ވާތީ ހިތަކު ލޯބި މަންމަންވެފާ 62

ސަލާމް ކިޔުންތެރިން…

ސޯޝަލް މީޑިއާ ނުގެންގުޅޭ ކުދިންނަށް ވާހަކައާއި ބެހޭ ގޮތުން ހިއްސާ ކުރާ މަޢުލޫމާތު ފޯރު ކޮށްދިނުމަށްޓަކައި އަޅުގަނޑު ވާނީ ވައިބާ ގުރޫޕެއް ހަދާލާފައި. ހުރިހާ ކުދިންނަށްވެސް އެ ގުރޫޕަށް ވަދެލެވޭނެ. ގުރޫޕަށް ވަނުމަށް ބޭނުންވާނޭ ލިންކު ކޮމެންޓް ސެކްޝަނުގައި އަޅުގަނޑު ހިއްސާ ކޮށްލާނަން. ހުރިހާ ކުދިންވެސް ޖޮއިންވެލައްޗޭ.. 🩶🩶

“ލާލާ އަނެއްކާ އެސޮރަށް ހިތް ނުކިއްޔާވެސް ރަނގަޅު. ވަރަށް ރީތި މީހެކޯ އެއީ. ބޮއެ ބޮއެ ގޮސް ހީވަނީ އެކަމަކު 30 އަހަރު ވާން އުޅޭހެން.. އެކަމަކު ވަރަށް ވަރަށް ރީތި”

“ހޫންންން. ނޫޅެން” ފައިހާގެ އަތުގައި ވިކައިގަންނަމުން ޒާލާ ބުނެލިއެވެ.

(62 ވަނަ ބައި)

މެންދުރުގެ ހޫނު ގަދަ ވަގުތެވެ. ވަމުން ދިޔަ ހޫނުގައިވެސް މަގުތަކުން މީހުން ހުސްނުވެޔެވެ. ސުކޫލަށާއި ޤުރުޢާން ކިލާސްތަކާއި ޓިއުޝަން ކިލާސްތަކަށް ދާ ކުދިންނެވެ. ވަޒީފާގައި ތިބެފައި ބުރޭކު ގަޑިއަށް އަންނަ މީހުންނެވެ. ދެލޯ ކުޑަ ކޮށްގެންނާއި އައިނު އަޅައިގެންވެސް މީހުންތައް މަގުމަތީގައި އުޅެމުން ދިޔައެވެ.

މަޑު ދުވެލީގައި ސައިކަލުގައި އައިސް ދާއިޔަލް މަޑުކޮށްލީ ހަސްފަތާލު ކުރިމަތީގައެވެ. ސައިކަލުން ލަޝްކާ މަޑުމަޑުން ފައިބަމުން ގޮސް ދާއިޔަލް ކުރިމަތީގައި ހުއްޓުނެވެ. “ސާބަަސް ދާއިއަށް. ހީވަނީ ވެލައެއްހެން. އެހާ މަޑުން ވިއްޔާ ތި ދުއްވަނީ” ބޯ ހޫރުވާލަމުން ލަޝްކާ ބުނެލިއެވެ.

“ދެން ލަޝްއަށާ ބޭބީއަށް ގޮތެއް ވެދާނެ ތީއޭ” ސައިކަލުން ފައިބަމުން ދާއިޔަލް ބުންޏެވެ.

“ހަހަ. ވާނެ ދޯ ކޮން ކަހަލަ ކުއްޖެއް ތޯ ވެސް ބަލަން؟” އުފަލުން ހުރެ ބަނޑުގައި ފިރުމާލަމުން ލަޝްކާ ބުންޏެވެ.

“މަންޖޭ އަދި ނޭނގޭނެއްނުން ކޮން ކަހަލަ ކުއްޖެއް ކަމެއް” ލަޝްކާގެ ކޯތާފަތުގައި ހިފާލަމުން ދާއިޔަލް ބުނެލިއެވެ. މިހާރު ލަޝްކާގެ މޫނުމަތީގައިވެސް ވަނީ ކޮންމެވެސް ވަރަކަށް މަސްޖަހާފައެވެ. ކުރިއަށް ވުރެ ފަލަވެފައި ހުރުމުން ދޮންހެންވެސް ހީވެޔެވެ. ބަލާލަން ވަރަށް ލޯތްބެވެ.

“ދޭންންން މިހާރު އިނގޭނެޔެކޭ ނޫނޭ. ބަލަން ވާނޭ އެކަމަކު. ހޫމް. ދާއި ކޮން ކަހަލަ ކުއްޖެއްތަ ބޭނުމީ؟” ދާއިޔަލްގެ އަތުގައި ހިފާލަމުން ލަޝްކާ އަހައިލިއެވެ.

“ދާއި ބޭނުމީ ލަޝް ކަހަލަ އަންހެން ކުއްޖެއް” ލަޝްކާގެ އަތުގެ ނުފުށުގައި ބޮސް ދެމުން ދާއިޔަލް ބުނެލިއެވެ.

“ދެން އެކަމަކު ލަޝް ބޭނުމީ ދާއި ކަހަލަ ފިރިހެން ކުއްޖެކޭ” ލަޝްކާ ގުންފައި ތަޅައިލިއެވެ. ހެމުން ހެމުން އޭނާ ގޮވައިގެން ދާއިޔަލް ހަސްފަތާލަށް ވަނެވެ.

މެންދުރުގެ ހޫނު ގަދަ ވަގުތު ނަމަވެސް އަކިޔަލް އާއި އޭނާގެ ‘ހައިޑް އައުޓް’ ވަނީ ކަނު އަނދިރި ކަމުގެ ތެރޭގައެވެ. ސޯފާގައި އިށީނދެލައިގެން އިން އަކިޔަލް އިންތިޒާރު ކުރަމުން ދިޔައީ ‘ބޮސް’ އަށެވެ.

މާ ގިނަ އިރަކު އިންތިޒާރު ކުރާކަށް ވެސް ނުޖެހުނެވެ. ސިނގިރޭޓު ތުމަށް ޖަހައިގެން ވައިން ‘ބޮސް’ އައިސް އަކިޔަލް ގާތުގައި އިށީނެވެ. ދެމީހުން އެކުގައި ކޮންމެވެސް ވާހަކަތަކެއް ދެއްކިއެވެ.

“އެންމެ ރަނގަޅު. އެހެންވެ ތިކަން ތިގޮތުގައި ވާނެ ކަމަށް މި ގަބޫލު ކުރީ” ސޯފާއިން ތެދުވަމުން ‘ބޮސް’ ބުނެލިއެވެ.

“ހާސް ނުވޭ ބޮސް. އިރާދަ ކުރެއްވިއްޔާ މިކަން އަހަރެން ކުރާނަން. އެކަން ކުރުމަށް މިހާރު މީހުންތައްވެސް ގެނެސްފިން” ސޯފާއިން ތެދުވަމުން އަކިޔަލް ބުނެލިއެވެ.

“ހޫމް.” މިހެން ބުނެ ބޮސް ދިޔައީ އެލާރާ އޮތް ކޮޓަރިއަށެވެ. ބިންމަތީގައި އޭނާގެ ހަށިގަނޑު ދެމިފައި އޮތް އިރު އަނގައިންނާއި ނޭފަތުން އައިސްފައި ހުރި ލޭތައް ވަނީ ގަނޑުވެފައެވެ. ދެލޯ މެރިފައި އޮތް އިރު މޫނުމަތިވެސް ވަނީ ދުޅަވެފައެވެ.

“އޭ!” އެލާރާގެ ބަނޑުގައި ފައިން ކޮއްޓާލަމުން ބޮސް ގޮވައިލިއެވެ. ކުކުރާލާފައި އެލާރާ ހާލަކުން ތެދުވެ އިށީނެވެ. ދެލޯ ކަހާލަމުން އޭނާ ބޮސްގެ ފައިގައި ހިފިއެވެ.

“ޒަވޫ… ކޮންތާކުންތަ ތިއައީ؟ ހާދަ ލަސްވީ ކިހިނެތްވީ…؟” ލޯބިން ފުރިގެންވީ ނަޒަރަކުން ބޮސްއާއި ދިމާލަށް ބަލައިލަމުން އެލާރާ އެހިއެވެ.

“ޒަވޫއޭ؟ ކޮން ޒަވޫއެކޭ ކިޔާކަށްތަ؟” އެލާރާގެ ކޯތާފަތުގައި ޖެހި އިރު ބޮސްގެ މޫނުމަތީގައިވީ އިންތިހާ ރުޅިވެރިކަމެވެ.

“ޒަވޫ.. ނުޖަހަބަ… ވަރަށް ތަދުވެޔޭ…” އެލާރާގެ ދެލޮލުން ކަރުނައިގެ މުތީތައް ބަބުޅަން ފެށިއެވެ.

“ބައްޔެއްނުން؟؟ ތަދު ކުރާށޭ މި ޖަހަނީވެސް. ކީކޭ ކިޔާނަމޭ ހިތާތަ ތިއުޅެނީ އޭނ؟؟؟” އޭނާގެ ރުޅިގަނޑު ދިޔައީ ހައްތަހާ ގަދަވަމުންނެވެ.

“ޕްލީޒް… ސޮރީ އޭ.. ދެން ޑިއުޓީގަ ގިނަ އިރެއް ނުވާނެ. ލަޝްކާގެ ވޭދަނަ ބަލާކަށްވެސް ނޫޅޭނަން. އޭނާ ރަހީމު ކުރި މީހަކު އޭނަ ގޮވައިގެން އުޅިދާނުން. އެލާއަށް ކޮން ކަމެއްތަ؟ ދޮންބެމެން އެ ވޭދަނަ ބަލައިދާނެ. އެލާ ދެން ނޫޅޭނަން އެކަމަކާ. ދެން ޒަވޫއަށް ވަގުތު ދޭނަން. ޕްރޮމިސް…” އެލާރާ ރޮމުން ރޮމުން އާދޭސް ކުރަމުން ދިޔައެވެ.

“ކަލޭ މޮޔަވީތަ އޭނ؟؟ ކީކޭ ކިޔާނަމޭ ހިތާ ތިއުޅެނީ؟؟؟” އެލާރާގެ ކޮލުގައި ހިފާ ކޮޅަށް ނަގަމުން ބޮސް އެހިއެވެ. އަދި ހަށިގަނޑަށް ލެވުނު އެންމެ ބާރެއް ލާފައި އެލާރާ ހޫރާލިއެވެ.

ސްކޭން ކުރަން އޮތް އިރު ލަޝްކާ އޮތީ ދާއިޔަލްގެ އަތަށް ފިތާލަ ފިތާލައެވެ. އޭނާގެ ދަރިފުޅު ރަނގަޅު ސިއްހަތުގައިވޭތޯ ހިތާ ހިތުން ދުޢާ ކޮށްލެވުން އަދަދު ބުނަންވެސް ނޭނގެޔެވެ. ވަރަށް ރަނގަޅަށް ސްކޭން ކުރަން އިން ޑަކްޓަރު ބެލިއެވެ. ބަލަން އިނދެފައި އޭނާ އެދެމަފިރިންނާއި ދިމާލަށް ބަލައިލިއެވެ.

“މަރުހަބާ. އެއްމާބަނޑުދެބެން. ދެކުދިންގެ ހާލުވެސް ވަރަށް ބަރާބަރު” ޑަކްޓަރު ދިން ހަބަރާއި އެކު ލަޝްކާގެ ދެލޯ ވިދާލީ އުފާވެރިކަމުގެ ކަރުނައިންނެވެ. ދާއިޔަލްގެ ދެލޯ ވެސްމެއެވެ.

ދެމަފިރިންގެ މޫނުމަތީގައިވީ ހިނިތުންވުން ފެނި ޑަކްޓަރުގެ މޫނުގައި ނުތަނަވަސްކަން އުފެދުނެވެ. ހިންދިރުވާލަމުން ކައިރީގައި އޮތް އޭނާގެ ފޯނަށް ބަލައިލިއެވެ. އޭނާ އެދެމީހުނަށް ދިން އެ އުފާވެރި ޙަބަރު އޭނާއަށްވެސް މިހާރު އިނގޭނެޔެވެ. ދެންވާނީ ކިހިނެތްބާއެވެ؟

(ނުނިމޭ)

ފަސްދޮޅަސްތިންވަނަބައިގެ ތެރެއިން:

“ކިހާ ދެރަ ކަމެއްތަ އޭނ؟؟؟ ބީރީތަ؟؟؟ ނޫނީ އިވޭ ކަމަށް ނަހަދަނީތަ؟؟ މަ މި އަހަނީ ކަލޭ ބަނޑުބޮޑީ ހޭ؟؟؟؟”

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.