ނޭނގި ހުރެ ލޯބިވެވުނީ 1

މެންދުރުގެ އެންމެ އަވިގަދަ ވަގުތެވެ. ރަށުގެ ސްކޫލު ދޮށުގައި ބައިބަޔަށް ބެލެނިވެރިން ތިއްބެވެ. އެމީހެއްގެ ދަރިފުޅު ޖީސީ ހޯލުން ނުކުންނާނެ އިރަކަށެވެ. މިއަދަކީ އޯލެވެލްގެ އެންމެ ފަހު ޕޭޕަރުއޮތް ދުވަސް ކަމުން ހުރިހާ ބެލެނިވެރިން ވެސް ތިބީ އައިހެވެ. އެމީހެއްގެ ދަރި 10 އަހަރު ކުރި މަސައްކަތަށް ނިމުމެއް އަންނަތަން ބަލަން ބޭނުން ނުވާނީ ފަހެ ކާކު ހެއްޔެވެ؟

ވަގުތު ޖެހުމުން ހުރިހާ ދަރިވަރުން ކުރަމުން ދިޔަ މަސައްކަތްތައް ހުއްޓާލުމަށް ޖީސީ ހޯލުގެ ޗީފް އިންވިޖިލޭޓަރ ބުންޏެވެ. މިއަޑަށް ހުރިހާ ދަރިވަރުން ވެސް އެމީހެއްގެ ގަލަންތައް ތިރި ކޮށްފިއެވެ.

ހޯލުގެ އެންމެ ފަހަތު ބަރީގެ އެންމެ ކަނާއަތަށް އިން އިނާރާ ވެސް ގަލަން މޭޒުގައި ބާއްވާ ހަމަޖެހިލިއެވެ. އޭރު އެހިތް ދިޔައީ އުދުހެމުންނޭ ބުނުމަކުން ދޮގަކަށް ނުވާނެއެވެ. ވާނީވެސް އެހެންތާއެވެ. މިއަދު އޭނާ އެ ނަރަކައެއް ފަދަ ސްކޫލުން ސަލާމަތް ވަނީއެވެ. އުފާ ނުވާންވީ ސަބަބެއް ނެތެވެ.

ޖީސީ ހޯލުން އިނާރާ ނުކުމެފައި އެންމެ ފުރަތަމަވެސް ބެލީ އޭނާގެ އެންމެ ގާތް އެކުވެރިޔާ ނުވަތަ މިޒަމާނުގެ ބަހުން ބުނާނަމަ “ބެސްޓު ފްރެންޑު” ހޯދޭތޯއެވެ. އަދި އެކުވެރިޔާ ފެނުމުން ދިޔަ ގޮތަށް ގޮސް އެކުއްޖާ ގައިގައި އޮޅުލައިގަތެވެ. ”އޯއެމްޖީ ވިނީ. އަމް ސޯ ހެޕީ. ފައިނަލީ މައި ޑްރީމް އިޒް ފުލްފިލްޑް. މި ނަރަކިން ސަލާމަތްވި. އާހް. އައި ފީލް ސޯ ފްރީ“ ޔޫވީން ގެ ގައިގައި އޮޅުލަމުން ފުންމަމުން އިނާރާ ބުނެލިއެވެ. ”އައި ނޯ ރައިޓް. ދިސް ޕިގް ފާމް އިން މި ސަލާމަތްވި ހާދަ ދުވަހެއް ފަހުންނޭ. އަމް ސޯ ހެޕީ“ ޔޫވީން އިނާރާގެ ގައިގައި ބައްދާލަމުން މަޑުމަޑުން ބުނެލިއެވެ. އަދި ދެމީހުން އެކީ އެހެން ކުދިންނެކޭ އެއްފަދައިން ސްކޫލުން ނުކުންނަން ދިޔައެވެ.

ސްކޫލު ގޭޓުން ދެކުދިންނަށް ނުކުމެވުމާއެކު ދެން ފެނުނީ ޔޫވީންގެ ކޮއްކޮ ޔޫމީން އައިސް ޔޫވީންގެ ގައިގައި ބައްދާލަމުން ”ކޮންގްރެޓްސް ދޮންތީ“ އޭ ބުނެލި ތަނެވެ. އަދި ޔޫވީން ގެ މަންމަ ވިދާދް އާއި ބައްޕަ ޔާމީން އައި ތަނެވެ. އެއާއެކު އިނާރާ އެމީހުންނަށް ހިނިތުންވެލާ ޔޫވީންގެ ގާތު ދަނީ ކަމުގައި ބުނެ ދުރަށް ހިނގައިގަތެވެ. އޭނާގެ ބައްޕަ ނާޒިމް އޭނާ ބަލާ އަންނާނަމޭ ބުނުމުން ބައްޕަ ހޯދުމުގެ ނިޔަތުގައެވެ.

އެތާނގައި ތިބި އެހެން ކުދިންނާ އިނާރާ ތަފާތެވެ. އެހެންކުދިންގެ އާއިލާ އާއި އެކުވެރިން އެކީ އެކުދިން ބަލާ އަޔަސް އިނާރާގެ ހުރީ ބައްޕަ އެކަންޏެވެ. ސަބަބަކީ އޭނާގެ މަންމަ އިޝާރާ އަކީ ޖީސީ ހޯލުން ބޭރުގައި ހުންނަ އިންވިޖިލޭޓަރަކަށް ވެފައި، ދޮންބެ އިޝާން ހުރީ މާލޭގައި ކަމަށްވާތީއެވެ. އަދި އޭނާގެ ގިނަ އެކުވެރިން ތިއްބަސް އޭނާއާ އެހާ ގާތްކޮށް އުޅޭ ހަމައެކަނި މީހަކީ ޔޫވީންއަށް ވީމައެވެ.

މީހުންގަނޑު ތެރެއިން ފުރޭނިގެން ސައިކަލުތައް ހުރި ދިމާލަށް ދިޔަ އިނާރާ އަށް އޭނާގެ ބައްޕަ ފެންނަ ގޮތެއް ނުވިއެވެ. އެހެންކަމުން ސްކޫލު ދޮރުމަތީގައި ތިބި އޭނާގެ ކުލާސް ކުދިންނާއި އެކުދިންގެ ބެލެނިވެރިންތަކާ ދިމާލަށް އަނެއްކާވެސް އިނާރާ ދިޔައެވެ. އޭނާގެ ބައްޕަ ހުރިތޯ ބެލުމުގެ ނިޔްތުގައެވެ. ނަމަވެސް ވީ ކަމެއް ހަރާމެވެ. މީހުންތައް މދުވަމުން ގޮސް އެންމެ ދިހަވަރަކަ މީހުންނަށްވި އިރުވެސް އޭނާއަށް ބައްޕައެއް ނުފެނުނެވެ. އެއާއެކު ބައްޕަ އޭނާ ބަލާ ނާންނަނީކަން އޭނާއަށް ޔަގީން ކުރެވުނެވެ. އެހެންކަމުން ދެން އޭނަ ހިނގައިގީ ގެއަށް ދާށެވެ.

ގެޔަށް ދިޔަ މަގުމަތީގައި އިނާރާގެ ހިތަށް އަރަމުން ދިޔައެވެ. ”އެހެންކުދިންގެ އާއިލާ އެއްކޮށް އައިސް ތިބި އިރު އަހަރެންގެ އެކަކުވެސް ނާދެ. އެންމެ ކުޑަމިނުން ބައްޕަ އަންނާނަމޭ ބުނެފަވެސް ނައި. އަހަރެންގެ މި އުފާވެރި ދުވަހުވެސް އެއްވެސް މީހެއް ނައި. އަހަރެން ހާދަ ބަދުނަސީބޭ.“ މިހެން ހިތަށް އަރަމުން ދިޔައިރު އޭނާގެ ރީތި މުށިކަންގަދަ ބޮޑު ދެލޯ ކަރުނުން ފުރުނެވެ. ކަރުނަތަށް ފޭބިޔަ ނުދޭން އެ ފިޔާތޮށި ކުލައިގެ އެ ތުންފަތުގައި ދައިގަންނަމުން އޭނާގެ ފިޔަވަޅުތައް އަވަސް ކޮށްލިއެވެ.

10 މިނެޓު ފަހުން ގެއަށް އައި އިނާރާއަށް ހައިރާން ކަމެއް ލިބުނީ ގޭގެ ދޮރުމަތީގައި ހުރި ފިރިހެން ފައިވާނުންނެވެ. ހަމަ ގިމުވެސް އެއީ އޭނާގެ ބައްޕަގެ ފައިވާނެއް ނޫނެވެ. އެއީ ކާކުގެ ފައިވާނެއް ބާވައޭ ހިތަށް އަރާ ހާލު ގޭގެ ދޮރު އިނާރާ ހުޅުވިއެވެ. ދެން ފެނުނީ އޭނާ ހަޅޭއްލަވައިގަނެފައި އަތުގައި ހުރި ގަލަންތަކާއި އެހެން ހުރިހާ އެއްޗެއް އުކާލި މަންޒަރެވެ.

މިއު އަޅުގަނޑު ލިޔާ ފުރަތަމަ ވާހަކަ ކަމުން ކުށް ހުރެދާނެއެވެ. ކުށެއް ފެނިއްޖެނަމަ ނުވަތަ އިސްލާހު ކޮށްލަން ޖެހޭ ތަނެއް ފެނިއްޖެ ނަމަ ކޮމެންޓު ސެކްޝަނުގައި އެވާހަކަ ބުނެލުމަކީ އަޅުގަނޑުގެ އެދުމެކެވެ.

މިބަޔަކީ ހުރިހާ ކިޔުންތެރިންނަށް ޝައުގުވެރި ބައެއް ކަމަށް އުންމީދުކުރަން💗💜,

ޝަވް.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.