އިންތިޒާރުގައި ހުރިން (9)

“އައްސަލާމް އަލައިކުމް… އޭޑީކޭ ހޮސްޕިޓަލް…” އެކޮޅުން ފޯނު ނެގުމާއި އެކު ބުނެލިއެވެ. “ވައަލައިކުމް ސަލާމް…. ތިކޮޅުން ޖޮބްއަކަށް އިއުލާންކޮށްލައްވާފައި އިނީމަ…. އަދިވެސް ބަލައިގަންނަންތޯ އެޕްލިކޭޝަންތަށް؟” ސުމާ ސުވާލުކޮށްލިއެވެ. ވާހަކަ ދެއްކީ ކިތަންމެ ރީތިކޮށްނަމަވެސް އޭނާ ހުރީ ބިރުގަނެފައެވެ.

“އާދެ… މާދަން ނޫން އަނެއްދުވަސް އެއީ ޑިއު ޑޭޓް.. އަދިވެސް ފޮނުވާލެވިދާނެ….” އެކޮޅުން ވާހަކަދެއްކިއެވެ. ސުމާ ވަޒީފާއާއި ބެހޭ މައުލޫމާތު އޮޅުން ފިލުވާލިއެވެ. އަދި ބޭނުންވާނެ އެއްޗެހި އޮޅުންފިލުވާލާ ފޯނު ކަނޑާލީ ހިތްހަމަޖެހިގެން ހުރެއެވެ. އަވަސްއަވަހަށް ބައެއް މުހިންމު މައުލޫމާތުތަށް ހޯދައިގެން އެ ތަކެތީގެ ފޮޓޯ ކޮޕީ ނަގާލުމަށްފަހު އޭޑީކޭ ހޮސްޕިޓަލުން ދެއްވި އީމެއިލްއަށް ފޮނުވާލިއެވެ. ސުމާ ހިތްބިރުގަންނަންފެށީ އޭނާއަށް ވުރެންވެސް ޤާބިލްކުދިން ތިބޭނެކަން އިނގި އޭނާއަށް ވަޒީފާ ނުލިބިދާނެތީއެވެ. އޭނާއަށް މިހާރު ވަޒީފާއަކީ ވަރަށް މުހިންމު އެއްޗެކެވެ. ސުމާ ލެޕްޓޮޕް ކޮޓަރިއަށް ލުމަށްފަހު ބޮލަށް ބުރުގާ މަހާލައިގެން ބޭރަށް ނިކުމެލީ އެ ހަބަރު މިޝްޔާމެންނަށް ދިނުމަށްޓަކައެވެ. އޭނާއާއި އެންމެ ގާތްކޮށް އުޅެނީ އެމީހުންނާއި ކަމަށްވެފައި އުފާވެރިކަމެއް ދިމާވުމުން މީހެއްކައިރި ނުބުނެ ހުރުން ސުމާއަށް އުނދަގޫވާތީއެވެ. ލިފްޓް ގްރައުނޑްފްލޯރ ގައި އިނުމުން ލަސްވާނޭ ހިތާ ސިޑިން ފައިބަމުން ދިޔަ ސުމާގެ ހިތް ހުރީ އަވަސްވެފައެވެ. އެ ކަމުގެ ސަބަބުން މިޝްޔާ އުޅޭގޭގެ ބެލްވެސް ޖެހުނީ ދެތިން ފަހަރުއެވެ. އެކޮޅުން ދޮރު ހުޅުވި މަރިޔަމް ހުރީ ހާސްވެފައެވެ. ކަމެއްވީކަމަށް ހިތާ އޭނާ ސުމާއާއި ދިމާލަށް ބަލަން ހުރީ ދެލޯ ބޮޑުކޮށްލައިގެން ހުރެއެވެ.

“ކިހިނެއްވީ ސުމްކޮ؟؟؟؟” މަރިޔަމް ސުމާއާއި ދިމާ ބަލައިލަމުން ބުނެލިއެވެ. އޭނާގެ އަޑުގައިވަނީ ހާސްކަމެވެ. “މަރީ ދައްތާ…………..އަޅުގަނޑު ވަޒީފާއަކަށް އެޕްލައި ކޮށްފިން…” ސުމާ މަރިޔަމް ގައިގާ ބައްދާލަމުން ބުނެލިއެވެ. ސުމާހުރީ އެ ވަޒީފާއަށް ކުރިމަތި ލެވުމުންވެސް އުފާވެފައެވެ. އޭނާގެ ހުވަފެންތަށް ސީދާ ކުރެވޭނެ ފުރަތަމަ ފިޔަވަޅަކީ އެއީއެވެ. ވަޒީފާ ނުލިބުނަސް އަދިވެސް އޭނާ މަސައްކަތްކުރާނެއެވެ. މަރިޔަމް ސުމާގެ ކޮނޑުގައި އަތްހާކާލިއެވެ. “އިރާދަކުރެއްވިއްޔާ ސުމްކޮއަށް ލިބޭނެ ވަޒީފާ…” މަރިޔަމް ހީކުރީ ސުމާ ހުރީ ބިރުގަނެފައި ކަމަށެވެ. ރީހަންމެންވެސް ފުރަތަމަ ވަޒީފާއަށް ކުރިމަތިލިއިރު އުޅުނީ ހަމަމިހެންނެވެ. ސުމާ މަރިޔަމް ކައިރިން ދުރަށްޖެހިލިއެވެ. “ދައްތާ…. އެކަމް އަޅުގަނޑަށްވުރެ މޮޅު ކުދިންވެސް ތިބޭނެ އެއްނު.. އެކަމަށް ގާބިލުކުދިން…” ސުމާ އޭނާގެ ހިތްބަންޑުންކޮށްލިއެވެ. ހިތުގައި ވީ ވާހަކަތަށް ހިއްސާކޮށްލަން ބޭނުންވީއެވެ. ބޮޑުމީހެއްގެ ކައިރިން މިފަދަ ކަމަކަށް ލަފާ ހޯދުން އެއީ އެންމެ ރަނގަޅުކަން ކަމުގައި ސުމާއަށް އެވަގުތު ވިސްނުނެވެ. ” ސުމްކޮ ހުއްޓާ އިތުރު މީހަކަށް ނުލިބޭނެ. މަރީދައްތަ ބުނީތީވެސް ބަލަންހުންނާތި.. އިރާދަކުރެއްވިއްޔާ ހަމަ ސުމްކޮއަށް ވަޒީފާ ލިބޭނީ..” ސުމްގެ އަތުގައި ހިފައިގެން އެތެރެއަށް ވަންނަމުން މަރިޔަމް ބުނެލިއެވެ.

ރޭގަނޑުގަޑީގައި އެހާ ގިނައިން ބެލްޖެހި އަޑުއިވިގެން ކޮޓަރިތެރޭ އޮތް ރީހަންއާއި މިޝްޔާވެސް ކޮޓަރިން ނިކުތެވެ. އެވަގުތު މަރިޔަމް ސުމާ ގެންގޮސް ސޯފާގައި ބައިންދަނީއެވެ. “ކިހިނެއްވީތަ ސުމް؟؟” ރީހަން އެމީހުންނާއި ކައިރިވެލަމުން ބުނެލިއެވެ. މިޝްޔާ ސުމާއާއި ދިމާ ބަލަންހުރެ ރީހަންގެ ފަހަތުން ހިނގާފައި އައެވެ. “ހެހެ.. އެއީ ޖޮބްއަކަށް އެޕްލައި ކުރީމަ.. އެވާހަކަ ބުނެލަން..” ސުމާ ބުނެލީ ލަދުގަނެފައި ހުރެގެންނެވެ. އޭނާގެ ސަބަބުން އެމީހުންނަށް އުނދަގޫވީއޭ ހިތާއެވެ. “ދެން ލިބުނީތަ؟؟؟؟” މިޝްޔާ އެހެން ބުނެލީ ސުމާ އެހާ ގިނައިން ބެލްޖަހާފައި ގެއަށް އެއައީ ވަޒީފާ ލިބުނީމަކަމަށެވެ. “ނޫން.. އެޕްލައި ކޮށްގެން މިއައީ..” ސުމާ އިސްޖަހާލައިގެން ހުރެ ބުނެލިއެވެ. އޭނާއަށް މާ ބޮޑަށް އުފާވެވުނީއެވެ. “ހަހަހަ.. ސާބަހޭ ސުމްކޯ…. އަދި ވަޒީފާ ލިބުނީމަ ކިހިނެއްބާ ވާނީ…” ރީހަން ހޭންފެށިއެވެ. ސުމާ މަރިޔަމްއާއި ދިމާ ބަލައިލީ ރީހަން މަލާމަތްކުރާތީއެވެ. “ރީހަން.. ދެން އެއީ ހޭވަރުކަމެއްނޫނޭ….. ސުމްކޮ ހަބަރު ދޭން އެއައީ ދޯ.. ހަމައެހެން އުޅުނީ ރީހަންވެސް ވަޒީފާއަށް ފުރަތަމަ ލީއިރު… ދެން ކޮންއިރަކުން ގުޅާނީ؟” މަރިޔަމް އެއްފަހަރު ރީހަންއަށް އަނެއްފަހަރު ސުމާއާއި ވާހަކަދެއްކިއެވެ. “ހީވަނީ ދެތިން ދުވަސް ތެރޭ ގުޅާނެހެން….” ސުމާ ބުނެލީ ހީލުމަށްފަހުގައެވެ. ރީހަން މޫނުކުނިކޮށްގެން އެތާހުރުމުން މިޝްޔާ ހޭންފެށިއެވެ.

“ސުމްއަށް ޖޮބް ލިބުނީމަ މިގެއަށް ދޯ ޒިން ގެންނާނީ.. ޕްލީސް ސުމް… ޕްލީސް ޒިން މިގެއަށް ގެނޭ…” މިޝްޔާ ކުއްލިއަކަށް އެހެން ބުނެލިއެވެ. އޭނާ ކުޑަކުއްޖަކު އާދޭސްކުރާ އުސޫލުން ސުމާ ކައިރި އާދޭސްކުރަމުންދިޔައެވެ. “އަޅެ، ދެން އެހެން ގެއެއްވެސް ނެތޭ ޒިން ބަހައްޓާކަށް… ދެން ލިބުނީމަ އިނގޭނީ…” ސުމާ ބުނެލީ ވަރަށް ހިނިއައިއްސާހުރެެއެވެ. “އުނހު ލިބޭނެ ހަމަ… ޒިން އަންނާނީވެސް މިގެއަށް… އިރާދައިން…އޯކޭކޭކޭކޭ؟؟؟” ރީހަން ވެސް މިޝްޔާއައި އެއްބައިވެލަމުން ބުނެލިއެވެ. “ހަހަ އޯކޭ…” ސުމާ ބުނެލިއެވެ. ކުޑައިރުކޮޅަކު ވާހަކަ ދައްކަން ހުރުމަށްފަހު ސުމާ ދަނީއޭ ބުނެ ނިކުމެގެން ދިޔައީ އެންމެންނަށްވެސް ބާއްޖަވެރި ރެއަކަށް އެދުމަށްފަހުގައެވެ. ސުމާ ގެއަށްވަދެ ތަޅުލުމަށްފަހު ނިދަން އޮވެލީ އެތަށް ހުވަފެންތަކެއް ސީދާ ކުރެވޭނެ ކަމުގެ އުއްމީދުގައެވެ

……..

އާ ދުވަހަކަށް އިރު އެރުމާއި އެކު ސުމާވެސް އޭނާގެ ކަންތަކައިގެން އުޅެންފެށިއެވެ. ނަމަވެސް ހިތުގައި ވަނީ އެންމެ ކަމެކެވެ.

“ރިޝް……. 7 ވަނަ ފްލޯރ އެއީ…..” ސައިކަލުގައި އައިސް ސުމާގެ ގޭ ދޮރުމައްޗަށް މަޑުކުރި މާޒިން ރިޝްފާ ކައިރި ބުނެލިއެވެ. ރިޝްފާ ސައިކަލުން ފޭބިއެވެ. “ރިޝް….. އަދި އެއްފަހަރު ވިސްނާލަންވީނު.. ޕްލީސް ޑޯންޓް ޑޫ ދިސް…. އިޓް ވިލް އޮންލީ އެފެކްޓް އަސް… އެން އައި ޑޯންޓް ވޯންޓް ދެޓް ޓު ހެޕަން..” މާޒިން ދުރުބަލަހައްޓައިގެން ހުރެ އެހެން ބުނެލީ ރިޝްފާއާއި ވެސް ހަތަރު ކަޅު ހަމަކުރަން ބޭނުންނުވާތީއެވެ. “ޒިން…. ކަމެއްވެގެން ދޯ ރިޝް މިގޮތަށް ކަންކުރަން މި ވިސްނީ.. ސޯ ލީވް އިޓް ޓު މީ…. އެން މި ދެމެދަށް އެއްވެސް ކަމެއްވެސް އަދި އެފެކްޓެއްވެސް ނުކުރާނެ… އިޓްސް އަ ގެރެންޓީ…” ރިޝްފާ މާޒިންގެ އަތުގައި ހިފާލުމަށްފަހު އެހެން ބުނެލީ އޭނާއަށް އިތުބާރުކުރާށޭ ބުނާފަދަ ގޮތަކަށެވެ. މާޒިން ރިޝްފާ ދަންދެން އެތާ ހުރުމަށްފަހު ސައިކަލުގައި ދިޔައީ އެގޭ ކައިރިވެސް އޭނާ އުޅެން ބޭނުންނުވާތީއެވެ. ކިތަންމެ ދުރަށް ދިޔަކަމުގައިވިޔަސް ކިތަންމެ ވަރަކަށް ސުމާއައި ދުރުވާން އުޅުނަސް އޭނާގެ ހިތްވަނީ ސުމާގެއަތުގައެވެ. އެ އަނބުރާ އޭނާއަށް ލިބިދާނެހެއްޔެވެ؟

ސުމާ ޒިންގެ ފޮތްތަކަށް ގަނޑުލައްވަން ހުރިއިރު ޒިން ކައިރީގައި ސުމާ ކުރާ ކަންތަށް ބަލަންއިނެވެ. ސުމާ އިނީ ލަވައެއް ކިޔާލަ ކިޔާލައެވެ.

“އޭ…  ހިތާ…. ހިތްއެދޭ.. މަންޒިލޭ ތީ މަގޭ…

އޭ ހިތާ ހިތްއެދޭ….. މަންޒިލޭ ތީ މަގޭ…

އިހްސާސްވޭ މެއަށް… ފިނިކަން ތިދޭ……”

“މަންމީ މަންޒިލޭ އެއީ ކޯޗެއް..” ސުމާ ކިޔަ ކިޔަ އިން ލަވަ ހުއްޓުނީ ޒިން އެ ސުވާލުކުރުމުންނެވެ. ސުމާއަށް ހެވުނެވެ. “މަންޒިލަކީ މީހުން ބޭނުންވާ އެއްޗެއް.. އިންގްލިޝް އިން ބުނާނަމަ އިޓްސް ގޯލް.. ޓާރގެޓް.. އިނގިއްޖެ ދޯ ބޭބީއަށް… ޒިންގެ މަންޒިލަކީ އައިސްކޯން ފިހާރައެއްނު ދޯ… ހެހެ އެގޮތަށް…” ސުމާ ކުޑަގޮތަކަށް ބުނެލިއެވެ. “މަންމީ..ޒިންގެ ފޭވްރިޓް ލަވަ ކިޔައިދީބަ..”

“ހުމްމްމް ހުމްމްް މްމްމް… މީ ނާނާ އޭ…. ނިދި ފިލާތީ…..

އޯގާވެ ދޭނަން.. ލޯބިން ހީލީމާ.. އޯ… ނިންދަވާނީ….

މީނާނާއޭ… ނިދި ފިލާތީ…. ”

“އުޕްސް ބެލްޖަހާ އެބަ.. އެބަ އަންނަން އިނގޭ.. ޒިން ބަލަންޗޭ އިނގޭ އެން ޔެސް ކަތުރުގަ އަތްނުލާތި…” ސުމާ ކައިރީގައި އޮތް ބުރުގާ އަޅާލަމުން ތެދުވެފައި އެހެން ބުނެލީ ޒިން އަށް ވިސްނައިދޭ ރާގަކަށެވެ. އަވަސް އަރުވާލަމުން ސުމާ ދޮރާއި ދިމާލަށް ދިޔައެވެ. ދޮރު ހުޅުވުމާއި އެކު ކުރިމަތީ ހުރި ކުއްޖާ ފެނި ސުމާގެ ހިނިތުންވުން ފަނޑުވެގެން ދިޔައެވެ. ހިތަށް ބިރުވެރިކަން ވަނެވެ. އެ ހުރިގޮތަށް އޭނާއަށް ހުރެވުނީއެވެ. “ވަންނާކަށް ނުބުނާނަންތަ…؟” ރިޝްފާ ބުނެލިއެވެ. ސުމާ ސިއްސައިގެން ދިޔައެވެ. އަދި އެތެރެއަށް ވަންނަން ތަން ދިނުމަށްފަހު ދޮރުން ބޭރުބަލައިލިއެވެ. ދެފަރާތް ރަނގަޅަށް ބަލާލުމަށްފަހު ސުމާ އެތެރެއަށް ވަންނަމުން ދިޔަ ރިޝްފާއަށް ބަލައިލިއެވެ. “ޑޯންޓް ވޮރީ ރިޝީއެއް ނާދެ… އަސްލު މިއައީ ވަރަށް ބޮޑަށް ސޮރީ އޭ ބުނެލަން ވެގެން.. ރޭގަ ވީ ހުރިހާ ކަމަކަށް…” ރިޝްފާ ސުމާއާއި ދިމާ ބަލަން ހުރެ ބުނެލިއެވެ. ސުމާ ފުން ނޭވައެއް ދޫކޮށްލުމަށްފަހު ދޮރު ލެއްޕިއެވެ. އަދި ހުރިތާ ހުރީ ރިޝްފާއަށް ފުރުސަތު ދީގެންނެވެ. “އިނގޭ ރޭގައި ވީ ހުރިހާ ކަމަކީ ވަރަށް ގޯސްކޮށް ވީ ކަމެއްކަމަށް.. ގަބޫލުކުރަން.. އެކަމަށް ވަރަށް ބޮޑަށް ސޮރީ.. ރޭ އަސްލު ހުރެވުނީ އެކަހަލަ މޫޑެއްގައި ދެން އަނެއްކާ ރިޝީ އުޅުނު ގޮތުން.. އަމް ސޮރީ” ރިޝްފާ މަޑުމައިތިރިކަމާއި އެކު ވާހަކަ ދައްކަމުން ދިޔައިރު އޭނާ ހުރީ ދެއަތް ދެއަތާއި މޮޑެލަމޮޑެލައެވެ. ސުމާ ހިނިތުންވުމެއް ދިނުމަށްފަހު އެންމެ ރަނގަޅުކަމަށް ބުނެލިއެވެ. ކިތަންމެ ބޮޑު ދެރައެއް ސުމާއަށް ދިން މީހަކަށް ފަސޭހަކަމާއި އެކު ސުމާއަށް އޭނާ މާފްކުރެވޭނެއެވެ. އޭނާގެ ހިތުގައި އެއްވެސް އެއްޗެއް ބާއްވާކަށް ބޭނުމެއްނުވެއެވެ.

“ސޯ ފްރެންޑްސް..” ރިޝްފާ ދަތްތަށް ފެންނަވަރަށް ހިނިތުންވެލަމުން ސުމާއާއި ދިމާލަށް އަތްދިއްކޮށްލިއެވެ. ދޮރުމަތީ ހުރި ސުމާ ހިނިތުންވެލުމާއި އެކު އައިސް ރިޝްފާއާއި ސަލާމްކޮށްލިއެވެ. “އަމް ރިޝްފާ…. ތީ ސުމާ ދޯ…” ރިޝްފާ ބުނެލިއެވެ. ސުމާ ހައިރާންކަމާއި އެކު ބޯ ޖަހާލިއެވެ. “ހެހެ އެހާ ޝޮކްނުވޭ.. ރިޝީ ބުނީ…. ރިޝީ މި ގެ ބުނެދިނީވެސް.. އޭނާ މައުލޫމާތު ހޯދައިފި ސުމާގެ… އެކަމް ޑޯންޓް ވޮރީ ރިޝް ހުއްޓާ ދެން ނުކެރޭނެ ސުމާއަށް އުނދަގުލެއް ކުރާކަށް…ރިޝީ އެހެންނޫނަސް މިއަދު ދޭ ރިސޯރޓަށް އެހެންވީމަ މާ ބޮޑު ކަމެއްވެސް ނުކުރެވޭނެ.. އެހާ އަޅައިނުލަންޗޭ އޭނާ ކިޔާ އެއްޗެއްސަށް.. އަބަދުވެސް އެހެން އުޅެނީ.. އަންހެންކުއްޖަކު ފެނުނީމަ.. މިހާރު ވިސްނައިދީ ވިސްނައިދީ ހަލާކުވެއްޖެ އެކަމް ކީއްކުރާނީ.. އެވަރަށް ބުނާއިރުވެސް….. އެނީވޭސް.. އިޓްވޯސް ނައިސް ޓު މީޓް ޔޫ އެން ތެންކްސް ފޯ ފޮރގިވިން މި..” ރިޝްފާ ވާހަކަދައްކަމުންދިޔައެވެ. ސުމާ ގެ ހިތުގައި އޮތް ބިރުވެރިކަން ފިލައިދިޔައެވެ. ނޭނގިނަމަވެސް ރިޝްފާއަށް ބަރޯސާކުރެވުނެވެ. އެއީ ސުމާގެ އާދައެވެ. ކުޑަވަގުތުކޮޅަކަށް މީހަކު ހިނިތުންވެލާ ވާހަކަ ދައްކާލުމުން ސުމާއޭނާއާއި މާ ބޮޑަށް ގާތްވެވި އޭނާއަށް ބަރޯސާ ކުރެވެއެވެ. ކޮންމެ ކޮންމެ މީހަކަށް ބަރޯސާ ކުރާކަށްނުވާނެއެވެ. ނޫންނަމަ ދެރަލިބޭނީވެސް ހުދު ތިމާއަށެވެ.

“އިށީނދެލަންވީނު އެބަ އަންނަން އެއްޗެއް ހިފައިގެން.. ޖޫސް އޯކޭ ދޯ..” ސުމާ ރިޝްފާއަށް އިށީންނަން ތަންދައްކަމުން ބުނެލިއެވެ.  ރިޝްފާ އިށީނދެލިއެވެ. އެއަށްފަހު މުޅި ގެއާއި ދިމާލަށް ނަޒަރު ހިންގާލިއެވެ. ސުމާ ބަދިގެއާއި ދިމާލަށް ދިޔައެވެ.

“މަންމީމީމީ…… ޒިން މިހާރު ފޫހި ވެއްދެ އެތާ އިނދެ” ޒިން ކޮޓަރިން ނުކުމެލަމުން ސުމާއަށް ގޮވާލިއެވެ. “ލައްބަ ބޭބީ….. ދައްތަ އަކު އައީހޭ އެއިނީ.. ދައްތައާއި ސަލާމްކޮށްލަބަ…. މަންމި ދާނަން ފަހުން އެކަންތަށް ކުރަން..” ސުމާ ބަދިގޭގައި ހުރެފައި އެހެން ބުނެލީ ތަންކޮޅެއް ބާރަށެވެ. ސުމާގެ އެދުމަށް ޒިންއައިސް ރިޝްފާއާއި ސަލާމްކޮށްލިއެވެ. “ދައްތީ.. ޒިންއަށް ހީވަނީ ދައްތި ފެނުނުހެން….” ޒިން ރިޝްފާއާއި ސަލާމްކޮށްލަމުން އެހެންބުނެލީ ރިޝްފާގެ މޫނަށް ނަޒަރު ހިންގާލައިގެން ހުރެއެވެ. “ހެހެ ވެދާނެ ފެނުނީކަމަށް ދޯ.. ކީއްކޮށްލަނީތަ ޒިން ދޯ ކިޔަނީ..” ރިޝްފާ ޒިންގެ ކޮލުގައި ހިފާލަމުން ބުނެލިއެވެ. “ލައްބަ މާޒިން ކިޔަނީ… ޒިން އާއި މަންމިއާއި މިގެން ޒިންގެ ބުކްސްއަށް ސެލޯފިން ލައްވަނީ ދޯ މަންމީ….” ޒިން ބުނެލިއެވެ. އެއަށްފަހު ކޮޓަރިތެރެއަށް ދިޔައެވެ.

“ހެހެ އެ ދިޔައީ ދޯ ޒިންވެސް..” ސުމާ ޓްރޭއަކަށް ޖޫސްތަށްޓަކައި ކުކީސްކޮޅެއް އަޅާފައި ހުރި ތަށްޓެއް ލައިގެން ރިޝްފާ ކައިރިއަށް އަންނަމުން ބުނެލިއެވެ. މޭޒުމަތީ ޓްރޭ ބޭންދުމަށްފަހު ރިޝްފާ ކައިރި ކާންބުނެލިއެވެ. ރިޝްފާ އޭނާގެ ވާހަކަތަށް ދައްކަމުންދިޔައިރު ހީވަނީ ދުވަސްވީ ދެ ރަހުމަތްތެރިންހެންނެވެ. ސުމާވެސް ރިޝްފާގެ ވާހަކަތަކަށް ޖަވާބުދެމުން ދެތިން އެއްޗެއް ބުނަމުން ދިޔައެވެ. ސުމާ މާ ބޮޑު ވާހަކަތަކެއް ނުދައްކައެވެ. “ވަރަށް މީރު އިނގޭ ކުކީސް… ކޮންތާކުން ގަތީ؟ ތި ގަންނަން ވެއްޖެ..” ރިޝްފާ ފަހު އެތިކޮޅު ކަމުންބުނެލިއެވެ. “ހެހެ އެއީ ހަދާފަ… މެލޭ ރެސިޕީ ހެހެ… މީރިއްޔާ އަދި ގެނެސްދެންތަ؟” ސުމާ އެހެން ބުނެލުމުން ރިޝްފާ ވަގުތުން ނޫނެކޭ ބުނެލިއެވެ. “އަނެއްކާ ފަލަވާނީ..” ސުމާ ޓްރޭ ހިފައިގެން ތެދުވިތަނާ ރިޝްފާ އެހެން ބުނެލިއެވެ. ސުމާ ހެމުން ހެމުން ބަދިގެއާއި ދިމާލަށް ގޮސް ޓްރޭ ބަހައްޓާފައި އަނެއްކާވެސް ރިޝްފާ ކައިރި އިށީނދެލިއެވެ.

“ހެލްޕެއް ބޭނުންތަ؟ ވަރަށް މޮޅުވާނެ ސްލޯފިން ލައްވަން..” ރިޝްފާ ބުނެލިއެވެ. ސުމާ ނޫނެކޭ ބުނުމުންވެސް ރިޝްފާ އެއްބަހެއްނުވިއެވެ. އެންމެފަހުން ސުމާއާއި އެކު ކޮޓަރިއަށް ގޮސް އޭނާވެސް ޒިންގެ ފޮތްތަކުގައި ސެލޯފިންލައްވަމުން ދިޔައެވެ. އެނދުމަތީ ޓެބްލެޓްއިން ކުޅެން އިން ޒިން އެމީހުން ވަނުމާއި އެކު ފޮތްތަށް ކައިރި އައިސް އިށީނދެލިއެވެ. އެއަށްފަހު އެމީހުން ކުރަމުން ދިޔަ ކަންތަށް ބަލަމުންދިޔައެވެ.

ފޮތްތަށް ނިންމާލުމަށްފަހު ރިޝްފާ ދެން ދަނީއޭ ބުނެ ދިޔައީ އިތުރަށް އިނުމުން ލަސްވެދާނެތީއެވެ. ސުމާ ރިޝްފާ ދަންދެން ދޮރުމަތީ ހުރުމަށްފަހު ދޮރުލައްޕާލިއެވެ. އަދި ހިނިތުންވެލަމުން ބުރުގާ ސޯފާ މައްޗަށް އެއްލާލުމަށްފަހު ކޮޓަރިއަށް ވަނެވެ.

…..

“ޒިން… އަމް ހޯމް ނައު.. ހުމްމް އަނެއްހެން މާ ބޮޑު ވާހަކަތަކެއް ނުދެއްކެ.. ބަޓް ޝީ އިޝް ސްވީޓް ވަރަށް ވަރަށް ރަނގަޅު އިނގޭ އަސްލުވެސް…. އައި ނީޑް އަ ފްރެންޑް ލައިކް ހާރ… ހުމްމް ހުމްް.. ފުރަތަމަ ދުވަހަކު ދެން ނޭނގިދާނެއެއްނު… ލީވް އިޓް ޓު މީ ސްޓޫޕިޑް…………………..” ރިޝްފާ ކުރުގޮތަކަށް މާޒިން ކައިރި ވީ ކަންތަށް ކިޔައިލަދިނެވެ.

— އަނެއްދުވަހުގެ މެންދުރު —

ސުމާ ޒިން ސުކޫލަށް ލާފައި ގެއަށް އައިގޮތަށް އެނދުމަތީ އޮތީ ފޫހިވެފައެވެ. ދުވަހަކީ ކުޑަކޮށް ވިއްސާރަ ދުވަހެއްކަމަކު ވިއްސާރަ ވާނެކަމުގެ އުއްމީދެއްނެތެވެ. ޒިން ސުކޫލަށް ދިޔުމުން އޭނާ އޮތީ ފޫހިވެފައެވެ. މަޖާކޮށްކުރާނެ ކަމެއްވެސް ނެތެވެ. އެހެންއޮތިއްޔާ އޭނާއަށް ވިސްނޭނީކަން ހުދު އޭނާއަށްވެސް އިނގެއެވެ.

“މާ މަލުގެ މީރު ވަސްތަކުން.. މާޒީ ހަނދާން ވަނީ…

ލޯބީގެ އިންތިޒާރުގައި ތި ހިޔާލު އާވަނީ……

ނާހާށޭ ކީއްވެހޭ… ނުބުނާށޭ ނޫނެކޭ… ހިތްވެސް ދިނީމޭ….”

ސުމާ ބާލިހެއްގައި ބައްދާލަމުން ލަވައިގެ އެ ބައިތު ކިޔާލީ ތުންފަތްމައްޗަށް ރަކި ހިނިތުންވުމެއް ވެރިކުރަމުންނެވެ. ވިސްނަން ބޭނުންނުވިޔަސް އޭނާއަށް ވިސްނެނީއެވެ. މާޒިންއާއި މެދުގައެވެ. މާޒިން ހުރި ގޮތް އަދިވެސް ސިފަވަނީއެވެ. މާޒިންގެ އެ ރީތި ހަށިގަނޑެވެ. އެރީތި އިސްތަށިގަނޑެވެ. އެ އަލި މޫނެވެ. އެ ހިޔާލުގައި އޭނާ އޮއްވާ ސިއްސައިގެން ދިޔައީ ފޯނެއް އައުމުންނެވެ.

-ނުނިމޭ-