ވާނަމަ އިރާދާގާ 4

ދުވަސްތައް އޭގެ ހަލުވި ދުވެލީގައި ފާއިތުވަމުން ގޮސް، ރީޝާގެ ބަނޑަށް ނުވަ މަސް ފުރިއްޖެއެވެ. އެ ކުޑަކުޑަ އާއިލާއަށް އުފާވެރިކަމާއި އުންމީދުގެ އައު ދިރުމެއް ގެނެސްދޭނޭ ތުއްތު ފުރާނަ ދުނިޔެއަށް ނޭވާލާނޭ ވަގުތު އޮތީ ވަރަށް ގާތުގައެވެ. މަޝާޢު އޮފީހުގެ ވަޒީފާ ނިންމާލުމަށްފަހު، އެހެން ހުރިހާ ކަމެއް އެއްކައިރިކޮށް، މުޅި ދުވަހުގެ ހުރިހާ ވަގުތެއް ހުސްކުރަމުން ދިޔައީ ލޯބިވާ އަނބިމީހާ ރީޝާގެ ޚިދުމަތުގައެވެ. ރީޝާގެ ކޮންމެ ހަރަކާތަކަށް، ކޮންމެ ބޭނުމަކަށް މަޝާޢު ހުންނަނީ ނުހަނު ލޯތްބާއި ކުލުނާއެކު ސަމާލުވެގެންނެވެ. ފައި ދުޅަވެގެން އުނދަގޫވާ ވަގުތުތަކުގައި ފައި މޮޑެދިނުމާއި، ކާހިތްވާ އެއްޗެހި ހޯދައިދިނުމުގައި މަޝާޢު ދެއްކި އަޅާލުމަކީ ރީޝާގެ ހިތުގައި މަޝާޢުއަށް އޮތް ލޯބި އެތައް ގުނައަކަށް އިތުރުކޮށްދިން ކަމެކެވެ.

މި އުފާވެރި ދުވަސްތަކުގައި، ރީޝާގެ މައިންބަފައިންވެސް މާލެއިން ތިނަދުއަށް އައީ އެމީހުންގެ ފުރަތަމަ ކާފަދަރިފުޅު ދުނިޔެއަށް އަންނަ މަތިވެރި ވަގުތުގައި ބައިވެރިވެ، ދަރިފުޅަށް ހިތްވަރު ދިނުމަށެވެ. ގޭތެރޭގައި އޮތީ އުފާވެރި، އެހާމެ ހަލަބޮލި މާޙައުލެކެވެ. މަޝާޢުގެ މަންމަ ޚަދީޖާދައްތައާއި ރީޝާގެ މަންމަ ޒާހިރާ، ތުއްތު ދަރިފުޅަށް ބޭނުންވާނޭ އަންނައުނުތައް ތަރުތީބުކޮށް، ދޮވެ އިސްތިރިކުރުމުގައި މަސްއޫލުވެ އުޅުނުއިރު، ދެ އާއިލާގެ މެދުގައި އޮތް ގުޅުން ވަނީ ކުރިއަށްވުރެވެސް ބަދަހިވެފައެވެ.

އެއްދުވަހެއްގެ ފަތިހުގެ ހަމަހިމޭން ވަގުތެވެ. މުޅި ދުނިޔެ އަރާމު ނިދީގައި އޮއްވައި، ރީޝާއަށް ވިހަން ބަނޑުގައި ރިއްސަން ފެށިއެވެ. ލަސްތަކެއް ނުކޮށް މަޝާޢުއާއި އާއިލާގެ އެހީތެރިކަމާއެކު ރީޝާ ގެންދެވުނީ ޑރ. ޢަބްދުއްޞަމަދު މެމޯރިއަލް ހޮސްޕިޓަލަށެވެ. އެ ފިނިފިނި ފަތިހުގެ ހަމަހިމޭންކަން ފޫއަޅުވާލީ، ހޮސްޕިޓަލުގެ ވިހާ ކޮޓަރިން އިވިގެން ދިޔަ ތުއްތު ކުއްޖެއްގެ ލޯބި ރުއިމުގެ އަޑުންނެވެ.

މާތް ﷲ ގެ ބޮޑުވެގެންވާ ރަޙްމަތްފުޅާއި އޯގާވަންތަކަމުން، ރީޝާ ވިހެއީ ޞިއްޙަތު ރަނގަޅު، އުޖާލާ މޫނެއްގެ ވެރި ނުހަނު ލޯބި ފިރިހެން ކުއްޖެކެވެ. ވިހެއުމުގެ ވޭނާއި ތަކުލީފުތަކަށްފަހު، ދަރިފުޅުގެ އަޑު އިވުމާއެކު ރީޝާގެ ހުރިހާ ވަރުބަލިކަމެއް ފިލައި، ހިތް އުފަލުން ފުރިގެން ދިޔައެވެ.

ހޮސްޕިޓަލުގެ ޕްރައިވެޓް ރޫމްގެ އެނދުގައި ރީޝާ އޮތްއިރު، އޭނާގެ ގާތުގައި މަޝާޢު އިނީ އެމީހުންގެ ލޯބީގެ ނިޝާން ކަމުގައިވާ ތުއްތު ދަރިފުޅު އަތްދަނޑިމައްޗަށް ލައިގެންނެވެ. އެ މައުސޫމު މޫނަށް ބަލަހައްޓައިގެން އިން މަޝާޢުގެ ލޮލުން އުފާވެރިކަމުގެ ކަރުނަ ފައިބަމުން ދިޔައެވެ. އޭނާ މަޑުމަޑުން އެ ކުޑަކުޑަ ނިތްކުރީގައި ބޮސްދިނެވެ. އެވަގުތު، ޚަދީޖާދައްތައާއި ރީޝާގެ މައިންބަފައިން ކޮޓަރިއަށް ވަދެގެން އައީ މޫނުމަތިން ފިސާރި ފުޅާ ހިނިތުންވުމަކާއެކުގައެވެ. ދެމައިންގެ ލޮލުންވެސް ފެންނަމުން ދިޔައީ ކާފައާއި މާމަ ކިޔާނެ ދަރިއަކު ލިބުމުގެ ފަޚުރުވެރި އިހުސާސެވެ.

މަޝާޢު މަޑުމައިތިރިކަމާއެކު ރީޝާގެ އަތުގައި ހިފާލިއެވެ. އަދި އޯގާތެރިކަމާއެކު ބުންޏެވެ.
“ރީޝާ… ހަނދާން އެބަހުރިތަ އަހަރެމެން އެންމެ ފުރަތަމަ ގޮނޑުދޮށުގައި ތިބެގެން ދެއްކި ވާހަކަ؟ ދިރިއުޅުމުގެ އުސްމިންތަކާއި އަޑިގުޑަންތަކާ އެކުވެސް، އެއްބަޔަކު އަނެއް ބަޔަކަށް ވަފާތެރިވެ، ކެތްތެރިވާން ވީ ވަޢުދު؟ މިއަދު މި ފެންނަނީ އެ އުންމީދުތަކުގެ ފޮނި ނަތީޖާ.”

ރީޝާ ފުން ލޯތްބަކާއި ކުލުނަކުން ފުރިގެންވީ ނަޒަރަކުން މަޝާޢުއަށާއި، ދެމީހުންގެ އަތްދަނޑިމަތީގައި އޮތް ތުއްތު ދަރިފުޅަށް ބަލައިލިއެވެ. އެ މޫނުމަތިން ފެންނަނީ ހިތްހަމަޖެހުމާއި ޝުކުރުވެރިކަމުގެ އަސަރެވެ.

“ހަނދާން އެބަހުރި މަޝާޢު،” ރީޝާގެ އަޑުގައި ވަނީ ޖަޒުބާތީ ފުން އަސަރެކެވެ. “އަހަރެން އަބަދުވެސް ބުނި ފަދައިން، ދެ ހިތް އެކުވެ، އެކުގައި ވުމަށް ތަޤުދީރުގައި ލިޔުއްވާފައި ވާނަމަ އިރާދައިގާ ހުރިހާ ކަމެއްވެސް ވާނީ އެންމެ ރީތިކޮށް. އަލްޙަމްދުލިއްﷲ. އަހަރެމެންގެ މި ކުޑަކުޑަ އާއިލާއަށް މާތް ﷲ ދެއްވި މި ބޮޑު ނިޢުމަތަށްޓަކައި އަބަދުވެސް ޝުކުރުކުރާނަން.”

މުޅި ކޮޓަރިތެރެއަށް ވެރިވެފައިވަނީ އުފާވެރިކަމާއި، ހިތްހަމަޖެހުމާއި، ރޫޙާނީ އަލިކަމެކެވެ. ލޯތްބާއި، އިތުބާރާއި، ކެތްތެރިކަމުގެ މަތީގައި ބިނާކުރެވުނު އެ ދިރިއުޅުމުގެ ބިންގާ، މިއަދު މިވަނީ އެ މައުސޫމު ތުއްތު ފުރާނައިގެ ސަބަބުން އިތުރަށް ވަރުގަދަވެ، ފުރިހަމަވެފައެވެ. ދުޢާއަކީ އެ ތުއްތު ދަރިފުޅަކީ މައިންބަފައިންނަށް ހެޔޮލަފާ، އިސްލާމީ ރިވެތި އަޚްލާޤުގެ މަތީގައި ތަރުބިއްޔަތުވާ، ދެދުނިޔޭގެ ބާއްޖަވެރިކަން ލިބިގެންވާ ދަރިއެއް ކަމުގައި ލެއްވުމެވެ. އެ ދެމަފިރިންގެ ލޯބީގެ ވާހަކަ ނިމިގެން ދިޔައީ، ޙަޤީޤީ ލޯތްބަކީ ކެތްތެރިކަމާއެކު މާތް ﷲ އަށް ވަކީލުކުރުމުން ޙާޞިލުވާ މަތިވެރި ނިޢުމަތެއްކަން ދުނިޔެއަށް ސާބިތުކޮށްދެމުންނެވެ.

ނިމުނީ