އިންތިޒާރުގައި ހުރިން 1

(މި ވާހަކައިގައި މާޒިން ކިޔާ ދެ ފިރިހެން ކުދިން އުޅުމުގެ ސަބަބުން 3 އަހަރުގެ މާޒިންއަށް ވާހަކައިގެ ތެރޭގައި “ޒިން” ޖަހައިގެން ލިޔެ އަދި 26 އަހަރުގެ މާޒިންއަށް “މާޒިން” ޖަހައިގެން ލިޔެފައިވާ ކަން އަންގަމެވެ.)

“ޒިން…..؟” “ޒިން…. އަޅެފަހެ މިތާ ދެންމެ ހުރީ މިހާރު ކޮބާތަ..؟ޒިން؟؟؟ ” ސުމާ ދެ އައިސްކޯން ހިފައިގެން ހުރެ 3 އަހަރުގެ “ޒިން” އަށް ގޮވަމުން ދިޔައެވެ. ތަނަކީ މީހުން ގިނަ ތަނެއް ކަމުން އޭނާ ގެއްލިވެސް ދާނެއެވެ.

………….

“ބޭބޭ…..ބޭބޭ!!!” މާޒިން ފަސް އެނބުރި ތިރި ބަލައިލީ އޭނާ ލައިގެން ހުރި ކަޅު ޖީންސުގައި ކުއްޖަކު ހިފާލަމުން އޭނާއަށް ގޮވާތީއެވެ. މާޒިން ކުޑަކޮށް ހިނިތުންވެލުމަށްފަހު އެ ކުއްޖާއާއި އެއް އިސްކޮޅެއް ވާވަރަށް އިށީނދެލިއެވެ. “ލައްބަ ހޭންޑްސަމް؟ ކިހިނެއްވީ؟” މާޒިން އެ ކުޑަ ފިރިހެން ކުއްޖާގެ ބޮލުގައި ކުޑަކޮށް ފިރުމާލަމުން އަހާލިއެވެ. އެ ކުއްޖާ ހުރީ ހުދު ކުލައިގެ އަތްއޮޅި ގަމިހަކާއި ކަޅު ސިކިނީއެއް ލާފައެވެ. ފެންނަގޮތުން އުމުރުން 3 އަހަރުހެން ހީވެއެވެ. އުމުރުގެ ގޮތުންވެސް އެކުއްޖާ ރީތިވެފައި ސްމާޓެވެ. ހާއްސަކޮށް ގަމިސް ލަފައި ހުރުމުންނެވެ. ހަމުގެ ކުލަ އަލިވެފައި އިސްތަށިގަނޑު ހުންނަނީ މަޑު ޗޮކްލެޓް ކުލައެއްގައެވެ. ފެންނަގޮތުން ރާއްޖެ ކުއްޖެހެން ހިއެއްނުވެއެވެ. “މީ.. ބޭބެގެތަ؟..” އަތުގައި އޮތް ވޮލެޓް ދިއްކޮށްލަމުން އެ ފިރިހެން ކުއްޖާ ބުނެލިއެވެ. މާޒިން ވޮލެޓްގައި ހިފާ ލުމަށްފަހު އެއީ އޭނަގެތޯ ޔަގީންކޮށްލިއެވެ. “ލައްބަ.. މީ ބޭބެގެ. ކޮންތާކުން ފެނުނީ؟” އޯގާތެރިކަމާއި އެކު މާޒިން އަހާލިއެވެ. “މިތާ ވެއްތިފަ އޮތީ.. ޒި……..” އެ ފިރިހެން ކުއްޖާ ބުނަންއުޅުނު އެތި މެދުކެނޑުނެވެ.

“ޒިން!!!!!” ސުމާ ޒިން ފެނުމާއި އެކު ތަންކޮޅެއް ބާރަށް ގޮވާލިއެވެ. މާޒިންވެސް އަދި ޒިންވެސް އެއްފަހަރާ ސުމާއާއި ދިމާ ބަލައިލިއެވެ. މާޒިން ކޮޅަށް ތެދުވިއެވެ. އަދި ސުމާ އަންނަތަން ބަލަން ހުރެވުނީ ދަންނަ ކުއްޖެއްތޯ ވަކިކުރުމަށެވެ. ސުމާ ހުރީ ފެހި ކުލައިގެ ޖިލްބާބެއް ލާފައެވެ. އަދި އެއާއި ގުޅޭ ޝޯލްއެއް އަޅާފައެވެ. ޝޯލްގެ ތެރެއިން ސުމާގެ މޫނު ފެންނަލެއް ވަރަށް ހިތްގައިމެވެ. އެ އެސްފިޔަތަށް ދިގު ބޮޑު ދެލޮލެވެ. ފިޔާތޮށި ކުލައަރާ ތުންފަތެވެ. ލައިގެން ހުރި ޖިލްބާބު ހަށިގަނޑަށް ދޫކަމުގައިވިޔަސް އެ ހަށިގަނޑުގެ ރީތިކަން ރަނގަޅަށްވެސް އިނގެއެވެ.

ސުމާ މާޒިންއާއި ދިމާލަށް ފަރުވާކުޑަގޮތަކަށް ބަލާލުމަށްފަހު ޒިން އާއި ދިމާލަށް އައެވެ. މާޒިން ހައިރާންވެފައި އެ ކުއްޖާއާއި ދިމާ ބަލައިލިއެވެ. ސުމާ ޒިންގެ އަތުގައި ހިފައިގެން އެތަނުން ހިނގައިގަތެވެ. ޒިން ފަސްއެނބުރި މާޒިންއަށް ބަލާލުމަށްފަހު ހިނިތުންވެލައި އަތުގެ އިޝާރާތުން ބައި ކިޔާލިއެވެ. މާޒިން ވެސް ކުޑަކޮށް ހިނިތުންވެލުމަށްފަހު ބައި ކިޔެވެ. މާޒިން ހީކުރީ އެ އަންހެންކުއްޖާ ގޮވީ އޭނާއަށް ކަމަށެވެ. ނަމަވެސް ކަންވީ އެހެންގޮތަކަށް ކަމުން އަމިއްލަ ނަފްސާއި ދިމާލަށް މަލާމާތްކޮށްލެވުނެވެ. ނަމަވެސް އެ އަންހެންކުއްޖާ އާއި ގާތްކަމެއް އިހްސާސްވިއެވެ. ކޮންމެވެސް ތާކުން ފެނުނު ހެން ހީވިއެވެ. އެ ފިރިހެންކުއްޖާއަށް އަށްވެސް އެކީ ޒިން އެވެ. މާޒިން އޭނާގެ ފަން އިސްތަށިގަނޑުގައި މަޑުމަޑުން ހިފާލިއެވެ. އެއަށްފަހު އިހްތިޔާރަކާ ނުލާ އެ އަންހެންކުއްޖާ ދިޔަ ދިމާލަށް ދެވުނެވެ. މާޒިން ހުރި ދިމާލުން ނުފެނުމުން ކަންބޮޑުވާނެ މީހަކު ހުންނާނެކަން ހިނދުކޮޅަކަށްވެސް އޭނާ ހަނދާންނެތުނެވެ.

“ޒިން…!! މަންމި ބުނަމެއްނު އެކަނި ނުދަންޗޭ… ދެން އެހެން ނަހަދަންޗޭ…އަވަހަށް ބޯލާ ދެން މެލްޓްވަނީ މިއޮށް….. ” ސުމާ ޒިން ހިލަ ގޮނޑިއެއްގައި ބައިންދާ އޭނާގެ އައިސްކޯން ދެމުން ބުނެލިއެވެ.

“މަންމީ… ޒިން އެބޭބެ އަތަށް އުޅުނީ ވޮލެތު ދޭސޭ… އެ ބޭބެ އަތުން ވެއްތިފަ އޮތީމަ.. ސޮލީ މަންމީ އައި ވިލް ނޮޓް ޑޫ ދެޓް. އަގައިން..” ކުޑަ ކުޑަ ޒިން ދެރަވެލާފައި އެހެން ބުނެލިއެވެ. އުމުރާއި ހިލާފަށް ޒިން ގެ އަނގަ ގަދަ ވެފައި ވިސްނުންތޫނެވެ. ރީތިކޮށް ވާހަކަދައްކަން އިނގުނެއް ކަމަކު ބައެއް އަކުރުތަށް ކިޔުމަށް ބައެއް ފަހަރު އޭނާއަށް އުނދަގުލެވެ. ދިވެއްސަށްވުރެ އިނގިރޭސިއަށް ޒިން އިސްކަންދެނީ އެހެންވެގެންނެވެ. އުޅެ ބޮޑުވިތަނުގައި މުޅިންވެސް އޭނާއަށް އިވިފައިވަނީ އިނގިރޭސިއެވެ. ސުމާ ނޫނީ އިތުރު މީހަކު ޒިންއާއި ދިވެހިން ވާހަކަނުދައްކާތީ އޭނާއަށްވެސް ބޮޑަށް ފަސޭހައީ އިނގިރޭސިއެވެ. “ހެހެ… އިޓްސް އޯކޭ.. ދެންވެސް މަންމި ކައިރި ބުނެފަ ދަންޗޭ…. މަންމި ހެޕީ ވެއްޖެ ޒިން އެ ބޭބެއަށް ހެލްޕް ވެދިނީމަ.. މައި ގުޑް ބޮއި..” ލޯބިން ފުރިގެންވާ ގޮތަކަށް ސުމާ އެހެން ބުނެލިއެވެ.

“ހެލޯ ހޭންޑްސަމް..” މާޒިން އައިސް  ޒިންއަށް ގޮވާލިއެވެ. ސުމާ އިސްއުފުލާ މާޒިންގެ މޫނަށް ބަލައިލިއެވެ. ހަތަރުކަޅި ހަމަވެގެން ދިޔަ ވަގުތު މާޒިން ހިނިތުންވުމެއް ދިނެވެ. ނަމަވެސް ސުމާއަށް އިނދެވުނީ އެ ލޮލުގެތެެރެއަށް ބަލަންށެވެ. އެއީ ހަމަ އެ ލޮލެވެ. އެ ނޫކުލައިގެ ރީތި ކަޅިއެވެ. އެއްވައްތަރު ލޯ ހުންނަ މީހުން ހުރެދާނެތާއޭ ހިތާ ހިތުން ކިޔާލަމުން ސުމާ އިސްޖަހާލިއެވެ. “ހެލޯ ބޭބޭ..” ޒިން ފުޅާ ހިނިތުންވުމަކާއި އެކު ބުނެލިއެވެ. “ބޭބެ ތެންކިޔުވެސް ނުބުނެވުނޭ ދޯ…. ތެންކިޔު އިނގޭ ހެންޑްސަމް…” ޒިންގެ އިސްތަށިގަނޑާއި ކުޅެލަމުން މާޒިން ބުނެލިއެވެ. “އަބަދުވެސް ތި ގޮތަށް ހެލްޕް ވެދެންޗޭ އިނގޭ ކުދިންނަށް… ކޯޗެއްތަ ބޭބެ ދޭންވީ އެހާ ގުޑް ބޮއި އަކަށް ވީމަ؟” މާޒިން ސުވާލުކޮށްލިއެވެ.

“ވެލްކަމް ބޭބެ.. މަންމި ބުނީ ރަނގަޅުު ކަންތަށް ކޮށްދޭންޖެހޭނީ އެއްޗެއްސަކަށް ނޫނޭ.. އެހެންވެ އައި ޑޯންޓް ވޯންޓް…..” ޒިން އަނގަމަތީ އަތް އެޅުނެވެ. އަދި ސުމާއާއި ދިމާ ބަލައިލެވުނެވެ. ސުމާ ބޯ ޖަހާލިއެވެ. ޖުމްލަ ފުރިހަމަކުރާށޭ ބުނާފަދަ ގޮތަކަށެވެ. “ޒިން ބޭނުމެއް ނޫން އެއްޗެއް ދޯ މަންމީ..” ޒިން އަވަސް އަވަހަށް ބުނެލިއެވެ. އަދި ސުމާއަށް ދޯ އެއްލިއެވެ. ޒިން އެހެން މީހުންގެ ކުރިމަތީ ދިވެހިން ވާހަކަ ދައްކަނީ ސުމާ އެގޮތަށް ކަންކުރަން ބުނެފައިވާތީއެވެ. ފަސޭހައިން ދިވެހި ދަސްވާނީ އޭރުންކަން ސުމާއަށް އިނގެއެވެ. ދިވެހިން ވާހަކަ ދައްކަން އުނދަގުލެއްކަމަކު ޒިން ސުމާ ބުނާކަންތަށް ކުރެއެވެ. ރާއްޖެއައި ފަހުން ޒިންއަށް ވަރަށް އުނދަގޫވިއެވެ. ނަމަވެސް އޭނާ މަސައްކަތްކުރެއެވެ. ސުމާ ހިނިތުންވެލަމުން އާއެކޭ ބުނެލިއެވެ. އިސްއުފުލާއި މާޒިންއާއި ދިމާލަށް ސުމާ ބަލައިވެސް ނުލައެވެ. ކުރީގެ ހަނދާނެއް އެ ލޮލުގެ ސަބަބުން އާވަމުން ދާތީއެވެ. މާޒިން އަށް ހިނިތުންވެލުމަށްފަހު ހިތާހިތުން “މާޝާ ﷲ” އޭ ބުނެވުނީ އެހާ ކުޑައިރުވެސް އެކުޑަ  ކުއްޖަގެ ތަރުބިއްޔަތު ވާލެއް ރަނގަޅުކަމުންނެވެ. ރަނގަޅު ކަންތަށް ދަސްކުރާލެއް އަވަސްވުމުންނެވެ. މާޒިންއަށް ހަނދާންވީ މީގެ އެތަށް އަހަރެއް ކުރީގެ ހަނދާނެކެވެ. ހަމަ މިގޮތަށް ރަނގަޅު ކުއްޖެކެވެ. ހަމަ އެކަހަލަ ވާހަތަކެވެ. ހަމަ މިފަދަ ހެޔޮ މިޒާޖެވެ.

“އެހެންތަ… ހާދަ ބަސްއަހާ ކުއްޖެކޭ ދޯ މީ… ޒިންތަ ކިޔަނީ؟؟” ހިޔާލުތަކުން ބޭރުވެލުމަށްފަހު ކުރިއަށް ވުރެ ބޮޑަށް ހިނިތުންވެލަމުން މާޒިން އަހާލިއެވެ. “ލައްބަ.. ޒިން.. މުހައްމަދު މާ…..” “ޒިން….! އަޅެ އެތާ ހުރެ ހުރެ… ހިނގާބަ ދެންވެސް ދާން… ވަރަށް ބަނޑުހައިވެއްޖެ..” މާޒިންގެ އަތުގައި ހިފައި ދަމައިގަންނަމުން ރިޝްފާ އެހެން ބުނެލީ ކުރިމަތީ ތިބި ސުމާއަށާއި ޒިންއަށް ބަލައިވެސްނުލައެވެ.

މާޒިންއަށް އިތުރު އެއްޗެއް ނުބުނެވެނިސް ރިޝްފާ އޭނާގެ އަތުގައި ހިފައިގެން ގެންދިޔައެވެ. ސުމާއަށް އެކުއްޖާގެ މޫނު މާ ރަނގަޅަކަށް ނުފެނުނެވެ.

މާޒިން ދަމުން ފަސްއެނބުރި ހިނިތުންވެލިއެވެ. ސުމާ ގެ ހިތް ތެޅިގަތީ އެޔެއް މިއެއް ބަލާފައެއް ނޫނެވެ. އެދެމީހުން ދިޔަ ދިމާއަށް ބަލަހައްޓައިގެން ހުރެވުނީ އެ އަންހެންކުއްޖާ އައިސް އެ ފިރިހެންކުއްޖާއަށް ގޮވާލި ނަމަކުންނެވެ. އަނެއްކާ އެއީ……..؟ ނޫނެކެވެ. އެހެންނެއް ނުވާނެއެވެ. ހިތާ ހިތުން އެހެން ކިޔަމުން ސުމާ އައިސްކޯން ބޯންފެށިއެވެ.

“މަންމީ..! ހިއިޒް ނޭމް އިޒް ޒިން ޓޫ؟؟ ..” މާޒިން ދިޔަ ދިމާލަށް ބަލަން ހުރެ ޒިން އެހެން ބުނެލިއެވެ. “ހެހެހެ ވެދާނެ.. ދެން ޒިން ފިނިޝް އިޓް ސޫން..” އިތުރަށް އެ ފިރިހެންކުއްޖާގެ ވާހަކަ ނުދެއްކުމަށްޓަކައި ސުމާ ވާހަކަ އޮޅުވާލިއެވެ.

……

“ޒިން… ކޮންކަމަކާ ތި ވިސްނަނީ މާ ވަރަކަށް؟” ރިޝްފާ މާޒިން ކަމަކާ ވިސްނާކަން އިނގުމުން އަހާލިއެވެ.

“ރިޝް… އެތާ އިން އަންހެންކުއްޖާ ދަންނަ ކުއްޖެއްހެން ހިއެއް ނުވޭތަ؟؟” މާޒިން އަހާލިއެވެ.

“ކޮން ކުއްޖެއް؟؟؟”

“އެތާ އިނެއްނު… ބޭބީ އެއް ގޮވައިގެން……”

“ރިޝް އަކަށް ނޭނގެ ނުވެސް ބަލަން އެ މީހުންނަކަށް.. ވެދާނެ އެއްނު ޒިންގެ ޕޭޝަންޓެއް ކަަމަށް…”

“ހެހެހެ އާނ ވެދާނެ…” އިތުރަށް ވިސްނުމަން ބޭނުންނުވާތީ މާޒިންވެސް ރިޝްފާގެ ވާހަކަ ގަބޫލްކުރިއެވެ. އޭނާއަކީ ކުޑަކުދިންނަށް ހާއްސަ ޑޮކްޓަރެކެވެ. އެހެންކަމުން އެ ކުއްޖާ އާއި ހޮސްޕިޓަލުން ދިމައިވެދާނެއެވެ. އެއަށްފަހު ދެމީހުންވެސް ޑައިނަމޯރއަށް ވަދެ ހުސްތަނަކުން ޖާގަ ހޯދާލާ އިށީނދެލިއެވެ.

……..

“މަންމީ…. އައި ވޯންޓް މޭކް މައި ހެއަރ ލައިކް ހިމް… އުޕްސް… މަންމީ ޒިންއަށް ވަރަށް އުނދަގުލޭ… މަންމީ… ޓޯކް ޓު މީ އިން ދިވެހި ދެން އޮންލީ އައި ކޭން ލާރން…..” ޒިން ބުނެލިއެވެ. ސުމާވެސް ޒިންއަށް ގިނަ ދިވެހި ބަސް ނޭނގޭތީ އިނގިރޭސިން ވާހަކަދައްކައެވެ. “އޯކޭ އޯކޭ. .ދެން ބުނެބަ ކާކުގެ ގޮތަކަށްތަ؟” ސުމާ އަހާލިއެވެ. “އެއްކަލަ… ބޭބެ..” ޒިން ދެއްކީމާޒިންގެ ވާހަކަައެވެ. ޒިންއަށް މާޒިން ކަމުދިޔައީ ރީތި ގޮތަކަށް ސްޕައިކް ޖައްސާފައި ހުރުމުންނެވެ. “ހެހެހެ މަންމި ޖައްސައިދޭނަން އިނގޭ އެގޮތަށް… ޒިން ދާންވީނު ދޯ ގެއަށް؟؟” ސުމާ ގެއަށް ދާންބޭނުންވިއެވެ. ހިތަށް ނޭނގޭ އުނދަގޫތަކެއް ވާންފެށުމުންނެވެ. “ލައްބަ… އައި ވިލް.. އައި މީން… ޒިން އެކަނިން އިނގޭ ގޮނޑިން ފައިބާނީ…” ގޮނޑިން ފައިބަމުން ޒިން އެހެން ބުނެލިއެވެ. ސުމާ ހިނިތުންވުމަކާއި އެކު ޒިން އާއި ދިމާ ބަލަންހުއްޓެވެ. ޒިންވެސް މިހާރުބޮޑުވަނީއެވެ. އޭނާގެ ބައްޕައާއި އެއްވެސް ތަފާތެއް ނެތޭ ސުމާ ހިތަށް އަރަމުން ދިޔައެވެ. ޒިން ފައިބާލަމުން ސުމާގެ އަތުގައި ހިފާލިއެވެ. އަދި ސުމާއާއި އެއްވަރަށް ހިނގަމުން ދިޔައެވެ.

ހިނގާލާފައި ދެވޭހާ ކައިރީގައި ގެ އިނުމުން ވަރަށް އަވަހަށް ސުމާމެންނަށް ގެއަށް ދެވުނެވެ. ލިފްޓަށް އަރާލުމަށްފަހު 7 ވަނަ ފްލޯރ އަށް ދިއުމަށް 7ށް އޮބާލިއެވެ. އިތުރު މީހަކު ނެތުމުން މާ ގިނަ އިރެއް ނުވެ ލިފްޓް 7 ވަނަ ފްލޯރއަށް މަޑުކުރިއެވެ.

ދޮރާއި ދިމާލަށް ދެމީހުން ހިނގާފައި ދިޔަ ވަގުތު ޒިން އާ ފުރެމުން ދިޔައެވެ. “މަންމިގެ ބޭބީ ނިދި އަންނަނީތަ؟” ތަޅަށް ތަޅުދަނޑި ހެޔޮވަރުކޮށްލަމުން ސުމާ އެހެން އަހާލިއެވެ. ޒިން ބޯ ޖަހާލިއެވެ. ނަމަވެސް ހަމަ އެ ބާރުމިނުގައި “ނޯ މަންމީ” އޭ ބުނެލިއެވެ. ސުމާ ދޮރު ހުޅުވާލުމަށްފަހު ޒިންގެ ބޫޓް ބާލައިދޭން ގުދުވެލިއެވެ. “މަންމީ…. އަދި ނަމާދުވެސް ނުކުލެވެއެއްނު.. އިޝާ ނަމާދު ކޮށްގެން ނިދާނީ ޒިން…” ކުޑަކުޑަ ޒިން ނަމާދުކުރުމަށް ހުންނަ ފޯރި ފެނިފައި ސުމާގެ ހިތް އުފަލުން ފޮޅުނެވެ. ޒިންގެ ގައިގާ ބައްދާލެވުނީ ލޯބިންނެވެ. “ލަވް ޔޫ ބޭބީ…” ސުމާ ޒިންގެ ނިތުގައި ބޮސްދެމުން ބުނެލިއެވެ. “ލަވް ޔޫ ތޫ މަންމީ.. ޒިން ފެންބޮވާ އެބަ.. އެކަމު މަންމި ހުރޭ އައި ކޭން ޑްރިންކް އަލޯން..” ބޫޓް ބޭލުމާއި އެކު ގޭގެތެރެއަށް ވަންނަމުން ޒިން އެހެންބުނެލިއެވެ. ސުމާވެސް މާ ބޮޑު ކަމަކަށް ނުހަދާ ދޮރުލައްޕާ ތަޅުލިއެވެ.

ސުމާ އުޅޭ ގެއަކީ 7 ފްލޯރގެ އުސް އިމާރާތެކެވެ. އެއީ އޭނާގެ ބައްޕަގެ ބުރަ މަސައްކަތެވެ. އެންމެ މަތީ ބުރި ސުމާގެ އާއިލާއަށް އުޅެވޭގޮތަށް ހަދައި އޭގެ ތިރީ ބައިތަށް ކުއްޔަށް ދޫކުރެވޭގޮތަށް ހެދިއެވެ. ނަމަވެސް މިހާރު އޭނާގެ އާއިލާގައި އެކަކުވެސް ނެތެވެ. އެހެންކަމުން އެތާ އުޅެނީ ސުމާއާއި ޒިންއެވެ.

އޭނާގެ ބައްޕަގެ ބޮޑު ކުންފުއްޏެއް އޮތްއިރު މިހާރު އެއީ އޭނާގެ ބައްޕަގެ ގާތް އެކުވެރިއެއްގެ ތަނެކެވެ. ބައްޕަ ނިޔާވުމުން  އެ ކުންފުނީގެ ކަންތަށް ބަލަން ހަމަޖެހުނީ އޭނާއަށެވެ. ބިޒްނަސް ޕާޓްނާއަކަށްވެފައި އެ ކުންފުނި ކުރިއަރައި ދާނެކަން އިނގޭތީވެ ސުމާގެ ބައްޕަގެ އެކުވެރިޔާ އެ ކުންފުނި ހިންގަންފެށިއެވެ. އަދިވެސް އެ ކުންފުނި ދަނީ ކުރިއަރަމުންނެވެ. ބައްޕަގެ ހިއްސާއެއް އޮތްތަނެއްކަމުން ސުމާއަށް ލާރިވެސް ލިބެއެވެ. އަދި ކުއްޔަށް ދޫކުރަމުން ދިޔަ ބައި ތަކުގައި އުޅޭ މީހުންގެ ފަރާތުންވެސްމެއެވެ. އެހެންކަމުން އޭނާއަށް ލާރީގެ ދަތިކަމެއް ނެތެވެ. ދަތީ އެކަނިވެރިކޮށް އުޅެންށެވެ. ދިރިއުޅުން ހިއްސާކުރާނެ ބައިވެރިއެއް ނެތުމެވެ. ނަމަވެސް ކޮންމެވެސް ދުވަހަކުން އެ ކަންވެސް ފުރިހަމަ ވެދާނެތާއެވެ.

މިހާރު އޭނާގެ ހަމައެކަނި މަގުސަދަކީ ޒިން ހެޔޮގޮތުގައި އުޅެ ހެޔޮ މަގުން ހިނގާ ޒިންމާދާރު ކުއްޖަކަށް ހެދުމެވެ. ޒިންގެ އުމުރު ހަގަސް މިހާރުވެސް އޭނާއަކީ ޒިންމާދާރު ހެޔޮ އަދި ރީތި އަހްލާގެއް ލިބިފައި ހުރި ކުއްޖެކެވެ. އެކަމާ ސުމާ ވަރަށް އުފާކުރެއެވެ. މާތް ﷲ އަށް ހަމްދުކުރެއެވެ. ސުމާ ވެސް ފެންފޮދެއް ބޯލަން ދިޔައެވެ. އެއަށްފަހު މަޤްރިބް ނަމާދުގަޑި ޖެހެންދެން ދެމީހުންވެސް ކުޑަކޮށް ތާޒާވެލިއެވެ. ނަމާދު ގަޑި ޖެހުމާއި އެކު ނަމާދުކޮށްލިއެވެ. މާޒިން އަށް ނަމާދުގައި ކިޔާ އެއްޗެހި ނޭނގުނެއް ކަމަކު ސޫރަތްތަށް ކިޔައެވެ. “ﷲ އަކްބަރ” ކިޔައެވެ. އަދި ނަމާދު ކުރާ ގޮތަށް ރުކޫއަށާއި ސަޖިދައަށްވެސް ދެއެވެ. ސުމާގެ ފަހަތުން އޭނާވެސް ކޮށް ނިންމާލިއެވެ. އެއަށްފަހު ޤުރުއާން ކިޔަވަން އެނދުމަތީ އިށީނދެލިއެވެ.

ސުމާ ސޫރަތެއް ފެށުމާއި އެކު އޭނާގެ އަޑުދަށުން ޒިންވެސް ފަށަައެވެ. އެއަށްފަހު އަމިއްލައަށް ސޫރަތް ކިޔައި ނިންމާލައެވެ. ސުމާ އަށް ގިނަފަހަރު އެ މައުސޫމް މޫނަށް ބަލަން އިނދެވެނީއެވެ. އޭނާގެ ބައްޕައާއި ހާދަ ވައްތަރެވެ. ލޮލުން ކަރުނަ ހިލެނީ އެ ދުވަސް މަތިން ހަނދާންވުމުންނެވެ. އިޝާއަށް ގޮވަންދެން ޒިން ކިޔަވަންއިނެވެ. އެއަށްފަހު އިޝާ ނަމާދުވެސް ކޮށްލިއެވެ.

“ހިނގާ ދޯ ދެން ކާން ބޭބީ؟” ސުމާ ޒިން އުރާލަމުން އެހެން ބުނެލިއެވެ. “މަންމީ ޒިންވެސް ހޯދާނީ ބުލުގާ އަޅާ ފްލެންޑުން މަންމި ގޮތަށް.. ޔޫ އަރ …. މަންމި ވަރަށް ލީތި ބުލުގާ އެޅީމަ..” ޒިން އެތަށް އިރަކު މަޑުން އިނުމަށްފަހު އެހެން ބުނެލިއެވެ. އިނގިރޭސިން ފެށޭ ޖުމްލަތަށް ވަގުތުން ހުއްޓާލައިފައިދިވެހިން ޒިން ފަށައެވެ. ތަށްޓަށް ރިހަ އަޅަން ހުރި ސުމާ ހިނިގަނޑެއް ޖަހާލިއެވެ. އެ ޖުމްލައިންވެސް ސުމާއަށް ހަނދާންވީ އޭނާގެ މާޒީއެވެ.

ތަފާތު ވާހަކަތަކުގައި ތިއްބާ ޒިންގެ ކެއުން ނިމުނެވެ. އެހެން ކަމުން ޒިން ކުޑަކޮށް ގައި ދޮއްވާލާ ނިދާ އެއްޗެހި ލެއްވުމަށްފަހު އެނދުމަތީ ބޭއްވިއެވެ. ސުމާއޭނާގެ މަގަތުގައި އެއް އަތް ވިއްދާލައިގެން އޮށޯވެލިއެވެ. “އަވަހަށް ޝަހާދަތް ކިޔާލާ ބޭބީ…” ސުމާ ޝަހާދަތް ކިޔައިދެން ފެށުމާއި އެކު ޒިން ވެސް ފެށިއެވެ. ގިނަ ތަންތަން އެކަނި ކިޔަމުން ގޮސް ހުއްޓާލަނީ ނޭނގުމުންނެވެ. ސުމާ އެތަން ތަން ފުރިހަމަކޮށްދިނުމުން ޒިންވެސް އަޑުދަށުން ކިޔާލަމުން ޝަހާދަތް ކިޔާލާ ނިންމާލިއެވެ. އެއަށްފަހު ލޯމަރާލިއެވެ. ސުމާ ޒިން ނިދަންދެން އެ އޮތްގޮތަށް އޮތެވެ. ޒިންގެ މައުސޫމް މޫނަށް ބަލަހައްޓައިގެންނެވެ. މިއަދު އޭނާގެ ދިރިއުޅުމުގައި ހުރީ ހަމައެކަނި ޒިންއެވެ. ޒިންނެތް ނަމަ އޭނާ ހާދަ އެކަނިވެރިވީހެވެ.

“ހައްދަވާ ބޮޑު ކުރެއްވި ރަސްކަލާކޮ…. ޒިން އަށް ހެޔޮ ރަހުމަތް ލައްވާށެވެ. މިއަޅާއާއި ޒިންއާއި ދުރުވާނެ ގޮތެއް މެދުވެރި ނުކުރައްވާށެވެ. ޒިން ހެޔޮގޮތުގައި ބޮޑުކުރެއްވުމުގެ ހިތްވަރު މިއަޅާއަށް ދެއްވާށެވެ.” ހިތާހިތުން ދުޢާ ކޮށްލުމަށްފަހު ޒިން ނިދިކަން ޔަގީންކޮށްލާ އޭނާގެ ނިތަށް ބޮސްދިނުމަށްފަހު ސުމާ ކޮޓަރިން ނިކުތީ ޒިންގެ ދެފަޅިއަށް ބާލިސް ލާފައެވެ. ސުމާ އުޅޭ ތަނުގައި 4 ކޮޓަރި ހުރެއެވެ. އެއީ އޭނާގެ ބައްޕަގެ އާއި އޭނާގެ ދޮންތަގެއާއި އޭނާގެ ކޮޓަރިއެވެ. ދެން ހުންނަނީ މެހެމާނުން އުޅެން ތައްޔާރުކޮށްފައިވާ ކޮޓަރިއެވެ. މަންމަ އެމީހުންނާއި އަލްވަދާޢު ކީ ސުމާގެ އުމުރުން 5 އަހަރުގައެވެ.

ސުމާ އާއި ޒިން އުޅެނީ މެހެމާނުންނަށް ހާއްސަ ކޮޓަރީގައެވެ. އަމިއްލަ ކޮޓަރީގައި އެތަކެއް ހަނދާންތަކެއް ގައިދުކޮށްފައިވުމުގެ ސަބަބުން އެތާ އުޅެން އޭނާގެ ހިތަށް ކުޅަދާނައެއް ނޫނެވެ. އޭނާގެ ދޮންތަ ސަނާ އާއި ބައްޕަގެ ކޮޓަރީގައިވެސް އުޅެން އުނދަގުލީ އެމީހުންގެ ހަނދާން އާވާތީއެވެ. ސުމާ ކޮންމެ ކޮޓަރިއެއްގެ ދޮރަށް ބަލައިލިއެވެ. އެއަށްފަހު ރޮވެން ފެށުނެވެ. ހުރިތަނަށް ތިރިވެވުނެވެ. އޭނާ ކެތްކުރަނީ ހަމައެކަނި ޒިންއަށް ޓަކައެވެ. ޒިން އަކީ އޭނާގެ ހިތްވަރެވެ. އެތަށް އިރަކު ރުއިމަށްފަހު ސުމާ ކޮޅަށް ތެދުވެލިއެވެ. ކަރުނަތަށް ފޮހެލީ އިތުރު މީހަކު އެ ކަރުނަތަށް ނުފޮހެދޭނޭ ހިތާ ހިތުން ކިޔަމުންނެވެ. އެއަށްފަހު އަމިއްލަ ކޮޓަރިއާއި ދިމާލަށް ހަރުކޮށް ހިނގާލާފައި ދިޔައެވެ. ކޮޓަރި ހުޅުވާލުމާއި އެކު ކުޑައިރުން ފަށައިގެން އުމުރުން 15 އަހަރުވަންދެން އެ ކޮޓަރީގައި އުޅުނު ގޮތް ފިލްމެއްގެ ގޮތުގައި ޕްލޭ ވަމުން ދިޔައެވެ. 15 އަހަރުގައި މެލޭޝިޔާއަށް ކިޔަވަން ބަދަލުކުރުމަށްފަހު ޗުއްޓީގައި އަންނަ އިރު އެ ކޮޓަރީގައި ހޭދަކުރި ދުވަސްތަށް ފެންނަމުން ދިޔައެވެ. ޑައިރީ ލިޔަމުން ދާ ތަނެވެ. އެނދުމަތީ އޮވެ އެތައް ރެއަކު ރޮމުން ދިޔަ ގޮތެވެ. ސަނާއާއި އެކު މަޖާކޮށް އުޅުނުގޮތެވެ. މާޒިން…………… ސުމާ ދެފަރާތަށް ބޯ ހޫރާލިއެވެ. އެ ހިޔާލު އާ ނުކުރާށެވެ.

އެތެރެއަށް ވަދެ އެނދުގައި އިށީނދެލައި އަތް ހާކާލިއެވެ. ކަރުނައިން ފުރިފައި ހުރެ އޭނާ އަލަމާރިއާއި ދިމާލަށް ދިޔައެވެ. އަލަމާރީގައި ތަޅުލެވޭގޮތަށް ހަދާފައިވާ ކަބަޑުން ބޯ ފޮތެއް ނަގާލިއެވެ. މިއަދު އޭނާ ބޭނުންވަނީ ހުރިހާ ހަނދާނެއް އާކޮށްލާށެވެ.  އެހިތަށް އަނިޔާތަކެއް ދޭން ބޭނުންވީއެވެ. އަދިވެސް އެ ހަނދާންތަކުން މިންޖުނުވާތީއެވެ. ހަވީރު ހިނގި ކަންތަށް އަދިވެސް އޭނާގެ ހިތުން ފިލައިގެން ނުދިޔައެވެ. އެނަން އިވުމުން އަދިވެސް ހަމަ އެ ބާރުމިނުގައި ހިތް ތެޅިގަންނާތީއެވެ. ފޮތް ހިފައިގެން އެނދުގެ ހެޑްބޯޑްގައި ލައްގަނެލައިގެން އިނދެލިއެވެ. އެއަށްފަހު ފޮތް ހުޅުވާލިއެވެ. “ކޮމްޕްލެއިންސް ފޯރ ޔޫ” ޖަހާފައި ވަކިކޮށްލާފައި ހުރި ބައިތަކެއް ހުރުމުން އެބައި ހުޅުވާލިއެވެ. އެއީ އެ ފޮތުގެ ފަހަތު ގަނޑާއި ހިސާބެވެ.

…………..

—– 1 ———

“ހައިރާން ނުވޭހޭ އޭނާ ކައިރީންދާތީއޭ….

ހާދަ ވިސްނާފިމޭ ހިތް ނުފިލާތީ އޭ….

ލޯބިވަން… ހިތަށް ތަދުވޭ ބުނަންންން…”

އަސްލުވެސް ވަރަށް ހައިރާންވޭ ކައިރިން ދާއިރު… ކައިރީގައި އުޅޭއިރުވެސް ހަމަ ހައިރާންވޭ.. އިންސާނަކު ތިހާ ރީތިވެދާނެބާއޭ ހިތަށް އަރާ….ހިތަށް ތަދުވޭ ލޯބިވާކަން ނުބުނެވޭތޯ… އެކަމު ބުނާކަށް ނުކެރެ…. އައި ހޮޕް ޔޫ ކޭން ޖަސްޓް ފީލް އިޓް..

“އަންގާލަން ކަމެއް ދެން ކުރެވޭނެ ނެތް ވަކިން…

ކުޑަކޮށް ވެސް ލޯބިވާކަން ނުވަނީހޭ ޔަޤީން…”

ނުވަނީތަ ހަމަ؟؟؟؟ މިހިތުގައި ތި ނަން ފެވިފައިވާކަމެއް ނޭނގޭތަ؟؟؟؟ މިހިތގައި ރަސްކަން ކުރަމުން ދާއިރުވެސް ނޭނގޭތަ؟؟؟ މިވަރަށް ކެއަރ ކުރަނީ “ޖަސްޓް ފްރެންޑްސް” ވީމައޭތަ ހީވަނީ؟؟؟

މާޒިން………………………………….

-ނުނިމޭ-

PS.. mi stryga diary ge “complains fr u” ge prt ga 1 2 3 liyefa huhnaany dhuvas thah vaki kuran…. eki dhuvas dhuvage cmplains kn dhahkan…  n cmplains bai kiyagn maa bwdu ehcheh dheyha nuviyas real diaryge bai vrh avahah ahnaane.. thnkx 🙂 kyp rydin