ބަދަލުވެ ދިޔަ ހަޔާތް – 9

ކިތަންމެ ހިތްވަރު ކުރި ނަމަވެސް ނާޒްގެ ދެލޮލުން ކަރުނަ ފައިބަމުން ދިޔައެވެ. އެއްވެސް ހިފެހެއްޓުމެއްނެތިއެވެ.
” ކިހިނެތްވީ. ނާޒް ރޯވަރުގެ ވާހަކައެއްތަ މިދެއްކެނީ ” ނާޒިމް ބޭނުންވީ ނާޒްގެ ދުލުން ހަގީގަތް އަޑުއަހާށެވެ. ނާޒް އަކީ ވިޔާނުދާ ކުއްޖެއް ނޫންކަން ނާޒިމް އަށް އިނގެއެވެ. އެކަން ގަބޫލުކުރާކަށް އިތުރު ހެއްކެއް ބޭނުމެއް ނުވެއެވެ. އެހެން ނަމަވެސް ނާޒިމް ބޭނުންވަނީ ނާޒްގެ ދުލުން ނާޒް އަށް ދިމާވި ހުރިހާ ކަމެއް އޮޅުން ފިލުވުމަށެވެ. ނާޒިމް ހުރީ ވެވުނު ކޮންމެ އެހީއެއްވެސް ނާޒް އަށް ވުމަށް ތައްޔާރަށެވެ. އެކަމަކު ފުރަތަމަ ނާޒް ރޯނެ ވަރަކަށް ރޯތަން ބަލަން ނާޒިމް ހުރީ އެވެ.
އެންމެ ފަހުން ނާޒް ވަރަށޤ ހިތްވަރު ކުރުމަށްފަހު ފެށުނީއްސުރެ މިއަދާ ހަމައަށް ކަންތައްތައް ވަމުން އައިގޮތް ނާޒިމް އަށް ކިޔާދޭންފެށިއެވެ. އެންމެ ފުރަތަމަ ދުވަހުން ފެށިގެން އަކީލް އާ ކައިވެނި ކޮށްގެން ދެން ދިމާވި ކަންތައް ތަކާ ވަކިވާން ޖެހުނު ހިސާބަށް ކިޔާދީ ނިމުނުތަނުން ޖެހިބާރު ގުގުރިއަކާ އެކު ވިދާލި އެވެ. ކުއްލިއަކަށް ވިދާލި ވިދުވަރު ފެނުމާއެކު ނާޒް ބިރުގަތްވަރުން ކުރިއަށްޖެހި ނާޒިމް ގައިގަ ބައްދާލިއެވެ. އޭރު ނާޒްގެ ހަށިގަނޑު ތުރު ތުރު އަޅަމުން ދިޔައެވެ. ލޮލުން ކަރުނަ ފައިބަމުން ދިޔައެވެ.
މަޑުމަޑުން އެއްޗެކޭ ބުނެވޭތޯ ނާޒް މަސައްކަތް ކުރިއެވެ. އެހެން ނަމަވެސް އަޑުބޭރުވާ ގޮތެއް ނުވިއެވެ. އެއަށްވުރެ ބޮޑައް ނާޒް އަށް ގިސްލެވެމުން ދިޔައެވެ. ނާޒްގެ ލޮލުން ފައިބަމުން ދިޔަ ކަރުނަތައް ނާޒިމް އަތުން ފޮހެލަދިނެވެ. އެއަށްފަހު ނާޒިމްގެ ދެއަތުން ނާޒްގެ މޫނުގަ ހިފަހައްޓާލިއެވެ. ނާޒްގެ އޮމާން މޫނުގައި ބީހިލުމާއެކު ނާޒިމްއަށްވެސް ހުރިހާ ކަމެއް ހަނދާން ނައްތާލެވުނު ކަހަލަ އެވެ. އެތައް ދުވަހަކަށްފަހު ނާޒްގެ ހަށިގަނޑައް ބުނެދޭން ނޭނގޭ ފަދަ ގޮތްތަކެއް ވެގެން ދިޔައެވެ. ބޭއިހުތިޔާރުގާ ކުރިއަށްވުރެވެސް ބާރަށް ނާޒިމްގެ ހަށިގަނޑުގައި ބައްދާލެވުނެވެ.
ފިނިވެފަ ނާޒް އަށް ނާޒިމްގެ ހަށިގަނޑުން ހޫނު ކަމުގެ އިހުސާސް ކުރެވުނެވެ. އެއާއެކު ދެމީހުންނަށްވެސް ގާތްވެވުނީ އެތައް ދުވަހެއްގެ ގުޅުމަކަށް މަރުހަބާ ކިޔާ ފަދައަކުންނެވެ. ކުއްލިއަކަށް ޖެހި ބާރު ގުގުރިއަކާ އެކު ނާޒް އަވަސް އަވަހަށް ނާޒިމް އަތުން ވީއްލިގަނެގެން ދުރައް ދިޔައެވެ. ކުރެވުނު ކަންތަކާ މެދު ނާޒިމް ލަދުގަތެވެ. ނާޒް އަވަސް އަވަހަށް ދުއްވައިގަތީ ކޮޓަރިއަށް ދިއުމަށެވެ. ފާއިޒާ ދައްތަ ނެތުމުން ނާޒް ނިދަނީ ރައުލް ކޮޓަރީ ގަ ކަމުން އެކޮޓަރިއަށެވެ.
ނާޒް ދިޔަ ދިމާއަށް ބަލަން ނާޒިމް އަށް ހުރެވުނީ އަމިއްލަ ނަފުސް ކުއްވެރިކުރާ ފަދައިންނެވެ. އެހެން ނަމަވެސް ނާޒް ހިފެހެއްޓުމަށްޓަކާ ވެސް ކުރިއަށް އަޅާނެހާ ހިތްވަރެއް ނާޒިމްގެ ނެތެވެ.
ކޮޓަރިއަށް ވަދެވުމާއެކު ނާޒް މުޅިން ހާސްވިއެވެ.
” ކީއް މިކުރެވުނީ .. ” އަމިއްލަ ނަފްސް ނާޒްއަށްވެސް ކުއްވެރި ކުރެވުނެވެ. އެފަދަ ކަމަކަށް އިސްނެގުނީތީ ނާޒް އިންތިހާ އަށް ދެރަވިއެވެ. ހިނގި ހާދިސާ އާ މެދު ދެމީހުންވެސް ލަދުގަނެ ދެރަވިއެވެ.
ނާޒިމް އަށްވެސް ވީ ނާޒް އަށް ވީ ވަަރެވެ. ދެން ނާޒް އާ ކުރިމަތިލާނެގޮތަކާ މެދު ވިސްނަން އެތައް އިރަކު ނާޒިމް ހުއްޓެވެ.
ހެނދުނު ހެނދުނާ ތެދުވެ ނާޒް ސައިހަދާ ރައުލްގެ ހުރިހާ ކަމެއް ނިންމާލިއެވެ. ކުއްލިއަކަށް ފެނުނީ ނާޒިމް އައިސް ވަންތަނެވެ. ނާޒިމް ގެ ފަހަތުން ކުޑަވަރެއްގެ ފޮއްޓެއް ހިފައިގެން އައި އަންހެން ކުއްޖާ ފެނުމުން ނާޒް އަކަށް އެއީ ކޮން ކުއްޖެއްކަމެއް ނޭނގުނެވެ. ބަލާބެލުމަށް އެއީ ރާއްޖޭ ކުއްޖެއްނޫންކަން އެނގޭހާ ވެއެވެ.
” ނާޒް ” ހަތަރުކަޅި ހަމަކުރަން އުނދަގޫވެގެން އުޅޭފަދަ ގޮތަކަށް ނާޒިމް ގޮވާލިއެވެ.
” މީ އަރޫނާ. މީނަ ހުންނަން މެއިޑް ރޫމް ސާފުކޮށްލާ ހަދާ. އަދި ގޭތެރޭގެ މަސައްކަތްތައް ވެސް ކިޔާލަދީ. އަދި ރައުލްގެ ކަންތައް ތައްވެސް ދަސްކޮށްދޭތި ” ވަގުތުން ނާޒްގެ މޫޑް އޮފްވިއެވެ. ރައުލްގެ ކަންތަކަކީ ނާޒް އާ ހަވާލުކޮށްފަ ވާކަމެކެވެ. ކުއްލިއަކަށް މީހަކު ގެނައުމުގެ ބޭނުމަކީ ކޮބާތޯ އަހާލަން ކިތަންމެ ފަހަރަކު ނާޒް ހިތަށް އެރިއެވެ. އެކަމަކު ވެސް އެހެން އެހުމުގެ ހައްގެއް ނާޒް އަކަށް ނޯންނާނެއޭ ހިތަށް އެރުމުން އަޅާނުލީ އެވެ.
އަރޫނާ އަކީ އިންޑިޔާގެ ރައްޔިތަކަށް ވީ ނަމަވެސް ދިވެހިބަހުން ވާހަކަ ދައްކަން އަރޫނާ ރަނގަޅަށް ދަނެއެވެ. ސަބަބަކީ އަރޫނާ ރާއްޖޭގަ މަސައްކަތް ކުރާތާ ދެއަހަރުވެފަ ވާތީ އެވެ. ބަލާބެލުމަށް ހީވަނީ ޒުވާން ކުއްޖެއް ހެންނެވެ. އެކަމަކު ހިތްހެޔޮ ވެފާ މުރާލި އެވެ.
ނާޒިމް އެހެން ބުނި ނަމަވެސް ރައުލްގެ އެއްވެސް ކަމެއް ނާޒް އަރޫނާ އަކާ ހަވާލެއް ނުކުރެއެވެ. ރައުލް ސްކޫލަށް ވައްދާ ހުރިހާ ކަމެއްކޮށް ހެދިއިރުވެސް ނާޒިމް އެވާހަކަ ނާޒް ގާތު ދައްކާވެސް ނުލައެވެ. ސްކޫލަށް ގެންދަން ހުރިހާ ކަމެއް ނިމި ގެންދާ ހިސާބަށް ދިއުމުން ނާޒް އަށް އެނގުމުން ނާޒް އިންތިހާ އަށް ދެރަވިއެވެ. އަމިއްލަ ދަރިއަކަށް ނުވިޔަސް ނާޒްގެ ހިތުގާ ރައުލް އަށްޓަކައި ވަނީ މައިވަންތަ ކަމުގެ ލޯތްބެވެ. އެލޯބި މިހާރު ނާޒިމް އަކަށް ވެސް ބަދަލެއް ނުކުރެވޭނެއެވެ.
ހެނދުނު ތެދުވެ ނާޒް އަވަހަށް ސައިހަދާލީ ނާޒިމްގެ ހެނދުނުގެ ޑިއުޓީއަށް ވާތީ އެވެ. ނާޒް އަށް ނުގޮވި ނަމަވެސް ސައިބޯން އަންނަން ވާއިރަށް ނާޒް އަށް ތައްޔާރު ވެވުނެވެ. އެކަމަކު ހުރިހާ ތައްޔާރީ ތަކެއް ބޭކާރުވީ ނާޒިމް ވަންގޮތަށް ވަދެ އަރޫނާ އަށް ގޮވާ ސައިގެ ވާހަކަ ބުނުމުންނެވެ. އެކަމަކީ ނާޒް ދެރަވާންޖެހޭ ވަރުގެ ކަމެއްވެސް ނޫނެވެ. ފާއިޒާ ދުނިޔޭގަ ވެސް ނާޒް ބަލަނީ ނާޒިމް ފެންނަ ހިސާބަށްވެސް ނައިސް ވޭތޯ އެވެ. އެކަމަކު މިހާރު މިވާ ގޮތެއް ނާޒްއަކަށް ނުވިސްނުނެވެ. ސައިބޮއި ނިމިގެން ދަމުން ނާޒިމް އެންމެ ފަހަރަކުވެސް ނާޒް އާ ދިމާލަށް ބަލައެއް ނުލައެވެ. ނާޒް އުއްމީދު ކުރި ކަހަލަ އެއްވެސް ކަމެއް ނާޒިމްގެ ފަރާތަކުން ނުފެނުނެވެ. ކުއްލިއަކަށް ނާޒިމް ހުއްޓި ބަލާލިއެވެ. ނާޒް ގެ ހިތުގާ އުފާވެރިކަމުގެ ޝުއޫރެއް ހިނގާލިއެވެ.
ޔަގީނެވެ. ނާޒިމް އެއުޅެނީ ނާޒް އާ ވާހަކަ ދައްކާށެވެ. އެކަމަކު ނާޒް ހީކުރި ގޮތަކަށް އެއްކަމެއްވެސް ނުވިއެވެ. ނާޒިމް އަރޫނާ އަށް ގޮވާލުމަށްފަހު ތިނެއްޖަހާއިރަށް ރައުލް ސްކޫލަށް ގެންދަން ތައްޔާރު ކޮށްލުމަށް ބުނެފަ ނުކުމެގެން ދިޔައީ އެވެ. ނާޒްގެ ހިތަށް ގޮތްނޭނގޭ ތަދެއްގެ އިހުސާސް ކުރެވުނެވެ.
ނާޒް ކޮޓަރިއަށްވަދެ ނިދާފަ އޮތް ރައުލް އަށް ބަލާލިއެވެ. އަދި ނާޒިމް އާ ދޭތެރޭ ވިސްނާލިއެވެ. ނާޒިމް އަށް އެހާބޮޑު ބަދަލެއް އެއައީ ހަމަ އެރޭގެ ހާދިސާ ގެ ސަބަބުން ބާވައެވެ. ނާޒް އަށް ލޯމަރާލެވުނީ ބޭއިހުތިޔާރު ގައެވެ. ލޯމަތިން ސިފަވީ ނާޒިމް އެވެ. އެރޭގެ އެގައިގޯޅި ވުމެވެ. އަވަސް އަވަހަށް ލޯ ހުޅުވާލާ ނާޒް ހަމަޖެހިލިއެވެ. އެއަށްފަހު އެތައް އިރެއްވަންދެން އަމިއްލަ ނަފްސާ ދޭތެރޭ ސުވާލުކުރަން ނާޒްއަށް އިނދެވުނެވެ.
އަހަންނަށް މިވަނީ ކީއްބާވައެވެ. ނާޒިމް އާ އަހަންނާ އެއްވެސް ގުޅުމެއް ނެތެވެ. އެކަމަކުވެސް ނާޒިމް އަހަރެން ދުރުކޮށްލުމުން އަހަރެން ދެރަވަނީ ކީއްވެ ހެއްޔެވެ؟ ޖަވާބު ނުލިބޭ އެތައް ސުވާލެއް ނާޒްގެ ސިކުނޑީގަ ދަތުރު ކުރަމުން ދިޔައެވެ.
ހިޔާލުތައް މިހިސާބަށް ދިޔަތަނާ ނާޒް ސިއްސައިގެން ދިޔައީ ފޯން ރިންގްވާ އަޑަށެވެ. ގުޅަނީ ނާޒިމް އެވެ. ވީ އުފަލުން އަވަސް އަވަހަށް ފޯނު ނަގާ ކަންފަތުގަ ޖަހާލިއެވެ.
” ނާޒް. އަހަންނަށް ފެންނަނީ ނާޒްގެ ކޮޓަރިއަށް ނާޒް ބަދަލުވެފަ އަރޫނާ ރައުލްގެ ކޮޓަރިއަށް ބަދަލުކުރަން. އެހެންވީމަ އެގޮތަށް އެކަން ހަމަޖައްސާ އިނގޭ ” ވަގުތުން ނާޒްގެ ދެލޯ ފެންކަޅި ވިއެވެ. ނާޒްގެ އޮމާން ކޯތާފަތްމަތިން ކަރުނަތައް ފައިބަމުން ދިޔައެވެ. ނާޒިމް އެގޮތަށް ކަންތައް ކުރަން ޖެހުނު ސަބަބެއް ނާޒް އަކަށް ނުވިސްނުނެވެ. އެހެންވިޔަސް ނާޒިމް ބުނިގޮތަށް ނާޒް ކަންތައް ކުރިއެވެ.
ނާޒިމް ގެއަށް އައުމުގެ ކުރިން ނާޒް ކޮޓަރިއަށްވަދެ ހުރީ ނާޒިމް އަށް ނުފެންނަން ވެގެންނެވެ. އެކަމަކު ކޮޓަރި ތެރޭ ހުރި ނަމަވެސް ބޭރުގަ މާއަޑުގަދަވާހެން ހީވުމުން ނާޒް ދޮރު ހުޅުވާލިއެވެ. އޭރު ނާޒިމް އުޅެނީ ރައުލް އަށް ވިސްނަދޭށެވެ. ނާޒިމް އަށް ނާޒް ނުފެނުނު ނަމަވެސް އެމީހުން ދައްކާ ވާހަކަ ވެސް ނާޒް އަށް އަޑު އިވުނެވެ.
” ނޫން ބައްޕީ.. ކޮއްކޮ ނިދާނީ މަންމި ކައިރީގަ. މަންމި ގެނޭ ކޮއްކޮ ރޫމަށް ” ރައުލް ބޮޑާ ދައްކަމުން ދިޔައެވެ.
” ރައުލް ބައްޕި ބުނާ ބަސް ގަބޫލު ކޮށްބަލަ. މަންމި ނުހުންނާނެއޭ އަބަދަކު…… ” ނާޒިމްގެ ޖުމްލަ ފުރިހަމަ ނުކުރެވެނީސް ނާޒް އައިގޮތަށް އަިއިސް ރައުލްގެ އަތުގަ ހިފާ ރައުލްގެ ކޮޓަރިއާ ދިމާލަށް ހިނގައިގަތެވެ. ނާޒިމް އިންގޮތަށް އިނީ ބުނާނެ ވަކި އެއްޗެއް ނެތުމާއެކުއެވެ. ނާޒްގެ ހިތުގަވާ އެއްޗެއް ދެނެގަންނާކަށް އެއްގޮތަަކަށްވެސް ނާޒިމް އަކަށް ނޭނގުނެވެ.
ރައުލް ނިންދެވުމަށްފަހު ނާޒް އަމިއްލަ ކޮޓަރިއަށް އައިސް އެރީ ނަމާދަށެވެ. އެތައް އިރެއްވަންދެން މުސައްލަމަތީ އިނދެ ދުއާ ކުރިއެވެ.
ދުވަހަކުވެސް ނާޒް އަށް އަކީލް ނޫން މީހަކާ ދޭތެރޭ މިވަރަށް ވިސްނޭނެ ކަމަކަށް ހިއެއް ނުކުރެއެވެ. ނާޒް އަށް އަމިއްލަ ހިތަކަށް ބާރެއް ނުފޯރުވުނެވެ. އަކީލް ފިޔަވާ އެހެން މީހަކާ އެއްވެސް ގުޅުމެއް ބޭއްވުމަކީ ނާޒް ހިތަށް އަރާފައިވެސް ވާ ކަމެއްނޫނެެވެ. އެކަމަކު މިހާރު މިދަނީ އެކަން ބަދަލުވަމުންނެވެ.
ނާޒިމްގެ ހާލަކީވެސް ހަމަ އެއީއެވެ. ކިތަންމެ ނޫންކަމަށް ހެދިގެން އުޅުނަސް ނާޒް މަތިން ހަނދާން ނުވާ އެންމެ ހިނދުކޮޅެއްވެސް ނުދެއެވެ. އެކަމަކުވެސް ނާޒް އޭނައަށް ނުލިބޭނެކަން މިހާރު ނާޒިމް އަށް ޔަގީންވާ ކަހަލަ އެވެ. ނާޒިމް އަކީ އެއްވެސް އިރަކު ގަދަކަމުން އެއްވެސް އެއްޗެއް ހޯދާ ފާޑުގެ މީހެއް ނޫނެވެ.
ނާޒިމް ބެލްކަންޏަށް ނުކުމެލި ވަގުތު ހަނީފު ގުޅިއެވެ. ހަނީފު އަކީ ނާޒިމްގެ ގާތް ރައްޓެއްސެކެވެ. ނާޒް މިރޭ ބެލްކަންޏަށް އައީ ހަމަ ނާޒިމް ފެނޭތޯ އެވެ. އިއްތިފާގުން ނާޒިމް ދައްކަމުން ދިޔަ ވާހަކައިގެ އެންމެ ފަހު ޖުމްލަ ނާޒް އަށް އިވުނެވެ. ކުރިއަށް އެޅި ފިޔަވަޅުވެސް ނާޒް އަށް އަޅާލެވުނީ ފަހަތަށެވެ. އަނގަމަތީ އަތްއެޅީ އެއްވެސް އަޑެއް ނާޒިމް އަށް ނީއްވާށެވެ. ފަހަތަށް ފަހަތަށް ގޮސް ދުވެފަ ކަހަލަ ގޮތަކަށް ކޮޓަރިއަށް ވަދެ އެނދުމައްޗަށް ވެއްޓި ނާޒް ރޯން ފެށިއެވެ.
( ނުނިމޭ )