އެދިގެން ކަލާ ލިބޭތޯ 13

 (13 ވަނަ ބައި)

“ޔޫލީންއަކީ އައިޝަމްގެ ދަރިއެއް… އައިޝަމްގެ ހަނގު އަންހެންދަރިފުޅު… ޔޫލީންގެ ހަޤީގަތާއިމެދު އެކަކުވެސް ސުވާލު އުފައްދާކަށް ނުޖެހޭނެ…” ޝެރީންގެ މޫނުގައި ވިދަމުންދިޔަ ދާތިކިތައް އަތުން ފުހެލަމުން ނުހަނު ސާބިތުކަމާއިއެކު ބުނެލަން މަސައްކަތްކުރި ގޮތުން ރީހާންއަށް އެއްމިޔަކަނިން ހިނިތުންވެވުނެވެ. ޝެރީންގެ ސިއްރުވެރި އަމަލުތަކުން ކަންކަން މޭރުންނުވާހާ ބޮޑަށް އޭނަ ސިކުނޑި ކޮށިވެދާނެކަމަށް ހީކުރުމަކީ ޝެރީންއަށް ހެދުނު އެންމެ ބޮޑު ގޯހެވެ.

“އަހަރެންގެ ދަރިފުޅުގެ ނަމުގެ ފަހަަތަށް އައިޝަމްގެ ނަން ގެނެސްގެން އެއްވެސް ކަމެއް ބަދަލުކުރެވިދާނެކަމަށް ހީކުރުމަކީ ޝެރީންގެ މޮޔަކަން… އަހަންނަށް އިނގޭ އެރޭ މަތިން ޝެރީ އެހާ ފަސޭހައިން ހަނދާންނުނެތޭނެކަން…” ތެމިފައިވީ ޝެރީންގެ މޫނުގައި ފިރުމާލަމުން ރީހާން ބުނެލި ބަަސްތައް ޝެރީންގެ މޫނުމަތީގައި ވީއްލާލި އެތިފަހަރަކަށްވިއެވެ. ސިކުންތުކޮޅެއްގެތެރޭގައި އެ ދޮންމޫނު މައްޗަށް އެތައް ކުލައެއް އަރާ ފައިބައިގެންދިޔައެވެ.

ހަށިގަނޑު ފިނިވެ، ނޭވާ ހާސްވެގެން ހިނގައިދާނެހެން ހީވި ވަގުތުކޮޅު އޭނައަށް ރީހާންގެ އަތްފޮޅު ވާލެވުނު ގޮތަށް ބާރު ފިޔަވަޅުތަކެއްގައި ރީހާންއާއި ދުރަށް ހިނގައިގަނެވުނެވެ. އޭނަގެ މޫނުމަތީން މިވަގުތު ހާމަވާ އަސަރުތަކުންވެސް ރީހާން ހަޤީގަތް ދެނެގަނެފާނެެއެވެ. އޭނައަށް ފާރަލައިގެން މިތަނަށް އަންނަން ފަސްނުޖެހުނުއިރު ހަޤީގަތް ހޯދުމުގެ ބޭނުމުގައި ރީހާން ކޮންމެފަދަ އިމެއްވެސް ހުރަސްކޮށް ފާނެކަން އޭނައަށް އިނގެއެވެ. މިވީހާތަނަށްވެސް ރީހާންވަނީ އޭނަ ބޭނުންވާ ކަމެއް ކޮންމެ ހާލެއްގައި ވިޔަސް ހާސިލްކުރާނެކަން ހާމަކޮށްދީފައެވެ.

**********************

ހިތްގައިމުކަމުގައި ހޭދަވެގެންދިޔަ ހެނދުނަކަށްފަހު މެންދުރުވެގެންއައިރު އިރުގެ ހޫނު އަވީން ބިންގަނޑު ފިއްސަމުން ދިޔައެވެ. ނޫއުޑުގައި ވިލާކޮޅެެއްގެ އަސަރުވެސްނެތި ދުރަށް ފެންނަން އޮތީ ވިދަމުންދާ ފީރޯޒް ކޮޅެއްހެންނެވެ. ވައިރޯޅިތައް ހިމޭންވެފައިވުމުން ފަޒާގައިވަނީ ދިލަ ހޫނުކަމެކެވެ.

މެންދުރުގެ ބައްދަލުވުމަށްފަހު ޒެލް އައިލީގެ ކެބިންތެރެއަށް ވަދެލިއިރު ފަރުދާތައް ކަހާލެވިފައިވާ ކުޑަ ދޮރުތަކުން އިރުގެ އަލިކަން ކެބިންގެ ބޮޑުބަޔަށް ފޯރާފައިއޮތެވެ. އިރުގެ އަލިކަމުގައި ކެބިންގެ ބިއްލޫރި ބިތްތައް ވިދަމުންދިޔަގޮތުން ޒެލްއަށް ލޯހަނިކޮށްލަންޖެހުނެވެ. ކުޑަދޮރުތައް ހުޅުވާލެވިފައިވުމުން ކެބިން ތެރޭގައި ހިސާބަަކަށް އުދާސްކަންވިއެވެ.

ކެބިންއަށް ވަތްގޮތަށް ޒެލްއަށް ވަށައިގެން ނަޒަރު ހިންގާލެވުނެވެ. ކެބިންތެރޭގައި އައިލީގެ ހިލަމެއްނެތި ހިމޭންކޮށް އޮތްއިރު ބިއްލޫރި ބިތުގެ ކުރިމައްޗަށްވާގޮތަށް ބެހެއްޓިފައިވާ ރޯޒްވުޑް މޭޒުމައްޗަށް ތަރުތީބެއް ފައިލްތައް ދޫކޮށްލެވިފައި ވެއެވެ. ބައެއްފައިލްތައް ލައްޕާލުމެއްނެތި ދޫކޮށްލެވިފައިވީ ގޮތުންވެސް ދާދި ދެންމެއަކާއި ޖެހެންދެން އައިލީ މަސައްކަތު ގައި އުޅެމުންދިޔަކަން ޒެލްއަށް ނަގައިގަނެވުނެވެ. ސުވާލު އުފެދިފައިހުރެ ޒެލްއަށް އައިލީގެ މޭޒާއި ގާތަށް ހިނގައިގަނެ ވުނެވެ. އޭރުވެސް މޭޒުމަތީގައި އޮތް އައިލީގެ ފޯން ވައިބްރޭޓްވަމުންދިޔައިރު ޒެލްގެ ނަޒަރު ފޯނާއި ދިމާލަށް ދަތުރު ކުރިއެވެ. އިރުކޮޅެއްވަންދެން ޑައިލް ވުމަށްފަހު ކޯލްކެނޑި ސްކްރީން ނިވިގެންދިޔުމާއިއެކު ޒެލް ދެހިޔާލެއްގައި ހުރެފައި ވެސް މޭޒާއި ދިމާލަށް އަތްފޯރުވާލާފައި ފޯނު ނެގިއެވެ.

“މައި ޒޭން… މައިޒޭންއަކީވެސް މީހުންނަށް ކިޔާކަހަލަނަންނަންތަ؟” ނިވިފައި އޮތް ފޯނުގެ ސްކްރީނަށް ނަޒަރު ހުއްޓާލައި ގެން ހުރެ އަމިއްލަ ނަފްސަށް އަޑުއިވޭވަރަށް ޒެލް ކިޔާލީ ސުވާލު އުފެދިފައި ހުރެއެވެ. އެވަގުތު ކަންފަތުގައި ޖެހިގެން ދިޔަ ތޫލި އަޑަށް ޒެލްއަށް ބަލާލެވުނުއިރު ބެލްކަނީގެ ދޮރުފަތް ދަމާލުމަށް ފަހު އައިލީ ކެބިން ތެރެއަށްވަނީއެވެ. ޒެލްއަށް އިތުރު ހަރަކާތެއް ނުގެނެވިގެން އުޅެނިކޮށް އައިލީ ހަލުވި ފިޔަވަޅުތަކެއްގައި އައިސް ޒެލްގެ އަތުގައި އޮތް އޭނާގެ ފޯނު އަތުލިއިރު އެ މޫނުމަތީން ކޮންމެވެސް ވަރަކަށް ހިތްހަމަނުޖެހުމުގެ އަސަރު ފާޅުވިހެން ހީވިއެވެ.

“މި ފޯނު…” ހުށިޔާރުނުވެ ހުއްޓާ އައި އެ ހަމަލާއިން ޒެލް ކޮންމެވެސް ވަރަކަށް ސިހިގެންދިޔައެވެ. އޭނަގެ ވާހަކަ ފުރިހަމަނުކުރެވެނީސް އައިލީ ފޯނު ހުޅުވާލިގޮތަށް ސްކްރީންއަށް ސަމާލުކަން ދިނުމުން ޒެލް ޖީބަށް އަތްޖަހާލަމުން ކަންނެތްގޮތަކަށް މޭޒަށް ލެގިލިއެވެ. އޭނަ ބަލަހައްޓައިގެން ހުއްޓާ އައިލީ އެއްވެސް އިހުސާސެއް ދައްކާލުމެއްނެތި ފޯނު ނިވާލިގޮތަށް މޭޒާއި ކައިރިވުމާއިއެކު ޒެލްއަށް އައިލީގެ މޫނަށް ފުންނަޒަރެއްދެވުނެވެ. އެވަގުތު ކޮޅުގައިވެސް އައިލީގެ ތެމިފައިވާ ކޯތާފަތާއި ރަތްވެފައިވީ ދެލޯ ޒެލްގެ ތޫނު ނަޒަރުގައި އަޅަައިގަތެވެ.

“ސަރ… ކަމަކުތޯ؟” މޭޒުމަތީގައި ހުރި ފައިލްތައް ތަރުތީބުކުރަމުން އައިލީ ވާހަކަދެއްކިއިރު ރުއިމުގެ ސަބަބުން އެއަޑު ކުރެހިފައިވިއެވެ. އޭނަ ޒެލްގެ މޫނަށް ނުބަލަން ހުއްޓަސް ޒެލްގެ ތޫނު ނަޒަރު އެ މޫނަށް ހުއްޓިފައިހުރިގޮތުން ކުރަމުން ދިޔަ މަސައްކަތަށް ސަމާލުކަންދޭން އައިލީއަށް އުނދަގޫވިއެވެ. އޭނަ ފައިލްތައް މޭޒުމައްޗަށް ދޫކޮށްލިގޮތަށް ކެބިންއިން ނިކުންނަން ހިނގައިގަތެވެ. އެވަގުތު ކުއްލިހަރަކާތަކާއި އެކު ޒެލް އައިލީގެ އުޅަބުއްޓާއި ހިސާބުގައި ހިފަހައްޓާލިއިރު ދެ ޒުވާނުންގެ ނަޒަރު ގުޅިގެންދިޔައެވެ. ކަރުނައިގެ އަސަރު ފާޅުވަމުންދިޔަ އެލޮލުގެ އެންމެ ބަލާލުމާއިއެކުވެސް ޒެލްގެ ހަނދާނަށް އައީ އައިލީ އާއި އެންމެ ފުރަތަމަ ބައްދަލުވި ރެއެވެ. އައިލީއާއި ބައްދަލުވި އެންމެ ފުރަތަމަ ފަހަރުވެސް އޭނައަށް އެރީތި ލޮލުން ކަރުނަ ފެނިފައިވިއެވެ. އޭނައަށް ނޭނގެނީ އައިލީފަދަ ހުރިހާ ކަމެއް ފުރިހަމަވެގެން ބޮޑުވެގެން އައި އަންހެން ކުއްޖަކު ހިތާމަކުރަންޖެހޭ ސަބަބެވެ.

“ބަލައިގެން އުޅެބަލަ…” އައިލީގެ ދިގު އިނގިލިތަކުން ޒެލްގެ އިނގިލިތައް އެއްފަރާތްކޮށްލުމަށް އުޅުމާއިއެކު ކުރެވުނު ކަންތައް ނަގައިގަނެވި ޒެލް ވަގުތުން އައިލީގެ އުޅަބުށީން ދޫކޮށްލަމުން ތިރީގައިވާ ހަރުފަތްތަަކަށް ލޮލުން އިޝާރާތްކޮށް ލިއެވެ. އޭނަ ނުހަނު ހަމަޖެހިފައިހުރިކަމަށް ހެދެމުން ޖީބަށް ދެއަތްޖަހާލިޔަސް މޫނުމަތީގައިވީ ނުތަނަވަސްކަން ފޮރުވައެއް ނުލެވުނެވެ. އޭނަގެ ކަންބޮޑުވުންތައް ސުވާލުތަކެއްގެ ގޮތުގައި ދުލުން ބޭރުނުކޮށް ހިފަހައްޓާލެވުނީތީ އޭނައަށް ހަމަޖެހުމުގެ ނޭވާއެއް ދޫކޮށްލެވުނެވެ. އައިލީގެ ތަފާތުކަން ފުރަތަމަ ބައްދަލުވުމުންވެސް އޭނައަށް ފާހަގަކުރެވިފައިވެެއެވެ. އެއްވެސް މީހެއްގެ ހަމްދަރުދީއާއި އަޅާލުން ތެރިކަމަށް ބޭނުންނުވާހާ ރުޅިގަދަކުއްޖެކެވެ. ވީއިރު ދެވަނަ ފަހަަރަށްވެސް އައިލީއަށް އެހީވާން އުޅެގެން އޭނަ ލަދުގަންނަން ނުޖެހޭނޭކަމުގެ ޔަގީންކަމެއް އޭނައަކަށް ނެތެވެ.

“ތޭންކްސް…” އެވަގުތު އައިލީ ފައިދަށުގައިވީ ހަރުފަތްތަކަށް ބަލާލަމުން ފުންނޭވާއެއް ދޫކޮށްލިގޮތުން ޒެލްއަށް ހަމަޖެހުމެއް ލިބުނެވެ. ޒެލްގެ އެކުޑަ އަޅާލުންތެރި އަަމަލަށް އައިލީ ޝުކުރުވެރިވީ އެވަގުތުކޮޅުގައި ޒެލްގެ ވިސްނުމުގައިވީ ހިޔާލުތައް ނޭނގިހުރެއެވެ. އެއާއިއެކު ޒެލް އައިލީއާއި ދިމާލަށް ބަލާލިގޮތަށް އެއްބުމަ އަރުވާލިއިރު ކުޑަކޮށް ކަރުކެހިލައިފިއެވެ.

“ބައްޕަ އެބަ އައިލީ ހޯއްދަވާ… އަހަރެމެންނަށް މަޑުކޮށްގެން ކެބިންގައި އިންނެވީ…” ހިނދުކޮޅަކަށްވެސް ކެބިންއަށް އައި ބޭނުން ހަނދާންނެތިފައިހުރުމަށްފަހު ޒެލް ވާހަކަދެއްކިއިރު އެއަޑުގައި އަވަސްކަންވިއެވެ. ޒެލްގެ ސަޙްސިއްޔަތު ތަނުގެ މުވައްޒަފުންނާއި ކިތަންމެ ތަފާތަކަސް މަސައްކަތަށް އިސްކަން ދޭވަރު ޒެލްއާއިއެކު ހޭދަވެގެންދިޔަ މަދު ދުވަސްތަކުން ވެސް އައިލީއަށް އިނގިފައިވެއެވެ. އޭނަ އިތުރު އެއްޗެކޭ ބުނުމެއްނެތި ވަގުތުން ކެބިންގެ ދޮރާއިދިމާލަށް ހިނގައިގަތީ އޭނަގެ ސަބަބުން ޒެލްގެ މަސައްކަތަށް އިތުރު ލަސްކަމެއް އަންނަން ބޭނުންނުވީތީއެވެ.

“މަޑުކޮށްބަލަ… ތިހެން ހުރެގެންތަ ބައްޕަ ކުރިމައްޗަށް ދާނީ؟” ޒެލްގެ އަޑަށް އައިލީ ފަސްއެނބުރިބަލާލުމާއިއެކު ޒެލް އައިލީގެ މޫނާއި ދިމާލަށް އިޝާރާތްކޮށްލައިފިއެވެ.

“ލޯ ކައިރީ އަނދުންތައް ފޭދިފައި ހުރީ… ތިހެން ހުރެގެން ބައްޕަ ކުރިމައްޗަށް ދިޔައިމާ ބައްޕަ ހީކުރާނީ އަހަރެން އައިލީ ރޮއްވަނީކަމަށް… އަހަންނަކީ އެހާ ހަރުކަށި މީހެއްނޫނޭ… ވަނަން ހަދައިގެން ދިމާކުރީމަވެސް އަހަރެން މިހުރީ އެކަން މައްސަލައަކަން ނުހަދާ މައާފުދީގެން…” ޒެލް އޭނަގެ އިޝާރާތް އިތުރަށް ތަފްސީލުކޮށްލަދިނުމާއިއެކު އައިލީގެ މޫނު ރަތްވެގެންދިޔައެވެ. އޭނައަށް ވަގުތުން ވޯކިން ކްލޯ ސެޓާއި ދިމާލަށް ހިނގައިގަނެވުނެވެ. އެވަގުތު ޒެލް ވާހަކަ ދެއްކުމާއިއެކު އައިލީގެ ހިތަށް އަރާފައިބައިގެން ދިޔަ ބަސްތައް ހިފަހައްޓާލުމަށް ދަތްތަކަށް ބާރުކޮށްލަންޖެހުނެވެ. އޭނައަށް އިނގެނީ ޒެލްގެ ކުރިމަތީގައި އޭނަ އުޅޭހާ ދުވަހު ޒެލް އޭނަގެ ކުށް ތަކުރާރުކޮށް އޭނައަށް ހަނދާންކޮށްދޭނެކަމެވެ.

”އިނގެއޭ އަހަރެންގެ ރީތިކަމުންވެސް އަންހެންކުއްޖަކަށް އޮޅިދާނެކަން… މިހާ ހޭންޑްސަމް ރީތި ސީއީއޯއެއް ހުންނާނީ ކޮން ކޮމްޕެނީއެއްގައިތަ؟” އެވަގުތު ޒެލްގެ އަމިއްލަ ނަފްސާއި ކަހަލަގޮތަކަށް ވާހަކަ ދެއްކިއިރު އެއަޑުގައިވީ ފޮނިކަމާއި ފަޙުރުވެރިކަން ފާހަގަކުރެވިފައިވެސް އައިލީއަށް އަނގަޔަށް ގޮތެއް ހަދާލެވުނެވެ.

“ނާރސިސްޓް… އަމިއްލަ މީހާއަށް މީހާ ފެނިފައި ހުންނަ ފިރިހެނެއް…” އައިލީ ކިތަންމެ މަޑުން ބުނެލިޔަސް އެ ބަސްތައް ނުހަނު ސާފުކޮށް ޒެލްގެ ކަންފަތާއި ހަމަޔަށް ފޯރިއެވެ.

ކްލޯސެޓްގެ ތެރެއަށް އައިލީ ވަދެގެން ދިޔަތަން ދެކެން ހުރެފައި ޒެލްއަށް އެއްމިޔަކަނިން ހިނިތުން ވެވުނެވެ. ޖީބަށް ޖަހާލެވިފައިވީ އަތްތިލަ ނަގާ ކަނދުރާއާއި ހިސާބުގައި ހިންގާލަމުން އޭނަ ބިއްލޫރި ބިތުން ބޭރަށް ނަޒަރު ހުއްޓާލިއިރު އެ މޫނުމަތީން ތަފާތު އަސަރެއް ފާޅުވެލިއެވެ.

*****************

ހަވީރުވަމުން އައި ވަރަކަށް ފަޒާގައިވީ ދިލަހޫނުކަން މަޑުވަމުންދިޔައެވެ. އިރުވެސް އޭގެ މަޤާމުން ތިރި އަށް ޖެހިލިއިރު ދުނިޔެމަތީން ފާޅުވަމުންދިޔަ ހިޔަނިތައް ފަޑުވެލައިފިއެވެ. އެލެގެންޓްސް ބިއްލޫރި ބިތްތަކުގެ ބްލައިންޑްސްތައް ކަހާލާފައި ވުމުން ފަނޑުވަމުންދިޔަ އިރުގެ ދޯދިތަކުގެ އަލިކަން އިމާރާތުގެ ތެރެ އަށް އެޅިފައި އޮތެވެ. މިލާން އެލެގެންޓްސްގެ ދިގު ކޯރިޑޯއިން ހިނގާލައިފައި އައިރު ވަށައިގެންވީ ކޮންމެ ދިމާލަކަށް ނަޒަރު ހުއްޓުނެވެ. ޑަސްޓީ ޕިންކްކުލައިގެ ގަޔަށް ބާރު ޕެންސިލް ހެދުންކޮޅުގައި މިލާން ފަރިކަމުން މޮޑެލްއަކަށް ދޫނުކުރެއެވެ. ކަނދުރާއާއި ހަމަޔަށް ކޮށާލައިފައި އޮތް ރަންކުލަ އަކަށްދާ ބުޅި އިސްތަށިގަނޑުގެ ތެރެއިން އެ މޫނު ފެންނަނީ ހަނދެއް ފަދައިންނެވެ. ހިސާބަކަށް ކުލަފަޑުވެފައިވާ މޭކަޕް އާއި ގަހަނާތަކުންވެސް ފެންނަނީ އެންމެ ޒަމާނީ ވިދުވަރެެވެ. ކޯރިޑޯގެ ވަކި ހިސާބަކަށް އައިސް ހުއްޓިލީއިރު ކޮންމެ އަދާއެއްގައިވީ ފަރިކަމާއިއެކުވެސް އެދެލޮލުގައިވީ ތަފާތު ސިއްރުވެރި ކަމެކެވެ.

“ދުނިޔޭގައި އެންމެ އަވަހަށް ފާއިތުވެގެންދާ އެއްޗަކީ އަދި އަނބުރާ ގެނެވުމެއްވެސް ނެތް އެއްޗަކީ ވަގުތު…” ބިއްލޫރި ބިތުގެ ފުރަގަހުން އޮރެންޖް ބޯޅައެއް ފަދައިން ފެންނަމުންދިޔަ އިރާއި ދިމާލަށް ބަލަހައްޓައިގެންހުރެ މިލާން އަމިއްލަށް ނަފްސަށް އަޑުއިވޭވަރަށް ވާހަކަދެއްކިއިރު ސިކުންތުކޮޅަކަށް އެ ދެލޮލުން ރިހުމެއް ފާޅުވެލިއެވެ. ނަމަވެސް ނުހަނު މޮޅަށް އެއަސަރުތައް ފަރުދާކޮށްލަމުން ދެވަނަ ސިކުންތުގައި މިލާން ހިނިތުންވެލައިފިއެވެ. އޭނަ ނުހަނު ފަރި ހިންގުމެއްްގައި އައިސް ކޯރިޑޯގެ ނިމޭ ކޮޅުގައި ހުރި ކޮންފަރެންސް ރޫމްގެ ދޮރުހުޅުވާލުމާއިއެކު އެތައް ބައެއްގެ ނަޒަރު އެ މޫނަށް ދަތުރު ކުރިއެވެ.

އެލެގެންޓްސްގެ ކޮންފަރެންސް ރޫމްވެސް ނުހަނު ތަނަވަހެވެ. މަޑުނޫކުލައާއި ހުދުކުލައިން ރޫމްގެ ފާރުތައް ފަޅުފިލުވާ ލައިފައިވާއިރު އެއްބިތް އެކީހެންވަނީ ސާފު ބިއްލޫރިންނެވެ. ބިސްބުރުގެ ބައްޓަމަށްވާ ބޮޑު މޭޒެއް މެދަށްވާހެން ބަހައްޓާފައިވާއިރު މިވަގުތުގައިވެސް ބައެއް ޒުވާނުން މޭޒުކައިރީގައި އިށީދެލައިގެން ތިއްބެވެ. ހިޒްޔާން މޭޒާއި ދިމާ ކުރިމައްޗަށްވާގޮތަށް އަޅުވާލެވިފައިވާ ސްކްރީންގެ ކުރިމަތީގައި ހުރެފައި ދޮރުހުޅުވުނު އަޑަށް ބަލާލުމާއިއެކު ކުޑަކޮށް ބުމަގާތްވެގެންދިޔައެވެ.

“އޯޙް… މިލާން… އާދޭ… އެތެރެއަށް…” އައިކަން ކަންނެތްގޮތަކަށް ގޮނޑިއަށް ވެއްޓިގަނެގެން އޮވެފައި ދޮރުހުޅުވުނު އަޑަށް ކުޑަކޮށް ގޮނޑިއަނބުރާލަމުން ބަލާލައިފިއެވެ. ދޮރުމަތީގައި މަޑުކޮށްލައިގެން ހުރި މިލާން ފެނުމާއިއެކު އޭނަ ގޮނޑިން ތެދުވިގޮތަށް މިލާންއަށް އެތެރެއަށް ވަނުމަށް ދައުވަތުދިނެވެ. އޭރު ހިޒްޔާން ހުރީ ޕޯޑިއަމްގެ ދެފަރާތުން އަތްވިއްދާލައިގެން އައިކަންއާއި ދިމާލަށް ސުވާލުގެ ނަޒަރަކުން ބަލަހައްޓައިގެންނެވެ.

“ޒޭން… މީ މިލާންް… އަހަރެމެންގެ ޕީއޭއަކަށް އިންޓަރވިއުކުރިކަން އިނގެެއެއްނު… މިލާން… މިއީ ހިޒްޔާން އައިޝަމް… މިކުންފުނީގެ ސީއޯއޯ އަދި ވަގުތީ ޗެއަރމަން…” އައިކަން މިލާންގެ ތަޢާރަފެއް ދިނުމާއިއެކު ހިޒްޔާންގެ ދެބުމަގޮށްޖެހިގެން ދިޔައެވެ. އެ މޫނުމަތީން ފާޅުވެގެންދިޔަ ރުޅިވެރިކަމާއިއެކު ދަތް ތަކަށް ބާރުކޮށްލަމުން ހިޒްޔާން ދުރުބަލާލައިފިއެވެ. ފުރަތަމަ ފަހަރުންވެސް އައިކަން އެފަަދަ ޒިންމާދާރު މަޤާމަކަށް މިލާންފަދަ ކުއްޖެެއް ހޮވާނެ ސަބަބު އޭނައަށް ނަގަައިގަނެ ވުނެވެ. ރީތި ބުރުސޫރައިގެ އިތުރުން އެއްވެސް ރީތި ސިފައެއް ދެއްވާފައިހުރި އަންހެންކުއްޖެއް ނޫނެވެ.

“ޒޭންއަށް މިއަދު މީޓިންގައި ބައިވެރިނުވެވުނީމަ މިލާން ޖޮއިންކުރިކަން ނޭނގުނީ…” އައިކަން އިތުރު ތަފްސީލުދިނަސް އަޑުއެހުމަކީ ހިޒްޔާންއަކަށް މުހިންމުކަމަކަށްނުވިއެވެ. އޭނަ ހިތްހަމަނުޖެހިފައި ހުރިވަރުން  އައިކަން ވާހަކަދައްކަނިކޮށް ސްޓޭޖްމަތީން ފޭބިގޮތަށް މިލާންގެ މޫނަށް އަލިފާނުގެ ނަޒަރެއްދެމުން ދޮރާއި ދިމާލަށް ދިޔައެވެ.

“ޒޭން…” އައިކަންއަށް އިތުރު އެއްޗެކޭ ނުބުނެވެނީސް ހިޒްޔާން ކޮންފަރެންސް ރޫމްގެ ބޭރަށް ނިކުތް ގޮތަށް ދޮރުލައްޕާލި އަޑު ކޮޓަރިތެރޭގައި ގުގުމާލައިފިއެވެ.

“ސޮރީ… ޒޭން ކުޑަކޮށް މޫޑީވާނެ… މާބޮޑަށް އެކަމާއި އަޅާލާނެކަމެއްނެތް… ދެން އެންމެ ރަނގަޅު މިލާން ދިޔަޔަސް… ޒޭންއާއި ބައްދަލުކޮށްދޭންވެގެން މަޑުކޮށްލަން ބުނީ…” އައިކަން ވާހަކަދެއްކިއިރު މިލާންއަށް ހުރެވުނީ އަނގަހަދާލައިގެން ނެވެ. ހިޒްޔާންގެ ފޮނިކަމާއި ބޮޑާކަން ފުރަތަމަ ރަސްމީ ބައްދަލުވުމުންވެސް ދައްކާލަދިނީތީ އޭނަ ހުރީ ނުހަނު ބޮޑަށް ފޫހިވެ ރުޅިގަދަވާގޮތްވެފައެވެ. މުއްސަނދިކަމާއިއެކު ފޮނިކަމެއްވެސް ދެއްވާފައިހުންނަ ފިރިހެނެކެވެ. އެ ފޮނި ބޮޑާ މިޒާޖު ދޫކޮށް ހިޒްޔާން އޭނަގެ ފައި މައްޗަށް ތިރިވެ އާދޭސްކުރާނޭ ދުވަހެެއް ނުދެއްކިއްޔާ އޭނަގެ ނަމަކަށް މިލާންއެއް ނުކިޔާނެެ އެވެ. ސިކުނޑިއަށް ވެރިވެގެން އައި ނުސިޔާނު ހިޔާލުތަކުންވެސް މިލާންގެ ތުންފަތްމައްޗަށް ހިނިތުންވުމެއް ގެނުވިއެވެ.

“މިލާން…” ހިޔާލަކަށް ގެއްލެމުންދިޔަ މިލާންގެ ސަމާލުކަން ހޯދަން އައިކަންއަށް ދެތިން ފަހަރަކު ގޮވާލަންޖެހުނެވެ. އޭރު އައިކަންއަށް ހުރެވުނީ ޝައްކުގެ ނަޒަރަކުން މިލާންގެ މޫނަށް ބަލަހައްޓައިގެންނެވެ. ހިޒްޔާން އެއްވެސް ސަބަބަކާއިނުލާ އެއްވެސް މީހަކުދެކެ ރުޅިނާންނާނެކަން އޭނައަށް އިނގެއެވެ. ވީއިރު މި ނުދަންނަ އަންހެންކުއްޖާދެކެ ހިޒްޔާން ރުޅި އަންނަން ޖެހޭ ސަބަބަކީ ކޮބާބާވައެވެ.

“ލައްބަ ސަރ…” މިލާންއަށްވެސް އައިކަންގެ ނަޒަރުގައިވާ ތަފާތުކަން ފާހަގަކުރެވުނީ ކަންނޭނގެއެވެ. އެ މޫނުމައްޗަށް ހިނދުކޮޅެއްގެތެރޭގައި ވެރިވެގެން އައި ނުތަނަވަސްކަމާއިއެކު ވަގުތުން ކޮންފަރެންސް ރޫމްއިން ނިކުންނަން ހިނގައިގަތެވެ. އައިކަންވެސް ހުސްވަގުތުކޮޅެއް ބޭނުންވާކަމުގެ ބަހަނާގައި ބޭރަށް ނުކުމެލީ ވިސްނުންތަކާއިއެކު މަސަައްކަތަށް އެދެވިގެންވާ ސަމާލުކަން ދޭން އުނދަގޫވާނެކަން އިނގޭތީ އެވެ. އޭނަ ދިގު ކޯރިޑޯ އިން ލާފައި ލިފްޓްތަކާއި ދިމާލަށް ހިނގައިގަތަސް ވަކި ހިސާބަކުން ފިޔަވަޅު ތައް ހުއްޓާލަން ޖެހުނެވެ. އޮއްސެމުންދިޔަ އިރުގެ ދޯދިތަކުން ކޯރިޑޯގެ ބެލްކަންޏަށް އެޅިފައި ހުރި ބިޔަ ހިޔަނި ފާހަގަކުރެވުމާއިއެކު އައިކަންގެ ފިޔަވަޅުތައް އެދިމާލަން ބެހެއްޓުނެވެ. އޭނަ ލަސްފިޔަވަޅުތަކެެއްގައި އައިސް ބެލްކަންޏާއި އަރާހަމާވީއިރު ހިޒްޔާން ހުރީ ރެއިލިންގައި އަތްވިއްދާލިގޮތަށް ބޭރަށް ނަޒަރު ހުއްޓާލައިގެންނެވެ. އައިކަންގެ ހިލަންވެގެންވެސް އޭނަ ފަސްއެނބުރިބަލާލާކަށް ހިޔާލެއްނުކުރިއެވެ.

“އަހަރެން ބޭނުމެއްނޫން އޭނަ އަހަރެންގެ ޕީއޭގެ ގޮތުގައި ހުންނާކަށް… އައިކް.. އޭނައަށް އަންގާ އަހަރެންގެ ކެބިން ތެރެެއިން ފެނިގެންނުވާނެކަން…” ހިޒްޔާން އައިކަންގެ ފިޔަވަޅުތައް ފާހަގަކުރެވުމާއިއެކު ވާހަކަދެއްކިއިރު އެއަޑުގައި ހިތްހަަމަ ނުޖެހުންވިއެވެ.

“ކޮބާ މައްސަލައަކީ ޒޭން…” އައިކަން ސުވާލުކުރިއިރު އަޑުގައި ސީރިއަސްކަންވިއެވެ. އޭނަ މަޑު މަޑުން ބެލްކަންޏަށް ނިކުމެގެން އައިސް ހިޒްޔާންއާއި އެއްހަމައެއްގައި ހުއްޓިލިއިރު އެ މޫނަށް ނަޒަރު ދަތުރުކުރިއެވެ. އެވަގުތު ހިޒްޔާން ވާހަކަދައްކަން އުޅެފައިވެސް ތުންފަތުގައި ދަތްއަޅާލަމުން އަނެއްކާވެސް ދުރަށް ނަޒަރު ބަދަލުކޮށްލައިފިއެވެ. މިލާންއާއި އޭނައާއި ދެމެދުގައި ހިނގާދިޔަ ހުރިހާކަމެއް ކިޔައިދީގެން އައިކަންގެ ދިމާކުރުންތަކުން ސަލާމަތްނުވާނެކަން މިއީ ދުވާލު ފަދައިން އޭނައަށް އިނގެއެވެ.

“ކޮންމެކަމަކަށް ސަބަބު އޮންނަން ޖެހޭތަ؟ އަހަންނަކަށް ނުބުނެވޭތަ ކަންކަން އިނގޭ ދުވަސްވީ މީހަކު ނަގާކަށް؟ ކޮއްކޮއެއްވަރުގެ އަންހެންކުއްޖަކު ނެގި ބޭނުން ނޭނގިގެން މަށެއްނޫޅެމޭ… މަށަށް އޭނަގެ ގޮތް އިނގޭތީ މި ބުނަނީ… އައިކް ބޭނުމިއްޔާ އޭނަ ބެހެއްޓިޔަސް އަހަރެންގެ ކެބިންއިން އޭނަ ފެނިގެންނުވާނެ…” ހިޒްޔާން ވާހަކަދެއްކިއިރު ކަތުރު ކަށިގަނޑަށް ބާރުވެގެންދިޔައެވެ. ކުންފުނީގެތެރެއިން މިލާން ފެނިގެން އޭނަގެ ތަބީއަތު ނުހަނު ބޮޑަށް ޚަރާބުވެފައިވެއެވެ. އެންމެ ބައްދަލުވުމަކުންވެސް އެ އަންހެން ކުއްޖާގެ ހުރި ލަދުކުޑަކަމާއި ގޮތެއްނެތްކަން އޭނައަށް ތަޖުރިބާކުރެވިފައިވެއެވެ. ދެވަނަ ފަަހަރަށް އޭނަ ދެކެން ބޭނުންނުވާފަދަ ޝަޙްސިއްޔަތެއްގެ ވެރި އަންހެންކުއްޖެކެވެ.

“އަސްލުވެސް ޒޭންގެ މައްސަލައެއް އުޅެނީތަ؟ އަހަންނަކަށް ނޭނގެ އަލަށް ފެނުނު އަންހެންކުއްޖެއްދެކެ ޒޭން ތިހާ ރުޅިއަންނަން ޖެހޭ ސަބަބެއް… ބުނެބަލަ… ކުރީންވެސް މިލާން ދަންނަނީތަ؟ ރަޝިއާގައި އުޅުނުއިރު އަހަންނަށް ނޭނގި ކަމެއް ހިނގާފައި އޮތީތަ؟” އައިކަންގެ ސުވާލާއިއެކު ހިޒްޔާންގެ ބުމަގޮށް ޖެހި މޫނަށް އަަރައިގެންދިޔަ ކުލަވަރުން އައިކަންއަށް ހައިރާންކަމެއް ލިބުނެވެ. އޭނަ ހިނދުކޮޅެއްވާންދެން ހިޒްޔާންގެ ހަރަކާތްތަކަށް ނަޒަރު ހުއްޓާލައިގެން ހުރެވުނީ ކަމެއް ދެނެގަންނަ ފަދައަކުންނެވެ. ލަސްލަހުން މާޒީވި ދުވަހެއް ހަނދާނުގައި ފިޔަޖަހާލުމާއިއެކު އައިކަންގެ ތުންފަތް ދެ ފަރާތަކަށް ދެމިލައިގެން ދިޔައެވެ. އޭނަގެ މޫނުމަތީގައިވީ ސީރިއަސްކަން ފިލާގޮސް އޭނަ ހިޒްޔާންގެ މޫނަށް ބަލާލީ ދިމާކޮށްލާފަދަ ގޮތަކަށެވެ.

”ޑޯންޓް ޓެލްމީ… ޒޭންގެ ޓްރޫ ލަވް…” އައިކަންގެ ޖުމްލަ ފުރިހަމަނުކުރެވެނީސް ހިޒްޔާން ބަދަލުކޮށްލި އިންޒާރުގެ ނަޒަރުންވެސް އައިކަންއަށް އޭނަގެ ހީވުންތައް ޔަގީންކުރެވިގެންދިޔައެވެ. “ޓްރޫ ލަވް” އެ ލަފްޒުން އެކަނިވެސް ހިޒްޔާންގެ ދަތްވިކިގެންދިޔައެވެ. މިލާންއަކީ ކާކުކަން ނޭނގޭއިރުވެސް އެ ލަފްޒު ބޭނުންކޮށްގެން އައިކަންވަނީ އޭނައާއި ދިމާކޮށް ފައެވެ.

“އޯވް… ތިހާ ނަފްރަތުކޮށްފައި އަދި ލޯބިވާނޭ ދުވަހެއް އަންނާނެކަން ޔަޤީން..” އައިކަންގެ ތުންފަތް މަތީން ފާޅުވެގެން ދިޔަ ފުން ހިނިތުންވުމާއިއެކު ހިޒްޔާންގެ ގައިގައި އެއްފަރާތުން ޖެހިގަތެވެ. އެވަގުތު ހިޒްޔާން ދުރަށް ޖެހިލަމުން ބަދަލު ކޮށްލި ހޫނު ނަޒަރުންވެސް އައިކަން ހިމޭންކޮށެއްނުލެވުނެވެ. އައިސްފައި ހުރި ފޯރިގަނޑުގައި އޭނަ ވަގުތުން ހަޅޭލަވައި ގަންނަމުން ހިޒްޔާންގެ ކޮނޑުގައި އެލިގަތެވެ.

“ޝަޓްއަޕް އައިކަން… ފެންނަހާ އަންހެންކުއްޖަކާއި މަށާއި އަޅުވާނުކިޔާށޭ ބުނެފީމެއްނު…” ހިޒްޔާން ރުޅިގަދަވާގޮތްވިއެވެ. ފެށުނީއްސުރެވެސް އަންހެންކުދިންނާއި އަޅުވާކިޔުމަށްވުރެ އޭނަ ރުޅިއަންނަ ކަމެއް ނެތެވެ. އޭނައަކީ ރީތިކަމަށް ފިދާވަމުން ލޯބި ބަހަމުންދުވާ ޒުވާނެއްނޫނެވެ. އެންމެ އަންހެންކުއްޖަކަށް ނޫނީ އޭނަ ހާސިލްކުރުމުގެ އުފަލެެއް ނުލިބޭނެއެވެ.

ހިޒްޔާން އިތުރަށް އެންމެ ވަގުތުކޮޅަކަށްވެސް އެތަނުގައި މަޑުކޮށްލާކަށް ބޭނުމެއްނުވިއެވެ. އޭނަ ނުހަނު ހަލުވި ފިޔަވަޅު ތަކެއްގައި ހިނގާލައިފައިގޮސް ލިފްޓަށް އެރިއިރުވެސް އެހުދު ދަތްތަކަށް ބާރުކޮށްލެވިފައިވެެެއެވެ. މަޑުމަޑުން ލިފްޓުގެ ބިތުގައި އަތްވިދާލަމުން އޭނަ އަމިއްލަ ނަފްސު ހަމަޔަަކަށް އަޅުވާލަން ފުން ނޭވާއެެއް ދޫކޮށްލިއެވެ. އެއާއިއެކު ލަސްލަހުން ކަރުގައިވީ ޓައިއަށް ދަމާލަމުން އޭނަ ދެލޯ މަރާލައިފިއެވެ.

****************

މެންދަމުގެ ވަގުތު ގާތްވެގެން އައިރު އުޑުމަތީގައި ވިދަމުންދިޔަ ތަރިތަކުގެ ވިދުން ފަނޑުކޮށްލާ އުޑުމަތީގައި އަޅިފުސް ކުލައިގެ ސާލެއް އޮޅާލައިފިއެވެ. މެހެލްގެ ގޯތިތެރޭގައި ދެމެމުންދިޔަ ފެންގަނޑުގައި ހިމަ ވާރޭ ތިކިތަކުން ބާނީލައްވަމުން ދިޔައެވެ. ނުހަނު ލޮލަށް ފަސޭހަ އައްޔަކުން މެހެލްގެ ބޮޑު އިމާރާތް ދިއްލާ ލެވިފައިވާއިރު ބަގީޗާއަށް ފޭދިފައިވާ ރީނދޫ ކުލައިގެ ފަނޑު އަލިކަމުގައި ވާރެއާއި ތެމިފައިވާ ގަސްތައް ފެންނަމުންދިޔައީ ހުވަފެނެެއްހާ ފުރިހަމަކޮށެވެ.

އައިޝަމްގެ މާސްޓަރ ބެޑްރޫމްގެ ދޮރުފޮތިތައް ކަހާލާފައިވުމުން ވާރޭ ތިކިތަކުން ފުސްވެފައިވާ ބިއްލޫރި ގަނޑުގެ ފުރަ ގަހުން ބަގީޗާގެ ފެހިކަން ފެންނަމުންދިޔައެވެ. އައިޝަމް އިރުކޮޅެއްވަންދެން ބޭރުބަލަން ހުރެފައި ކުޑަދޮރު ލައްޕާލިއިރު އެ މޫނުމަތީގައި ކުދިކުދި ފެންތިކިތައް ވިދަމުންދިޔައެވެ. ކަނޑުނޫކުލައިގެ ނިދާ ކުރުތާއާއި ހަރުވާޅުގައި އައިޝަމް ހުރިއިރު އެލޮލުގައި ނިދީގެ ކުޑަވެސް އަސަރެއްނެތެވެ. ފުރަ މެންދަމުގެ މިފިނިކަމާއިއެކު ކޮޓަރިތެރޭގައިވާ ހުސްކަން އޭނަގެ ނަފްސަށް އުނދަގޫކުރަމުންދިޔައެވެ. ކުޑަ ދޮރުގެ ވަށައިގެން ދަމާލެވެން އިން ފަރުދާގައި ހިފަހައްޓާލަމުން އައިޝަމްއަށް ލަސްލަހުން ދަތްތަކުން ތިރީ ތުންފަތުގައި ހިފަހައްޓާލެވުނެވެ. މިފަދަ ފިނި ރޭރޭގެ ފަޅުކަން އޭނައަށް އިހުސާސްކުރެވެނީ ފުން ވޭނެއްފަދައިންނެވެ. ހަޔާތުގެ މިފަދަ އެތައް ރެއެއްގައި ހަނދާންތަކުގައި މުޅިއުމުރަށް އޭނަ ތެޅިފޮޅެން ޖެއްސުމަށްފަހު މިޝްޔާވަނީ އޭނަގެ ހަޔާތާއި ވަކިވެގެންގޮސް މާދުރުގައެވެ.

“މިޝްޔާ… ކީއްވެ؟” ދޫމައްޗަށް ގެނެވުނު ތިންއަކުރުގެ ނަމާއިއެކު އައިޝަމް ފެންކަޅިވެގެންދިޔައެވެ. ލަސްލަހުން އެސްފިޔަތަކުގެ ތެރެއިން ފުރޭނިގެން އައި ކަރުނަަތައް ކޯތާފަތް ދޫކޮށްދިޔައިރު އައިޝަމްއަށް މަޑުމަޑުން މޫނުގައި އަތް ޖައްސާލެވުނެވެ. ކަރުނައިގެ ތެރެއިން އޭނަ ހިނިތުންވެލަން މަސައްކަތް ކުރިއެވެ. މިޝްޔާ މިއަދު ދުނިޔޭގައިނެތަސް މިޝްޔާ އޭނަގެ އަތްމައްޗަށް ދޫކޮށްލައިފައިދިޔަ ނިޝާންކަމުގައި ވީ ދަރިފުޅުގެ ހައްޤުގައިވެސް އޭނަ ހިނިތުންވެލަން މަޖުބޫރުވެފައިވެއެވެ.

ކުޑަދޮރުގެ ފަރުދާތައް ކަހާލިގޮތަށް އައިޝަމް ދެލޯ މަރާބާރުކޮށްލަމުން ފާރާއި ދިމާލަށް މޫނު އަނބުރާލިއެވެ. އިރުކޮޅެއް ވާންދެން އެހެން ހުރުމަށްފަހު އަވަސްފިޔަވަޅުތަކެއްގައި އޭނަ ކޮޓަރި ދޮރާއިދިމާލަށް ހިނގައިގަތެވެ. މާޒީގެ ފޮނި ހަނދާން ތަކުގައި ބެހިގެންގޮސް އޭނަގެ ނަފްސު ބަލިކަށިވުމަކަށް އޭނަ ނޭނދެއެވެ.

އައިޝަމް ލަސްފިޔަވަޅުތަކެއްގައި މަތީބައިގެ ކޯރިޑޯއިން ހިނގާލާފައިއައިރު މުޅި ގޭތެރޭގައިވަނީ އޮރެންޖް ކުލައިގެ ފަޑު އަލިކަމެކެވެ. މުޅި ކޯރިޑޯއާއި ލިވިންރޫމް ހިމޭންވެފައި އޮތްއިރު ޖެހެމުންދިޔަ ބާރުވަޔާއި އެއްވަރަށް ކުޑަދޮރުގެ ފަރުދާތައް ހެލެމުންދާ އަޑު އިވިލަ އިވިލާ ހުއްޓެވެ. އައިޝަމް ކުޑަ ދޮރުގެ ދިގު ފަރުދާތައް ވަޔާއި ނުހޫރޭނެހެން ހައްޔަރުކޮށްލުމަށް ފަހު ޔޫލީންގެ ކޮޓަރީގެ ދޮރުހުޅުވާލިއެވެ. ގަނޑުކޮށްލާފަދަ ފިނިކަމެއް ހަމުގައި ބީހިލާފައިދިޔައިރު އައިޝަމްއަށް ދެފަރާތަ ކަށް ބޯހޫރާލެވުނެވެ. ޔޫލީން މިވަގުތު ކޮޓަރީގައި ނެތަސް ކޮޓަރިއަށް ވަންނަގޮތަށް ފިނިބޮޑުވެގެން އުޅޭނެކަން އިނގޭތީވެ އޭނަ އެނދުގެސައިޑް ކަބަޑްމަތީގައި އޮތް ރިމޯޓް ނެގިގޮތަށް އޭސީގެ ފިނިމިން މަތިކޮށްލިއެވެ. އައިޝަމް އެ ކޮޓަރިން ނިކުމެފައި ހިޒްޔާންގެ ކޮޓަރިއަށް ނަޒަރު ހުއްޓާލިއިރު ހިޒްޔާންއާއި އޭނަގެ ހީނަރުވަމުން އަންނަ ގުޅުމާއިމެދު ވިސްނާލާ ފައި ފުންނޭވާއެއް ދޫކޮށްލެވުނެވެ. އޭނަ ކޮންމެގޮތަކަށް ކަންތައްކޮށްދިނަސް ހިޒްޔާން ހުރީ އޭނަގެ ފަރާތުން އެއްވެސް ކަމެއް ބަލައިގަންނަފަދަ ގޮތަކަށް ނޫންކަން މިވީ ދުވަސްތަކުންވެސް އޭނައަށް އިނގިފައިވެއެވެ. އިރުކޮޅެއްވާންދެން އެ ކޮޓަރިއަށް ނަޒަރު ހިންގަން ހުރުމަށްފަހު އައިޝަމް ލިވިންރޫމްއަށް ފޭބެން އިންނަ ސިޑިއާއި ދިމާލަށް ހިނގައިގަތެވެ.

ދަންވަގުތެއްކަމުން މިވަގުތު ލިވިންރޫމްގައި ރަސްކަންކުރަމުންދިޔައީ ހަމަހިމޭންކަމެވެ. ލިވިން ރޫމްގައިވީ ހިމޭންކަމުގެ ތެރެއިން ކުދިވެރީންނާއި ޒައިތޫން ވާހަކައިގެ އަޑު މަޑުމަަޑުން އިވެމުންދިޔައެވެ. ލަސްލަހުން ސިޑިން ފޭބި އައިޝަމްގެ ތުންފަތްމައްޗަށް ވެރިވެގެން އައި ލުއި ހިނިތުންވުމާއިއެކު ފިޔަވަޅުތައް ސިޑި އާއި އެންމެ ކައިރިއަށް އިން ކޮޓަރިއާއި ދިމާލަށް އަމާޒުވެގެންދިޔައެވެ. ޗާންދަލިއާގެ ފަނޑުއަލިކަމުގައި ވިދަމުންދިޔަ އޮމާން މާބްލްސްތައްމަތީގައި ހިނގާލާފައި ގޮސް އޭނަ ޒައިތޫންގެ ކޮޓަރީގެ ދޮރުގައި މަޑުމަޑުން ޓަކި ދިނުމާއިއެކު އެ ކޮޓަރިން އިވެމުންދިޔަ އަޑުތައް ކެނޑި ހިނދުކޮޅަކަށް ހިމޭންކަމެއް ވެރިވެގެން ދިޔައެވެ. އެއާއިއެކު އައިޝަމް ލަސްލަހުން އެ ބިޔަ ދޮރުގައި ހިފާ ހުޅުވާލިއިރު އެނދުމަތީގައި އިށީދެލައިގެން ތިބި ތިން އަންހެން ކުދީންނާއި ޒައިތޫންގެ ނަޒަރު އެ މޫނަށް ދަތުރުކުރިއެވެ.

“އައިޝަމް… ދަރިފުޅު ކަމަކަށް ބޭނުންވީތަ؟” އެފަދަ ވަގުތަކު އައިޝަމް ފެނުމުންވެސް ދަރިފުޅަށް ޙިދުމަތްކޮށްދޭން ޒައިތޫންއަށް އަވަސްވެގަނެވުނެވެ. ޒައިތޫންގެ ބަލިކަށިވެފައިވާ ބުރަކަށި ވަގުތުން ސީދާ ވެގެންދިޔަގޮތުން މަންމަ އޭނައަށް މުހިންމުކަންދޭވަރު އައިޝަމްއަށް އިހުސާސްކުރެވުނެވެ.

“ނޫނޭ މަންމާ… އަޅުގަނޑު ނިދަންދަމުން ޔޫލް ކޮޓަރީގައި ނެތީމަ ބަލާލީ… ދަރިފުޅުމެން މާމަ ލައްވާ ވާހަކަ ކިޔުއްވާ ރެއަކީތަ؟” ޔަލާއާއި އައިލީ މާމަ ޒައިތޫން ދެފަރާތުން ކޮނޑުގައި ބޯ ޖައްސާލައިގެން އެނދުގެ ފަޑިއަށް ލެގިލައިގެން ތިބިއިރު ޔޫލީން ޒައިތޫންގެ އުނގު އަމިއްލަކޮށްލައިގެން އޮތް ގޮތުން އައިޝަމްއަށް މާޒީ ހަނދާންވާގޮތްވިއެވެ. އެގޮތަށް މަންމަ ލައްވާ ވާހަކަކިޔުއްވަން ތިބުމަކީ އޭނައާއި ދޮށީ ދެދައްތައިންގެވެސް ކުޑައިރުގެ އާދައެކެވެ. އޭރުވެސް އައިޝަމް ގަދަދައްކާލައިގެން މަންމަގެ އުނގުގެތެެރެއިން ޖާގަހޯދުމުގައި ކާމިޔާބުކުރެއެވެ. އޭނަ އުފަންވީއްސުރެ ބޮޑުވުމާއި ހަމަޔަށްވެސް މަންމަގެ އުނގާއި ހަމަޔަށް އެހެން ކުއްޖަކަަށް އާދެވުނަކަނުދެއެވެ. ކުޑައިރުގެ އުފާވެރި އެ ދުވަސްތައް ހަނދާންވެގެން އައުމާއިއެކު އައިޝަމްއަށް ހިނިތުންވެވުނެވެ.

“ދަރިފުޅު… ގުޅައިފިންތަ؟” އިރުކޮޅެއްވާންދެން އައިޝަމްގެ ހަރަކާތްތައް ދެކެން އިނުމަށްފަހު ޒައިތޫން ސުވާލުކޮށްލިއިރު ފުރިހަމަ ސަމާލުކަން އައިޝަމްއަށް ދެވިފައިވެއެވެ. ކުދީން ތިބުމުން ޒައިތޫން މާބޮޑު ތަފްސީލަކަށް ނުދިޔަނަމަވެސް މަންމަގެ ސުވާލު އައިޝަމްއަށް ނަގައިގަނެވުނެވެ. އެ ސުވާލާއިއެކު އައިޝަމް ހިނދުކޮޅަކަށް ހިމޭންވާގޮތްވިއެވެ.

“އަޅުގަނޑު ގުޅިން… ފޯނެއް ނުނެގި…” އައިޝަމް ވާހަކަަދެއްކިއިރު އެ މޫނުމަތީން ޒައިތޫން ހީކުރިފަދަ އަސަރެއް ނުފެނުނެވެ. ފާއިތުވެގެންދިޔަ އަހަރުތަކުގައި ޝެރީންގެ ފަރާތުން އޭނަ އެއްވެސްކަމަކަށް އުންމީދުނުކުރާނެހާ ބޮޑަށް އޭނައަށް ޝެރީން ދަސްވެފައިވެއެވެ. އޭނައަކީ ޝެރީންގެ ފިރިމީހާއަށް ވިޔަސް ޝެރީންގެ މައްޗަށް އޭނަގެ އަމުރުތައް ހިނގަނީ ހަމައެކަނި ޝެރީން އެކަމަށް ބޭނުންވާ ހިނދެއްގައިކަން އޭނައަށް އިނގެއެވެ.

“މަންމައަކަށް ހިޔެއްނުވޭ ހިޒް ގެއަށް އައިހެނެއް… ކޮންމެ ރެއަކު ދަންކޮށްފައި ހިޒްޔާން ދާތަނެއް ދަރިފުޅަށް އިނގޭތަ؟” އައިޝަމްގެ ފަރާތުން ލިބުނު ޖަވާބުން ޝެރީންއާއިމެދު ހިތްހަަމަ ނުޖެހޭގޮތްވިޔަސް އެ ވާހަކަކުރިއަށް ގެންދާކަށް ޒައިތޫން ގަސްތެއްނުކުރިއެވެ. ކުދީންނަށް އަޑުއިވޭ ހިސާބެއްގައި އެފަދަ ވާހަކައެއް ދައްކަން ބޭނުންނުވާތީ އޭނަ މައުޞޫއު ބަދަލު ކޮށްލިއެވެ.

“ހިޒް ދާތަނަކަށް ދާނީ އައިކްއާއިވެސް އެކީ… މަންމަ ހިޒް އަންނަންދެން މަޑުނުކޮށް ނިދާލާ… ހިޒް ގެއަށް ނައިސް ލަސްވަންޏާ އަޅުގަނޑު ގުޅާލާނަން…” ހިޒްޔާންގެ އިންތިޒާރުގައި މަންމަ ރޭގަނޑުގެ ނިދި ނަގާލާފައި ހޭލާ އިންނާކަށް އައިޝަމް ނޭދެއެވެ. އޭނައަށްޓަކައި މިއަދާއި ހަމަޔަށްވެސް މަންމަވަނީ ހިޒްޔާންގެ އެތައް ޒިންމާތަކެއް އުފުލާފައެވެ. މި ދުވަސްކޮޅު ހިޒްޔާން ދަންވަރު ބޭރަށް ދިޔުން ގިނަވެފައިވާކަން ފާހަގަވެފައިވިޔަސް އައިޝަމް އެއްޗެއްް ނުބުނަން ގަސްތު ކޮށްފައިވަނީ އޭނަ ގޮތްކިޔައިގެން ރަނގަޅު ނަތީޖާއެއް ނުނިކުންނާނެކަން އިނގޭތީއެވެ. އެހެންނޫނަސް ދަރިފުޅުގެ މައްޗަށް އޭނައަށް ފުރިހަމަ އިތުބާރު އޮވެއެވެ.

އައިޝަމްއާއި ޒައިތޫން ހިޒްޔާންގެ ވާހަކަދައްކަމުންދިޔައިރު ޒައިތޫންގެ ކޮނޑުގައި ބޯއަޅާލައިގެން އައިލީއަށް އޮވެވުނީ އެ ވާހަކަތައް އަޑުއަހަން ކަންފަތް ހުޅުވާލައިގެންނެވެ. ހަފްތާ ބަންދާއި ދިމާކޮށް ޔަލާއާއި ޔޫލީން އެއްބައިވެގެން މެހެލްގައި މަޑުކުރާގޮތަށް ރޭވުމުން އައިލީ ޔަލާމެންނާއި ބައިވެރިވާން ނިންމީވެސް އޭނައާއި ހިޒްޔާންގެ ދެމެދަށް އައިސްފައިވީ ދުރުކަމަށް ނިންމުމެއް ގެންނަން ބޭނުންވީވަރުންނެވެ. ފާއިތުވެގެންދިޔަ ދުވަސްތަކުގައި އޭނަ މެސެޖްގެ ޒަރިއްޔާއިން ހިޒްޔާންގެ ގާތުން އެތައްފަހަރަކު މައާފަށް އެދިފައިވެއެވެ. އެތައް ފޯންކޯލްތަކަކަށްފަހުވެސް ހިޒްޔާން ހުރީ އޭނައާއި ވާހަކަދައްކާގޮތަަކަށް ނޫނެވެ. އެ ދެމެދުގައިވީ ހިމޭންކަމުގެ ފާރުބޯވަމުންދާއިރު ފާއިތުވެގެންދާ ކޮންމެ ދުވަހަކާއިއެކު އޭނަގެ ކެތްތެރިކަންވެސް ކޮޅުންލަމުންދަނީއެވެ.

ދަރިފުޅުމެން މާލަސްވަންދެން މާމަ ލައްވާ ވާހަކަ ކިޔުއްވަން ނުތިބެ ނިދަންވާނެ އިނގޭ… މާމަ މާބޮޑަށް ވަރުބަލި ވެދާނެ… އަނެއްކާ ފަތިހު ހޭލަންވެސްޖެހޭނެއެއްނު…” އައިޝަމް ވާހަކަދެއްކިއިރު އޭނަ ނަޒަރު ތިން އަންހެންކުދީންނަށް ހުއްޓިފައިވިއެވެ. އަމިއްލަ ދަރީންނެކޭ އެއްފަދައިން އޭނަގެ ދައްތަގެ ދަރީންނާއި އެކުވެރިޔާގެ ކުދީންނާއިމެދުވެސް އައިޝަމް އަބަދުވެސް ގާތްކަމެއް ބަހައްޓައެވެ. އޭނަގެ ދެދައްތަ އާއި ރަޒްދާން އޭނަގެ ހަޔާތަށް ވެދީފައިވާ އިޙުސާންތެރި ކަމުގެ ބަދަލު ދުވަހަކުވެސް ދެވިދާނެ ކަަމަށް އޭނައަކަށް ޤަބޫލެއްނުކުރެއެވެ. މުޅިއުމުރަށްވެސް އޭނަގެ އާއިލާއަށް އޭނަ ދަރަނިވެރިވެފައިވެއެވެ.

ރޭގަނޑުގެ ސަލާމްކޮށްލުމަށްފަހު އައިޝަމް ޒައިތޫންގެ ކޮޓަރިން ނިކުތްއިރު ފަރުދާތައް ހިއްލާލެވިފައިވާ ކުޑަދޮރުތަކާއި ދިމާލުން ބޭރަށް ކަޅިދަތުރުކުރިއެވެ. ހިނދެއް ހިނދަކަށް މޫސުން ގޯސްވަމުން އަންނަ ކަމުގެ ނިޝާންތައް ދުނިޔެމަތީން ފާޅުވަމުންދިޔައެވެ. ވެހެމުންދިޔަ ވާރޭ ހުއްޓާލާފައި އޮތަސް އުޑުމަތި އޮތީ ނުހަނު ބަނަކޮށެވެ. ގަސްތައް ވަޔާއި ހޫރެމުން ދިޔައިރު މާހައުލުގައި ޒޫން އަޑު ލައްވާލައިފައިވެއެވެ.

*****************

ދަންވަމުން އައިވަރަަކަށް ފަޒާގައިވީ ތެތްފިނިކަން ގަދަވަމުން އައެވެ. ޖެހެމުންދިޔަ ވައިރޯޅިއަކާއިއެކު ކަށިތައް ތޮރުފާލާފަދަ ފިނިކަމެއް ޖައްވުގައި ހިފާލައެވެ. ކަޅުސާލެއްފަދައިން އޮތް އުޑުމަތީގައި ވިލާތައް ބޯވަމުންދިޔަގޮތުން ކޮންމެ ވަގުތަކުވެސް ވާރޭ ތިކިތަކުން ބިންގަނޑު ތެންމާލަފާނެކަހަލައެވެ.

ރޭގަނޑުގެ ޑިއުޓީ ނިމުމާއިއެކު ޔުމްނު “އެމެރިކާނޯ”ގެ އިމާރާތުން ނިކުމެގެން އައިރު ފިނީގެ ސަބަބުން އެ ދޮން ކޯތާފަތް ކޮންމެވެސްވަރަކަށް ރަތްވެފައިވެެއެވެ. ކޮނޑުގެ އެއްފަރާތަށްވާނެހެން އަޅުވާފައިވާ އަތް ދަބަހުގެ ވާގަނޑުގައި ހިފާ ބާރުކޮށްލައިގެން ހުރެ ކެފޭގެ ދޮރުމައްޗަށް މަޑުކޮށްލިގޮތަށް އޭނަ ހިމޭންވެފައި ވީ މަގުމައްޗަށް ނަޒަރެއްދިންގޮތަށް މޫނު އުފުލާލަމުން ހާމައަށް އޮތް އުޑަށް ބަލާލިއެވެ. ބޯވިލާތަކުން އުޑުމަތި ފޮރުވެމުންދިޔަވަރަކަށް ދުނިޔެމަތީގައިވީ އަނދިރިކަން ފުންވަމުންދިޔަގޮތުން އޭނަ ޖެހިލުންވާގޮތް ވިއެވެ. ޖެހެމުންދިޔަ ވައިރޯޅިތަކާއިއެކު ގަސްތަކުގެ ފަތްތައް ހިރިލާގޮތުންވެސް އޭނަ މޭޖެހިގެން ހިނގައިދާނެ ކަހަލައެވެ

އިރުކޮޅެއްވާންދެން މޫސުން ދެކެން ހުރެފައި ޔުމްނު ކުރިއަށް ހިނގައިގަތުމާއިއެކު ފަހަތުން ގާތްވެގެން އައި ފިޔަވަޅު ތަކުގެ އަޑާއިއެކު އޭނަގެ ހިތްހަމައެއްލަމައެއްނެތި ތެޅިގަނެގެންނެވެ. އޭނަގެ ފިޔަވަޅުތަކަށް އައި ހުއްޓުމާއިއެކު ފަހަތުން އެޅެމުން އައި ހިޔަނީގެ އަނދިރިކަން ގާތްވެގެން އައުމާއިއެކު އޭނައަށް އަމިއްލަ ދިފާއުގައި އަތުގައި އޮތް އަތްދަބަސް ވައިގެ ތެރޭގައި ހޫރާލެވުނެވެ. އެވަގުތު ނުހަނު ހުށިޔާރު ކަމާއިއެކު އެ ޒުވާނަކު އޭނަގެ އަތްދަަބަހުގައި ހިފަހެއްޓިގޮތުން ޔުމްނުއަށް ވަގުތުން ދަބަަސް ފޮޅާލެވުނުއިރު ފަހަތަށް ފިޔަވަޅެއް އަޅާލެވުނެވެ.

“ސޮރީ…” ކަންފަތުގައި ޖެހިގެންދިޔަ އަޑަށް ޔުމްނުއަށް އެސްފިޔަތަކަށް ދޫކަމެއްދެމުން ލަސްލަހުން ލޯ ހުޅުވާލެވުނެވެ. އޭރު އޭނައާއި ތިންފޫޓެއްހާ ދުރުގައި ހިޒްޔާން ހުއްޓިލައިގެން ހުރީ އެއްއަތުން އޭނަގެ އަތްދަބަސް ދިއްކޮށްލައިގެންނެވެ. އެއްފަހަރު ހިޒްޔާންއަށް ނަޒަރެއްދެމުން ޔުމްނުއަށް އަތްދަބަހާއި ދިމާލަށް ބަލާލެވުނެވެ.

“ތިގޮތަށް އަހަންނާއި ދިމާލަށް ނުބަލަފާނަންތަ؟ އަަހަރެންނަކީ ތިހީކުރާހާ ނުބައި މީހެއްނޫނޭ… އިނގޭ ކުރީ ދުވަހަކު ކަންތައްކުރެވުނުގޮތުން ނުބައި މާނައެއް ނެގިދާނެކަން… އެކަމާއި މައާފަށް އެދެން އަހަރެން ބޭނުން… އަންހެންކުދިންނާއި ހަނގާކުރަމުން ދުވާހާ ނުބައި މީހެއްނޫން އަހަންނަކީ…” ޔުމްނުގެ މޫނަށް ބަލަހައްޓައިގެން ހުރެ ޖިންްސްގެ ޖީބަށް އަތް ޖަހާލެވުނުއިރު އެބޮޑު ދެލޯފުރާލާފައިވީ ސިހުމާއި ބިރުވެރި ކަމުގެ ކުލަވަރުތަކުން ހިޒްޔާންއަށް އުނދަގޫވާގޮތްވިއެވެ. އެއީ މީވީހާތަަނަށްވެސް އެހެން މީހަކު އޭނައަށް ހަދިޔާ ނުކުރާފަދަ ނަޒަރެކެވެ. ޔުމްނު ބިރުގަންނަވައި އެ ހިތް ސިހުވާކަމަށް އޭނަ ބޭނުމެއްނުވެއެވެ. ނަމަވެސް ފާޅުގައި ޔުމްނުއާއި ކުރިމަތިލައިފިނަމަ ކާމިޔާބުނުވާނެކަން އޭނައަށް މިވޭތުވެގެންދިޔަ ދުވަސްތަކުގައި އިނގިފައިވެއެވެ.

“އަހަރެން ހަމައެކަނި ބޭނުންވާކަމަކީ އަހަރެމެންގެ ދެމެދުގައި އެކުވެރިކަމުގެ ގުޅުމެއް އޮންނަން…” ހިޒްޔާން ކުރިއަށް ފިޔަަވަޅެއްއަޅާލަމުން އަތްދަބަސް ދިއްކޮށްލުމާއިއެކުވެސް ޔުމްނުއަށް ބަލަހައްޓައިގެން ހުރެވުނީ ކުރިއަށް ފިޔަވަޅެއް ނަގަން ނުކެރިފައިހުރިކަހަލަގޮތަަކަށެވެ. އިރުކޮޅެއްވާންދެން ހިޒްޔާންގެ ހަރަކާތްތަކަށް ދެނެގަންނަކަަހަލަގޮތަކަށް ހުރެފައި ޔުމްނު ލަސްލަހުން ކުރިއަށް ފިޔަވަޅެއް އަޅާލިއެވެ. މަޑުމަޑުން ހިޒްޔާންއާއި ދިމާލަށް ދަމާލި އަތްތިލައިން ދަބަހުގެ އެއްކޮޅުގައި ހިފައިގާތަށް ދަމައިގަތުމާއިއެކު ހިޒްޔާންއަށް ޔުމްނުގެ އަތްތިލައާއި ދިމާލަށް ނަޒަރެއްދެވުނެވެ. އެވަގުތު އަވަސް ހަރަކާތަކާއިއެކު އޭނައަށް ޔުމްނުގެ އަތްތިލައިގައި ހިފާ އޭނަގެ ގާތަށް ދަމާލެވުނުގޮތެއްވެސް ނޭނގުނެވެ.

“މީ ކިހިނެތްވެފައި؟” ޔުމްނުގެ އަތްތިލައިގައި ނޫފައިގަނެފައި ހުރި ޒަޙަމްތައް ފެނުމާއިއެކު ހިޒްޔާންގެ ދޫމައްޗަށް އެ ސުވާލުތައް އައީ އޭނައަށްވެސް އިނގުމަކާއިވެސް ނުލައެވެ. ހިނދުކޮޅަކަށްވެސް އެދެމެދުގައިވީ ދުރުހިލޭކަމުގެ މަތީން އޭނަ ހަނދާންނެތިގެންދިޔަކަހަލައެވެ. އެދެމެދުގައިވީ ދުރުމިން ހަނދާން ނައްތާލަމުން އޭނައަށް ޔުމްނުގެ މޫނަށް ބަލާލެވުނީ ފުރަތަމަ ފަހަރަށް ޔުމްނުގެ ފަރާތުން ޖަވާބަކަށް ކެތްމަދުވެފައިހުރެއެވެ.

“ޔުމްނު…” ހިމޭންކަމުގައި ވަގުތައް ދެމިގެންދާންފެށުމާއިއެކު ކެތްތެރިކަން ކޮޅުންލަމުންދިޔަ ހިޒްޔާންގެ އަޑުބޭރުވެގެން ދިޔައިރު އެއަޑުގައި ހަރުކަށިކަންވިއެވެ. ކަންފަތްދޮށުގައި އެއަޑު ތަކުރާރުވެގެންދިޔުމާއިއެކު ޔުމްނުއަށް ހިޒްޔާންގެ މޫނަށް ބަލާލެވުނީ ސިހިފައެވެ. އެހާ ޔަޤީންކަމާއިއެކު ހިޒްޔާން އޭނަގެ ނަން ކިޔާލީތީ ހައިރާންކަމާއި އެއްވަރަަށް ޖެހިލުންވެފައި ހުރެެއެވެ. އެވަގުތު ހިޒްޔާންގެ އަތުގެތެރޭގައި އޮތް އޭނަގެ އަތްތިލައަށް ބާރުވެގެން އައިކަން އިހުސާސްކުރެވިގެން ދިޔުމާއިއެކު އެއަތުގެ ބާރުގެ ދަށުން ސަލާމަތްވުމަށް ޔުމްނުއަށް ތެޅިގަނެވުނެވެ. ހަށިގަނޑުގެ ކޮންމެ ގުނަވަނަކަށް އިހުސާސް ކުރެވިގެންދިޔަ ބިރުގެ ގަދަަފަދަ އިހުސާސާއިއެކު ކަރުނުން ފުރެމުންދިޔަ ލޮލުން އޭނައަށް އިސްއުފުލާ ބަލާލެވުނުއިރު ހިޒްޔާން ރީތި މޫނު ފެނުނީ ނުރައްކާތެރިކަމުގެ އިންޒާރުދޭހާ ގާތުންނެވެ. އެހަށިގަނޑުން ދޫކުރަމުންދާ ނޭވާތަކުގެ ހޫނުކަން ކޯތާފަތަށް އިހުސާސްކުރެވިގެންދިޔުމާއިއެކު ޔުމްނުއަށް ނޭވާލާންވެސް ހަނދާންނެތުނުކަހަަލައެވެ. އެ މޫނުގައިވީ ފިޔާތޮށިކަން ކެނޑި ހުދުވަމުންދިޔަވަރަކަށް ތުރުތުރުލުންތައް އެކުލެވެމުންދިޔަ ތުންފަތަށް ހިޒްޔާންގެ ތޫނު ލޮލުގެ ނަޒަރު ހުއްޓިގެންދިޔުމާއިއެކު އޭނަގެ ސިކުނޑި ރަންގުވެގެންދިޔަފަދައެވެ. އޭނަގެ ހަރުކަށި އުސޫލުތަކާއި ދުނިޔެމަތީން ހަނދާންނެތި ޝައިތާނާގެ އަވައިގައި ބެހިގެންދިޔަ ހިނދުކޮޅެކެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.