އަބަދުވޭ ހިތުގާ މަގޭ 4

“ތިއީތަ ލޯތްބަކީ؟ ލޯތްބަކީ ހިލިހިލާ ތަ؟ މަ ނުދެކެން ޝިވާ މިގެއަށް ވައިން ފަހުން އެ ހިލިހިލާ އޭނާގެ ފައިގައި ނެތްތަނެއް. މުޅި ހަށިގަނޑުގައި އެހުރީ ލަކުނު. ޝިވާ ރޮއެ ހޭރޭ އަޑު މަށަށްވެސް އިވެޔޭ” ނިކާލްއާއި ނިޔާލްގެ ޒުވާބު ހޫނު ވަމުން ދާތީވެ ޝިވާ ހުރީ ބިރުން ރޫރޫ އަޅާ ހާލުގައެވެ.

(4 ވަނަ ބައި)

“އޭ! ކޮންހާ ހަޅޭކެއްތަ ތިލަވަނީ؟” އެވަގުތު ބަދިގެއަށް ވައިން ޔަލީޝާ ރުޅި އަހިސްފައި އަހާލިއެވެ. “މަންމާ. މަންމައަށް ވެސް އިވޭނެ ޝިވާ ރޯއަޑު. ކީއްވެ ތަ ދޮންބެ ނުހުއްޓުވަނީ؟” ނިކާލަށް ބުނެވުނެވެ.

“ކޮބާތަ މައްސަލައަކީ؟ ނިކާލް މިކަމަށް ބޯ ނުކޮށްޕާ. އެއީ ނިޔާލްގެ އަންހެނުން. ނިޔާލްގެ އަންހެނުންނަށް ކަން ކުރާނީ ކިހިނެތްކަން އެނގޭނީ ވެސް ހަމަ ނިޔާލަށް”

ޔަލީޝާ ތެދުވީ ނިޔާލްއާއި އެއްކޮޅަށެވެ. ކަންވާނީ ވެސް އެހެންކަން ނިކާލަށް އެނގެއެވެ. ނަމަވެސް މިހާރު އެހާލެއްގައި ޝިވާ އުޅޭތާ މިހާރު ކިތަށް އަހަރު ވެއްޖެ ހެއްޔެވެ؟. ކައިވެނީގެ ފުރަތަމަ ރޭން ސުރެ ޝިވާ ވަނީ ނިޔާލްގެ ވަކި ތަކުގެ ޝިކާރައަކަށް ވެފައެވެ. ހަމަ އެކަކުވެސް އަޅާނުލާ ހުންނަންވީ ހެއްޔެވެ؟ ކޮންމެ ގޮތެއްވިޔަސް ނިކާލް މިފަހަރު ރަށަށް އެއައީ ޝިވާ ސަލާމަތް ކުރުމަށް އަޒުމް ކަނޑައަޅައިގެންނެވެ.

ނިދި ނިދި އޮތް ޔީޝާއަށް ހޭލެވުނީ ކައިރީގައި އޮތް ފޯނު ރިންގުވާ އަޑަށެވެ. އާފުރިލާފައި ޔީޝާ ފޯނު ނެގީ ކާކުތޯ ވެސް ބަލާ ނުލައެވެ.

“ޔިޝީ.. ދޮންތި ކިހިނެތް ހަދަންވީ؟” އެކޮޅުން ވާހަކަ ދެއްކީ ޔީޝާގެ ދޮންތަ ޔޫޝާއެވެ. “ކިހިނެތް ވީ؟” ޔޫޝާ ރޮނީކަން އެނގުމުން ޔީޝާ ކޮޅަށް ޖެހުނެވެ. “މިއަދު އަކޫ ދައްކައިފި ކުއްޖަކު ހޯދާ ވާހަކަ. އަޅެ ޔިޝީ. ދޮންތިއަކަށް ނުކެރޭނެ އެވާޙަކަ ދައްކާކަށް” ޔޫޝާ ރޮމުން ވާހަކަ ދެއްކިއެވެ.

“އެކަމަކު ދޮންތީ. ދޮންތިއަށް ވެސް އެނގެޔޭނުން ތިއީ އަބަދުގެ އަބަދަށް ސިއްރު ކުރެވޭނެ ކަމެއް-”

“ފަހުން ގުޅާނަން. އަކޫ އަހިސްފި” ޔީޝާ ވާހަކަ މެދުކަނޑުވާލާފައި ޔޫޝާ ބުނެލިއެވެ. ޔީޝާ “އޯކޭ” އޭ ބުނެލާފައި ފޯނު ބޭއްވިއެވެ.

ކުޅަދާނަ ކަމާއި އެކު ޔޫޝާ ކަރުނަތައް ހިންދާލަމުން މޫނު ފުހެލިއެވެ. އަދި ލުއި ފިޔަވަޅު ތަކެއްގައި ސިޓިންގް ރޫމަށް ނުކުތެވެ. އޭރު އަކްވާން ބޫޓު ބާލަނީއެވެ. “ދޫނި ފެންތައްޓެއް ގެނެސްދީބަ” އަކްވާން ބުނެލިއެވެ. ޔޫޝާ އަވަހަށް ބަދިގެއަށް ވަދެ ފެންތައްޓެއް ހިފައިގެން އައެވެ.

“ކޮބާ ވިސްނައިފިން ތަ؟” ޔޫޝާ ބޮލު އިސްތަށިކޮޅުގައި ފިރުމާލަމުން އަކްވާން އަހާލިއެވެ. އަކްވާން އެދައްކަނީ ކޮން ވާޙަކައެއްކަން ޔޫޝާއަށް ވަރަށް ރަނގަޅަށް އެނގެޔެވެ. ތެދެކެވެ. ހަގީގަތުގައި ވެސް އެދެމަފިރިން މިހާރު ކުއްޖަކު ހޯދަން ވެއްޖެއެވެ. އިނދެގެން އުޅޭތާ 10 އަހަރަށް ވުރެ ގިނަ ދުވަސް ވެއްޖެއެވެ. އެހެނަސް އެ ސިއްރު…؟

“އިކޫ ބޭނުމިއްޔާމުން ހަމަ ޓްރައި ކުރަންވީ. ޔޫޝާއަށް ހަމަ އޯކޭ” ޔޫޝާގެ ޖަވާބު ލިބުމުން އަކްވާން ވަރަށް އުފާވިއެވެ. ޔޫޝާގެ ހަށިގަނޑުގައި ވަރަށް ލޯބިން ބައްދާލިއެވެ.

އިރު އޭގެ ރަންދޯދިތަށް ދުނިޔެއަށް ދައްކާލީ އައު ދުވަސް ފެށުން ކަމަށް އިޢުލާން ކުރަމުންނެވެ. ނިދާފައި ތިބި އެންމެންތައް ހޭލަ މޭލަ ވާން ފެށިއެވެ. އިސްކޯލަށް ދާކުދިން އިސްކޯލަށެވެ. ވަޒީފާއަށް ދާމީހުން ވަޒީފާއަށެވެ. ކޮންމެ މީހަކު ވެސް އެމީހަކު ދާން ޖެހޭ މަންޒިލަށް ދާން ފެށިއެވެ. އައު ދުވަހަކަށް ތައްޔާރު ވެއްޖެއެވެ.

ޖާލީދޮރުގެ ފޮތިގަނޑު ދަމާލުމާއި އެކު އެޅުނު އިރުގެ ރަންދޯދި ތަކުން ނިދިޖެހިފައި އޮތް ޝިވާގެ ދެލޮލަށް އުނދަގޫ ވެލިއެވެ. މަޑު މަޑުން ދެލޯ ހުޅުވާލި އިރު ޝިވާއަށް ފުރަތަމަ ވެސް ފެނުނީ ރުޅި އަހިސް ރަތްވެފައި ހުރި ނިޔާލެވެ.

“އަދިވެސް އޮތީ؟ މަވީ ދެން މިހެން ހުރެ ބަނޑަށް މަރުވާން ތަ؟” ނިޔާލް ހިތްހަމަ ނުޖެހިފައި ހަޅޭ ލަވައިގަތެވެ. ޝިވާ ތުންފިއްތާލާފައި ތެދުވިއެވެ. އެނދާއި ތަންކޮޅެއް ދުރުގައި ރޭގައި ޝިވާ ލައިގެން ހުރި އަންނައުނުތައް ވީދާ، އުކާފައި ހުއްޓެވެ. އެމަންޒަރު ފެނި ޝިވާގެ މުޅި ހަށިގަނޑުން ހީބިހި ނަގައިގަތެވެ.

“އަދިވެސް އިނީ ތަ؟ ތެދުވާށޭ!” ނިޔާލްގެ އަޑު ދިޔައީ ހިނދެއް ހިނދަކަށް ބާރު ވަމުންނެވެ. ހަގީގަތުގައި ޝިވާ އިނީ ނުތެދުވެވިފައެވެ. އެހެނަސް ދަށް ބަނޑުގައި އަތް އަޅައިގެން ޝިވާ ތެދުވެވޭތޯ މަސައްކަތް ފެށިއެވެ. ނަމަވެސް ހިނގައިގަންނާނެހާ ވަރުވެސް އެދެފައިކޮޅުގައި ނެތެވެ. ތެދުވެވުނުހެން ހީނުވެ، ޝިވާ އަނގަވަތަށް ވެއްޓުނެވެ.

“މިދެން ކިހާ ދެރަ ކަމެއް ތަ އޭނ؟ އަބަދު މަށާއި ދިމާލަށް ކިޔާނެ ގައިމު އަނިޔާ ނުކުރާށޭ. މިއީ ނިޔާގެ ހަލާލު އަންހެނުން ނެއްނުން ހޭ؟ ތިއީ މަގޭ އަނބިމީހާ ވިއްޔާ އަންބެއްގެ ވާޖިބު އަދާ ކޮއްބަލަ. އެއްވެސް ފޮތަކު ނޯންނާނެ ފިރިމީހާ ބަނޑަށް ބަހައްޓާށެކޭ ގައިމު”

ޝިވާގެ އުނަގަނޑުގައި ކޮޅުފައިން ތަޅަމުން ނިޔާލް ވާޙަކަ ދެއްކިއެވެ. “ސޮރީ…” ޝިވާއަށް ބުނެވުނެވެ. “އަނެއްކާ ސޮރީ. ކަލޭގެ ތި ސޮރީއަކު އެއްވެސް މާނައެއް ނެތެއްނުން؟” ނިޔާލްގެ ރުޅިގަނޑު ހައްތަހާ ގަދަ ވަމުން ދިޔައެވެ.

“ނިޔާ… ޕްލީޒް.. ޝިވާ ނަގައިދީބަ.. ވަ… ވަރަ..ށް ވަރަށް… ތަދު… ތަދުވޭ އެބަ…” ޝިވާއަށް ކެތް ނުވެގެން އެންމެ ފަހުން އަޑުން އަޑު ނަގާ ރޯން ފެށިއެވެ. އެއަޑަށް ޔަލީޝާ އައިސް ކޮޓަރި ދޮރު ހުޅުވާލިއެވެ.

(ނުނިމޭ)

ފަސްވަނަބައިގެ ތެރެއިން:

“ނިކް. އާދެބަ ވަރަށް އަވަހަށް ސްޓޭޝަނަށް. މީޓިންގެއް ބާއްވާލަން” ރައިޒެލް ބުނެލިއެވެ. މިދަނީކަމަށް ބުނެ ނިކާލް ފޯނު ބާއްވާފައި ނިކުތެވެ. ކޮޓަރިން ނިކުން ނިކާލަށް އެންމެ ފުރަތަމަ ވެސް ފެނުނީ ދަށް ބަނޑުގައި އަތް އަޅައިގެން ހިނގަން އުނދަގޫ ވާތީ އުޅުނު ޝިވާއެވެ.

މިވާހަކައިގެ ދެންއޮތް އެޕިސޯޑުގެ ލިންކު ކޮމެންޓް ސެކްޝަންގެ ތިރީގައި ވާނެއެވެ.