ހިތުގެ މަގުތައް-11

ކޮލެޖުގެ މައި ހޯލުގެ ތެރޭގައި ވެރިވެފައި އޮތް ފިނި ހަމަހިމޭންކަން މުގުރާލަމުން، ލިޔުޝާ ދިއްކޮށްލި ރަން ފަށައް ބަލަން ޔައިޝް ހުރީ ބުނާނެ އެއްޗެއް، ގެންނާނެ ހަރަކާތެއް ނޭނގިފައެވެ. އެ ފަށަކީ އެމީހުންގެ ދެ އަހަރުވީ އުފާވެރި ލޯބީގެ އެންމެ ފުރަތަމަ ރަމްޒެވެ. ރަށުން މާލެ އައިސް، ދިރިއުޅުމުގެ އާ ސަފުހާއެއް ފެށިއިރު ޔައިޝް އޭނާގެ ފުރަތަމަ ޕޮކެޓް މަނީން ގަނެދިން އެ ފަށް އަތަށް ލިބުމާއެކު، ޔައިޝްގެ ހިތް އެއްކޮށް ކުދިކުދިވެ، މުޅި ދުނިޔެއަށް ބާކީވި ފަދަ ފުން އިހުސާސެއް ކުރެވުނެވެ.

ލިޔުޝާ ފަސްއެނބުރި ބަލައިލުމެއް ނެތް ގޮތުގައި ހަރުކޮށް ހިނގާފައި ދިޔައިރު، އޭނާގެ ކޮނޑު ތުރުތުރުލަމުންދިޔަ މަންޒަރުން އޭނާވެސް ރޮނީކަން އެނގެއެވެ. ނަމަވެސް، އޭނާގެ ނިންމުން ބަދަލުކުރާކަށް އޭނާ ބޭނުމެއް ނުވިއެވެ. ޔައިޝްގެ ދެލޮލުން ހިފެހެއްޓުމެއް ނެތް ގޮތުގައި ކަރުނަ އޮހޮރެމުންދިޔައެވެ. ދުރުގައި މި މަންޒަރު ބަލަން ހުރި އަފްލާޒްއަށް ޔައިޝްގެ ހިތާމަ ފެނިފައި ކެތެއް ނުކުރެވުނެވެ. އޭނާ ދުވެފައި ގޮސް ޔައިޝްގެ ކޮނޑުގައި ހިފެހެއްޓިއެވެ.

“ޔައިޝް… ހިތްވަރުކުރޭ،” އަފްލާޒް އޭނާގެ އެންމެ ގާތް އެކުވެރިޔާއަށް ވިސްނައިދޭން މަސައްކަތް ކުރިއެވެ. “ލިޔޫ އެހުރީ ވަރަށް ދެރަވެފައި. ލިވީގެ ކަންތައް އެގޮތަށް ދިމާވީމާ ކޮންމެ އަންހެން ކުއްޖަކަށްވެސް ވާނީ ތިހެން. އޭނާއަށް ވިސްނާލަން ވަގުތު ބޭނުންވަނެ”

“ނޫން އަފްލާޒް! އޭނާ އެދިޔައީ އަހަރެންގެ ދިރިއުޅުން އެއްކޮށް ހުސްކޮށްލާފައި،” ޔައިޝް ބާރަށް ގިސްލަމުން ބުންޏެވެ. “އަހަރެންނަށް ކުރިން ކުރެވުނު ކުށްތަކުގެ އަދަބު މިއަދު މި ލިބުނީ. ޔަޝްމީގެ ފަހަތުން ދުވުމުގެ ހިތްދަތި ނަތީޖާ މިއީ. އަހަރެން ދެން ކޮލެޖަށް އަންނާނެ، މީހުންނާ ކުރިމަތިލާނެ ހިތްވަރެއް ނެތް.” ޔައިޝް އޭނާގެ ދަބަސް ކޮނޑުގައި އަޅުވައިގެން، ބޯދަށަށް ޖަހައިގެން ކޮލެޖުން ނުކުމެގެން ދިޔައީ މާޔޫސްކަމުގެ ކަނޑެއްގައެވެ.

އެދުވަހުގެ ހަވީރު، ކޮލެޖުގެ ބޮޑު ގަސްދަށުގައި ހުރި ބެންޗެއްގައި އަފްލާޒް އާއި ޔަޝްމީ ތިއްބެވެ. ޖެހެމުންދިޔަ ފިނިރޯޅިތަކުން ހިތްތަކަށް ހަމަޖެހުން ދޭން މަސައްކަތް ކުރި ނަމަވެސް، އެމީހުންގެ މޫނުމަތީގައިވަނީ ކަންބޮޑުވުމެވެ. ޔަޝްމީ އިނީ ލިޔުޝާއާ ދޭތެރޭ ވަރަށް ބޮޑަށް ދެރަވެފައެވެ.

“އަފްލާޒް، އަހަރެމެން މިހެން ބަލަން ތިބޭކަށް ނުވާނެ،” ޔަޝްމީ އަފްލާޒްގެ އަތްތިލައިގައި ހިފާލަމުން ބުންޏެވެ. “ލިޔޫއަށް ޔައިޝް ދެކެ ލޯބިނުވެއެއް ނުހުރެވޭނެކަން އަހަރެންނަށް އެނގޭ. އެކަމަކު އޭނާގެ ހިތުގައި އޮތް ބިރުވެރިކަމާއި ޝައްކު މާ ބޮޑީ. އަހަރެން މާދަމާ ލިޔޫއާ ވަކިން ބައްދަލުކޮށް ވާހަކަދައްކާނަން. ލިވީގެ މައްސަލައިގައި ޔައިޝްގެ އެއްވެސް ކުށެއް ނެތްކަމާއި، ޔައިޝް ހަމައެކަނި ލޯބިވަނީ ލިޔޫދެކެކަން އޭނާއަށް ސާފުކޮށްދޭން އެބަޖެހޭ. އަންހެން ކުއްޖަކަށް ވިސްނައިދޭން އެންމެ ފަސޭހަވާނީ އަންހެން ކުއްޖަކަށް.”

އަފްލާޒް ފުން ނަޒަރަކުން ޔަޝްމީއަށް ބަލައިލުމަށްފަހު ހިނިތުންވެލިއެވެ. “ޔަޝް، ތީ ވަރަށް ރަނގަޅު ޚިޔާލެއް. އަހަރެން މިރޭ ޔައިޝްގެ ގެއަށް ގޮސް އޭނާއާ ވާހަކަދައްކާނަން. އޭނާ އެހުރީ ވަރަށް ބޮޑަށް އެކަނިވެފައި. އަހަރެމެންގެ އެކުވެރިންގެ ބަގީޗާ މިލާން ދޫކޮށްލައިގެން ނުވާނެ. ޒައިންމެންގެ ކަންތައް ހަމައަކަށް އެޅުނުތަނާ މިކަހަލަ ކަމެއް މި ދިމާވީ.”

އެވަގުތު ކޮލެޖު ކައިރީގައި އޮންނަ ހިތްގައިމު ކެފޭއެއްގައި ޒައިން އާއި ޝައިހާ ތިއްބެވެ. ބައްޕަ ޤާސިމްގެ ޤަބޫލުވުމާއި މަރުހަބާގެ ބަސްތަކަށްފަހު ޒައިން ހުރީ ވަރަށް އުފާވެ، އާ ހަކަތައެއް ލިބިފައެވެ. ނަމަވެސް އޭނާގެ ސަމާލުކަން މިހާރު ހުރީ ޔައިޝްމެންގެ ގުޅުން އަލުން ގުޅުވައިދީ، އެކުވެރިންގެ މެދުގައި އޮތް އުފާވެރިކަން އަނބުރާ ހޯދުމަށެވެ.

“ޝައި، މާދަމާ އަހަރެމެން އެންމެން އެކުގައި ލިޔޫގެ ގެއަށް ދާންވީ،” ޒައިން ކޮފީ ތަށިން ކޮލެއް ބޯލަމުން ބުންޏެވެ. “ޔައިޝް ނުލައި އަހަރެމެން ދާނީ. އަހަރެމެން ހުރިހާ އެކުވެރިން ގޮސް ލިޔޫއަށް ހަގީގަތް ކިޔައިދީ، އޭނާގެ ހިތް މަޑުކުރަން މަސައްކަތް ކުރާނީ. އޭނާ އަހަރެމެން ދައްކާ ވާހަކަ އަޑުއަހާނެ. ލިޔޫއަކީ ބަސްއަހާ ހަރުދަނާ ކުއްޖެއް.”

ޝައިހާ ބޯޖަހާލިއެވެ. “އާނ ޒައިން. ލިޔޫ އެކަނިވެފައި ހުރުމުން އޭނާގެ ޚިޔާލުތައް މާ ގޯސްވަނީ. އަމިއްލަ ނަފްސަށް ކުށްވެރިކުރެވެނީ ނޫނީ ޔައިޝްދެކެ އަންނަ ރުޅި އިތުރުވަނީ. އަހަރެމެން އޭނާއަށް އެހީވާންޖެހޭނެ. މާދަމާ ހެނދުނު އަހަރެން އޭނާއަށް ގުޅާފައި ގޭގައި އުޅޭތޯ ބަލާނަން.”

އެރޭ ދަންވަރު 12 ޖެހި ބޮޑުވި ވަގުތެވެ. މާލޭގެ މަގުތައް ހަމަހިމޭންވެ، އެންމެން ނިދީގެ ފުން ކަނޑަކަށް ގެނބިފައިވީ ވަގުތެވެ. އަފްލާޒް އޮތީ އޭނާގެ ކޮޓަރީގައި ނިދަން އޮށޯވެއެވެ. އޭނާ ޔައިޝްއަށް ގުޅަން ދެތިން ފަހަރަކު މަސައްކަތް ކުރި ނަމަވެސް ޔައިޝްގެ ފޯނު އޮތީ ނިއްވާލާފައެވެ.

ކުއްލިއަކަށް އަފްލާޒްގެ ފޯނު ބާރަށް ރިންގްވާން ފެށިއެވެ. ކަނޑުގެ ހަމަހިމޭންކަން މުގުރާލި ރާޅެއް ފަދައިންނެވެ. ސްކްރީނަށް ބަލައިލިއިރު އެއީ ޔައިޝްގެ ނަންބަރެވެ. އަފްލާޒް ހިތްހަމަޖެހުމުގެ ނޭވާއެއްލަމުން އަވަސްއަވަހަށް ފޯނު ނެގިއެވެ.

“ހެލޯ ޔައިޝް؟ ފޯނު ނިއްވާލައިގެން ކޮންތާކު…”

ނަމަވެސް އެކޮޅުން އިވުނީ ޔައިޝްގެ އަޑެއް ނޫނެވެ. އެއީ އަންހެން ކުއްޖެއްގެ ބާރަށް ރުއިމުގެ އަޑެކެވެ. “ހެލޯ… އަފްލާޒްތަ؟ މިއީ ޔައިޝްގެ ކޮއްކޮ… ޔައިޝް… ދޮންބެ ކޮޓަރީގައި ހޭނެތިގެން ވެއްޓިފައި އޮއްވާ ފެނިގެން މިހާރު އައިޖީއެމްއެޗް ހޮސްޕިޓަލަށް އެބަގެންދޭ! އޭނާގެ އެނދު ކައިރީގައި ގިނަ އަދަދެއްގެ ނިދާ ބޭސް ހުސްކޮށްފައި ފުޅިއެއް އޮތް… އޭނާ ނޭވައެއް ނުލާ!”

އެ ބަސްތައް އިވުމާއެކު އަފްލާޒްގެ އަތުން ފޯނު ދޫވެގެން އެނދުމައްޗަށް ވެއްޓުނެވެ. އޭނާގެ މުޅި ހަށިގަނޑު ބިރުން ގޮސް ތުރުތުރުލާން ފެށިއެވެ. ލޮލުން ކަރުނަ ފައިބައިގަތެވެ. ޔައިޝް އަމިއްލައަށް މަރުވާން މަސައްކަތް ކުރީ ހެއްޔެވެ؟ ލޯބީގެ ހިތްދަތިކަމަށް ކެތްނުކުރެވިގެން އޭނާ އެ ނިންމީ ކޮންފަދަ ނުބައި ނިންމުމެއް ހެއްޔެވެ؟

އަފްލާޒް އަވަސްއަވަހަށް ގަމީސް ލައިގެން، ސައިކަލުގެ ތަޅުދަނޑި ހިފައިގެން ހޮސްޕިޓަލާ ދިމާއަށް މިސްރާބުޖެހިއިރު، އޭނާގެ ހިތް ދުއާކުރަމުންދިޔައީ އޭނާގެ އެންމެ ގާތް އެކުވެރިޔާގެ ފުރާނަ ސަލާމަތްކޮށްދެއްވުމަށެވެ.

ނުނިމޭ!

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.