އެންމެ ފަހު ސިޓީ ــ1

މާލޭގެ ހަނި، ކުދި މަގުތަކުގެ މަތިން އިރުއޮއްސެމުން ދިޔަ ވަގުތެވެ. އުޑުމަތި ވަނީ ރަން ރީނދޫ ކުލައަކުން ފެވުމަށްފަހު، މަޑުމަޑުން ކަޅު އަނދިރި ސާލެއް ފަތުރަން ފަށާފައެވެ. އުމުރުން އެންމެ 22 އަހަރުގެ ޝައުހާ އިނީ އޭނާގެ ކުޑަކުޑަ ކޮޓަރީގެ ބާގަނޑެއް ފަދަ ކުޑަދޮރު ކައިރީގައި، ބޭރު ބަލާށެވެ. ބޭރުން އިވެމުންދިޔަ ސައިކަލުތަކުގެ ބާރު އަޑާއި، ބޮޑެތި ބާޒާރުމަތީގެ ހަލަބޮލި ހަޅޭކުގެ އަޑުތަކުން އޭނާގެ ބޯގޮވާ ވަރުވެއެވެ. ނަމަވެސް އޭނާގެ މޫނުމަތިން ފެންނަމުން ދިޔައީ އެއަށްވުރެ ފުން، ނުތަނަވަސް ވޭނެކެވެ. އޭނާގެ ޒުވާން މޫނުމަތިން އުފާވެރިކަމުގެ ކުލަވަރު ފިލާފައިވާތާ ކިތަންމެ ދުވަހެކެވެ. ލޮލުގެ ކަޅި ވަނީ ނިދިމަދުވުމުގެ ސަބަބުން ރަތްވެފައެވެ.

އެނދުމަތީގައި ބަލި އެނދުގައި އޮތް އޭނާގެ މަންމަ، ޒަހުރާ، މަޑުމަޑުން ކުކުރާލި އަޑު އިވުމުން ޝައުހާގެ ހިތް ކުދިކުދިވިއެވެ. ޒަހުރާ އަކީ ކެންސަރު ބަލީގެ ފަހު މަރުހަލާގައި ހުރި މީހެކެވެ. އެ ބައްޔަށް ބޭނުންވާ އަގުބޮޑު ބޭސްތަކާއި، ކޮންމެ މަހަކު ކުރަންޖެހޭ ތަހުލީލުތަކުގެ ޚަރަދުތައް ހަމަޖެއްސުމަކީ ޝައުހާ ފަދަ ނިކަމެތި އަންހެންކުއްޖަކަށް އެކަނި ކުރެވޭނެ ކަމެއް ނޫނެވެ. ބައްޕަ ވަނީ އޭނާ ކުޑައިރު ވަކިވެފައެވެ. އާއިލާގެ އެހެން މީހެއްގެ އެހީތެރިކަމެއް ނުލިބެއެވެ. ކޮންމެ ދުވަހަކު ބޭސް ސިޓީއަށް ސަލާންޖެހުމާއި، ދަރަންޏަށް ފައިސާ ހޯދުމަކީ ޝައުހާގެ ނަފްސާނީ ދުޅަހެޔޮކަން ނަގާލި ކަމެކެވެ.

“ދަރިފުޅާ… ޝައުހާ،” ޒަހުރާ ވަރަށް ބަލި އަޑަކުން، ހިކިފައިވާ ތުންފަތް ތަޅުވާލަމުން ގޮވާލިއެވެ.

ޝައުހާ އަވަސްއަވަހަށް މަންމަގެ ގާތަށް ގޮސް، ފިނިވެފައިވާ އެ އަތުގައި ދެއަތުން ހިފާލިއެވެ. “ލައްބަ މަންމާ. ބޭސް ބޯންވީތަ؟ ނޫނީ ތަނަކަށް ތަދުވަނީތަ؟”

“ނޫން ދަރިފުޅާ… މަންމަގެ ސަބަބުން ދަރިފުޅުގެ ޒުވާން ދިރިއުޅުން މި ހަލާކުވަނީ . ތިޔަ ހާލުގައި ރެއާއިދުވާލު މަސައްކަތްކޮށް، ކަރުނަ އަޅާތަން ދެކޭކަށް މަންމަގެ ހިތަކަށް ކެތެއް ނުވޭ. މަންމަ މަރުވިޔަދީ…” ޒަހުރާގެ ލޮލުން ކަރުނަ ފޮދެއް ކޯތާފަތް މައްޗަށް ފޭބިއެވެ. އޭނާ އަމިއްލަ ނަފްސު ކުށްވެރި ކުރަނީ ދަރިފުޅަށް ބުރަޔަކަށް ވެވިފައިވާތީއެވެ.

“މަންމާ، ތިޔަހެން ނުބުނޭ! މަންމަ ރަނގަޅު ކުރުމަކީ މި ދުނިޔޭގައި އަޅުގަނޑުގެ އެންމެ ބޮޑު އުންމީދު. ކޮންމެ ފަދަ ގުރުބާނީއެއް ވެގެންވެސް އަހަރެން މަންމަ ސަލާމަތްކުރާނަން،” ޝައުހާ މަންމަގެ ނިތްކުރީގައި ބޮސްދިނެވެ. ނަމަވެސް އެތެރެއިން އޭނާގެ ހިތް ކަރުނުން ތެމެމުން ދިޔައެވެ. ފައިސާ ހޯދާނެ އެއްވެސް މަގެއް، އެއްވެސް އުންމީދެއް އޭނާއަކަށް ނެތެވެ. ބޭންކު އެކައުންޓުގައި އޮތީ ހުސް އަދަދެކެވެ. ދަރަނިތައް ވަނީ ބޯމަތިވެފައެވެ. ގޭގެ ކުލި ނުދެއްކިގެން ގެއިން ނެރެލާނެ ކަމުގެ އިންޒާރުވެސް އޮތީ ލިބިފައެވެ.

މި ކަނު އަނދިރި މާޔޫސްކަމުގެ ތެރެއަށް، ކުއްލި އަލިކަމެއްގެ ގޮތުގައި އައީ ރައްޔާން އެވެ. ރައްޔާންއަކީ ރާއްޖޭގެ އެންމެ މުއްސަނދި، ރިސޯޓްތަކާއި ފަތުރުވެރިކަމުގެ ދާއިރާގެ ރަސްގެފާނު ކަމަށް ބުނާ މަހުޖަނެކެވެ. އޭނާގެ ހިތްގައިމު، މަޑުމައިތިރި މިޒާޖާއި، ބަލާލަން ރީތި، ފިރިހެންވަންތަ ސިފައަކީ ކޮންމެ އަންހެން ކުއްޖެއްގެ ހިތްވެސް ކަތިލާނެ ފަދަ ސިފަތަކެކެވެ. އޭނާ ހިނގާލާފައި ދާއިރުވެސް މީހުންގެ ނަޒަރު ހުއްޓޭހާ ކަރިސްމާތެކެވެ.

ޝައުހާއާ ރައްޔާން ދިމާވީ މާލޭގެ ރެސްޓޯރެންޓަކުންނެވެ. އެތަނުގައި ޝައުހާ ޕާޓް-ޓައިމްކޮށް ވެއިޓްރެސްއެއްގެ ގޮތުގައި މަސައްކަތް ކުރަނިކޮށެވެ. ޝައުހާގެ ސާދާކަމާއި، މައުސޫމް ދެލޮލުން ފެންނަން ހުރި ހިތްވަރު ފެނި، ރައްޔާން އޭނާއާ ވާހަކަދައްކަން ފެށިއެވެ. އޭނާ ޝައުހާގެ އިތުބާރު ހޯދީ ވަރަށް ކެތްތެރިކަމާއެކުގައެވެ. ކޮންމެ ދުވަހަކު އެ ރެސްޓޯރެންޓަށް އައިސް ޝައުހާއަށް ހިތްވަރުދީ، މާލީ އެހީތެރިކަން ދޭން އުޅުނެވެ. ނަމަވެސް ޝައުހާ އަމިއްލަ އަބުރުވެރިކަމަށްޓަކައި އެ ފައިސާގައި ހިފާކަށް ބޭނުމެއް ނުވިއެވެ.

ޝައުހާގެ ހިތްދަތި ހާލަތު މެކްސިމަމްއަށް ދިޔަ ދުވަހު، ރައްޔާން ހީވެސް ނުކުރާ ފަދަ ބޮޑު ހުށަހެޅުމެއް ހުށަހެޅިއެވެ. “ޝައުހާ، އަހަރެން ޝައުހާ މަންމަގެ ހުރިހާ ފަރުވާއެއް ބޭރުގެ އެންމެ މޮޅު ހޮސްޕިޓަލުން ހަމަޖައްސާދީ، ހުރިހާ ޚަރަދެއް ޒިންމާވެފާނަން. ބަދަލުގައި އަހަރެން ބޭނުމީ ހަމައެކަނި އެއްކަމެއް. ޝައުހާ އަހަންނާ ކައިވެނިކުރުން. އަހަރެން ބޭނުމީ ޝައުހާއަށް ރާއްކާތެރިކަންދޭން،” ރައްޔާން ބުންޏެވެ.

“މިއީ ޝައުހާއަށް ލިބުނު ފުރާނަ ސަލާމަތްކުރާނެ ރާސްތާއެކެވެ. މަންމަގެ ފުރާނަ ސަލާމަތްކުރުމަށްޓަކައި، އޭނާ އެއްވެސް ޖެހިލުމެއް ނެތި، އަމިއްލަ ނަފްސަށްވުރެ މަންމަ އިސްކޮށް، ރައްޔާންގެ ހުށަހެޅުން ގަބޫލުކުރިއެވެ. ކައިވެނީގެ ކަންތައްތައް ވަރަށް ސިއްރުވެރި ގޮތަކަށް، ބޮޑު ޕާޓީއަކާ ނުލައި ނިމިގެން ދިޔައެވެ. ރައްޔާން ބުނި ގޮތަށް ޒަހުރާ އެއާ އެމްބިއުލާންސްއެއްގައި އިންޑިއާގެ މޮޅު ހޮސްޕިޓަލަކަށް ފޮނުވާލެވުނެވެ. އެތަނުން ޒަހުރާގެ ފަރުވާ ފެށި، ހާލަތު ރަނގަޅުވާން ފެށިކަމުގެ ޚަބަރު ފޮޓޯތަކާއެކު ލިބުމުން ޝައުހާގެ ހިތަށް ބޮޑު ހަމަޖެހުމެއް ލިބުނެވެ. ނަމަވެސް، ރައްޔާންގެ މި ނުފޫޒުގަދަ، ސިއްރުވެރި ދިރިއުޅުމުގެ ތެރެއަށް އަމިއްލަ ނަފްސު ވިއްކާލަން ޖެހުމުން ޝައުހާގެ ހިތް ވަނީ ބިރުވެރިކަމުން ފުރިފައެވެ. އޭނާއަށް އިހުސާސްވަމުން ދިޔައީ މަންމަގެ ސަލާމަތަށްޓަކައި، އޭނާ އެ ފުން ހަލާކުގެ ތެރެއަށް އަމިއްލައަށް ފުންމާލެވުނު ކަމުގެ ނުތަނަވަސްކަމެވެ.

ކައިވެންޏަށްފަހު، ރައްޔާން ޝައުހާ ގޮވައިގެން ދިޔައީ މާލެއާ އެތައް މޭލެއް ދުރުގައި އޮތް އެކަހެރި ފަޅުރަށަކަށެވެ. އެ ރަށަކީ ރައްޔާންގެ އަމިއްލަ މިލްކެކެވެ. ރަށުގެ މެދުގައި ހުރީ ބޮޑު، ގަނޑުވަރެއް ފަދަ ވިލާއެކެވެ. ގުދުރަތީ ރީތިކަމާއި، ހުދު ދޮންވެލި ގޮނޑުދޮށުން ފުރިގެންވާ އެ ރަށަށް ލޯންޗް ކައިރިކުރިއިރު، ރަށު ތެރެއިން ފެންނަމުން ދިޔައީ އާދަޔާ ހިލާފު، ބިރުވެރި ހިމޭންކަމެކެވެ. އާންމުކޮށް ރަށްރަށުން އިވޭ ދޫނި ސޫފާސޫފީގެ އަޑެއް، ނުވަތަ ގަސްގަހާގެހީގެ ދިރުމެއްގެ އަޑެއްވެސް އިވޭކަށް ނެތެވެ. ހީވަނީ މަރުވެފައިވާ ފަސްގަނޑެއް ހެންނެވެ. ރަށުގެ ވަށައިގެންވާ ބޮޑެތި ރުއްތައް ހީވަނީ ހިމޭން ފާރަވެރިންތަކެއް ހެންނެވެ.

“މިއީ އަހަރެމެންގެ ދުނިޔެ. މިތަނުގައި އަހަރެމެންނަށް އެއްވެސް މީހެއްގެ އުނދަގުލެއް ނެތި އުޅެވޭނެ،” ޝައުހާގެ އަތްތިލައަށް ފިތާލަމުން ރައްޔާން ބުންޏެވެ. އޭނާގެ ހިނިތުންވުމުގައި މާލޭގައި ހުރިއިރު ހުރި އޯގާތެރިކަމުގެ ބަދަލުގައި، މިހާރު ހުރީ ފާޑެއްގެ ފުން، ބިރުވެރި އަދި ނޭނގޭ އަސަރެކެވެ. އޭނާގެ ދެލޮލުން ފެންނަނީ ކާމިޔާބީގެ ކުލަވަރެވެ. ހީވަނީ ބޭނުންވި ޝިކާރައެއް އަތުލެވުމުން ވާނެ ފަދަ ގޮތެކެވެ.

ވިލާގެ ބޮޑު، ބަރު ލަކުޑި ދޮރު ހުޅުވާލުމާއެކު ފެނުނީ އަނދިރި އަދި ފިނި މާހައުލެކެވެ. ދުވާލުގެ އަލިކަންވެސް އެތެރެއަށް ވަންނަނީ ކިރިޔާއެވެ. އެ ބޮޑު ގޭގައި މަސައްކަތް ކުރަން ހުރީ ހަމައެކަނި ވާސިފް އެވެ. ވާސިފްއަކީ އުމުރުން ދުވަސްވީ… ބޮލުގެ އިސްތަށިގަނޑު ހުދުވެފައިވާ، މާ ގިނަ ވާހަކައެއް ނުދައްކާ މީހެކެވެ. އޭނާ ހުންނަނީ އަބަދުވެސް ބިރުން، ކޮންމެވެސް ކަމެއް ސިއްރުކުރަން އުޅޭ ކަހަލަ ގޮތަކަށެވެ. އޭނާ ޝައުހާއާ ދިމާލަށް ބަލާލި ބެލުމުގައި “މިތަނުން ދާށޭ” ބުނާ ފަދަ އިންޒާރެއް އެކުލެވިގެންވާ ކަމަށް ޝައުހާއަށް އިހުސާސްވިއެވެ. ވާސިފްގެ ތުރުތުރުއަޅާ އަތުން ދަބަސްތައް ނެގިއިރު އޭނާގެ ދެލޯ ހުރީ ބިމަށް އަމާޒުވެފައެވެ.

“ވާސިފް، މިއީ މަގޭ އަންހެނުން ޝައުހާ. މިއަދުން ފެށިގެން މިގޭގެ ހުރިހާ ކަމެއް ބަލަހައްޓަންވާނީ ޝައުހާ ބުނާ ގޮތަށް. އެކަމަކު ހަނދާންކުރާތި… މަތީ ބުރިއަށް ދިއުމަކީ މަނާކަމެއް،” ރައްޔާން އަމުރުވެރި، ހަރުކަށި ރާގަކަށް ބުންޏެވެ. ވާސިފް އެއްވެސް އެއްޗެކޭ ނުބުނެ، އިސްދަށަށް ޖަހައިގެން ހުރެ ބޯޖަހާލިއެވެ.

ފުރަތަމަ ރޭގެ މެންދަމުން އަނބުރާލި ވަގުތެވެ. ބޭރުން ކަނޑުގެ ބާރު ރާޅުތަކުގެ އަޑު ފިޔަވައި އެހެން އަޑެއް ނީވެއެވެ. ވިލާގެ ބޮޑެތި ކުޑަދޮރުތަކުގައި ރާޅުގެ ތެތްކަން ހިފާފައި ހުއްޓެވެ. ޝައުހާ އޮތީ އެނދުގައެވެ. ކައިރީގައި ރައްޔާން ގަދަ ނިދީގައި އޮތެވެ. ނަމަވެސް ޝައުހާގެ ހިތަށް ވަދެފައިވާ ބިރުވެރިކަމެއްގެ ސަބަބުން، ލޮލަށް ނިދި އަންނަ ގޮތެއް ނުވިއެވެ. އެނދުގެ މަޑުކަމާއި ކޮޓަރީގެ ލަގްޒަރީ ސިފަތަކުން އޭނާގެ ހިތަކަށް ހަމަޖެހުމެއް ނުލިބެއެވެ. އޭނާގެ ހިތް ބުނަމުން ދިޔައީ ކޮންމެވެސް ނުރައްކަލެއް ކައިރިވަމުން އަންނަ ކަމެވެ.

ކުއްލިއަކަށް، ވިލާގެ ތިންވަނަ ބުރިން ކޮންމެވެސް އެއްޗެއް ވެއްޓި ތެޅުނު އަޑު އިވުނެވެ. ބިއްލޫރިގަނޑެއް ތެޅުނު ފަދަ ތޫނު އަޑެކެވެ. އެއާއެކު، މަޑު… ވޭނީ ރޮއިލުމެއްގެ އަޑުވެސް ކަންފަތުގައި ޖެހުނެވެ. އެއީ ރިހުމަކުން ފުރިގެންވާ އަންހެނެއްގެ އަޑެވެ. “ނޫން… އަހަރެން ދޫކޮށްލާ…” އެ އަޑުގައި ވަނީ މާޔޫސްކަމެވެ.

ޝައުހާ ސިހިފައި ތެދުވިއެވެ. އޭނާގެ ހިތް ބާރަށް ތަޅަމުން ދިޔައެވެ. އޭނާ ކައިރީގައި އޮތް ރައްޔާންއަށް ބަލާލިއެވެ. ރައްޔާން ނިދާފައި އޮތް ގޮތުން ހީވަނީ އެއްވެސް އަޑެއް އޭނާގެ ކަންފަތާ ހަމައަށް ފޯރާފައި ނުވާ ހެންނެވެ. އޭނާ އޮތީ މަރުވެފައި އޮތް މީހެއް ފަދައިން ހިމޭނުންނެވެ.

ޝައުހާ މަޑުމަޑުން އެނދުން ފައިބައި، ކޮޓަރީގެ ބޮޑު ދޮރު ހުޅުވާލިއެވެ. ބޭރު ބޮޑު ކޮޓަރި އޮތީ ކަޅު އަނދިރީގައެވެ. އޭނާ ފިޔަވަޅަކަށްފަހު ފިޔަވަޅެއް އަޅަމުން، ފާރުގައި އަތް ހާކަމުން ސިޑިއާ ދިމާލަށް ހިނގައިގަތެވެ. މަތިން އިވުނު އަޑު މިހާރު ވަނީ ކެނޑިފައެވެ. ނަމަވެސް ސިޑީގެ އަނދިރި ކަނަކުން މީހެއްގެ ހިޔަނި ހަރަކާތްތެރިވިތަން ފެނުނެވެ. އެ ހިޔަނި ހީވަނީ ސިޑިން ތިރިއަށް ފައިބަން އުޅޭ ހެންނެވެ.

“ކާކު؟” ޝައުހާ ބިރުން ހުރެ، ތުރުތުރުއަޅާ އަޑަކުން މަޑުމަޑުން އަހާލިއެވެ.

އެއީ ވާސިފް އެވެ. އޭނާގެ އަތުގައި ދިއްލާފައިވާ ބައްތިއެއް އޮތެވެ.” އޭނާ މަޑުމަޑުން ޝައުހާގެ ގާތަށް އައިސް، ދެލޯ ބޮޑުކޮށްލަމުން ކަޅިޖަހާނުލާ ބަލަން ހުއްޓެވެ. އޭނާގެ މޫނުމަތިން ފެންނަމުން ދިޔައީ ބޮޑު ހާސްކަމެކެވެ. “މެޑަމް… މިގަޑީގައި ބޭރަށް ނިކުތުން ރަނގަޅެއް ނުވާނެ. ބޮސް (ރައްޔާން) ހޭލައްވައިފިއްޔާ ވަރަށް ކަންތައް ބޮޑުވާނެ. އޭނާގެ ރުޅިގަނޑަކީ އެކަކަށްވެސް ހިފެހެއްޓޭނެ އެއްޗެއް ނޫން. މިތަނުގައި ނުހުންނަވާ،” ވާސިފް ސިއްރުސިއްރުން ބުންޏެވެ.

ވާސިފް… އަހަންނަށް އެނގޭ އިވުނު އަޑު. އެއީ ވައިގެ އަޑެއް ނޫން. މިގޭގައި ކޮންމެވެސް ސިއްރެއް އެބައޮތް. މަތީގައި ކާކު އުޅެނީ؟” ޝައުހާ ގޮތްދޫނުކޮށް ބުންޏެވެ.

ވާސިފްގެ މޫނުމަތިން ބިރުވެރިކަން އިތުރުވިއެވެ. އޭނާ ހިންދިރުވާލުމަށްފަހު، ވަށައިގެން އަނދިރިގަނޑަށް ބަލާލަމުން ބުންޏެވެ: “މެޑަމް… މިގޭގެ ކަންތައްތަކާ މާބޮޑަށް ނުވިސްނާ. އަހަރެން މިގޭގައި އުޅޭތާ ލައްކަ ދުވަސްވެއްޖެ. އަޑުއިވޭ ކޮންމެ އެއްޗަކީ ހަގީގަތެއް ނޫން. މިއީ މަގޭ އާދޭހެއް. އަވަހަށް ކޮޓަރިއަށް ވަޑައިގަންނަވާ! ނޫނީ އަހަރެމެން ދެމީހުންގެ ދުވަސްވެސް ދާނީ.”

ޝައުހާ އެނބުރި ކޮޓަރިއަށް އައިސް އެނދަށް އެރިއެވެ. ނަމަވެސް އޭނާގެ ސިކުނޑި ބުނަމުން ދިޔައީ ވާސިފް އެ ހެއްދެވީ ބޮޑު ދޮގެއް ކަމެވެ. އެއީ ވައިގެ އަޑެއް ނޫނެވެ. އެއީ ހަމަޔަގީނުންވެސް ކޮންމެވެސް އަންހެނެއްގެ، އެހީއަށް އެދި ގޮވަމުންދިޔަ ވޭނީ އަޑެކެވެ. އެ އަޑު އޭނާގެ ކަންފަތުގައި ހަރުލާފައި ހުއްޓެވެ.

ޖެހިގެން އައި ދުވަހު ހެނދުނު، މުޅި މާހައުލު ބަދަލުވިއެވެ. އިރުގެ ރީތި އަލިކަން ކޮޓަރި ތެރެއަށް އެޅިފައި އޮތްއިރު، ރައްޔާން ހުރީ ވަރަށް އުފާވެފައެވެ. އޭނާ ޝައުހާއަށްޓަކައި އަމިއްލައަށް ކޮފީއާއި ސައި ތައްޔާރުކޮށްދީ، މާލޭގައި ހުރި އޭނާގެ މަންމަގެ ހާލަތު ވަރަށް ރަނގަޅު ކަމުގެ ޚަބަރު ދިނެވެ. “މަންމަގެ އޮޕަރޭޝަން ކާމިޔާބު. ދެން މާ ގިނަ ދުވަހެއް ނުވެ ރަނގަޅުވާނެ،” ރައްޔާން ބުންޏެވެ. ރައްޔާންގެ މި އޯގާތެރިކަމުން ޝައުހާގެ ހިތް މަޑުވި ނަމަވެސް، ރޭގެ ހާދިސާ އޭނާގެ ހަނދާނުން ފިލައެއް ނުދެއެވެ.

“ރައްޔާން… މި ގޭގެ ތިންވަނަ ބުރުގައި ހުންނަނީ ކޮން އެއްޗެއް؟” ޝައުހާ ސައިބޯން އިނދެ، ޖެހިލުންވެ ހުރެ ލޯބިން އަހާލިއެވެ.

ރައްޔާންގެ އަތް ބަރުވިއެވެ. އޭނާގެ އަތުގައި އޮތް ކޮފީ ސަމުސާ ތަށީގައި ޖެހުނު ބާރު އަޑާއެކު، މުޅި ތަނަށް ހިމޭންކަން ވެރިވިއެވެ. އޭނާގެ މޫނުމަތީގައި ހުރި ހިނިތުންވުން ސިކުންތެއްގެ ތެރޭގައި ފިލައިގެން ދިޔައެވެ. އޭނާ ޝައުހާގެ ލޮލަށް ބަލާލީ ފުން، ނުރައްކާތެރި ނަޒަރަކުންނެވެ. އޭނާގެ ދެލޮލުން ފެނުނީ ހަރުކަށިކަމެވެ.

“އަހަރެން ހީކުރީ ޝައުހާއަކީ ބަސްއަހާ ކުއްޖެއް ކަމަށް. އަހަރެން އިއްޔެ ބުނީމެއްނު އެތަނަށް ވަނުމަކީ މަނާކަމެކޭ؟ އެއީ އަހަރެންގެ ސިއްރު އޮފީސް މަސައްކަތްތައް ހުންނަ ތަން. އެތަނުގެ ވާހަކަ ދެން ދުވަހަކުވެސް މިގޭގައި ދެކެވިގެން ނުވާނެ. އަހަރެން ކުރާ ކަންތައްތަކަށް ސުވާލު ނުއުފައްދާ،” ރައްޔާންގެ ރާގު ހަރުކަށިވެ، ބިރުވެރިވިއެވެ.

ޝައުހާ ބިރުން ހުރެ ބޯޖަހާލިއެވެ. ނަމަވެސް އޭނާގެ ހިތުގައި ބިރުވެރިކަމުގެ އޮށް އިންދިއްޖެއެވެ. މި ރަށާއި، މި ވިލާ އަދި އޭނާގެ ފިރިމީހާ ރައްޔާންގެ ފަހަތުގައި ވަނީ ކޮންފަދަ ބޮޑު، އަނދިރި ސިއްރެއް ބާވައެވެ؟ އޭނާގެ ދިރިއުޅުން މި ބަދަލުވީ މަންމަ ސަލާމަތްކުރި އުފާވެރި ހަޔާތަކަށްހެއްޔެވެ؟ ނޫނީ އޭނާ މިއައީ އަމިއްލައަށް ކޮށްޓަކަށް ވަދެ، ނުރައްކާތެރި މަހުޖަނެއްގެ ހައްޔަރުގައި ބަންދުވާންހެއްޔެވެ؟ އޭނާއަށް މި ކުރެވުނީ ކޮންފަދަ ކައިވެންޏެއް ހެއްޔެވެ؟

ނުނިމޭ….
މިއީ އަޅުގަނޑު ލިޔާ ފުރަތަމަ ދިގު ވާހަކަ ކަމުން ކުށް ހުރުން އެކަށީގެންވޭ…..
ރަނގަޅު ކުރަން ޖެހޭ ކަންތައް ތައް ފާހަގަ ކޮށްލަ ދިނުން އެދެން.

މި ވާހަކަ ވެސް ކިޔުންތެރިންނަށް ކަމުދާނެ ކަމަށް އުންމީދުކުރަން 😀💗

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.