ހިތުގެ މަގުތައް-10

ޒައިންގެ ބައްޕަ ޤާސިމްގެ ކުއްލި މެސެޖުން ޒައިން އާއި ޝައިހާގެ ހިތްތަކަށް ވެރިވީ ނޭނގޭ ހާސްކަމެކެވެ. ރޭގަނޑުގެ ކެއުމަށް ހަމަޖެހިފައި އޮތް ވަގުތު ކައިރިވަމުންދިޔަ ވަރަކަށް، ޒައިންމެންގެ ބޮޑު ގޭގެ ސިޓިންގްރޫމް ތެރޭގައި ވަނީ ވަރަށް ފުރިހަމައަށް ތައްޔާރުވެފައެވެ. މޭޒުމަތީގައި ތަފާތު ވައްތަރުގެ މީރު ކާތަކެތި އަތުރާލާފައި ހުއްޓެވެ.

ޝައިހާ އޭނާގެ މަންމަ އާއި ބައްޕާއާއެކު އެގެއަށް ވަތްއިރު، އޭނާގެ ހިތް ބާރަށް ތެޅެމުންދިޔައެވެ. ނަމަވެސް ޒައިން ކުރިއަށް އައިސް ހިނިތުންވުމަކާއެކު އެމީހުންނަށް މަރުހަބާ ކިއުމުން ޝައިހާގެ ހިތަށް ކުޑަ ހަމަޖެހުމެއް ލިބުނެވެ. ޤާސިމް ސޯފާއިން ތެދުވެ، ޝައިހާގެ ބައްޕަ އަޙްމަދާ ސަލާމްކޮށްލަމުން ވަރަށް ގާތްކޮށް ވާހަކަދައްކަން ފެށިއެވެ.

ކެއުމުގެ ވަގުތުގައި ދެ އާއިލާގެ މެދުގައި ދެެކެވުނީ ވަރަށް އުފާވެރި، ގާތް ވާހަކަތަކެކެވެ. ޤާސިމްގެ މޫނުމަތިން ކުރިން ފެނުނު ހަރުކަށިކަމެއް މިރެއަކު ނެތެވެ. ކެއުން ނިމި، ސައިބޯން ތިބި ވަގުތު ޤާސިމް އަޙްމަދަށް ބަލައިލަމުން ވާހަކަދައްކަން ފެށިއެވެ.

“އަޙްމަދު، އަޅުގަނޑު މިރޭ ތިޔަ ބޭފުޅުންނަށް މި ދައުވަތު ދިނީ ވަރަށް ބޮޑު ކަމަކު،” ޤާސިމްގެ އަޑުގައި ސީރިއަސްކަން ހުއްޓެވެ. “ޒައިން އާއި ޝައިހާ އެކަކު އަނެކަކުދެކެ ލޯބިވާކަން އަޅުގަނޑަށް އެނގޭ. އަދި ދެކުދިންވެސް ކިޔަވާ ނިމެންދެން މަޑުކުރަން އަޅުގަނޑު ކުރިން ބުނިން. އެކަމަކު އަޅުގަނޑު ވިސްނާލިއިރު، މި ޒަމާނުގައި ކުދިންގެ ގުޅުން ހަލާލު ގޮތުގައި ކުރިއަށް ގެންދިއުމަކީ އެންމެ ރަނގަޅު ގޮތް. އަޅުގަނޑު ބޭނުންވަނީ އަންނަ މަހުގެ ތެރޭގައި ދެކުދިންގެ ރަންކިޔުން ނުވަތަ ކައިވެނީގެ ކުރިން ކުރަންޖެހޭ ރަސްމީ ކަންތައްތައް ނިންމާލަން. ކައިވެނި ކުރިޔަސް ކިޔެވުން ކުރިއަށް ގެންދެވޭނެ.”

ޤާސިމްގެ އެ ބަސްތަކުން ޒައިން އާއި ޝައިހާއަށް ލިބުނީ ބޮޑު ސިހުމަކާއި އިންތިހާ އުފާވެރިކަމެކެވެ. ޝައިހާގެ ބައްޕަވެސް ހިނިތުންވެލަމުން ޤާސިމްގެ ޚިޔާލަށް ތާއީދުކުރިއެވެ. “ތިޔައީ ވަރަށް ރަނގަޅު ވާހަކައެއް ޤާސިމް. އަޅުގަނޑުގެވެސް އެއްވެސް އިއުތިރާޒެއް ނެތް.” ދެ އާއިލާގެ މެދުގައި ކައިވެނީގެ ފުރަތަމަ ފިޔަވަޅު އެޅިގެންދިޔައީ ހީނުކުރާހާ ފަސޭހައިންނެވެ.

ޖެހިގެން އައި ދުވަހު، ޒައިން އާއި ޝައިހާ ކޮލެޖަށް ގޮސް އެންމެންނަށް މި ޚަބަރު ދިނެވެ. ކެންޓީނުގައި ތިބި އަފްލާޒް، ޔަޝްމީ، ޔައިޝް އަދި ލިޔުޝާ އުފަލުން ހަޅޭއްލަވައިގަތެވެ.

“ޔޭސް! ތހިސ ކޮންގްރެޓްސް މޭން! އަހަރެމެންގެ ގްރޫޕުން އެންމެ ފުރަތަމަ ކައިވެނި މި ކުރަނީ ޒައިންމެން ދޯ!” ޔައިޝް ޒައިންގެ ގައިގައި ބައްދާލަމުން ބުންޏެވެ. ޔައިޝްގެ މޫނުމަތިން މިހާރު ފެންނަނީ ކުރީގެ އުފާވެރި ހިނިތުންވުމެވެ. ލިޔުޝާ އޭނާގެ އަތުގައި ހިފާލައިގެން އިނީ ވަރަށް ފަޚުރުވެރިކަމާއެކުގައެވެ.

“އަހަރެމެން ހުރިހާ ކަމެއް ތައްޔާރުކުރާނީ،” ޔަޝްމީ ޝައިހާގެ އަތުގައި ހިފާލަމުން ބުންޏެވެ. “ވެޑިންގް ޕްލޭނިންގްގެ ހުރިހާ ކަމެއް ކުރާނީ އަހަރެމެން އަންހެން ކުދިން.”

އެންމެން އުފާ ކުރަމުން ދިޔައިރު، އަފްލާޒް އިނީ ކުޑަކޮށް ވިސްނުމަކަށް ގެއްލިފައެވެ. ޔަޝްމީއަށް އެކަން ފާހަގަކުރެވިގެން ކެންޓީނުން ނުކުމެގެން ހިނގާލާފައި ދިޔަ ވަގުތު އަހައިލިއެވެ. “އަފްލާޒް، ކިހިނެއްވީ؟ ޒައިންމެންގެ ކަންތައް އެހާ ފުރިހަމައަށް ހަމަޖެހުނީމާވެސް މާ ބޮޑަށް ވިސްނަނީ؟”

އަފްލާޒް ޔަޝްމީގެ މޫނަށް ބަލައިލިއެވެ. “ޔަޝް… އަހަރެން ޒައިންމެންނަށްޓަކައި ވަރަށް އުފާވޭ. އެކަމަކު އަހަރެންގެ ހިތަށް އަރަނީ އަހަރެމެންގެ ދިރިއުޅުމާ މެދު. ޔަޝްމީގެ ބޭބެ ބުނީ ކިޔަވާ ނިމިގެންނޭ ރަސްމީކޮށް ގުޅޭނީ. އަދި ކިޔަވާ ނިމެން ދެ އަހަރު އެބައޮތް. އަހަރެން ބިރުގަނޭ އެ ދެ އަހަރުގެ ތެރޭގައި އެހެން ހުރަހެއް އަތުވެދާނެތީ. ލޯތްބަކީ ކޮންމެ ފަދަ އިމްތިހާނެއްވެސް ކުރިމަތިކުރުވާ އެއްޗެއް.”

ޔަޝްމީ އަފްލާޒްގެ އަތަށް ބާރުކޮށްލިއެވެ. “އަފްލާޒް، ޔައިޝްމެންގެ ހާދިސާއިން އަހަރެމެންނަށް ދަސްވީ ކޮންމެ ފަދަ ކަމެއް ދިމާވިޔަސް އެކަކު އަނެކަކަށް އިތުބާރު ކުރަން. އަހަރެންގެ ހިތް އަބަދުވެސް އޮންނާނީ އަފްލާޒްއާއެކު. ވަގުތު އައުމުން ބޭބެވެސް އަހަރެމެންނަށް ހުއްދަދޭނެ.”

އެދުވަހުގެ ހަވީރު، އަފްލާޒް ގެއަށް ގޮސް ކޮޓަރީގައި އިންދާ އޭނާގެ ފޯނަށް ކޯލެއް އައެވެ. ބަލައިލިއިރު އެއީ ޔަޝްމީގެ ބޭބެ ސާޖިދުގެ ނަންބަރެވެ. އަފްލާޒްގެ ހިތް ބާރަށް ތަޅިގަތެވެ. ހެނދުނު ހިތަށް އެރި ބިރުވެރިކަން ހަގީގަތަކަށް ވަނީ ބާވެއެވެ؟

“ހެލޯ، ސާޖިދުބޭ؟” އަފްލާޒް ފޯނު ނަގާ އަހައިލިއެވެ.

“އަފްލާޒް، ވަރަށް އަވަހަށް އަހަރެން ބުނާ ކެފޭއަށް އައިސްދީބަލަ. ޔަޝްމީއަށް ނޭނގޭ ގޮތަށް. ވަރަށް ބޮޑު ކަމެއް ދިމާވެއްޖެ،” ސާޖިދުގެ އަޑުގައި ހުރި ހާސްކަމުން އަފްލާޒްގެ މުޅި ހަށިގަނޑު ފިނިވެގެންދިޔައެވެ.

ނުނިމޭ!

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.