ވާތީ ހިތަކު ލޯބި މަންމަންވެފާ 35

“މިރޭ ލަދެއް ނުގަނެވޭނެ އިނގޭ؟ އަވަހަށް ހިނގާ. ބީ ޑޭޑީސް ގުޑް ގާލް” ލުއި ފަތެއްހެން ލަޝްކާގެ ހަށިގަނޑު އުފުލާލަމުން ދާއިޔަލް ފާހާނާއިން ނިކުތެވެ. އުއްބައްތީގެ ފަނޑު އަލިން ލަޝްކާއާއި ދާއިޔަލް ފެންނަމުން ދިޔައީ އެކަކު ފަދައިންނެވެ. ކައިވެނީގެ ހަލާލު ގުޅުމުން ދެހިތް ގުޅިއްޖެއެވެ. ދެމީހުންގެ ‘ފޯރްއެވާރ’ މިއަދުން ފެށިގެން މި ފެށުނީއެވެ. ގިނަ ގުނަ އިމްތިހާނު ތަކަށް ފަހުގައެވެ.

(38 ވަނަ ބައި)

އުފާވެރިކަމާއި ހިތްހަމަ ޖެހުމާއި އެކުގައި އެރޭގެ ބާކީ އޮތްބައި ދެމަފިރިން ހޭދަކޮށްލިއެވެ. ވެފައިވީ ވަރުބަލި ކަމުން 4 ޖަހަން އުޅެނިކޮށް ދެމަފިރިންނަށް ނިދި ޖެހުނެވެ. ދާއިޔަލްގެ އަތުތެރޭގައި ލަޝްކާ ނިދާލީ އުފަލާއި ހިތްހަމަ ޖެހުމުން ފުރިފައިވީ ކުޑަ ކުއްޖެއް ފަދައިންނެވެ.

ފަތިހުގެ ވަގުތެވެ. ގަޑިން 15 5 އެވެ. އޭރު އިރުގެ އަލި އެއްވެސް ވަރަކަށް މަގުތަކުގައެއް ނެތެވެ. ކާޅާއި ހާ ގޮވާ އަޑު ނޫން އެހެން އެއްވެސް އަޑެއް މަގެއްގައި ވެސް ނީވެޔެވެ. ފަތިހުގެ އެ ތެތް ފިނި ކަމުގައި ގިނަ މީހުން ތިބީ ނިދާފައެވެ. ނަމަވެސް އެ ކަޅު ފޮއެ އަނދިރިގަނޑުގެ ތެރޭގައި ދިޔާން ހުރީ އެޕާޓްމެންޓުގެ ތިރީބައިގައެވެ. ދިޔާންއާއި އެކު ޔޫޒާއާއި ޔޫއާލްވެސް ހުއްޓެވެ. އެންމެން އިންތިޒާރު ކުރަމުން ދިޔައީ ޝަރަފްއަށެވެ.

މާ ގިނަ އިރު ހުންނާކަށްވެސް ނުޖެހުނެވެ. ސައިކަލުގައި ޝަރަފް އެތަނަށް އައެވެ. “ކޮބާ އަވަހަށް އާދޭ ދެން” ހެމުން ހެމުން ދިޔާން ބުނެލިއެވެ. “ސަޅި ހިޔާލެއް މިއީ. އެކަމަކު ކިހިނެތްތަ އަހަރެމެން އެޕާޓްމެންޓަށް ވަންނަނީ؟” ސައިކަލު ޕާކު ކޮށްލަމުން ޝަރަފް އެހިއެވެ. “ހަމަ ޖެހިބަލަ. ރޭގަ އެ ކޮޓަރި ތައްޔާރު ކުރަން ވަންނަންވެގެން އަހަރެން އަތަށް ދާއިޔަލް އޮންނާނީ ޑަބަލްކީ ދީފަ. އެހެންވެ ވަދެވޭނެ” ދިޔާން އޭނާގެ އަތުގައި އޮތް ތަޅުދަނޑި ދައްކާލިއެވެ. “ނައިސްސް” ދިޔާންއާއި ޝަރަފް އަތާ އަތް ޖަހާލަމުން އެތެރެއަށް ވަނެވެ.

މުޅި އެޕާޓުމެންޓު ތެރޭގައިވީ ކަނު އަނދިރި ކަމެވެ. ސިޓިންގްރޫމް ބޮކިތައް ދިއްލާލަމުން ދިޔާން އެތެރެއަށް ވަނެވެ. ދިޔާންގެ މޫނަށް ބަލައިލަމުން ޝަރަފް ހިނގައިގަތީ ކޮޓަރި ދޮރު ކައިރިއަށެވެ. “ކޮބާ ދާއިޔަލޫ. ދެން ނިކުންނާށޭ” ކޮޓަރި ދޮރުގައި ބާރަކަށް ޖަހައިގަންނަމުން ޝަރަފް ގޮވާލިއެވެ. ޝަރަފްއާއި ބައިވެރި ވެލަމުން ދިޔާންވެސް ގޮސް ދޮރުގައި ޖަހަން ފެށިއެވެ.

ދެމީހުން ދޮރުގައި ޖަހަން ފެށި އަޑަށް ދާއިޔަލްއާއި ލަޝްކާއަށް ސިހިފައި ހޭލެވުނެވެ. އެ އަޑު އިވި ދާއިޔަލްއަށް ބޯ ހޫރުވާލެވުނެވެ. “ކޮބާ ކޮބާ. އަދިވެސް ކަމުގަތަ؟؟ އޭ ދެން ނިންމަން އުޅޭ ފަތިސް ވީ އޭ” ޝަރަފް ގޮވާލި އަޑަށް ލަޝްކާ ލަދުން މޫނުގައި އަތް އެޅިއެވެ. “އަނހާ. ލަދުގަތީތަ؟ ރޭގަ ގައިމު ހީވަނީ އެހެން ފަދަ ކަމެއް ހެން” ދާއިޔަލްވެސް އުޅުނީ ލަޝްކާ ލަދުގަންނުވާށެވެ.

“ދެން ދާއިގަނޑާ. ދޭބަލަ އެ ދޮރު ހުޅުވަން ދެންވެސް” ދާއިޔަލް ކޮށްޕާލަމުން ލަޝްކާ ބުނެލިއެވެ. ހެމުން ހެމުން ދާއިޔަލް ތެދުވެ ތުވާލި އަނދެލިއެވެ. ލަޝްކާ ކަނދުރާއާއި ހަމައަށް ފޮތިގަނޑު އަޅާލުމާއި އެކު ދާއިޔަލް ގޮސް ދޮރު ހުޅުވާލިއެވެ.

“ކުރާނެ ކަމެއް ނެތިގެންތަ މިއޮށް ހެނދުނާ މި ދޮރުގަ ތި ޖަހަނީ؟” ބޯ ހޫރުވާލަމުން ދާއިޔަލް އަހައިލިއެވެ. “އޭ ދެން ސީރިޔަސް ކޮށޭ. ތިކަން ނިންމަން އުޅޭ ދެން. މިރެއިން މިރެއަށް ލަޝްކާ ބަނޑުބޮޑު ކޮށްލަންތަ ތިއުޅެނީ؟” ދިޔާން ކޮށްލި ސުވާލުން ދާއިޔަލްވެސް ލަދުގަތެވެ.

“ސާބަސް ކަލޭމެނަށް. ޔޫއާލްވެސް ހުއްޓާ ތިހުރީ ދައްކާ ވާހަކަ” ލަދު ކަނޑުވާލާފައި ދާއިޔަލް ބުނެލިއެވެ. “އޭ އުހޫން ޔޫއާލް ދެން މިދޭތެރެއަށް ނުވައްދާ. ނިކުންނަން އުޅޭ ދެން” ހެމުން ހެމުން ދިޔާން ބުނެލިއެވެ.

ދެމަފިރިން ފެންވަރާ ތާޒާވެލާ، ނަމާދު ކޮށްލައިގެން ނިކުން އިރު ޔޫޒާ ހުރީ އޭނާ ގެނައި ހެދިކާތައް މޭޒު މަތީގައި އަތުރާ، ކާން ހަދާފައެވެ. މަޖަލާއި ސަކަރާތުގައި އެދުވަސް އެކީގައި ހޭދަ ވެގެން ދިޔައެވެ.

ހަވީރު ވުމުން ލަޝްކާއާއި އެކު ނިދާލި ދާއިޔަލްއަށް ދެން ހޭލެވުން އިރު 30 6 ވާން އުޅެޔެވެ. ބަނޑުހައި ވެފައި ހުރުމުން ދާއިޔަލް ނިންމީ ފެންވަރާ ތާޒާ ވެލައިގެން ކާނެ އެއްޗެއް ހޯދަން ދިޔުމަށެވެ. ލަޝްކާގެ ނިތުގައި ބޮސް ދީފައި ދާއިޔަލް ގެއިން ނިކުތީ އެހެން ވެގެންނެވެ.

ގެއިން ނިކުން ދާއިޔަލް ދިޔައީ ހިނގާލާފައެވެ. އެވަގުތު އެގެއާއި ޖެހިގެން ކަހަލަ ގޮތަކަށް ހުރި ގެ އޭނާގެ ލޮލުގައި އަޅައިގަތެވެ. ގޭގެ ބޭރު ބޮކި ނުދިއްލާ ހުރުމުންނެވެ. “އަނެއްކާ މިގޭ މީހާ ރަށުން ބޭރަށް ދިޔައީބާ؟” ހިތާހިތުން ދާއިޔަލްއަށް ބުނެވުނެވެ.

ދާއިޔަލް މަޑުމަޑުން އެގޭގެ ދޮރާދިމާލަށް ހިނގައިގަތެވެ. ހިތުގައި އުފެދުނު ކުޑަކުޑަ ސުވާލާއި އެކު އޭނާގެ ގޮސް ދޮރުގައި ޓަކި ޖަހާލިއެވެ. ނަމަވެސް އެތެރެއިން އެއްވެސް ޖަވާބެއް ނުލިބުނެވެ. މަގުމަތީގެ ހަމަހިމޭންކަމާއި، ދެނަމާދު ދޭތެރޭގެ އެ ފަޅު ވަގުތުގެ ސަބަބުން މާހައުލަށް އޮތީ ބިރުވެރިކަމެއް ވެރިވެފައެވެ. ދާއިޔަލްގެ ސިއްސައިގެން ދިޔައީ ކުޑަކޮށް ހުޅުވިފައި ހުރި ދޮރު ވައިރޯޅިއަކާއިއެކު އެތެރެއަށް ހުޅުވިގެން ދިޔުމުންނެވެ.

ގޭގެ އެތެރެއަށް ފިޔަވަޅެއް އަޅާލި އިރު، މުޅި ގޭތެރެ އޮތީ ކަޅު އަނދިރިގަނޑެއްގެ ތެރޭގައެވެ. އެއްވެސް ބޮތްކެއް ދިއްލާފައެއް ނެތެވެ. ނޭފަތުގައި ޖެހުނު އާދަޔާ ހިލާތު ނުބައި ވަހަކުން ދާއިޔަލްގެ މޭ ނުބައިކޮށްލިއެވެ. އޭނާ ފޯނުގެ ބައްތި ދިއްލާލަމުން ކޮޓަރިއާއި ދިމާލަށް ހިނގައިގަތެވެ. އެވަހުގެ ސިއްރު އެނގެން ބޭނުން ވެގެންނެވެ.

ކޮޓަރީގެ ދޮރު ހުޅުވާލުމާއި އެކު ފެނުނު މަންޒަރުން ދާއިޔަލްގެ ފައިދަށުން ބިންގަނޑު ދެމިގެން ދިޔަ ކަހަލައެވެ. ކޮޓަރި ތެރޭގައި ގިނަ އަދަދެއްގެ މެހިތައް އަޑު އަޑު ލައްވަމުން އުދުހެމުން ދިޔަ އިރު، ތަޅުންގަނޑު މަތީގައި ކުދިކުދި ސޫފިތައް ފިރުކެމުން ދިޔައެވެ. އެނދުމަތީގައި އޮތީ ބަލާލަންވެސް ނުކެރޭ ފަދަ ބިރުވެރި މަންޒަރެކެވެ. އެއީ މަރުވެ، ކުނިވެފައިވާ އަންހެނެއްގެ ހަށިގަނޑެވެ. ހަށިގަނޑުގެ މަސްތައް ފީވެ، ކުލަ ކަޅުވެފައި އޮތް އިރު، އެ މޫނުމަތިން ފެންނަން ހުރި ބިރުވެރިކަމުންނާއި ހުޅުވިފައިވާ ލޮލުން މުޅި މާހައުލަށް ނާމާންކަން ވެރިކުރުވިއެވެ. މުޅި ކޮޓަރި ތެރޭގައިވެސް ދުވަމުން ދިޔައީ މަރުވެ، ކުނިވެފައި އޮތް އެ މައްޔިތާގެ ވަހެވެ. ދާއިޔަލްއަށް ބިރުން ފަހަތައް ޖެހިލެވުނެވެ.

(ނުނިމޭ)

ތިރީސްނުވަވަނަބައިގެ ތެރެއިން:

“ދާއީ؟؟ ކިހިނެތްތަވީ؟؟” ލަޝްކާ ދައްކަމުން ދިޔަ ވާހަކަ އިވޭ ވަރަށް ވުރެ ދާއިޔަލް ހުރީ މާ ބިރުންނެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.