަމަށެވެ. ކެތްތެރިވާން ޖެހޭނެކަމަށް އެ ހިތް އަބަދުވެސް ބުނެދެއެވެ. އެކަމަކު މިކަހަލަ ރަނގަޅު ވިސްނުންތައް އެކަނިމާއެކަނި އިންނަ ޒުވާން އަންހެން ކުއްޖަކަށް ލިބެނީ ކިހިނެއް ހެއްޔެވެ؟
*********
ކޮންމެ ކަމެއްގެ ފަހަތުގައި ވެސް ސަބަބުތަކެއް ވެއެވެ. ހަމަ އެ ބީދައިން ޒަމްލާގެ ނަޒަރިއްޔާތު އެ މަގުން އެ ހުންނަނީ ސަބަބަކާ ލައިގެންނެވެ. ޒަމްލާ ގާތަށް ދެވޭ ރެއެއްގައި ވިއްޔާ މަލައިކާ ޒަމްލާގެ ހިތަށް ވިސްނައިދެއެވެ. ހިތުގައި އުއްމީދުގެ ހުޅުކޮޅުތައް ރޯކޮށްދެއެވެ. ޝައިޠާނީ ވަސްވާސްތަކުން އެ ކުއްޖާ މިންޖު ކުރެވޭތޯ މަސައްކަތް ކޮށްދެއެވެ. މިއީ ޒަމްލާގެ ލޮލަށް ނުފެނި ހުރެ ޒަމްލާއަށްޓަކައި މަލައިކާ ކޮށްދޭ ކަންތައްތަކެވެ.
ޖިންނީންނަކީ ނުބައި ބައެކެވެ. އިންސާނުންނަށް ހެވެއް އެދޭ ބައެެއް ނޫނެވެ. އިންސާނުންނަށް ނޭނގި އޭގެން މަޚުލޫޤަކަށް ގެއްލުމެއް ދެވިއްޖެއްޔާ އެ ކަމަށް ބަދަލު ހިފުމުގެ ރޫހު އެބައިމީހުންގެ ހިތްތަކުގައި ކެކި އަރައެވެ. ޖިންނީންގެ ތެރޭ، މުއުމިން ޖިންނީން ވެސް މަދެއް ނޫނެވެ. މަލައިކާ އަކީ އޭގެން އެކަކެވެ. ނިކަމެތި އިންސާނަކަށް ޚިދުމަތް ނުކޮށްދޭނެވަރަށް މަލައިކާ ޒަމްލާއަށް ޚިދުމަތް ކޮށްދެއެވެ. ޒާޔާމެނަށް ޚިދުމަތް ކޮށްދެއެވެ.
ހުޅުމާލޭ ފޭސް ދޭއްގައި ހެދިފައިވާ ބީޗުގެ ރާޅުޖަހާ ފަށުގައި މަލައިކާގެ ފިޔަވަޅުތައް އަޅަމުން ދިޔައެވެ. އެއީ ވަރަށް ދަން ވަގުތެއް ކަމަށް ވިޔަސް މަދުމަދުން ސައިކަލުތަކުގައި މީހުން އުޅޭތަން ފެނެއެވެ. ގިނައިން ފެންނަނީ ޒުވާން ފުރައިގެ މީހުންނެވެ. މަލައިކާގެ ހިނގުން މަޑުކޮށްލިއެވެ. އަދި ދޮންވެލިގަނޑު މަތީ މިނިވަންކަމާއެކީ އުޅެމުން ދިޔަ ކުދިކުދި ބަރަވެލިތަކާއި ކަކުނިތަކަށް ގެއްލުމެއްނުވާނެހެން އެ އެއްޗެހި ދުރަށް ޖެއްސިއެވެ. އަދި ދޮންވެލިގަނޑު މަތީ އިށީނެވެ.
އޮޔާ ދެމެމުން އަންނަ ކުދި ރާޅުތައް މަލައިކާގެ ކުރަކިކަން ހުރި ދެ ފައިތިލައިގައި ބީހިލާފައި އަނެއްކާވެސް އެނބުރި އާދެއެވެ. ލައިގެން ހުރި ހުދުކުލައިގެ ފަށުވި ފޭރާމުގެ ފަސްބައި ވެސް މަލައިކާގެ ބަސްނާހާ ފަދައެވެ. ކުދިކުދި ރާޅުތަކަށް ހެދުމުގެ ފަސްބައި އިޖާބަދެމުން ދާ ކަހަލައެވެ.
ތެމެމުން ދިޔަ ހެދުމުގެ ފަސްބައި އެއްފަރާތްކޮށްލުމަށް ފަހު މަލައިކާގެ ދިގު އިސްތަށިގަނޑު އައްސައިލިއެވެ. ބޮލުގެ ވަށައިގެން އަޅައިފައިވި ރިހި ގަހަނާ ބޮލުން ނުވެއްޓޭނެހެންނެވެ. އެ ގަހަނާއަކީ އޭނާއަށް ވަރަށް މުހިއްމު އެއްޗެކެވެ. އެ ގަހަނާ، ނިމުމެއް ނުވާ ލޯތްބެއްގެ ވިދުވަރުން ވިދަމުން ދާތީއެވެ.
އެއީ މާލިކުގެ ހަނދާނެކެވެ. ބައްޕަ މަލައިކާދެކެ ވާ ފުން ލޯބި ރަމްޒުކޮށްދޭ އަލިގަދަ ނިޝާނެކެވެ. މާލިކާއި މަލަކާ ވަނީ އިންސާނަކަށް ޖެހުނު ސިހުރަކުން އެ މީހާ ސަލާމަތްކުރަން އުޅުމުގެ ތެރޭ ޤަތުލުވެފައެވެ. އެ ފަދަ މިޞްރާބަކަށް ދެބަފައިން ދިޔަ ކަމެއް މަލައިކާއަށް ރޭކައިނުލީއެވެ. ދެ ބަފައިންވެސް ޤަތުލުކުރެވުނީ އެ އިންސާނަކަށް ސިހުރު ޖެއްސި މީހަކު އެ ސިހުރު ވަރުގަދަކުރަމުން ދިޔައީމައެވެ. އެ އިންސާނައަށް ގޯނާ ކުރަމުން ދިޔަ އިފުރީތެއްގެ ކިބައިން ދެބަފައިން ސަލާމަތްނުވީއެވެ.
ލޮލުން ފޭދުނު ކަރުނަ ތިކި މަލައިކާ ފުހެލިއެވެ. އެކަނިވާ ވަގުތުތަކުގައި ބައްޕައާއި ކޮއްކޮ މަތިން މަލައިކާ ހަނދާންވެއެވެ. އެ ވަގުތުތަކުގައި މަލައިކާއަށް އެކަނިވެރިކަން ވަރަށް ބޮޑަށް އިހުސާސްކުރެވެއެވެ. ހިނދުކޮޅަކަށްމެ އޭނާއަކީ ނިކަމެއްޗެއްކަމަށް ހީވެއެވެ. ޖިންނިއަކަށްވީތީ ބައްޕަމެން ޤަތުލުކުރި މީހުންގެ ކިބައިން ވަރުގަދަ ބަދަލެއް ހިފަން އެތައް ފަހަރަކު މަލައިކާގެ ހިތަށް އަރައެވެ. އެހެނަސް، އޭނާގެ ހިތުގައި ބިންވަޅުނެގިފައިވާ ވަރުގަދަ އީމާންތެރިކަން، އެކަން ކުރާކަށް ތަނެއް ނުދެއެވެ.
**********
“ފޯމު ގެންނާނަން ދެތިން ދުވަހެއް ތެރޭ.” އެ އިވުނީ އިޒްވާގެ އަޑެވެ. އެ ރޭގެ ފަތިސް ނަމާދަށް ބަންގި ގޮވީ އިޒްވާ ގޮޅިތެރޭ ހުއްޓައެވެ. އެކަމަކު އެއީ އިޒްވާ ސަމާލުކަން ދިން އަޑެއް ނޫނެވެ.
ރީތި ރާގަކަށް އިވެމުން ދިޔަ ބަންގީގެ ސަބަބުން ލިއަމްގެ ހިތަށް ބުނެދޭން ނޭނގޭ އަސަރުތަކެއް ކުރުވިއެވެ. އިޒްވާ ބުނި ބަހަކަށް ލިއަމް ރައްދެއް ދޭން އުޅުނެވެ. ނަމަވެސް ދެވަނަ ސިކުންތުގައި އެ މޫރިތި ކަލިމަތައް އިވެން ފެށުމުން ﷲ މަތިން ހަނދުމަވެއްޖެއެވެ. ހިތާހިތުން އެތައް ދުޢާއެއް ކުރެވުނެވެ. މި ޙާލަތުން ސަލާމަތްކޮށްދެއްވުމަށް އެދި އާދޭސްކޮށް އެ ހިތް ރޮނީއެވެ. މި އިމްތިޙާން މަތީ ދިގުދެމިގެންދާން ލިއަމް ބޭނުމެއް ނޫނެވެ. އެ ހިތަށް ވެސް ކެތްވާނީ ވަކި ވަރަކަށެވެ. ނަމަވެސް މިއަދު ހެއްދެވި ފަރާތަށް ވަކީލުކުރުން ނޫންގޮތެއް ނެތެވެ. އެނގޭ ކަމަކީ، ލިއަމްއަށް ކުރިމަތިވެފައިވާ މި ޙާލަތަކީ ދާއިމަށް ދެމިގެންދާނެ ޙާލަތެއް ނޫންކަމެވެ. ދިރި ދުނިޔޭގައި ހުރިއްޔާ ކޮންމެވެސް ދުވަހަކުން އިންސާފު ލިބޭނެކަމެވެ.
“އެއްޗެކޭ ނުބުނެވުނެއްނު ދޯ…. މަ އެބަ ޖެހޭ ކަލެއާ ވާހަކައެއް ދައްކަން.” ލިއަމްއަށް އިސް އުފުލައިލެވުނެވެ. އެ ދެ ލޮލުން ފެންނަނީ ހިތާމައިގެ އިންތިހާއެވެ. ނިމުމެއް ނެތް ބޭގަރާރުކަމެވެ. އާދޭހުގެ ކުލަވަރުތަކެވެ. ވަރުބަލިކަމާއި ބަލިކަށިކަން ރަމްޒުކޮށްދޭ ރަތްކަމެވެ. އިޒްވާ ކަޅި މައްޗަށް ހިންގައިލިއެވެ. ކަހަރުވަކެކޭ ވެސް އިޒްވާގެ ހިތަށް ނާރަނީއެވެ.
“ކަލޭގެ އަންހެނުން ކީއްވެތަ އަހަންނާ ޖައްސައިލައިގެން އެ އުޅެނީ؟ އެއީ ހަމައިގަ ހުންނަ މީހެއްތަ؟ އާދަޔާ ހިލާފު މީހެއްތަ؟” އިޒްވާގެ ސުވާލުތަކަށް ލިއަމް ޖަވާބެއް ނުދިނެވެ. އިޒްވާއާ ވާހަކަ ދައްކަން ބޭނުމެއް ވެސް ނުވީއެވެ. އެއީ ކޮންމެހެން ލިއަމްގެ އަންހެނުންނޭ ކިޔައިގެން އެ ދައްކާ ވާހަކަތަކުން ލިއަމްއަށް އުނދަގުނުވާތީއެއް ނޫނެވެ. އޭގެ ބަދަލުގައި އިޒްވާއަށް ކަމެއް ސާބިތުކޮށްދޭން އުޅުމަކީ ފެން އިސްކުރަކުން އޮހޮރޭ ފެން ކަފަން އުޅުން ކަހަލަ ކަމަކަށް ވާނެތީއެވެ. “ބުނެބަލަ ނިކަން. މަ ބިރުގަންނަވަރަށް އޭނަ އަހަންނަށް ޖެއްސުން ކުރެއޭ. އަދި އެނގޭތަ.. އެ ވެސް ދަން ގަޑިތަކުގަ.” އިޒްވާ ބުންޏެވެ.
އިޒްވާއަށް ކުރިމަތިވެފައިވާ ކަމެއް ވިއްޔާ އެ ކަމެއްގެ ވާހަކަތައް ލިއަމްއަށް އަޑު އިއްވައިދެމުން ދިޔައީ އޭނާ ބޭނުން ގޮތަކަށް އެ ކަންކަން ބަދަލުކުރަމުންނެވެ. އެެއީ ޒާޔާގެ ނަން ކިލަނބުވާނެހެންނެވެ. ފެނުނު މަންޒަރުތަކުން އެއީ ޒާޔާ ނޫންކަން އިޒްވާއަށް ޝައްކުވަމުން ދިޔަޔަސް އޭނާ ބެލީ އޭނާގެ މަޤްސަދު ހާސިލުވޭތޯއެވެ. ލިއަމްގެ މޫނުމަތިން ރުޅިވެރިކަން ފެންނަން ފެށި ވަގުތު އިޒްވާގެ މަޤްސަދު ހާސިލުވެއްޖެހެން އޭނާއަށް ހީވިއެވެ. އެހެނަސް އިޒްވާގެ ތުންފަތަށް ވެރިވި ނުލަފާ ހިނިތުންވުން ފިލައިގެން ދިޔައީ، ކުއްލިއަކަށް ލިއަމް ހޭ ހުސްވެގެން ވެއްޓުމުންނެވެ. މިއީ ފެނިދާނެކަމަށް، އިޒްވާ އުއްމީދުކުރި މަންޒަރެއް ނޫނެވެ. ގޮޅިން ބޭރުގައި ހުރި ފުލުހަކު ސަމާލުކަމަށް ގެނެސް، އިޒްވާ އެތަނުން ނުކުތެވެ.
*********
އާދައިގެ މަތިން މިއަދަކީވެއް ޒާމިލް ހެނދުނު ޑިއުޓީއަށް ދިޔަ ދުވަހެކެވެ. ހިނދުކޮޅަކަށް އޭނާގެ ލޮލަށް އިޒްވާ ފެނިލިއެވެ. އެވަގުތު ޒާމިލް ވަރަށް ކެތްކުރަން ޖެހުނެވެ. އެހެނަސް އެ މޫނުމައްޗަށް އެރި ނުރުހުންތެރިކަން ސިއްރެއް ނުވިއެވެ. އެންމެންގެ ކުރިމަތީ އިޒްވާ ބޭޒާރު ކޮށްލަން ބޭނުންވިޔަސް މަންމަ ބުނީތީ ޒާމިލް މަޑުން ހުރީއެވެ.
ޒާމިލްމެން ޓީމް މަސައްކަތްކުރާ ބަޔަށް ވަތްއިރު އެތަނުގައި މިހާދު ވެސް އިނެވެ. ކޮމްޕިއުޓަރ ކައިރީ އިން މިހާދު ޒާމިލް ފެނި ހިނިތުންވެލިއެވެ. އެއީ ނުތަނަވަސްކަން ވެރިވެފައިވާ ހިނިތުންވުމެކެވެ. “ކަލެއަށް ވަރަށް އިތުބާރުކޮށްފަ ކަމެއް ހަވާލުކުރިން އަހަރެން.” ޒާމިލް ހުރީ ރުޅި އައިއްސައެވެ. އެހެނަަސް، އޭނާ ވާހަކަ ދެއްކީ މަޑުންނެވެ. “މަށަކަށް ނުކެރޭނެ އެކަހަލަ ކަމެއް ކުރާކަށް.” މިހާދު ބުންޏެވެ. ޒާމިލް މޭޒުމަތީގައި ޖެހިއެވެ. މީހާ ހުރީ ތުރުތުރު އަޅާވަރުވެފައެވެ. “އަހަރެން ބުނިހާވެސް އެއްޗަކީ އޭނައަށް ފާރަލާން. އޭނަގެ ހުރިހާ ކަމެއް ހޯދަން.” ޒާމިލް ބުންޏެވެ. “އަހަރުން މޭމްއަށް ފާރަލާކަން މޭމްއަށް އެނގިއްޖެއްޔާ ރުޅިދުރުވާނެ. ވަޒީފާއިން ވަކިކުރާނެ. ގައިމު ކަމެއް އެއީ. މަށަކަށް ނުވާނެ… މަށަކަށް ނޭނގެ ކަލޭ މޭމްއާ ޖައްސައިލައިގެން ތިއުޅެނީ ކީއްވެކަމެއް.” މިހާދު ބުންޏެވެ. “ހުރިހާ ކަމެއްގެ ސަބަބު އިނގޭކަށް ނުޖެހޭ. އެދުވަހު އޭނަ ކައިރީ ޓީވީގަ އިންޓަވިއު އޮތް ވާހަކަ ބުނެފަ ދެން ބަޚަބަރު.. އާނ.. ކަލެއަކަށް ނުވާނޭ މިކަމެއް. ކަލޭގެ އާއިލާއަކަށް ނޫންވިއްޔަ އޭނަ ގެއްލުން ދީގެން އެއުޅެނީ.” ޒާމިލް ބުނަންވީ އެއްޗެއް ބުނެފައި އެތަނުން ނުކުތެވެ. އެތާ ހުރިއްޔާ އޭނާ އިތުރަށް ރުޅިއައުން ނޫންކަމެއް ނުވާނެތީއެވެ. ޒާމިލް ފަހުން ބުނެލި ޖުމުލައާއި ދޭތެރޭ މިހާދަށް ވިސްނައިލެވުނެވެ. އެއީ ޒާމިލް ކީއްވެ ބުނި ވާހަކައެއް ހެއްޔެވެ؟
*********
“ކަމެއް ނުވެއެއްނޫން އޭނަ ވެސް އެއްޗެކޭ ނުބުނެ އެ ހުންނަނީ. އޭނައަށް ކަނޑައެޅިގެން އެނގޭނެ ބައްޕަ ޖަލަށްލިކަން ވެެސް.” ޒާމިލް ބުންޏެވެ. ޒާމިލް އާއި ލާއިމް އަދި ޝަޒާވެސް ތިބީ އެއަރޕޯޓުގައެވެ. ޒާމިލް އެއަރޕޯޓަށް އައީ އެތަނުގައި ކަންތައްތައް ހިނގާ ނުހިނގާ ގޮތް ބަލައިލުމަށްޓަކައެވެ. ލާއިމަށް ބްރޭކް ވަގުތެއް ލިބުނީތީ ދޮންބެ ކައިރިއަށް އައީއެވެ. ކަން ދިމާކުރި ގޮތުން އެމީހުނަށް އެތަނުން ޝަޒާ ވެސް ފެނުނީއެވެ. ޝަޒާ އެއަރޕޯޓަށް އައީ އޭނާގެ ރައްޓެހި ކުއްޖަކު ރާއްޖެއިން ބޭރަށް ދާތީއެވެ. ތިން މީހުން ވެސް ތިބީ ކޮފީއެއްގައެވެ.
“މީހެއް ކައިރީ ބުނެ ކިޔައިގެން ކަން ކުރަން އުޅުމަށްވުރެ މާ ރަނގަޅުވާނެ އަހަރުމެން އަމިއްލައަށް މިހިރަ ކަންކަން ހޯދަން އުޅުނިއްޔަ.. ދައްތައަށް ކިހިނެއް ލިއަމްބެމެންގެ ހަބަރެއް ލިބުނީ؟” ޝަޒާ އެހިއެވެ. “ނޭނގެ. މަންމަ ނިކަން މަޝްހޫރު މީހެއްނު. މަންމަ ދަންނަ ކިތަންމެ ބައެއް ތިބޭނެ. އޭގެން މީހަކު މަންމަ ކައިރީގަ ބުނީ ކަންނޭނގެއެއްނު.” ލާއިމަށް ވިސްނުނު ގޮތް އޭނާ ހާމަކުރިއެވެ. “އާނ ދޯ. ދައްތަ އަހަރެން ކައިރީގަ ބުނި ލިއަމްބެ ސިންގަޕޫރަށް ދިޔަ ފަހުންނޭ ގެއްލުނީ.” ޝަޒާ ބުންޏެވެ. ޒާމިލް އާއި ލާއިމަށް އެކަކު އަނެކަކަށް ބަލައިލެވުނެވެ. ކުރިއަށް ގެންދިއުމަށް ޒާމިލް އެދުނެވެ. އެއާއެކު މިހާތަނަށް ނެގުނު ތެރަޕީ ސެޝަން ތަކުގައި ޒާޔާ ޚިއްސާ ކުރި ވާހަކަތައް ޝަޒާ ކިޔައިދޭން ފެށިއެވެ.
*********
ފްލައިޓް ޖައްސާ ވަގުތު ކުޑަތަންވަމުން އައީތީ ލާއިމް އަނބުރާ އޭނާގެ މަސައްކަތް ކުރަން ދިޔައެވެ. މަސައްކަތް ކުރަމުން ދިޔަޔަސް ޝަޒާ ކިޔައިދިން ވާހަކަތައް އޭނާގެ ސިކުނޑީގައި ގުގުމަމުން ދިޔައެވެ. އެކުގައި އުޅުނު މީހުން ދައްކާ ވާހަކަތަކަށް ގިނަ ފަހަރު ސަމާލުކަމެއް ނުދެވުނެވެ. ޖަވާބު ނޭނގޭ އެތައް ސުވާލުތަކެއް އެބަހުއްޓެވެ.
ޒާމިލްގެ ޙާލަކީ ވެސް އެއީއެވެ. ތަހުގީގު ކުރަން ޖެހޭ އެކި ކޭސްތައް ޒާމިލްމެނާ ހަމައަށް އަންނައިރު އެ މަސައްކަތްތަކަށް ކުރިން ދެވޭ ސަމާލުކަމެއް މިއަދު ނުދެވުނެވެ. އެހެނިހެން ފުލުހުން އެ މީހުންގެ މަސައްކަތުގައި އުޅޭތީ ޒާމިލަށް އުނދަގޫ ވެސް ވިއެވެ. އޭގެން މީހަކަށް އެއްވެސް ކަމަކާ ކުރިމަތި ނުވަނީ ހެއްޔެވެ؟ ހުރިހާ ކަމަކާ ކުރިމަތިލާން މި ޖެހެނީ ޒާމިލަށް ހެއްޔެވެ؟ އެ މީހުން މަސައްކަތުގައި އުޅެމުން ދިޔަ ގޮތުން އެއްވެސް ޚިޔާލެއް ފިކުރެއް ހުރިހެން ވެސް ހީނުވެއެވެ.
********
އެހެން ދުވަސްދުވަހާ ޚިލާފަށް މިއަދު ޒާޔާގެ ތެރަޕީ ސެޝަން ކުރިއަށް ދިޔައީ ތިރީސް މިނެޓަށެވެ. ނިހާން ބަލިކޮށް އުޅޭތީ ޝަޒާ، ވަގުތު ކުރުކޮށްލީއެވެ. ޝަޒާ އެގެއިން ދަމުން ދިޔައީ ނިހާން ކައިރިއަށް ވަދެ އޭނާއާ ކުޑަކޮށް ވާހަކަ ދައްކާލާފައެވެ.
އިތުރަށް ފަރުވާ ކުރިއަށް ގެންދަން ބޭނުން ނުވާ ކަމުގައި ޒާޔާ، މިއަދު ޝަޒާ ގާތުގައި ބުންޏެވެ. ކުރިއާއި ޚިލާފަށް އެތައް ގޮތަކުން ރަނގަޅުކަމުގައި ޒާޔާ ބުންޏެވެ. ޒާޔާ ބުނީ ތެދެއްކަން ޝަޒާއަށް ވެސް އެނގެއެވެ. އެހެނެއްކަމަކު ޒާޔާގެ ފަރުވާ އެއްކޮށް ހުއްޓައިލާކަށް ޝަޒާ ބޭނުމެއް ނުވިއެވެ. އޭނާ ދެކޭގޮތުގައި ޒާޔާއަށް އަދިވެސް އެހީތެރިކަން ބޭނުންވާނެއެވެ. ކުރިއަށް އޮތްތަނުގައި ވެސް އެހީތެރިކަން ބޭނުންވާނެއެވެ. ދަރިންގެ އެހީތެރިކަން ލިބުނަސް، ޒާޔާ ކުރަން އެއުޅެނީ ކުޑަކަމެއް ނޫނެވެ. އެތައް ގޮންޖެހުންތަކަކާ ކުރިމަތިލާން ޖެހޭނެއެވެ. ދިމާވާ އުނދަގުލެއް ނުވަތަ ކުރިމަތިވާ ގޮންޖެހުމެއްގެ ސަބަބުން އަނެއްކާވެސް ޒާޔާ ނަފްސާނީ ގޮތުން ބަލިކަށިވުމަކީ ވެދާނެ ގޮތެކެވެ. ޒާޔާގެ މޫނުމަތިން ފެނުނު ކުލަވަރުތަކުން އޭނާ ހުރީ ކޮންމެ ކަމަކާވެސް ކުރިމަތިލާން ތައްޔާރަށްކަން ޝަޒާއަށް އެނގުނެވެ.
*********
މެންދުރުގެ ދިލަ ހޫނުކަން ކެނޑި ހަވީރުއަތަށް އަޅައިފިއެވެ. އަމީނީ މަގުން ޒާމިލް ސައިކަލު ދުއްވަމުން ގޮސް ވަކި ދިމާލެއްގައި ސައިކަލު ޕާކު ކުރިއެވެ. އަދި ދުވާރުމަތިން ހިނގާފައި ގޮސް އޭނާ ވަނީ ކަރެކްޝަންސް އޮފީހަށެވެ. އެއަރޕޯޓުން މާލެ އައިސް އޮފީހަށް ވަދެ ކަރެކްޝަންސް އޮފީހަށް ހަތަރު ފަހަރެއްގެ މަތިން ޒާމިލް ގުޅިއެވެ. އެތަނުން ޖަވާބު ނުދިނީތީ ޒާމިލް ޑިއުޓީ ނިންމާފައި އެ އޮފީހަށް އައީއެވެ.
ކަރެކްޝަންސް އޮފީހުގައި ވެސް ޒާމިލް ދަންނަ ފަރާތްތައް ގިނައެވެ. އެކި ފަހަރު މަތިން ޒާމިލް ވަނީ ކުށްވެރިން ގޮވައިގެން އެ އޮފީހަށް ވަދެފައެވެ. އެތަނުގައި ވެސް އޭނާ ބައެއް މަސައްކަތްތައް ކޮށްފައިވެއެވެ. އެހެންކަމުން އެއީ ޒާމިލަށް އާ ތަނެއް ނޫނެވެ.
އެތަނުގައި އުޅޭ އެންމެނަށް ވެސް ޒާމިލަކީ ލިއަމް އާއި ޒާޔާގެ ދަރިއެއްކަން އެނގޭނެއެވެ. ފަހަރުގައި އަލަށް އެ އޮފީހާ ގުޅުނު ބައެއް ފަރާތްތަކަށް އެކަން ނޭނގިދާނެއެވެ. ފުލުހުންގެ އިދާރާގައިވެސް އެކަން ނޭނގޭ ބަޔަކު މަދުވާނެއެވެ. އެހެނެއްކަމަކު، ނުބައި މީހެއްްގެ ނުފޫޒު އެމީހުނަށް ފޯރަމުން ދާތީ ހަނު ހުންނަނީއެވެ.
ޒާމިލްގެ ވިސްނުން ތޫނު ސިކުނޑިން އެކަން ދެނެގަނެވުނީ ކަންނޭނގެއެވެ. އެ އޮފީހުން ނުފެންނަ ފަރާތެއް ފެނުމުން ޒާމިލް އެ މީހާއާއި ވާހަކަދެއްކިއެވެ. ޒާމިލް ބުނި ބަހަކަށް އެއްބަސްވަމުން އެ މީހާއާއެކީ އައުމަށް އެދުނެވެ. އެ މީހާއަށް ޚާއްސަ ކުރެވިފައިވި ކެބިންއަށް ޒާމިލާއެކު ވަނެވެ. “ކިހާ ދުވަހެއް ވެދާނެ މިތަނުގަ މަސައްކަތްކުރާތާ؟” ޠާހާ ދެއްކި ގޮނޑީގައި އިށީންނަމުން ޒާމިލް އެހިއެވެ. ޠާހާ އިނީ ކޮމްޕިއުޓަރ ކައިރީ، ޒާމިލާ ކުރިމަތިވާނެހެންނެވެ. “އަޅުގަނޑު މިތާ މަސައްކަތްކުރާތާ އަހަރެއް މިވީ އަދި.” ޠާހާ ބުންޏެވެ. ޒާމިލް ވިސްނައިލިއެވެ. ޠާހާއަކީ އޭނާއަށް މި އޮފީހުން މީގެ ކުރިން ފެނިފައިވި ޒުވާނެއް ނޫނެވެ. ފަހަރެއްގައި އޭނާއަށް ޒާމިލަކީ ކާކުކަން އެނގިދާނެއެވެ. އެ ގޮތް ބަލައިލުމުގެ ނިޔަތުގައި ޒާމިލް ވާހަކަ ދައްކަން ފެށިއެވެ.
“2017 ނޫނީ 2018. މީގެން ކޮންމެވެސް އެއް އަހަރެއްގަ ލިއަމް އިބްރާހީމް ކިޔާ މީހަކު ހައްޔަރުކޮށްފަވަނީ.. އަޑު އެހިންތަ؟” ޒާމިލް ބުންޏެވެ. “ކުރީގެ ޗީފް އޮފް ޑިފެންސް ފޯސް ދެއްތޯ؟” ޔަގީން ކުރުމުގެ ގޮތުން ޠާހާ އެހިއެވެ. ޒާމިލް ބޯ ޖަހައިލިއެވެ. “އެ ބޭފުޅާގެ މައުލޫމާތު ހޯއްދަވަންތޯ ތި ދުރުވީ؟” ޠާހާ އެހިއެވެ. އަނެއްކާވެސް ޒާމިލް ބޯ ޖަހައިލިއެވެ. ޠާހާ ވާހަކަ ދައްކަމުން ދިޔަ ރާގާއި، ސުވާލުކުރަމުން ދިޔަ ގޮތުން އޭނާއަށް ޒާމިލަކީ ލިއަމްގެ ދަރިއެއްކަން ނޭނގޭކަން ޒާމިލަށް ފާހަގަކުރެވުނެވެ. ޒާމިލަށް ބަހެއް ބުނާކަށް ނުޖެހުނެވެ. ޠާހާ އޭނާގެ ސްކްރީން ބަލަން ފެށިއެވެ. ޠާހާގެ ހަރަކާތްތައް ހުރިގޮތުން އޭނާއަކީ އެހެން މީހުންނަށް ޚިދުމަތްކޮށްދިނުމަށް އަތުކުރި އޮޅާލައިގެން ހުރި ފަރާތެއްހެން ހީވެއެވެ.
“ލިއަމް އިބްރާހީމްގެ އެއްވެސް މައުލޫމާތެއް އަޅުގަނޑަށް ފެންނާކަށް ނެތް.” ޠާހާ ބުންޏެވެ. އޭނާގެ މޫނުމަތީގެ ކުލަވަރުތަކުން އޭނާ ދޮގެއް ނުހަދާކަން ޒާމިލަށް އެނގުނެވެ. ޤައިދީންގެ ކަންކަން ބަލަހައްޓާ އިދާރާއެއްގައި ޤައިދީއެއްގެ މަޢުޟޫމާތެއް ނެތުމަކީ އޭގައި ޝައްކު ކުރެވޭ ކަންތައްތަކެއް ހުރި ކަމެކެވެ. “އެ އަހަރުތަކުގެ ފައިލުތައް އަހަންނަށް ގެނެސްދީ.” ޒާމިލް އެދުނެވެ. ސިސްޓަމަކަށް އަޅާ ކޮންމެ އެއްޗަކީ ކޮންމެ ވަގުތެއްގައިވެސް އަޕްޑޭޓް ކުރެވޭނެ އެއްޗެއްސެވެ. ޒާމިލަށް ވިސްނުނު ގޮތުގައި އެ ވެބްސައިޓު ހިންގާ ވެރިފަރާތަކުން އެ މައުޟޫމާތު ފުހެލީއެވެ. އޮޅިގެން، ބައެއްގެ މައުޟޫމާތު ޝާއިއު ނުކުރެވި ހިނގައިދާނެއެވެ. އެހެނަސް، އެންމެ މީހަކާ ބެހޭ މައުޟޫމާތު އޮޅިގެން ވެބްސައިޓަށް ނުލެވި ހުރުން އެއީ ވުމަށް ވުރެ ނުވުން ގާތް ކަމެކެވެ.
އިރުކޮޅެއްގެ ތެރޭ ޠާހާ ފައިލުތަކެއް ހިފައިގެން ކެބިން ތެރެއަށް ވަނެވެ. ޠާހާއާއެކު އިތުރު މީހަކު ވެސް އެތަނަށް އައެވެ. އެމީހަކަށް ނުބަލާ، ޒާމިލް އެ ފައިލުތައް ބަލަން ފެށިއެވެ. ކޮންމެ ގަނޑެއް ވަކިވަކިން ބެލިއެވެ. 2017 ވަނަ އަހަރުގެ ރެކޯޑުތައް ބަލައިގެން އޭގެން ބައްޕަގެ ނަމެއް ނުފެނުނެވެ. ދެން ބެލީ 2018 ވަނަ އަހަރުގެ ރެކޯޑުތަކެވެ. ލިސްޓް ބަލަމުން ބަލަމުން ގޮސް، ފަންސާސް ވަނަ ނަންބަރު ފެނުނުއިރު، ޒާމިލްގެ ތުންފަތަށް ލުއި ހިނިތުންވުމެއް ވެރިވިއެވެ. އެ ނަންބަރުގެ ކައިރީ ބައްޕަގެ ނަން ލިޔެވިފައި އިންތަން ފެނުނެވެ. އަދި ބައްޕަ ހައްޔަރުކުރެވިފައިވީ މާލެއާ ކައިރީގައި ހުރި ރަށެއްގައިކަން ވެެސް އެނގިގެން ދިޔައެވެ. އަދި ވަކިން ލިއަމްގެ ތަސްވީރެއް ތަތްކޮށްފައި އޮތް ގަނޑެއްގައި ތާވަލެއް ވެސް ފެންނަން އޮތެވެ. ޒާމިލް އެންމެ ސިކުންތުކޮޅެއްވެސް ބޭކާރު ކުރާކަށް ބޭނުމެއް ނުވިއެވެ. އޭނާގެ ފޯނުން އެ ގަނޑުތައް ފޮޓޯ ނެގުމަށްފަހު އެތަނުން ތެދުވިއެވެ. އަދި ޠާހާއަށް ޝުކުރު އަދާކޮށްފައި އެތަނުން ނުކުތެވެ.
ފައިލުތައް ހިފައިގެން ޠާހާ އެތަނުން ނުކުންނަންދެން ބަޝީރު އެތާ ހުއްޓެވެ. ބަޝީރު ޠާހާގެ ފަހަތުން އައީ އޭނާ ފައިލުތަކެއް ހިފައިގެން ދާތީ އޭނާ ކުރަން އުޅޭކަމެއް ބެލުމުގެ ނިޔަތުގައެވެ. އެ ދިޔަ މަގުމަތީ އެ ތަކެތި ގެންދަނީ ކީއްކުރަންތޯ ބަޝީރު އެހިއެވެ. ހަމަ އެހިއިރަށް، އެއީ ޒާމިލް ސަރ އެދިލައްވައިގެން ކަމަށް ޠާހާ ބުންޏެވެ. އަދި ހޯދަނީ ޗީފް ކަމަށް ވެސް ޠާހާ ބުންޏެވެ. އެ ދައްކަނީ ކޮން ޗީފެއްގެ ވާހަކައެއްކަން އެނގުމާއެކު ބަޝީރު ޠާހާ ހުއްޓުވަން އުޅުނެވެ. ނަމަވެސް އޭގެ ކުރިން ޠާހާ ކެބިންއަށް ވަދެފިއެވެ.
ޒާމިލް އެ ފައިލުތައް ބަލަން ފެށުމުން ބަޝީރު ބިރުގަންނަން ފެށިއެވެ. ޒާމިލަށް އެ މައުޟޫމާތުތައް އެނގުނީ މިތަނުން ކަމަށް ވަންޏާ އޭނާގެ ވަޒީފާ ގެއްލޭކަށް ގިނަ ދުވަހެއް ނުނަގާނެއެވެ. ޠާހާގެ ވަޒީފާ ވެސް ގެއްލޭނެއެވެ. ބަޝީރު ބޭނުންވީ ޒާމިލް އަތުން ފައިލުތައް އަތުލާށެވެ. ނަމަވެސް، ޒާމިލް ކުރަމުން ދިޔަ ކަމެއް ކޮށް ނިމުނުއިރު ވެސް އޭނާއަށް ބަލަހައްޓައިގެން ހުރެވުނީއެވެ. ކުއްލިއަކަށް އެ ޖަހައިގަންނަން ދިޔައިއްޔާ ޒާމިލަށް ޝައްކުވެދާނެތީއެވެ.
ބަޝީރަކީ ދުވަހަކުވެސް މީހަކަށް ދެރަގޮތެއްވާން އެދޭނެ މީހެއް ނޫނެވެ. އެއަށްވުރެ މާ ހިތްހެޔޮ މީހެކެވެ. އެކަމަކު އިޚުލާޞްތެރިކަމާއެކީ އޭނާއަށް މަސައްކަތް ކުރެވޭކަށް ނެތެވެ. ބަޝީރު އެކަންޏެއް ނޫނެވެ. އެ އިދާރާގައި މަސައްކަތްކުރާ ގިނަ މީހުންގެ ޙާލަކީ އެއީއެވެ. ކޮންމެ މީހަކު ވެސް ކަން ކުރަން ޖެހެނީ ބޮޑެތި އިއްޒަތްތެރީން ބޭނުންވާ ގޮތަކަށެވެ. އަމުރު ކުރަނީ ގޯސް ކަންކަމަށް ވިޔަސް، ކިޔަމަންވާން ޖެހިފައިވަނީ އެ މީހުންގެ އަމުރަށެވެ. އެއީ އެންމެ ސަބަބަކަށް ޓަކައެވެ. ވަޒީފާ ގެއްލިދާނެކަމުގެ ބިރަށް ޓަކައެވެ.
*********
ރޭގަނޑުގެ ވަގުތެވެ. ޒާމިލާއި ޒާޔާ ތިބީ ސިޓިންގް ރޫމުގައެވެ. ލާއިމް އަދި ގެއަކަށް ނާދެއެވެ. ނިހާން ވީ އޭނާގެ ކޮޓަރީގައެވެ.
ޒާމިލް އިނީ ވަކިން ހުރި ސޯފާއެއްގައެވެ. ޖެހިގެން ހުރި ސޯފާގައި ޒާޔާ އިނެވެ. އޭނާ އިނީ ޒާމިލްގެ ފޯނުން މިއަދު ނަގާފައި ހުރި ފޮޓޯތައް ބަލާށެވެ. “ދަރިފުޅު ހާދަ ފަސޭހައިން މިއެއްޗެހި ހޯދީ.” ޒާޔާއަށް ބުނެވުނެވެ. ޒާޔާ ޤަބޫލުކުރާގޮތުގައި ޒާމިލަކީ ކާކުކަން ނޭނގޭ މީހަކު ކަރެކްޝަނުގައި ނޫޅޭނެއެވެ. ވީއިރު ލިއަމްގެ މަޢުޟޫމާތު އެއް ދުވަހުން އެހާ ފަސޭހައިން ޒާމިލަށް ލިބުމަކީ އެކަށީގެންވާނެކަމެއް ނޫނެވެ. ޒާމިލް އެ މަޢުޟޫމާތުތައް ހޯދި ގޮތް ޒާޔާއަށް ކިޔައިދިނެވެ. އަދި އޭނާ އެ އޮފީހަށް ވަނީ ޔުނީފޯމުގައި އިން ޓެގުކޮޅު ނައްޓާލައިފައި ކަމަށް ބުންޏެވެ. ޒާޔާ ހިތަށް އެރިއެވެ. މިހުރީވާ ކުޅަދާނަ ދަރިއެކެވެ. މިއީ ހަމަ ދެވަނަ ލިއަމްއެކެވެ.
“މަންމަ ބުނޭ ދެން ކުރަންވީ ކަމެއް.” ޒާމިލް ބުންޏެވެ. “ކޯޓު އަޑުއެހުންތައް ހޯދަން ޖެހޭނީ. މަންމަ އެކަން ކުރާނަން. ދަރިފުޅު އޮފީހުގެ ތެރެއިން ހޯދަން ޖެހޭ ކަންކަން ހޯދާފަ މަންމައަށް އަންގާ.” ޒާޔާ ބުންޏެވެ. “މިހާރު ހީނުވެ މަންމައާ ވާހަކަދެއްކޭހެނެއް… މިހާރު ހީވަނީ މޭމްއަކާ ވާހަކަދެއްކޭހެން..” ޒާމިލް ބުނި އެއްޗަކުން ޒާޔާއަށް ހީނލެވުނެވެ. “ފޮނި ވާހަކަނުދައްކަ ހިނގަ ކާފަ ގޮވައިގެން ކާން. ސާފު؟” ޒާޔާ ބުންޏެވެ. “މޭމް ޔެސް މޭމް.” ޒާމިލް ސޯފާއިން ތެދުވެ ދެ އަތް ސީދާކޮށް އެއްފަައި ހިއްލާފައި ތިރިކޮށްލިއެވެ. “މި.. ހުރެބަލަ ނިކަން..” ޒާޔާ އެހެން ބުނެ ތެދުވިއެވެ. އެއާއެކު ޒާޔާގެ އަތު ނުވާންވެގެން ޒާމިލް ނިހާންގެ ކޮޓަރިއާ ދިމާއަށް ދުއްވައިގަތެވެ. ޒާޔާއަށް މަޖާވިއެވެ. މިހެން ސަކަރާތް ޖަހާ އުފާކޮށްނުލެވޭތާ ހާދަ ދުވަހެއް ވެއްޖެއެވެ.
********
އިޒްވާގެ ގޭގައި އަމާނާ ނޫން މީހަކު އެވަގުތު ނޫޅެއެވެ. ހުޅުމާލޭގައި ފުލުހުންގެ އިވެންޓެއް ބާއްވާތީ އިޒްވާ ދިޔައީ އެތަނަށެވެ. ރާމިޝް ވެސް ގެއަކު ނެތެވެ. އެކަކުވެސް ނެތުމުން އަމާނާ ޒަމްލާ ގޮވައިގެން ބަދިގެއަށް އައެވެ. އަދި ޒަމްލާއަށް ކާން ދެވޭތޯ އުޅުނެވެ.
މަޑުމަޑުން ޒަމްލާ ކަމުން ދިޔައިރު އަމާނާ އިނީ ޒަމްލާއަށް ބަލަހައްޓައިގެންނެވެ. ޒަމްލާއަށް ބަލައިފި މީހަކު އެއީ ތޭވީސް އަހަރުވެފައިވާ ޒުވާނެކޭ ނުބުނާނެއެވެ. ޒަމްލާގެ މޫނުމަތިން އުމުރަށްވުރެ ޅަ ކަމަށް ދައްކައެވެ. ގަވާއިދުން ނުކެވޭތީ ޒަމްލާގެ ހަށިގަނޑު ހުންނަނީ ހިކި އަނަރޫފަވެފައެވެ. ހިކިކޮށް ހުއްޓަސް، ޞިއްޙަތު ރަނގަޅު މީހުންވެސް އުޅެއެވެ. އެހެނަސް ޒަމްލާގެ ޙާލަތު މާ ތަފާތެވެ.
“ރަނގަޅަށް ކާތި އިނގެ. އިޒޫ މޭމް ނާންނާނެ އެހާ އަވަހަކަށް. އަންނާނަން ދޮވެފަ ހުރި އެއްޗެހިތައް ހިއްކަން އަޅުވާފަ.” އަމާނާ އެހެން ބުނެ ‘ލޯންޑްރީ ރޫމް’ އާއި ދިމާލަށް ދާން ހިނގައިގަތެވެ. އަމާނާ ދިއުމުން ޒަމްލާގެ ހަމަޖެހުން ގެއްލިއްޖެއެވެ. ކޮންމެ ވަގުތަކުވެސް އިޒްވާ އަތުވެދާނެޔޭ އޭނާގެ ހިތް ބުނަން ފެށިއެވެ. ހިތް ނުތަނަވަސްވެ ހިތް ތެޅެން ފެށިއެވެ. މީހާ ހާސްވެގެން ގޮސް އެންމެ ފަހުން ނޭވާލާން އުނދަގޫވާވަރު ވެއްޖެއެވެ. ރާމިޝްއަށް ގެއަށް ވަދެވުނީ ޒަމްލާ ކާމޭޒުމަތީ ބޯ ޖަހައިގެން އޮއްވައެވެ.
ޒަމްލާގެ ބުރަކަށީގެ ހަރަކާތްތައް ހުރިގޮތުން އޭނާ ފުންކޮށް ނޭވާލަނީކަން އެނގެއެވެ. ނޭވާ ލާފައި ބޭރުކުރާ ގޮތުން ނޭވާލުމުގައި ދަތިތަކެއް އުޅޭކަން ރާމިޝްއަށް ފާހަގަކުރެވުނެވެ. ބޭއިޚްތިޔާރުގައި އޭނާއަށް ޒަމްލާ ކައިރިއަށް ދެވުނެވެ. އަދި ޒަމްލާގެ ދެކޮނޑުގައި ހިފަހައްޓައިލީ ޒަމްލާއަށް ތެދުވަން އެހީތެރިވެދިނުމުގެ ގޮތުންނެވެ. ޒަމްލާ ހީކުރީ އެއީ އަމާނާ ކަމަށެވެ. ދިގު އިސްތަށިގަނޑުން މޫނު ނިވާވެފައިވީތީ އޭނާ ކައިރީ ހުރި ރާމިޝް ލައިގެން ހުރި ގަމީސް ވެސް ނުފެނެއެވެ. ރާމިޝް ފުރުސަތުގެ ބޭނުން ހިފާ، ޒަމްލާ ގޮވައިގެން ޒަމްލާގެ ކޮޓަރިއަށް ދިޔައެވެ. އަދި މަޑުމަޑުން ދޮރު ލަައްޕާލާފައި އައިސް ޒަމްލާއަށް އެނދުގައި އިށީންނަން އެހީތެރިވެދިނެވެ.
ޒަމްލާއަށް އިސްއުފުލާ ބަލައިލެވުނީ ދެނެވެ. ކުރިމަތީ ރާމިޝް ހުރި މަންޒަރު ފެނުމުން ޒަމްލާއަށް ހީވީ އިޒްވާ އައިސް ޒަމްލާގެ ގަޔަށް ވަޅިއެއް ހަރާލަފާނެހެންނެވެ. ގަނެފައިވި ބިރެއްގެ ސަބަބުން ޒަމްލާގެ ސިކުނޑި އޭނާއަށް ދައްކުވައިދިން މަންޒަރަކީ އެއީއެވެ. ހަމައަކަށް ނޭޅިގެން އުޅުނު ނޭވާ އިތުރަށް ލާން ދަތިވެގެން ދިޔައެވެ. ހާސްކަން އިންތިހާއަށް ދިޔައެވެ. އެ ނިކަމެތި ކުއްޖާ ހޭ ހުސްވެގެން ވެއްޓުނީ ރާމިޝްގެ ދެލޮލުގެ ކުރިމަތީގައެވެ.
**********
އައިޖީއެމް ހޮސްޕިޓަލުގެ ވަރޑެއްގެ ދޮރުމަތީ ރާމިޝް ހުއްޓެވެ. ބަލި މީހުންނާއި ޑޮކްޓަރުންނާއި ނަރުހުން އެތަނުގައި އެކި ކަންކަމުގައި އުޅެއެވެ. ވަށައިގެންވި މާހައުލަށް ނަޒަރު ހިންގަމުން ދިޔައިރުވެސް ރާމިޝްއަށް ވިސްނެމުން ދިޔައީ މިރޭ އަމާނާ އޭނާއާއި ޚިއްސާ ކުރި ވާހަކަތަކާ މެދުއެވެ. ޒަމްލާއާއި ބެހޭގޮތުން އަމާނާއަށް އެނގޭ ހަގީގަތެއް ވިއްޔާ އަމާނާ ވަނީ ރާމިޝްއަށް އެކަންކަން ކިޔައިދީފައެވެ. ކޮނޑާ ހަމައަށް އަންނަ ދިގު އިސްތަށިގަނޑުގައި އަތްފުނާ އަޅާލާފައި ޒަމްލާ އެޑްމިޓު ކޮށްފައި އޮތް ވަރޑާއި ދިމާލަށް ހިނގައިގަތެވެ.
ޒަމްލާ ބާއްވާފައި އޮތް އެނދުގެ ވަށައިގެން ހުދު ފަރުދާ ދަމާފައި ހުއްޓެވެ. އެނދުގެ އަރިމަތީ ބަހައްޓާފައި ހުރި ކުޑަ މޭޒުމަތީ މޭވާ ތައްޓަކާއި ފެން ފުޅިއަކާއި ޓިޝޫ ޕެކެޓެއް ބަހައްޓާފައި ހުއްޓެވެ. ރާމިޝް ގޮސް އެނދު ކައިރީ ހުރި ގޮނޑީގައި އިށީނެވެ. އޭނާއަށް އިނދެވުނީ ފުން ނިންޖަކުން ނިދިފައި އޮތް ޒަމްލާގެ މޫނަށް ބަލަހައްޓައިގެންނެވެ.
ރާމިޝް ހިތަށް އެރިއެވެ. އެކަނިމާއެކަނި އިނދެ މި ކުއްޖާ ހާދަ ކަމަކާ އެބަ ހަނގުރާމަކުރެއެވެ. ދުލުން ނުބުންޏަސް، ނިމުމެއްނެތް އެތައް އާދޭހެެއް އެބަ ކުރެއެވެ. ދުލުން ބަޔާން ނުކުރި ކަމުގައި ވިޔަސް ނަފްސާނީ ގޮތުން މިކުއްޖާ ހާދަ ބަލިކައްޓެވެ.
ރާމިޝް އެހެން އިންދާ ވަށައިގެން ދަމާލެވިފައިވި ފަރުދާ ކަހާލާފައި އެތަނަށް ވަނީ އަމާނާއެވެ. “މަންމަ ކޮބާ؟” އަމާނާ ފެނުމާއެކު ރާމިޝް އެހިއެވެ. “އިޒޫ މޭމް ނިދަން ވަދެއްޖެ.” އަމާނާ ބުންޏެވެ. “ޒަމްލާ ނުހޯދާތަ؟” ރާމިޝް ޒަމްލާއަށް ނަޒަރެއް ދިނެވެ. “އާނ.” އަމާނާގެ ޖަވާބު ކުރެވެ. “އަހަރެން ސުވާލެއް ކުރަންތަ؟” އިރުކޮޅެއްގެ ހިމޭންކަމަކަށްފަހު ރާމިޝް އަނެއްކާވެސް އެހިއެވެ. އަމާނާ ބޯ ޖަހައިލިއެވެ. އޭނާގެ މޫނުމަތިން ކޮންމެވެސްވަރަކަށް ނުތަނަވަސްކަމުގެ ކުލަވަރުތައް ފެންނަމުން ދިޔައެވެ. “މިއޮއް ކުއްޖާގެ ހާލަތު އަމާނާއަށް ރަނގަޅަށް އެބަ އެނގޭ.. ނޫންތަ؟ ދެން ކީއްވެ ހަނު ހުންނަނީ؟” އަމާނާ ދެރަވާގޮތްވިއެވެ. އޭނާގެ މަޖުބޫރީ ހާލަތު ރާމިޝްއަށް އެނގޭނެ ނަމައެވެ. ފުރަތަމަ ފަހަރަށް އަމާނާ ރާމިޝްގެ ކުރިމަތީ އޭނާގެ ހިތުގެ ހާލަތު ބަަޔާން ކުރިއެވެ. “ރާމިޝްއަށްވެސް އެނގޭނެ ރާމިޝްގެ މަންމައަކީ މަތީ މަގާމެއްގަ ހުރި މީހެއްކަން. ބާރުގަދަ މީހެއްކަން. މޭމް ބޭނުން ކަމެއް ބޭނުން ވަގުތަކު ކުރެވޭނެ. އަހަރެން މީ މޭމްއާ އަޅާ ބަލާފަ ކާކު؟ ތިއޮއް ދަރިއާ ދޭތެރޭ އަހަރެންގެ ހިތުގަ ވެސް ރަހުމު ވޭ. އެކަމަކު އެކުއްޖާގެ ދިފާއުގަ ތެދުވެއްޖެ މީހެއްގެ ދުވަސް ދާނެ.” ޒަމްލާއަށް ބަލަހައްޓައިގެން ހުރި އަމާނާގެ ދެލޯ ފެންކަޅިވިއެވެ. އެ އަޑު ވަނީ ކުރެހިފައެވެ. ހިތްދަތިކަމުގެ އަސަރުތައް އެ ހިތުގައިވެއެވެ.
ރާމިޝް އިތުރަށް ވާހަކައެއް ނުދެއްކިއެވެ. އެއީ ކޮންމެހެން އަމާނާއަށްޓަކައި އެ ހިތުގައި ހަމްދަރުދީ އުފެދުނީތީވެއެއް ނޫނެވެ. ތިމާއަށްވުރެ ދަށް މީހަކާ ދޭތެރޭ ހެޔޮކޮށް ވިސްނުމަކީ ރާމިޝްގެ މިޒާޖުގައި ހަރުލާފައި ހުންނަ ކަމަކަށް ނުވާތީވެއެވެ. އެގޮތުގައި ދެމީހުން އެތާ ތިއްބައި ޒަމްލާ ބަލަން ހަވާލުވެފައިވި ޑޮކްޓަރ އެތަނަށް އައެވެ. ޒަމްލާގެ ހިތުގެ ހިނގުމާ، ހިތު ވިންދު ހުރިވަރު ބެލުމަށްފަހު ހުރިހާ ކަމެއް ރަނގަޅު ކަމުގައި ބުންޏެވެ. އަދި ގިނައިރުތަކެއް ނުވެ ޒަމްލާ ހޮސްޕިޓަލުން ދޫކޮށްލެވޭނެ ކަމަށް ބުންޏެވެ.
*********
ތަނަވަސް ބޮޑު ކޮޓަރި ތެރޭ އަރާމު ނިންޖަކުން ނިދިފައި އިޒްވާ އޮތެވެ. ކޮޓަރީގައި ހަރުކޮށްފައި ހުރި އެއަރ ކޮނޑިޝަނަރގެ ފިނިހޫނުމިން ސޯޅައިގައި ހުއްޓަސް އިޒްވާއަށް ހޫނުވާން ފެށިއެވެ. ހޫނުވާން ފެށުމުން އިޒްވާއަށް ހޭލެވުނެވެ. ދެ ލޯ އުނގުޅާލައިފައި އޭސީގެ ރިމޯޓު ނެގިއެވެ. އޭގެން ފެނުނު ގޮތުގައި ކޮޓަރި ތެރެ ހުރީ މީހަކު ގަނޑުވާނެވަރަށް ފިނި ގަދަ ކޮށްފައެވެ. އެހެނަސް އޭނާއަށް ވަރަށް ހޫނުވަމުން ދިޔައެވެ. ހޫނުވަމުން ދިޔައީތީ ގައި ކަހަން ފެށިއެވެ.
ގައިގެ އެކި ދިމަދިމާ ކަހަން އިން އިޒްވާ އެއްލި ކަޅިއަކުން އެނދުގެ ފައިލާކޮޅާ ދިމާއިން ކޭއްތެމުން އަންނަ އަތްތިލައެއް ފެނުނެވެ. ލިބުނު ކުއްލި ސިހުމުގައި އިޒްވާގެ ގައިގައި ހުރި ލޯލިތައް ކޮޅަށް ޖެހުނެވެ. އިޒްވާއަށް ހިރިލާކަށް ނުކެރުނެވެ. ރޯމަހެއް ތެޅޭހާ ހަލުވި މިނުގައި އޭނާގެ ހިތް ނެގިނެގިފައި ޖެހެން ފެށިއެވެ. ބިރުން ތުރުތުރު އަޅާ ޙާލު އިޒްވާއަށް އިނދެވުނީ އޭނާއާއި ދިމާލަށް ކޭއްތެމުން އަންނަ އަތްތިލައާ ދިމާއަށް ބަލަހައްޓައިގެންނެވެ. އެ އަތްތިލަ ބޮޑުވެފައި ބާޒެއްގެ ފައިތިލައަކާ ވައްތަރެވެ. ފަސް އިނގިލި އިނަސް ނިޔަފަތިތައް ބާޒެއްގެ ނިޔަފަތިތަކެއް ފަދައިން ދިގުވެފައި ކޮޅު ތޫނެވެ.
އިޒްވާގެ ފަޔާ ހަމައަށް އެ ބިރުވެރި އަތްތިލަ ކައިރިވިއިރު އިޒްވާއަށް އެނދުން ފުންމައިލެވުނެވެ. ދެފަރާތް ބަލަމުން އަވަސްއަވަހަށް ފަހަތަށް ޖެހެން ފެށުނެވެެ. އިޒްވާ ފަހަތަށް ޖެހެމުން ދިޔަ ހަލުވިމިނުގައި އެ އަތްތިލަ ވެސް އޭނާއާއި ދިމާލަށް އަންނަމުން ދިޔައެވެ. އެންމެ ފަހުން ގޮސް އަލަމާރި ކައިރީ ހުރި ބިތުގައި އޭނާގެ ބުރަކަށި ޖެހުނު ހިނދު ދެން ފިލަން ދެވޭނެ ގޮތެއް ނެތްކަން އިޒްވާއަށް އެނގިއްޖެއެވެ. ނަފްސު ވަށައިގެން ރަސްކަން ކުރަމުން ދިޔަ ބިރުވެރިކަން ދެގުނަ ވެގެން ދިޔައެވެ. ބިރުވެރި ފިލްމަކުން ވެސް ދެކެފައިނުވާ ފަދަ ބިރުވެރި ކަންކަން އޭނާގެ ދެ ލޯ ކުރިމަތީ މި ދަނީ ހިނގަމުންނެވެ.
ވަށައިގެންވި ފަނޑު އަލިކަމުގެ ތެރެއިން ކުއްލިއަކަށް އިޒްވާގެ މޫނާ ޖެހޭނުޖެހޭހާ ކައިރިން ކަޅު ހިޔަންޏެއް ފާޅުވިއެވެ. ހިޔަނީގެ ބައްޓަން ހުރި ގޮތުން އެއީ އިންސާނެއްގެ މޫނެއްހެން ހީވެއެވެ. އިޒްވާއަށް އިނދެވުނީ ނޭވާ ހިފަހައްޓައިލައިގެންނެވެ. ދެން ވާނެ ގޮތެއް ނޭނގިފައެވެ. އެ ހިޔަނި އޭނާއާ މަޑުމަޑުން ދުރަށް ޖެހެން ފެށީ އިޒްވާ ބަލަހައްޓައިގެން އިންދައެވެ.
އޭތި ދުރަށް ޖެހެމުން ދިޔަ ވަރަކަށް އޭގެ ފަހަތުން ދުންތަކެއް އަރަން ފެށިއެވެ. ދެއަތް ފުޅާކޮށްގެން އޭތި ހުރިއިރު އޭތީގެ އިސްކޮޅު ދިގުވަމުން ގޮސް ސީލިންގުގައި އޭގެ ބޯ ޖެހިއްޖެއެވެ. އަދި އިސްޖަހައިލަމުން އޭތީގެ ދެ އަތް ތިރިކޮށްލިއެވެ. އޭރުވެސް އޭގެ ފަހަތުގައި ދުންތައް ދައުރުވަމުން ދިޔައެވެ. ކުއްލިއަކަށް އޭތީގެ ދެލޯ ހުޅުވައިލިއެވެ. ދެ ލޯ އަލިފާން ކުލައިގައި ހުރިއިރު އޭތި ހުރީ އިޒްވާއާ ދިމާލަށް ދެ ލޯ އަޅައިގެންނެވެ. ރުޅި އައިސް ފަޅައިގެންދާ ޙާލުގަައެވެ. އިޒްވާއަށް އޭގެ ސޫރަ ފެނުމާއެކީ ބިރުން ރޮވެން ފެށިއެވެ. ހަތަރު އުދަރެސް ފެނު ޖެހިއްޖެއެވެ. އޭނާއަށް ހީވީ ބިރުވެރި ކިއްލާއެއް ތެރޭ ތާށިވެފައި އިންހެންނެވެ.
އޭތި މަޑުމަޑުން އިޒްވާއާއި ދިމާއަށް ގުދުވެލިއެވެ. އިޒްވާއަށް ހިންދިރުވައިލެވުނެވެ. “ކަލޭ މަރާލަން އަހަރެން މި އައީ.. މަރުވާން ބޭނުންތަ؟” އެއީ އަންހެން އަޑެއްކަމަކު އެ އަޑު ބަރުވެފައި ބާރެވެ. އިޒްވާއަށް ބިރުން ދެ ފަރާތަށް ބޯ ހޫރުވައިލެވުނެވެ. “އެހެންކަމަށް ވަންޏާ އެމީހުނަށް ކަލޭ ތި ކުރާ އަނިޔާ ހުއްޓާލާ!” އަމުރުވެރި ރާގަކަށް އޭތި ބުންޏެވެ. “ކޮންބައެއްތަ؟” އިޒްވާއަށް އެހެން އެހުނު ހިނދު ހީވީ އޭނާގެ މޫނުމަތިން ތަރިބުރައިގެން ދިޔަހެންނެވެ. އިޒްވާގެ ކޯތާފަތަށް އޭތި ހޫނު އެތިފަހަރެއް ވީއްލައިލީއެވެ. ކޮލުގައި އޭތީގެ ތޫނު ވަކިތައްވެސް އެހިނދު އެޅިގެން ދިޔައެވެ. “ޖެއްސުމަށް ކަލޭ މަށާ ވާހަކަ ނުދައްކައްޗޭ އިނގެ!!! އަޑުއަހައްޗޭ.. ޒާޔާމެނަށް ކަލޭ ދޭން އުޅޭ އެއްވެސް ހަމަލައެއް ކާމިޔާބެއް ނުވާނެ. ލިއަމް ކަލޭ ކައިރިން ސަލާމަތް ކުރަނީ ވެސް އަހަރެން.. ލިއަމްގެ ދަރިފުޅު ޒަމްލާ ވެސް. އޭނާގެ އަންހެނުންވެސް.. މަ ސަލާމަތް ނުކުރާނީ ކާކުކަން ބުނަންތަ…؟ އެއީ ކަލޭ!!” އޭތި ބުނަންވީ އެއްޗެއް ބުނެ އޭތީގެ އަތަށް މިޔަ ތޫނު ކަނޑި ހެޔޮވަރުކޮށްލިއެވެ. މާ ސިންގާ ކަނޑިއެއް ފެނުމުން އިޒްވާ ބިރުން ނޫނެކޭ ކިޔާ ރޯން ފެށިއެވެ.
ނޫނެކޭ ކިޔައި ރޮއެ ހަޅޭއްލަވަން އިންދައި އޭތި އަތް ދަމާލާފައި އިޒްވާގެ ކަރުގައި އެ ކަނޑިން ޖެހިއެވެ. އިޒްވާގެ އަޑު އެކީ ކެނޑި އެ ކަރު ބުރިވެގެން ގޮސް މުޅިތަނަށް ލޭތައް ބުރައިގެން ދިޔައެވެ.
ـނުނިމޭ-
އާރާ 5
އާއެކޭ ލޯބިވޭ… ފަސްދޮޅަސްހަވަނަބައި (ލިޔެވި އެ ނިމުނީ ހަޤީޤަތެއް)
