ވަފާތެރިމަވީމޭ 2 (7)

“ކޮބާ. އަޑު އިވިއްޖެ؟ މިއީ ކަލޭ ކަންތަކޭ!” ތުވާލި ހިފައިގެން ފެންވަރަން ފާހާނާއާއި ދިމާލަށް ދަމުން ނިކްޔާން ބުނެލިއެވެ. އޭނާގެ ރާގު ހުރި ގޮތުން ވެސް އެހުރީ ވަރަށް ހިތްހަމަ ނުޖެހިފައިކަން ދޭހަވެޔެވެ.

(7 ވަނަ ބައި)

ފާހާނާ ދޮރު ހުޅުވާލާފައި އަނެއްކާވެސް ނިކްޔާން އެނބުރުނެވެ. “ދެން ތި ތަނުން ތެދުވަން އުޅޭ. ޒަކޫ އަންނަ އިރުވެސް ތިހެންތަ އޮންނާނީ؟” ކަޅި އަޅާލަމުން ނިކްޔާން ބުނެލިއެވެ. ހީނލަމުން ޒުކާ އެނދުން ތެދުވިއެވެ. އޭނާ ގާތައް ޒުކާ އައިސްދާނެތީވެ، ނިކްޔާން އަވަހަށް ފާހާނާއަށް ވަދެ ދޮރު ތަޅުލިއެވެ.

އިސްކޯލު ކައިރިއަށް ދިޔަ ނިހާލްއަށް ބޭރުގައި ހުރި އާންޓީ ކައިރީ ތުންކޮޅު އޫކޮށްލައިގެން ހުރި ޒާކު ފެނުނެވެ. އާންޓީއަށް ހިނިތުންވުމެއް ހަދިޔާ ކޮށްލަމުން ނިހާލް ޒާކު އުރާލިއެވެ. “ކާފައަށްވެސް މާމާއަށްވެސް މަންމިއަށްވެސް ބައްޕިއަށްވެސް ޒަކޫ ރުޅި” ހަރަމް ބަނދެލަމުން ޒާކު ޝަކުވާ ކޮށްލިއެވެ.

“އަޅޭ ކާފަގެ ފުއްގަނޑު. ސޮރީއޭ. މިއަދު ހަމަ ބިޒީވީ ހުރިހާ ކުދިންވެސް…” ނިހާލްއަށް ބުނެވުނީ އެހެންނެވެ. ބުނާނީވެސް އެނޫން ކޯއްޗެކޭ ހެއްޔެވެ؟

ޔަލާ ފަހަތުން ޔޫއާ ކޮޓަރިއަށް ވައިން އިރު އެކުއްޖާ އަޑުން އަޑު ނަގާ ރޮމުން ދިޔައެވެ. ބަނޑުން އޮށޯވެ އޮތް އިރު އެ ވޭނީ ރުއިމުގެ އަޑު އިވި ޔޫއާގެ ހިތް ފިސްފިސް ވެގެން ދިޔައެވެ. “ޔަލޫ؟…”

ޔަލާ ގާތުގައި އިށީންނަމުން އެކުއްޖާ ނަގާ އޭނާގެ އުނގުގައި ބާއްވާލިއެވެ. “ޔަލޫ؟ ކިހިނެތްތަވީ؟ ބުނެބަ. ކުލާސް ކުދިން އެއްޗެއް ބުނީތަ؟” އޭރު ޔޫއާވެސް އިނީ ރޮވޭ ނުރޮވޭ ހާލުގައެވެ.

“ކުލާސް ކުދިން ޔަލޫއަށް މަލާމަތް ކުރަނީ… ބުނީ… ޔަލޫ މިއީ ބޭކާރު ކުއްޖެކޭ.. ރިހާން ބުނީ… ރިހާންއަށް މިހާރު ކޮއްކޮއެއް ލިބޭށޯ އެ އުޅެނީ.. ޔަލޫއަކަށް ދުވަހަކުވެސް ކޮއްކޮއެއްވެސް ނުލިބޭނޭ. މީ ބޭކާރު ކުއްޖެކޭ… މަންމީ… ކޮބާތަ ޔަލޫގެ ބައްޕި…؟ ޔަލޫވެސް ބޭނުމޭ ބައްޕިއެއް…” ރޮމުން ރޮމުން ޔަލާ ޝަކުވާ ކުރިއެވެ.

އެވާހަކަތައް އިވި ޔޫއާގެ ހިތް މަރުވިއެވެ. މުޅި އުމުރުގައިވެސް ޔަލާ ބައްޕަގެ ވާހަކަ ދެއްކި އެއީ ފުރަތަމަ ފަހަރެވެ. އޭނާ ހީކުރީ މަޔަކާއި ބަފައެއްގެ ލޯބިވެސް ޔަލާއަށް ދެވޭ ކަމަށެވެ. އެހެން ވިޔަސް މިއަދު ބައްޕައެއްގެ ލޯބި ބޮޑު ވަމުން އަންނަ ކުއްޖަކަށް ބޭނުންވާނޭ ވަރާއި މެދު ވިސްނާލެވުނެވެ. ފުރަތަމަ ފަހަރަށެވެ.

“ދަރިފުޅުގެ ބައްޕިއާއި މަންމި މިތިބީ ވަރިވެގެންނޭ… އެހެންވެ ބައްޕި ނުފެންނަނީ…” މަޑުމަޑުން ޔޫއާ ބުނެލިއެވެ.

“އެކަމަކު އެހެން ވިޔަސް ޔަލޫއާއި ބައްޕިއާއި އެކީގަ އުޅެވޭނެއްނުން. މަންމި ހާދަ ގޯހޭ” ޔޫއާގެ މޭގައި ޖަހަމުން ޔަލާ ބުންޏެވެ.

“ސޮ… ސޮރީ… ސޮރީ ދޫނީ… ޕްރޮމިސް… މިއަދު ދަރިފުޅާ ދަރިފުޅުގެ ބައްޕިއާއި ދިމާ ކުރުވާނަން…” ދެލޯ ފުހެލަމުން ޔޫއާ އެހެން ބުނެލުމާއި އެކު ޔަލާގެ ދެލޯ ވިދާލިއެވެ.

“ތި ކުރީ ޕްރޮމިސް އިނގޭ؟” ޝަހާދަތް އިނގިލި ދައްކާލަމުން ޔަލާ ބުނެލިއެވެ. ޔޫއާ ބޯ ޖަހައިލިއެވެ.

ޔަލާ ފެންވަރުވާލައިގެން އައިސް އެނދުގައި އޮށޯވެލިއެވެ. ކާން ދާން ބުނުމުންވެސް ޖަވާބަކަށް ބުނީ “ކާނީ ބައްޕިއާއި އެކުގައި” އެވެ. އެނދުގައި އެހެން އޮއްވާ މާ ގިނަ އިރެއް ނުވަނިސް ޔަލާއަށް ނިދުނެވެ.

ނިދިފައި އޮތް ޔަލާގެ މޫނަށް ބަލަން ޔޫއާ 10 ވަރަކަށް މިނިޓް އޮތެވެ. ޔަލާގެ ސޫރަ ހީވަނީ ޔޫއާގެ ސިފަ ނަކަލު ކޮށްފައިވާ ހެންނެވެ. އެހެން ވިޔަސް ޔަލާގެ ހުރީ ނިކްޔާންގެ އިސްތަށިގަނޑެވެ. ހަމަ އެއްވެސް ތަފާތެއް ނެތެވެ. އުޅުންވެސް ބޮޑަށް ހުންނަނީ އެހެންނެވެ. ހަމަ ނިކްޔާންގެ ސަކަ މިޒާޖެވެ. ޔަލާގެ އެ މިޒާޖުން ނިކްޔާން މަތިން އޭނާ އިންތިހާއަށް ހަނދުމަވެޔެވެ. އެހެން ވިޔަސް ނިކްޔާން އޭނާއަށްވީ ބޭވަފާތެރިކަން ހިތައް އަރާ އަމިއްލަ ނަފުސަށް މަލާމަތް ކުރެވެޔެވެ. ސުކޫލު ދަށުން ޒާކު ފެނުމުންވެސް ޔޫއާގެ ހިތް ފިތޭ ކަހަލަ އިހުސާސެއް ކުރެވެޔެވެ. ޒާކު އާއި ނިކްޔާން ހީވަނީ ހަމަ އެކަކު ހެންނެވެ. އެހާ ކުޑަ އިރުވެސް ބައްޕަގެ ސިފަ އެވަނީ ނަކަލު ކޮށްލާފައެވެ. ބޮޑު ވުމުން އަދި ކިހާ ވައްތަރު ވާނޭ ހެއްޔެވެ؟

ނޭފަތް ދަމާލަމުން ޔޫއާ ތެދުވެ އިށީނެވެ. އިރުކޮޅަކު ފޯނު ހިފައިގެން އިނދެފައި އޭނާ ގުޅާލީ ފައިޒަންއަށެވެ. 2 ވަނަ ރިންގުގައި އޭނާ ފޯނު ނެގިއެވެ. “ހަލޯ؟ ކޮބާ ކިހިނެތް އިނީ ދެން؟” ފައިޒަން ދައްކަމުން ދިޔައީ އައިސް ކުރީމް ބޯން ދާ ވާހަކައެވެ.

“އަހަ… އަހަރެން ވަރަށް ބޮޑު ކަމަކު ކިޔަން ބޭނުން…” ކުރަކިވެފައިވީ އަޑުން ޔޫއާ ބުނެލިއެވެ.

“އަނހާ… އަވަހަށް ބުނޭ. ޔޫއީ ނުޖެހޭނެ ދޯ އަހަރެން ގާތު ހުއްދަ ހޯދާކަށްވެސް. ޔޫއީ ބޭނުން ހުރިހާ ކަމެއް ކޮށްދޭން އަހަރެން މިހުރީ ހަމަ ތައްޔާރަށް” ޔަގީން ކަމާއި އެކު ފައިޒަން ބުނެލިއެވެ.

ފައިޒަން އެހެން ބުނުމުން މިއަދު ހިނގާ ދިޔަ ހުރިހާ ކަމެއް ވަރަށް ތަފުސީލުކޮށް ކިޔާދިނެވެ. އެވާހަކަތައް ކިޔާދީ ނިމުން އިރު ޔޫއާއަށް ގިސްލަ ގިސްލާފައި ރޮވެމުން ދިޔައެވެ. ޔޫއާ ވާހަކަ ދައްކާ ނިމެންދެން ފައިޒަން މަޑުން އިނެވެ. އޭނާ ބޭނުން ހުރިހާ ވާހަކައެއް އަޑު އަހަން އިން ފަދައެވެ.

“ދެން… ޔޫއީ ތި ވިސްނަނީ… ނިކްޔާންއާއި ޔަލޫ ބައްދަލު ކުރުވަންތަ…؟” ޔަގީން ކޮށްލުމުގެ ގޮތުން ފައިޒަން އެހިއެވެ.

“ނޫން… އެހެންނެއް ނޫން…”

“ދެން…؟”

“ފައި… ފައިއާއި މިއަދު ބައްދަލު ކުރާ އިރުން… އަހަރެން ބުނަންތަ ތިއީއޭ… ޔަލޫގެ ބައްޕިއަކީ…؟” ޔޫއާ އެހެން އެދުމުން އަނެއްކޮޅުން އިވުނީ ފައިޒަން ދޫކޮށްލި ފިނި ނޭވާގެ އަޑެވެ.

“އަހަރެން ޔޫއީއަށް ތިކަން ކޮށްދީފާނަން. އެކަމަކު.. ތިއީ ދާއިމީ ހައްލެއްތަ..؟” ފައިޒަން އޭނާގެ ބޮލަށް އައި ސުވާލު ކޮށްލިއެވެ.

“އަހަރެން ބޭނުމެއް ނޫން އެ ނިކްޔާން މަގޭ ދަރިފުޅާ ވައިވެސް އެޅޭކައް. އޭނަ އަށް ޒުކާއާއި ޒާކު ވެސް އެހުރީނުން؟ އަހަރެން ޔަލޫ ކައިރީގަ ބުނިން ޔަލޫގެ ބައްޕިއާއި މަށާ މިތިބީ ވަރިވެގެންނޭ. އެހެންވީމަ… ފައި ބުނިން ދޯ…؟ ކޮންމެ ކަމެއްވެސް ކޮށްދޭނަމޭ…” ޝަކުވާ ކޮށްލާފަދައިން ޔޫއާ ބުނެލިއެވެ.

(ނުނިމޭ)

އަށްވަނަބައިގެ ތެރެއިން:

“ޔަލޫ… އެއީ ޔަލޫގެ ބައްޕި…” އިނގިލި ދިއްކޮށްލަމުން ޔޫއާ އެހެން ބުނެލިއެވެ. ލޯ މަރާލައިގެން ހުރި ޔަލާ ދެލޯ ހުޅުވާލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.