ހިތް އެދެ ޔާރާ ތިއޭ – 34

“ކޮ..ކޮން ދެކުދިންނެއް..” މައިރީން އަޅައަޅައިގަންނަމުން އެއްސެވެ. “ދަރިފުޅާ ކައިލްއާއެއްނުން..” ރިޔާޒްގެ ޖުމުލައިން ދެލޯ ބޮޑުކޮށްލާފައި ބިރެއް ފެނުނުހެން މައިރީންއަށް ކައިލްއާއި ދިމާލަށް ބަލައިލެވުނެވެ. މައިރީންގެ މޫނަށް އަރައި ފޭބި ކުލަވަރުން ކައިލްއަށް އޭނަގެ ހިނިގަނޑު ހިފަހައްޓާލަން މަޖުބޫރުވިއެވެ.

***ޕާޓް 34***

މައިރީންގެ އަތުގައި ހިފާ ރިޔާޒް އެތާ ހުރި ގޮޑީގައި ބޭންދިއެވެ. މައިރީންގެ ކައިރީގައި ކައިލް އިށީނދުނުއިރު، ކައިލް ހުރީ ހިނިގަނޑު ހިފައްޓައިލައިގެންނެވެ. މައިރީންގެ މޫނު ރަތްކަމުން ޗެރީކޮޅެއް ފަދައެވެ. ކައިލްއާއި ދިމާލަށް އޭނަގެ ވާން އުޅޭ ފިރިމީހާއަށް ކުރާނެ ގޯނަތަށް ކިޔައިދެވުމުން، މައިރީން ހުރީ ދެވަނަ ފަހަރަށް އިސްއުފުލައިލާ ބަލައިލަންވެސް ނުކެރިފައެވެ. މިހެން ކަންތައް ވެދާނެކަމަކަށް ދުވަހަކުވެސް އޭނަ ހިޔެއް ނުކުރެއެވެ. ލަދުން ބިންފަޅާފަ އަޑިއަށް ދެވޭނެ ނަމައޭ މައިރީންގެ ހިތަށް އެރިއެވެ. މައިރީންގެ ކޮލަށް ޖަންބުކުލައަރައިފައިވި ގޮތުން ހީވަނީ މޭކަޕް ކުރާ ފިހިން ރަތްކުލަ ގަދަ ބްލަޝްއެއް ކޯތާފަތުގައި ޖައްސާލާފައި ހުރިހެންނެވެ. ކައިވެނީގެ ޚުތުބާ ކިޔަން ފެށުމުން ކައިލް ޙުތުބާއަށް ސަމާލުކަންދިނެވެ. “އަނބި ގަބޫލުކޮށްފިން” ކައިލް ގާތު އަނބި ގަބޫލުކޮށްފިންތޯ ގާޒީ ސުވާލުކުރުމުން ކައިލް ޖަވާބުދިނެވެ.

މައިރީންގެ ހަށިގަނޑަށް ފިނިގަނޑެއް އަރައިގެންފަދަ އިހްސާސެއްކުރެވުނެވެ. މިހާރު އޭނައަކީ މީހެއްގެ އަނބެކެވެ. އެއީ އަދި ކޮންމެ ކޮންމެ މީހެއް ނޫނެވެ. މައިރީންއަކީ ކައިލްގެ ހަލާލު އަނބިމީހާއެވެ. މައިރީންގެ ކުރީގެ އެންމެ ގާތް އެކުވެރިޔާގެ ބޭބެގެއެވެ. ކިޔާރާއަށް މިދުވަސް ފެނުމުން އުފާވާނެވަރު މައިރީންއަށް އިހްސާސް ކުރެވުނެވެ. އެހެންނަމަވެސް ކިޔާރާއަކަށް އެ ނަސީބެއް ނުލިބުނެވެ. އޭނަގެ އާއިލާ އަދި ލޯބިވާ ދޮންބެއަކަށްވެސް އެ ނަސީބެއް ނުލިބުނެވެ. ސަބަބަކީ މައިރީން ވަނީ ނުރައްކާތެރި އަނދަވަޅަކަށް ވެއްޓިފައެވެ. މައިރީންއަށް ހިޔާލުތަކުން ނިކުމެވުނީ އޭނަގެ އަތުގައި ކައިލް ހިފައިލުމުންނެވެ.

ކައިލް އެއްމިޔަކަނުން ހީލާފައި ބަލައިލިއެވެ. އެ ތޫނު ދެލޮލުގައިވަނީ ލާނެތްކަމުގެ ވިދުވަރެވެ. މައިރީން ލޯއަޅައިލުމުން ކައިލްގެ ހިނިތުންވުން ފުޅާވެގެން ދިޔައެވެ. ކައިވެނިކޮށްދިނުމަށްފަހު ގާޒީ އެތަން ދޫކޮށްފައި ދިޔައެވެ. ދެމަފިރިންނަށް ހާއްސަ އުނދޯއްޔެއް އެތާ ވަނީ ހަރުކުރެވިފައެވެ. އުނދޯލީގެ ވާކޮޅުގައި މަޑު ދަނބުކުލައިގެ ފެއާރީ ލައިޓްސްގެ އިތުރުން ޓޫލިޕް މާތަކެއްވެސް ވަނީ ހަރުކުރެވިފައެވެ. މަޑު ދަނބުކުލައިގެ ފަޑު އަލިން ދެމަފިރިން ފެންނަނީ ޖާދޫވި ގޮތަކަށްށެވެ. ކައިލް މައިރީންގެ ގަޑުފެންފޮދެއްހައި ފިނި އަތުގައި ހިފައިގެން އެ އުނދޯލީގައި އިށީނެވެ. ވަލީމާއަށް ދައުވަތު ދެވިގެން ވަޑައިގެން ބޭފުޅުން ދެމަފިރިންނާ ސަލާމް ކުރުމަށްފަހު ހަދިޔާދިނެވެ. ދެމަފިރިންގެ ފޮޓޯ ކައިވެނީގެ ހަފްލާގައި ބައިވެރިވި މީހުން ނެގުން ރިޔާޒްވަނީ މަނާކޮށްފައެވެ. ސަބަބަކަށްވީ އެ ފޮޓޯތަށް ނުބައި މީހެއްގެ އަތަށް އަރައިފާނެކަމުގެ ބިރު އޮތުމެވެ.

މައިރީން އިނީ ކައިލްއާއި ޖެހި ފިތިގެން އިންނަންވުމުން އުނދަގޫވެފައެވެ. “ވެޑިން ޑްރެސް ރީތިތަ؟” މައިރީންގެ ކަންފަތާ އަނގަ ކައިރިކޮށްލަމުން ކައިލް އަހައިލިއެވެ. މައިރީން ތުންފަތުގައި ދަތްއަޅައިލިއެވެ. އިސްޖަހައިގެން ވާހަކަ ނުދައްކަން ނަދުރުބުނެގެންއިން ފަދައިން އޭނަ އިނެވެ. “އަހަރެންނަށް އެނގޭ ރީތިވާނެކަން.. މިކަހަލަ ކުއްލި ކައިވެންޏަކަށްވިޔަސް ޓައިނީ ބޭނުންވާނެހެން ހީވާ ގޮތަށް އަހަރެން މިއޮތީ މިތަން ޑެކަރޭޓްކޮށްފަވެސް..” ކައިލް ފުންނޭވާއެއް ދޫކޮށްލަމުން ބުނެލިއެވެ. “ކައިލް އެހާ މައިދެކެ ހޭޓް ކުރާއިރު ކީއްވެ ތިގޮތަށް ކަންތައްކުރަނީތި؟ ކީއްވެ މައިއާ މެރީ ކުރީ..” މައިރީން އެހެން މީހުންނަށް އަޑު ނީވޭހައި މަޑުން އަހައިލިއެވެ.

“އެއީ އަހަރެންނަކީ ވިލެންއަކަށް ވީމަ.. އެއީ އޭރުން އަހަރެންނަށް ޓައިނީ ކޮންޓްރޯލް ކުރަން ފަސޭހަވާނެނެތީ..” އަޑަށް ބަރުކަމެއް ގެންނަމުން ކައިލް ބުންޏެވެ. މައިރީންގެ ދެލޯ ބޮޑުވިއެވެ. ކައިލް މައިރީންގެ ބޮޑު ދެލޮލަށް ބަލަން ހުރެފައި ހިނިގަނޑެއް ޖަހައިލިއެވެ. “ތިހާ ވަރަށް ދެލޯ ބޮޑުކުރަންޏާ އައި ސޮކެޓްއިން ވެއްޓިދާނެ..” ހިނިއައިސްފައި ކައިލް ބުންޏެވެ. “ޔޫ އާރ ނޮޓް ފަނީ..” މައިރީން މޫނު ކުނިކޮށްލަމުން ބުންޏެވެ. “އައި ނޯ ރައިޓް.. އައިމް ހިލޭރިޔަސް..” ކައިލް ހިނިގަނޑެއް ޖަހައިލިއެވެ. “ޓައިނީއަށް އެނގޭތަ ކައިވެނި ކުރާ ކަޕްލްސް ތިބޭނީ މީހުންނާ ގްރީޓް ކުރަން ކޮޅަށް.. އެކަމް އަހަރެން ކިހާ ރަނގަޅު.. ޓައިނީގެ ފަޔަށް ތަދުދާނެނެތީ އަހަރެން އުނދޯއްޔެއް ގެނައީ.. އޭރުން މިރޭ ފައި ވަރުބަލިވާ ވާހަކައެއް ނުބުނެވޭނެއެއްނުން ބެޑްރޫމް އެކްޓިވިޓީޒް ފަށަން އުޅޭއިރު..” ލާނެތް ގޮތަކަށް ހިނިއައިސްފައި އިނދެ ކައިލް ބުނެލިއެވެ.

ކައިލްގެ ޖުމުލަޔާއިއެކު މައިރީން މޫނު ކުރިއަށްވުރެ ރަތްވެގެން ދިޔައެވެ. މައިރީން ވަގުތުން ދުރުބަލައިލިއެވެ. ކައިވެނީގެ ހަފްލާގަެ ބައިވެރިން އެތަން ދޫކޮށް ދާން ފެށުމުން ދެމަފިރިން ފޮޓޯ ނަގަން ފޮޓޯގްރަފާއެއް ރިޔާޒް ގެނައެވެ. “ވަރަށް ލޯބިކޮށް ދެމީހުން ދެމީހުންގެ ލޮލަށް ބަލަން ތިބެބާ” އީލާއު ބުނެލިއެވެ. ލަދުގަނެފައި ހުރިވަރުން މައިރީންއަށް ކައިލްގެ ދެލޮލަށް ބަލަން އުނދަގޫވިއެވެ. ކައިލްއަށް އެކަންވެސްވީ މަޖާ ކަމަކަށްށެވެ. ޕާޓީ ނިމުމުން ރިޔާޒް މައިރީންއާ ވާހަކަ ދައްކަން ދުރަށް ގެންދިޔައެވެ. ޝިޔާމާއާ ވީޑިއޯކޯލް ހަދައިގެން ރިޔާޒް މައިރީންއަށް ނަސޭހަތްދިނެވެ. މައިރީން ހުރީ ފެންކަޅިވެފައެވެ. ގަދަކަމުން ކައިވެނި ކުރުވުމުން މައިރީންގެ ހިތުގައި އެ ޝަކުވާވިއެވެ. އެހެންނަމަވެސް އެ ޝަކުވާ ދުލާއި ހަމައަށް ގެންނަން މައިރީންއަށް ނުކުޅެދުނެވެ.

ދަންވާން ފެށުމުން މައިރީންގެ އަތުގައި ހިފައިގެން ކައިލް ގެއަށް ވަދުނެވެ. ކައިލް އޭނަގެ ކޮޓަރިއަށް މައިރީން ގޮވައިގެން ވަދުނެވެ. އެނދުމަތިވަނީ ލެވެންޑާމަލުގެ ފިޔަތަކުން ހިތެއް އަޅާލާފައެވެ. ލެވެންޑާމަލުގެ ވަހުން މުޅި ކޮޓަރިވަނީ އެއްވަސްކޮށްފައެވެ. ދަނބުކުލައިގެ އެކި ޝޭޑްތަކުގެ ފެއާރީ ލައިޓްސްއިންވަނީ ކޮޓަރިތެރެއަށް ފަނޑު އަލިކަމެއް ވެރިވެފައިވެއެވެ. މައިރީން ހުރީ ތުންފިއްތާލައިގެންނެވެ. ކޮޓަރިއަށް ވަދެވުމާއެކު ކުއްލިއެއް ޖަހައި އޭނަގެ އަތް ކައިލްގެ އަތުން މިނިވަންކޮށްލިއެވެ. އަދި އަވަސް އަވަހަށް ތުވާލި ހިފައިގެން ފާހަނައަށް ވަދުނެވެ. މައިރީންގެ އަމަލުން ކައިލްއަށް މާ ބޮޑު ސިހުމެއް ނުލިބުނެވެ. ކަންތައް ވާނީ އެހެންކަން އޭނައަށް ކުރިންވެސް އެނގޭ ފަދައެވެ. ދެލޮލުން ހޯސްލާފައި ކަރުނަތަށް ފައިބަމުން ދިޔައިރު މައިރީން ދިޔައީ ޝޯލްގައި ޖަހާފައި ހުރި ޕިންތައް ނައްޓަމުންނެވެ.

މައިރީންގެ ހިތްވަނީ ޝަކުވާއިން ފުރި ބާރުވެފައެވެ. މައިރީންއަށް އޭނަގެ މައިންބަފައިންގެ ކައިރިން އިހްސާސްވަނީ ހާސްކަމެވެ. ކޮށީގައި ބަންދުކޮށްފައިވާ ދޫންޏަކަށް ކުރެވޭނެފަދަ އިހްސާސެކެވެ. އޭނަ ބޮޑުވެގެންއައިއިރު އޭނަގެ ހަޔާތުގެ ހުރިޙާ ނިންމުމެއް ފަދައިން ނިންމަމުން ދިޔައީ އޭނަގެ މައިންބަފައިންނެވެ. އެންމެފަހުން ހަޔާތުގެ ބައިވެރިޔާވެސް ހަމަޖެއްސީ އޭނަގެ މައިންބަފައިންނެވެ. މައިރީންގެ ގިސްލުމުގެ އަޑުއިވުމުން ކައިލް ދޮރުގައި ޓަކި ޖަހައިލިއެވެ. “ޓައިނީ.. ރޮނީތަ؟ ހޭ ދޮރު ހުޅުވަބަލަ..” ތަޅު ހުޅުވަން މަސައްކަތް ކުރަމުން ކައިލް ބުންޏެވެ.

“ގޯ އަވޭ އައިމް ފައިން..” މައިރީން އަނގަމަތީގައި އަތް އަޅަމުން ބުންޏެވެ. ކައިލް ފުންނޭވާއެއްލުމަށްފަހު އެނދުމަތީގައި ހުރި ފިޔަތައް ކޮޓަރީގެ އެއްކަނަކަށް އަޅައިލިއެވެ. މައިރީން ހަދަނީ ކަނޑައެޅިގެން ދޮގުކަން ކައިލްއަށް އެނގެއެވެ. އަނެއްކާ މައިރީންގެ ބައްޕަ އެއްޗެކޭ ބުނީބާއޭ ކައިލްގެ ހިތަށް އެރިއެވެ. ހެދުމުގެ ފަހަތުގައިއިން ޒިބު ނުދެމިގެން މައިރީން ހާސްވާން ފެށިއެވެ. މައިރީން ފާހަނައިގަ ހުންނަތާ ގަޑިއިރަކަށްވުރެ އިތުރުވުމުން ކައިލް އަނެއްކާ ޓަކިޖަހަން ފެށިއެވެ. “ޓައިނީ ދޮރުހުޅުވަބަލަ.. އަހަރެން ކަމެއްކޮށްފާނެކަމަށް ތިތާ ފިލާ ހުރިއްޔާ ބުނެލަން.. އަހަރެން ޓައިނީގެ ހަށިގަނޑަކު އިނގިލިކުރިވެސް ޖައްސާނުލާނަން ޓައިނީގެ ނުރުހުމުގަ އައި ޕްރޮމިސް..” ކައިލް ހުވާ ކުރިއެވެ.

ފާހަނައިގައި ހުރި މައިރީންގެ ހިތަށް ކުޑަ ހަމަޖެހުމެއް ލިބުނެވެ. މައިރީން ހުރީ ކައިލްއަށް ނިދެންދެން ފާހަނައިގަ ފިލާ ހުންނަން އަޒުމް ކަނޑައަޅައިގެންނެވެ. އެހެންނަމަވެސް ކައިލް ޔަގީންކަން ދިނުމުން މައިރީން ނިކުތުނެވެ. “އަދިވެސް ތި ހެދުމުގަ؟؟ ފާހަނައިގަ މިއޮތް ހުރިހާއިރު ކީއްތަ ކުރީ؟؟” ހައިރާންވެފަ ސުވާލުގެ ރާގަކަށް ކައިލް އެއްސެވެ. “ޒިބު ނުދެމުނީ..” ކުރެހިފައިވި އަޑަކުން މައިރީން ބުނެލިއެވެ. “ދެން އެހެންވެގެން ގަޑިއިރެއް ވަންދެން އެތާ ހުރެ ރުއީ ޕިސްޕިސް.. އެކަމަކުވާ ދޯ…” ކައިލް ނިތްކުރީގައި ފިރުމާލަމުން ބުންޏެވެ. އަދި މައިރީން ކޮނޑުގައި ހިފައި ފަހަތަށް އަނބުރައިލުމަށްފަހު ޒިބު ތިރިއަށް ދަމައިލިއެވެ. “އެންމެ ވިހި މިނެޓް ދޭނީ.. މައިރިން ނުނުކުތިއްޔާ މައިރީންއާ އެއްކޮށް އަހަރެން ފެންވަރާނީ..” އިންޒާރުގެ ރާގަކަށް ކައިލް ބުންޏެވެ.

މައިރީންގެ މޫނު ލަދުން ރަތްވިއެވެ. އަވަސް އަވަހަށް ފާހަނައަށް ދެމިގަނެ ތަޅުލިއެވެ. “އަހަރެން އަތުގަ ފާހަނައިގެ ތަޅުދަނޑި އެބަ އޮތް.. ވިހި މިނެޓް އަވަސް ކުރޭ..” ކައިލް ބުނެލިއެވެ. މައިރީން ކުދިކިޔަމުން އަވަސްއަވަހަށް ފެންވަރައިލިއެވެ. ކައިލް އޭނަ ލައިގެން ހުރި ގަމީހުގެ ގޮށްތައް ނައްޓާލައި ގަމީހާއި ފަޓުލޫނު ބާލައި އުނުގައި ތުވާލި އައްސައިލިއެވެ. ފެންވަރައި ނިމުމުން ހަށިގަނޑު ތުވާލިން ހިއްކުމަށްފަހު، ހެދުންލާން ބެލިއިރު މައިރީންއަށް ނިދަންލާނެ އެއްޗެއް ނުގެނެވުންކަން ހަނދާންވިއެވެ. މައިރީންގެ މޫނަށް ހޫނުކަމެއްވެރިވިއެވެ. މިހާރު ވިހި މިނެޓް ހިގަން ގިނައިރެއް ނުހުންނާނެކަން އޭނައަށް އެނގެއެވެ.

މޫނުދޮންނަ ތަށި ގާތު ހުރި ޕާރިސަލް ފެނި މައިރީން އޭތި ހުޅުވައިލިއެވެ. “ޑޭމް އިޓް..” އޭގެ އެތެރޭގައި އޮތް އެތި ފެނި މައިރީންއަށް ބުނެވުނެވެ. ދަނބުކުލައިގެ އެ ނިދާ ހެދުމުން އޭނަގެ ހަށިގަނޑު ފޮރުވޭނީ ތުވާލިން ފޮރުވޭ މިންވަރަށްށެވެ. އިތުރު ގޮތެއް ނެތުމުން މައިރީން އެ ހެދުންލިއެވެ. އެ ނިދާ ހެދުމުގެ ކަރު ހުރީ ‘ވީނެކް’އެއް ފަދައިންނެވެ. ކިރިޔާ ކޮނޑު ފޮރުވޭފަދަ ލޭސް އަތެކެވެ. މޭގެ ތިރިއަށް ރޫޖައްސާލާފައިވީއިރު އެ ހެދުންކޮޅު ކިރިޔާ ފަލަމަސްގަނޑުގެ މެދާއި ހަމައަށް އަރާކަމެވެ. މައިރީން ސިއްސައިގެން ދިޔައީ ފާހަނައަށް ކައިލް ދެމިގަތުމުންނެވެ.

މައިރިންއަށް ހަޅޭއްލަވައިގަނެވުނެވެ. ކައިލް ހުރީ އުނުގައި ތުވާލިއައްސާލައިގެންނެވެ. މައިރީން އަވަސް އަވަހަށް ތުވާލިން އޭނަގެ ހަށިގަނޑު ފޮރުވޭވަރަކަށް ފޮރުވައިލިއެވެ. ކައިލްގެ ކަތި ނަޒަރު މައިރީންގެ ލޫޅާފަތި ހަށިގަނޑަށް ދަތުރުކޮށްލިއިރު އޭނަގެ ހިއްސުތައް ހޭލަން ފެށިއެވެ. “އަހަރެން ކޮންޓްރޯލުން ނައްޓާތޯތަ ތިކަހަލަ އެއްޗެއް ލައިގެން ތި ހުރީ..” ކައިލް ނޭވާ ހިފައްޓާލަމުން ބުނެލިއެވެ. މައިރީން އަވަސް އަވަހަށް ބޯހޫރުވައިލާފައި ފާހަނައިން ނިކުންނަން ދުއްވައިގަތެވެ. އެހެންނަމަވެސް ދޮރުގައި އަޅާގަނެފައި މައިރީންގެ ތުވާލި ވެއްޓުނެވެ. ކައިލް ދޮރުލައްޕާލީ މައިރީންއަށް ކުރެވުނު ހުވާ ބާތިލް ކުރެވި ދާނޭކަމުގެ ބިރު ހީވުމުންނެވެ.

ހިތް އަވަސްވެފައި ހުރެ މައިރީން އަލަމާރިން ކައިލްގެ އަތްދިގު ހޫޑީއަކާއި ސްވެޓްޕޭންޓެއް ނެގުމަށްފަހުލިޔެވެ. ކައިލްގެ ހޫޑީ ދިގުކަމުން، މައިރީން އެ ހޫޑީލުމުން މައިރީންގެ ކަކުލާއި ހަމައަށް އޭތި ނާރަނީ ކިރިޔާއެވެ. ސްޕެޓްޕޭންޓްސްވެސް ބޮޑުކަމުން މައިރީންގެ އުނަގަނޑުގައި ހަރުވެސްނުލިއެވެ. ނަމަވެސް އެއަށް ބެލުމެއް ނެތި ކައިލް ނުކުތުމުގެ ކުރިން މައިރީން އެނދަށްއަރާ އޮށޯތެވެ. ކައިލް ފެންވަރައިލައިގެން ފާހަނައިން ނުކުތުނެވެ. އެއާއެކު މުޅި ކޮޓަރިން ލެމަންގްރާސް ޝަވާޖެލްގެ މީރުވަސް ދުވަން ފެށިއެވެ.

މައިރީންގެ މޫނުން މައިރީން ރޮއެފައި ހުރިކަން ކައިލްއަށް އެނގުނެވެ. އަދި މައިރީން އޮތީ ނިދާފައި ނޫންކަންވެސް ކައިލްއަށް އެނގުނެވެ. އެހެންނަމަވެސް އެޔަށް ކައިލް މާ ބޮޑު ސަމާލުކަމެއް ނުދިނެވެ. “ކައިވެންޏަށް ސައުވީސް ގަޑިއިރު ނުވަނީސް މަގޭ ހޫޑީކޮޅު ވަގަށް ނެގިއްޔޭ.. ޕިސް މިއަންހެންވެރިންގެ އަލަމާރިފުރާ ހެދުން އޮތަކަސް ހަމަ އަހަރުންގެ އެއްޗެހި ނޫނީ ނޭނގޭނެ ނަގާކަށް..” މައިރީންއަށް އަޑުއިވޭ ވަރަށް މައިރީން ހެއްވައިލުމުގެ ގޮތުން ކައިލް ބުނެލިއެވެ. ނިދާ ކަމަށް ހެދިގެން އޮތް މައިރީންގެ ތުންފަތަށް ކުޑަ ހިނިތުންވުމެއްވެރިވުމުން ކައިލް ހީލިއެވެ. އަދި ސޯފާގައި ބާލީހަކާއި ރަޖާގަނޑެއް ހިފައިގެން އޮށޯތެވެ. މައިރީންގެ ނުރުހުމުގައި ކައިލް އެއީ އޭނަގެ އެނދަކަސް އޮންނާކަށް ބޭނުމެއްނުވިއެވެ.

ނިދަން އޮށޯއްވެ އޮތް އަލިޝްކާގެ ދެލޮލުގައި ނިދީގެކަންފުޅެއްވެސްނެތެވެ. އަތުގައި އޮތް ފޮޓޯގަނޑަށް ބަލަން އޮތް އިރު އަލިޝްކާގެ ދެލޮލުން ހޯސްލާފައި އަންނަމުންދިޔަ ކަރުނައިގެ މުތީތައް ކޯތާފަތުގައި ބީހިލާފައި ބާލީހަށް ވެއްޓެމުން ދިޔައެވެ. “ދޮންތިއަކަށް ޔާޝް ސަލާމަތެއް ނުކުރެވުނު.. އައިމް ސޯ ސޮރީ..” ގިސްލަމުން އަލިޝްކާ ބުންޏެވެ. އެވަގުތު ބޭރު ދޮރުހުޅުވާލައިފައި މީހަކު ގެއަށް ވަދުނު އަޑުއިވުމުން، އަލިޝްކާގެ ހިތް ބިރުވެރި ގޮތަކަށް ތެޅިގަތެވެ. ކޮޓަރީގައި ހުރި ފިހިގަނޑު ނަގައިގެން ކޮޓަރިން ނުކުތުނެވެ. ސިޓިންރޫމްގެ ބޮކި ދިއްލުމުން އެތަން އަލިވެގެން ދިޔައެވެ. ސޯފާގައި އިށީނދެގެންއިން މީހާ ފެނި އަލިޝްކާގެ ދެބުމަ ގޮށްޖެހުނެވެ. “އައިދިން؟” އަލިޝްކާއަށް ގޮވައިލެވުނެވެ. އައިދިން ވަރުބަލި ގޮތަކަށް އިސްއުފުލައިލާ ބަލައިލިއެވެ. “މިހާރު ކާކު މަރާފަ މަގޭ ކައިރިއަށް ތިއައީ؟” ރުޅިވެރި ރާގަކަށް އަލިޝްކާ އަހައިލިއެވެ.

(ނުނިމޭ)

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.