ފުންއަސަރު 19

ދަރިފުޅާއޭ ގޮވާ ލަތާ ކުރިއަށް ދުއްވައިގަތީ ކޮޓަރީ ޓައިލްސްްތައްމަތީގައި  ވެއްޓިފައި އޮތް ޝިޔާރާއާއި ދިމާލަށެވެ. ލަތާ ޝިޔާރާ ކައިރީގައި ިއިށީނުމަށްފަހު ބޯ ބާއްވާލީ ލަތާގެ އުނގުމަތީގައެވެ. އަދި ބިރުގަނެފައިވާ ހާލު ޝިޔާރާގެ އަތުގައި ހިފާ ވިންދު ވެސް ބަލާލިއެވެ. އެއަށްފަހު އަތްފޯރާ ހިސާބުގައި ހުރި ފެންޖަޖުން އަތަށް ފެން އަޅާ ޝިޔާރާގެ މޫނަށް ބުރުވާލިއެވެ. ދެވަނަ ފެންގޮށި މޫނުގައި ވަށައިގެން ލޯތްބާއެކު ހާކާލިއެވެ. ޝިޔާރާގެ ބުރަކަށި ދަށުގައި އޮތް ދިގި އިސްތަށިގަނޑު ލަތާއަށް ފެނުނީ އެވަގުތުއެވެ. މީގެ ކުރިން ޝިޔާރާގެ އިސްތަށިގަނޑު ދޫކޮށްލާފައި އޮންނަތަނެއް ލަތާއަށް ފެނިފައެއް ނުވޭއެވެ. އުނދަގުލުން ދެލޯ ހުޅުވާލި ޝިޔާރާއަށް ތަންތަން ފެންނަންފެށީ ފުސްކޮށެވެ. ދެފަހަރަކު ދެލޯ މަރާލާ ބާރުކޮށްލުމުން ތަންތަން ސާފުކޮށް ފެންނަން ފެށުމުން ބަލާލީ ހިތްއެދޭ މީހާ އިނީ ކައިރީގަތޯއެވެ. ލަތާ ކައިރީގައި އެނދުގައި ލެގިލައިގެން ޝިޔާރާ ވެސް އިށީނެވެ. ލަތާ ޝިޔާރާގެ މޫނުގައި ފިރުމާލިއެވެ. ވީކީއްތޯ އަހާލިއެވެ. އިޝާރާތުން ޝިޔާރާ ބުނި އެއްޗެއް ކިތަންމެހާ ވެސް ރަނގަޅަށް ލަތާއަށް ސާފުވިއެވެ. “ބޯއަނބުރާގަނެފަ ވެއްޓުނީ” ބަދަލުގައި ޝިޔާރާ ކައިރީގައި ރަނގަޅަށް ކައިގެން ހުންނާށޭ ބުނެލިއެވެ. ކަމެއް ބޭނުންވެއްޖެނަމަ މަންމައަށް ގުޅާށޭ ބުންޏެވެ. ހިތްހަމަޖެހިގެން ހުންނާށޭ ވެސް ބުންޏެވެ. ނަމަވެސް ޝިޔާރާ ހުންނަނީ ހިތްހަމަޖެހިފައި ނޫންކަން ލަތާއަށް އެނގެއެވެ. ސަބަބު ވެސް ލަތާއަށް އެނގޭއެވެ. ޒޯހަން ޝިޔާރާއާއި މިދިޔަ ދުވަސްތަކުގައި ގުޅުމެއް ނުބާއްވާކަން ވެސް ލަތާއަށް އެނގެއެވެ. ލަތާ އެންމެ ހައިރާންވީ ޝިޔާރާ ނިއާގެ ހާލު އަހާލުމުންނެވެ. ހިތްތިރި ކަމުގެ ނަމޫނާއެކެވެ. ތިމާގެ ފިރިމީހާ ޖަހައިގަނެގެން އުޅޭ އަންހެނާގެ ހާލު ބަލާނީ މިޒަމާނު ކާކުހެއްޔެވެ؟ ނިއާއަށް ވަރަށް ބަލައިގެން އުޅުމަށް ލަތާ ކައިރީގައި ޝިޔާރާ ބުނެލިއެވެ. އެންމެ ފަހަރަކު ވެސް ޝިޔާރާ ޒޯހަންގެ ވާހަކައެއް ނާހާތީ ވެސް ލަތާ ހައިރާންވިއެވެ. ހާދަ ކެތްތެރި ކުއްޖެކެވެ. ނަމަވެސް އެއްކަމެއް އެމޫނު މަތިން ލަތާއަށް ފާހަގަވިއެވެ. އެންމެ ކުރިން ވެސް ފެނުނު އެކަނިވެރިކަމާއި ހިތާމަ އަދި މާޔޫސްކަން އެމޫނު މަތިން ފާޅުވޭއެވެ. އެހެންކަމުން ލަތާ އެބައިން ނިކުތުމުގެ ކުރިން ޝިޔާރާ ހިތްހަމަޖައްސާލަން ބުނި އެއްޗަކުން ރަކި ގޮތަކަށް ހީލުމަށްފަހު ލަތާގެ ގައިގާ ބައްދާލިއެވެ. “މަންމަ ކުރިން ހިއެއް ނުކުރަން ދަރިފުޅުގެ ތިހާ ދިގު އިސްތަށިގަނޑެއް އޮތް ކަމަކަށް. މިދުނިޔޭގައި ހުރި ޒޯންއާ ގުޅޭ ހަމައެކަނި އަންހެންކުއްޖަކީ ތީކަން މަންމައަށް ހަމަ ޔަގީން. މިހާރު އެނގިއްޖެ ދަރިފުޅު ފެނުމުން ޒޯހަން މޮޔަވި ސަބަބު” ހީލާފާއި ޝިޔާރާގެ ބުރަކަށީގައި ފިރުމާލަމުން ނިތަށް ބޮސްދިނެވެ. އެއަށްފަހު ތިރިއަށް ފޭބީ ނޫރީ ގެއަށް އައުމުގެ ކުރިން އަވަހަށް ތިރިއަށް ފޭބޭތޯއެވެ.

ވަގު ދަރިއަކު ބޮލުގައި އަޅުވައިގެން ޒޯހަންގެ ސިކުނޑި ކަމުންދާ ނިއާގެ ހަޔާތަށް ބަހާރު މޫސުން އައި ފަދައެވެ. ޒޯހަންގެ ހިތް އެއްކޮށް މިލްކު ކުރެވޭނެކަން މިހާރު ނިއާ އަށް ޔަގީން ވެއްޖެއެވެ. ޒޯހަން ޝިޔާރާގެ އެއްވެސް ވާހަކައެއް ނިއާ ކައިރީގައި ނުދައްކައެވެ. ޝިޔާރާ ކައިރީގައި ނިދަން ދާކަށް ވެސް މިހާރު ޒޯހަން ބޭނުމެއް ނުވޭއެވެ. ލިބެންއުޅޭ ދަރިފުޅު ދެކެ ވެސް ވަރަށް ބޮޑަށް ލޯބިވާހެން ހީވެއެވެ. ހީ ސަމާސާ ކުރުމުގައި ޒޯހަން ވަރުގެ ކަމެއް މިހާރަކު ނެތެވެ. ކުރީގައި ދޭތެރެއަކުން ޝަޒަން ރަނގަޅު ނަޞޭހަތެއް ދިނަސް އެމީހުން ވެސް ހުޅުމާލެއަށް ބަދަލުވި ފަހުން ޒޯހަންގެ ހުރިހާ ވަގުތެއް ވަނީ ނިއާއަށް ހާއްސަ ކުރެވިފައެވެ. ޒޯހަންގެ އިތުރުން އެގޭ ހުރިހާ މީހުންގެ ފަރާތުން ނިއާ އަށް ލޯތްބާއި އަޅާލުން އިންތިހާއަށް ލިބޭއެވެ. މައިދައިތަ ފިޔަވައެވެ. ލަތާގެ މޫނު މަތި ކިޔަވާކަށް ނިއާ އަކަށް ނޭނގޭއެވެ. އެމޫނު މަތިން ހަރުކަށި ކަމެއް ވެސް އަދި ލޯތްބެއް ވެސް ނިއާ އަށް ފެނިފައެއް ނުވޭއެވެ. ރަނގަޅު ގޮތަކީ ކޮބާކަން އަބަދުވެސް ލަތާ ނިއާއަށް ބުނެދޭއެވެ. ހޮޑުލާން ފެށުމުން ބުރަކަށީގައި ފިރުމާލަ ވެސް ދޭއެވެ. މާގިިނަ ވާހަކަ ނުދައްކާތީ ނިއާ އަށް ވެސް އަނގަ ގަދަ ކުރާކަށް ނުކެރޭއެވެ. އާދައިގެން މަތިން މިރޭ ވެސް ބޭރުން އައިސް ވަން ނޫރީ ލައިފް ކުޑަ ފެންފުޅި ދިއްކޮށްލީ ސިޓިންގްރޫމުގައި ޓީވީ ބަލަން އިން ނިއާގެ އަތަށެވެ. އަދި ހީލުމަށްފަހު ދިޔައީ ނިއާގެ ބޮލުގައި ވެސް ފިރުމާލާފައެވެ. މަޑުމަޑުން ކޮޓަރިއަށް ވަން ނިއާ އެނދުގައި އިނދެ އިންތިޒާރު އެކުރަނީ އޮފީހަށް ފައިލެއް ބަލާ ދިޔަ ޒޯހަން ކޮޓަރިއަށް އަންނާނެ ވަގުތަކަށެވެ. އެނދުގެ ހެޑްބޯޑް މަތީގައި ހުރި ފެންފުޅިއަށް ބަލާލުމަށްފަހު ކޮޓަރީ ދޮރާއި ދިމާލަށް ވެސް ބަލާލެވެއެވެ. އަވަސް އަވަހަށް ބަދިގެއަށް ވަދެ ފެންފުޅި ތައްޓަކަށް އަޅާލުމަށްފަހު އޮރެންޖް ޖޫސް ތައްޓެއް ގިރާލިއެވެ. އަދި ތަށި ހިފައިގެން އަލުން ކޮޓަރިއަށް ވަނެވެ.

އޮފީހުން ފައިލު ނުފެނުމުން ދޮރު ތަޅުލުމަށްފަހު ޒޯހަން ލިފްޓަށް އެރިއެވެ. އަދި އެންމެ ތިރިއަށް ގޮސް ހާމައަށް އޮތް ބަޔަށް ނިކުމެލީ ސިގިރެޓެއް ރޯކުރަމުންނެވެ. ޒޯހަން މިހާރަކަށް އައިސް ދުންފަތަށް ވެސް ދެވި ހިފާފައި ހުރީ މާވަރަކަށެވެ. އެއްވެސް ފިކުރެއް ހިޔާލެއް ނެތި ޒޯހަން މުޅި އިމާރާތަށް ކަޅި ހިންގާލިއެވެ. އެވަގުތު ބެލްކަނީގައި މަޑުކޮށްލައިގެން ހުރި ޝިޔާރާ ޒޯހަން އަށް ފެނުނެވެ. ޒޯހަން އަށް ޝިޔާރާ މިފެނުނީ މަސް ދުވަސްވާން ގާތް ވެފައި ވަނިކޮށެވެ. އެހެންޏާ އެހިތުގައި ޝިޔާރާ ފެނުމުން ހިނގާ އުފާވެރިކަމެއް ނުހިނގިއެވެ. ނަމަވެސް ހިތް މަޖުބޫރު ކުރީ ޝިޔާރާއާއި ކައިރިވެލުމަށެވެ. ނިއާ ބަލިވެ އިނުމާއި ގުޅިގެން ޒޯހަންއަށް ކަމެއް ކޮށްނުދެވޭތީ އެބައި ފޫބައްދަން އެސިކުނޑި ނިންމީ ޝިޔާރާގެ ބޭނުންކުރުމަށެވެ. ޒޯހަން އަށް ނުވިސްނުނީ ޝިޔާރާގެ ބަނޑުގައި ޒޯހަންގެ ދަރިއަކު ގަރުބަގަނެފާ ވާކަމެވެ. އަލުން ލިފްޓަށް އަރާ ޝިޔާރާގެ ބަޔަށް ތަޅުދަނޑި ޖަހާލަމުން އެތެރެއަށް ހުޅުވާލިއެވެ. ކޮޓަރި ދޮރުމަތީގައި ހުރި ޝިޔާރާގެ ތުންފަތް މައްޗަށް ވެރިވެގެން ދިޔައީ ފުޅާ ހިނިތުންވުމެކެވެ. ލޯބިވާ ފިރިމީހާ އެހާ ދުވަސް ފަހުން ފެނުމުން ކޮންޓްރޯލް ނުކުރެވުނެވެ. ޒޯހަންގެ ހަށިގަނޑުގައި ޝިޔާރާ އޮޅުލައި ގަތުމުން ވެސް ޒޯހަން ހުރީ އަޅާވެސް ނުލައެވެ. ޒޯހަން ލާފައި ހުރި ގަމީހުގެ މަތިން ތިން ގޮށް ނެއްޓި ތަނަވަސް މޭމަތި ހާމަވާން ހުރި ހިސާބުގައި ޝިޔާރާގެ ތުންފަތް ޖެހުމުން ޒޯހަންއަށް ވެސް އިތުރަކަށް ނުހުރެވުނެވެ. ޝިޔާރާ ކުރިން ފަށައިދިނުމުން ޒޯހަން ކުރަން އުޅުނު ކަންތަކަށް އިތުރު ދޮރެއް ހުޅުވުނީއެވެ. އޭގެ ގަޑީރެއް ފަހުން ޝިޔާރާގެ އެނދުމަތީގައި އޮތް ޒޯހަން ކުއްލިއަކަށް ތެދުވެ ތިރީގައި ހުރި އަންނައުނުތައް ނަގާ ލާން ފެށިއެވެ. މެއާއި ހަމައިގާ ރަޖާ އޮޅާލައިގެން ޝިޔާރާ ވެސް އެނދުން ތެދުވެލިއެވެ. ކޮޓަރިން ނިކުންނަން ހިނގައިގަތް ޒޯހަންގެ އަތުގައި ޝިޔާރާ ހިފާލިއެވެ. ޒޯހަން ބަލާލުމާއެކު ޝިޔާރާ ނޫނެކޭ ބުނެ ދެފަރާތަށް ބޯ ތަޅުވާލިއެވެ. ޝިޔާރާ ބަނޑުބޮޑުކަން އަންގާ ދިނުމަށްޓަކައި ޒޯހަންގެ އަތްތިލަ ގެންގޮސް ޝިޔާރާގެ ބަނޑުގައި ޖައްސާލިއެވެ. ޒޯހަންއަށް އޭގެ މާނަ ވިސްނުނީ އެހެން ގޮތަކަށެވެ. ޒޯހަން ހީކުރީ އެކަމަށް ޝިޔާރާ ދެވަނަ ފަހަރަށް ބޭނުންވީ ކަމަށެވެ. އެހެންކަމުން އަވަސް އަވަހަށް ޝިޔާރާއަށް ބަލާލުމަށްފަހު ނޯ އޭ ބުނެލިއެވެ. ކުދިކުދިވެފައިވާ ޝިޔާރާގެ ހިތަށް ލޮނު މިރުސް އެޅި ފަދައެވެ. ހިތް ފަޅައިގެން ނުދިޔައިއްޔާ ރަނގަޅެވެ. ބަލާލުމެއް ނެތި ޒޯހަން އެނބުރި ދިޔައީ ނިއާ އިންތިޒާރުކުރާނޭ ބުނެފައެވެ. ޝިޔާރާގެ ހިތް ރޮށްވާލާފައި ކުރިއަށް އެޅި ކޮންމެ ފިޔަވަޅެއް ނިކަމެތި ޝިޔާރާގެ ހިތް މަތީގައި އެޅި ފަދައެވެ. ފިޔަވަޅަކަށް ފަހު ފިޔަވަޅެއް އަޅަމުން ގޮސް ޒޯހަން ދޮރުން ނިކުމެ ބޭރުން ތަޅުލި އަޑު ވެސް ޝިޔާރާއަށް އިވުނެވެ. ގަބުވެފައި ހުރި ޝިޔާރާ ހުރީ ވެދިޔަ ކަންތައް ގަބޫލުނުކުރެވިފައެވެ. ޒޯހަން ބަދަލުވެދާނޭ ކަމަށް ޝިޔާރާ ދުވަހަކު ވެސް އުއްމީދު ކޮށްފައެއް ނެތެވެ. ލޮލުންފޭބި ކަރުނަތައް ފޮހެލުމަށްފަހު ފާހާނާއަށް ވަނީ މިންވަރަށް ޝުކުރު ކުރަމުންނެވެ. ޒޯހަންގެ ހިތް އަލުން ބަދަލުވަންދެން ޝިޔާރާ ކެއްކުރާނެއެވެ. އެއްވެސް ޝަކުވާއެއް ނުކުރާނެއެވެ. އަދި ހަމަ ވަފާތެރިކަންމަތީ އެލޯތްބަށް އިންތިޒާރުކުރާނެއެވެ. ޒޯހަން ކަމަކު ބޭނުންވެގެން އައިއްޔާ އުފަލުން އެކަމަށް މަރުހަބާ ކިޔާނެއެވެ. ޒޯހަންއަކީ ޝިޔާރާގެ ފުރާނައެވެ.

ފުދޭ ވަރަކަށް ގިނައިރުވުމުން ނިއާ ހާސްވާނެކަން އެނގޭތީ ޒޯހަން ހުރީ އިންތިހާއަށް ދެރަވެފައެވެ. އެހެންކަމުން ކޮޓަރިއަށް ވަނުމުގެ ކުރިން ފުންނޭވައެއްލާ މީހާ ރިލޭކްސް ވެލިއެވެ. އަދި މަޑުމަޑުން ދޮރު ހުޅުވާލުމަށްފަހު އެތެރެއަށް ވަނެވެ. މަންޒަރު ބަލަން ހުރި ލަތާގެެ ތުންފަތްމަތީގައި ވީ ހިނިތުންވުމެކެވެ. ޒޯހަން އައީ ޝިިޔާރާގެ ކައިރިންކަން ލަތާއަށް އެނގުނީ ޝިޔާރާގެ ހާލު ބަލާލަން އެބަޔަށް ދިޔުމުން ޒޯހަންގެ އަތްދަނޑިމަތީގައި ޝިޔާރާ އުފުލާލައިގެން ކޮޓަރިއަށް ވަންތަން ފެނުމުންނެވެ. އުފަލުން ފޮޅިފައި ހުރި ލަތާ އައީ ހުޅުވާލާފައި ހުރި ދޮރުވެސް ތަޅުލާފައެވެ. ލަތާގެ ދުއާ އިޖާބަ ކުރައްވާތީ އެކަމާއި ޝުކުރުކުރާ ހާލު ކޮޓަރިއަށް ވަނީ ހިނިތުންވެ ހުރެއެވެ.

“ކޮންކަމަކާ ބޭބީ މާ ހާސްވެފަ” އެނދުގައި އިން ނިއާ ފެނުމުން ޒޯހަން ލޯތްބާއެކު އަހާލިއެވެ. ނިއާގެ މޫނު ފެނުމުން ވެސް ޒޯހަންގެ ހިތަށް ހަމަޖެހުން ލިބިގެން ދިޔައެވެ. އަދި ހަމަޖެހިލުމަށްޓަކައި ސައިޑް ކަބަޑްމަތީގައި ބަހައްޓާފައި ހުރި ޖޫސްތަށި ބޯލީ އެއްނޭވައިންނެވެ. ނިއާގެ ތުންފަތްމަތީގައިވި ވިހަ ހިނިތުންވުން ފެނުނުނަމަ ޒޯހަން ނިއާ އާއި ސުވާލުކުރާނެކަން ޔަގީނެވެ. “ތީ އޮފީހަށް ފައިލެއް ބަލާ ދިޔަ މީހާ. އެކަމަކު ޒޯން ހާދަލަހެކޭ. ނިންނި އޮފީސްބަޔަށް އަރަން އުޅެނިކޮށް ތިއައީ” އެނދުގައި ނިއާ ކައިރީގައި އިން ޒޯހަންގެ އަތުގައި ބައްދާލަމުން ނިއާ ވާހަކަދެއްކިއެވެ. “ފައިލް ނުފެނުނީމަ މަސައްކަތެއް ކުރަން އިނީ. ނިންނި ބިރުގަނެފާނެތީވެ މިއައީ ވެސް. އެހެންނޫނީ އެކަންތައް އެއްކޮށް ނިންމާފަ އަންނާނީ” ޒޯހަންއަށް ނިއާ އާއި ހަތަރުކަޅި ހަމަކުރަން ނުކެރުނީ ދޮގު ބޭޒާރުވެދާނެތީއެވެ. އެވަގުތު ޒޯހަންގެ ބުމަ މަތިން ބޮލުގެ އިސްތަށިގަނޑާއި އެކުވެފައި އޮތް ދިގު އިސްތަށި ފެނުމުން ނިއާ އަށް އިތުރު ސުވާލެއް ކުރާކަށް ނުޖެހުނެވެ. ނަމަވެސް ޒޯހަން ދޮގު ހެދުމުން ދެރަވިއެވެ. އަދި އެކަން އިތުރަށް ޔަގީން ކުރުމަށްޓަކައި ނިއާ ވިސްނާލުމަށްފަހު ޒޯހަންގެ ކޮލުގައި ބޮސްދިނެވެ. “މިރޭ މިއުޅެނީ ކަމެއް ކުރާ ހިތުން. މިހާރު ކިހާ ދުވަހެއްމިވީ. ނުބުންޏަސް އެނގޭ ޒޯން ވެސް ބޭނުންވާކަން. ޑޮކް ވެސް ބުނިދޯ އޯކޭއޭ. ބަލައިގެން އުޅެވިދާނެދޯ… ޕްލީޒް ހިނގާބާ” ވަގުތުން ޒޯހަން ދެކޮޅު ހެދިއެވެ. އަދި އެހެން ފަހަރަކުން ކަމަށްް ބުނެ ނިއާގެ ބޮލުގައި ބޮސްދިނެވެ. ނިއާއަށް ކުރެވުނީ ކުށްހީއެއް ނުންކަން އެނގުމުން ރުޅި އާދެވުނީ ޝިޔާރާ ދެކެއެވެ. ޒޯހަންގެ މޭގައި ބޯއަޅާލައިގެން ނިއާ އިންއިރު ހިތާހިތުން ޝިޔާރާއަށް ބަދުދުޢާ ކުރަމުން ދިޔައެވެ.

ދުވަސްތައް ފާއިތުވަމުން ގޮސް އިތުރު އެއްމަސް ދުވަސް ފާއިތުވީއެވެ. ޝިޔާރާގެ ހާލަކީ ކޮބާތޯއެވެ؟ ޒޯހަންގެ ފަރާތުން އަޅާލުމެއް ނުލިބުނުތާ މިހާރު ޒޯހަން ވަނީ ބަކުރާއި މޯޑްއާއި އެއްފެންވަރަށް ވެއްޓިފައެވެ. ޒޯހަން ބޭނުންވާ ކަންތައް ޝިޔާރާގެ ފަރާތުން ކޮށްލެވުނީމާ އެނިމުނީއެވެ. ކުޑަމިނުން ހުރީ ކައިގެންތޯވެސް ބަލާނުލައެވެ. މުޅި ގޭގައި ޝިޔާރާއަށް އަޅާލާން ހުރީ ލަތާ އެކަންޏެވެ. ބޮޑުވެފައި ހުރި ތައުލީމީ ފިރިހެން ދަރިފުޅު އުޅޭ ގޮތުން ލަތާ ހުންނަނީ އަބަދު ހިތުގައި ޖެހިފައެވެ. މިހާރަކަށް އައިސް ޒޯހަން އަށް ނިއާ ހުރެފަ އެއްވެސް މީހަކު ނެތަސް ވަރިހަމައެވެ. ނިކަމެތި ޝިޔާރާ އުޅޭ ހާލުން ލަތާގެ ހިތް ފަޅައިގެންދާވަރު ވޭއެވެ. ލަތާ ބޭހަކަށް ޔަޝްމީ ގޮވައިގެން ބޭރަށް ފުރަން ހަމަޖެހިފައި އޮތުމުން އެނިކަމެތި އަންހެންކުއްޖާއަށް އަޅާލާނެ މީހަކު ނެތުމުން އިތުރަށް ކަންބޮޑުވެއެވެ. ރާކީއަށް ވެސް ވިސްނާދެވުނު އަދަދެއް ވެސް ނޭނގެއެވެ.

އެއްދުވަހެއްގެ މެންދުރުފަހެވެ. ކައިގެން ސޯފާގައި ހަބަރު ބަލަން ޖައްސާލި ނޫރީ އަށް ލަތާ ބިލެއްގަނޑު ގެނެސްދިނެވެ. އަދި ޖެހިގެން ހުރި ސޯފާގައި ޖައްސާލިއެވެ. ފަހަކަށް އައިސް ލަތާއާއި ނޫރީ ވެސް މާގިނައިން ވާހަކަދައްކައެއް ނޫޅޭއެވެ. ނޫރީގެ ރޭވުންގަނޑު ކުރިފަޅާ މޫލަމުންދާތީ ހުންނަނީ ނުލާހިކު ހިތްހަމަޖެހިފައެވެ. ނިއާގެ އުނަގަނޑުގައި އަތް އަޅުވާލައިގެން ކޮޓަރިން ނިކުތް ޒޯހަން އަށް ނޫރީ ގޮވާލިއެވެ. އަދި ކުރިމަތީގައި ހުރި ސޯފާގައި އެދެމަފިރިން ޖައްސާލުމުން ލަތާ ތެދުވެގެން ދިޔައެވެ. “ބައްޕަ މިއުޅެނީ ވަރަށް ބޮޑު ވާހަކައެއް ބުނަން ދަރިފުޅުމެން ކައިރީ. މަންމަ އެއުޅެނީ ދޮންބެދައްތަ ގޮވައިގެން ޔޫކޭއަށް ފުރަން. ދޮންބެ ވެސް ދާނެ. ދެން ދޮންތަ އެއުޅެނީ ނުލާހިކު ބުރަކޮށް ދެކުދިން ގޮވައިގެން. މިގޭގައި އިތުރަށް ކެއްކެން ވެސް ހުރީ ދޮންތައަށް އެކަނި. ނިއާ އަކަށް އެކަހަލަ މަސައްކަތެއް ނުކުރެވޭނެ. ދެން ހުރީ ޒޯންގެ ދޮށީ އަނބި ޝިޔާރާ. ބުނޭ މަންމަ އަންނަންދެން މިބަޔަށް ބަދަލުވާން. ދެން ޒޯންވެސް ވާނެ އެމަންޖެގެ ހާލު ބަލަން. އިރަކު ބައްޕަ ނުގަބޫލަސް މިހާރު ބައްޕަ މުޅިން ބަދަލުވެއްޖެ. ގަބޫލުކުރަން އެއީ ވެސް ޒޯންގެ އަންބެއްކަން. އެހެންވީމަ ބުނޭ މިބަޔަށް ބަދަލުވާށޭ. މަންމަ އާއި ބައްޕަގެ ރޫމް ކުރިމަތީގައި ހުރި ރޫމުގަ ބަހައްޓާ ގެނެއްސަ” ފާރު ކައިރީގައި ހުރި ލަތާގެ ތުންފަތަށް ވެރިވީ ހިނިތުންވުމެކެވެ. ނޫރީ ޝިޔާރާއާއި ދޭތެރެ ދެކުނު ގޮތް ބަދަލުވީތީ ލަތާ ވަރަށް ހިތްހަމަޖެހުނެވެ. ލަތާ އަށް ނުވިސްނުނީ ފަރުދާގެ ފުރަގަހުގައިވީ ކަންތަކެވެ. ޒޯހަން ފޫހިވެފައި އިނދެ ވެސް ބޯޖަހާލިއެވެ. “ފޯނުން މެސެޖްކޮށްލާފައި ބުނޭ. ކީއްކުރަން ކޮންމެހެން އެބަޔަށް ދަނީ” ނިއާ ޒޯހަން އަށް އަމުރު ކޮށްލިއެވެ. ވަގުތުން ޒޯހަން ނިއާގެ ބަހަށް ކިޔަމަންވިއެވެ. ފޯނު ނަގާ ޒޯހަން މެސެޖް ޓައިޕް ކުރަން ފެށުމުން ނިއާ އާއި ނޫރީ ހިނިތުންވުމެއް ބަދަލުކޮށްލިއެވެ.

ލަތާ ފުރައިގެން ދިޔުމާއެކު ޝިޔާރާ ތިރިއަށް ބަދަލުވިއެވެ. އެބައިގާ އުޅޭތާ ހަފްތާއެއްވެ ދިޔައިރު ވެސް ޒޯހަން ޝިޔާރާ އާއި ބަސް ކިޔާފައެއް ނުވޭއެވެ. ރާކީ ވެސް ކޮންމެހެން ބުނަން ޖެހުނު އެއްޗެއް ވިއްޔާ ނުބުނެއެވެ. ޝިޔާރާ ކުރިމަތީގައި ޒޯހަން ނިއާ އާއި ސަކަރާތްޖަހާ މަންޒަރު ފެނުމުން ޝިޔާރާ ހިތް ކުދިކުދިވާވަރު ވެއެވެ. ނިއާގެ ބަނޑުގައި ކޮށްޓަމުން ސަކަރާތް ޖަހަމުން ކޮޓަރިން ނިކުންނަ މަންޒަރު ފެނުމުން އެދެލޯ ކަރުނުން ތެންމާލައެވެ. ފެންނަ މަންޒަރު ނުފެންނަ ކަމަށް ހަދައިގެން އުޅޭނީ ކިހާ ދުވަހަކުތޯއޭ ޝިޔާރާގެ ހިތަށް އަރައެވެ. ނޫރީގެ ފަރާތުން ވެސް މަލާމާތުގެ ހިނިތުންވުމެއް ނޫނީ ޝިޔާރާއަށް ނުލިބޭއެވެ. އެކަނިމާއެކަނި ކަރުނަ އަޅަމުން ކެއްކުރަނީ ލޯބިވާ ފިރިމީހާގެ ލޯމަތިން ގެއްލިގެން ދާން ބޭނުން ނުވާތީއެވެ. ކޮންމެ ހާލެއްގަ ވެސް ޝިޔާރާ ކެއްކުރާނެއެވެ. ބަނޑުގައިވާ ދަރިފުޅަކީ ޒޯހަން ގެ ލޯބީގެ ނިޝާނެވެ. އެއަމާނާތަށް ހިޔާނާތްތެރިއެއް ނުވާނެއެވެެ. އަމިއްލަ ފުރާނަ ގުރުބާން ކޮށްގެން ވެސް އެކުޑަކުޑަ ފުރާނަ މިދުނިޔެއަށް ގެންނަން ޝިޔާރާ ބޭނުންވެއެވެ.

މެންދުރުގެ ގަދަ ހޫނުގައި ޒޯހަން އޮފީހުގައި އުޅުމަށްފަހު ނިމޭ ވަގުތު ނުޖެހެނިސް ތިރިއަށް އައީ ނިއާގެ މޫނު ދެކިލާ ހިތުން ކެއްނުވެގެންނެވެ. ކަރުގައި އޮތް ޓައީ އަށް ދޫކުރަމުން ކޮޓަރިއަށް ވަންނަން އައި ޒޯހަންއަށް ކުރިމައްޗަށް އެރި ޝިޔާރާ ފެނުމުން ހުއްޓެވުނެވެ. ކަރުނުން ދެލޯ ފުރިފައި ހުރި އިރު ވެސް ޝިޔާރާ މަސައްކަތްކުރީ ހިނިތުންް ވެވޭތޯއެވެ. ޒޯހަން ފޫހިކަމާއެކު ޝިޔާރާއަށް ބަލާލުމުން ޝިޔާރާގެ ހިތުގައި ވަރަށް ބޮޑަށް ޖެހުނެވެ. ޝިޔާރާ ޒޯހަންގެ ދެލޮލަށް ބަލަހައްޓައިގެން ހުރިއިރު ޒޯހަން ހުރީ މާދުރަށް ބަލަހައްޓައިގެންނެވެ. ޝިޔާރާގެ މޫނު ދެކެ ވެސް ޒޯހަން ފޫހިވާ ކަހަލައެވެ. ޒޯހަންގެ އަތުގައި ޝިޔާރާ ހިފާލަން އުޅުނު ވަގުތު ޒޯހަން ހީލާފައި ގޮސް ހިފާލީ ދޮރުމަތީގައި ހުރި ނިއާގެ އުނަގަނޑުގައެވެ. ހިތުގައި ޖެހިފައި ހުރި ޝިޔާރާ އެނބުރުނު ވަގުތު ކުރިމަތީގައި ކަޅި އަޅާލައިގެން ހުރި ނޫރީ ފެނި މޭ ކެކިގަތެވެ. ޒޯހަންގެ ބައްޕައެއް ކަމަކު އެވަރަށް ދެލޯ ކުޑަނުކޮށް ކަޅި ނޭޅެނީހޭ ޝިޔާރާގެ ހިތަށް އެރިއެވެ. ޖެހިލުންވެފާ ކުރިއަށް ހިނގައިގަތީ އެދެލޮލުން މީހާ ފިއްސާލާފާނެތީއެވެ. ބާރު ހިނގުމުގައި ގޮސް ކޮޓަރިއަށް ވަދެވުނު އިރު މީހާއަށް ރަނގަޅަށް ވެސް ރޮވިއްޖެއެވެ. ދޮރުގައި ލެގިލައިގެން ހުރެ ރޮމުން ދިޔައިރު ކޮޓަރީގައި ވާހާ ހުރިހާ އެއްޗެއް ހިތާމައިގާ ބައިވެރިވާ ކަހަލައެވެ.

ދެފަރާތަށް ދުއްވާ އެއްޗެހީގެ ސަބަބުން ހަލަބޮލި ކަމެއް ވެރިވެފައިވާ މަގުމައްޗަށް ބަލަމުން ޕޭވްމަންޓް މަތިން ހިނގާލާފައި އައި ޝިފްނީ އައީ ޝަޒަން އާއި ދިމާލަށް ހިތާ ހިތުން އެއްޗެތި ގޮވަމުންނެވެ. ކޮލެޖް ނިމުނު ގަޑިއަށް ޝަޒަން އަށް ބަލާ ނާދެވުމުން ޝފްނީ ހުރީ ވަރަށް ބޮޑަށް ހިތްހަމަނުޖެހިފައެވެ. ކުޑަކޮށް ވިއްސާރަ ދުވަހެއް ކަމުން މަގުމަތިން ޓެކްސީއެއް ވެސް ނުލިބުނެވެ. މަގުމައްޗަށް ކިރިޔާ އަވިކޮޅެއް ދިއްލާލީތީ އަވި އައިނުން އެބޮޑު ދެލޯ ފޮރުވާލިއެވެ. މަގުމަތިން މީހަކު ޖެހިލިޔަސް ޝިފްނީ ރުޅި ގަދަވަނީއެވެ. ދުވަހަކު ވެސް ކޮލެޖަށް ނުދާނަމޭ ހިތަށް އެރިއެވެ. ޒޯހަން އަށް ގުޅަން ކިތަންމެ ފަހަރަކު ހިތަށް އެރިކަމުގައި ވިޔަސް ފަހު ވަގުތު ޒޯހަން މަތިން ވެސް ފޫހިވީއެވެ. މަގު ހުރަސްކުރާ ކަފީގައި މަޑުކޮށްލައިގެން ހުރި ޝިފްނީ ކުއްލިއަކަށް ސިހުނީ ކައިރިއަށް މަޑުކޮށްލި ސައިކަލެއް ފެނުމުންނެވެ. އެ ސައިކަލުގައި އިނީ ޝިފްނީ ދުވަހަކު ވެސް ނުދެކޭ ފިރިހެން ކުއްޖެކެވެ. މަޑު ނޫކުލައިގެން އަތްދިގު ގަމީހާއެކު ކަޅު ފަޓްލޫނުގައި އިން އިރު ލޮލުގައި އަވި އައިނެއް އިނެވެ. ޕޮލިޝް ކޮށްފައި ހުރި ބޫޓުން ވެސް ސާފުކޮށް މޫނު ފެންނަ ވަރުވެއެވެ. މުށިކުލައިގެ ބެކްޕެކެއް އިން އިރު ތުންފަތްމަތީގައިވީ ހިނިތުންވުމެކެވެ. ޝިފްނީ ހުއްޓުން އަރާފައި އިރުކޮޅަކު ހުރުމަށްފަހު އެކުއްޖާއާއި ދިމަލަށް ކަޅި އަޅާލިއެވެ. ” ތިހާ ރީތި ކުއްޖެއް މަގުމަތިން އެކަނި ހިނގާފައި ދާކަށް ނުވާނެ. ބަލާބާ ކުޑަކޮށް ދާވެސް ހިއްލާފައި ތިހުރީ. ލިފްޓެއް މިދިނީ. ގަބޫލުކުރާނެކަމަށް އުއްމީދު ކުރަން” ޝިފްނީގެ އަތްތިލައިގާ އޮތް ޓިޝޫ ނިއްކުރީގައި ޖައްސާލަމުން ލޮލުގައި އަޅާފައި އޮތް އައިނު ބުރުގާ މަތިން ބޮލުގައި އަޅުވާލިއެވެ. “މައިގޯޑް.. މިހާރު ވަކިން ލޯބި” އެކުއްޖާ ހަށިގަނޑު ފަހަތަށް ޖައްސާލަމުން ބުނެލިއެވެ. “އެކްސްކިއުޒްމީ… ކިހިނެއްވެގެން ތިއުޅެނީ. ޝިނީ ނޫނީ މިތަނުން ކުއްޖަކު ނުފެނުނީތަ. މަންމަ ކައިރީގައި ބުނާނަން. ދޮންބެ ކައިރީގަވެސް” ޝިފްނީ ހުރި ހިސާބުގައި ހުއްޓިލަމުން ކުރިމަތީގައި އިން ޒުވާނާއަށް ބުނެލިއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.