ހަވޭލީ – ތިރީސްވަނަ ބައި

“ޔުމްނާ ހިތަކަށް ނާރާތަ އަހަރެން އެހާ ޔުމްނާއާއި ވައްތަރުވީ ކީއްވެކަމެއް؟” ޒިންނީރާ މާނަ ފުން ގޮތަކަށް ސުވާލު ކުރިއެވެ. އޭގެ ރައްދުގައި ޔުމްނާ ބޯ ހޫރުވާލިއެވެ. އަދިވެސް ޔުމްނާ ހުރީ ވާހަކަ ދައްކަން ބޭނުން ނުވެފައެވެ. އެހެންކަމުން އޭނާ މުއާމަލާތު ކުރަމުން ދިޔައީ އިޝާރާތުންނެވެ.

ޒިންނީރާ ފަސްޖެހޭ ފަދައަކުން ޔުމްނާގެ ކިލާވެފައިވާ އަތުގައި ހިފާލިއެވެ. “އެއީ….އަހަރުމެން ދެމީހުން މީ…..އެއް މާބަނޑު ދެކުދިން.”

*** 30 ވަނަ ބައި ***

ޔުމްނާގެ ބަސް ހުއްޓިގެން ދިޔައެވެ. ޔުމްނާ ނިކަން ރަނގަޅަށް ޒިންނީރާއާއި ދިމާއަށް ބަލާލިއެވެ. ތެދެކެވެ. ހީވަނީ ހަމަ ލޯގަނޑެއް ކުރިމަތީ ހުއްޓި ހުރެ އަމިއްލަ ސޫރައަށް ބަލާލެވޭ ހެންނެވެ. ޔުމްނާާ މަޑުމަޑުން ޒިންނީރާއާއި ދިމާއަށް ދިއުމަށް ފިޔަވަޅު އަޅަން ފެށިއެވެ. ޒިންނީރާ ޔުމްނާ އޭނާ ކައިރިއަށް އަންނަންދެން މަޑުކޮށްގެން ހުއްޓެވެ. ޔުމްނާ ޒިންނީރާއާއި އަރާ ހަމަވުމުން ޔުމްނާގެ ބަޑި ފަޅައިގެން ދިޔައެވެ. ރޮމުން ރޮމުން ޔުމްނާ ކަކޫ މައްޗަށް ތިރިވިއެވެ. މި މަންޒަރު ފެނިފައި ޒިންނީރާގެ ހިތަށް އާދަޔާޚިލާފު ހިތާމަ ވެރިކަމެއް ވެރިވިއެވެ. ޔުމްނާ ދެއަތުން މޫނު ފޮރުވައިގެން ރޯން އިން ތަން ފެނުމުން މާ ބޮޑަށް ޒިންނީރާއަށް އަސަރު ކުރީ ކަންނޭނގެއެވެ.

ޒިންނީރާ މަޑުމަޑުން ޔުމްނާއާއި އެއްވަރަށް ބިންމަތީގައި ދެ ކަކޫ ޖަހައިގެން އިށީނެވެ. އަދި ޔުމްނާގެ ދެ އަތް އޭނާގެ މޫނުން ދުރުކޮށްލުމަށްފަހު ޔުމްނާގެ ގައިގައި ބާރަށް ބައްދާލިއެވެ. އެ ވަގުތު ކުރިން ޒިންނީރާގެ ހިތުގައި ޔުމްނާއާއި މެދު އުފެދުނު ހަސަދަވެރިކަމާއި ނަފްރަތު މުޅިންހެން ފިލައިގެން ގޮއްސިއެވެ. މި މަންޒަރު ބަލަން ޒަބީލު ހުރިއިރު އޭނާގެ ހިތަށް ކުރަމުން ދިޔަ އަސަރުތައް ވަކި މަދެއް ނޫނެވެ.

ޔުމްނާ ދިޔައީ އޭރުވެސް ގިސްލަ ގިސްލާފައި ރޮމުންނެވެ. އޭނާއަށް ރޮވެމުން ދިޔަ ވަރަކަށް އޭނާގެ ހަށިގަނޑުން ދިޔައީ ވަރު ދޫވަމުންނެވެ. މިކަން ޒަބީލަށް އިހްސާސްކުރެވުމުން އިޝާރާތުން އެކަން ޒިންނީރާއަށް އެންގިއެވެ. ޒިންނީރާ މިތަން ފެނި މަޑުމަޑުން ޔުމްނާގެ ގައިން ދޫކޮށްލިއެވެ. ޒަބީލު ކުރިއަށް ޖެހިލިއެވެ. އަދި މަޑުމަޑުން ވައިރޯޅިއަށް ވެސް ސިއްރު ވާ ވަރަށް އެއްޗެހިތަކެއް ކިޔަން ފެށިއެވެ.

ޔުމްނާއަށް އާދަޔާޚިލާފަށް ފިނި ވާން ފެށީ އެ ހިސާބުންނެވެ. އޭނާގެ ވީދިފައިވާ ދޯޕައްޓާ ގައިގައި އޮޅާ ބާރުކޮށްލިއެވެ. “ކީ…ކީއްތަ ޒަބީލު ތިކުރަނީ؟” ދެ ދަތްޕިލަ ރަނގަޅަށް ނުޖެހޭ ހާލު ޔުމްނާ ސުވާލު ކުރިއެވެ. ޒަބީލު އެއަކަށް ޖަވާބެއް ނުދެއެވެ. އޭގެ ރައްދުގައި ކިޔެވުން ބާރުކޮށްލީއެވެ.

ކުއްލިއަކަށް ވައި ގަދަވާން ފެށިއެވެ. ޔުމްނާގެ ހިތުގައި ބިރުވެރިކަން އަލުން އާލާވެގެން ދިޔައެވެ. “ޔުމްނާ. ޔުމްނާގެ ދެލޯ މަރައިގެން އަހަރެން ބުނާ އިރެއްވަންދެން ހުރޭ!” ޒަބީލު އަމުރުކުރާ ބީދައަކުން ބުންޏެވެ. ޔުމްނާ އެއަށް އެއްޗެކޭ ބުނަން އުޅެފައިވެސް އެންމެ ފަހުން ޒަބީލު ބުނި ފަދައިން ދެލޯ މަރާލިއެވެ. ދެލޯ މެރުނުތަނާހެން ޔުމްނާއަށް އިހްސާސް ވަމުން ދިޔަ ފިނި އަރާމު ފިންޏަކަށް ބަދަލުވެގެން ދިޔައެވެ. ޔުމްނާއަށް އިހްސާސް ކުރެވުނީ ވިލާތަކެއް މަތީގައި އުދުހެވެމުން ދިޔަ ކަހަލަ އިހްސާސެކެވެ. ޔުމްނާއަށް ފުން ނޭވާއެއް ދޫކޮށްލެވުނެވެ.

އިރުކޮޅެއްފަހުން ޔުމްނާ މަޑުމަޑުން ބިންމަތީގައި ޖެހުނު ކަމުގެ އިހްސާސް ކުރެވުނެވެ. “ދެން އެންމެ ރަނގަޅު ދެލޯ ހުޅުވިއަސް.” ޒަބީލު މިހެން ބުނުމުން ޔުމްނާ އޭނާގެ ދެލޯ މަޑުމަޑުން ހުޅުވާލިއެވެ. ޔުމްނާއަށް އޮވެވުނީ ފުދޭވަރަކަށް އަނދިރި ތަނެއްގައެވެ. ވަށައިގެން ބަލަލިއިރު ކޮންމެވެސް ވަރަކަށް އަލިވި ނަމަވެސް އަކި އަންނަމުން ދިޔައީ ކޮންތަނަކުން ކަމެއް ފާހަގަ ކުރާކަށް ޔުމްނާއަކަށް ނޭނގުނެވެ. ޔުމްނާ ވަށައިގެން އެކި ދިމަ ދިމާއަށް ބަލާލިއެވެ. އެ ތަނުން އެއްވެސް ދިރުމެއްގެ ނިޝާނެއް ފެންނާކަށް ނެތެވެ.

ޔުމްނާ މަޑުމަޑުން ކޮޅަށް ތެދުވިއެވެ. “އަހަރެން ކޮންތާކަށްތަ ތިގެނައީ؟” ޔުމްނާ ޒަބީލާއި ދިމާއަށް އެނބުރެމުން އެހިއެވެ. “މީ އެހެން މީހުންނަށް ފޮރުވިފައިވާ ތަނެއް. މި ތަނަށް މި ގެނައީ ޔުމްނާއަށް ހުރިހާ ވާހަކައެއް ކިޔައިދޭންވެގެން” ޒަބީލު ބުންޏެވެ. ޒިންނީރާ ވެސް މީގެ ރައްދުގައި ބޯ ޖަހާލިއެވެ. “އިށީނދެލީ. ތަންކޮޅެއް އިރު ވެދާނެ” ޒަބީލު ކުއްލިއަކަށް ފާޅުވި ގޮނޑިއަކަށް އިޝާރާތް ކޮށްލަމުން ބުންޏެވެ. ޔުމްނާ އެ ގޮނޑީގައި އިށީނުމުން ޒަބީލު ވާހަކަ ފެށިއެވެ.

“އަހަރުމެން ދެ މީހުން މީ ޔުމްނާއަށް އެނގޭނެ ފަދައިން ދެ ޖިންނި. އެކަމަކު ހިތަށް އަރާ ދޯ އެއީ ކިހިނެއް ވާ ކަމެއް ހޭ؟” ޒަބީލު މި ސުވާލު ކޮށްލުމުން ޔުމްނާ ބޯ ޖަހާލިއެވެ.

“އަހަރެން މިއީ ހުސްނާގެ އެންމެ ދޮށީ ދަރިފުޅު. އެހެންވީމާ އަހަރެން ބޮޑުވާނެ ޔުމާންއަށް ވުރެ ވެސް،” މިހެން ޒަބީލު ބުނުމުން ޔުމްނާ އެހާ ހައިރާނެއް ނުވިއެވެ. ޒިންނީރާއަކީ އޭނާގެ ދައްތައޭ ބުނި ހިސާބުން ޒަބީލަކީ ވެސް ހަމަ ލޭގެ ގުޅުމަކުން ޔުމްނާއާއި ގުޅިފައިވާ މީހެއްކަން ޔުމްނާއަށް ވިސްނުނެވެ. ނަމަވެސް އެ ވަރުންވެސް ޔުމްނާގެ ހިތުގެ ތެރޭގައި އޮޅެމުން ދިޔަ ސުވާލުތަކުގެ އޮޅުން ބޮޅުންގަނޑު ފިލާ ގޮތެއް ނުވިއެވެ. “އަޑުއަހާ ރަނގަޅަށް”. ޒަބީލު ބުންޏެވެ.

***

މުޅި މާހައުލަށް ވެރިވެފައިވަނީ އުފާވެރިކަމެވެ. ކޮންމެ މީހަކުވެސް ހުރީ އެ މީހަކަށް ލިބުނު އެންމެ ރީތި ހެދުން ލައިގެންނެވެ. ކޮންމެ މީހަކުވެސް އަވަސް ހިނގުމެއްގައި ހިނގަމުން ދިޔައީ ރަށުގެ ތުނޑިއާއި ދިމާއަށެވެ. މުޅި ތުނޑި ވަނީ ރަތް ކުލައިގެ ފޮތި ދަމާ ޒީނަތްތެރި ކޮށްފައެވެ. ބޮޑު މޭޒެއްމަތީ އެކި ވައްތަރުތަކުގެ ހެދިކާއާއި ކަޅުސައި އަޅާފައި ހުރި ތަރުމޯޒުތައް ހުއްޓެވެ. ކޮންމެ މީހަކުވެސް ދައްކަމުން ދިޔައީ އަލަށް ކައިވެނި ކުރެވުނު ޖޯޑުގެ ވާހަކައެވެ. އެ ޖޯޑުގެ ފުރިހަމަ ކަމުގެ ވާހަކައެވެ.

ހުސްނާ ހުރީ އަދިވެސް އަލަށް ކައިވެނި ކުރީތީވެ ބިރުން ފިތްކަނޑައިގެން ދާވަރުވެފައެވެ. އިރުއިރުކޮޅާ  އޭނާ ލައިގެން ހުރި ރަތް ކުލައިގެ އޮފު އަރާ ދިގު ހެދުމުގައި ހިފާލައެވެ. ނޫނީ އޭނާގެ އިސްތަށިގަނޑުގައި އަޅާފައި އިން ވިދާ ފޮތިގަނޑުގައި ޖަހާފައި އިން ޓިސް ދަތި ރަނގަޅު ކޮށްލައެވެ. ނޫނީ އޭނާގެ އިސްތށިގަނޑު އެއް ކޮނޑަށް ވައްޓާލާފައި އަނެއް ކޮނޑަށް އިސްތަށިގަނޑު ބަދަލުކޮށްލައެވެ.

ހުސްނާ ކައިރީގައި ހުރި ފިރިހެން މީހާގެ މޫނުމަތިން މި ކަހަލަ އެއްވެސް ހާސްކަމެއް ނުފެނެއެވެ. އޭނާގެ ކަޅު ކުލައިގެ ފަޓުލޫނަށް އަތް ޖަހައިގެން ހުރިއިރު އޭނާ ހުރީ ކައިވެނީގެ ސަޔަށް އަންނަމުން ދިޔަ މެހެމާނުންގެ ހަރަކާތްތަކަށް ބަލާށެވެ. ދޭތެރެއަކުން ވައްކަޅިން ހުސްނާ ތެޅޭ ވަރު ބަލާލައެވެ. ނަމަވެސް އެ މޫނު މަތިން އެއްވެސް ނުތަނަވަސްކަމުގެ އަސަރެއް އަދި އުފާވެރިކަމުގެ އަސަރެއްވެސް ނެތެވެ.