މިވަނީ ލޯތްބޭ… 4

ޖުމާނައަށް ވަގުތުން ހަޅޭލަވައިގަނެވުނެވެ. ބިރުން ތުރު ތުރުއަޅައިގަތެވެ. ހާދިމް އަނދިރިގަނޑުގެ ތެރެއިން ނިކުމެގެން އައެވެ. އޭރު އޭނާގެ އަތުގައި ބޮޑު ލަކުޑި ގަނޑެއް އޮތެވެ. އެއަށްފަހު ޖުމާނަގެ ނަޒަރު ހުއްޓުނީ ބިންމަތީގައި އޮތް ޒާޔަންއަށެވެ. އޭނާ ބޮލުގައި އަތުން ހިފަހައްޓާލައިގެން އޮތްއިރު ދެކޮޅަށް އެނބުރެއެވެ. ވިހަ ހިނިތުންވުމަކާއި އެކު ހާދިމް ޖުމާނައާއި ދިމާލަށް އައެވެ. ލަކުޑި ދުރަށް އެއްލާލަމުން ޖުމާނަގެ ބުރުގަލުގައި ހިފީ އޭނާގެ ލޮލުން ޖުމާނާގެ ހަށިގަނޑަށް ދަހިވެތިގޮތަކަށް ބަލަމުންނެވެ.. ޖުމާނަ އަށް މާ ބޮޑު ކަމެއް ނުކުރެވުނު ކަމުގައިވިޔަސް އޭނާ ހިތްވަރެއް އެލުވައެއް ނުލައެވެ. އަތުން ހާދިމްގެ އެތަން މިތާ ތަޅަމުން ދިޔައެވެ. ނަމަވެސް އެ ބިޔަ މީހާއަށް އެ ކުޑަ ޖުމާނަގެ އަނިޔާއަކުން ކަމެއް ވާނެ ހެއްޔެވެ؟

ޖުމާނަ ފަހަތަށް ޖެހެމުން ގޮސް ފާރުގައި ޖެހި ހުއްޓުނެވެ. އެއާއި އެކު ހާދިމްގެ މޫނުމަތިން ހިނިތުންވުމެއް ފެނުނެވެ. ޖުމާނައަށް ރޮވެން ފެށުނެވެ. “ޒާން….! ޒާން.. ޒާން…” ޖުމާނަ އެހެން ކިޔަމުން ދިޔައިރު އޭނާގެ އަޑުގައި ތުރު ތުރެއްހުއްޓެވެ. ހާދިމް އޭނާގެ ބޯ އަރިކޮށްލަމުން ޖުމާނަގެ މޫނާއި ކައިރިވެލީ ޖުމާނައަށް ސަލާމަތްވެވޭނެ ހުރިހާ ގޮތެއް ބަންދުކުރަމުންނެވެ. ޖުމާނައަށް ލޯ މަރާލެވުނެވެ. އެ ލޮލުން ހޯސްލާފައި ކަރުނަތަށް ފައިބައިގެން ދިޔައެވެ. އެތަން ފެނި ހަރު ހިލަ ހިތެއްވެސް އޭނާއަށް ޓަކައި ހަމްދަރުދީވާނެކަން ޔަޤީނެވެ. ނަމަވެސް ހާދިމްމެން ކަހަލަ ޖަނަވާރުންނަށް އެއްވެސް އަސަރެއް ނުކުރާނެއެވެ.

ޖުމާނަ ދެލޯ މަރާ ތަގުޅި ކޮށްލައިގެން ހުރިއިރު އޭނާގެ ހިތް ނެގި ނެގިފައި ޖެހެއެވެ. މައި ނޭވާތަކެއް ލަމުން ދިޔައިރު އޭނާ މަސައްކަތް ކުރީ ހާދިމްގެ އަތުން އޭނާގެ އަތް ދޫވޭތޯއެވެ. އިރުކޮޅެއް ނުވެ އަނެއްކާވެސް އަޑެއްއިވިގެން ދިޔައެެވެ. އެއާއި އެކު ހާދިމްގެ ހުރިހާ ބާރެއް ނެތިގެން ގޮސް ވެއްޓުނީ ބިންމައްޗަށެވެ. ޖުމާނައަށް އެކަން އިހްސާސްވިއެވެ. ނަމަވެސް ދެލޯ ހުޅުވާލާ އެންމެ ފަހަރަކުވެސް ބަލައި ނުލާ ހުރިތާ ހުރެވުނީ ގަނެފައި ބިރެއްގެ ސަބަބުންނެވެ. ކުއްލިއަކަށް އަނެއްކާވެސް އޭނާގެ ހަށިގަނޑާއި މީހަކު ކައިރިވެލި އިހްސާސް އޭނާއަށް ކުރެވުނެެވެ. ކުރިއަށްވުރެ ބޮޑަށް ލޯ މަރާލީ ދުވަހަކުވެސް ދެން ލޯ ނުހުޅުވާނަމޭ ބުނާ ކަހަލަގޮތަކަށެވެ. ޒާޔަންގެ އަތުގެ ބީހުން ޖުމާނައަށް އިހްސާސްވީ ކަންނޭނގެއެވެ. ދެލޯ ހުޅުވާލަމުން އޭނާއަށް ފެނުނީ ޒާޔަންއެވެ. ޒާޔަން ޖުމާނަ އާއި ގާތްވެލަމުން އޭނާގެ ހަށިގަނޑުގައި ބައްދާލިއެވެ. “ޒާން.. ޒާން..” ޖުމާނަ  ޒާޔަން ގެ އެ ކަސްރަތީ ހަށިގަނޑުގައި ބައްދާލެވުނު އިރު ޒާޔަންގެ ހަށިގަނޑުން ވާގި ދޫވާން ފެށިއެވެ. ޖުމާނައަށް އެކަން އިހްސާސްވިއެވެ.

“ޒާން.. އާރ ޔޫ އޯކޭ؟؟؟” ޖުމާނަ ޒާން ގެ ގައިން ދޫކޮށްލުމާއި އެކު އޭނާ ބިންމައްޗަށް ވެއްޓުނެވެ. ޖުމާނައަށް ހަޅޭލަވައިގަނެވުނެވެ. އޭނާ ގެ މަސައްކަތަކަށް ދެން ވީ ޒާޔަންގެ ފޯނު ހޯދާ ޕޮލިހަށް ގުޅުމެވެ.

“ހަލޯ ޕޮލިސް……..” ޖުމާނަ ފުރަތަމައިނުންވެސް ޕޮލިހުންނަށް ގުޅާ އަންނަން ވީ ތަން ބުނެދިނީ ހާދިމް އޮތްގޮތް ނޭނގޭތީއެވެ. ކޮންމެވަގުތަކުވެސް ތެދުވެ ހަމަލާއެއް ދީފާނެތީއެވެ.  އެއަށްފަހު އޭނާގެ މަންމަގެ ނަމްބަރަށް ގުޅާލިއެވެ. ހީކުރިގޮތަށް ކަންވުމާއި އެކު އޭނާ ފޯނު ކަންފަތާއި ދުރުކޮށްލިއެވެ. ޕޮލިސްގެ ޖިޕް އައި އަޑާއި އެކު ޖުމާނަ ހުރިތަނުން ނިކުމެގެން ދިޔައެވެ. ޓޯޗުން އަލި ކުރަމުން އައި ދެ ފުލުހުން ގެ ކުރިމައްޗަށް ޖުމާނައަށް އެރުމާއި އެކު ބަޑި ފަޅައިގެން ދިޔައެވެ. އުނދަގުލަކުން އަމިއްލަ ނަފްސް ކޮންޓްރޯލް ކުރުމަށްފަހު ކަން ހިނގައިދިޔަ ގޮތް ފުލުހުންނަށް ކިޔައިދިނެވެ. ފުލުހުންގެ ލަފަޔާއި އެއްގޮތަށް ފުރަތަމަވެސް އެދެމީހުން ގެންދެވުނީ ހޮސްޕިޓަލަށެވެ.

ޖުމާނަ އެތަށް އިރަކު ގުޅަމުން ދިޔަ އޭނާގެ މަންމަގެ ނަމްބަރުން ފޯނު ނެގީ ހޮސްޕިޓަލަށް ދެވުމާއިއެކުހެންނެވެ. ފަހުމާއަށް ވީ ގޮތް ސާފްކޮށް ކިޔައިދިނުމުން ހާފިޒް ގޮވައިގެން މިދަނީކަމަށް ބުނެ އޭނާ އަވަހަށް ފޯނު ކަނޑާލިއެވެ. ދެމީހުންވެސް އެމަރގެންސީ ރޫމަށް ގެންގޮސް ފަރުވާ ދެމުން ދިޔައެވެ. ޖުމާނަ ޒާޔަންގެ ފޯނުން ހައިކަލްއަށް ގުޅާލިއެވެ. އެތަކެއް ފަހަރު ގުޅުމުންވެސް އެ ފޯނުން ޖަވާބެއް ނުދިނެވެ.

“ދަރިފުޅާ!!!!” ގޮނޑިބައްރީގައި ފުލުހުންނާއި އެކު އިށީނދެ އިން ޖުމާނައާއި ދިމާލަށް ދުވެފައި ފަހުމާ އައިސް ބައްދައިގަތެވެ. “ދަރިފުޅާ ކިހިނެއްވެ ބޭރަށް ނިކުތީ؟؟؟؟ މަންމަ ބުނަމެއްނު ނުނިކުންނާށޭ…” އެންމެ ފުރަތަމަވެސް ފަހުމާ ކުރީ ޝަކުވާއެވެ. “ނޫން މަންމާ.. އޭނަ.. އޭނަ ވަނީ އޭ ކޮޓަރިއަށް.. އަހަރެން ނިކުތީ އަވަހަށް ގެއިންވެސް.. މަންމައަށް ގޮވާކަށް ފުރުސަތެއްވެސް ނުލިބުނު.. އަނެއްކާ ފޯނުވެސް..” އެހިސާބަށް ބުނެވުނުތަނާ ޖުމާނައަށް ރޮވުނެވެ. ފަހުމާ ޖުމާނަގެ ގައިގާ ބައްދާލަމުން ގޮނޑީގައި އިށީނދެލިއެވެ. “މަންމާ.. އޭނަ.. ކިހިނެއް ހަދަނީ.. އޭނަގެ ރައްޓެހި ކުއްޖާ ފޯނެއްވެސް ނުނަގަ…” ގިސްލަމުން ގޮސްވެސް ޖުމާނައަށް ފަހުމާ ކައިރި ބުނެވުނީ އެހެންނެވެ. “ޒާޔަންތަ؟؟ ޒާޔަންގެ މަންމައަށް ގުޅަންވީނު..” ހާފިޒް އޭނާގެ ހުރި ހަމައެކަނި ދަރިފުޅުގެ ބޮލުގައި ފިރުމާލަމުން އެހެން ބުނެލީ އޭނާގެ ހިތަށް ކުޅަދާނަނުވެގެންނެވެ.

ޖުމާނަ އަވަސް އަވަހަށް ބޯ ޖަހާލަމުން ޒާޔަންގެ ފޯނުން އޭނާގެ މަންމަގެ ނަމްބަރ ފެނޭތޯ ބަލާލިއެވެ. “މަމް” ގެ ނަމުގައި އިން ނަމްބަރ އަށް ގުޅާލިއިރު އޭނާގެ ހިތް ވަނީ ނުތަނަވަސްވެފައެވެ.

“ހަލޯ ދަރިފުޅާ…! ކޮބާ ކިހިނެއް ކަންތައްތަށް؟؟؟ހާދަ ދަންގަޑިއަކު..” އެތަކެއްފަހަރު ގުޅުމަށްފަހު އެކޮޅުން ފޯނު ނެގި އަރޫޝާ ވާހަކަ ދެއްކީ މަޑުމައިތިރިކަމާއި އެކުގައެވެ.

“ދައްތާ… ޒާ…ޒާން ހޮސްޕިޓަލުގައި…….” އެހިސާބަށް އޭނާއަށް ބުނެވުމާއި އެކު އަނެއްކާވެސް އޭނާއަށް ރޮވުނެވެ. ހާފިޒް ޖުމާނައަތުން ފޯނު ނަގައިގެން ދުރަށް ޖެހިލީ ވީ ގޮތް އޮޅުން ފިލުވައިދިނުމަށެވެ. ޖުމާނަ އަމިއްލަ ނަފްސު ކުށްވެރިކުރަމުން ދިޔައެވެ. ހުރިހާ ކަމެއްވެސް ވީ އެނައާއި ހެދިއެވެ.  ޒާޔަން އަަށް ކަމެއްވެއްޖެއްޔާ ޖުމާނަ ދުވަހަކުވެސް އަމިއްލަ ނަފްސު މާފެއް ނުކުރާނެއެވެ. ޑޮކްޓަރ ނިކުމެގެން އައީ ހާދިމް ހޭ އަރައިފިކަމަށް ބުނުމަށެވެ. ޕޮލިހުން އޭނައާއި ހަވާލުވިއެވެ. “ޑޮކް.. ކޮބާ ޒާން… ؟؟؟” ޖުމާނަ އެހެން އަހާލުމުން ޑޮކްޓަރ ބުނުއްވީ އަދި ހޭނާރާ ކަމަށާއި އޭނާގެ ހާލު އިނގޭނީ ހޭ އެރީމާ ކަމަށެވެ. “ހޭ އަރާނީ ކޮންއިރަކުންތޯ؟؟” “3 ގަޑިއިރު ކަމަށް މިބަލަނީ” އެހެން ބުނެލުމަށްފަހު އޭނާ އެތެރެއަށް ވަދެގެން ދިޔައެވެ.

ޖުމާނަ ފަހުމާގެ ކޮޮނޑުގައި ބޯ އަޅާލިއެވެ. “އެމީހުން 2 ޖެހުމުގެ ކުރިން އަންނާނެ..” ފޯނު ކަނޑާލާފައި ގޮނޑީގައި އިށީންނަމުން ހާފިޒް ބުނެލީ ޔާމިން މެން އަންނަ ވާހަކައެވެ.

……..

“ޖުމް… ޖުމް…!!” ޒާޔަން ބަލި އަޑަކުން ގޮވަންފެށިއެވެ. ކައިރީގައި ހުރި ނާރސް ބޭރަށް ނިކުތީ ޑޮކްޓަރަށް އެކަން އެންގުމަށެވެ. ނަރުސް ނިކުތުމާއި އެކު ޖުމާނައަށް ކޮޅަށް ތެދުވެވުނެވެ. ނަމަވެސް ނަރުސްގެ މިޝްރާބް ހުރީ އެހެންދިމާލަކަށް ކަމުން ނާއުއްމީދީގޮތަކަށް ޖުމާނައަނެއްކާވެސް އިށީނދެލިއެވެ. ޑޮކްޓަރާއި އެކު ނަރުސް އަވަހަށް އެތެރެއަށް ވަނެވެ.

“ޖުމް..!” ޒާޔަން އަދިވެސް ގޮވަމުން ދިޔައީ ޖުމާނައަށެވެ. ޑޮކްޓަރު އައިސް ޒާޔަން ޗެކް ކޮށްލުމަށްފަހު ބޭރަށް ނިކުމެލީ ޖުމާނައަށް ގޮވާލާށެވެ. “ޕޭޝަންޓް ހޭއަރައިފި..  ހާލު ކުރިއަށް ވުރެ ރަނގަޅު.. ޖުމް އަކީ ކާކު؟؟” ޑޮކްޓަރު ނިކުމެލާފައި އެހެން ބުނެލުމާއި އެކު ޖުމާނަ ގޮނޑިން ތެދުވީ ކަށްޓެއް ޖެހި ކަހަލަ ގޮތަކަށެވެ.

ތެޅި ތެޅި އޮތް ހިތަކާއި އެކު ޖުމާނަ އެތެރެއަށް ވަނެވެ. އެއާއި އެކު ޑޮކްޓަރާއި ނަރުސް ނިކުތީ އެކަކު އަނެކަކާ ވާހަކަ ދައްކަމުންނެވެ.

ޖުމާނަ އެތެރެއަށް ވަނުމާއި އެކު ފެނުނީ ބޮލުގެ ވަށައިގެން ބެންޑޭޖް އަޅާއިފައި އޮތް އޭނާގެ ޒާން އެވެ. އޮމާން އަލި މޫނެކެވެ. ތުނި ތުނބުޅިއެކެވެ. ބޯ އެސްފިޔަތަކެކެވެ. ކަސްރަތީ ރީތި ހަށިގަނޑެކެވެ. ޖުމާނައަށް އޭނާގެ މޫނު ރަނގަޅަށް ފެނުނީ ކިރިޔާއެވެ. ހިތުގެ ވިންދު އަވަސްވެގެން ދިޔައެވެ. ޒާޔަން ކައިރި ގޮސް ހުއްޓިލެވުުނުއިރު އެ ލޮލުން ކަރުނަތަށް އަންނަން ފެށީ އެޔެއް މިއެއް ބަލާފައެއް ނޫނެވެ. ޒާޔަންއަށް މީހަކު އައިކަން އިހްސާސްކުރެވުމާއި އެކު މަޑު މަޑުން ލޯ ހުޅުވާލިއެވެ. ކުރިމަތީ ހުރީ އަންހެންކުއްޖެކެވެ. ދޮން މޫނެކެވެ. އެއްވެސް އައިބެއްނެތެވެ. ހިމަ ބުމައެކެވެ. ބޮޑު ލޮލަކާއި ދިގު އެސްފިޔަތަކެކެވެ. ފިނިފެންމާ ކުލައަށްދާ ތުންފަތެކެވެ. ކުޑަ ކުޑަ ނޭފަތެކެވެ. ކަޅު ބުރުގަލެއްގެ ތެރެއިން އެ މޫނު ފެންނަލެއް ވަރަށް ހިތްގައިމެވެ. ވިލާތަކުގެ ތެރޭ ފޮރުވި އިނދެގެން ދުނިޔެ އަލިކުރަމުން ދާ 14 ވިލޭރޭގެ ހަނދު ކަހަލައެވެ. ޒާޔަންއަށް ކަޅި ޖަހާލަންވެސް އުނދަގޫވިއެވެ.

ޖުމާނައަށް އެހެން ހުރެވުނީ އިރުކޮޅަކަށެވެ. ޒާޔަންގެ ގައިގާ ބައްދާލަމުން ރޮއެ ގަނެވުނީ އަޑުން އަޑުނަގާފައެވެ.

“ޝްޝް ބޭބީ.. ސްޓޮޕް ކުރައިން.. އައިމް ފައިން.. ސީ…” ޒާޔަން ޖުމާނަ ދުރަށް ލާން މަސައްކަތް ކުރަމުން އެހެން ބުނެލިއެވެ. އެންމެ ފަހުން ޒާޔަން މަޑުން އޮތީ ޖުމާނަ ހިތްފުރޭވަރަށް ރޯލަން ފުރުސަތު ދެމުންނެވެ.

“އޯކޭ ދެން ނިމުނީ އޭ ލަވް..” އެތަށް އިރުވިއިރުވެސް ޖުމާނަގެ ރުއިން ނުކެނޑުމުން ޒާޔަން އެހެން ބުނެލިއެވެ. އަދި ޖުމާނަ ދުރަށްލުމުގައި ކާމިޔާބުވިއެވެ. “ގޮނޑީގައި އިށީނދެބަ..” ޒާޔަން ގޮނޑި ދައްކާލަމުން އެހެން ބުނެލުމުން ޖުމާނަ އިށީނދެލިއެވެ. އަދި ޒާޔަންގެ މޭގައި ބޯ އަޅާލީ ޒާޔަން އެގޮތަށް ކަންތަށް ކުރުމަށް ބުނުމުންނެވެ. އޭރުވެސް ޖުމާނަ ހަމަޔަކަށް ނޭޅެއެވެ. ލޮލުން ފައިބަމުން ދާ ކަރުނައިން ޒާޔަންގެ މޭ ތެންމަމުންދިޔައެވެ.

“ލަވް.. މިކޮޅު ބަލާބަ.. ޒާންއަށް މޫނު ފެންނަ ގޮތަށް އޮވެބަ..” ޒާޔަން ޖުމާނަގާތު އެހެން ބުނެލުމުން ޖުމާނަ ޒާޔަންއާއި ދިމާލަށް މޫނުއަނބުރާލިއެވެ. އަދި އެއޮތްގޮތަށް އޮވެ ޒާޔަންގެ މޫނަށް ބަލަމުންދިޔައެވެ. ޒާޔަން އޭނާގެ އަތުން ޖުމާނަގެ ބޮލުގައި ފިރުމަމުންދިޔައެވެ.
“ލަވް.. ތިއުޅެނީ މިތަނުގައި ފެންބޮޑު ކުރަންތަ؟ އެވަރަށް ތި ރޮނީ ކީއްވެޔޯ؟” ޒާޔަން އެހެން ބުނެލުމާއި އެކު ކަރުނައިގެ ތެރެއިން ޖުމާނައަށް ހީލެވުނެވެ.

“ދެޓްސް މައި ގަރލް.. ޔޫ ނޯ ޖުމް އަކަށް ނުވެސް ގުޅޭ ރޯކަށް.. ބަލާބަ ނޯސްވެސް ރެޑް ވެފަ.. އެން ލޯ ވެސް… ޒާން ކިހާ ދެރަވާނެ ތިރީތި މޫނު ރަތްވެފަ ހުރީމަ އެވެސް ޒާން އާއި ހެދި.. ދޯ؟؟” ޒާޔަން ޖުމާނަ ހިތްހަމަ ޖައްސާލަދޭން މަސައްކަތްކުރިއެވެ. ދެމީހުން އެގޮތަށް ބައިވަރު ވާހަކަ ދައްކަން ތިއްބެވެ.

އެވަގުތު އެތަނުގެ ބޭރަށް އައިސް ވަނީ ޔާމިންއާއި އޭނާގެ އާއިލާއެވެ. ހައިކަލްވެސް ފަހަތުގައި ހުއްޓެވެ. އެންމެންގެ މޫނުމަތިން ފެންނަމުން ދިޔައީ ހާސްކަމެވެ. ފަހުމާ އަދި ހާފިޒް އެ އެންމެންނަށް ތައާރަފް ވެލިއެވެ. އަދި މިހާރު ޒާޔަން ރަނގަޅު ކަމަށާއި ޖުމާނަ ވީ އެތެރޭގައި ކަމަށް ބުނެލަދިނެވެ.

ޖުމާނައާއި ޒާޔަން އަތް ޖޯޑް ކޮށްލައިގެން ވާހަކައިގައި ތިއްބާ ސިއްސައިގެން ދިޔައީ އެތެރެއަށް ވަދެގެން އައި ޔާމިން އާއި އަރޫޝާ ފެނިފައެވެ. ވަގުތުން ދެމީހުންނަށް ދުރަށް ޖެހިލެވުނެވެ. ހީވީ ކަރަންޓް ޝޮކެއް ޖެހުނުހެންނެވެ. ޔާމިން އާއި އަރޫޝާ އެކަކު އަނެކަކާއި ދިމާ ބަލާލަމުން ހިނިތުންވެލިއެވެ. ޖުމާނަ ޒާޔަންއަށް ބަލާލަމުން އިންތަނުން ތެދުވެ ނިކުމެގެން ދިޔައީ ލަދުން ހުރެ އިސްޖަހާލައިގެންނެވެ. ޖުމާނަ ނިކުތުމާއި އެކު ހައިކަލްގެ ނަޒަރުވެސް އަދި ޒިޔާންގެ އަންހެނުން އަދުލާގެ ނަޒަރުވެސް އޭނާއަށް ހުއްޓުނެވެ. ޖުމާނަގެ ރީތިކަމާއި މެދު ދެމީހުންނަށްވެސް ހިތާ ހިތުން ތައުރީފްކޮށްލެވުނެވެ.

……………………….

އޭގެ އަނެއްދުވަހު ޒާޔަން ދޫކޮށްލެވުނެވެ. ކުރިއަށްވުރެ ހާލުރަނގަޅުކަމަށް ބުނެ ރެސްޓް ނެގުމަށް ލަފާދެމުންނެވެ. ޒިޔާންވެސް އުނގޫފާރުން ނައިފަރަށް އައެވެ. އެންމެން އުޅުމަށް ހަމަޖެހުނީ ޖުމާނަމެން ގޭގައެވެ. އެންމެންވެސް ތިބީ އުފަލުގައެވެ. ހާދިމް ފުލުހެންގެ ބެލުމުގެ ދަށަށް ގެންދެވުމުގެ ހަބަރު ވެގެން ދިޔައީ ޖުމާނައަށްވެސް އަދި ޒާޔަންގެވެސް ހިތަށް ހަމަޖެހުމެއް ލިބުނު ކަމަކަށެވެ.

………..

“އަނބި ގަބޫލުކޮށްފިން…” ގާޒީގެ ކުރިމަތީ އަދި ދެ ހެކިވެރިންގެެޔާއި ޖުމާނައަދި ޒާޔަންގެ އާއިލާގެ ކުރިމަތީ ޒާޔަން އެހެން ބުނެލީ ހިނިތުންވުމަކާއި އެކީގައެވެ. ދެމީހުންވެސް އާ ހަޔާތެއް ފަށަަން ތައްޔާރުވިއެވެ. އަބަދުވެސް އެކަކު އަނެކަކާއި އެކީގައި ވާނެކަމަށް ވައުދުވަމުންނެވެ. ކޮންމެ އުފާވެރި ކަމެއްގައި އެކަކު އަނެކަކުގެ ކައިރީ ވާ ފަދައިން ހިތާމަވެރި ކަމެއްގައިވެސް ވުމަށް ވައުދުވަމުންނެވެ. ނިމުމެއް ނުވާ ލޯބި އަބަދުވެސް އެކަކު އަނެކަކަށް ދޭނެކަމަށް ވައުދުވަމުންނެވެ. އަބަދުވެސް އެކަކު އަނެކަކު ހިމާޔަތްކުރުމަށް ވައުދުވަމުންނެވެ.

“އަމާޒަކީ މިހާރު ތިޔަ ލޯތްބޭ..

ހިތް އަދު ދިނީމެ ލޯބި ދެން ލިބޭތޯ…

މަލާއޭ… މަލާއޭ… މަލާއޭ ކުރޭ ފުންއަސަރު އިނގޭތޯ..

ޔާރު މިވަނީ ލޯތްބޭ ހަޤީޤީ… ޔާރު މިވަނީ ލޯތްބޭ ހަޤީޤީ….”

ކޮޓަރި ތެރޭގައި ޖަހާލެވިފައިވާ އެދެމީހުންނަށް އެންމެ ރީތި ލަވައިން އެ ރޭ ފުރިހަމަ ކޮށްލިފަދައެވެ. “ޒާން…! އަސްލު ހީކުރިންތަ އެރޭ އެއީ ޖުމް އޭ..؟؟” ޒާޔަންގެ ތަނަވެސް މޭގައި ބޯ އަޅާލައިގެން އޮވެ ޒާޔަންގެ އަތުގެ ފިރުމުންތަކަށް ފުރުސަތު ދެމުން ޖުމާނައަހާލީ ވަރަށް ލޯބިންނެވެ.

“ތެދައްބުނަންތަ؟ އަސްލު ހިއެއް ނުކުރަން އެކަމު ހިތަށް އުނދަގޫތަކެއް ވިކަން އިހްސާސްވި. ވެން އައި ހިއާރޑް ޔޫ ކުރައިން.. އައިމީން އެ މީހާ ކައިރި ހުރެގެން.. ދެން އެންމެ ފަހުން ދިޔައީ ކެއް ނުވެގެން.. ޖުމް ހީކުރިންތަ ޒާންއަށް ވެދާނޭ؟؟” ޒާޔަން ޖުމާނަގެ އިސްތަށިގަނޑުގައި ބޮސްދެމުން ބުނެލިއެވެ. “ޖުމް ވެސް ހިއެއް ނުކުރަން. އެކަމު ހަމަ ހީވީ ވަރަށް ގާތް ކުއްޖެކޭ އެކަމު އެ ހެން ހިތަށް އެރި ސަބަބަކާއި މެދު ވިސްނާކަށް އެން އިތުރު އެއްޗެއް ހިތަށް އަރުވާކަށް ޓައިމް އެއް ނުލިބުނު..އެއަށްވުރެ ބޮޑަށް ބިރުގަތް ވިއްޔަ..ހެހެހެ” ޖުމާނަ އެ އޮތްގޮތަށް އޮވެ ބުނެލިއެވެ.

“ހެހެ.. އިނގޭތަ..ޒާން ހަމަ ސިއްސައިގެން ދިޔައީ ޖުމް ގުޅާފަ އޮތް ނަމް ފެނުނީމަ.. ހިތަށް އެރީ މީ ކޮންކަމެއް ބާއޭ… ދެން ހަމަ ނަމްބަރ ކިޔާލަ ކިޔާލަ އިނދެވުނީ….ހަހަހަ..” ޒާން އެހެން ބުނީ ލޯ މަރާލަމުންނެވެ. އެދުވަހުގައި ދިމާވި ކަންތައްތަށް ހަނދާންކުރަމުންނެވެ. ޖުމާނަވެސް ހޭންފެށިއެވެ. އަދި ޒާޔަންގެ މޭތެރޭ އިތުރަށް ބޮނޑިވެލިއެވެ.

“ޔާރު މިވަނީ ލޯތްބޭ ހަޤީޤީ…..”

“ޔާރު މިވަނީ ލޯތްބޭ ހަޤީޤީ…..”

ނިމުނީ-